အီတလီနိုင်ငံရှိ နိုင်ငံခြားရေးဝန်ကြီးဌာန website နှင့် မီလန်မြို့ရှိ လေဆိပ်နှစ်ခုတို့၏ website တို့အပါအဝင် ဌာနဆိုင်ရာ website (၁၀) ခုတို့ကို ဟက်ကာများက ဒီဇင်ဘာ ၂၈ ရက်နေ့တွင် ပစ်မှတ်ထား ဝင်ရောက် တိုက်ခိုက်ခဲ့ကြောင်း၊ ၎င်းတို့ကို ခေတ္တဖယ်ရှားခဲ့ ထားကြောင်း အီတလီနိုင်ငံဆိုက်ဘာ လုံခြုံရေး အေဂျင်စီ က ပြောကြားလိုက်ပါသည်။

Distributed Denial of Service (DDoS) အမည်ရှိ ထိုဟက်ကာတိုက်ခိုက်မှုမှာ နှစ်နာရီနီးပါး ကြာမြင့်ခဲ့ပြီး ရုရှားလိုလားသည့် ဟက်ကာအဖွဲ့နှင့် ဆက်နွှယ်မှု ရှိနိုင်ကြောင်း အီတလီဆိုက်ဘာလုံခြုံရေး အေဂျင်စီ ပြောရေးဆိုခွင့်ရှိသူတစ်ဦးက အခိုင်အမာ ပြောကြား လိုက်ပါသည်။ 

ကိုးကား - CNA

တောင်ခမ်းစစ်မျက်နှာဘက်တွင် တပ်မတော်၏ တန်ပြန် တိုက်စစ်အားကောင်းနေပြီး TNLA ဘက်ကလည်း အင်အားဖြည့်တင်းမှုအချို့ ပြုလုပ်လာကြောင်း အဆိုပါစစ်ရေးအခြေအနေအကြောင်း သိရှိသူ သတင်းရင်းမြစ်တစ်ဦးက NP News သို့ပြောသည်။

တောင်ခမ်းတွင် တပ်မတော်၏ တန်ပြန်ထိုးစစ်သည် ချိန်သားကိုက် လုပ်ဆောင်နိုင်ခဲ့ကြခြင်းဖြစ်ပြီး တစ်လ ကျော်ကြာခဲ့သည်အထိ နှစ်ဘက်ချိန်ခွင်လျှာ မပြောင်းလဲ ခဲ့သော်လည်း တပ်မတော်၏ ဟန်ချက်ညီ တိုက်ခိုက်မှု နှင့်အတူ စစ်ကူများပါ ထည့်သွင်းကာ တန်ပြန် တိုက်စစ် ဆင်ခဲ့ခြင်းဖြစ်သည်။

TNLA ပူးပေါင်း အဖွဲ့အများသည် နှစ်ဖက်ညှပ်လာသော တပ်မတော် ၏ ချိန်သားကိုက် တန်ပြန်ထိုးစစ်ကို ကြုံခဲ့ရပြီး TNLA မှ အလံဖြူထောင်သူများပင် ရှိခဲ့ကြောင်း သိရသည်။

“တပ်မတော်က တန်ပြန်တိုက်စစ်ကို ထဲထဲဝင်ဝင် ထိုးနေတယ်။ စစ်ဦးက ဟိုဘက် ဒီဘက် ချိတ်ဆက်လု နီးပါးပါ။ ရန်သူကလည်း အင်အားဖြည့်တာ တချို့ လုပ်လာတယ်” ဟု ၎င်းက ဆိုသည်။

တောင်ခမ်းကို တိုက်ခိုက်လာသော TNLA အဖွဲ့များ အတွင်း ဓနု PDF များ နှင့် ဗမာ PDF များကို အသုံးချနေကြောင်းလည်း သိရသည်။

“ရွာသားတွေကို ၂ ပတ်သင်တန်းပေးပြီးတော့ ထည့်ရင် လည်းထည့်မှာပေါ့။ တွေ့တဲ့ရွာသားက သူတို့ရွာသားပေါ့။ တွေ့တဲ့ရွာသားက သူတို့လူဆိုပြီး ထည့်ချင်ထည့်မှာ” ဟု အထက်ပါသတင်းရင်းမြစ်က ဆိုသည်။

ကိုးကား-NP News

ဒီဇင်ဘာ ၂၆ ရက်နေ့ထုတ် ဝါရှင်တန်ပို့စ်သတင်းစာ၏ ဆောင်းပါးတစ်ခုတွင် ၃ နှစ် နီးပါး စစ်တိုက်နေရသည့် ယူကရိန်းစစ်တပ်များသည် စစ်ပန်းနေကြောင်း ဖော်ပြ ထားပြီး စစ်သည်များသည် ရုရှားနှင့်ပဋိပက္ခအဆုံး သတ်ရေး ညှိနှိုင်းဆွေးနွေးပွဲများကို အလိုရှိနေသည်ဟု  အမေရိကန်စစ်ဌာချုပ်မှ စစ်သတင်းများ၏ အချက်အလက် များကို ကိုးကားပြီး ရေးသားဖော်ပြထားပါသည်။ 

ရုရှားမှတိုက်ခိုက်သိမ်းပိုက်ထားသော ဆုံးရှုံးခဲ့ရသည့် နယ်မြေအားလုံးကို ပြန်လည်ရရှိသည်အထိ တိုက်ပွဲ ဝင်ရန် အဆင်သင့်ရှိကြောင်း ယခင်က ပြောကြားခဲ့ သော်လည်း ယူကရိန်းတပ်များသည် အဆိုပါ ရည်မှန်းချက်အား အကောင်အထည်ဖော်နိုင်မည်ကို မယုံကြည်တော့ကြောင်း ဆောင်းပါးတွင် ဖော်ပြထား ပါသည်။

