လူထဲကလူ သိပ်တော်သောလူတစ်ယောက်ဖြစ်လိုလျှင် ပညာလေ့လာသင်ကြား အားထုတ်ရမည်ဖြစ် သည်။ ပညာသည် ဦးနှောက်ကိုကောင်းစွာအလုပ်ပေးနိုင်သဖြင့် စဉ်းစားတွေးခေါ်မှု၊ ဉာဏ်ရည် ဉာဏ်သွေး သာလွန်ထက်မြက်စေသည်။ စွမ်းရည်ပြည့်ဝသော လူ့အသိုက်အဝန်းတစ်ရပ် ပီပြင်စွာအကောင်အထည် ဖော်ရာတွင် လူတစ်ဦးချင်းစီ၏ ကိုယ်စွမ်း၊ ဉာဏ်စွမ်းသည် လွန်စွာအရေးပါလျက်ရှိ သည်။ လူ့ဘဝတစ်လျှောက်တွင် အခက်အခဲဆုံးသော အလုပ်များဖြင့် ပြည့်နှက်နေလေ့ရှိပြီး လောကဓမ္မ၊ လောကဓံတရားများနှင့် ရင်ဆိုင်ကြရာတွင် သူ့နေရာနှင့်သူ အံဝင်ခွင်ကျဖြေရှင်းဆောင်ရွက်နိုင်ရေးမှာမူ အရေးကြီးလှပေသည်။

သက်ဝင်လှုပ်ရှားမှုရှိသော ပြောင်းလဲမှုများကို ခံနိုင်ရည်ရှိရှိဖြင့် ဖြေရှင်းဆောင်ရွက်၍ ဘဝကို ထူထောင်ကြရသည်။ ဘဝရပ်တည်ရေးအတွက် ငွေကြေးသည် ဝင်သက်ထွက်သက်နှင့်အတူဖြစ်တည် လေ့ရှိသည်။  နေ့စဉ်ဘဝ ပိုက်ဆံငွေကြေးရရှိရေး ပုံစံမျိုးစုံ၊ အလုပ်မျိုးစုံ လုပ်ကိုင်ဆောင်ရွက်ကြရသည်။ ကာယ၊ ဉာဏ၊ လုံ့လပြု၍ ဘဝအခြေပြုကာ နိုင်ငံတော်ဘက်စုံဖွံ့ဖြိုးတိုးတက်ရေးကိုပံ့ပိုးကူညီပေးကြသည်။ ကာယလုပ်သားကြီးများသည် အကြောင်းအမျိုးမျိုးကြောင့် ပညာရေးနှင့် ဝေးကွာခဲ့ရပြီး ခွန်အားဗလအရင်းအနှီးဖြင့် အသက်မွေးဝမ်းကျောင်းပြုကြရသည်။ဉာဏလုပ်သားများမှာမူအရိပ်အောက်တွင်ကိုယ်ခန္ဓာမပင်ပန်း တစ်ဖက်တစ်လမ်းမှ နိုင်ငံက အားထားကြရပေသည်။

ပညာရေးသည် ဘဝအဆင့်ဆင့်မြင့်မားရေးအတွက် အခြေခံအုတ်မြစ်ဖြစ်ပေသည်။ ပညာသင်ကြားရာတွင် အဆင်ပြေမှု၊ အဆင်မပြေမှုကြားမှခြေလှမ်းစတင်ရခြင်းဖြစ်သည်။  ဘဝအခက်အခဲနှင့်ပညာသင် ကြားမှုဖြစ်စဉ် ကွဲပြားစွာနားလည်သိရှိမှသာပညာပန်းတိုင် လျှောက်လှမ်းနိုင်မည်ဖြစ်သည်။

နိုင်ငံတစ်နိုင်ငံဘက်စုံဖွံ့ဖြိုးရေးအတွက် ပညာရေးသည် ကဏ္ဍတစ်ခုအနေဖြင့် ထိပ်ဆုံးမှ ရပ်တည်နေလေ့ရှိပြီး စိုက်ပျိုးမွေးမြူရေးလုပ်ငန်းများ အဆင့်မြှင့်တင်ထုတ်လုပ်နိုင်ရေး၊ ကျန်းမာရေးစောင့် ရှောက်မှုလုပ်ငန်းများအောင်မြင်ရေး၊ အဆောက်အအုံနှင့် လမ်းတံတားတည်ဆောက်ရေး၊ အိုင်တီနည်း ပညာမြှင့်တင်ရေး၊ စက်မှုလုပ်ငန်းများအကောင်အထည်ဖော်ရေးအစရှိသောအရေးပါသည့် နယ်ပယ် အသီးသီးတွင် ပညာ၏အခန်းကဏ္ဍကို ကျယ်ကျယ်ပြန့်ပြန့် တွေ့ရှိရမည်ဖြစ်သည်။ ဘဝအုတ်မြစ်ခိုင်ခံ့ အောင်  တည်ဆောက်ကြရာတွင် ပညာရေးသည် အခြေခံအကျဆုံးဖြစ်သည်။

ကျောင်းတွင်းပညာသင်ယူခြင်းကို အစပြု၍ ဘဝကို ပိုမိုတောက်ပအောင် ဆောင်ရွက်ကြရပေသည်။

ပညာအရင်းအနှီးကြီးမားလှသည်။ သင်ယူနိုင်စွမ်းရှိသလောက် ဦးနှောက်ဖွံ့ဖြိုးမှုကို ဖြစ်ပေါ်စေသည်။ ဖြတ်ထိုးဉာဏ်နှင့် ဗဟုသုတအထွေထွေ တိုးပွားရရှိစေရန် များစွာအထောက်အကူပြုသည်။ ပညာလိုအိုသည့်တိုင်သင်ယူနိုင်စွမ်းရှိသဖြင့် ပညာ၏အရေးပါမှုကိုသိရှိနိုင်ပေသည်။

ပညာရေးသည် နိုင်ငံတော်၏ မျှော်မှန်းချက်၊ အခြေခံအုတ်မြစ်ဖြစ်သည်။  စိုက်ပျိုးရေးပညာ၊ မွေးမြူရေး ပညာ၊ စက်မှုပညာရပ်များကို လွယ်လင့်တကူသင်ကြားခွင့်ရရှိမှု   ဦးတည်ချက်ထက်သာလွန်သော အလုပ်အကိုင်အခွင့်အလမ်းရရှိရေး ပန်းတိုင်အထိရည်မှန်းထားပေသည်။ ပညာသင်ကြားသူတိုင်း အနာဂတ်အလင်းတန်းကို မြင်နိုင်ခွင့်ရှိသည်။ ပညာသင်ကြားရာတွင် သင်ကြားရသည့် ဘာသာရပ်တိုင်း အထူးချွန်ဆုံး၊ အထက်မြက်ဆုံးဖြစ်အောင် ကြိုးစားရမည်ဖြစ်သည်။ အားနည်းချက်၊ အားသာချက်များကို မိမိကိုယ်တိုင်သိရှိပြီး ပြုပြင်ပြောင်းလဲနိုင်မှုအလိုက် ကောင်းမွန်သောအခြေအနေသို့ရောက်ရှိအောင်  မနှေးအမြန်အကောင်အထည်ဖော်ရမည်ဖြစ်သည်။ ပညာရေးနှင့် အလုပ်အကိုင် တွဲစပ်ဖော်ဆောင်သည့် ပညာရေးစနစ်တွင် ကျောင်းသား၊ ကျောင်းသူအားလုံး  လိုက်ပါရမည်ဖြစ်သည်။ မိမိနှစ်သက်ရာ ဘာသာရပ်အလိုက်၊ ဝါသနာအလိုက်ရွေးချယ်ပြီး နိုင်ငံ၏စိုက်ပျိုးမွေးမြူရေးအခန်းကဏ္ဍ၊ စက်မှုနည်းပညာ ကဏ္ဍသစ်များကို ပီပီပြင်ပြင်ဖွင့်လှစ်သွားနိုင်မည်ဖြစ်သည်။

သို့ဖြစ်၍ ပညာခေတ်တွင် ပညာရှာဖွေရမည်ဖြစ်သည်။ ပညာရေး အလှမ်းမဝေးရအောင် အနာဂတ်ရင် သွေးများကို ပညာအမွေပေးရမည်ဖြစ်သည်။

ပညာရည်အဆင့်အတန်းမြင့်မားသော နိုင်ငံအများစုသည် ခေတ်မီဖွံ့ဖြိုးတိုးတက်ကြသည်။ ပညာရေး အဆင့်မြင့်မားမှုမှတစ်ဆင့်  တီထွင်ဆန်းသစ်မှုကိုဖြစ်စေသည်။ တိုးတက်မှုအရင်းခံ အခြေခံပညာရေး သည် အဓိကဖြစ်ပေသည်။ အနာဂတ်ကာလတွင် သာမန်ဘွဲ့တစ်ခုတည်းဖြင့် ရပ်တည်နိုင်ရေး ခက်ခဲလာ နိုင်သည်။ ပညာခေတ်တွင် အကျုံးဝင်ပါဝင်မည့် ဘွဲ့လွန်ပညာ၊ ပါရဂူပညာတွေပါရရှိလာပြီး  အခြား သူများထက် အဘက်ဘက်ကသာလွန်ရေး  ကြိုးစားလုံ့လပြုရမည်ဖြစ်သည်။ ငယ်စဉ်အခါ ပညာရှာ ချိန်တွင် ဆရာ၊ ဆရာမများ သင်ကြားလမ်းညွှန်မှုကို ခံယူလျက် ရည်မှန်းချက်ကိုယ်စီ၊ ဘဝအိပ်မက် ကိုယ်စီဖြင့်ရှေ့သို့ချီတက်ရမည်ဖြစ်သည်။  ပညာသင်ကြားတတ်မြောက်ပြီးချိန်၌လည်း ဆင့်ကဲပညာများ တိုးပွားရရှိအောင် စဉ်ဆက်မပြတ် ကြိုးစားကြရမည်ဖြစ်သည်။ပညာသင်ကြားတပည့်ဘဝမှ ကိုယ်တိုင် ဆရာ၊ ဆရာမအဖြစ် လက်ဆင့်ကမ်းပညာသင်ကြားမျှဝေပေးနိုင်သည့် နိုင်ငံအားထား လူချွန်လူ ကောင်းများအဖြစ် ပါဝင်ခွင့်ရှိပေသည်။

မျက်မှောက်ကာလသည် အသိပညာ၊ အတတ်ပညာပြည့်စုံသော ပညာတတ်များပေါများလာစေရေး ကျောင်းနေအရွယ်ကလေးများအားလုံး စဉ်ဆက်မပြတ် သာတူညီမျှ ပညာသင်ကြားခွင့် အခွင့်အလမ်းများ ပိုင်ဆိုင်ရရှိနေချိန်ဖြစ်သည်။ နိုင်ငံတော်၏ အထူးပညာရေး မျှော်မှန်းဆောင် ရွက်မှုအဖြစ် ကျောင်းအပ်နှံရာတွင် ပြဋ္ဌာန်းစာအုပ်၊ ဗလာစာအုပ်၊  ခဲတံ၊ ဘောပင်များ အခမဲ့ရယူလျက် ကျောင်းသား၊ကျောင်းသူကလေးများကျောင်းနေပျော်အောင်စွမ်းဆောင်မှုဖြစ်သည်။ ကျောင်းနေ အရွယ် ကျောင်းသား၊ ကျောင်းသူကလေးများ ပညာရေးတွင်  ဆုံးခန်းတိုင်ပြီးမြောက်အောင်သင်ယူလျက် ပိုမိုကောင်းမွန်သောပညာရေးစနစ်ကို ဦးတည်အကောင်အထည်ဖော်ရမည်ဖြစ်သည်။

အခြေခံပညာ၊ တက္ကသိုလ်ပညာ၊ အသက်မွေးဝမ်းကျောင်းပညာရပ်များသင်ယူပြီးမြောက်ပြီးနောက် သက်ဆိုင်ရာ လုပ်ငန်းခွင်အသီးသီးသို့ ဝင်ရောက်လုပ်ကိုင်နိုင်မည့် အခွင့်အလမ်းများလည်း တစ်ပါတည်း လမ်းပွင့်သွားစေမည်ဖြစ်သည်။

အသိနှင့်ပညာသည်  ယှဉ်တွဲတည်ရှိနေသည့် သဘောတရားဖြစ်သည်။ ပညာတတ်ဖြစ်အောင် ကျင့်ဆောင်ပြီး ဘဝကို တိုးတက်အောင်ဆောင်ရွက်ကြရမည်ဖြစ်သည်။ အသိပညာ၊ အတတ်ပညာဖြင့် လူ့အရည်အချင်းပြောင်လက်အောင် စွမ်းဆောင်ရမည်ဖြစ်သည်။နိုင်ငံ၏အနာဂတ်နှင့် ပညာရည်မြင့်မားရေးအခန်းကဏ္ဍသည် ထင်ရှားလင်းလက်တောက်ပနေရမည်ဖြစ်သည်။ နိုင်ငံရေး၊ စီးပွားရေး၊  လူမှုရေးနယ်ပယ်အသီးသီးတွင် အရေးပါပြောင်မြောက်သည့်ပညာအရင်းအမြစ်ဖြင့် မှန်ကန်သောတွေးခေါ်ပုံ၊ အခက်အခဲမျိုးစုံ ကျော်လွှားနိုင်ပုံကို လက်တွေ့ကျကျ သိရှိရမည်ဖြစ်သည်။တစ်နည်းအားဖြင့် “နိုင်ငံတော်ဖွံ့ဖြိုးဖို့ ပညာရေးကို အားပေးစို့”ကြွေးကြော်မှုသည် ပညာရည် အဆင့်အတန်းမြင့်မားမှုမှသည် နိုင်ငံတော်ဖွံ့ဖြိုးအောင်စွမ်းဆောင်နိုင်မည့်ယုံကြည်ချက်ကို ကိုယ်စား ပြုပေသည်။လူ့စွမ်းအားအရင်းအမြစ်ကောင်းကို မွေးထုတ်ပေးနိုင်မှုကိုလည်းအထောက်အကူပြုစေသည်။ အလားတူ ပညာရေးသည် နိုင်ငံတည်ငြိမ်အေးချမ်းရေး၊ စီးပွားရေး၊ လူမှုရေး၊ အုပ်ချုပ်ရေး၊ ကျန်းမာရေး အစရှိသော ကဏ္ဍများကို အမှန်နှင့်အမှား လမ်းပြပေးနိုင်သည်။ မိသားစုနှင့် ဝန်းကျင် တစ်ခုလုံးကို ပညာပြည့်ဝနှလုံးလှအောင်စွမ်းဆောင်နိုင်စွမ်းရှိသည့်ပညာသင်ကြား၊ သင်ယူမှုဖြစ်စဉ်များကို ရပ်တန့်မပစ်ဘဲဝိုင်းဝန်းကြိုးပမ်းကြပါစို့ဟု တိုက်တွန်းရေးသားလိုက်ရပါသည်။    ။

MWD

Photo- Apeejay Newsroom

နိုင်ငံသားတိုင်းအတွက် မှန်ကန်သော အသိတရား

လူတိုင်းသည်ဘဝတစ်ခုကို တည်ဆောက်နေကြသည်။ ဤသို့တည်ဆောက်ရာတွင်  အောင်မြင်သောဘဝမျိုးကို တည်ဆောက်ရန်လိုအပ်သည်။ အောင်မြင်သောဘဝမျိုးကို  တည်ဆောက်နိုင်ရန်အတွက် လိုအပ်သောအရာတစ်ခုမှာ မှန်ကန်သောအသိတရားပင်ဖြစ်သည်။ မှန်ကန်သောအသိတရားဖြင့်တည်ဆောက်မှသာ အောင်မြင်သောဘဝမျိုးကို ပိုင်ဆိုင်ရမည်။ အကယ်၍ မှားယွင်းသော အသိတရားဖြင့်တည်ဆောက်ပါက  ဆုတ်ယုတ်နိမ့်ကျသောဘဝမျိုးကိုသာပိုင်ဆိုင်ရမည်။ ဤသဘောအတိုင်းပင် နိုင်ငံသူ၊ နိုင်ငံသားများသည် နိုင်ငံကိုတည်ဆောက်နေကြသည်။   မှန်ကန်သော  အသိတရားများဖြင့် တည်ဆောက်ပါက  အောင်မြင်သောနိုင်ငံမျိုးကို ပိုင်ဆိုင်ရမည်။ အကယ်၍ မှားယွင်းသော အသိတရားများဖြင့် တည်ဆောက်ပါက ဆုတ်ယုတ်နိမ့်ကျနေသော နိုင်ငံမျိုးကိုပိုင်ဆိုင်ရမည်။ လူတစ်ဦး၏ ဘဝအောင်မြင်နေသလော သို့မဟုတ် ဆုတ်ယုတ်နေသလောဆိုသည်ကိုကြည့်ပြီး ထိုသူ၏အသိတရားများ မှန်ကန်နေသလော  သို့မဟုတ် မှားယွင်းနေသလော ဆိုသည်ကိုခန့်မှန်းကြည့်ရှုနိုင်သည်။ ထို့အတူ နိုင်ငံတစ်နိုင်ငံအောင်မြင်နေသလော   သို့မဟုတ် ဆုတ်ယုတ်နိမ့်ကျနေသလော ဆိုသည်ကိုကြည့်ပြီး ထိုနိုင်ငံရှိလူမျိုးတို့၏ အသိတရားများ  မှန်ကန်မှုရှိနေသလော  သို့မဟုတ်  မှားယွင်းနေသလောဆိုသည်ကို ခန့်မှန်းသိရှိနိုင်သည်။

မှန်ကန်သောအသိတရားဆိုသည်မှာ

မှန်ကန်သောအသိတရားဆိုသည်မှာ ကျွန်ုပ်တို့အမိနိုင်ငံတွင် လူလာဖြစ်ရခြင်းမှာ အမိနိုင်ငံအတွက် ကောင်းကျိုးမှန်သမျှကို ဆောင်ရွက်ရန်နှင့် အနစ်နာခံပေးဆပ်မှုမှန်သမျှကို ဆောင်ရွက်ပေးရမည့် တာဝန်ဖြင့်  ရောက်ရှိလာခြင်းဖြစ်သည်။   အမိနိုင်ငံသည် ကျွန်ုပ်တို့အမိနိုင်ငံသားများအတွက် အနစ်နာခံရန်မဟုတ်။ ကျွန်ုပ်တို့နိုင်ငံသားများကသာ အမိနိုင်ငံအတွက် အနစ်နာခံပေးဆပ်နေရမည်။ အမိနိုင်ငံတည်ငြိမ်အေးချမ်းလာစေရန်၊ ဖွံ့ဖြိုးတိုးတက်လာစေရန် ပြည်ပနိုင်ငံသားတွင် တာဝန်မရှိ၊ မိမိတို့နိုင်ငံသားများတွင်သာ တာဝန်ရှိသည်။ ကျွန်ုပ်တို့နိုင်ငံသားများသည် အမိနိုင်ငံအပေါ် ရယူလိုသူများအဖြစ် ရပ်တည်နေရန်မဟုတ်။ ပေးဆပ်အနစ်နာခံလိုသူများအဖြစ် ရပ်တည်နေရမည်။ ဤအချက်များသည် မှန်ကန်သောအသိတရား၏ သဘောများဖြစ်ကြသည်။ ကျွန်ုပ်တို့အသိတရားများ မှန်ကန်နေမှသာ ကျွန်ုပ်တို့အားလုံးသည် အမိနိုင်ငံ၏ အားကိုးရသည့် အားများအဖြစ် ရပ်တည်နိုင်ကြမည်ဖြစ်သည်။

မှန်ကန်သောအသိတရားနှင့် နိုင်ငံကြံ့ခိုင်မှု

ကမ္ဘာပေါ်တွင် အင်အားကြံ့ခိုင်တောင့်တင်းသော နိုင်ငံများရှိသကဲ့သို့ အင်အားကြံ့ခိုင်တောင့်တင်းခြင်း မရှိသောနိုင်ငံများလည်းရှိသည်။ နိုင်ငံချင်းတူပါလျက်နှင့် ကြံ့ခိုင်မှုအားချင်း ခြားနားသွားရသည်မှာ နိုင်ငံ၏လူမျိုးတစ်မျိုးနှင့်တစ်မျိုး မှန်ကန်သောအသိတရားရှိပုံခြင်း မတူညီကြသောကြောင့်ဖြစ်သည်။ မှန်ကန်သော အသိတရားရှိသည့်လူမျိုးက အမြော်အမြင်ကြီးမားစွာ၊  စည်းလုံးညီညွတ်စွာ  နေထိုင်သည်။

တစ်ဦးကိုတစ်ဦး  အပြန်အလှန် ကာကွယ်စောင့်ရှောက်ကြသည်။ တစ်ဦး၏တိုးတက်ရာ တိုးတက်ကြောင်းကို တစ်ဦးကကြိုးပမ်း ဆောင်ရွက်ပေးသည်။ တစ်ဦးကိုတစ်ဦး အပြန်အလှန် သစ္စာစောင့်သိကြသည်။ ထို့ကြောင့် နိုင်ငံသားအချင်းချင်း အပြန်အလှန်ယုံကြည်အားကိုးမှုများ ထားရှိလာကြပြီး စည်းလုံးညီညွတ်လာကြသည်။    နိုင်ငံသားများ စည်းလုံးညီညွတ်လာခြင်းကြောင့်    နိုင်ငံ၏အားကြံ့ခိုင် တောင့်တင်းလာသည်။ နိုင်ငံသားများ၏ အသိတရား မှန်ကန်မှုရှိနေခြင်းကြောင့်   ဤသို့နိုင်ငံ၏အား ကြံ့ခိုင်တောင့်တင်းလာခြင်းဖြစ်သည်။   သို့သော် မှားယွင်းသော အသိတရားရှိသည့်သူများက အမြော်အမြင်နိမ့်ကျစွာ၊ စိတ်ဝမ်းကွဲပြားစွာနေထိုင်သည်။ တစ်ဦးကိုတစ်ဦး အပြန်အလှန်တိုက်ခိုက် ဖျက်ဆီးကြသည်။ တစ်ဦး၏ပျက်စီးရာ ပျက်စီးကြောင်းကို တစ်ဦးက ကြံဆောင်ကြိုးပမ်းကြသည်။ တစ်ဦးနှင့်တစ်ဦး အပြန်အလှန်သစ္စာ ဖောက်ဖျက်ကြသည်။ ထို့ကြောင့် နိုင်ငံသားအချင်းချင်း အပြန်အလှန်ယုံကြည်မှုကင်းမဲ့လာကြပြီး  စည်းလုံးညီညွတ်မှု ပြိုကွဲလာသည်။ နိုင်ငံသားများ စည်းလုံးညီညွတ်မှုပြိုကွဲလာခြင်းကြောင့်   နိုင်ငံ၏ အားယုတ်လျော့ကျဆင်းလာသည်။ နိုင်ငံသားများ၏ အသိတရားများ မှားယွင်းနေခြင်းကြောင့်  ဤသို့နိုင်ငံ၏ အားယုတ်လျော့ကျ ဆင်းလာရခြင်းဖြစ်သည်။   နိုင်ငံတစ်နိုင်ငံ၏အား ကြံ့ခိုင်တောင့်တင်းနေမည်လော သို့မဟုတ် ယုတ်လျော့ ကျဆင်းနေမည်လောဆိုသည်မှာ လူမျိုး၏ အသိတရားများ မှန်ကန်နေသလော သို့မဟုတ် မှားယွင်းနေသလောဆိုသည့် အချက်ပေါ်တွင် များစွာမူတည်သည်။ ဤအချက်ကို နှလုံးသွင်းဆင်ခြင်ပြီး  အမိနိုင်ငံတော်ကြီး၏အား   ကြံ့ခိုင်တောင့်တင်းနေစေရန်အတွက် ကျွန်ုပ်တို့နိုင်ငံသားများ၏ အသိတရားမှန်ကန်နေရမည်။

