မန္တလေးတိုင်း၊ ပုသိမ်ကြီးမြို့နယ်နှင့် မတ္တရာမြို့နယ် ကြားရှိ ထန်းပင်ကုန်းကျေးရွာ တိုက်ပွဲအတွင်း TNLA/PDF အကြမ်းဖက်သမား အသေဖမ်းဆီးရမိမှု များပြား လာသည်ကို တွေ့ရသည်။

တပ်မတော်သားများနှင့် ပြည်သူ့စစ်တပ်ဖွဲ့ဝင်များ ပူးပေါင်း၍ TNLA/PDF အကြမ်းဖက်အဖွဲ့များကို ရှင်းလင်း ဆောင်ရွက်လျက်ရှိရာ ဒီဇင်ဘာ ၁၉ ရက်နေ့က အကြမ်းဖက်သမား သေဆုံးရုပ်အလောင်းမှတ်တမ်းများ ထွက်ပေါ်လာပြီး ဒီဇင်ဘာ ၂၁ ရက်တွင် အကြမ်းဖက် သမား သေဆုံးဓာတ်ပုံများ ထပ်မံဖော်ပြထားသည်။

မတ္တရာမြို့နယ်တွင် NLD အစွန်းရောက် PDF အကြမ်းဖက် သမားများသည် မစဖအဖွဲ့ဝင် ဗိုလ်မှူးကို လုပ်ကြံသတ်ဖြတ်သည်အထိ လုပ်ဆောင်ခဲ့ကြသည်။ မတ္တရာမြို့နယ်အတွင်း TNLA/PDF အကြမ်းဖက်သမားများ အခြေပြု လှုပ်ရှားနေသည်မှာ ကြာမြင့်နေပြီဖြစ်သည်။

ကိုးကား-Myanmar National Post

ရှမ်းပြည်နယ် (မြောက်ပိုင်း)၊ နောင်ချိုမြို့နယ်၊ တောင်ခမ်း ဒေသတွင် ဒီဇင်ဘာ ၂၀ ရက် နေ့လယ်ပိုင်းက နယ်မြေရှင်း စစ်ကြောင်းနှင့် TNLA အကြမ်းဖက်သမား၂၀ ဦးခန့်တို့ ထိတွေ့တိုက်ပွဲဖြစ်ပွားခဲ့ပြီး TNLA အကြမ်းဖက်သမား အလောင်း ၂ လောင်း၊ Type-81 သေနတ် ၁ လက် တို့အား သိမ်းဆည်းရရှိခဲ့ကြောင်း သိရသည်။

ဒီဇင်ဘာ ၂၁ ရက် မွန်းလွဲပိုင်းတွင် နောင်ချိုမြို့နယ်၊ တောင်ခမ်းဒေသတွင် နယ်မြေရှင်းလင်းနေသော စစ်ကြောင်းနှင့် TNLA အကြမ်းဖက်အဖွဲ့တို့ ထိတွေ့မှု ထပ်မံဖြစ်ပေါ်ခဲ့ပြီး TNLA အကြမ်းဖက်သမား ၄ လောင်း၊ Type-81 သေနတ် ၃ လက်၊ ခဲယမ်း/ ကျည်အိမ်များ ထပ်မံသိမ်းဆည်းရရှိခဲ့ကြောင်း သိရသည်။

ကိုးကား-Myanmar National Post

အမေရိကန်ကွန်ဂရက်လွှတ်တော်သည် တရုတ်နိုင်ငံတွင် အမေရိကန်၏ ရင်းနှီးမြှုပ်နှံမှုများကို ကန့်သတ်သည့် ဥပဒေကို လာမည့်ရက်များတွင် မဲခွဲဆုံးဖြတ်မည်ဖြစ်ပြီး ယင်းဥပဒေသည် အစိုးရလုပ်ငန်းများကို မတ်လလယ် အထိငွေကြေးထောက်ပံ့မည့် အစီအစဉ်နှင့်စပ်လျဉ်းသည့် ဥပဒေကြမ်းတွင် ပါဝင်နေကြောင်း လွှတ်တော်အမတ် များက ဒီဇင်ဘာ ၁၇ ရက်နေ့တွင် ပြောကြားလိုက် သည်။