 ဒီနက်ထရိုပီထရိုဗက်စ်ဒေသတွင် တပ်စွဲထားသော ယူကရိန်းတပ်မဟာ ၃၃ မှ လက်ထောက်တပ်ရင်းမှူး ကီရေးက ၎င်း၏ရဲဘော်များအတွက် စိတ်မကောင်းကြောင်း ဝန်ခံခဲ့ပြီး အခြားအဖွဲ့ဝင်တစ်ဦးဖြစ်သူ ဖီလစ်က တပ်ဖွဲ့ဝင်များအနေဖြင့် များစွာပင်ပန်းနေပြီး တိုက်ပွဲ များကို ရပ်စေလိုကြောင်း အခိုင်အမာ ပြောကြား ခဲ့ပါသည်။ 

 တပ်ဖွဲ့ဝင်အင်အား လျော့နည်းလာခြင်းက ယူကရိန်း တပ်ဖွဲ့ဝင်များကြားတွင် ဆိုးရွားသော စိတ်ဓာတ်ကို ဖြစ်ပေါ်စေသည်ဟုလည်း သိရှိရပါသည်။ 

ကိုးကား-Myanmar National Post

ရုရှားနိုင်ငံတွင် လက်နက်ကိုင်ပုန်ကန်မှုအတွက် ပြစ်ဒဏ်သည်ပိုမိုတင်းကျပ်ခဲ့ပြီး ထိုကဲ့သို့သော လုပ်ရပ် အတွက် အနိမ့်ဆုံး ထောင်ဒဏ် ၁၅ နှစ်မှ ၂၀ နှစ် အထိ ပြစ်ဒဏ်ကျခံရမည်ဖြစ်သည်။ ထိုဥပဒေကို ရုရှားသမ္မတ ဗလာဒီမာပူတင်ကလက်မှတ်ရေးထိုးခဲ့ပြီး အဆိုပါ စာရွက်စာတမ်းများကိုတရားဝင် ဥပဒေဆိုင်ရာ သတင်းအချက်အလက်ဝက်ဘ်ဆိုက်တွင် ဖော်ပြထား ပါသည်။

ယခင်က လက်နက်ကိုင်ပုန်ကန်မှုများအတွက် စည်းရုံးရန် (သို့မဟုတ်) တက်ကြွစွာပါဝင်ရန် လုပ်ဆောင်မှုအတွက် အနိမ့်ဆုံးပြစ်ဒဏ်ကို ထောင်ဒဏ် ၁၂ နှစ်မှ ၂၀ နှစ်အထိ ချမှတ်နိုင်ကြောင်း ဖော်ပြထားပါသည်။

ယခုအခါတွင် အဆိုပါ ဥပဒေအရထောင်ဒဏ် ၁၅ နှစ်မှ ၂၀နှစ်အထိကျခံရမည်ဖြစ်ပြီး၊ ပုန်ကန်မှုသည် လူတစ်ဦး သေဆုံးခြင်း (သို့မဟုတ်) အခြားသောဆိုးဝါးသော အကျိုးဆက်များဖြစ်ပေါ်စေခဲ့လျှင်၊ ပြစ်ဒဏ်မှာ ထောင်ဒဏ်၁၅ နှစ်မှ ၂၀ နှစ်အထိကျခံရမည်ဖြစ်သည့်အပြင် ဒဏ်ငွေ ရူဘယ် ၅၀၀,၀၀၀ မှ ၁ သန်းအထိ ပေးဆောင် ရမည် ဖြစ်ပြီး (သို့မဟုတ်) ထောင်ဒဏ် တစ်သက်တစ်ကျွန်း အထိကျခံရမည်ဖြစ်ပါသည်။

အဆိုပါ ဥပဒေအရ လက်နက်ကိုင်ပုန်ကန်မှုတွင်ပါဝင် သူတစ်ဦးသည် အစိုးရအာဏာပိုင်များကို မိမိဆန္ဒ အလျောက် အဆိုပါ လုပ်ရပ်ကို ချက်ချင်းအသိပေးခြင်း (သို့မဟုတ်) အခြားနည်းဖြင့် "ရုရှားပြည်ထောင်စု၏ အကျိုးစီးပွားကိုထပ်မံထိခိုက်စေခြင်းမှ ကာကွယ်ရန်" ပါဝင်ကူညီခဲ့လျှင် ရာဇဝတ်မှုဆိုင်ရာပြစ်မှုမှ လွတ်မြောက် နိုင်မည်ဖြစ်သည်။

လွတ်ငြိမ်းချမ်းသာခွင့်ကို တားမြစ်ခြင်း

အဆိုပါဥပဒေသည် အကြမ်းဖက်မှုနှင့် လက်နက်ကိုင် ပုန်ကန်မှု ပြစ်ဒဏ်ချမှတ်ခံရသူများအတွက် လွတ်ငြိမ်းချမ်းသာခွင့်ပေးခြင်းနှင့်ဆိုင်သည့် အခြားစည်းမျဉ်း များစွာကိုလည်း တင်းကြပ်ထားပါသည်။