မှန်ကန်သောအသိတရားနှင့် နိုင်ငံဖွံ့ဖြိုးမှုကမ္ဘာပေါ်တွင် အချို့သောနိုင်ငံများသည် ခေတ်မီဖွံ့ဖြိုးတိုးတက်လျက် ရှိနေကြပြီး အချို့သောနိုင်ငံများသည်  ခေတ်နောက်ကျကျန်ရစ်ပြီး ဆုတ်ယုတ်နိမ့်ကျလျက်ရှိနေကြသည်။ နိုင်ငံချင်းတူပါလျက်နှင့် ခေတ်မီဖွံ့ဖြိုးတိုးတက်မှုချင်း ခြားနားနေရသည်မှာ  နိုင်ငံ၏လူမျိုးတစ်မျိုးနှင့်တစ်မျိုး မှန်ကန်သောအသိတရားရှိပုံချင်း  မတူညီကြသောကြောင့်ဖြစ်သည်။   မှန်ကန်သော အသိတရားရှိသည့်လူမျိုးက နိုင်ငံ၏အခြေအနေအရပ်ရပ်ကို ပိုမိုတိုးတက်မြင့်မားသည့် အခြေအနေကောင်းများအဖြစ်သို့  ရောက်ရှိအောင် တာဝန်သိစိတ်မြင့်မားစွာ  ကြိုးပမ်းဆောင်ရွက်သည်။ နိုင်ငံတွင်ကြုံတွေ့နေရသောပြဿနာ၊ အခက်အခဲ၊ အန္တရာယ်များဖြေရှင်းရေးသည်  မိမိနိုင်ငံသားများတွင်လည်း တာဝန်ရှိသည်ဟုခံယူပြီး နိုင်ငံတော်အစိုးရနှင့် တက်ကြွစွာပူးပေါင်းဖြေရှင်းသည်။ နိုင်ငံ၏ တော၊ တောင်၊ ရေ၊ မြေ၊ သယံဇာတအရင်းအမြစ်များကို ထိရောက်အကျိုးရှိစွာ စနစ်တကျအသုံးချပြီး နိုင်ငံတွင်ဖြစ်ပေါ်နေသည့် ရှားပါးမှု၊ ပြတ်လပ်မှု၊ လိုအပ်မှုအမျိုးမျိုး ပြည့်ဝသွားအောင် ဖြည့်ဆည်းပေးသည်။ နိုင်ငံတော်၏ ရည်မှန်းချက်ပန်းတိုင်၊  နိုင်ငံတော်က  အကောင်အထည်ဖော် ဆောင်ရွက်နေသည့်လုပ်ငန်းများသည် မိမိတို့နိုင်ငံသားများ ကောင်းကျိုးအတွက်ဖြစ်သည်ဟု  အလေးအနက်ယုံကြည်ပြီး  တက်ကြွစွာပူးပေါင်း ပါဝင်ဆောင်ရွက်သည်။   နိုင်ငံတော်ကို   မိမိတို့အတ္တကောင်းကျိုးအတွက်  အသုံးမချဘဲ နိုင်ငံတော်ကောင်းကျိုးအတွက်  မိမိတို့၏ဘဝကို  အသုံးချစတေးသည်။ ဤသို့မှန်ကန်သော အသိတရားများကြောင့်  နိုင်ငံခေတ်မီဖွံ့ဖြိုး တိုးတက်လာသည်။

သို့သော် မှားယွင်းသော အသိတရားရှိသည့်သူများကမူ နိုင်ငံ၏ကောင်းမွန်နေသော အခြေအနေအရပ်ရပ်ကို  ဆုတ်ယုတ်ဆိုးဝါးသည့် အခြေအနေဆိုးများအဖြစ်သို့ရောက်ရှိအောင်  စီမံဖန်တီးသည်။ နိုင်ငံကြုံတွေ့နေရသော ပြဿနာ၊ အခက်အခဲ၊ အန္တရာယ်များကို ပိုမိုဆိုးဝါးလာစေရန် ကောက်ကျစ်စဉ်းလဲစွာ  ကြံစည်လုပ်ဆောင်သည်။  နိုင်ငံ၏ တော၊ တောင်၊ ရေ၊ မြေ သယံဇာတများကို အသွင်သဏ္ဌာန်အမျိုးမျိုးဖြင့် တိုက်ခိုက်ဖျက်ဆီးပြီး   နိုင်ငံတွင်   ရှားပါးမှု၊ ပြတ်လပ်မှု၊ ကျပ်တည်းမှုအမျိုးမျိုးဖြစ်အောင် အရှက်အကြောက်ကင်းမဲ့စွာ ဆောင်ရွက်သည်။ နိုင်ငံတော်၏ ရည်မှန်းချက်ပန်းတိုင်၊ နိုင်ငံတော်က အကောင်အထည်ဖော် ဆောင်ရွက်နေသည့်  လုပ်ငန်းများကို ကဲ့ရဲ့ပြစ်တင်မှု အမျိုးမျိုးပြုလုပ်သည်။    နိုင်ငံကောင်းကျိုးအတွက် မိမိတို့ဘဝကိုပေးလှူခြင်း မပြုဘဲ မိမိတို့အတ္တကောင်းကျိုး အတွက် နိုင်ငံတော်ကို အသွင်သဏ္ဌာန်အမျိုးမျိုးဖြင့် အသုံးချစတေးသည်။

ဤသို့မှားယွင်းသော အသိတရားများကြောင့် နိုင်ငံခေတ်နောက်ကျပြီး ဆုတ်ယုတ်နိမ့်ကျလာရသည်။ နိုင်ငံတစ်နိုင်ငံ ခေတ်မီဖွံ့ဖြိုးတိုးတက်သည်လော သို့မဟုတ် ခေတ်နောက်ကျပြီး ဆုတ်ယုတ်နိမ့်ကျနေမည်လော  ဆိုသည်မှာ  လူမျိုး၏အသိတရားမှန်ကန်မှုရှိနေသလော  သို့မဟုတ်  မှားယွင်းနေသလောဆိုသည့် အချက်ပေါ်တွင်  များစွာမူတည်သည်။  ဤအချက်ကို နှလုံးသွင်းဆင်ခြင်ပြီး အမိနိုင်ငံတော်ကြီး ခေတ်မီဖွံ့ဖြိုး တိုးတက်နေစေရန်အတွက် ကျွန်ုပ်တို့နိုင်ငံသားများ၏ အသိတရားများမှန်ကန်နေရမည်။

မှန်ကန်သောအသိတရားနှင့် နိုင်ငံအရှိန်အဝါ ကမ္ဘာပေါ်တွင် အချို့သောနိုင်ငံများသည် အရှိန်အဝါကြီးမားစွာရပ်တည်နေကြပြီး အချို့သောနိုင်ငံများသည် အရှိန်အဝါနိမ့်ကျစွာ ရပ်တည်နေကြသည်။ နိုင်ငံချင်းတူပါလျက် မည်သည့်အတွက်ကြောင့် နိုင်ငံ၏အရှိန်အဝါချင်း  ခြားနားနေရပါသနည်း။ အဖြေမှာ နိုင်ငံ၏ လူမျိုးတစ်မျိုးနှင့်တစ်မျိုး မှန်ကန်သော အသိတရားရှိပုံချင်း ခြားနားနေသောကြောင့်ဖြစ်သည်။ မှန်ကန်သော အသိတရားရှိသည့်လူမျိုးက   နိုင်ငံ၏အနာဂတ်ရေးကို မျှော်ကိုးပြီး  အချင်းချင်းစည်းလုံးညီညွတ်စွာ   နေထိုင်သည်။  ထို့ကြောင့်  ပြည်တွင်းစည်းလုံး ညီညွတ်မှုမြင့်မားသော  နိုင်ငံအဖြစ် ကမ္ဘာ့အလယ်ရပ်တည်ရသည်။ ဆင်ခြင်တုံတရားကြီးမားစွာ နိုင်ငံအတွက် မည်သည့်အမှားမျိုးကိုမှ မကျူးလွန်ဘဲ  တိုးတက်အောင်မြင်စေမည့် အမှန်တရားဟူသမျှကိုသာ ရွေးချယ်ဆောင်ရွက်သည်။ ထို့ကြောင့် အသိသတိကြီးမားပြီး အမှားအမှန်ဝေဖန်ပိုင်းခြားနိုင်စွမ်းမြင့်မားသည့် နိုင်ငံအဖြစ်  အသိအမှတ်ပြုခြင်းခံရသည်။   အရှက်အကြောက်တရား နှစ်ပါးနှင့်အညီ ကျင့်ကြံနေထိုင်ပြီး မကောင်းမှုမှန်သမျှကိုရှောင်ရှားပြီး   ကောင်းမှုမှန်သမျှကို ပြုမူဆောင်ရွက်သည်။ ထို့ကြောင့် ကိုယ်ကျင့်သီလမြင့်မားသောနိုင်ငံအဖြစ် လေးစားတန်ဖိုးထားခြင်းခံရသည်။ ပြည်ပနိုင်ငံများ၏သပ်လျှိုသွေးခွဲစည်းရုံးမှုမှန်သမျှကို လုံးဝလက်မခံဘဲ နိုင်ငံတော်အပေါ်ကိုသာ  သစ္စာစောင့်သိသည်။  ထို့ကြောင့် စိတ်ဓာတ်ကြံ့ခိုင်သော နိုင်ငံအဖြစ် ဂုဏ်သိက္ခာရှိစွာရပ်တည်ရသည်။ ဤသို့နိုင်ငံ၏ အရှိန်အဝါကြီးမားလာရခြင်းမှာ နိုင်ငံသားများ၏ အသိတရားများ မှန်ကန်မှုရှိနေသောကြောင့်ဖြစ်သည်။ သို့သော် မှားယွင်းသော အသိတရားရှိသည့်   လူမျိုးကမူ  ဆင်ခြင်တုံတရားကင်းမဲ့စွာ၊  စိတ်ဝမ်းကွဲပြားစွာနေထိုင်သည်။ ထို့ကြောင့် ပြည်တွင်းစည်းလုံးညီညွတ်မှုမရှိသောနိုင်ငံအဖြစ်  ကမ္ဘာ့အလယ်ရပ်တည်ရသည်။ ဆင်ခြင်တုံတရားကင်းမဲ့စွာ၊  နိုင်ငံအတွက်  အမှားဟူသမျှကို   တက်ကြွစွာကျူးလွန်ပြီး  အမှန်ဟူသမျှကိုလုံးဝမဆောင်ရွက်ဘဲနေသည်။ ထို့ကြောင့် အသိသတိကင်းလွတ်ပြီး အမှားအမှန်ဝေဖန်ပိုင်းခြားနိုင်စွမ်းမရှိသည့်နိုင်ငံအဖြစ်  အသိအမှတ်ပြုခြင်းခံရသည်။ အရှက်နှင့်အကြောက်တရား နှစ်ပါးကင်းမဲ့စွာကောင်းမှုမှန်သမျှကို မဆောင်ရွက်ဘဲ မကောင်းမှုမှန်သမျှကိုသာ ရွေးချယ်ကျူးလွန်သည်။ ထို့ကြောင့် အရှက်အကြောက်တရား နှစ်ပါးကင်းမဲ့ပြီး ကိုယ်ကျင့်သီလနိမ့်ကျသောနိုင်ငံအဖြစ် ဝိုင်းဝန်းအထင်အမြင် သေးခြင်းကိုခံရသည်။  ပြည်ပနိုင်ငံများ၏ သပ်လျှိုသွေးခွဲစည်းရုံးမှု မှန်သမျှကို လွယ်လင့်တကူလက်ခံပြီး   နိုင်ငံအပေါ်သစ္စာအမျိုးမျိုး ဖောက်ဖျက်သည်။ ထို့ကြောင့် စိတ်ဓာတ်ညံ့ဖျင်းသော နိုင်ငံအဖြစ် နိုင်ငံတကာ၏အထင်အမြင်သေးခြင်းကိုခံရသည်။  ဤသို့နိုင်ငံ၏အရှိန်အဝါနိမ့်ကျနေရခြင်းမှာ နိုင်ငံသားများ၏အသိတရားများ မှားယွင်းနေသောကြောင့်ဖြစ်သည်။ နိုင်ငံတစ်နိုင်ငံအရှိန်အဝါကြီးမားစွာ ရပ်တည်နေမည်လော  သို့မဟုတ်  အရှိန်အဝါနိမ့်ကျစွာ ရပ်တည်နေမည်လောဆိုသည်မှာ နိုင်ငံရှိလူမျိုးသည် မှန်ကန်သောအသိတရားများရှိနေသလော သို့မဟုတ်  မှားယွင်းသော အသိတရားများရှိနေသလောဆိုသည့် အချက်ပေါ်တွင်  များစွာမူတည်သည်။ ဤအချက်ကို  အလေးအနက်ဆင်ခြင်ပြီး အမိနိုင်ငံတော်ကြီး၏အရှိန်အဝါကြီးမားနေစေရန်အတွက်  ကျွန်ုပ်တို့နိုင်ငံသားများ၏ အသိတရားများမှန်ကန်နေရမည်။

အသိတရားမှန်ကန်ရန် စာဖတ်ပါ

ကျွန်ုပ်တို့၏အသိတရားများ အစဉ်မှန်ကန်မှုရှိနေစေရန်  ကြိုးပမ်းဆောင်ရွက်နေရမည့် နည်းလမ်းများရှိသည်။ ယင်းနည်းလမ်းများထဲတွင်  ကျွန်ုပ်တို့အားလုံး  အမြန်ဆုံး၊ အလွယ်ကူဆုံး  အချိန်မရွေး၊ နေရာမရွေး၊ အခါမရွေး အသုံးပြုနိုင်သောနည်းလမ်းမှာ စာဖတ်ခြင်းနည်းလမ်းပင်ဖြစ်သည်။  ပညာရှိသူတော်ကောင်းများ ရေးသားထားသော စာအုပ်စာပေများကို အချိန်မရွေး၊ အခါမရွေး၊ နေရာမရွေး ကျွန်ုပ်တို့ဖတ်ရှုလေ့လာနိုင်သည်။ ဖတ်ရှုလေ့လာရန် ကျွန်ုပ်တို့ဆန္ဒပြင်းပြနေရမည်။ စာဖတ်ရန်ဆန္ဒပြင်းပြလျှင် စာအုပ်စာပေများကို မပြတ်ဖတ်ရှု လေ့လာနေမည်သာဖြစ်သည်။ စာအုပ်စာပေများကို ဖတ်ရှုလေ့လာနေခြင်းသည်  အသိတရားမှန်ကန်နေရန် အချက်(၇)ချက်ကို တစ်ပြိုင်နက်တည်း ဆောင်ရွက်နေခြင်းဖြစ်သည်။ ပထမအချက်မှာ ပညာရှိသူတော်ကောင်းများထံ ဆည်းကပ်နေခြင်း၊ ဒုတိယအချက်မှာ ပညာရှိသူတော်ကောင်းများ၏အဆုံးအမကို နာယူနေခြင်း၊ တတိယအချက်မှာ  မိမိမသိရှိသေးသည့် မှန်ကန်သောအသိတရားများကို    ထပ်မံစုဆောင်းနေခြင်း၊ စတုတ္ထအချက်မှာ မိမိတွင်ရှိသည့်မှားယွင်းနေသော အသိတရားများကို ပြုပြင်တည့်မတ်ပေးနေခြင်း၊ ပဉ္စမအချက်မှာ မိမိစဉ်းစားဆင်ခြင် ထိုးထွင်းသိမြင်နိုင်စွမ်းကို မြှင့်တင်ပေးနေခြင်း   စသည့်အချက်များကို တစ်ချိန်တည်း၊ တစ်ပြိုင်တည်း ဆောင်ရွက်နေခြင်းဖြစ်သည်။ ဆဋ္ဌမအချက်မှာ မိမိဘဝ၏ တည်ငြိမ်အေးချမ်းမှုနှင့် တိုးတက်အောင်မြင်မှုကိုတည်ဆောက်နေခြင်း၊ သတ္တမအချက်မှာ ပစ္စုပ္ပန်အချိန်များကို   တန်ဖိုးရှိစွာအသုံးချနေခြင်း စသည်တို့ဖြစ်ကြသည်။ ဤအချက်(၇)ချက်ကြောင့်   မှန်ကန်သောအသိတရားဖြစ်ပေါ်လာခြင်းဖြစ်သည်။

စာဖတ်ရာတွင် လိုက်နာရမည့်နည်းစနစ် စာပေများကိုဖတ်ရှုရာတွင်    နည်းစနစ်မှန်ကန်မှသာ အကျိုးတရားများစွာရရှိမည်။ နည်းစနစ်လွဲမှားစွာ  ဖတ်ရှုလေ့လာနေပါက  အကျိုးတရားမရရှိနိုင်ပါ။ မှန်ကန်သောနည်းစနစ်ဆိုသည်မှာ များများဖတ်၊ များများမှတ်၊ အလေးအနက်ဆင်ခြင် သုံးသပ်ဟူ၍ဖြစ်သည်။ များများဖတ်ဆိုသည်မှာ  ပညာရှိသူတော်ကောင်းများ၏စာများကို များများရှာဖွေဖတ်ရှုခြင်းဖြစ်သည်။ များများမှတ်ဆိုသည်မှာ ဖတ်ရှုလေ့လာထားသည့်   စာပေများအနက်မှ သဘောတရား၊ နိယာမ၊ သင်ခန်းစာအမျိုးမျိုးကို  မှတ်သားထားခြင်းဖြစ်သည်။  အလေးအနက်ဆင်ခြင်သုံးသပ်ဆိုသည်မှာ လောကကြီး၏ ဖြစ်စဉ်ဖြစ်ရပ်များကိုလည်းကောင်း၊ နေ့စဉ်ဘဝအတွေ့အကြုံများကို လည်းကောင်း၊ နိုင်ငံ၏ပစ္စုပ္ပန်အခြေအနေ အရပ်ရပ်ကိုလည်းကောင်း မှတ်သားထားသည့် အချက်အလက်များနှင့် အလေးအနက်ဆင်ခြင် သုံးသပ်အဖြေရှာခြင်းဖြစ်သည်။ ထို့ကြောင့်  များများဖတ်၊ များများမှတ်၊ အလေးအနက်ဆင်ခြင်သုံးသပ်ဟူသော မှန်ကန်သောနည်းစနစ်ဖြင့် စာပေများကိုဖတ်ရှုလေ့လာနေပါက အကျိုးတရားအမျိုးမျိုးကို ရရှိမည်ဖြစ်သည်။

စာဖတ်ခြင်းကြောင့်ရရှိသည့်အကျိုးတရားများ

စာပေများကို နည်းစနစ်မှန်ကန်စွာ ဖတ်ရှုလေ့လာခြင်းဖြင့် အကျိုးတရားများစွာ ရရှိနိုင်သည်။ ယင်းအကျိုးတရားများစွာထဲမှ အဓိကအချက်(၁၀)ချက်ကို ဖော်ပြလိုသည်။ ယင်းအချက်များမှာ အဖိုးတန်ဗဟုသုတများ ပိုမိုပွားများလာခြင်း၊ မှန်ကန်သောအသိတရားများ ထပ်မံတိုးပွားလာခြင်း၊  ယခင်ကလွဲမှားနေသောအသိများ မှန်ကန်သောအသိများအဖြစ်သို့ရောက်ရှိလာခြင်း၊   အမှားအမှန်၊အကောင်းအဆိုး၊ အကြောင်းအကျိုးမှန်ကန်စွာ ဝေဖန်ပိုင်းခြားနိုင်စွမ်းမြင့်မားလာခြင်း၊ အသိတရားနှင့် သတိတရားပိုမိုမြင့်မားလာခြင်း၊   တန်ဖိုးနှင့်ဂုဏ်သိက္ခာရှိသော သမိုင်းကြောင်းကိုပိုင်ဆိုင်ရခြင်း၊ တွေးခေါ်မြော်မြင်နိုင်စွမ်းမြင့်မားလာခြင်း၊ ပစ္စုပ္ပန်ကာလ၏ အခြေအနေအရပ်ရပ်ကို ပြည့်စုံတိကျမှန်ကန်စွာ နားလည်ပြီး အနာဂတ်အခြေအနေများကို ထိုးထွင်းသိမြင်နိုင်စွမ်းမြင့်မားလာခြင်း၊ ကြုံတွေ့နေရသောပြဿနာ၊ အခက်အခဲတစ်ရပ်အား ဘက်စုံထောင့်စုံသိမြင်နားလည်ပြီး ပြဿနာဖြေရှင်းနိုင်သည့်စွမ်းရည်မြင့်မားလာခြင်း၊ လောကနှင့်ပတ်ဝန်းကျင်ကြီး၏ လိမ်ညာလှည့်စားမှု၊ ပရိယာယ်ဆင်မှုအမျိုးမျိုးကို မှန်ကန်စွာ ထိုးထွင်းသိမြင်ပြီး အောင်မြင်စွာကာကွယ် တားဆီးနိုင်စွမ်းမြင့်မားလာခြင်းတို့ဖြစ်ကြသည်။

