ထရမ့်၏မှတ်ချက်များ ထွက်ပေါ်လာပြီးနောက် ရုရှားက ယူကရိန်းနှင့် ဆွေးနွေးရန်အသင့်ရှိနေဆဲဟု ကရင်မလင်နန်းတော်ပြော

ရုရှားအနေဖြင့် ယူကရိန်းနှင့် ဆွေးနွေးမှုများ တစ်ဆင့်တိုးလုပ်ဆောင်ရန် အသင့်ရှိနေဆဲဖြစ်သော်လည်း ယူကရိန်းဘက်မှ တွေ့ဆုံမှုဆိုင်ရာ အဆိုပြုချက်များ လက်ခံရရှိခြင်းမရှိကြောင်း ကရင်မလင် နန်းတော်ပြောရေးဆိုခွင့်ရှိသူ ဒီမီထရီပက်စ်ကော့ဗ်က ဇူလိုင် ၁၅ ရက်၌ ပြောကြားခဲ့သည်။

“သူတို့ ကတော့ ဝါရှင်တန်မှာတွေ့ချင်တယ်။ ဥရောပမှာ တွေ့ချင်တယ်လို့တော့ ပြောနေကြတာပဲ” ဟု ပက်စ်ကော့ဗ်က ဆိုသည်။

အမေရိကန်နိုင်ငံက ယူကရိန်းအား မြောက်အတ္တလန္တိတ်စာချုပ်အဖွဲ့ (NATO) မှတစ်ဆင့် လက်နက်တွေ ပို့ဆောင်မည်ဟု အမေရိကန်သမ္မတ ဒေါ်နယ်ထရမ့်က ဇူလိုင် ၁၄ ရက်၌ ပြောကြားခဲ့ပြီး ရက်ပေါင်း ၅၀ အတွင်း အပစ်အခတ်ရပ်စဲရေး သဘောတူညီချက်မရရှိပါက ရုရှားကို ရည်ရွယ်သည့် “ပြင်းထန်သော စည်းကြပ်ခွန်များ” ချမှတ်မည်ဟု ခြိမ်းခြောက်ခဲ့ပြီးနောက် ထိုကဲ့သို့မှတ်ချက်များ ထွက်ပေါ်လာခြင်း ဖြစ်သည်။

ထရမ့်၏ ထုတ်ပြန်ချက်များမှာ “လွန်စွာပြင်းထန်လှကြောင်း” နှင့် ထိုပြောကြားချက်များအနက် အချို့ မှာ ရုရှားသမ္မတ ဗလာဒီမာ ပူတင်အား ပုဂ္ဂိုလ်ရေးအရ ရည်ရွယ်ပြောကြားခြင်းဖြစ်ကြောင်း အထက်ပါ ပြောရေးဆိုခွင့်ရှိသူက ဆိုသည်။ “ဝါရှင်တန်က ပြောခဲ့သည်များကို လေ့လာခွဲခြမ်းစိတ်ဖြာဖို့ မိမိတို့ အချိန်အတော်လေးလိုပါသည်” ဟု ၎င်းက ဖြည့်စွက်ပြောခဲ့သည်။

ရုရှားနှင့် ယူကရိန်းတို့သည် တူကီယဲနိုင်ငံ အစ္စတန်ဘူလ်မြို့တွင် ‌မေ ၁၆ ရက်မှ ဇွန် ၂ ရက်အထိ တိုက်ရိုက်တွေ့ဆုံဆွေးနွေးမှု နှစ်ကြိမ်ပြုလုပ်ခဲ့ပြီး ဖြစ်သည်။ ယခင်တွေ့ဆုံဆွေးနွေးမှုများအတွင်း ညှိနှိုင်းခဲ့သည့်အတိုင်း စစ်အကျဉ်းသားများ လဲလှယ်ခြင်းများနှင့် ကျဆုံးစစ်သည်ရုပ်အလောင်းများကို လွှဲပြောင်းခြင်းများ ပြီးစီးပြီးနောက် တတိယအကြိမ် ဆွေးနွေးပွဲကျင်းပရန် နှစ်ဖက်သဘောတူခဲ့ကြကြောင်း ပူတင်က အစောပိုင်း၌ ပြောကြားခဲ့သည်။

ကိုးကား- ဆင်ဟွာ