ထို့ကြောင့် အကြမ်းဖက်တိုက်ခိုက်မှုတစ်ခုအတွက် ပြစ်ဒဏ်ချမှတ်ခံရသူများ၊ အကြမ်းဖက်လှုပ်ရှားမှုများတွင် ကူညီပေးခြင်း၊ အဆိုပါရည်ရွယ်ချက်များအတွက် လေ့ကျင့်သင်ကြားခြင်း သို့မဟုတ် အကြမ်းဖက် အဖွဲ့အစည်းကို စည်းရုံးခြင်းနှင့် ၎င်းတွင်ပါဝင်ခြင်း အတွက် ပြစ်ဒဏ်ကျခံရသူများသည် လွတ်ငြိမ်းချမ်းသာ ခွင့်အတွက် ထည့်သွင်းစဉ်းစားမည် မဟုတ်ကြောင်းသိရှိရပါသည်။ လက်နက်ကိုင်ပုန်ကန်မှု သို့မဟုတ် နိုင်ငံတကာ အကြမ်းဖက်မှုလုပ်ရပ်ဖြင့် ပြစ်ဒဏ်ချမှတ် ခံရသူများကို လွတ်ငြိမ်းချမ်းသာခွင့်ဖြင့် လွှတ်ပေးနိုင်မည် မဟုတ်ကြောင်း ဖော်ပြထားပါသည်။

နိုင်ငံခြားသားများအတွက် ပြစ်ဒဏ်သတ်မှတ်ခြင်း

ထို့ပြင် ရုရှားပြည်ထောင်စု၏ ရာဇဝတ်မှုဆိုင်ရာ ဥပဒေတွင် အပိုဒ်ခွဲသစ်တစ်ခုထည့်သွင်းထားပါသည်။ ရုရှားနိုင်ငံ၏လုံခြုံရေးကိုရည်ရွယ်ချက်ရှိရှိ ဆန့်ကျင် သည့်လှုပ်ရှားမှုများတွင် ရန်သူအားငွေကြေး ထောက်ပံ့ ပေးခြင်း၊ အကြံပေးခြင်း သို့မဟုတ် အခြားအကူအညီ များပေးနေသော နိုင်ငံခြားသားများ (သို့မဟုတ်) နိုင်ငံသားမဲ့များကို ပြစ်ဒဏ်ချမှတ်နိုင်သည်။ ဤဥပဒေ အရ အဆိုပါ နိုင်ငံခြားသားများသည် ထောင်ဒဏ် ၁၀ နှစ်မှ ၁၅ နှစ်အထိကျခံရမည်ဖြစ်ပြီးဒဏ်ငွေ ရူဘယ် ၅၀၀,၀၀၀ အထိ ပြစ်ဒဏ်ချမှတ်ခံရမည်ဖြစ်ပါသည်။

ရန်သူဘက်သို့ပြောင်းသွားခြင်း

နိုင်ငံတော်သစ္စာဖောက်မှုနှင့် ပတ်သက်သောအပိုဒ်ခွဲကို လည်းပြင်ဆင်ထားကြောင်း သိရှိရပါသည်။ သစ္စာဖောက်မှုဆိုသည်မှာ ရုရှားပြည်ထောင်စုကို ဆန့်ကျင်သော နိုင်ငံများ (သို့မဟုတ်) နိုင်ငံတကာအဖွဲ့အစည်းများ၏ တပ်ဖွဲ့များ၏ အစိတ်အပိုင်းအဖြစ် လက်နက်ကိုင် ပဋိပက္ခ (သို့မဟုတ်) စစ်ရေးလှုပ်ရှားမှုများတွင် ပါဝင်ခြင်း ဖြစ်ပါသည်။ ရန်ဘက်ဘက်သို့ပြောင်းသွားခြင်း ဆိုသည် မှာ ရုရှားပြည်ထောင်စု၏ လုံခြုံရေးကို တမင်တကာ ဆန့်ကျင်သောအာဏာပိုင်များ၊ အဖွဲ့အစည်းများ၊စီးပွားရေးလုပ်ငန်းများ၊ ရန်သူ့အဖွဲ့အစည်းများ၏ လှုပ်ရှားမှုများတွင် စေတနာ့ဝန်ထမ်းအဖြစ်ပါဝင်မှုများ ပါဝင်ပါသည်။ ထိုကဲ့သို့သောပြစ်မှုအတွက် အမြင့်ဆုံး ပြစ်ဒဏ်မှာ ထောင်ဒဏ်တစ်သက်တစ်ကျွန်းအထိ ကျခံ ရနိုင်ပါသည်။

ကိုးကား - TASS

ဆိုက်ဘာတိုက်ခိုက်ခံရမှုကြောင့် ချို့ယွင်းသွားသော ဂျပန်လေကြောင်းလိုင်း (JAL) စနစ်သည် ဒီဇင်ဘာလ ၂၆ ရက် ညနေ ၂ နာရီ ၂၀ မိနစ်ဝန်းကျင်တွင် ပုံမှန် အခြေအနေသို့ ပြန်လည်ရောက်ရှိသွားပြီဖြစ်ကြောင်း အဆိုပါ လေကြောင်းလိုင်းက ယင်းနေ့တွင်ပင် ကြေညာချက်ထုတ်ပြန်ခဲ့သည်။
ဒီဇင်ဘာ ၂၆ ရက် နံနက်ပိုင်းတွင် ဂျပန်လေကြောင်းလိုင်း ၏ ဆိုက်ဘာစက်ပစ္စည်းများ ဆိုက်ဘာတိုက်ခိုက်မှုခံ ခဲ့ရကာ ခရီးသည်အိတ်များ သယ်ဆောင်ရေး စသည့် စနစ်များချို့ယွင်းခဲ့ရသည်။ ဆိုက်ဘာတိုက်ခိုက်မှုကြောင့် ထိုနေ့တွင် ပြည်တွင်းနှင့် နိုင်ငံတကာလေကြောင်း အနည်းဆုံး ဒါဇင်နှင့်ချီနှောင့်နှေးခဲ့ရကြောင်း ဂျပန် ကျိုဒို သတင်းအေဂျင်စီ၏အဆိုအရသိရသည်။ ဂျပန်လေကြောင်းလိုင်းသည် လက်မှတ်ရောင်းချမှု ယာယီရပ်ဆိုင်းခဲ့ရပြီး ယခုအခါ ပြန်လည်ကောင်းမွန် သွားပြီ ဖြစ်ကြောင်းသိရသည်။ ယခု အကြိမ် ဆိုက်ဘာ တိုက်ခိုက်မှုကြောင့် အသုံးပြုသူများ၏ အချက်အလက်များ ပေါက်ကြားခြင်းမရှိကြောင်း ဂျပန်လေကြောင်းလိုင်းက ပြောကြားခဲ့သည်။  