ကျေးဇူးတရားပြန်လည်ပေးဆပ်ရမည့်တာဝန်

အမိနိုင်ငံသည် ကျွန်ုပ်တို့၏ကျေးဇူးရှင်ဖြစ်သည်။   ကျွန်ုပ်တို့နိုင်ငံသားများသည် ကျေးဇူးစားများဖြစ်ကြသည်။ ထို့ကြောင့် အမိနိုင်ငံ၏ကျေးဇူးတရားကို ပြန်လည်ပေးဆပ်ရမည့်တာဝန်  ကျွန်ုပ်တို့နိုင်ငံသားများတွင်ရှိသည်။ ဤတာဝန်ကိုကျေပွန်စွာ ထမ်းဆောင်သည့်အနေဖြင့် အမိနိုင်ငံအား အင်အားကြံ့ခိုင်တောင့်တင်းသော၊    တိုးတက်ဖွံ့ဖြိုးသော၊ အရှိန်အဝါကြီးမားသော    နိုင်ငံအဖြစ်သို့ ပို့ဆောင်ပေးရမည်။ ဤသို့ပို့ဆောင်ပေးနိုင်ရန်အတွက် အဓိကလိုအပ်ချက်မှာ ကျွန်ုပ်တို့၏ အသိတရားများ မှန်ကန်နေရေးပင်ဖြစ်သည်။ အသိတရားများ   မှန်ကန်နေရေးအတွက် ကျွန်ုပ်တို့အစဉ်ကြိုးပမ်းဆောင်ရွက်နေရမည့်အချက်များမှာ စာပေများကို  များများဖတ်၊ များများမှတ်၊ အလေးအနက်ဆင်ခြင် သုံးသပ်နေခြင်းပင်ဖြစ်ပါကြောင်း နိဂုံးချုပ်အနေဖြင့် တင်ပြအပ်ပါသည်။   ။

MWD

တက်လူတေးသံ

ကြက်ဖသာလျှင် အရုဏ်ရောင်လှ ဝင်းဝါကြ၏။

ဥဩသာလျှင် ရာသီနွေလ ဖူးပွင့်ကြ၏။

ဖားငယ်သာလျှင် အာကာမိုးက မိုးရွာကြ၏။

တက်လူသာလျှင် မြန်မာပြည်လှ အားသစ်ရ၍ ဇေယျအောင်လံ ထူမည်တည်း။

ဇော်ဂျီ (အိုးဝေမဂ္ဂဇင်း၊ ဒီဇင်ဘာလ၊ ၁၉၃၅ခုနှစ်)

ယနေ့ကျောင်းနေအရွယ် မောင်မယ်တို့သည် တက်လူငယ်များဖြစ်ကြသည်။ တက်လူငယ်တို့သည် အနာဂတ်ကိုပိုင်စိုးကြရမည်။ အနာဂတ်ကို ပုံဖော်ထုဆစ်ကြရမည်။ အနာဂတ်သည် ယ​နေ့တက် လူငယ်တို့၏လက်ထဲတွင် ရှိနေပါသည်။ ယနေ့တက်လူငယ်တို့၏ စွမ်းရည်၊ စွမ်းအားအပေါ်တည်မှီနေပါသည်။

ယနေ့ ကျောင်းနေအရွယ် တက်လူငယ်တို့၏ စွမ်းရည်၊ စွမ်းအားပြည့်ဝသည့်အလျောက် အနာဂတ်သည် တောက်ပြောင်၊ ထွန်းသစ်နေမည်မှာ မြေကြီးလက်ခတ် မလွဲပေ။ ခေတ်မီ ဖွံ့ဖြိုးတိုးတက်နေမည်မှာလည်း သေချာပါသည်။

ကမ္ဘာဦးကာလ လူနေမှုအဆင့်အတန်းသည် နိမ့်ကျ၏။ ယနေ့မျက်မှောက်ကာလ လူနေမှုအဆင့်အတန်းသည် မြင့်မား၏။ ကမ္ဘာဦးကာလနှင့် ယနေ့မျက်မှောက်ကာလသည် လွန်စွာကွာခြားသွားသည်။ အဆင့်ဆင့် ဖွံ့ဖြိုးတိုးတက်လာသောကြောင့် နိမ့်ရာမှမြင့်ရာသို့ ရောက်ရှိလာခြင်းဖြစ်ပါသည်။ အဆင့်ဆင့် ဖွံ့ဖြိုးတိုးတက်လာသော ဖြစ်စဉ်များတွင် လူသားတို့၏ တီထွင်ဆန်းသစ်မှု၊ တွေးခေါ်မြော်မြင်မှု၊ စဉ်းစားဆင်ခြင် ချင့်ချိန်မှု၊ ကြံရည်ဖန်ရည်ဉာဏ်ရည် ကျယ်ပြန့်လာမှုတို့က အခရာကျပါသည်။ ဖွံ့ဖြိုးတိုးတက်မှုအလုံးစုံ၏ မူလရင်းမြစ်လည်း ဖြစ်ပါသည်။

ထိုမူလရင်းမြစ်များကို ပိုင်ဆိုင်သူများသည်ကား မဟာလူသားများ ဖြစ်ပေသည်။ မဟာလူသားများဟု ခေါ်ဆိုဂုဏ်ပြုအပ်သော ယနေ့ ကျောင်းနေအရွယ် တက်လူငယ်တို့သည် လူသားအရင်းအမြစ်များ၏ အညွန့်အဖူးများပင် မဟုတ်ပါလော။

လူသားအရင်းအမြစ် အညွန့်အဖူးများကို ရှင်သန်ကြီးထွားလာအောင် ပြုစုပျိုးထောင် မြေတောင်မြှောက်ပေးကြရသည်။ ဗလငါးတန်ပြည့်ဝအောင် ဖြည့်ဆည်းပေးကြရသည်။ ထိုသို့ ဖြည့်ဆည်းရာတွင် အခြေခံပညာသင်ကျောင်းများသည် အရေးကြီးသော အခန်းကဏ္ဍ၌ပါဝင်နေပေသည်။ အကြောင်းမူကား အခြေခံပညာကျောင်းများသည် ပညာအခြေခံကောင်းများဖြစ်သည့် “ကာယ၊ ဉာဏ၊ စာရိတ္တနှင့် ရသ၊ သက်မွေးဘက်စုံပညာရေး”ကို သင်ကြားလေ့ကျင့်ပေးနေသောကြောင့်ဖြစ်ပါသည်။ အတန်းလိုက် သင်ရိုးညွှန်းတမ်းများသည် “ကာယ၊ ဉာဏ၊ စာရိတ္တနှင့် ရသ၊ သက်မွေးဘက်စုံပညာရေး”ကို ဦးတည်ထားခြင်းဖြစ်ပါသည်။

အခြေခံပညာရေးအဆောက်အအုံသည် အခြေခံပညာ မူလတန်းဆင့်အုတ်​မြစ်ပေါ်တွင် ဆင့်တင်ထားခြင်းဖြစ်

ယခုအခါ အကောင်အထည်ဖော်ဆောင်ရွက်နေသော အခြေခံပညာရေးအဆောက်အအုံသည် (KG+12) သူငယ်တန်း+ ဒွါဒသမတန်း အဆောက်အအုံဖြစ်ပါသည်။ အခြေခံပညာရေးအဆောက်အအုံသည် အခြေခံပညာမူလတန်းဆင့်အုတ်​မြစ်ပေါ်တွင် အခြေခံပညာအလယ်တန်းဆင့်နှင့် အခြေခံပညာအထက်တန်းဆင့်တို့ကို ဆင့်တင်ထားခြင်း ဖြစ်ပေသည်။ အခြေခံပညာရေး၏ အုတ်မြစ်ဖြစ်သော အခြေခံပညာမူလတန်းဆင့်တွင် KG+ ပထမတန်း၊ ဒုတိယတန်း၊ တတိယတန်း၊ စတုတ္ထတန်း၊ ပဉ္စမတန်းအထိ တန်းစဉ်ငါးဆင့်၊ အခြေခံပညာအလယ် တန်းဆင့်တွင် ဆဋ္ဌမတန်း၊ သတ္တမတန်း၊ အဋ္ဌမတန်း၊ နဝမတန်းအထိ တန်းစဉ် လေးဆင့်၊ အခြေခံပညာ အထက်တန်းဆင့်တွင် ဒသမတန်း၊ ဧကာဒသမတန်း၊ ဒွါဒသမတန်းအထိ တန်းစဉ်သုံးဆင့်ရှိပါသည်။

အခြေခံပညာရေး အုတ်မြစ်ဖြစ်သော အခြေခံပညာမူလတန်းဆင့် ငါးဆင့်ပေါ်တွင် အခြေခံပညာအလယ်တန်းဆင့် လေးဆင့်၊ နောက်အခြေခံပညာအထက်တန်းဆင့် သုံးဆင့်ဖြင့် တြိဂံပုံ (၅၊ ၄၊ ၃) အဆင့် သုံးဆင့်နှင့် တည်ဆောက်ထားရာ အခြေခံပညာရေး အဆောက်အအုံသည် တောင့်တင်းခိုင်မာနေပါသည်။

အခြေခံပညာမူလတန်းဆင့်တွင် သင်ရိုးဝင်ဘာသာရပ်များဖြစ်သော မြန်မာစာ၊ အင်္ဂလိပ်စာ၊ သင်္ချာ၊ သိပ္ပံ၊ လူမှုရေးဘာသာရပ်များနှင့် တွဲဖက်သင်ရိုးဝင်ဘာသာရပ်များဖြစ်သော စာရိတ္တနှင့် ပြည်သူ့နီတိ၊ ဘဝတွက်တာကျွမ်းကျင်စရာ၊ ကာယပညာ၊ အနုပညာ (ဂီတနှင့်ပန်းချီ) စသည့်ဘာသာရပ်များ၊ အခြေခံပညာအလယ်တန်းဆင့်တွင် သင်ရိုး ဝင်ဘာသာရပ်များဖြစ်သော မြန်မာစာ၊ အင်္ဂလိပ်စာ၊ သင်္ချာ၊ သိပ္ပံ၊ ပထဝီဝင်၊ သမိုင်းဘာသာရပ်နှင့် တွဲဖက်သင်ရိုးဝင်ဘာသာရပ်များ ဖြစ်သော စာရိတ္တနှင့် ပြည်သူ့နီတိ၊ ဘဝတွက်တာကျွမ်းကျင်စရာ၊ ကာယပညာ၊ အနုပညာ(ဂီတနှင့်ပန်းချီ) စသည့်ဘာသာရပ်များ၊ အခြေခံပညာအထက်တန်းဆင့်တွင် ဘာသာတွဲအလိုက် ယူထားသော သင်ရိုးဝင် ဘာသာရပ်များဖြစ်သည့် မြန်မာစာ၊ အင်္ဂလိပ်စာ၊ သင်္ချာ၊ ဓာတုဗေဒ၊ ရူပဗေဒ၊ ဇီဝဗေဒ၊ ဘောဂဗေဒ၊ စိတ်ကြိုက်မြန်မာစာ၊ ပထဝီဝင်၊ သမိုင်း စသည့်ဘာသာရပ်များနှင့် တွဲဖက်သင်ရိုးဝင်ဘာသာ ရပ်များဖြစ်သော စာရိတ္တနှင့် ပြည်သူ့နီတိ၊ ဘဝတွက်တာ ကျွမ်းကျင် စရာ၊ ကာယပညာ၊ အနုပညာ( ဂီတနှင့် ပန်းချီ) စသည့် ဘာသာရပ်များ ကို သင်ကြားလေ့ကျင့်ပေးနေပါသည်။

အတန်းလိုက် သင်ယူလေ့ကျင့်ခြင်းဖြင့်နယ်ပယ်အလိုက် တတ်မြောက်ကျွမ်းကျင်လာ

အတန်းလိုက် သင်ရိုးဝင်ဘာသာရပ်များကို သင်ယူလေ့ကျင့်ခြင်းဖြင့် ဘာသာရပ်နယ်ပယ်အလိုက် တတ်မြောက်ကျွမ်းကျင်လာမည်။ အတန်းလိုက်တွဲဖက်သင်ရိုးဝင် ဘာသာရပ်များကို သင်ယူလေ့ကျင့်ခြင်း ဖြင့် ကိုယ့်ကိုယ်ကိုယ် ယုံကြည်မှု၊ ကြံ့ခိုင်သန်စွမ်းမှု၊ တစ်ကိုယ်ရေသန့်ရှင်းမှု၊ ဖြောင့်မတ်တည်ကြည်မှု၊ ရိုးသားဖြူစင်မှု၊ ကျင့်ဝတ် စည်းကမ်းစောင့်ထိန်းလိုက်နာမှု၊ ပူးပေါင်းဝိုင်းဝန်းဆောင်ရွက်မှု၊ ပေါင်းသင်းဆက်ဆံရေးဝင်ဆံ့မှု၊ ထောက်ထားညှာတာစာနာမှု၊ သည်းခံ ခွင့်လွှတ်မှု စသည့်အလေ့အကျင့်ကောင်းများကို ရရှိလာမည်။ သင်ရိုးဝင် ဘာသာရပ်များက စဉ်းစားမြော်မြင်တွေးခေါ် ဆန်းသစ်နိုင်သည့် ဉာဏ်ရည်ဖွံ့ဖြိုးထက်သန်စေသည်။ တွဲဖက်သင်ရိုးဝင်ဘာသာရပ် များက စာရိတ္တ၊ ကိုယ်ကျင့်တရားနှင့် ကိုယ်ခန္ဓာကိုကြံ့ခိုင်စေသည်။

ထိုသည်ကား ဘက်စုံပညာရေး၏ အနှစ်သာရဖြစ်ပါသည်။ အခြေခံပညာကျောင်းများက သင်ကြားလေ့ကျင့်ပေးနေသော ဘက်စုံပညာရေးသည် ဗလငါးတန်နှင့် ပြည့်စုံသည့် ကျောင်းနေအရွယ် တက်လူငယ် များကို မွေးဖွားပေးနေခြင်းပင် မဟုတ်ပါလော။

ကျောင်းနေအရွယ်ကလေးများအားလုံးမသင်မနေရပညာရေးကို အောင်မြင်စွာဆောင်ရွက်ပေးနိုင်ခဲ့

လက်ရှိအစိုးရလက်ထက်တွင် ဘက်စုံပညာရေးမှတစ်ဆင့် ဗလငါးတန်​ပြည့်ဝသည့် တက်လူငယ်များကို မွေးဖွားပေးနိုင်ရန်အတွက် အထူးတလည် အကောင်အထည်ဖော်ကာ စီမံဆောင်ရွက်ပေးနိုင်ခဲ့သည်။ အခြေခံပညာကျောင်းများမှ သင်ကြားလေ့ကျင့်ပေးလိုက်သော ကျောင်းနေအရွယ်ကလေးများ ပညာရေးအဟောသိကံဖြစ်စေမည့်၊ သင်ယူမှုအခွင့်အလမ်း အလှမ်းဝေးစေမည့်၊ ပညာသင်ယူရန် အဟန့်အတားဖြစ်စေမည့် စသည့်စိန်ခေါ်မှုများကို ကူညီပံ့ပိုးဖြေရှင်းပေးကာ အတန်းကူးပြောင်းမှုနှုန်း မြင့်မားအောင် စီမံဆောင်ရွက်ပေးနိုင်ခဲ့သည်။ အဆက်ဆက်က မသင်မနေရ မူလတန်းပညာရေးကိုသာ အကောင်အထည်ဖော်နိုင်ခဲ့သည်။ ယခုအခါတွင် ကျောင်းနေအရွယ် ကလေး အားလုံး အခြေခံပညာအလယ်တန်းဆင့် နဝမတန်း (KG+9)အထိ မသင်မနေရ ပညာရေးကို အောင်မြင်စွာ ဆောင်ရွက်ပေးနိုင်ခဲ့သည်။ ကျောင်းနေအရွယ် တက်လူငယ်တို့၏ အနာဂတ်လမ်းချောမွေ့ ဖြောင့်တန်းနေအောင် ပညာပန်းများဖြင့် လမ်းခင်းပေးနိုင်ခဲ့ခြင်းဖြစ် ပါသည်။           

အခြေခံပညာအလယ်တန်းဆင့် နဝမတန်း(KG+9)အထိ မသင်မနေရပညာရေးနှင့်အတူ အခြေခံပညာအလယ်တန်းဆင့် နဝမတန်း (KG+9) ကို ပြီးမြောက်အောင်မြင်သူများသည် အခြေခံပညာအထက်တန်းကျောင်းများသို့လည်းကောင်း၊ စက်မှုစိုက်ပျိုးရေးနှင့် မွေးမြူရေးအခြေခံပညာအထက်တန်း ကျောင်းများသို့လည်းကောင်း နှစ်သက်ရာ၊ ဝါသနာပါရာ၊ စိတ်ဝင်စားရာ အခြေခံပညာ အထက်တန်းကျောင်းများသို့ စိတ်ကြိုက်ရွေးချယ်ကာသင်ယူနိုင်သည့် အခွင့်အလမ်းများကိုလည်း လမ်းဖွင့်ပေးထားပါသည်။

လက်ရှိအစိုးရလက်ထက်တွင် စက်မှုစိုက်ပျိုးရေးနှင့် မွေးမြူရေးအခြေခံပညာအထက်တန်းကျောင်းပေါင်း ၈၆ ကျောင်းကိုဖွင့်လှစ်ပေးခဲ့သည်။ အခြေခံပညာအထက်တန်းကျောင်းများမှ တက္ကသိုလ်ဝင် စာမေးပွဲ အောင်မြင်သူများသည် သက်ဆိုင်ရာ တက္ကသိုလ်၊ ဒီဂရီကောလိပ်၊ ကောလိပ်/သိပ္ပံ အသီးသီးသို့တက်ရောက်ပြီး ပညာသင်ယူနိုင်သကဲ့သို့ စက်မှု၊ စိုက်ပျိုးရေးနှင့် မွေးမြူရေး အခြေခံပညာအထက်တန်း အောင်မြင်သူများသည်လည်း သက်ဆိုင်ရာတက္ကသိုလ်၊ ဒီဂရီ ကောလိပ်၊ ကောလိပ်/သိပ္ပံ အသီးသီးသို့ တက်ရောက်ပြီး ပညာသင်ယူနိုင်ပါသည်။

အနာဂတ်ပညာတတ်လူငယ်များ များပြားလာစေရန် ရည်ရွယ်၍ Polytechnic တက္ကသိုလ်ရှစ်ခုအထိ ဖွင့်လှစ်ပေးနိုင်ခဲ့

အနာဂတ်ပညာတတ်လူငယ်များ များပြားလာစေရန်ရည်ရွယ်၍ ပညာရေးဝန်ကြီးဌာန၊ သိပ္ပံနှင့် နည်းပညာဝန်ကြီးဌာနတို့နှင့် တိုင်ပင်ဆွေးနွေးပြီး Polytechnic တက္ကသိုလ်များ ဖွင့်လှစ်နိုင်ရေးကို ဆောင်ရွက်ခဲ့ရာ Polytechnic တက္ကသိုလ် ရှစ်ခုအထိ ဖွင့်လှစ်ပေးနိုင်ခဲ့ပါသည်။ ဒီမိုကရေစီနိုင်ငံတော် တည်ဆောက်ရာတွင် ဥပဒေ ဆိုင်ရာ၊စီးပွားရေးဆိုင်ရာများနှင့် ပတ်သက်ပြီးသိရှိထားရန် လိုအပ်ပါသည် ။ ထို့ကြောင့် တက္ကသိုလ်အားလုံးတွင် ဥပဒေပညာရပ်ဆိုင်ရာနှင့် စီးပွားရေးပညာရပ်ဆိုင်ရာ BA(Law) နှင့် BA(Eco)ဘွဲ့များ သင်ကြားနိုင်အောင် ဆောင်ရွက်ပေးခဲ့ပါသည်။ ထိုသို့ နိုင်ငံတော်အစိုးရက စီမံဆောင်ရွက်အားပေးနေခြင်းသည် မျိုးဆက်သစ်လူငယ်များ ပညာရည်မြင့်မားပြီး ပညာရည်မြင့်မားသော မျိုးဆက်သစ်လူငယ်များဖြင့် ခေတ်မီဖွံ့ဖြိုးတိုးတက်သော နိုင်ငံတော်ကို တည်ဆောက်လိုသောကြောင့် ဖြစ်ပါသည်။

ထိုသို့ခေတ်မီဖွံ့ဖြိုးတိုးတက်သော နိုင်ငံတော်သစ်တည်ဆောက်ရာတွင် အရေးအကြီးဆုံးအချက်မှာ လူသားအရင်းအမြစ်ပင်ဖြစ်သည်။ ဘက်ပေါင်းစုံသောကဏ္ဍတို့၌ ကျွမ်းကျင်သော အသိပညာရှင်၊ အတတ် ပညာရှင်များ ရှိနေမှသာလျှင် မိမိတို့နိုင်ငံသည် သူများနိုင်ငံများနည်းတူ ကမ္ဘာ့အလယ်တွင် ရင်ပေါင်တန်းနိုင်ပေလိမ့်မည်။ ဥပမာအားဖြင့် မိမိတို့မြန်မာနိုင်ငံ၏ အဓိကစီးပွားရေးဖြစ်သည့် စိုက်ပျိုးရေးနှင့် မွေးမြူရေးတွင် မိရိုးဖလာနည်းအတိုင်း စိုက်ပျိုးမွေးမြူနေ၍ မဖြစ်တော့ပေ။

ခေတ်မီနည်းစနစ်များနှင့် ပေါင်းစပ်မှသာ အထွက်နှုန်းပိုမိုကောင်းမွန်ခြင်း၊ အရည်အသွေးကောင်းသော ထွက်ကုန်များထုတ်လုပ်နိုင်ခြင်း စသည့် ရလဒ်ကောင်းများကို ရရှိနိုင်မည်ဖြစ်ပါသည်။ ဤသည်ကားပညာ၏အရေးပါ၊ အရာရောက်ပုံကို ဥပမာဆောင်ပေးခြင်းသာဖြစ်ပါ သည်။ အခြားသော ဘက်ပေါင်းစုံ ကဏ္ဍစုံတို့၌လည်း ထိုသို့သာဖြစ်ပါသည်။