အမေရိကန်နိုင်ငံဗဟိုဘဏ်သည် နိုင်ငံတော်၏ အမျိုးသားလုံခြုံရေးကို ခြိမ်းခြောက်နိုင်သည့် တရုတ်နိုင်ငံရှိ ဉာဏ်ရည်တုနှင့် အခြားနည်းပညာကဏ္ဍများတွင် အမေရိကန်၏ ရင်းနှီးမြှုပ်နှံမှုများကို ကန့်သတ်သည့် နည်းဥပဒေများကို အောက်တိုဘာလတွင် အပြီးသတ် ရေးဆွဲခဲ့ပြီး လာမည့် ဇန်နဝါရီ ၂ ရက်နေ့တွင် စတင် အကျိုးသက်ရောက်မည်ဖြစ်သည်။

အဆိုပါဥပဒေကြမ်းတွင် ရင်းနှီးမြှုပ်နှံမှုဆိုင်ရာ ကန့်သတ်ချက်အသစ်များအပြင် တရုတ်နိုင်ငံထုတ် Routers များနှင့် Modems များကြောင့် ဖြစ်ပေါ်စေနိုင်သည့်အမျိုးသားလုံခြုံရေးဆိုင်ရာ ခြိမ်းခြောက်မှုအန္တရာယ်များ၊ အမျိုးသားလုံခြုံရေးကို ထိခိုက်စေနိုင်သောနေရာများ အနီးတွင် တရုတ်နိုင်ငံက အိမ်ခြံမြေ ဝယ်ယူမှုများကို ပြန်လည်သုံးသပ်ခြင်းအပါအဝင် တရုတ်နိုင်ငံနှင့် ပတ်သက်၍ သတိထားဆောင်ရွက်ရမည့် အခြားသော ပြဋ္ဌာန်းချက်များလည်း ပါဝင်သည်။

“တရုတ်နိုင်ငံသည် စီးပွားရေးရန်ဘက်ဖြစ်ပြီး ၎င်းတို့၏ အနာဂတ်ကို တရုတ်ကွန်မြူနစ်ပါတီရန်မှ ကာကွယ် စောင့်ရှောက်ရန် ပြတ်ပြတ်သားသား ဆောင်ရွက်ရမည် ဖြစ်ကြောင်း၊ ၎င်းတို့၏ အမျိုးသားလုံခြုံရေးဆိုင်ရာ နည်းပညာကို တရုတ်နိုင်ငံ၏ လက်ထဲသို့ မရောက်ရှိ စေရန် အမေရိကန်၏ရင်းနှီးမြှုပ်နှံမှုများကို ဤဥပဒေဖြင့် အခိုင်အမာကန့်သတ်ထားခြင်းဖြစ်ကြောင်း” ဒီမိုကရက် တစ်ပါတီမှ အထက်လွှတ်တော်အမတ် Bob Casey က ပြောကြားလိုက်ပါသည်။

ကိုးကား - CNA

မန္တလေးတိုင်းဒေသကြီး၊ ငါန်းဇွန်မြို့အနောက်ဘက် ၂ မိုင် ခန့်အကွာရှိ ဆပ်ပြာကျင်းကျေးရွာအတွင်းသို့ ၁၉-၁၂-၂၀၂၄ ရက်နေ့ ၁၃း၃၀ အချိန်ခန့်တွင် PDF အကြမ်းဖက်သမား အင်အား ၇၀ဦးခန့်သည် ဆိုင်ကယ်များ၊ Light truck မော်တော်ယာဉ်များဖြင့် ဝင်ရောက်လာပြီး ငါန်းဇွန်မှ ဆပ်ပြာကျင်းရွာသို့ ခေတ္တခွင့်ဖြင့်ပြန်သွားသည့် ဌာနေ ပြည်သူ့စစ်အဖွဲ့ဝင် ဦးကြည်သောင်းနှင့် ပြည်သူ့စစ်အဖွဲ့ဝင် ဦးစိုးပေ၏ဇနီးဖြစ်သူ ဒေါ်ယမင်းသူတို့အားPDF အကြမ်းဖက်အဖွဲ့မှ သေနတ်ဖြင့် ပစ်ခတ်သတ်ဖြတ် ခဲ့ကြောင်း သိရသည်။