ကိုးကား - Xinhua

ယူကရိန်းတွင် ယခင်အမေရိကန်ပြည်ထောင်စုမှ ထောက်ပံ့ ပေးခဲ့သည့် တာဝေးပစ် ATACMS ဒုံးကျည် အစင်း ၅၀၀ မှာ ယခုလက်ရှိအချိန်တွင် အစင်း ၅၀ ခန့်သာ ကျန်ရှိကြောင်း၊ အမေရိကန်နှင့် နေတိုးအရာရှိများက ယူကရိန်းသည် အမေရိကန်၏ တာဝေးပစ် ATACMS ဒုံးကျည်များကို တိုက်ခိုက်မှုအတွက် အသုံးပြုရာတွင် ပစ်မှတ်အရေအတွက်နှင့် ရွေးချယ်မှုများကို ပိုမိုဂရုတစိုက် လုပ်ဆောင်သင့်ကြောင်း အမေရိကန် သတင်းစာ New York Times က ဖော်ပြထားပါသည်။

ကိုးကား- New York Times

နိုင်ငံတော်အစိုးရက အကြမ်းဖက်အုပ်စုအဖြစ် ကြေညာထားသော CRPH ၊ NUG နှင့် ယင်းတို့၏ လက်အောက်ခံ PDF အမည်ခံ အကြမ်းဖက်အဖွဲ့များ၊ ယင်းတို့နှင့် ဆက်နွယ်နေသော အဖွဲ့အစည်းများနှင့် လူပုဂ္ဂိုလ်များသည် နိုင်ငံတော်တည်ငြိမ်အေးချမ်းရေးကို ပျက်ပြားစေရန်နှင့် ပြည်သူလူထုကို အကြောက်တရား များဖြစ်ပေါ်စေရန်၊ အစိုးရယန္တရားများ ပျက်ပြားစေရန် ရည်ရွယ်လျက် နိုင်ငံ့ဝန်ထမ်း များအပါအဝင် အပြစ်မဲ့ ပြည်သူများအား အဓိကပစ်မှတ်ထား၍ လုပ်ကြံ သတ်ဖြတ်ခြင်း၊ အများပြည်သူနှင့် သက်ဆိုင်သော နေရာများအား ဖောက်ခွဲဖျက်ဆီးခြင်း၊ အများပြည်သူပိုင်ပစ္စည်းများအား ဓားပြတိုက် လုယက်ခြင်းစသည့်အကြမ်းဖက်လုပ်ငန်းများကို နည်းမျိုးစုံဖြင့် ပြုလုပ် လျက်ရှိသည်။

၂၀၂၄ ခုနှစ်၊ ဒီဇင်ဘာလ ၂၄ ရက်နေ့ နံနက် ၁၀ နာရီ ၁၅ မိနစ်တွင် ရန်ကုန်တိုင်းဒေသကြီး၊ စမ်းချောင်းမြို့နယ်၊ ဟုမ်းလမ်းဘူတာရပ်ကွက်နေ ရပ်ကွက်အုပ်ချုပ်ရေးမှူး ဖြစ်သူဦးစန်းငွေ(၆၆)နှစ်၊ (ဘ)ဦးလှရွှေသည် ဟုမ်းလမ်း ဘူတာရပ်ကွက်၊ ပန်းလှိုင်လမ်းရှိ ရပ်ကွက်အုပ်ချုပ် ရေးမှူးရုံး၌ ရှိနေစဉ် အကြမ်းဖက်သမားများက သေနတ်ဖြင့် ပစ်ခတ်ထွက်ပြေးသွားခဲ့သဖြင့် ဦးစန်းငွေ တွင် ကျည်ထိမှန် ဒဏ်ရာများရရှိခဲ့သည့် ဖြစ်စဉ် ဖြစ်ပွား ခဲ့သည်။