နိုင်ငံတော်ဖွံ့ဖြိုးတိုးတက်ဖို့ဆိုလျှင် ယခုကဲ့သို့ပင် ပညာရေးကို အစဉ်တစိုက် အားပေးဆောင်ရွက်ကြရပေမည်။ ကျောင်းနေ အရွယ် တက်လူငယ်များကို ပညာပြည့်ဝနှလုံးလှသည့် လူ့စွမ်းအား အရင်းအမြစ်များ ဖြစ်ပေါ်လာအောင် သင်ကြားလေ့ကျင့်မွေးမြူပေးကြ ရမည်ဖြစ်ပါသည်။ လူ့စွမ်းအားအရင်းအမြစ်များဖြစ်သည့် တက်လူငယ် မောင်မယ်များ၏ စွမ်းရည်၊ စွမ်းအား၊ စွမ်းပကားက မိုးပေါ်ရောက်အောင် ပျံသန်းနိုင်သည်အထိ အစွမ်းထက်လှပါပေသည်။ ကျောင်းနေ အရွယ် တက်လူငယ်မောင်မယ်များသည် နိုင်ငံတော်စဉ်ဆက်မပြတ် ဖွံ့ဖြိုးတိုးတက်ခိုင်မာစေရေးအတွက် ဇေယျအောင်လ ထူပေးကြမည့် လူ့စွမ်းအားအရင်းအမြစ်များ ဖြစ်ပါသည်။

ထို့ကြောင့် “နိုင်ငံတော်ဖွံ့ဖြိုးဖို့ပညာ​ရေးကို အားပေးစို့”ဆိုသည့် အတိုင်းကျရာကဏ္ဍအသီးသီးမှ တက်ညီလက်ညီဖြင့် ဝိုင်းဝန်းကြိုးပမ်း အကောင်အထည်ဖော် ဆောင်ရွက်ကြရမည်ဖြစ်ပါကြောင်း ရေးသားတင်ပြလိုက်ရပါသည်။ ။

MOI

ဇူလိုင်လ ၂၇ ရက်တွင်  ၂၀၂၅ ခုနှစ်   တက္ကသိုလ်ဝင်စာမေးပွဲ အောင်စာရင်းထုတ်ပြန်ကြေညာခဲ့သည်။  ကျောင်းသားမိဘများသည် အောင်စာရင်း ထုတ်ပြန်မည့်ရက်ကို   လက်ချိုးရေတွက်ခဲ့ရသည်။ 

ဇူလိုင်လ ၂၆ ရက် ညပိုင်းကတည်းက ကျောင်းသားမိဘများနှင့် ကလေးများကောင်းကောင်းမအိပ်နိုင်ဘဲ အောင်စာရင်းအတွက် ရင်ခုန်နေကြသည်။ ထို့နောက် ဇူလိုင်လ ၂၇ ရက် နံနက်စောစောတွင် မိဘများနှင့် ကျောင်းသား၊ ကျောင်းသူများ ဝမ်းသာ၊ ဝမ်းနည်းဖြစ်ခဲ့ရသည်။ စာမေးပွဲအောင်မြင်သူများသည် ပျော်လို့မဆုံးဖြစ်နေကြသည်။ ဂုဏ်ထူးများစွာနှင့်အောင်မြင်သောကလေးများသည် အတိုင်းထက်အလွန်ပင်ဖြစ်သည်။

အထူးသဖြင့်  မိဘများသည်  ပို၍ပင်ပျော်ရွှင်နေကြသည်။  သူတို့၏အပျော်များသည် ပတ်ဝန်းကျင်ရှိ မိတ်ဆွေများနှင့်သူငယ်ချင်းများကို ဝမ်းသာပီတိဖြစ်စေသည်။  စာမေးပွဲကျရှုံးသည့် ကလေးများသည် ဝမ်းနည်းပက်လက်ငိုကြွေးနေကြသည်။   တချို့သော မိဘများသည် မစားနိုင်မသောက်နိုင်ပင်ဖြစ်နေကြသည်။ စိတ်မကောင်းစရာပင်ဖြစ်သည်။

အောင်ချက်ရာခိုင်နှုန်း

၂ဝ၂၅ ခုနှစ် တက္ကသိုလ်ဝင်စာမေးပွဲ၌ နိုင်ငံခြားစာစစ်ဌာနအပါအဝင် တစ်နိုင်ငံလုံးအတိုင်းအတာဖြင့်  ကျောင်းသား၊ ကျောင်းသူ ၂၀၇၈၉၈ ဦးဖြေဆိုခဲ့ရာ ၉၉၉၂၄ ဦးအောင်မြင်ခဲ့သောကြောင့် အောင်ချက်ရာခိုင်နှုန်း  ၄၈ ဒသမ ၀၆  ရာခိုင်နှုန်းရှိခဲ့သည်။ ဆိုရလျှင် စာမေးပွဲဖြေဆိုသူ နှစ်ဦးလျှင်  တစ်ဦးနီးပါးခန့်  အောင်မြင်ခဲ့ခြင်းဖြစ်သည်။

မွန်ပြည်နယ် စာစစ်ဌာနသည် ၅၇ ဒသမ ၁၆ ရာခိုင်နှုန်းဖြင့် အောင်ချက်အမြင့်မားဆုံးဖြစ်သည်။  ခြွင်းချက်အနေဖြင့်  နိုင်ငံခြားစာစစ်ဌာနသည် အောင်ချက် ၉၅ ရာခိုင်နှုန်းရှိသည်။

မုဒိတာပွားမိ

စာမေးပွဲအောင်စာရင်းသည်  ကျောင်းသားတစ်ဦး၊  တစ်ယောက်ချင်းစီ၏   တစ်နှစ်တာကာလအတွင်း ကြိုးပမ်းအားထုတ်ခဲ့မှုများကို မှတ်ကျောက်တင်ပေးခြင်းဖြစ်သည်။   အောင်စာရင်းတွင်   ဂုဏ်ထူး ရရှိသည့်ဘာသာရပ်များကို  ဖော်ပြထားလေ့ရှိသည်။  ထို့ကြောင့် ဂုဏ်ထူးဖြင့်အောင်မြင်သည့်ကလေးများသည်  ပို၍ပျော်ရွှင်ကြမည်ဖြစ်သည်။ အထူးသဖြင့် တစ်နိုင်ငံလုံးတွင် အဆင့် ၁ဝ အတွင်းဝင်သည့် ကျောင်းသား၊ ကျောင်းသူများသည် သူတို့၏ကြိုးပမ်းမှုရလဒ်အတွက် ကျေနပ်နေလိမ့်မည်ဖြစ်သည်။  မိဘများသည် သားသမီးများအတွက် ဂုဏ်ယူဝင့်ကြွားပျော်လို့မဆုံး တပြုံးပြုံးဖြစ်နေကြမည်။ မိဘချင်း ကိုယ်ချင်းစာမိသည်။ ထိုအောင်မြင်မှုများကိုလည်း လှိုက်လှိုက်လှဲလှဲမုဒိတာပွားမိသည်။  မည်သို့ပင်ဆိုစေကာမူ တက္ကသိုလ်ဝင်စာမေးပွဲ အောင်မြင်ကြသည့် ကျောင်းသား၊ ကျောင်းသူအားလုံးအတွက် များစွာဂုဏ်ယူမိသည်။

ကိုယ်တွေ့ကြုံခဲ့ရ

တက္ကသိုလ်ဝင်စာမေးပွဲသည်    လက်ရေးလက်သား အပါအဝင်  အမှတ်ပေးစည်းမျဉ်းနှင့်အညီ သပ်သပ်ရပ်ရပ် စနစ်တကျဖြေဆိုနိုင်မှသာလျှင် မျှော်မှန်းသလောက် ရလဒ်ထွက်ရှိမည်ဖြစ်သည်။ တချို့သောကလေးများသည် အားလုံးဖြေဆိုခဲ့သော်လည်း  အဖြေလွှာကို ပြန်လည်စစ်ဆေးခြင်းမရှိသဖြင့် မျှော်မှန်းမထားသော စာလုံးပေါင်းသတ်ပုံအမှားအယွင်းများပါသွားနိုင်ပေသည်။

စာရေးသူတို့လည်း   ၂၀၂၀  ပြည့်နှစ်  တက္ကသိုလ်ဝင်စာမေးပွဲအောင်စာရင်း မထုတ်ပြန်ခင်က အောင်စာရင်းကို ရင်တမမဖြင့် မျှော်လင့်ခဲ့ရသည်။ ထိုစဉ်က သမီးကြီးသည် ဂုဏ်ထူးငါးဘာသာခန့်မျှော်မှန်းထားသော်လည်း  အောင်စာရင်း ထွက်သည့်အချိန်တွင် သုံးဘာသာပါရှိခဲ့သဖြင့် စိတ်မကောင်းဖြစ်ခဲ့ရသည်။ သို့သော် အမှတ်စာရင်းထွက်သည့်အချိန်တွင်   အမှတ်ကောင်းသဖြင့်   စိတ်ဖြေဆည်ရာရရှိခဲ့သည်။ သမီးကြီးသည် စာမေးပွဲဖြေဆိုရာတွင် စိတ်လောလေ့ရှိသဖြင့်   စိတ်အေးအေးထား၍ဖြေဆိုဖို့ရန်   အမြဲတမ်းသတိပေးခဲ့ရသည်။

စာမေးပွဲအောင်စာရင်းတွင် ပါမလာသော်လည်း စာမေးပွဲဖြေဆိုခါနီးအချိန်တွင် ကျန်းမာရေးနှင့် အခြားလူမှုရေး အခက်အခဲတစ်ခုခုကြောင့်   ခြေချော်လက်ချော်ဖြစ်သွားနိုင်သည်။

ထိုကလေးများအနေဖြင့် လက်ရှိအခြေအနေထက် ပိုမိုကောင်းမွန်သည့် အခြေအနေတစ်ရပ်ကို ဖန်တီးလာသည်ဟု သဘောထားရမည်ဖြစ်သည်။ အရာရာတိုင်းကို ပုံသေကားကျတွက်၍ စိတ်ဓာတ်ကျဆင်းနေရန် မလိုပေ။ အနာဂတ်တွင်ပိုမိုကောင်းမွန်သော အခွင့်အလမ်းများ တွေ့ရှိလာနိုင်သည်။   ဘဝကို အပြုသဘောဆောင်စွာ ရှုမြင်ထားသင့်သည်။  စာမေးပွဲတစ်ခါကျရှုံးခြင်းသည်  ဘဝတစ်ခုလုံးအတွက်  ဆုံးရှုံးမှုကြီးမဟုတ်ပေ။ လာမည့်ပညာသင်နှစ်တွင်  နှစ်စကတည်းက ဖိဖိစီးစီးသာ ကြိုးစားသွားမည်ဆိုလျှင် ဂုဏ်ထူးများစွာဖြင့်ပင် အောင်မြင်နိုင်မည့်အခွင့်အလမ်းရှိနေပါသေးသည်။ အောင်စာရင်းတွင် ပါရှိမလာသော်လည်း စိတ်ဓာတ်ကျနေစရာမလိုပေ။ ကျရှုံးသော်လည်း ထပ်မံကြိုးစားပါက အောင်မြင်မှုအတွက် အခွင့်အလမ်းများစွာရှိနေပြီး မုချအောင်မြင်နိုင်မည်ဖြစ်သည်။

ဆန္ဒသာရှိမည်ဆိုလျှင်

လက်ရှိစာမေးပွဲကျရှုံးမှုကို ဘဝအတွက် သင်ခန်းစာအဖြစ်  သဘောထား သွားရမည်ဖြစ်သည်။   အောင်စာရင်းတွင် ပါလာခြင်းမရှိသည့် ကျောင်းသား၊ ကျောင်းသူတစ်ဦးအနေဖြင့် ပထမဆုံးဆောင်ရွက် ရမည့်အလုပ်သည် လွန်ခဲ့သော တစ်နှစ်တာကာလအတွင်း လုပ်ဆောင်ခဲ့မှုများကို ပြန်လည်သုံးသပ်သွားရန်လိုအပ်သည်။ ပထမဆုံးအချက်မှာ မိမိဖြေဆိုခဲ့သော အမှတ်စာရင်းတောင်းကြည့်ရမည်ဖြစ်သည်။ အမှတ်စာရင်းတွင် အားနည်းချက်ရှိသော ဘာသာရပ်များကို ယခုနှစ်တွင်  ပိုမိုလေ့ကျင့် ကျက်မှတ်သွားရန် လိုအပ်သည်။   အားသာချက်ရှိပြီးသော  ဘာသာရပ်များကို ဆက်လက်လေ့ကျင့် ကျက်မှတ်လိုက်မည်ဆိုလျှင်  သေချာပေါက် ဂုဏ်ထူးထွက်မည်ဖြစ်သည်။  မည်သည့်အရာတွင်မဆို  အောင်မြင်လိုသည့်ဆန္ဒသာ အမှန်တကယ်ရှိနေမည်ဆိုလျှင် တစ်နေ့တွင်   ထိုက်တန်သောအောင်မြင်မှုကို   ဧကန်မုချရရှိသွားမည်ဖြစ်သည်။

နေထိုင်မှုပုံစံပြောင်းရန်လို

လက်ရှိအချိန်တွင် စမတ်ဖုန်းများသည်  လူငယ်များ၏ နေ့စဉ်ဘဝကို လွှမ်းမိုးလာနေပြီဖြစ်သည်။ တက္ကသိုလ်ဝင်တန်းတက်မည့် ကလေးများအနေဖြင့် ဖုန်းသုံးစွဲချိန်ကို လျှော့သွားရန်လိုအပ်သည်။ လူမှုကွန်ရက်သည် သုံးတတ်လျှင် အကျိုးရှိနိုင်သော်လည်း မသုံးတတ်လျှင် အချိန်နှင့်  ငွေကြေးကုန်ကျပြီး   ပညာသင်ကြားရေးကိုပါ ထိခိုက်နိုင်သည်။

တချို့သောယောကျ်ားလေးများသည်  ဖုန်းဖြင့်ဂိမ်းဆော့နေတတ်ပြီး မိန်းကလေးများသည် လူမှုကွန်ရက်ပေါ်မှနေထိုင်မှု ပုံစံများအပေါ်တွင် သာယာနေတတ်ကြသည်။  ထို့ကြောင့်  မိဘအုပ်ထိန်းသူများသည် သားသမီးများ၏ တယ်လီဖုန်းသုံးစွဲချိန်ကို စောင့်ကြည့်ကန့်သတ်ထားသင့်သည်။ သားသမီးများကို အလိုလိုက်ခြင်းသည်  ချစ်ရာမကျဘဲ နှစ်သလိုဖြစ်နေတတ်ပေသည်။ ပကာသနဆန်သော ပြိုင်ဆိုင်မှုများသည် ကလေးများကို လမ်းမှားသို့တွန်းပို့စေနိုင်သဖြင့် မိဘအုပ်ထိန်းသူများအနေဖြင့် ချင့်ချိန်ဆောင်ရွက်သွားရန် လိုအပ်ပေသည်။

လက်တစ်ကမ်းတွင်ရှိနေ

တချို့သောသူများသည်  တစ်ခါကျရှုံးရုံမျှဖြင့် စိတ်ဓာတ်ကျဆင်းသွားတတ်ကြသည်။ စိတ်ထင်ရာလျှောက်လုပ်တတ်ကြသည်။ အပေါင်းအသင်းမှားပြီး မူးယစ်ဆေးဝါး သုံးစွဲတတ်သည်။ အဆိုးရွားဆုံးအချက်သည်   လွဲမှားသောနည်းလမ်းဖြင့်  ထွက်ပေါက်ရှာခြင်းဖြစ်သည်။

အောင်မြင်သူများကိုကြည့်မည်ဆိုလျှင် အချို့သူများသည် တစ်ချိန်ကကျရှုံးခဲ့ဖူးသည်။ သို့သော် အောင်မြင်လိုသည့် ခိုင်မာသောဆန္ဒရှိနေသဖြင့် အကြိမ်ကြိမ်ကြိုးစား၊ အကြိမ်ကြိမ်ရုန်းကန်ထခဲ့ကြရသည်။

မိမိလည်း   ကြိုးပမ်းသွားမည်ဆိုလျှင်  မအောင်မြင်စရာ အကြောင်းမရှိချေ။ မလျှော့သော ဇွဲ၊ လုံ့လ၊ ဝီရိယတို့သာလိုသည်။ အောင်မြင်မှုသည် မိမိ၏လက်တစ်ကမ်းတွင်ရှိနေသည်။

ထူးချွန်စွာအောင်မြင်နိုင်

စင်စစ်အားဖြင့် တက္ကသိုလ်ဝင်စာမေးပွဲ   ကျရှုံးခဲ့သူများသည် စိတ်ဓာတ်ကျဆင်း နေစရာမလိုပေ။ တမှိုင်မှိုင်တတွေတွေဖြင့် နောင်တရနေရန်လည်း မလိုပေ။   အဓိကလုပ်ဆောင်သွားရမည့် အချက်သည် လာမည့် ပညာသင်နှစ်အတွက်  စိတ်သစ်ခွန်အားသစ်များနှင့် ကြိုးစားသွားရန်သာ လိုအပ်သည်။ ပညာသင်နှစ်အစမှစ၍ တစ်နေ့စာတစ်နေ့ပြတ်အောင်သာ    ကြိုးစားလေ့ကျင့် ကျက်မှတ်သွားမည်ဆိုလျှင် အတန်းတင်စာမေးပွဲကြီးကို အလွယ်တကူဖြေဆို အောင်မြင်နိုင်မည်ဖြစ်သည်။   စနစ်တကျသာ   လေ့လာသင်ယူလေ့ကျင့် ကျက်မှတ်သွားမည်ဆိုလျှင်  ဂုဏ်ထူးများစွာဖြင့်ပင် ထူးချွန်စွာအောင်မြင်နိုင်သည်။

ကြိုးပမ်းအားထုတ်မှုနှင့် အောင်မြင်မှု အသီးအပွင့်များမည်သည့်အရာမဆို အချိန်ကကုစားသွားမည်ဖြစ်သည်။ မိဘများအနေနှင့်ကလည်း   ကလေးများကို စိတ်ဒဏ်ရာရရှိအောင် လွန်လွန်ကဲကဲဖိအားမပေးသင့်ပေ။   အဆိုးထဲမှ အကောင်းပင်ဖြစ်သည်။

ကောင်းမွန်သောအခြေအနေတစ်ရပ်ကို ဖန်တီးလာခြင်းဖြစ်သည်ဟု သဘောထားသွားရန်သာ လိုအပ်သည်။ ဆိုလိုသည်မှာ  လက်ရှိအခြေအနေထက်   ပိုမိုကောင်းမွန်အောင် ကြိုးပမ်းနိုင်ရေးအတွက်  အခွင့်အလမ်းရှိသည်ဟု သဘောထားရန်သာ လိုအပ်သည်။  တက္ကသိုလ်ဝင်စာမေးပွဲကျရှုံးခဲ့သည့် ကျောင်းသား၊ကျောင်းသူများသည်  လာမည့်စာမေးပွဲတွင် အောင်မြင်အောင် ကြိုးစားသွားမည်ဆိုသည့်   ခိုင်မာသော သန္နိဋ္ဌာန်စိတ်ဖြင့်သာ ကြိုးပမ်းသွားမည်ဆိုလျှင်  အောင်မြင်မှု အသီးအပွင့်များကို    ပိုင်ပိုင်နိုင်နိုင် ဆုပ်ကိုင်နိုင်မည်မှာ  သေချာပါသည်။    ။

MWD Web Portal
 

  “တက်လူတေးသံ”

* ကြက်ဖသာလျှင်

   အရုဏ်ရောင်လှ ဝင်းဝါကြ၏။

* ဥဩသာလျှင်

   ရာသီနွေလ ဖူးပွင့်ကြ၏။

* ဖားငယ်သာလျှင်

   အာကာမိုးက မိုးရွာကြ၏။

* တက်လူသာလျှင်

   မြန်မာပြည်လှ အားသစ်ရ၍

   ဇေယျအောင်လံ ထူမည်တည်း။

                       ဇော်ဂျီ

                       (အိုးဝေမဂ္ဂဇင်း၊ ဒီဇင်ဘာလ၊ ၁၉၃၅ ခုနှစ်)

ယနေ့ကျောင်းနေအရွယ်မောင်မယ်တို့သည် တက်လူငယ်များဖြစ်ကြသည်။ တက်လူငယ်တို့သည် အနာဂတ်ကိုပိုင်စိုးကြရမည်။ အနာဂတ်ကို ပုံဖော်ထုဆစ်ကြရမည်။  အနာဂတ်သည် ယနေ့တက်လူငယ်တို့၏ လက်ထဲတွင်ရှိနေသည်။  ယနေ့တက်လူငယ်တို့၏ စွမ်းရည်စွမ်းအားအပေါ် တည်မှီနေသည်။ ယနေ့ကျောင်းနေအရွယ် တက်လူငယ်တို့၏ စွမ်းရည်စွမ်းအားပြည့်ဝသည့်အလျောက် အနာဂတ်သည် တောက်ပြောင်၊  ထွန်းသစ်နေမည်မှာ မြေကြီးလက်ခတ်မလွဲပေ။ ခေတ်မီဖွံ့ဖြိုးတိုးတက်နေမည်မှာလည်း သေချာသည်။

ကမ္ဘာဦးကာလ လူနေမှုအဆင့်အတန်းသည် နိမ့်ကျ၏။  ယနေ့မျက်မှောက်ကာလ လူနေမှုအဆင့်အတန်းသည် မြင့်မား၏။ ကမ္ဘာဦးကာလနှင့် ယနေ့မျက်မှောက်ကာလသည် လွန်စွာကွာခြားသွားသည်။

အဆင့်ဆင့်ဖွံ့ဖြိုးတိုးတက်လာသောကြောင့် နိမ့်ရာမှမြင့်ရာသို့   ရောက်ရှိလာခြင်းဖြစ်သည်။အဆင့်ဆင့်ဖွံ့ဖြိုး တိုးတက်လာသော ဖြစ်စဉ်များတွင်  လူသားတို့၏ တီထွင်ဆန်းသစ်မှု၊  တွေးခေါ်မြော်မြင်မှု၊ စဉ်းစားဆင်ခြင်ချင့်ချိန်မှု၊ ကြံရည်ဖန်ရည်ဉာဏ်ရည် ကျယ်ပြန့်လာမှုတို့က အခရာကျသည်။  ဖွံ့ဖြိုးတိုးတက်မှု အလုံးစုံ၏ မူလရင်းမြစ်လည်းဖြစ်သည်။ 