ဦးကြည်သောင်းတွင် ဦးခေါင်း ပွင့်ထွက်ဒဏ်ရာ ၂ချက်၊ ဒေါ်ယမင်းသူတွင် ဦးခေါင်း ပွင့်ထွက်ဒဏ်ရာ ၁ချက်၊ ယာလက် ဖောက်ထွက်ဒဏ်ရာ ၁ချက်တို့ဖြင့် အခင်းဖြစ် နေရာတွင် သေဆုံးသွားခဲ့သည်။

PDF အကြမ်းဖက်သမားများသည် ဌာနေပြည်သူ့စစ် အဖွဲ့ဝင် ဦးထွန်းပိုင်၏ဇနီးဖြစ်သူ ဒေါ်မော်နှင့် သားဖြစ်သူ မောင်အောင်မျိုးဇော် တို့အား ဖမ်းဆီးခေါ်ဆောင်သွား ခဲ့ပြီး ကျေးရွာအတွင်းရှိ ဦးအောင်ညွန့်ဝင်း ပိုင်ဆိုင်သည့် Hijet မော်တော်ယာဉ် 7N/6754 အား မောင်းနှင်ယူ ဆောင်ကာ ကုလကျေးရွာဘက်သို့ ထွက်ပြေးသွားကြောင်း သိရသည်။

လုံခြုံရေးတပ်ဖွဲ့ဝင်များနှင့် ဌာနေပြည်သူ့စစ်အဖွဲ့ဝင် များမှ PDF အကြမ်းဖက်သမားများနောက်သို့ လိုက်လံ ရှင်းလင်းလျက်ရှိကြောင်း သိရသည်။

ကိုးကား-Myanmar National Post

အကြမ်းဖက်နှိမ်နင်းရေးဆောင်ရွက်မှုမှတ်တမ်းများ ထုတ်ပြန်ချက်အရ ၂၀၂၄ ခုနှစ်၊ ဒီဇင်ဘာ ၁ ရက်မှ ၁၅ ရက်အတွင်း နယ်မြေရှင်းလင်းရေး၊ အကြမ်းဖက် နှိမ်နင်းရေးဆောင်ရွက်ရာ အကြမ်းဖက်သမား ၈၅၁ ဦး အသေဖမ်းဆီးရမိပြီး၊ ၂၃ ဦး အရှင်ဖမ်းဆီးရမိကြောင်း စစ်တမ်းအရ သိရသည်။

တိုင်းစစ်ဌာနချုပ်အလိုက် နှိမ်နင်းဆောင်ရွက်မှု စာရင်းတွင် ဒီဇင်ဘာ ပထမပတ်နှင့် ဒုတိယပတ်အတွင်း အနောက်ပိုင်းတိုင်း စစ်ဌာနချုပ်နယ်မြေတွင် အကြမ်းဖက် သမား ၅၉၀ ဦးအထိ နှိမ်နင်းဆောင်ရွက်ခဲ့ရပြီး မြောက်ပိုင်းတိုင်းစစ်ဌာနချုပ်နယ်မြေတွင် ၂၁၀ ဦးအထိ နှိမ်နင်းဆောင်ရွက်ခဲ့ရသည်။