အဆိုပါဖြစ်စဉ်နှင့်ပတ်သက်၍ လုံခြုံရေးတပ်ဖွဲ့ဝင် များက တရားခံများအား ဖော်ထုတ်ဖမ်းဆီးရမိရေးဆောင်ရွက်ခဲ့ရာ အကြမ်းဖက်မှုကို မလိုလားသော ပြည်သူများ၏ ပူးပေါင်းပါဝင် သတင်းပေးမှု များကြောင့် ဒီဇင်ဘာလ ၂၄ ရက်နေ့ ည ၉ နာရီ ၁၅ မိနစ်တွင် လုပ်ကြံပစ်ခတ်မှု ကျူးလွန်သူများ ဖြစ်ကြသည့် တရားခံ ဇော်ဇော်ဗိုလ်(ခ)ထွန်းထွန်းအောင် (၂၉)နှစ်၊ (ဘ) ဦးသိန်းဇော် နှင့် မေမြတ်သဉ္ဇာကျော် (ခ) ငယ်ငယ် (၂၃)နှစ်၊ (ဘ)ဦးမြင့်တို့အား ၎င်းတို့နေထိုင်ရာ အင်းစိန် မြို့နယ်၊ အောင်ဆန်းရပ်ကွက်၊ အောက်မင်္ဂလာဒုံလမ်း၊ အမှတ်(၇၈၂)နေအိမ်၌ ပြစ်မှုကျူးလွန်ရာတွင် အသုံးပြု ခဲ့သည့် CZ 2075 RAMI P အမျိုးအစား အနက်ရောင် ပစ္စတိုသေနတ် ၁ လက်၊ ၎င်းကျည် ၅ တောင့်၊ လုပ်ကြံ ပစ်ခတ်စဉ်အတွင်း အသုံးပြုစီးနင်းခဲ့သည့် ယာဉ်အမှတ် YGN-8 GG-6136 Fielder အဖြူရောင် အငှားယာဉ် တို့နှင့်အတူ ဖမ်းဆီးရမိခဲ့သည်။

ဖမ်းဆီးရမိတရားခံ ဇော်ဇော်ဗိုလ်(ခ) ထွန်းထွန်းအောင် နှင့် မေမြတ်သဉ္ဇာကျော်(ခ) ငယ်ငယ်တို့၏ ထွက်ဆိုချက် အရ လုပ်ကြံပစ်ခတ်မှုအတွင်းပါဝင်သူ ထန်းတပင် မြို့နယ်၊ ရေတွင်းကုန်းကျေးရွာ၊ ရေတွင်းကုန်း-ဝါးတရာ လမ်း၊ “စိုင်းသူအောင်” အဆောင်နေ ကျော်ဇင်ဦး (ခ) ကျောင်းဆရာ (၃၁)နှစ်၊ (ဘ) ဦးမြင့်ဦးအား ယင်းနေ့ ည ၁၀ နာရီခွဲတွင် Glock အမျိုးအစား ပစ္စတိုသေနတ် ၁ လက်၊ ၎င်းကျည် ၁၄ တောင့်၊ လက်ပစ်ဗုံး ၁ လုံးတို့ နှင့်အတူ ထပ်မံဖမ်းဆီးရမိခဲ့သည်။ ဆက်လက်၍ တရားခံ မေမြတ်သဉ္ဇာကျော်(ခ)ငယ်ငယ်၏ ထွက်ဆို ချက်အရ ဒီဇင်ဘာလ ၂၅ ရက်နေ့ နံနက် ၁ နာရီ ၁၅ မိနစ်တွင် လှိုင်သာယာ (အရှေ့ပိုင်း)မြို့နယ်၊ အမှတ်(၃) ရပ်ကွက်၊ မင်းရဲကျော်စွာ(၅)လမ်း၊ အိမ်အမှတ်(၁)နေ စိုင်းနောင်ထက် (ခ) အာကြီး(၂၇)နှစ်၊ (ဘ)ဦးဇော်ဝင်း ၏နေအိမ်အား ဝင်ရောက်ရှာဖွေရာ စိုင်းနောင်ထက်(ခ) အာကြီးအား ၎င်းနေထိုင်သည့် အဆောက်အဦ ပထမ ထပ်၏ ထပ်ခိုးပေါ်တွင် အနက်ရောင် စက္ကူဘူးအတွင်း ထည့်၍ ဝှက်သိမ်းထားသည့် SIG SAUER အမျိုးအစား အနက်ရောင်ပစ္စတိုသေနတ် ၁ လက်၊ ၎င်း ကျည်အိမ် ၂ ခု၊ 9 mm ကျည် ၃၃ တောင့်နှင့် မီးခိုးဗုံး ၂ လုံး တို့နှင့် အတူ ထပ်မံတွေ့ရှိဖမ်းဆီးရမိခဲ့သည်။