ထိုမူလရင်းမြစ်များကို ပိုင်ဆိုင်သူများသည်ကား မဟာလူသားများဖြစ်ပေသည်။မဟာလူသားများဟုခေါ်ဆိုဂုဏ်ပြုအပ်သော ယနေ့ ကျောင်းနေအရွယ် တက်လူငယ်တို့သည် လူသားအရင်းအမြစ်များ၏ အညွန့်အဖူးများပင် မဟုတ်ပါလော။

လူသားအရင်းအမြစ် အညွန့်အဖူးများကို ရှင်သန်ကြီးထွားလာအောင် ပြုစုပျိုးထောင် မြေတောင်မြှောက်ပေးကြရသည်။  ဗလငါးတန်ပြည့်ဝအောင် ဖြည့်ဆည်းပေးကြရသည်။

ထိုသို့ဖြည့်ဆည်းရာတွင်   အခြေခံပညာသင်ကျောင်းများသည် အရေးကြီးသော အခန်းကဏ္ဍ၌ ပါဝင်နေပေသည်။ အကြောင်းမူကား အခြေခံပညာကျောင်းများသည်    ပညာအခြေခံကောင်းများဖြစ်သည့် “ကာယ၊  ဉာဏ၊ စာရိတ္တနှင့် ရသ၊ သက်မွေးဘက်စုံပညာရေး”ကို သင်ကြားလေ့ကျင့် ပေးနေသောကြောင့်ဖြစ်သည်။   အတန်းလိုက်သင်ရိုးညွှန်းတမ်းများသည် “ကာယ၊ ဉာဏ၊ စာရိတ္တနှင့် ရသ၊  သက်မွေးဘက်စုံပညာရေး”ကို ဦးတည်ထားခြင်းဖြစ်သည်။

ယခုအခါအကောင်အထည်ဖော် ဆောင်ရွက်နေသော အခြေခံပညာရေး အဆောက်အအုံသည် (KG+12)သူငယ်တန်း+ဒွါဒသမတန်း အဆောက်အအုံဖြစ်သည်။ အခြေခံပညာရေး အဆောက်အအုံသည် အခြေခံပညာမူလတန်းဆင့် အုတ်မြစ်ပေါ်တွင် အခြေခံပညာအလယ်တန်းဆင့်နှင့် အခြေခံပညာအထက်တန်းဆင့်တို့ကို  ဆင့်တင်ထားခြင်းဖြစ်ပေသည်။  အခြေခံပညာရေး၏ အုတ်မြစ်ဖြစ်သော အခြေခံပညာမူလတန်းဆင့်တွင် KG+ ပထမတန်း၊ ဒုတိယတန်း၊ တတိယတန်း၊ စတုတ္ထတန်း၊  ပဉ္စမတန်းအထိ တန်းစဉ်(၅)ဆင့်၊ အခြေခံပညာအလယ်တန်းဆင့်တွင် ဆဋ္ဌမတန်း၊ သတ္တမတန်း၊ အဋ္ဌမတန်း၊  နဝမတန်းအထိ  တန်းစဉ်(၄)ဆင့်၊  အခြေခံပညာအထက်တန်းဆင့်တွင် ဒသမတန်း၊ ဧကာဒသမတန်း၊ ဒွါဒသမတန်းအထိ  တန်းစဉ်(၃)ဆင့်ရှိသည်။  အခြေခံပညာရေးအုတ်မြစ်ဖြစ်သော အခြေခံပညာမူလတန်းဆင့်(၅)ဆင့်ပေါ်တွင် အခြေခံပညာအလယ်တန်းဆင့်(၄)ဆင့်၊  နောက်အခြေခံပညာအထက်တန်းဆင့်(၃)ဆင့်ဖြင့် တြိဂံပုံ(၅၊ ၄၊ ၃)အဆင့်(၃)ဆင့်နှင့်တည်ဆောက်ထားရာ အခြေခံပညာရေး အဆောက်အအုံသည်  တောင့်တင်းခိုင်မာနေသည်။

အခြေခံပညာမူလတန်းဆင့်တွင်သင်ရိုးဝင် ဘာသာရပ်များဖြစ်သော  မြန်မာစာ၊ အင်္ဂလိပ်စာ၊  သင်္ချာ၊  သိပ္ပံ၊ လူမှုရေး ဘာသာရပ်များနှင့် တွဲဖက်သင်ရိုးဝင် ဘာသာရပ်များဖြစ်သော စာရိတ္တနှင့်ပြည်သူ့နီတိ၊ ဘဝတွက်တာ ကျွမ်းကျင်စရာ၊  ကာယပညာ၊  အနုပညာ(ဂီတနှင့်ပန်းချီ)  စသည့်ဘာသာရပ်များ၊ အခြေခံပညာအလယ်တန်းဆင့်တွင် သင်ရိုးဝင် ဘာသာရပ်များဖြစ်သော  မြန်မာစာ၊ အင်္ဂလိပ်စာ၊  သင်္ချာ၊ သိပ္ပံ၊ ပထဝီဝင်၊ သမိုင်းဘာသာရပ်နှင့်တွဲဖက်သင်ရိုးဝင် ဘာသာရပ်များဖြစ်သော စာရိတ္တနှင့်ပြည်သူ့နီတိ၊ ဘဝတွက်တာကျွမ်းကျင်စရာ၊  ကာယပညာ၊ အနုပညာ(ဂီတနှင့်ပန်းချီ)စသည့် ဘာသာရပ်များ၊ အခြေခံပညာ အထက်တန်းဆင့်တွင်  ာသာတွဲအလိုက်ယူထားသော သင်ရိုးဝင်ဘာသာရပ်များဖြစ်သည့်မြန်မာစာ၊ အင်္ဂလိပ်စာ၊ သင်္ချာ၊ ဓာတုဗေဒ၊ ရူပဗေဒ၊ ဇီဝဗေဒ၊ ဘောဂဗေဒ၊ စိတ်ကြိုက်မြန်မာစာ၊ ပထဝီဝင်၊ သမိုင်းဘာသာရပ်များနှင့် တွဲဖက်သင်ရိုးဝင်ဘာသာရပ်များဖြစ်သော  စာရိတ္တနှင့်ပြည်သူ့နီတိ၊  ဘဝတွက်တာကျွမ်းကျင်စရာ၊ ကာယပညာ၊ အနုပညာ(ဂီတနှင့်ပန်းချီ)စသည့် ဘာသာရပ်များကို သင်ကြားလေ့ကျင့်ပေးနေသည်။

အတန်းလိုက်သင်ရိုးဝင်ဘာသာရပ်များကို သင်ယူလေ့ကျင့်ခြင်းဖြင့် ဘာသာရပ်နယ်ပယ်အလိုက်   တတ်မြောက်ကျွမ်းကျင်လာမည်။  အတန်းလိုက်တွဲဖက်သင်ရိုးဝင် ဘာသာရပ်များကို သင်ယူလေ့ကျင့်ခြင်းဖြင့် ကိုယ့်ကိုယ်ကိုယ်ယုံကြည်မှု၊  ကြံ့ခိုင်သန်စွမ်းမှု၊  တစ်ကိုယ်ရေသန့်ရှင်းမှု၊  ဖြောင့်မတ်တည်ကြည်မှု၊  ရိုးသားဖြူစင်မှု၊  ကျင့်ဝတ်စည်းကမ်းစောင့်ထိန်းလိုက်နာမှု၊  ပူးပေါင်းဝိုင်းဝန်းဆောင်ရွက်မှု၊  ပေါင်းသင်းဆက်ဆံရေး ဝင်ဆံ့မှု၊  ထောက်ထားညှာတာစာနာမှု၊ သည်းခံခွင့်လွှတ်မှုစသည့် အလေ့အကျင့်ကောင်းများကို ရရှိလာမည်။  သင်ရိုးဝင်ဘာသာရပ်များက စဉ်းစားမြော်မြင်တွေးခေါ်ဆန်းသစ်နိုင်သည့် ဉာဏ်ရည်ဖွံ့ဖြိုးထက်သန်စေသည်။ 

တွဲဖက်သင်ရိုးဝင်ဘာသာရပ်များက  စာရိတ္တနှင့်  ကိုယ်ကျင့်တရားကိုကြံ့ခိုင်စေသည်။  ထိုသည်ကား  ဘက်စုံပညာရေး၏ အနှစ်သာရဖြစ်သည်။  အခြေခံပညာကျောင်းများက သင်ကြားလေ့ကျင့်ပေးနေသော ဘက်စုံပညာရေးသည် ဗလငါးတန်နှင့်ပြည့်စုံသည့်    ကျောင်းနေအရွယ် တက်လူငယ်များကို မွေးဖွားပေးနေခြင်းပင်မဟုတ်ပါလော။

နိုင်ငံတော်စီမံအုပ်ချုပ်ရေးကောင်စီအစိုးရ လက်ထက်တွင် ဘက်စုံပညာရေးမှတစ်ဆင့်  ဗလငါးတန်ပြည့်ဝသည့်တက် လူငယ်များကိုမွေးဖွားပေးနိုင်ရန် အတွက် အထူးတလည် အကောင်အထည်ဖော်ကာ စီမံဆောင်ရွက်ပေးနိုင်ခဲ့သည်။  အခြေခံပညာကျောင်းများမှ သင်ကြားလေ့ကျင့်ပေးလိုက်သော ကျောင်းနေအရွယ်ကလေးများ  ပညာရေးအဟောသိကံဖြစ်စေမည့်၊  သင်ယူမှုအခွင့်အလမ်း အလှမ်းဝေးစေမည့်၊ ပညာသင်ယူရန်အဟန့်အတားဖြစ်စေမည့်   စသည့်စိန်ခေါ်မှုများကို ကူညီပံ့ပိုးဖြေရှင်းပေးကာ  အတန်းကူးပြောင်းမှုနှုန်း မြင့်မားအောင် စီမံဆောင်ရွက်ပေးနိုင်ခဲ့သည်။   အဆက်ဆက်က မသင်မနေရ မူလတန်း ပညာရေးကိုသာ  အကောင်အထည်ဖော်နိုင်ခဲ့သည်။  နိုင်ငံတော်စီမံအုပ်ချုပ်ရေး ကောင်စီအစိုးရက ကျောင်းနေအရွယ်ကလေးအားလုံး   အခြေခံပညာအလယ်တန်းဆင့် နဝမတန်း(KG+9)အထိ သင်မနေရပညာရေးကို အောင်မြင်စွာ ဆောင်ရွက်ပေးနိုင်ခဲ့သည်မှာ  အနာဂတ်လမ်းအတွက်   ပညာပန်းများဖြင့် လမ်းခင်းပေးနိုင်ခဲ့ခြင်းဖြစ်ပေသည်။

အခြေခံပညာအလယ်တန်းဆင့်နဝမတန်း(KG+9)အထိ   မသင်မနေရပညာရေးနှင့်အတူ   အခြေခံပညာအလယ်တန်းဆင့် နဝမတန်း(KG+9)ကို ပြီးမြောက်အောင်မြင်သူများသည်  အခြေခံပညာအထက်တန်းကျောင်းများသို့ လည်းကောင်း၊  စက်မှု၊ စိုက်ပျိုးရေးနှင့်မွေးမြူရေး အခြေခံပညာအထက်တန်းကျောင်းများသို့ လည်းကောင်း နှစ်သက်ရာ၊ ဝါသနာပါရာ၊  စိတ်ဝင်စားရာအခြေခံပညာ အထက်တန်းကျောင်းများသို့  စိတ်ကြိုက်ရွေးချယ်ကာ  သင်ယူနိုင်သည့်  အခွင့်အလမ်းများကိုလည်း လမ်းဖွင့်ပေးထားသည်။  နိုင်ငံတော်စီမံအုပ်ချုပ်ရေးကောင်စီ လက်ထက်တွင်  စက်မှု၊ စိုက်ပျိုးရေးနှင့်မွေးမြူရေး အခြေခံပညာ အထက်တန်းကျောင်းပေါင်း ၈၉ ကျောင်းကိုဖွင့်လှစ်ပေးခဲ့သည်။  အခြေခံပညာ အထက်တန်းကျောင်းများမှ တက္ကသိုလ်ဝင်စာမေးပွဲ အောင်မြင်သူများသည်   သက်ဆိုင်ရာတက္ကသိုလ်၊  ဒီဂရီကောလိပ်၊  ကောလိပ်/သိပ္ပံအသီးသီးသို့ တက်ရောက်ပြီး  ပညာသင်ယူနိုင်သကဲ့သို့   စက်မှု၊  စိုက်ပျိုးရေးနှင့်မွေးမြူရေး အခြေခံပညာ အထက်တန်းအောင်မြင်သူများသည်လည်း  သက်ဆိုင်ရာ တက္ကသိုလ်၊ ဒီဂရီကောလိပ်၊  ကောလိပ်/သိပ္ပံအသီးသီးသို့ တက်ရောက်ပြီး  ပညာသင်ယူနိုင်သည်။

အနာဂတ်ပညာတတ်လူငယ်များ  များပြားလာစေရန် ရည်ရွယ်၍ ပညာရေးဝန်ကြီး၊ သိပ္ပံနှင့် နည်းပညာဝန်ကြီးတို့နှင့် တိုင်ပင်ဆွေးနွေးပြီး Polytechnic တက္ကသိုလ်များဖွင့်လှစ်နိုင်ရေးကို ဆောင်ရွက်ခဲ့ရာ Polytechnic တက္ကသိုလ် ၈ ခုအထိဖွင့်လှစ်ပေးနိုင်ခဲ့သည်။  ဒီမိုကရေစီနိုင်ငံတော် တည်ဆောက်ရာတွင်  ဥပဒေဆိုင်ရာ၊  စီးပွားရေးဆိုင်ရာများနှင့် ပတ်သက်ပြီး  သိရှိထားရန်လိုအပ်သည်။ ထို့ကြောင့်  တက္ကသိုလ်အားလုံးတွင် ဥပဒေပညာရပ်ဆိုင်ရာနှင့် စီးပွားရေးပညာရပ်ဆိုင်ရာ B.A(Law)နှင့်  B.A(Eco)ဘွဲ့များ သင်ကြားနိုင်အောင် ဆောင်ရွက်ပေးခဲ့သည်။  ထိုသို့နိုင်ငံတော်က စီမံဆောင်ရွက်အားပေးနေခြင်းသည်  အနာဂတ်မျိုးဆက်သစ် လူငယ်များ  ပညာရည်မြင့်မားပြီး  ပညာရည်မြင့်မားသော အနာဂတ်မျိုးဆက်သစ် လူငယ်များနှင့် ခေတ်မီဖွံ့ဖြိုးတိုးတက်သော နိုင်ငံတော် တည်ဆောက်လိုသောကြောင့်ဖြစ်သည်။ ထိုသို့ခေတ်မီ ဖွံ့ဖြိုးတိုးတက်သော နိုင်ငံတော်သစ်တည်ဆောက်ရာတွင် အရေးကြီးဆုံးသော အချက်မှာ လူသားအရင်းအမြစ်ပင်ဖြစ်သည်။  ဘက်ပေါင်းစုံသော ကဏ္ဍတို့တွင်  ကျွမ်းကျင်သော အသိပညာရှင်၊ အတတ်ပညာရှင်များ ရှိနေမှသာလျှင် မိမိတို့နိုင်ငံသည် သူများနိုင်ငံများနည်းတူ ကမ္ဘာ့အလယ်တွင် ရင်ပေါင်တန်းနိုင်ပေလိမ့်မည်။ ဥပမာအနေဖြင့် မြန်မာနိုင်ငံ၏ အဓိကစီးပွားရေးဖြစ်သည့် စိုက်ပျိုးရေးနှင့် မွေးမြူရေးတွင် မိရိုးဖလာနည်းအတိုင်း စိုက်ပျိုးမွေးမြူနေ၍ မလုံလောက်တော့ပေ။ ခေတ်မီနည်းစနစ်များနှင့် ပေါင်းစပ်မှသာ အထွက်နှုန်းပိုမိုကောင်းမွန်ခြင်း၊ အရည်အသွေးကောင်းသော ထွက်ကုန်များထွက်ခြင်း စသည့်ရလဒ်များကို ပိုင်ဆိုင်ရလိမ့်မည်ဖြစ်သည်။ ထိုသို့ခေတ်မီနည်းစနစ်များကို ပညာတတ်သော အသိပညာရှင်၊ အတတ်ပညာရှင်တို့ကသာ ဦးဆောင်လမ်းပြ နိုင်ပေလိမ့်မည်။ ဤသည်မှာ ပညာ၏အရေးပါပုံ၊ အရာဝင်ပုံကို ရိုးရှင်းစွာဥပမာပြခြင်းပင်ဖြစ်သည်။ အခြားဘက်ပေါင်းစုံသော ကဏ္ဍတို့တွင်လည်း ထိုသို့သာဖြစ်သည်။

သို့အတွက်ကြောင့် နိုင်ငံတော်ဖွံ့ဖြိုးတိုးတက်ဖို့ဆိုလျှင်  ယခုကဲ့သို့ပင် ပညာရေးကိုအစဉ်တစိုက် အားပေးဆောင်ရွက်နေရမည်မှာ မလွဲမှားနိုင်သော ဧကန်အမှန်တရားပင်ဖြစ်သည်။  ကျောင်းနေအရွယ် တက်လူငယ်များကို ပညာပြည့်ဝနှလုံးလှသည့် လူ့စွမ်းအား အရင်းအမြစ်များဖြစ်ပေါ်လာအောင် သင်ကြားလေ့ကျင့် မွေးမြူပေးကြရမည်ဖြစ်သည်။  လူ့စွမ်းအားအရင်းအမြစ်များဖြစ်သည့်  တက်လူငယ်မောင်မယ်များ၏ စွမ်းရည်စွမ်းအားစွမ်းပကားက  မိုးပေါ်ရောက်အောင် ပျံသန်းနိုင်သည်အထိ အစွမ်းထက်လှပါပေသည်။ ကျောင်းနေအရွယ် တက်လူငယ်မောင်မယ်များသည်  နိုင်ငံတော်စဉ်ဆက်မပြတ် ဖွံ့ဖြိုးတိုးတက် ခိုင်မာစေရေးအတွက်   ဇေယျအောင်လံထူပေးကြမည့် လူ့စွမ်းအားအရင်းအမြစ်များပင် မဟုတ်ပါလော။ 

ထို့ကြောင့်  “နိုင်ငံတော်ဖွံ့ဖြိုးဖို့ ပညာရေးကို အားပေးစို့”  ဆိုသည့်အတိုင်း  ကျရာကဏ္ဍအသီးသီးမှ တက်ညီလက်ညီဖြင့်  ဝိုင်းဝန်းကြိုးပမ်းအကောင် အထည်ဖော် ဆောင်ရွက်ကြရမည်ဖြစ်သည်။     ။

MWD Web Portal
 

၂၀၂၅ ခုနှစ်  ဇူလိုင်လ ၂၇ ရက်တွင်တက္ကသိုလ်ဝင်စာမေးပွဲအောင်စာရင်းများထုတ်ပြန်ကြေညာသည်။နေပြည်တော်ကောင်စီနယ်မြေအပါအဝင် တိုင်းဒေသကြီးနှင့်ပြည်နယ်တို့အတွင်းရှိကျောင်းများ၌တက္ကသိုလ်ဝင်စာမေးပွဲအောင်စာရင်းများကို ထုတ်ပြန်ထားရှိသကဲ့သို့ မြန်မာနိုင်ငံစာစစ်ဦးစီးဌာန၏ Website ဖြစ်သော www.myanmarexam.org  တွင်လည်း  ဝင်ရောက်ကြည့်ရှုနိုင်ကြသည်။  ထို့ပြင်  လမ်းပန်းဆက်သွယ်ရေးခက်ခဲသော တိုင်းဒေသကြီးနှင့်ပြည်နယ်တို့ရှိ စာစစ်ဌာနများ၏ အောင်စာရင်း များကိုလည်း မြန်မာ့အသံ(ရေဒီယို)၊ တိုင်းရင်းသားအစီအစဉ်များမှထုတ်လွှင့်ကြေညာပေးလျက်ရှိသည်။   ဤသည်မှာ  နှစ်စဉ်လုပ်ဆောင်နေသည့် လုပ်ငန်းစဉ်တစ်ရပ်လည်းဖြစ်သည်။ ယခုနှစ်တွင် မြန်မာ တစ်နိုင်ငံလုံး တက္ကသိုလ်ဝင်စာမေးပွဲအောင်ချက်ရာခိုင်နှုန်းမှာ ၄၈ ဒသမ ၀၆ ရာခိုင်နှုန်းဖြစ်သည်။

ယခုနှစ် တက္ကသိုလ်ဝင်စာမေးပွဲအောင်မြင်သည့်ရာခိုင်နှုန်းတွင် နိုင်ငံခြားစာစစ်ဌာနမှအောင်ချက် ရာခိုင် နှုန်း ၉၅ ရာခိုင်နှုန်းဖြင့် အများဆုံးဖြစ်သည်။ ထို့အတူ တိုင်းဒေသကြီးနှင့်ပြည်နယ်တို့တွင် မွန်ပြည်နယ် သည် အောင်ချက်ရာခိုင်နှုန်း ၅၇ ဒသမ ၁၆ ရာခိုင်နှုန်းဖြစ်၍ အောင်ချက်ရာခိုင်နှုန်း အမြင့်ဆုံးဖြစ်သည်။ စာမေးပွဲဆိုသည်မှာ ကျောင်းသားတို့၏ ပညာအရည်အချင်းကို  စစ်ဆေးခြင်းဖြစ် သည်။

တက္ကသိုလ်ဝင်စာမေးပွဲဆိုသည်မှာ အခြေခံပညာအဆင့်တွင် အမြင့်ဆုံးစာမေးပွဲဖြစ်သည်။ ထိုစာမေးပွဲ အောင်မြင်လျှင် မိမိတို့တက်ရောက်လိုသောတက္ကသိုလ်တို့သို့  မိမိတို့အရည်အချင်းအလိုက် ဆက်လက် တက်ရောက်နိုင်ပြီဖြစ်သည်။