မြောက်ပိုင်းတိုင်းစစ်ဌာနချုပ်နယ်မြေအတွင်း တိုက်ပွဲ ဖြစ်စဉ်များတွင် ဒီဇင်ဘာ ၄ ရက်နေ့ကစပြီး အကြမ်းဖက်သူပုန်များက ကချင်ပြည်နယ်၊ ဗန်းမော် မြို့နယ်အတွင်း တပ်စခန်းများအား လာရောက် တိုက်ခိုက်ရာတွင် KIA/PDF အကြမ်းဖက်သမား (သေဆုံးမှုအနေဖြင့် ၁၈၇ ဦး၊ ဒဏ်ရာရ ၂၂၈ ဦး)၊ မိုးမောက်မြို့နယ်တွင်း တိုက်ပွဲဖြစ်စဉ်များတွင် KIA/PDF အကြမ်းဖက်သမားများ (သေဆုံးမှုအနေဖြင့် ၈ ဦး ဒဏ်ရာရ ၂၄ ဦး)၊ မံစီမြို့နယ်အတွင်း တပ်စခန်းများအား လာရောက်တိုက်ခိုက်စဉ် KIA/PDF အကြမ်းဖက်သမား (သေဆုံး ၁ ဦး)၊ ဝိုင်းမော်မြို့နယ်အတွင်း တိုက်ပွဲဖြစ်စဉ် တွင်  KIA/PDF အကြမ်းဖက်သမား (သေဆုံးမှုအနေဖြင့် ၅ ဦး၊ ဒဏ်ရာရ ၂ ဦး) အထိရှိခဲ့ကြောင်း၊ ကချင် ပြည်နယ်တိုက်ပွဲများအတွင်း KIA/PDF အကြမ်းဖက်သမားများသေဆုံးမှု ၂၁၀ ဦးအထိရှိခဲ့၍ ဒဏ်ရာရ ၂၆၂ ဦးရှိခဲ့ကြောင်း တွေ့ရှိရပြီး ဗန်းမော်မြို့နယ်တွင်KIA/PDF အကြမ်းဖက်အဖွဲ့ ခေါင်းဆောင်ပိုင်းများအပါအဝင် အများအပြား သေဆုံး/ဒဏ်ရာရရှိခဲ့ကြောင်း တွေ့ရှိရသည်။

လက်ရှိအချိန်တွင် တပ်မတော်မှ ဗန်းမော်မြို့အား ဆက်လက်ထိန်းချုပ်ထားပြီး ဗန်းမော်မြို့နယ်အတွင်း ခိုအောင်းနေသော အကြမ်းဖက်သမားများကို လိုက်လံ ရှင်းလင်းလျက်ရှိကြောင်း သိရသည်။

၁၉-၁၂-၂၀၂၄ ရက်နေ့ ညပိုင်း ၉ နာရီ သတင်းအရ အမ်းမြို့တွင် နံနက် ၇ နာရီအချိန်ခန့်က တိုင်းရုံးအား သောင်းကျန်းသူများမှ လာရောက်တိုက်ခိုက်ခဲ့သောကြောင့်‌ နေ့လည် ၁၁ နာရီအချိန်အထိ နှစ်ဖက်တိုက်ပွဲ ၄ နာရီခန့် ဖြစ်ပွားခဲ့‌ကြောင်း၊ နံနက် ၈ နာရီအချိန်ခန့်က ဆင်ခုံတိုင် စခန်း၏ အနောက်ဘက် မီတာ ၃၀၀ ခန့် အကွာရှိကာကင်းစခန်းများအား သောင်းကျန်းသူများမှလာရောက်တိုက်ခိုက်ခဲ့သောကြောင့် နှစ်ဖက်တိုက်ပွဲကြိုကြားကြိုကြားဖြစ်ပွားခဲ့ပြီး ရန်သူအား ထိန်းချုပ်ဟန့်တားနိုင်ခဲ့ကြောင်း သိရသည်။

ထို့အတူ စစ်တွေမြို့တွင် ယနေ့ည ၈ နာရီခန့်က AA သောင်းကျန်းသူများမှ ခမောင်းတောကျေးရွာမှနေ၍ စစ်တွေမြို့ အရှေ့မြောက်ဘက်ရှိ ကာကင်းစခန်း တစ်ခုအား လက်နက်ကြီးများဖြင့် ပစ်ခတ်တိုက်ခိုက်ခဲ့သောကြောင့် ၎င်းတို့ပစ်ခတ်သည့်နေရာအား အမြောက်လက်နက်ကြီးများဖြင့်လည်းကောင်း၊ ရေတပ်သ‌င်္ဘောမှ လက်နက်ကြီးများဖြင့်လည်းကောင်း ပစ်ခတ်ချေမှုန်းခဲ့ကြောင်း သိရသည်။