ဖမ်းဆီးရမိသူ တရားခံ ကျော်ဇင်ဦး(ခ)ကျောင်းဆရာ၊ ဇော်ဇော်ဗိုလ်(ခ) ထွန်းထွန်းအောင်နှင့် မေမြတ်သဉ္ဇာကျော် (ခ)ငယ်ငယ်တို့ ၃ ဦး၏ ထွက်ဆိုချက်များအရ ၎င်းတို့ ၃ ဦးသည် Free Land Attack Force(FLA) အမည်ခံ အကြမ်းဖက်အဖွဲ့မှ အဖွဲ့ဝင်များဖြစ်ကြပြီး ၎င်းအဖွဲ့တွင် အဖွဲ့ဝင် ၁၅ ဦး ခန့်ရှိကာ အဖွဲ့ခေါင်းဆောင်မှာ ဖမ်းဆီးရန်ကျန်တရားခံ နေမျိုးနွယ်(စိစစ်ဆဲ)ဖြစ်ပြီး ထိုင်းနိုင်ငံ၊ မဲဆောက်မြို့တွင် နေထိုင်သူဖြစ်ကြောင်း၊ အကြမ်းဖက်လုပ်ကြံသတ်ဖြတ်မှုများအား အဖွဲ့ခေါင်းဆောင်ဖြစ်သူ နေမျိုးနွယ်၏ စေခိုင်းချက်ဖြင့် ဆောင်ရွက်ရခြင်းဖြစ်ကြောင်း၊ စမ်းချောင်းမြို့နယ်၊ ဟုမ်းလမ်းဘူတာ ရပ်ကွက်အုပ်ချုပ်ရေးမှူးဖြစ်သူ ဦးစန်းငွေအား သေနတ်ဖြင့် လုပ်ကြံပစ်ခတ်ရန်အတွက် ဒီဇင်ဘာလ ၂၂ ရက်နေ့တွင် FLA အဖွဲ့ခေါင်းဆောင် နေမျိုးနွယ်မှ တရားခံ ကျော်ဇင်ဦး(ခ)ကျောင်းဆရာပါ ၃ ဦး တို့အား Telegram မှဆက်သွယ်၍ စေခိုင်းခဲ့ခြင်း ဖြစ်ကြောင်း၊ ဒီဇင်ဘာလ ၂၄ ရက်နေ့ နံနက် ၁၀ နာရီ ၁၅ မိနစ်တွင် ငှားရမ်းထားသည့် ယာဉ်အမှတ် YGN-8 GG-6136 Fielder အဖြူရောင်အငှားယာဉ်အား ဇော်ဇော်ဗိုလ်(ခ) ထွန်းထွန်းအောင်မှ မောင်းနှင်၍ ကျော်ဇင်ဦး (ခ)ကျောင်းဆရာနှင့် မေမြတ်သဉ္ဇာကျော် (ခ) ငယ်ငယ်တို့မှ ပစ္စတိုသေနတ် ၁ လက်စီဖြင့် အုပ်ချုပ်ရေးမှူး ဦးစန်းငွေအား ရုံးရှေ့ ၅ ပေအကွာ ခန့်မှ လုပ်ကြံပစ်ခတ်ခဲ့ကြခြင်းဖြစ်ကြောင်း၊ လုပ်ကြံပစ်ခတ် ပြီးနောက် တရားခံ ကျော်ဇင်ဦး(ခ) ကျောင်းဆရာ နှင့် ဇော်ဇော်ဗိုလ်(ခ) ထွန်းထွန်းအောင်တို့မှ ပစ္စတိုသေနတ် ၁ လက်စီယူဆောင်သွားခဲ့ ကြပြီး မေမြတ်သဉ္ဇာကျော် (ခ)ငယ်ငယ်မှ ၎င်းကိုင်ဆောင်သည့် SIG SAUER အမျိုးအစား အနက်ရောင် ပစ္စတိုသေနတ် ၁ လက်၊ ၎င်းကျည်အိမ် ၂ ခု၊ 9 mm ကျည် ၃၃ တောင့်တို့အား စိုင်းနောင်ထက်(ခ) အာကြီး၏နေအိမ်တွင် သွားရောက် အပ်နှံသိမ်းဆည်းထားခဲ့ခြင်းဖြစ်ကြောင်း ထွက်ဆိုခဲ့သည်။

ဆက်လက်စစ်ဆေးချက်များအရ တရားခံ ကျော်ဇင်ဦး(ခ)ကျောင်းဆရာ၊ ဇော်ဇော်ဗိုလ်(ခ) ထွန်းထွန်းအောင်နှင့် မေမြတ်သဉ္ဇာကျော်(ခ) ငယ်ငယ် တို့ ၃ ဦးသည် FLA အဖွဲ့ခေါင်းဆောင် ဖမ်းဆီးရန်ကျန် တရားခံ နေမျိုးနွယ်၏စေခိုင်းချက်အရ ၂၀၂၄ ခုနှစ်၊ နိုဝင်ဘာလ ၂၃ ရက်နေ့ ညပိုင်းတွင် တာမွေမြို့နယ်၊ နတ်မောက်ရပ်ကွက်၊ ဗညားဒလလမ်းပေါ်ရှိ တာမွေ မြို့နယ်လျှပ်စစ်မန်နေဂျာရုံးအား လက်ပစ်ဗုံး ၂ လုံးဖြင့် ပစ်ခတ်ခြင်းနှင့် ဒီဇင်ဘာလ ၁၀ ရက်နေ့တွင် ညပိုင်း တွင်တာမွေမြို့နယ်၊ ကျားကွက်သစ်ရပ်ကွက်၊ ကျိုက္ကဆံ လမ်းနှင့် မလွှကုန်းလမ်းထောင့်ရှိ တာမွေမြို့နယ် စည်ပင်သာယာ အုပ်ချုပ်ရေးမှူးရုံးအား လက်ပစ်ဗုံးဖြင့် အကြမ်းဖက်ပစ်ခတ်တိုက်ခိုက်မှု ၂ ကြိမ် ကျူးလွန်ခဲ့ ကြကြောင်း၊ တရားခံ ကျော်ဇင်ဦး(ခ)ကျောင်းဆရာ၊ မေမြတ်သဉ္ဇာကျော်(ခ)ငယ်ငယ်နှင့် ဖမ်းဆီးရန်ကျန် တရားခံ Free Land Attack Force(FLA) အဖွဲ့ဝင်ဖြစ်သူ အောင်မျိုးအေး (ခ) ဆာကူရာ (စိစစ်ဆဲ) တို့ ၃ ဦးသည် ၂၀၂၃ ခုနှစ်၊ မေလအတွင်း အင်းစိန်ပန်းခြံ၊ လျှပ်စစ်ရုံး ရှေ့ ခြံစည်းရိုးဘေးတွင် ချိန်ကိုက်မိုင်း ၃ လုံး၊ ဇွန်လ အတွင်း တာမွေမြို့နယ်စည်ပင်သာယာ အုပ်ချုပ်ရေးမှူး ရုံးရှေ့ခြံစည်းရိုးတွင် ချိန်ကိုက်မိုင်း ၁ လုံး၊ ဩဂုတ်လ အတွင်း မရမ်းကုန်းမြို့နယ်၊ သမိုင်းလမ်း၊ မင်းဓမ္မလမ်း မီးပွိုင့်အနီးရှိ CCTV ပုံးတွင် ရီမုမိုင်းတစ်လုံးတို့အား အကြမ်းဖက်မိုင်းထောင်ဖောက်ခွဲခဲ့ခြင်း ၃ ကြိမ် ကျူးလွန် ခဲ့ကြကြောင်း ဖော်ထုတ်သိရှိရသည်။