အောင်စာရင်းထွက်တော့မည်ဆိုကတည်းက ရင်အခုန်ဆုံးသူများမှာ ကျောင်းသားမိဘများဖြစ်သည်။ မိမိတို့သားသမီးများစာမေးပွဲအောင်မြင်သည်ကိုသာ မိဘတိုင်းကမြင်တွေ့လိုကြသည်။ကျောင်းသားများအနေဖြင့်လည်း မိမိတို့၏ဘဝတက်လမ်းဖြစ်သည့်အတွက် အောင်စာရင်းကို ရင်ခုန်စွာမျှော်လင့် စောင့်စားခဲ့ကြမည်ပဲဖြစ်သည်။ စာမေးပွဲအောင်မြင်သူများအတွက် အလွန်ပင်ဝမ်းသာဖွယ်ဖြစ်သည်။ မိမိအမည်၏ဘေးတွင် ကပ်လျက်ပါလာမည့် ဘာသာရပ်အမည်များကိုလည်း  အားလုံးကမြင်တွေ့လိုကြ ပေလိမ့်မည်။ကျောင်းသားအားလုံးသည်အဆင့်အမြင့်ဆုံးအခြေအနေကိုရည်မှန်းကာ ကြိုးစားခဲ့ကြ ခြင်းဖြစ်ပေလိမ့်မည်။ ပညာသင်နှစ်တစ်နှစ်လုံး မိမိတို့အစွမ်းရှိသမျှ တက်ကုန်ဖွင့်၊ ရွက်စုံလွှင့်၍ စာမေးပွဲဆိုသောပင်လယ်ပြင်ကို ကူးခပ်ခဲ့ကြပေလိမ့်မည်။

တက္ကသိုလ်ဝင်စာမေးပွဲအောင်စာရင်းထွက်သည့်နေ့မှာ  အောင်မြင်သူတို့အတွက် ကြည်နူးဝမ်းသာစရာ အလွန်ကောင်းသည့် ကျက်သရေမင်္ဂလာအပေါင်းနှင့် ပြည့်စုံသည့်နေ့ဖြစ်သည်။  ဘာသာစုံဂုဏ်ထူးဖြင့် အောင်မြင်သူတို့အဖို့ သူတို့ကျောင်း၊ သူတို့မြို့နယ်၊  သူတို့ပြည်နယ်နှင့်တိုင်းဒေသကြီးအတွက်  အလွန်ပင်မျက်နှာပန်းပွင့်သူများဖြစ်လာကြသည်။  လူမှုကွန်ရက်တွင် မြို့အမည်၊ ကျောင်းအမည်နှင့် ဘာသာစုံဂုဏ်ထူးရသူတို့ကို အသီးသီးဖော်ပြ၍ ဂုဏ်ပြုချီးမြှောက်ကြသည်။ မိမိကျောင်း၊ မိမိမြို့နယ် အတွက်၊ တိုင်းဒေသကြီးနှင့်ပြည်နယ်အတွက် ဂုဏ်ယူဖွယ်ဖြစ်ရသလို ကာယကံရှင်နှင့် မိဘ၊ ဆရာများ ကလည်း ဝမ်းသာအားရဂုဏ်ယူကြလျက်ရှိသည်။

ထို့အတူ အောင်စာရင်းတွင် အမည်မပါလာသူတို့အတွက် တဒင်္ဂအားဖြင့် ခေတ္တမျှစိတ်ညစ်ညူးဖွယ် အခြေအနေဖြစ်သော်လည်းအခြားတစ်ဖက်မှကြည့်မည်ဆိုလျှင်   ပိုမိုကောင်းမွန်သောအနာဂတ်ကို ခွန်အားအသစ်ဖြင့် ပြန်လည်စတင်နိုင်ခြင်းဆိုသည့် အခွင့်အလမ်းကောင်းတစ်ခုကို ထပ်မံရရှိခြင်း လည်းဖြစ်သည်။ အကယ်စင်စစ်အောင်မြင်ခြင်း၊ ကျရှုံးခြင်းဆိုသည်မှာမိမိ၏ကြိုးစားအားထုတ်မှုနှင့် အကြောင်းကြောင်းသော ကံတရားတို့အပေါ်တွင်လည်း မူတည်ပေသည်။ ထိုအကြောင်းတရားတို့အပေါ်  သင်ခန်းစာရယူပြင်ဆင်၍ လာမည့်နှစ်တွင် မုချအောင်မြင်အောင်ကြိုးစားမည်ဟူသော ခိုင်မာသည့် သန္နိဋ္ဌာန်ချမှတ်ကာပြန်လည်ကြိုးစားရမည်ဖြစ်သည်။

ဆိုလိုချင်သည်မှာ  စာမေးပွဲကျရှုံးခြင်းကြောင့်စိတ်ဓာတ်မကျဆင်းပါနှင့်။ သူလည်းကျောင်းသား၊ ကိုယ်လည်းကျောင်းသား၊ သူလည်းလူ၊ ကိုယ်လည်းလူ၊ သူတောင်အောင်မြင်သေးရင် ငါလည်း အောင်မြင်ရမှာပေါ့ဆိုတဲ့စိတ်နဲ့အားတင်းထားပါ။ ဘဝကိုအရှုံးမပေးလိုက်ပါနှင့်။ ကျရှုံးခြင်းမှာ ခေတ္တသာ ဖြစ်ရမယ်။ အားသစ်အင်သစ်နှင့်ကြိုးစားလျှင် အောင်မြင်မှုက လက်ကမ်းကြိုနေမည်သာဖြစ်သည်။   စာရေးသူအနေဖြင့် အောင်မြင်သူအားလုံးအတွက် ဝမ်းသာပီတိ ဂွမ်းဆီထိပမာဖြစ်ရသလို ကျရှုံးသူတို့ အတွက်လည်း အထူးပင်ဝမ်းနည်းမိသည်။ စိတ်မကောင်းလည်းဖြစ်မိသည်။ ထို့အတူ မအောင်မြင်သော ကျောင်းသားများအနေဖြင့် ပညာရေးခရီးအားအဆုံးတိုင်ဆက်မလျှောက်ဘဲလမ်းခုလတ်တွင် ရပ်တန့် ပစ်လိုက်မည်ကို  စာရေးသူအထူးပင်စိုးရိမ်မိသည်။  တက္ကသိုလ်ဝင်စာမေးပွဲဆိုသည်မှာ  ဘဝစာမေးပွဲနှင့် နှိုင်းစာသော် အစိတ်အပိုင်းငယ်မျှသာဖြစ်သည်။ ထိုအစိတ်အပိုင်းငယ်ကြောင့် မိမိဘဝကို ရေစုန်မျှော မပစ်လိုက်ဖို့လိုသည်။ ထို့နည်းတူ ထိုအစိတ်အပိုင်းငယ်ကို မထီမဲ့မြင်ပြု၍လည်း  မိမိဘဝကို  ပေါ့ပြက် ပြက်မပြုစေလို။ ဟန်ချက်ညီညီဖြင့် ထိုအစိတ်အပိုင်းငယ်ဖြစ်သော စာမေးပွဲကိုလည်း အလေးအနက် ထား၊ မိမိဘဝကိုလည်းတန်ဖိုးထား၍ နည်းမှန်လမ်းမှန်၊ စနစ်မှန်ဖြင့် နောက်ထပ်တစ်ကြိမ်  အခွင့်ကောင်း ကိုဖမ်းဆုပ်၍ မုချပိုင်ပိုင်အောင်နိုင်ခြင်းသို့ရောက်ရှိအောင် မလျှော့သောဇွဲလုံ့လတို့ဖြင့်ရည်သန် ကြိုးစား ကြရမည်ဖြစ်သည်။ သို့ဆိုလျှင် အဘယ်မျှခက်ခဲသော စာမေးပွဲပင် ဖြစ်စေ ကျောင်းသားတို့၏ လက်ဝယ် ရှေ့မှောက်အောင်မြင်ခြင်းတို့ မလွဲမသွေဆိုက်ရောက် လာကြမည်သာဖြစ်သည်။

ဤနေရာတွင် ကျောင်းသားအားလုံးသိပြီးဖြစ်သည့်ဆရာမငွေတာရီ၏ “ထိပ်ဆုံးသို့” ဆိုသည့် ကဗျာစာသားအချို့ကို မျှဝေလိုသည်။  တောင်တက်သူသည် အမြင့်ဆုံးရည်မှန်းချက်သို့ ရောက်ရှိရန် အတွက် တစ်တောင်ပြီးတစ်တောင်တက်နေရသည်။ တစ်တောင်ဆုံးလို့ ကြည့်လိုက်ပြန်တော့လည်း နောက်တစ်လုံးကကျန်နေသေးသည်။  ဒီလိုနှင့်ကြိုးစားပြီးလျှောက်လှမ်းရသည်။ ရည်မှန်းချက်သို့ရောက် အောင်လျှောက်ရသည်မှာပင်ပန်းသည်။  မပင်ပန်းဘဲနှင့်လည်း အောင်မြင်မှုကိုရမည်  မဟုတ်ပေ။ ထိုကဗျာတွင်“ခါတလေ တကယ်ပန်းတာကြောင့်၊ တော်ပါပြီ ဆက်မလှမ်းချင်ဘု၊ ရပ်တန်းက ရပ်မယ်ကြံ၊ အမှန်တော့ ဖြစ်နိုင်မလား။

စခဲ့မိဟာပေါ့၊ တစ်နေ့မှာ ဆုံးရာရောက်ပါလိမ့်၊ အားလျှော့ကာ ဆုတ်ချင်စမ်းပါနဲ့ ဟု  ဆရာမငွေတာရီ က နှိုးဆော်သတိပေးထားသည်။

တက္ကသိုလ်ဝင်စာမေးပွဲကျရှုံးသူများအနေဖြင့်လည်း လာမည့်နှစ်မှာ အောင်မြင်ဖို့အတွက် အားသစ် အင်သစ်နဲ့ရည်မှန်းချက်ရောက်အောင်ဆက်လျှောက်ကြပါလို့ စာရေးသူကတိုက်တွန်းပါသည်။ “ပညာမြင့်မှလူမျိုးတင့်မည်” ဆိုသောစကားကို အခြေတည်၍ တိုက်တွန်းရခြင်းပင်ဖြစ်သည်။ ပညာ သည် မိမိတို့ဘဝအတွက် အလွန်ပင်တန်ဖိုးကြီးမားသည့် အရင်းအနှီးဖြစ်သည်။ ပညာအရင်းအနှီး များများစုနိုင်လေ မိမိအနာဂတ်အတွက် အကောင်းဆုံးအသုံးချနိုင်လေဖြစ်သည်။

ကျောင်းသားတိုင်းက ပညာရေးကို ဆုံးခန်းတိုင် အောင်သင်ကြားကြမှ မိမိနိုင်ငံတော်တွင် လူ့စွမ်းအားအရင်းအမြစ်များပေါကြွယ်ပြီး ပိုမိုဖွံ့ဖြိုးတိုးတက်သည့်နိုင်ငံကြီး ဖြစ်လာပေမည်။ နိုင်ငံတစ်နိုင်ငံ၏ တိုးတက်ခြင်း၊ ဆုတ်ယုတ်ခြင်းတို့ကို ပညာကသာ အဆုံးအဖြတ်ပေးနိုင်သည်။ ပညာအဆင့်မြင့်လျှင် တိုင်းပြည်တိုးတက်မည်။ နိုင်ငံတစ်နိုင်ငံ၏အနေအထားကို ပညာဖြင့်ဆုံးဖြတ်သကဲ့သို့ လူတစ်ဦးချင်းစီ၏ အနေအထားကိုလည်း ပညာကသာဆုံးဖြတ်မည်ဖြစ်သည်။

သင်မကြိုးစားလျှင် သင်အခွင့်အရေးကောင်းရလိမ့်မည်မဟုတ်ဟု ဆိုထားသည်။ အခွင့်အရေးကောင်း ဆိုသည်မှာ ပညာအရည်အချင်းအလိုက်ရရှိခြင်းဖြစ်ပေရာ တက္ကသိုလ်ဝင်စာမေးပွဲတွင်  ကျရှုံးသူများ အနေဖြင့် အားမငယ်ပါနှင့်။

ကျောင်းသားဘဝဆိုသည်မှာအပြေးပြိုင်ပွဲတွင် ဝင်ရောက်ယှဉ်ပြိုင်နေသည်နှင့် ပမာတူလှသည်။ အများနှင့်ယှဉ်ပြိုင်မပြေးနိုင်လျှင် မိမိသည်အများ၏ နောက်မှာ ကျန်ခဲ့မည်သာဖြစ်သည်။ တစ်ကြိမ်လဲ ကျရုံမျှနှင့်   အလွယ်တကူအရှုံးပေးလိုက်ရန်မဟုတ်။ နောက်တစ်ကြိမ်ပြန်ထ၍   အားမာန်အပြည့်ဖြင့် ဆက်လက်ပြိုင်ပွဲဝင်ရန်ပင်ဖြစ်သည်။ သို့မှသာ ပန်းတိုင် ကို လှမ်းကိုင်နိုင်မည့်အခွင့်အလမ်းအား အခြားသူများနည်းတူရရှိနိုင်မည်ဖြစ်သည်။အောင်မြင်သူများကို အားကျသည့်စိတ်ဖြင့် နမူနာယူကာ အောင်မြင်အောင်ကြိုးစားကြရမည်ဖြစ်သည်။

လူငယ်ဘဝဆိုသည်မှာ အချိန်အကန့်အသတ်ဖြင့်သာနေကြရသည်။ မိုးရွာတုန်းရေခံ၊ လသာတုန်း ဗိုင်းငင်ဆိုသကဲ့သို့ ပညာသင်ယူခွင့်ရရှိနေချိန်တွင် ကြိုးစားကြရမည်ဖြစ်သည်။ မိုးလွန်မှထွန်ချဆိုသလို ကြိုးစားမှုနောက်ကျခဲ့သော် အချည်းနှီးသာဖြစ်သည်။

နိုင်ငံတော်အစိုးရအနေဖြင့် ပညာရေးကဏ္ဍနှင့် ကျန်းမာရေးကဏ္ဍကို အထူးအားပေးမြှင့်တင်နေချိန်တွင် မိမိသည်လည်း မြှင့်တင်ခံရသူအဖြစ် နေရာယူစေချင်သည်။ ပညာသင်ရမည့်အရွယ်တွင် အကောင်းဆုံး ထားရှိရမည်မှာ စာမေးပွဲအောင်မြင်ရေးသာဖြစ်သည်။  ကျောင်းသားများအနေဖြင့်  မိမိတို့ဘဝ တိုးတက် လမ်းကိုသိရှိကြသလို  တိုးတက်လမ်းကို အနှောင့်အယှက်ပြုနိုင်သည့် အရာများကိုလည်း ဖယ်ရှားနိုင်ရ မည်ဖြစ်သည်။ ကျောင်းနေအရွယ်တွင် ကွမ်းယာ၊ အရက်၊ ဆေးလိပ်၊ မူးယစ်ဆေးဝါး စသည်များကို အထူးရှောင်ရှားရမည်ဖြစ်သလို အချည်းနှီးအချိန်ကုန်စေသည့်ဂိမ်းကစားခြင်း၊ အချိန်ကုန်ရုံမျှမက အကျိုးမဲ့စေသည့် လောင်းကစားခြင်းမျိုးကိုလည်း အထူးရှောင်ရှားသင့်သည်။ ကျောင်းသားနှင့် မအပ်စပ် သည့် အကြောင်းခြင်းရာများတွင် ဝေလေလေလိုက်ပါ၍ တွေဝေမိန်းမောကာ စိတ်လေလွင့်မှုမရှိအောင် လည်း သတိပြုနေထိုင်ကြရမည်ဖြစ်သည်။ ဤသို့လျှင် အရှုံးမှသင်ခန်းစာဖော်ထုတ်၍ အောင်မြင်မှု လမ်းကြောင်းကို  တည့်မတ်စွာထိန်းကျောင်းနိုင်ရမည်ဖြစ်သည်။

အောင်မြင်သူများအနေဖြင့်ဆက်လက်၍အောင်မြင်မှုလမ်းကြောင်းမှာ အောင်မြင်စွာလျှောက် လှမ်းနိုင် ကြပါစေ။  ကျရှုံးသူများအနေဖြင့်လည်း ကျရှုံးမှုကို အောင်မြင်မှုဖြင့်အနိုင်ယူနိုင်ကြပါစေ။ မိဘများအနေ ဖြင့် အောင်မြင်မှုကို ဝမ်းသာအားရပီတိဖြစ်နေကြသလို ကျရှုံးသူများအတွက်လည်း  အားပေးနှစ်သိမ့် ပေးစေချင်သည်။  မိမိသားသမီးအတွက် အားတက်ဖွယ်စကားများ ပြောကြားခြင်း၊ ထပ်မံ၍ အခြေအနေ ကောင်းများ   ဖန်တီးပေးခြင်းတို့ဖြင့် စိတ်ခွန်အားဖြစ်စေချင်သည်။ နေမင်းကြီး နှင့်လွဲ၍ ဝမ်းနည်းနေခြင်း မျိုးမဖြစ်စေဘဲ   လမင်းကြီးနှင့် ထပ်မံဆုံတွေ့နိုင်အောင် ကြိုးစားအားထုတ် ခြင်းဖြင့် အချိန်ကောင်း အခါကောင်းများကို  ဖမ်းဆုပ်နိုင်ရန် အသင့်ရှိ နေကြစေချင်သည်။

စာရေးသူအနေဖြင့်ကျောင်းသားဟူသောအသုံးအနှုန်းသုံးထားခြင်းမှာ ကျောင်းသားဟူသောစကားရပ်တွင် ကျောင်းသူများလည်းပါဝင်ပြီးဖြစ်၍ သုံးနှုန်းရခြင်းဖြစ်သည်။  ဆရာဟူသောစကားရပ်တွင်လည်း  ဆရာမများပါဝင်ပြီးဖြစ်သောကြောင့် “မိဘ၊ ဆရာပူးပေါင်း ကလေးပညာကောင်း” ဆိုသော ဆောင်ပုဒ် ကိုလက်ကိုင်ပြုကာ ကြိုးစားကြရမည်ဖြစ်သည်။ အောင်မြင်သူ၊ကျရှုံးသူ ကျောင်းသားများအားလုံး အနေဖြင့်  မူတစ်သွင်အားအင်သစ်လိုက်ပါ့ ချစ်စရာ့တို့ကျောင်းသားများအဖြစ် အနာဂတ်လှပအောင် လျှောက် လှမ်းကြရန်ဖြစ်ပါကြောင်း ရေးသားလိုက်ရပေသည်။      ။

လူသားတို့သည် မိမိဘဝတွင် ကြုံတွေ့ရသော ဘဝအခက်အခဲစိန်ခေါ် မှုများကို ရင်ဆိုင်ဖြေရှင်းကျော်လွှားကြရသည်။  ရင်ဆိုင်ဖြေရှင်းကျော်လွှား နိုင်သူသည် ဘဝအောင်မြင်မှု ပန်းတိုင်တစ်ခုကို တက်လှမ်းခွင့်ရသည်။

စင်စစ်မူ  ထိုရင်ဆိုင်ဖြေရှင်းရသောဘဝအခက်အခဲများသည်  ဘဝစာမေးပွဲများဖြစ်သည်။ ဘဝအောင်မြင်မှုပန်းတိုင်တစ်ခုကို တက်လှမ်းနိုင်သူသည် ဘဝစာမေးပွဲတစ်ခု အောင်မြင်ခြင်းဖြစ်သည်။ ဘဝစာမေးပွဲဟူသည်   လူ့ဘဝတစ်လျှောက်တွင်   အမြဲကြုံတွေ့ရမည့် အခက်အခဲ စိန်ခေါ်မှုများဖြစ်သည်။ စာမေးပွဲသည် ကျွန်တော်တို့ ငယ်စဉ်ကတည်းက ကျောင်းတွင်ကြုံတွေ့ရသော အတွေ့အကြုံများဖြစ်သည်။ ငယ်စဉ်ဘဝ ကျောင်းနေစဉ်ကာလတွင် အတန်းစာမေးပွဲများကို ဖြေဆိုခဲ့ကြရသည် မဟုတ်ပါလား။ သို့ဆိုလျှင် စာမေးပွဲများကို ဖြေဆိုမှုမပြုလုပ်သင့်သည်၊ ပြုလုပ်သင့်သည်ဟူသော အချက်သည် စဉ်းစားစရာဖြစ်လာသည်။

ကျွန်တော်တို့သည်  ကျောင်းသားဘဝတွင်  ကျောင်းစာမေးပွဲများကို တစ်တန်းပြီးတစ်တန်း၊ တစ်နှစ်ပြီးတစ်နှစ်ဖြေဆိုပြီး တစ်ဆင့်ပြီးတစ်ဆင့် တက်လှမ်းအောင်မြင်လာခဲ့ကြသည်။ လုပ်ငန်းခွင် ဝင်ရောက်ရာတွင်လည်း ဝန်ထမ်းရွေးချယ်ရေး အလုပ်စာမေးပွဲများ၊ အင်တာဗျူးများကို စာတွေ့လူတွေ့ဖြေဆိုပြီး  အောင်မြင်မှုကိုရယူခဲ့ကြသည်။  တစ်ဖန်စာမေးပွဲများသည်  ရပ်တန့်ပြီးဆုံးသွားခြင်းမရှိဘဲ  ရာထူးတိုးမြှင့်စာမေးပွဲများကို အဆင့်ဆင့် ဆက်လက် ဖြေဆို၍  တစ်ဆင့်ထက်တစ်ဆင့်မြင့်သော ရာထူးနေရာများကို တက်လှမ်းခဲ့ကြသည်။ ယနေ့မျက်မှောက်ခေတ်ကာလတွင် ကမ္ဘာတစ်ဝန်း၌ စာမေးပွဲစစ်ဆေးခြင်းသည် ကောင်းသည်၊ မကောင်းသည်၊ လိုသည်၊ မလိုသည်ကို ဆွေးနွေးငြင်းခုံလာကြသည်။

စာမေးပွဲသည် အလွတ်ကျက်မှတ်မှုကိုသာအားပေး၍ စဉ်းစားတွေးခေါ်နိုင်စွမ်းကို ကျဆင်းစေသည်ဟု ယူဆကြသူများလည်း ရှိသည်။ ထိုအချက်သည် အလုံးစုံမှန်ကန်မှုရှိ၊ မရှိ စဉ်းစားရန် လိုအပ်လာပြီဖြစ်သည်။