ကိုးကား - Myanmar National Post

အစ္စရေးစစ်တပ်သည် ယီမင်ရှိ ဆိပ်ကမ်းများနှင့်စွမ်းအင် အခြေခံအဆောက်အအုံများကို တိုက်ခိုက်ခဲ့ပြီး ဟူသီစစ်သွေးကြွများနှင့် ချိတ်ဆက်ထားသောနေရာများကိုရွေးချယ်ပစ်မှတ်ထား တိုက်ခိုက်ခဲ့သည်။ ယခုတိုက်ခိုက်မှုသည် မကြာသေးမီက ဟူသီစစ်တပ်၏လုပ်ရပ်အတွက် လက်တုံ့ပြန်ခြင်းဖြစ်ကြောင်း အစ္စရေး ကာကွယ်ရေးတပ်ဖွဲ့ (IDF) ၏ ပြောကြားချက်အရ သိရှိရသည်။

ယီမင်နိုင်ငံ ဟူသီသူပုန်များက အစ္စရေးကို ဒုံးကျည်များ နှင့်တိုက်ခိုက်ခဲ့ပြီးနောက် နာရီပိုင်းအကြာတွင် “အစ္စရေးလေတပ်က စစ်ဆင်ရေးဆင်နွှဲပြီး ယီမင်နိုင်ငံသားပေါင်းများစွာကို ဗုံးခိုကျင်းများဆီသို့ ရောက်အောင်တွန်းပို့နိုင် လိုက်ခဲ့သည်ဟု” အစ္စရေးစစ်တပ်ပြောရေးဆိုခွင့်ရှိသူက ကြေညာခဲ့ပါသည်။

ယီမင်နိုင်ငံ၏ မြို့တော် ဆန်နာရှိ ဆိပ်ကမ်းများနှင့် စွမ်းအင်အခြေခံအဆောက်အအုံများ အပါအဝင် စစ်ဘက်ဆိုင်ရာ ရည်ရွယ်ချက်များအတွက် အသုံးပြုနေ သည်ဟု IDF မှ အခိုင်အမာယူဆထားသည့် တည်နေရာ များကို လေကြောင်းမှ တိုက်ခိုက်ခဲ့ခြင်းဖြစ်ပါသည်။ ဟူသီအဖွဲ့ ပြောရေးဆိုခွင့်ရှိသူ တစ်ဦးက X မီဒီယာ (ယခင်တွစ်တာ) မှာ တိုက်ခိုက်မှုကို အတည်ပြုခဲ့ပြီး ပစ်မှတ်အများစုသည် အရပ်ဘက်ကို ရည်ညွှန်းနေကြောင်း၊ IDF ၏ လေကြောင်းတိုက်ခိုက်မှုများကြောင့် ဆာလစ်ဖ် ဆိပ်ကမ်းတွင် ၇ ဦးနှင့် ရာအီစလာဆိပ်ကမ်းရှိ ရေနံစက်ရုံတွင် နှစ်ဦးအပါအဝင် လူကိုးဦးသေဆုံးခဲ့ကြောင်း ဟူသီ မီဒီယာရုံး၏ လက်ထောက်အကြီးအကဲက ပြောကြားခဲ့ပါသည်။ အစ္စရေးတို့သည် မြို့တော်ရှိ ဓာတ်အားပေးစက်ရုံနှစ်ရုံကို တိုက်ခိုက်ခဲ့ပြီး နောက်ဆက်တွဲရလဒ် ပြသနေသည့်ပုံများကို မျှဝေ ခဲ့ကြောင်း  ၎င်းက ရေးသားဖော်ပြခဲ့ပါသည်။

ဟူသီသူပုန်များသည် ဂါဇာကမ်းမြောင်ဒေသတွင် အစ္စရေး စစ်တပ်၏ စစ်ဆင်ရေးကုန်ကျစရိတ်ကို မြင့်တက်စေရန် ပင်လယ်နီအတွင်း အသွားအလာများ သည့် ပင်လယ်ကူးသင်္ဘောများကို ပစ်မှတ်ထားကာတိုက်ခိုက်နေပါသည်။ ယီမင်နိုင်ငံနှင့်ထိစပ်နေသောပင်လယ်နီအတွင်းမှ ရေပိုက်နက်ကို ပိတ်ဆို့ရန် ကြိုးပမ်းနေပြီး လပေါင်းများစွာကြာအောင် တိုက်ခိုက်မှုများ ပြုလုပ်လျက်ရှိပါသည်။ 

