ထိုင်းဝန်ကြီးချုပ် ပေထုံတန်ရှင် နာဝပ်ထရာသည် ရာထူးမှ နုတ်ထွက်မည် မဟုတ်သလို ပါလီမန်ကိုလည်း ဖျက်သိမ်းမည်မဟုတ်ကြောင်း လက်ရှိ အာဏာရပါတီ အရာရှိတစ်ဦးပြောကြား

လက်ရှိတွင် နိုင်ငံရေးအကျပ်အတည်းများနှင့် ရင်ဆိုင်နေရသော ထိုင်းနိုင်ငံ ဝန်ကြီးချုပ် ပေထုံတန်သည် ရာထူးမှ နုတ်ထွက်ခြင်း သို့မဟုတ် ပါလီမန်ဖျက်သိမ်းခြင်းများ ပြုလုပ်မည်မဟုတ်ကြောင်း Pheu Thai ပါတီ ၏ အကြီးတန်းအရာရှိတစ်ဦးက ဇွန် ၂၁ ရက် (စနေနေ့) တွင် ပြောကြား ခဲ့သည်။

ပေထုံတန်သည် ကမ္ဘောဒီးယားနိုင်ငံနှင့်ဖြစ်ပွားသည့် နှစ်နိုင်ငံ နယ်စပ် ပြဿနာတွင် ကိုင်တွယ်ဖြေရှင်းပုံမှားယွင်းခဲ့မှုကြောင့် ရာထူးမှ နုတ်ထွက်ရန် တောင်းဆိုမှုများ မြင့်တက်နေသော်လည်း နုတ်ထွက်မည် မဟုတ်ကြောင်း ထိုင်းနိုင်ငံခရီးသွားလာရေးဝန်ကြီး Sorawong Thienthong က ဖေ့စ်ဘုတ်စာမျက်နှာတစ်ခုတွင် ပြောကြားခဲ့ပြီး အစိုးရအနေဖြင့် ဆက်လက် လုပ်ဆောင်သွားမည်ဖြစ်ကြောင်း၊ နုတ်ထွက်မည် မဟုတ် ကြောင်းနှင့် ပါလီမန်ကိုလည်း ဖျက်သိမ်းမည်မဟုတ်ကြောင်း ၎င်းက အတည်ပြုပြောကြားခဲ့သည်။ 

ထို့ပြင် ပေထုံတန်သည် ကမ္ဘောဒီးယားဝန်ကြီးချုပ်ဟောင်း ဟွန်ဆန်နှင့် ဖုန်းဖြင့် ဆက်သွယ်ပြောဆိုမှုကိစ္စ ပေါက်ကြားခဲ့ပြီး ထိုင်းပြည်သူများက သူမအပေါ် အကြီးအကျယ် ဒေါသထွက်ခဲ့ကြသည်။ အကြောင်းမှာ အဆိုပါ ဖုန်းပြောဆိုမှုအကြောင်းအရာများတွင် ပေထုံတန်သည် ဟွန်ဆန်အား အလွန်ရိုသေလေးစားပြီး ထိုင်းစစ်တပ်၏ အကြီးတန်းအရာရှိတစ်ဦးကို ဝေဖန်ရှုတ်ချခဲ့သည်ဟု ထင်မြင်ရသောကြောင့်ဖြစ်သည်။

ပေထုံတန်သည် ကမ္ဘောဒီးယား ဝန်ကြီးချုပ်ဟောင်း ဟွန်ဆန်နှင့် ဖုန်း ပြောဆိုမှုကိစ္စအပေါ် တောင်းပန်ခဲ့သော်လည်း လက်ရှိရင်ဆိုင်နေရသည့် နိုင်ငံရေးအကျပ်အတည်းနှင့်ပတ်သက်၍မူ တစ်စုံတရာ ဝေဖန် ပြောဆိုခဲ့ခြင်း မရှိပေ။

အဆိုပါဖုန်းပြောဆိုမှုကိစ္စပေါက်ကြားခဲ့ပြီးနောက် ဇွန် ၁၉ ရက်နေ့ ညနေ ပိုင်းတွင် ထိုင်းနိုင်ငံညွန့်ပေါင်းအစိုးရအဖွဲ့၏ ဒုတိယအကြီးဆုံးပါတီ ဖြစ်သည့် Bhumjaithai ပါတီသည် ညွန့်ပေါင်းအဖွဲ့မှ နုတ်ထွက်ခဲ့သည်။ 

ရှင်နာဝပ်ထရာအစိုးရကို ဆန့်ကျင်သည့် အုပ်စုများအပါအဝင် တက်ကြွ လှုပ်ရှားသူများကလည်း ဇွန် ၂၈ ရက်မှစတင်၍ ဝန်ကြီးချုပ် ပေထုံတန် ရာထူးမှ နုတ်ထွက်ရေး တောင်းဆိုမည့်ဆန္ဒပြပွဲကို ဘန်ကောက်တွင် ပြုလုပ်ရန် စီစဉ်ထားကြသည်။

ကိုးကား -CNA

Photo: thesun.my

ဘာသာပြန်ဆိုသူ- ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