စာမေးပွဲစစ်ဆေးမှု၏ရည်ရွယ်ချက်မှာ သက်ဆိုင်ရာ ဘာသာရပ်တစ်ခု၊ နယ်ပယ်တစ်ခုတွင်ရှိရမည့် ကျွမ်းကျင်မှုကို စစ်ဆေးရန်သာမက ယင်းဘာသာရပ်၊ နယ်ပယ်အပေါ်တွင် အသိပညာနှင့် နားလည်မှုမည်မျှရှိသည်ကို စစ်ဆေးအကဲဖြတ်ရန်လည်းဖြစ်သည်။ ကျောင်းသားတစ်ဦး၏ ပညာရည်ကို တိုင်းတာစစ်ဆေး အကဲဖြတ်ရာတွင် စာမေးပွဲထက်ကောင်းသော စစ်ဆေးမှုမရှိသေးချေ။ စာမေးပွဲစစ်ဆေးမှုတွင် ရေးဖြေသာမက နှုတ်ဖြေစစ်ဆေးခြင်း၊ လုပ်ငန်းအတွေ့အကြုံ လက်တွေ့စမ်းသပ်ခြင်းတို့လည်းပါဝင်သည်။ ကျောင်းသားတစ်ဦးသည် သက်ဆိုင်ရာဘာသာရပ်တွင် တတ်သိမှု၊ ထူးချွန်မှုတို့ မည်မျှရှိသည်ကို စာမေးပွဲစစ်ဆေး

အမှတ်ပေး၍ အကဲဖြတ်ခြင်းဖြင့်သာ စစ်ဆေးခြင်းသည် အကောင်းဆုံး မှတ်ကျောက်တင်မှုဖြစ်သည်။  စင်စစ်အားဖြင့်  ကျောင်းသား၊ ကျောင်းသူများ၏ ပညာရေးဆိုင်ရာ တိုးတက်မှု၊  စွမ်းရည်နှင့် အရည်အချင်းများကို စာမေးပွဲစစ်ဆေးခြင်းဖြင့် အတည်ပြုနိုင်သည်။ ထို့ကြောင့် ပညာသင်နှစ်တစ်လျှောက် သင်ကြားပို့ချခဲ့သော ဘာသာရပ်အသီးသီး၏ တတ်မြောက်မှုကိုတိုင်းတာရန် လပတ်စာမေးပွဲများ၊ နှစ်ဝက်စာမေးပွဲများ၊ နှစ်ဆုံး စာမေးပွဲများစစ်ဆေး၍ အတည်ပြုဆုံးဖြတ်ရသည်။

ကျောင်းသား၊ ကျောင်းသူတစ်ဦးချင်း၏ လေ့လာသင်ယူမှတ်သားမှုတွင် အားနည်းချက်၊ အားသာချက်များရှိမည်မှာ   ဧကန်ဖြစ်သည်။ တစ်ဦးချင်းစီ၏ အားနည်းချက်ကို ကြိုတင်သိရှိခြင်းဖြင့် ပြုပြင်ပေးရမည့်အချက်၊ ဖြည့်စွက် ပေးရမည့်အချက်ကို သိရှိနိုင်သည်။ တစ်ဖန်အားသာချက်ကို သိရှိခြင်းဖြင့် ပိုမိုထူးချွန်ထက်မြက်အောင် အားဖြည့်လေ့ကျင့်ပေးနိုင်သည်။ တစ်ဦးချင်းစီ၏ သင်ယူမှုအားနည်းချက်၊ အားသာချက်တို့ကို ပညာသင် ကာလတစ်လျှောက် ကြိုတင်သိရှိနိုင်မည့် နည်းလမ်းသည်

စာမေးပွဲစစ်ဆေးခြင်းပင်ဖြစ်သည်။ ကျောင်းသားတစ်ဦးချင်းစီ၏ သင်ယူမှတ်သားနိုင်မှု စွမ်းရည်ကို ယှဉ်ပြိုင်အကဲဖြတ်ရာတွင်လည်း စာမေးပွဲစစ်ဆေးခြင်းသည်  အနီးစပ်ဆုံးမှန်ကန်မှုကို ပေးနိုင်သည်။  ထို့ပြင် တစ်ဦးချင်း စီ၏ စွမ်းရည်ပိုမိုတိုးတက်မှုအတွက်စစ်မှန်သောယှဉ်ပြိုင်လိုစိတ်ကိုဖြစ်ပေါ် စေသည်။ ထို့ကြောင့် ကျောင်းသားတစ်ဦးချင်းစီ၏ ပညာရပ်ကို ထူးချွန်စွာတတ်မြောက်မှု၊ အားသာရာ ထူးချွန်မှုမှ ဘဝရည်မှန်းချက်ရောက်အောင် လျှောက်လှမ်းနိုင်မှုတို့ကို စာမေးပွဲစစ်ဆေးခြင်းက များစွာ ကူညီပံ့ပိုးပေးသည်။

စာမေးပွဲများသည် ကျောင်းသား၊ ကျောင်းသူများ၏ အလွတ်ကျက်မှတ်မှုကိုသာ အားပေးသည်ဆိုသောအချက်မှာ မမှန်ကန်ပေ။ စာမေးပွဲစစ်ဆေးခြင်းဖြင့်  အလွတ်ကျက်မှတ်မှုသာမက ကျက်မှတ်နားလည်ထားသော အချက်အလက်များကိုအသုံးပြု၍  ပြန်လည်အသုံးချနိုင်မှုအကျိုးဆက်ကိုရစေသည်။  စာမေးပွဲများသည် အချက်အလက်များကို တိုက်ရိုက်ဖြေဆိုရသည့် မေးခွန်းများရှိသကဲ့သို့ အချက်အလက်ကို အခြေခံ၍ စဉ်းစားတွေးခေါ်ဖြေဆိုရသည့် ဉာဏ်ရည်စစ်မေးခွန်းများလည်း ရှိသည်။

ထိုမေးခွန်းမျိုးကိုဖြေဆိုရန် ကျောင်းသား၏ ကျိုးကြောင်းဆီလျော်စွာ စဉ်းစားတွေးခေါ်နိုင်မှု၊ ယုတ္တိဗေဒဆိုင်ရာ စဉ်းစားဆုံးဖြတ်နိုင်မှုကို အသုံးပြုရသည်။  ထိုသို့စဉ်းစားတွေးခေါ် ဆုံးဖြတ်မှုပြုနိုင်ရန် ဘာသာရပ်ဆိုင်ရာ လေ့လာကျက်မှတ်မှုနှင့် နားလည်သဘောပေါက်မှုများ လိုအပ်သည်။

ထို့ကြောင့် စာမေးပွဲစစ်ဆေးခြင်းသည် ကျောင်းသားတို့၏ မှတ်သားနိုင်မှုဉာဏ်ရည်၊ တွေးခေါ်ထင်မြင်ယူဆချက်တို့ကို မြှင့်တင်ပေးနိုင်သည်။

နိုင်ငံတော်က ကျောင်းသား၊ ကျောင်းသူများ၏ သင်ယူနိုင်မှုစွမ်းရည်တိုးတက်၍  ဗလငါးတန်နှင့်ပြည့်စုံသော  ထူးချွန်ထက်မြက်သူများပေါ်ထွန်းလာစေရန် လူရည်ချွန်စာမေးပွဲများ ကျင်းပစစ်ဆေး၍ မြှောက်စား မြှင့်တင်လျက်ရှိသည်။  လူရည်ချွန်ရွေးချယ်ရေး စာမေးပွဲများတွင် ဉာဏစွမ်းရည်၊ ကာယစွမ်းရည်ဆိုင်ရာ စစ်ဆေးမှုများပြုလုပ်၍ ထူးချွန်သူများကို ရွေးချယ်ပေးခြင်းဖြင့် ကျောင်းသား၊ ကျောင်းသူများ၏ ကိုယ်ရည် ကိုယ်သွေးများ  မြှင့်တင်ခွင့်တံခါးကို ဖွင့်ပေးလျက်ရှိသည်။

ကျောင်းသား၊  ကျောင်းသူများကို  စာမေးပွဲစစ်ဆေးခြင်းသည် အပိုအလုပ်မဟုတ်ဘဲ အမှန်တကယ်လိုအပ်ချက်ကို ဖြည့်ဆည်းလေ့ကျင့် ပေးလိုက်ခြင်းဖြစ်သည်။  စာမေးပွဲများသည်  ကျောင်းသား၊ ကျောင်းသူများ၏  အရည်အသွေးနှင့်ကျွမ်းကျင်မှုကို ဖော်ထုတ်ပေးနိုင်သည်။

ထို့ကြောင့် ကျောင်းသားဘဝတွင် စာမေးပွဲနှင့် ကင်းကွာ၍မရနိုင်ပေ။

စင်စစ် စာမေးပွဲများသည် ကျောင်းသား၊ ကျောင်းသူများ၏ဘာသာရပ်ဆိုင်ရာ ကျွမ်းကျင်မှုကို စစ်ဆေးနိုင်ရုံသာမက  ကျောင်းသား၏ အားနည်းချက်၊  အားသာချက်ကိုပါ ဖော်ထုတ်ပေးနိုင်သည်။ ကျောင်းသား၊ ကျောင်းသူများသည် စာမေးပွဲဖြေဆိုလေ့ကျင့်မှုများမှတစ်ဆင့် သဘောတရားဆိုင်ရာအချက်များကိုပါ  ပိုမိုနက်ရှိုင်းစွာသိမြင်လာစေသည်။

ထို့ကြောင့် စာမေးပွဲသည်  ကျောင်းသားလူငယ်များ၏  ပညာရေးဆိုင်ရာ တိုးတက်အောင်မြင်မှုမှ ဘဝတစ်လျှောက်တွင် ကြုံတွေ့ရမည့်အခက်အခဲစိန်ခေါ်မှုများကို   ကိုယ်ပိုင်ဉာဏ်ရည်ဖြင့်  ရင်ဆိုင်ဖြေရှင်းနိုင်သော စွမ်းရည်များအထိရရှိလာမည်ဖြစ်သည်။ တစ်နည်းအားဖြင့် ဘဝစာမေးပွဲများကိုပါ  ကောင်းမွန်စွာဖြေဆို အောင်မြင်လာနိုင်မည်ဖြစ်သည်။

ကျွန်တော်တို့နှင့်အတူ ပညာသင်ယူခဲ့ကြသော ငယ်သူငယ်ချင်းများတွင် အချို့သည် ပညာဆုံးခန်းတိုင်အောင် သင်ယူ၍ စာမေးပွဲများစွာကိုဖြေဆိုအောင်မြင်ခဲ့ကြသည်။ ထိုသူတို့သည် မိမိဘဝကို မိမိနည်းမိမိဟန်ဖြင့် ဖန်တီးပုံဖော်နိုင်ကြသည်။  အချို့မှာ  ပညာဆုံးခန်းမတိုင်ဘဲ လက်တွေ့ဘဝထဲသို့ ရောက်ရှိကာ ကြုံသလိုရင်ဆိုင်ရင်း ဘဝကိုလှပစွာ မဖန်တီးနိုင်သူများရှိကြသည်။ အတန်းပညာဆုံးခန်းတိုင် မသင်ခဲ့သော်လည်း ဖြေဆိုခဲ့ဖူးသော စာမေးပွဲအတွေ့အကြုံများမှ ရရှိသော ဉာဏ်ရည်ကို  လက်တွေ့ကျကျကောင်းစွာ အသုံးချနိုင်သဖြင့်  ဘဝအောင်မြင် တိုးတက်သူအချို့လည်း ရှိသည်။ သို့သော် ထိုသူတို့မှာ အရေအတွက်အားဖြင့် လက်ချိုး ရေနိုင်ရုံလောက်သာရှိသည်။ အများစုမှာ စာမေးပွဲများစွာ ဖြေဆိုဖူးသောသူများကသာ  ကြီးမားသောဘဝ အောင်မြင်မှုများ ရရှိသူဦးရေများပေသည်။ 

ထို့ကြောင့် ကျောင်းများက ဖြေဆိုလေ့ကျင့်ပေးလိုက်သော စာမေးပွဲများသည် ဘဝစာမေးပွဲများ ဖြေဆိုအောင်မြင်နိုင်သည်အထိ အကျိုးသက်ရောက်စေသည်မှာ ကျွန်တော်တို့ ကိုယ်တွေ့ဟု ဆိုလိုက်ချင်ပါသည်။    ။

MWD Web Portal

ပညာရေးတွင်ရင်းနှီးမြှုပ်နှံခြင်းသည် တိုင်းပြည်တိုးတက်ရေးကို ဖော်ဆောင်နေခြင်းပင်ဖြစ်သည်။

ဖွံ့ဖြိုးတိုးတက်သောနိုင်ငံများသည် မျိုးဆက်သစ်လူငယ်များ၏ပညာရေးကို အလေးထားကြသည်။ ပညာရေးအသုံးစရိတ်သုံးစွဲနိုင်မှုအပေါ်မူတည်၍  နိုင်ငံတစ်နိုင်ငံ၏အဆင့်အတန်းကို  ဖော်ပြလျက်ရှိသည်။ နိုင်ငံတစ်နိုင်ငံတည်ဆောက်ရာတွင် မျိုးဆက်သစ်များဖြင့်သာ တည်ဆောက်ကြရသည်။ မျိုးဆက်သစ်များ ပညာပြည့်ဝနေမှသာလျှင်  အနာဂတ်နိုင်ငံတော်ကိုတိုးတက်အောင်ထူထောင်နိုင်မည်ဖြစ်သည်။

ထို့ကြောင့် မျိုးဆက်သစ်များကို အလေးထားသင့်ပေသည်။ နိုင်ငံတစ်နိုင်ငံ၏ အနာဂတ်သည် မျိုးဆက်သစ်လူငယ်များ၏ ပညာတတ်မြောက်မှုအဆင့်အတန်းပေါ်တွင်  များစွာတည်မှီလျက်ရှိသည်။

ပညာသည်သာလျှင်

ဆိုရလျှင် စာမတတ်သူနှင့်ပညာနိမ့်ပါးသူတို့များပြားခြင်းသည် နိုင်ငံတော်အတွက် ဝန်ထုပ်ဝန်ပိုး မိုဖြစ်ပေါ်စေသည်။ ပညာပြည့်ဝနှလုံးလှသူများဖြင့်သာလျှင် နိုင်ငံတော်တည်ငြိမ်အေးချမ်းရေးနှင့်ခေတ်မီဖွံ့ဖြိုးတိုးတက်ရေးတို့အတွက်  မရှိမဖြစ်လိုအပ်သည့် တန်ဖိုးမြင့်လူ့စွမ်းအားအရင်းအမြစ်များ ကို ဖြည့်ဆည်းပေးနိုင်မည်ဖြစ်သည်။ နိုင်ငံတစ်နိုင်ငံတွင်စာမတတ်သူများပြားခြင်း၊ အလုပ်လက်မဲ့ ပေါများခြင်းတို့သည် ရာဇဝတ်မှုများကိုထူပြောစေပြီး လက်နက်ကိုင်  ဆူပူသောင်းကျန်းမှုများကိုလည်း ပိုမိုဖြစ်ပေါ်လာစေနိုင်သည်။ ထို့ပြင် လူညံ့၊ လူဆိုးများ အင်အားကြီးမားသည်နှင့်အမျှ လူ့အဖွဲ့အစည်းကိုလည်း ပြန်လည်ခြိမ်းခြောက်ပြီး အန္တရာယ်ပေးလာနိုင်သည်။

မြန်မာနိုင်ငံတွင်  လူဦးရေစုစုပေါင်း ၅၁ သန်းကျော်ရှိသည့်အနက်  ဘွဲ့ရသူမှာ သုံးသန်းခန့်သာ ရှိသည်။ မဟာဘွဲ့၊ ပါရဂူဘွဲ့များဆိုလျှင် ထိုအရေအတွက်ထက်နည်းပါးမည်ဖြစ်သည်။ အသက် ၂၅ နှစ် အထက် လူဦးရေ  ၂၅ သန်းကျော်ရှိရာ ၎င်းလူဦးရေ၏သုံးပုံနှစ်ပုံကျော်သည် အခြေခံပညာမူလတန်းနှင့် အလယ်တန်းအဆင့်၌ပင် ကျောင်းထွက်ထားကြသူများဖြစ်သည်။ အ‌များစုသည်  အခြေခံပညာမူလတန်းပြီးဆုံးချိန်တွင် ကျောင်းထွက်သွားကြခြင်းဖြစ်သည်။

ကျန်းမာပျော်ရွှင်စွာပညာသင်ယူနိုင်ရေး

လက်ရှိအချိန်တွင် CRPH၊ NUG နှင့် PDF အမည်ခံ အစွန်းရောက်အကြမ်းဖက်သမားများသည် တချို့သောဒေသများတွင် အခြေခံပညာကျောင်းများအား ဗုံးခွဲတိုက်ခိုက်ခြင်း၊ မီးရှို့ခြင်း၊ ကျောင်းသားမိဘများအားခြိမ်းခြောက်ခြင်း၊   ပညာသင်ကြားပေးနေသော ဆရာ၊ ဆရာမများအား ခြိမ်းခြောက်အကျပ်ကိုင်ခြင်းတို့ လုပ်ဆောင်လျက်ရှိသည်။ တချို့သော ကျောင်းအုပ်ဆရာ၊ဆရာမကြီးများနှင့်ဆရာ၊ ဆရာမများသည် အသက်ကိုပင်လျှင် ရန်ရှာခြင်းခံနေကြရသည်။ ထို့ပြင် အကြမ်းဖက်ထောက်ခံသူ တချို့သောမိဘများသည် အစိုးရကိုဆန့်ကျင်လျက် သား၊ သမီးများကို  ကျောင်းတက်ခွင့်မပြုဘဲထားကြသည်။ ထိုသို့ပြုလုပ်ခြင်းသည်   မိမိရင်သွေးငယ်များ၏အနာဂတ်ကိုဖျက်ဆီးနေခြင်းပင်ဖြစ်သည်။

ထို့ကြောင့် မိဘအုပ်ထိန်းသူများအနေဖြင့် မိမိသား၊ သမီးများ၏အနာဂတ်ကိုမြော်တွေးလျက် ကျောင်းပုံမှန်တက်ရောက်ခွင့်ပြုသွားစေလိုသည်။ မျိုးဆက်သစ်ကလေးငယ်အားလုံး ပညာသင်ယူခွင့် ရရှိစေရေးအတွက် အားလုံးပူးပေါင်းဆောင်ရွက်သွားရန်လိုအပ်သည်။  ထို့ပြင် မိဘအုပ်ထိန်းသူများ၊ ကျောင်းအကျိုးတော်ဆောင်များ၊ ဆရာ၊ ဆရာမများ၊ တာဝန်သိပြည်သူများအနေဖြင့် အဖျက်အမှောင့် လုပ်ဆောင်ရန်   ကြံစည်နေသူများ၏သတင်းနှင့်လှုပ်ရှားမှုများကို သက်ဆိုင်ရာလုံခြုံရေးတပ်ဖွဲ့များသို့ အချိန်မီအသိပေးသွားသင့်သည်။ စင်စစ်အားဖြင့် ကျောင်းသား၊   ကျောင်းသူအားလုံးဘေးကင်းလုံခြုံပြီး ကျန်းမာပျော်ရွှင်စွာ ပညာသင်ယူနိုင်ရေးသည် များစွာအရေးပါလျက်ရှိသည်။

သာယာကောင်းမွန်သောအနာဂတ်နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်သည်  ဇွန်လ ၁၁ ရက်တွင် ပြင်ဦးလွင်မြို့ရှိ အမှတ်(၃) အခြေခံပညာအထက်တန်းကျောင်းသို့ရောက်ရှိစဉ် ကျောင်းစုံညီခန်းမ၌ ဆရာ၊ ဆရာမများအားတွေ့ဆုံ၍ အမှာစကားပြောကြားရာတွင်   “မိမိတို့နိုင်ငံတွင်ဖြစ်ပွားလျက်ရှိသည့်   မတည်မငြိမ်မှုများနှင့်အကြမ်းဖက်မှုဖြစ်စဉ်များကိုကြည့်မည်ဆိုပါက  ပညာရေးအားနည်းသည့်ဒေသများ၌ ပိုမိုဖြစ်ပွားသည်ကိုတွေ့ရှိရမည်ဖြစ်ကြောင်း၊ အတန်းပညာတတ်မြောက်မှုအားနည်းခြင်း၊ သိမြင်တွေးခေါ်နိုင်မှုအားနည်းခြင်းတို့ကြောင့် အကြမ်းဖက်မှုလုပ်ရပ်များကို   လုပ်ဆောင်လာကြခြင်းဖြစ်ပြီး ဒေသနှင့်ဒေသခံများ၏  လူမှုစီးပွားဘဝများကိုပါထိခိုက်လာစေကြောင်း၊ ထို့ကြောင့် ဆရာ၊ ဆရာမများအနေဖြင့်  မိမိတို့သင်ကြားပေးနေရသည့် ကလေးငယ်များအား အတန်းပညာသင်ကြားပေးခြင်းအပြင်    အကောင်းအဆိုး၊ အကြောင်းအကျိုးကို ခွဲခြားသိမြင်နိုင်စွမ်းရှိစေမည့် အသိပညာနှင့်အတွေးအမြင်များကို သင်ကြားပေးရမည်ဖြစ်ကြောင်း၊ ငယ်စဉ်ကလေးဘဝကတည်းက စနစ်တကျဖြင့် နေထိုင်သွားလာတတ်စေရေး၊ သန့်ရှင်းသပ်ရပ်မှုရှိစေရေး၊ လိမ္မာယဉ်ကျေးမှုရှိစေရေး သင်ကြားလေ့ကျင့်ပေးမှသာလျှင် အနာဂတ်ဘဝလမ်းတစ်လျှောက်၌ သာယာကောင်းမွန်သည့်   လူမှုဘဝကိုရရှိစေမည်ဖြစ်ကြောင်း”တိုက်တွန်းပြောကြားခဲ့သည်။