အစ္စရေးအနောက် ဂျေရုစလင်အစိုးရမှ ဟူသီလက်နက်ကိုင်များသည် အကြမ်းဖက်သမားများဖြစ်ကြောင်း၊ အစ္စရေး၏ရန်သူ အီရန်ကိုကျောထောက်နောက်ခံပြုထားကြောင်း၊ ပင်လယ်နီအတွင်း ကုန်သင်္ဘောများအား တိုက်ခိုက်နေခြင်းသည် ကမ္ဘာကို ခြိမ်းခြောက်နေကြောင်း၊ ဟူသီသူပုန်များသည် ဂါဇာရှိ ဟားမတ် သူပုန်များကို ထောက်ပံ့နေကြောင်း၊ ၎င်းအရာကိုလည်း ထိရောက်စွာ ဟန့်တားမည်ဖြစ်ကြောင်း ပြောကြားထားသည်။

ကိုးကား-Myanmar National Post

မကွေးတိုင်းဒေသကြီး၊ မြိုင်မြို့နယ်အတွင်း ဒီဇင်ဘာ ၁၈ ရက်နေ့က နယ်မြေရှင်းလင်းစဉ် မြို့၏ တောင်ဘက် မီတာ ၂၀၀၀ ခန့်အကွာသို့အရောက် အကြမ်းဖက်သမား အင်အား ၁၅၀ ဦးခန့်က ၁ ကြိမ်၊ ၁၀၀ ဦးခန့်က ၁ ကြိမ် ပစ်ခတ်တိုက်ခိုက်သဖြင့် လေကြောင်းပစ်ကူယူ၍ ပြန်လည်ပစ်ခတ်နှိမ်နင်းခဲ့ရကြောင်း သိရသည်။

နှိမ်နင်းဆောင်ရွက်စဉ်အတွင်း အကြမ်းဖက်သမား ၁ လောင်း၊ Type-81 ၁ လက်၊ ကျည်အိမ် ၆ ခု၊ ကျည် ၁၈၆ တောင့်၊ ကျည်ကာအင်္ကျီ ၁ ထည် သိမ်းဆည်း ရမိခဲ့ကြောင်း သိရသည်။

ကိုးကား-Myanmar National Post

ပြန်ပေးဆွဲမှု၊ လုယက်မှုများ ဖြစ်ပေါ်ထားသည့် မန္တလေးမြို့တွင် ညဦးပိုင်းကစပြီး လူငယ်များ အပြင်မထွက်ကြရန် လူငယ်များအချင်းချင်း သတိပေးမှုများရှိလာနေကြောင်း သိရသည်။

“ကြားတယ်၊ အိမ်ကလည်း စိုးရိမ်နေတယ်။ မနေ့ကဆို သိပ္ပံလမ်းမကြီးပေါ်မှာတောင် ပြန်တဲ့လူ သိပ်မရှိတော့ဘူး၊ သတိထားသွားလာနေကြရတယ်”ဟု မန္တလေးမြို့ခံလူငယ်တစ်ဦးက ပေါ်ပြူလာနယူးကို ပြောသည်။

မန္တလေးမြို့ပေါ်၌ အခုရက်ပိုင်း လူပျောက်မှုများအပြင် ခိုးမှု၊ လုယက်မှု၊ ဓါးပြတိုက်မှုများလည်း ဆက်တိုက်ဖြစ်ပွားနေသည့်အတွက် မြို့ခံများသည်လည်း စိုးရိမ်ပူပန်နေကြကြောင်း အထက်ပါဒေသခံကပင် ဆိုသည်။

အဆိုပါ အဖြစ်အပျက်များကြောင့် အချို့သော ဆိုင်များ၊ အရောင်းဆိုင်များသည်လည်း (၆)နာရီခွဲမတိုင်ခင် ရုံးစောဆင်းပေးနေပြီး အိမ်ကိုသာစောစောပြန်ကြရန် တိုက်တွန်းမှုများလည်း ပြုလုပ်နေသည်ဟုလည်း သိရသည်။