ဖြစ်စဉ်တွင် အကြမ်းဖက်လုပ်ကြံပစ်ခတ်မှုနှင့် မိုင်းထောင် ဖောက်ခွဲတိုက်ခိုက်မှုများ ကျူးလွန်ခဲ့သူ  Free Land Attack Force (FLA) အမည်ခံ အကြမ်းဖက် အဖွဲ့ဝင် များဖြစ်ကြသော ကျော်ဇင်ဦး (ခ) ကျောင်းဆရာ ပါ ၄ ဦးတို့အား ပြစ်မှုများကျူးလွန်စဉ် အသုံးပြုခဲ့သည့် ပစ္စတိုသေနတ် ၃ လက်၊ ကျည်မျိုးစုံ ၅၂ တောင့်၊ လက်ပစ်ဗုံး ၁ လုံး၊ မီးခိုးဗုံး ၂ လုံး တို့နှင့်အတူ ဖမ်းဆီးရမိခဲ့ပြီး ဥပဒေအရ ၎င်းတို့ကျူးလွန်ခဲ့သော ပြစ်မှုများအတိုင်း ထိရောက်စွာအရေးယူနိုင်ရေးဆက်လက်ဆောင်ရွက်သွားမည်ဖြစ်ကာ အကြမ်းဖက်မှု ပြုလုပ်နေသူများအား ပြည်သူတစ်ရပ်လုံးက ဝိုင်းဝန်း ကာကွယ်တိုက်ဖျက်ကြရန်နှင့် ဖမ်းဆီးရန်ကျန် တရားခံ များအား အမြန်ဆုံးဆက်လက်ဖမ်းဆီး ရမိရေးအတွက် ၎င်းတို့ပုန်းခိုရာ နေရာများ၊ လှုပ်ရှားသွားလာနေထိုင်မှု သတင်းများရရှိပါက သက်ဆိုင်ရာသို့ လျှို့ဝှက်စွာ သတင်းပေး တိုင်ကြားနိုင်ပါကြောင်းနှင့်မြို့၊ ရွာများ အမြန်ဆုံး အေးချမ်းတည်ငြိမ်ရေးအတွက် ပြည်သူ တစ်ရပ်လုံး ပူးပေါင်းပါဝင်ကြိုးပမ်းဆောင်ရွက်နိုင်ပါရန် မေတ္တာရပ်ခံအပ်ပါကြောင်း အသိပေးသတင်း ထုတ်ပြန် အပ်ပါသည်။

ကိုးကား -  CINCDS

အမေရိကန်ပြည်ထာင်စု၏ ဘိုင်ဒင်အစိုးရသည် ယူကရိန်းအတွက် ဒေါ်လာ ၁.၂၅ ဘီလီယံတန်ဖိုးရှိသည့် စစ်ဘက်ဆိုင်ရာ ထောက်ပံ့ရေး အစီအစဉ်သစ်ကို ခွဲဝေ ပေးမည်ဖြစ်ကြောင်း Associated Press က ဖော်ပါ သည်။

သမ္မတဘိုင်ဒင်အစိုးရအဖွဲ့သည် ယူကရိန်းနိုင်ငံအတွက် အဆိုပါ စစ်ဘက်ဆိုင်ရာ ထောက်ပံ့ရေး အစီအစဉ် သစ်ကို လာမည့်သီတင်းပတ်တွင် ကြေညာရန် ရည်ရွယ် ထားကြောင်းသိရှိရပါသည်။

သမ္မတဘိုင်ဒင် အစိုးရသည် ဇန်နဝါရီလတွင် သမ္မတ ဘိုင်ဒင် ရာထူးမှ မထွက်ခွာမီ ယူကရိန်းသို့ ဒေါ်လာ ၁.၂၅ ဘီလီယံ တန်ဖိုးရှိ စစ်ဘက်ဆိုင်ရာ ထောက်ပံ့ရေး အစီအစဉ်သစ် ပေးပို့ရန် စီစဉ်နေကြောင်း AP သတင်း တွင် ဖော်ပြထားပါသည်။

စစ်ဘက်ဆိုင်ရာ ထောက်ပံ့ရေး အစီအစဉ်သစ်တွင် NASAMS နှင့် HAWK လေကြောင်းရန်ကာကွယ်ရေး ခဲယမ်းမီးကျောက်များ၊ Stinger ဒုံးကျည်များ၊ 155mm နှင့် 105mm အမြောက်ကျည်များ ပါဝင်မည်ဖြစ်ကြောင်း သိရှိရပါသည်။

ဘိုင်ဒင်အစိုးရအဖွဲ့သည် ဒီဇင်ဘာလ ၃၀ ရက်နေ့တွင် အဆိုပါ စစ်ဘက်ဆိုင်ရာထောက်ပံ့ရေးအစီအစဉ်သစ်ကိုတရားဝင်ကြေညာရန်စီစဉ်ထားပြီး လာမည့်နှစ် ဇန်နဝါရီလ ၂၀ ရက်နေ့တွင် ယူကရိန်းသို့ အကူအညီ များ ပေးပို့ရန်ဖြစ်ကြောင်း တာဝန်ရှိသူများက ရှင်းလင်း ပြောကြားခဲ့သည်။