လတ်တလောတွင် မန္တလေးမြို့ပေါ်ရှိ ရွှေစင်အကယ်ဒမီရွှေဆိုင်မှ ကျပ်သိန်း (၃၀,၀၀၀) ကျော်တန်ဖိုးရှိသည့် ရွှေထည်ပစ္စည်းများ ဓါးပြတိုက်ခံခဲ့ရမှုနှင့် ဆရာဝန်အချင်းချင်း ပြန်ပေးဆွဲကာ သတ်ဖြတ်မှု ဖြစ်စဉ်တို့ကြောင့် မန္တလေးမြို့၏ လုံခြုံရေးမှာ မေးခွန်းထုတ်စရာအခြေအနေဖြစ်နေပြီး မြို့ခံပြည်သူများ၏ စိုးရိမ်ထိတ်လန့်မှုရေချိန်မှာလည်း မြင့်သထက် မြင့်တက်လာနေသည်။

Source: Popular Journal

အသံထက်မြန်သည့် Oreshnik တာလတ်ပစ် ပဲ့ထိန်းဒုံးကျည်စမ်းသပ်ပစ်လွှတ်မှုက လန်ဒန်ကိုခြေတစ်လှမ်းဆုတ်သွားရန် ဖိအားပေးလိုက်ခြင်း ဖြစ်ကြောင်း ဗြိတိန်ဆိုင်ရာ ရုရှားသံအမတ်ကြီး ပြောကြားလိုက်ပါသည်။ 

၎င်းတို့အနေဖြင့် ကြောက်လန့်သွားခြင်းမျိုး မဟုတ်သော်လည်း ဉရောပမှာ ရုတ်တရက် ယခုလို စွမ်းရည် မြင့်မားလွန်းသည့် လက်နက်အသစ်အဆန်းတစ်ခု ပေါ်လာခြင်းကို လက်ခံသွားကြကြောင်း၊ နောက်တစ်ခုက ၎င်းတို့၏ Storm Shadow  တာဝေးပစ်ဒုံးကျည်ကို စိန်ခေါ်တုံ့ပြန်လိုက်ခြင်းဖြစ်ကြောင်း၊ ယူကရိန်းက ၎င်းတို့လက်နက်ဖြင့် တိုက်ခိုက်ပြီး မကြာမီ  ရုရှားဘက်က Oreshnik တာလတ်ပစ်ပဲ့ထိန်း ဒုံးကျည်စမ်းသပ်ပစ်လွှတ်ခဲ့မှုနှင့်ပတ်သက်၍  ဗြိတိန်ဘက်က တရားဝင် တုံ့ပြန်ပြောကြားနေမှုမှာ အတော်လေး မရေမရာဖြစ်နေကြကြောင်း၊ ကျွမ်းကျင်သူတို့ကလည်း Oreshnik စွမ်းရည်များနှင့် ဘီလာရုစ်ပိုင်နက်တွင် ဖြန့်ကျက်ထားမည့် အစီအမံများကို  သေချာလေ့လာခဲ့ကြပြီး  ဉရောပရှိ မည်သည့်နေရာမဆို အချိန်မရွေးရောက်ရှိနိုင်သည်ကို တွက်ဆထားကြကြောင်း သံအမတ်ကြီးက ဆက်လက် ပြောကြားပါသည်။ 

ဘီလာရုစ်နိုင်ငံပိုင်နက်အတွင်း Oreshnik ဒုံးကျည်များချထားပေးရန် ရုရှားသမ္မတဗလာဒီမာပူတင်ကို တောင်းဆိုထားမှုအပေါ် “၂၀၂၅ ခုနှစ် ဒုတိယနှစ်ဝက်တွင် ဆောင်ရွက်ပေးမည်”ဟု ရုရှားသမ္မတက ပြောကြားထားကြောင်း ဘီလာရုစ်အကြီးအကဲ Alexander Lukashenko က ၂၀၂၄ ခုနှစ် ဒီဇင်ဘာ ၆ ရက်တွင် ပြုလုပ်သော ဘီလာရုစ်နိုင်ငံ အဓိပတိကောင်စီ အစည်းအဝေးအပြီးတွင်  ပြောကြားထားပါသည်။ Lukashenko  အဆိုအရ ဘီလာရုစ်တွင် Oreshnik ဒုံးကျည်များဖြန့်ကျက်ရန် နေရာ ၃၀ ရှိကြောင်း ပြောကြားထားပါသည်။

ကိုးကား - TASS

တရုတ်၏ နျူကလီးယားလက်နက်များသည် ထင်ထားသည်ထက် ပို၍အလျင်အမြန် ကြီးထွားလာကြောင်း အမေရိကန်ကာကွယ်ရေးအရာရှိများက ပြောကြား ကြသည်။ လွန်ခဲ့သည့်တစ်နှစ်အတွင်းတွင် အသုံးပြုနိုင်သည့် ဒုံးကျည်ထိပ်ဖူးပေါင်း ၁၀၀ ခန့် တိုးလာကြောင်း၊ အမေရိကန်စစ်ဌာနချုပ် Pentagon ၏ "တရုတ်စစ်အင်အားဆိုင်ရာ အစီရင်ခံစာ" တွင် ယခုနှစ်လယ်ပိုင်း အထိ တရုတ်နိုင်ငံ၏ လက်နက်သိုလှောင်မှုများ၌ ထိပ်ဖူးပေါင်း ၆၀၀ ကျော် ရှိမည်ဖြစ်ကြောင်း ခန့်မှန်းထားပါသည်။ လာမည့်ဆယ်စုနှစ်အကုန်တွင် ၁,၀၀၀ အထိတိုးလာနိုင်ပြီး တရုတ်အစိုးရခေါင်းဆောင်ပိုင်းအနေဖြင့် အနည်းဆုံး ၂၀၃၅ ခုနှစ်အထိ အင်အားကို ဆက်လက် တည်ဆောက်သွားမည်ဖြစ်ကြောင်း အစီရင်ခံစာတွင် ဖော်ပြထားသည်။

တရုတ်စစ်တပ်အနေဖြင့် ၂၀၃၀ ပြည့်နှစ်မတိုင်မီ သိုလှောင်မှုအား အနည်းဆုံး နှစ်ဆတိုးနိုင်ကြောင်း အမေရိကန်ကာကွယ်ရေးအရာရှိများက ၂၀၂၀ ပြည့်နှစ်တွင်ယူဆခဲ့သော်လည်း လွန်ခဲ့သော ၄ နှစ်အတွင်းတွင်သုံးဆနီးပါး တိုးလာနေပြီဖြစ်ကြောင်း ခန့်မှန်းထား ကြသည်။

"လက်ဦးအဖြစ် အသုံးမပြု မူဝါဒ" ဟု ဆိုသည့် တရုတ်၏ နျူကလီးယားချဉ်းကပ်မှုကို ၎င်းအစီရင်ခံစာက မေးခွန်းထုတ်နေကြောင်းဖော်ပြထားသည်။ ကွန်မြူနစ် ပါတီအစိုးရ၏ရှင်သန်မှုကို အကြီးအကျယ် ခြိမ်းခြောက်မည့် ထိုင်ဝမ်တွင် သမားရိုးကျစစ်ရေး ရှုံးနိမ့်မှုနှင့်ရင်ဆိုင်ရပါက တရုတ်အနေနှင့် ဦးဆုံး တိုက်ခိုက်ရန် စဉ်းစားဖွယ်ရှိသည်ဟု ၎င်းအစီရင်ခံစာတွင် ဖော်ပြထားသည်။

၎င်းအစီရင်ခံစာ၌ တရုတ်နိုင်ငံ စစ်အသုံးစရိတ်နှင့် ပတ်သက်၍ ပွင့်လင်းမြင်သာမှုဆိုင်ရာ ကိစ္စများအားလည်းထောက်ပြထားပါသည်။ စစ်တမ်းတစ်ခုအရ ၎င်းဘတ်ဂျက်သည် ပြည်သူ့ကာကွယ်ရေးအသုံးစရိတ်တွင် ကြေညာထားသည်ထက် ၄၀ ရာခိုင်နှုန်းမှ ၉၀ ရာခိုင်နှုန်းအထိ များနေကြောင်း ၎င်းအစီရင်ခံစာ၌ ဖော်ပြထားကြောင်း သိရှိရပါသည်။

ကိုးကား-NHK World