ကိုးကား - AP News

ရုရှားတပ်ဖွဲ့များက ဒီဇင်ဘာလ ၂၅ ရက် နံနက်ပိုင်းတွင် ယူကရိန်းနိုင်ငံရှိ စစ်ရေး ပစ်မှတ်များကို တိကျမှုရှိသော တာဝေး တိုက်ခိုက်မှုများ လုပ်ဆောင်ကြောင်း ရုရှား ကာကွယ်ရေးဝန်ကြီးဌာနက ထုတ်ပြန်ထားသည်။

ယခုစစ်ဆင်ရေးတွင် ယူကရိန်းနိုင်ငံရှိ စစ်ဘက်စက်မှုလုပ်ငန်းများသို့ လျှပ်စစ်ဓာတ်အားပေးနေသော စွမ်းအင်အခြေခံအဆောက်အအုံများကို ဒုံးကျည်များနှင့် ဒရုန်းများအသုံးပြု၍ တိုက်ခိုက်ခဲ့ခြင်းဖြစ်ကြောင်းနှင့် ရည်မှန်းချက်များအားလုံးကို အောင်မြင်စွာဆောင်ရွက်နိုင်ကြောင်း ထုတ်ပြန်ချက်တွင် ဖော်ပြထားသည်။

ထိုသို့တိုက်ခိုက်ရာ၌ ရုရှားက ဒုံးကျည် အစင်း ၇၀ ခန့်နှင့် အသေခံဒရုန်းအစင်း ၁၀၀ ကျော်တို့ကို  အသုံးပြုထားကြောင်းနှင့်   ဒေသခြောက်ခုရှိ  ပစ်မှတ်များစွာမှာ တိုက်ခိုက်ခံရကြောင်း  ယူကရိန်းဒုတိယဝန်ကြီးချုပ်    အလက်ဆီကူလဲဘားက အတည်ပြုထားသည်။

ဒီဇင်ဘာလ ၂၄ ရက်ညပိုင်းတွင် ရုရှားနိုင်ငံအတွင်းပိုင်းသို့ ဦးတည်ဝင်ရောက်လာသည့် ယူကရိန်းနိုင်ငံမှ  ဒရုန်း ၅၉ စင်းကို ရုရှားကကြားဖြတ် ပစ်ချနိုင်ကြောင်းနှင့် ထိုသို့တိုက်ခိုက်လာမှုကို ထိရောက်မှုရှိစွာ လက်တုံ့ပြန်မည်ဖြစ်ကြောင်း ရုရှားနိုင်ငံ ခြားရေးဝန်ကြီးက ပြောပြီးနောက် ဒီဇင် ဘာလ ၂၅ ရက်တွင် ရုရှားက ယူကရိန်း၏ ဓာတ်အားလိုင်းများကို  ပစ်မှတ်ထားတိုက်ခိုက်ခြင်းဖြစ်ကြောင်း သိရသည်။

Source: Myawady Web Portal

မန္တလေးတိုင်းဒေသကြီး၊ နွားထိုးကြီးမြို့နယ်၊ မြိုင်သာယာရွာနှင့် ဒေါင့်ဘိုးရွာကို ဒီဇင်ဘာလ ၂၃ ရက်နှင့် ၂၄ ရက်တို့တွင် လုံခြုံရေးတပ်ဖွဲ့ဝင်များက လေကြောင်းဖြင့် ၂ ရက်ဆက်တိုက် ဗုံးကြဲတိုက်ခိုက်ခြင်းကြောင့် ပြည်သူ ၁ ဦး သေဆုံးခဲ့ကြောင်း တရားမဝင် ပြည်ဖျက်မီဒီယာများက မဟုတ်မမှန် ရေးသားဖြန့်ဝေနေကြောင်း တွေ့ရှိရသည်။ 

အဆိုပါ သတင်းနှင့်ပတ်သက်၍ သက်ဆိုင်ရာ လုံခြုံရေးတာဝန်ရှိသူတစ်ဦး၏ ပြောကြားချက်အရ လုံခြုံရေးတပ်ဖွဲ့ဝင်များအနေဖြင့် ၎င်းကျေးရွာများအတွင်း ပြည်သူများအေးချမ်းစွာ နေထိုင်နိုင်ရေးအတွက် လိုအပ်သည့် နယ်မြေလုံခြုံရေးလုပ်ငန်းများကို ဆောင်ရွက်ပေးလျက်ရှိပြီး လေကြောင်းဖြင့် ဗုံးကြဲတိုက်ခိုက်ခြင်း မရှိကြောင်း ၊ အကြမ်းဖက်သမားများကသာ ၎င်းတို့အပေါ် ထောက်ခံအားပေးမှုမရှိသည့် ကျေးရွာများကို ဒရုန်းဖြင့် ဗုံးကြဲခြင်း၊ လက်နက်ကြီးများဖြင့် ပစ်ခတ်ခြင်းများဆောင်ရွက်လျက်ရှိပြီး တရားမဝင်ပြည်ဖျက်မီဒီယာများ အကြမ်းဖက်သမားများ၏ လုပ်ရပ်များကို ဖုံးကွယ်ရန်နှင့် ပြည်သူလူထုမှ လုံခြုံရေးတပ်ဖွဲ့ဝင်များအပေါ် အထင်အမြင်လွဲမှားစေရန်ရည်ရွယ်၍ မဟုတ်မမှန် ရေးသားဖြန့်ဝေနေခြင်းသာဖြစ်ကြောင်းသတင်းရရှိသည်။

Source : (၂၆-၁၂-၂၀၂၄) ရက်နေ့ထုတ် မြဝတီနေ့စဉ်သတင်းစာ