ဆိုရလျှင် နိုင်ငံတော်၏အနာဂတ်သည် လူငယ်များလက်ဝယ်တွင်ရှိသည်။ လူငယ်များသည် ဆရာများ၏လက်ဝယ်တွင်ရှိသည်။ ထို့ကြောင့် နိုင်ငံတော်၏အနာဂတ်သည် ဆရာများ၏လက်ဝယ်တွင်ရှိသည်ဟုဆိုနိုင်သည်။ အမှန်တော့ အရည်အသွေးပြည့်ဝသည့်ဆရာများကသာ  အေးချမ်းပြီးဖွံ့ဖြိုးတိုးတက်သည့်   နိုင်ငံတော်ကိုဖော်ဆောင်နိုင်မည်ဖြစ်သည်။

ထို့ပြင် မသိသူကိုသိအောင်၊ မတတ်သူကိုတတ်အောင်၊ မကျွမ်းကျင်သူကို ကျွမ်းကျင်အောင်၊  မယဉ်ကျေးသူကိုယဉ်ကျေးအောင်၊   မလိမ္မာသူကို လိမ္မာလာအောင် “စာကိုလည်းသင်၊ လူကိုလည်းပြင်”ပေးရမည့်သူများမှာဆရာများပင်ဖြစ်သည်။ စင်စစ်အားဖြင့်  မြန်မာ့လူမှုအသိုက်အဝန်းတွင် ဆရာ၊ ဆရာမများသည် အရေးပါသောအခန်းကဏ္ဍမှပါဝင်လျက်ရှိသည်။ “ဆရာမပြနည်းမကျ” ဆိုသလို  ဆရာ၊ ဆရာမများသည်  တပည့်များ၏   စံပြပုဂ္ဂိုလ်များပင်ဖြစ်သည်။ ထို့ပြင်  တိုင်းပြည်တည်ဆောက်ရာတွင်လည်း အခရာကျလျက်ရှိသည်။

အမျိုးသားပညာရေးစီမံကိန်း

နိုင်ငံတော်စီမံအုပ်ချုပ်ရေးကောင်စီသည်  တိုင်းပြည်အတွင်း   ပညာတတ်များမွေးထုတ်နိုင်ရေးရည်မှန်းချက်ဖြင့် လက်ရှိအချိန်တွင် ပညာရေးဆိုင်ရာဖွံ့ဖြိုးတိုးတက်ရေးအတွက် နှစ် ၃၀ အမျိုးသားပညာရေးစီမံကိန်းကိုဆက်လက်အကောင်အထည်ဖော်ဆောင်ရွက်လျက်ရှိသည်။ ပြည်နယ်နှင့်တိုင်းဒေသကြီးတစ်ခုလျှင် အနည်းဆုံးတက္ကသိုလ်တစ်ခု၌ Ph.D သင်တန်းဖွင့်လှစ်ရန် စီစဉ်ဆောင်ရွက်လျက်ရှိသည်။

ထို့ပြင် ကျောင်းသား၊ ကျောင်းသူအားလုံး ပညာများအမှန်တကယ်တတ်မြောက်ပြီးပုံမှန်တန်းစဉ်ကူးပြောင်းနိုင်ရေးအတွက် ဘာသာရပ်ဆိုင်ရာ ဆရာ၊ ဆရာမများကို မွမ်းမံသင်တန်းများပို့ချပေးရန်စီစဉ်လျက်ရှိသည်။ တစ်ဖက်တစ်လမ်းမှလည်း ဆရာ၊ ဆရာမများ  လိုအပ်ချက်များကို   တတ်နိုင်သမျှ ဖြည့်ဆည်းဆောင်ရွက်ပေးရန်စီမံလျက်ရှိသည်။

တိုင်းပြည်တည်ငြိမ်အေးချမ်းတိုးတက်ဖို့ ပညာတတ်များမွေးထုတ်စို့

အမှန်တော့ လူတစ်ဦး၏ဘဝတိုးတက်အောင်မြင်နိုင်မှုသည် ထိုသူ၏ပညာတတ်မြောက်ထားမှုအပေါ်တွင်များစွာမူတည်နေသည်။ငယ်စဉ်ကပုံမှန်ကျောင်းပညာသင်ကြားခွင့်မရရှိခဲ့သော  လူတစ်ဦး သည်  အသက်မွေးဝမ်းကျောင်းလုပ်ငန်းအတွက်  ခက်ခဲပင်ပန်းကြမ်းတမ်းစွာ ရုန်းကန်လှုပ်ရှားကြရသည်။  ထိုသဘောတရားအရ  နိုင်ငံတစ်နိုင်ငံတည်ငြိမ်အေးချမ်းဖွံ့ဖြိုးတိုးတက်မှုသည်လည်း ထိုနိုင်ငံရှိ ပြည်သူများ၊ အထူးသဖြင့် မျိုးဆက်သစ်လူငယ်များအားလုံး ပညာတတ်မြောက်မှုနှုန်းအပေါ်တွင်သာ မူတည်လျက်ရှိသည်။  စင်စစ်အားဖြင့် ပညာရေးသည် လူသားအားလုံးအတွက်   ပင်မဒေါက်တိုင်ဖြစ်နေသောကြောင့် ကမ္ဘာ့နိုင်ငံအသီးသီးသည် နိုင်ငံသားများ၏ပညာရည်မြင့်မားရေးအတွက် ရေတိုရေရှည်စီမံချက်များ၊  သုတေသနလုပ်ငန်းများအား ငွေကြေးမြောက်မြားစွာ  အကုန်ကျခံလျက်  ရင်းနှီးမြှုပ်နှံဆောင်ရွက်လျက်ရှိသည်။  ထိုသို့ရင်းနှီးမြှုပ်နှံရာတွင်  နိုင်ငံသားများ၏ ပညာရည်အဆင့်အတန်းမြင့်မားရေးသည် များစွာအရေးပါလျက်ရှိသည်။  အထူးသဖြင့်  မျိုးဆက်သစ်များ  ပညာရည်မြင့်မားနေမှသာလျှင် ထိုနိုင်ငံသည်   တည်ငြိမ်အေးချမ်းတိုးတက်ပြီး  အဆင်းရဲဆုံးနိုင်ငံများစာရင်းမှ  လွတ်မြောက်နိုင်မည်ဖြစ်သည်။

နိုင်ငံတစ်နိုင်ငံ၏ အနာဂတ်တိုးတက်ရေးသည်မျိုးဆက်သစ်များ၏ပညာရည်တတ်မြောက်မှု အဆင့်အတန်းပေါ်တွင် များစွာတည်မှီနေသည်ဆိုသောအချက်ကို ကမ္ဘာ့နိုင်ငံတိုင်းက တူညီစွာလက်ခံ ထားရှိကြသည်။  ထိုနည်းတူစွာပင်  ကျွန်ုပ်တို့မြန်မာနိုင်ငံသည်လည်း မျိုးဆက်သစ်များပညာရည်မြင့်မားရေးအတွက်  ရေတိုရေရှည်စီမံကိန်းများချမှတ်လျက်   အမျိုးသားရေးအသွင်ဖြင့် အကောင်အထည်ဖော်လျက်ရှိသည်။ အမှန်တော့ အသိပညာရှင်၊ အတတ်ပညာရှင်ပေါများသော နိုင်ငံတိုင်းသည် စီးပွားရေး၊ လူမှုရေး၊ နိုင်ငံရေး  စသည့်နယ်ပယ်အားလုံးတွင်  ဖွံ့ဖြိုးတိုးတက်ပြီး ကမ္ဘာ့ဦးဆောင်နိုင်ငံများအဖြစ် ရပ်တည်နိုင်လေ့ရှိကြသည်။        

ဆိုရလျှင် “ပညာသမာ အာဘာနတ္ထိ-ပညာနှင့်တူသော အလင်းရောင်သည်မရှိ”ဟူ၍မြတ်စွာဘုရားက ဟောကြားတော်မူခဲ့ရာ ပညာတန်ဆောင်အလင်းရောင်ဖြင့် ဘဝကိုအောင်မြင်စွာတည်ဆောက်နိုင်ရေး၊ ပညာအလင်းကင်းမဲ့စွာ အမိုက်မှောင်တွင်းသက်ဆင်းကျရောက်မသွားစေရေး၊ အသိပညာရှင်၊ အတတ်ပညာရှင်တစ်ဦးအဖြစ်    နိုင်ငံကိုအလုပ်အကျွေးပြုနိုင်ရေးအတွက် မျိုးဆက်သစ်လူငယ်များ ပညာသင်ယူခွင့်ရရှိရေး အားလုံးဝိုင်းဝန်းပူးပေါင်းဆောင်ရွက်သွားရန်လိုအပ်သည်။

မည်သို့ပင်ဆိုစေ  နိုင်ငံတစ်နိုင်ငံ၏အနာဂတ်သည် မျိုးဆက်သစ်လူငယ်များ၏ပညာတတ်မြောက်မှုအဆင့်အတန်းပေါ်တွင်များစွာတည်မှီလျက်ရှိသည်။ထို့ကြောင့်နိုင်ငံတော်အစိုးရသည်ဘက်စုံထူးချွန်သောမျိုးဆက်သစ်လူငယ်များပေါ်ထွန်းရေးဘက်ပေါင်းစုံမှစဉ်းစားသုံးသပ်ဆောင်ရွက်လျက် ရှိသည်။ အထူးသဖြင့် အဆင့်မြင့်ပညာသင်ယူနိုင်သူအရေအတွက်တိုးတက်လာမှသာလျှင် လူသားအရင်းအမြစ်များဖြင့် တိုင်းပြည်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးကို လက်တွေ့ကျကျဖော်ဆောင်နိုင်မည်ဖြစ်သည့်အတွက် မျိုးဆက်သစ်များပညာရည်မြင့်မားရေးအတွက် အားလုံးဝိုင်းဝန်း ဆောင်ရွက်သွားကြပါစို့ဟု တိုက်တွန်းရေးသားလိုက်ရပါသည်။    ။

ကျောက်သွေးသူသည် သဘာဝကျောက်ရိုင်းတုံးများကို သွေးပေးရ၏။ ကျောက်ရိုင်းတုံးများကို သွေးပေးလိုက်ပါက တောက်ပြောင်လာသည်။ အရည်အသွေးပေါ်လာသည်။

ကျောက်၏တန်ဖိုးသည် အရည်အသွေးတောက်ပြောင်မှုအပေါ်မူတည်နေသည်။ အရည် အသွေးမတောက်ပြောင်ဘဲ မှေးမှိန်နေပါက တန်ဖိုးနည်းပါးသည်။ ကျောက်သွေးမကျွမ်းကျင်သူ၏ လက်ဝယ်တွင်ရှိသော သဘာဝကျောက်ရိုင်းတုံးများသည် အချည်းနှီးဖြစ်ရရှာသည်။ နှမြောစရာကောင်းလှပါသည်။ လက်ဝယ်ရှိ ကျောက်ရိုင်းတုံးများကို အရည်အသွေး တောက်ပြောင်လာအောင်သွေးကြရသည်။ ကျောက်သွေးသူ ကျွမ်းကျင်လေလေ​ကျောက်ရိုင်းတုံးများ၏ အရည်အသွေးက တောက်ပြောင်လေလေဖြစ်သည်။ အရည်အသွေးတောက်ပြောင်လေလေ တန်ဖိုးကြီးမြင့်လေလေဖြစ်ပါသည်။

ကိုယ်ရည်ကိုယ်သွေး တောက်ပြောင်လာအောင် သွေးပေးနေခြင်းဖြစ်

ယနေ့ ကျောင်းနေအရွယ်ကလေးတို့သည် ကျောက်ရိုင်းတုံးလေးများနှင့်တူလှ၏။ ထိုကျောက်ရိုင်းတုံးလေးများကို လက်ဝယ်ပိုင်ပိုင်ရှိနေကြသူများသည် မိဘများဖြစ်ကြ၏။ မိဘတို့သည် ကျောက်ရိုင်းတုံးလေးများနှင့်တူလှသော ရင်နှစ်သည်းချာသားသမီးရတနာများကို အရည်အသွေးတောက်ပြောင်လာအောင် သွေးပေးကြရပေမည်။ ကျောက်ရိုင်းတုံးလေးများကို မသွေးဘဲပစ်ထားပါက အလဟဿဖြစ်ရသကဲ့သို့ သားသမီးများကို မသွေးဘဲထားပါကလည်း အလဟဿဖြစ်ချေမည်။ မိဘတို့က သားသမီးများကို ပြုစုပျိုးထောင်မွေးမြူပေးနေခြင်းသည် သားသမီးတို့၏ ကိုယ်ရည်ကိုယ် သွေးတောက်ပြောင်လာအောင်သွေးပေးနေခြင်းဖြစ်ပါသည်။

မိဘတိုင်းသည် မိမိတို့၏ ရင်နှစ်သည်းချာ သားသမီးများကို “လိမ္မာယဉ်ကျေးသူ၊ စာရိတ္တကောင်းမွန်သူ၊ အားကိုးအားထားပြုရသူ၊ ကျန်းမာကြံ့ခိုင်သူ၊ ထူးချွန်ထက်မြက်သူ” စသည်ဖြင့် လူကောင်းလူတော်များ ဖြစ်စေချင်ကြသည်။ ထိုသို့ဖြစ်ပေါ်လာအောင် ပြုစုပျိုးထောင်မွေးမြူပေးရမည့် တာဝန်ဝတ္တရားကလည်း မိဘတိုင်းတွင်ရှိပါသည်။ မိဘတိုင်းတွင်ရှိသော တာဝန်ဝတ္တရားများကို သင်္ဂဇာဆရာတော်ကြီးက “မကောင်းမြစ်တာ၊ ကောင်းရာညွှန်လတ်၊ အတတ်သင်စေ၊ ပေးဝေနှီးရင်း၊ ထိမ်းမြားခြင်းလျှင်ဝတ်ငါးအင်၊ ဖခင်မယ်တို့တာ”ဟူ၍ အနှစ်ချုပ်ပြီး မိန့်ကြားခဲ့ပါသည်။ မိဘတို့၏ ဝတ္တရားငါးပါးကို မိဘတိုင်းက ကျေပွန်ကြရပေမည်။

မိဘတို့သည် မိဘတာဝန်ဝတ္တရားများကို သားသမီးတို့၏အရွယ်လိုက်ပြီး ကျေပွန်အောင်ဆောင်ရွက်ကြရမည်သာဖြစ်ပါသည်။ သားသမီးတို့ကို “မွေးကင်းစမှ ငါးနှစ်အတွင်းကို ကျောင်းမနေမီ အရွယ်၊ ငါးနှစ်မှ တက္ကသိုလ်ပညာသင်ယူပြီးမြောက် သည်အထိကို ကျောင်းနေအရွယ်၊ အတန်းပညာ သင်ယူပြီးမြောက် လူလားမြောက်သည်မှစပြီး ကျောင်းနေလွန်အရွယ်”ဟူ၍ အရွယ်သုံးမျိုးခွဲနိုင်ပါသည်။ ကျောင်းမနေမီအရွယ်နှင့် ကျောင်းနေအရွယ်သည် မိဘတို့၏ ထိန်းကျောင်းမှုအောက်တွင်ရှိနေသည်။ ထိုအရွယ်နှစ်မျိုးတွင် မိဘတို့၏တာဝန်ဝတ္တရားငါးပါးထဲမှ “မကောင်းမြစ်တာ၊ ကောင်းရာညွှန်လတ်၊ အတတ်သင်စေ”ဟူသော ဝတ္တရားသုံးပါးကို ရှေးဦးကျေပွန်အောင် ဆောင်ရွက်ကြရပေမည်။

သွန်သင်ညွှန်ပြ ဆိုဆုံးမ

မိဘတို့သည် သားသမီးများကို မွေးကင်းစမှ အရွယ်ရောက်သည်အထိ ကာယနှင့် ဉာဏဖွံ့ဖြိုးအောင် ပြုစုစောင့်ရှောက်မွေးမြူကြရသည်။ ကောင်းသောအစားကောင်းများကိုကျွေးပြီး ကောင်းသောအဝတ်ကောင်းများကို ဝတ်ဆင်ပေးသည်။ ကောင်းသော အကျင့်ကောင်းများကို လေ့ကျင့်ပေးကြသည်။ မကောင်းမှုဟူသမျှကို မကျူးလွန်မိအောင်တားမြစ်သည်။ ကောင်းသောအပြုအမူ၊ ကောင်းသောအပြောအဆို၊ ကောင်းသောအကြံ၊ ကောင်းသောစရိုက်လက္ခဏာများကို သွန်သင်ညွှန်ပြဆိုဆုံးမကြသည်။ ကောင်းသော အလေ့အကျင့်များကို လေ့ကျင့်ပေးနေခြင်းဖြစ်ပါသည်။ ထိုသို့ပြုစုစောင့်ရှောက်လေ့ကျင့်မွေးမြူပေးနေသော မိမိတို့၏သားသမီးများသည် မိဘတို့ လိုလားတောင့်တမျှော်မှန်းသော သားရတနာ၊ သမီးရတနာများဖြစ်လာကြပေသည်။

ကျောင်းမနေမီအရွယ်ကတည်းက အလေ့အကျင့်သည် သားသမီးတို့၏ရင်ထဲတွင် စွဲမြဲသန္ဓေတည်လာသည်။ ထိုသန္ဓေသည် အလိုလိုစွဲတည်လာခြင်းမဟုတ်ပေ။ မိဘတို့က တည်ပေးလိုက်သော သန္ဓေသာဖြစ်ပါသည်။ မိဘများက ကောင်းသောသန္ဓေကိုတည်ပေးလိုက်လျှင် ကောင်းသောသန္ဓေစွဲတည်နေမည်ဖြစ်ပြီး မိဘများက မကောင်းသောသန္ဓေကို တည်ပေးလိုက်လျှင် မကောင်းသောသန္ဓေစွဲတည်နေမည်ဖြစ်ပါသည်။

အချို့မိဘတို့သည် အကဲပိုလှ၏။ သားသမီးတို့ဆိုသမျှ အလိုကျဖြစ်စေသည်။ အကျိုးသင့်၊ အကြောင်းသင့်ပြောပြပြီး တားမြစ်ရမည်ကို မတားမြစ်၊ ထိန်းကျောင်းပေးရမည်ကို ထိန်းကျောင်းမပေး၊တည့်မတ်ပေးရမည်ကို တည့်မတ်မပေး၊ ပဲ့ပြင်ရမည်ကို မပဲ့ပြင်၊ သွန်သင်ရမည်ကို မသွန်သင်၊ ဆုံးမရမည်ကို မဆုံးမဘဲလိုက်လျောထားသည်။ ဘာမဆို အလိုကျလိုက်လျောထားခြင်းသည် ကောင်းသောအလေ့အကျင့်မဟုတ်ပေ။ အလေ့အကျင့်ဆိုးဖြစ်ပါသည်။ ထိုအလေ့အကျင့်ဆိုးသည် သားသမီးတို့ ရင်ထဲသန္ဓေစွဲတည်နေမည်ဖြစ်သည်။ ထိုသန္ဓေဆိုးပေါက်ဖွားလာပါက မိဘတို့ လိုလားတောင့်တ မျှော်မှန်းထားသော သားကောင်းသားမွန်၊ သမီးကောင်းသမီးမွန်များဖြစ်မလာဘဲ သားဆိုးသားမိုက်၊ သမီးဆိုးသမီးမိုက်များ ဖြစ်လာပေမည်။

သားဆိုးသားမိုက်၊ သမီးဆိုးသမီးမိုက်တို့သည် မိသားစုကို ကောင်းကျိုးမ​ပေးဘဲပတ်ဝန်းကျင်နှင့် အများပြည်သူကိုပါ ဒုက္ခပေးနေတော့သည်။ ထိုမျှနှင့် အားမရ။ မိဘကိုရန်ပြုသည်အထိ လက်ရဲဇက်ရဲဖြစ်လာတတ်သည်။ ထိုသောအခါမှ မိဘတို့သည် သားသမီးများ ငယ်စဉ်အရွယ်တွင် မသွန်သင်၊ မညွှန်ပြ၊ မဆုံးမခဲ့သည်ကို နောင်တရတတ်ကြသည်။ ထိုနောင်တမျိုးကို မရစေချင်သော မန်လည်ဆရာတော်ကြီးက “သားကို ငယ်က၊ မဆုံးမသော်၊ မိဘတလည်၊ ရန်သူမည်၏”ဟု သတိပေးထားပါသည်။

ထိုသတိပေးဆုံးမစာလင်္ကာကို မိဘတိုင်း သတိမူကြရပေမည်။ သတိမမူခဲ့လျှင် “နားရွက်ဖြတ်ခံရသည့်မိခင်” ကဲ့သို့ အဖြစ်ဆိုးနှင့်ကြုံတွေ့ရမည်မှာ သေချာသည်။ သားဆိုးသမီးဆိုးတို့၏ မိဘတို့သည် လူပုံအလယ်တွင် ခေါင်းမဖော်ရဲကြပေ။ မျက်နှာပျက် အရှက်ကွဲနေကြရရှာသည်။ “သားသမီးမကောင်း မိဘခေါင်း” မဟုတ်ပါလော။

ပညာအခြေခံကောင်းများကိုသင်ကြား

မိဘတို့၏ သားသမီးတို့သည် အသက်ငါးနှစ်ပြည့်၍ ကျောင်းနေအရွယ်ရောက်သည်နှင့် အခြေခံပညာကျောင်းတော်များရှိ အခြေခံပညာသင် ဆရာဆရာမများထံသို့ အပ်နှံကြသည်။ အခြေခံပညာသင်ကျောင်းများတွင် တာဝန်ထမ်းဆောင်နေကြသော အခြေခံပညာ ဆရာ ဆရာမများသည် ပညာအခြေခံကောင်းများကို သင်ကြားလေ့ကျင့်ပေးနေကြသည်။ ဆရာ ဆရာမတို့သည် မိဘများကဲ့သို့ပင် ကျောက်ရိုင်းတုံးကလေးများကို အရည်အသွေးတောက်ပြောင်လာအောင် သွေးပေးနေကြသူများ ဖြစ်ကြပါသည်။ သူတို့ ရင်ခွင်အောက်ရောက်လာကြသော မိဘတို့၏ သားသမီးများကို မိဘများကဲ့သို့ပင် မြတ်မြတ်နိုးနိုးတန်ဖိုးထားသည်။ ရင်ဝယ်လွယ်ဖွား မွေးသည့်သားကဲ့သို့ တယုတယ ပြုစုစောင့်ရှောက်ကြသည်။

ဆရာ ဆရာမတို့ကလည်း မိဘတို့၏သားသမီးများဖြစ်ကြသည့် မိမိ၏တပည့်များကို “လိမ္မာယဉ်ကျေးသူ၊ အကျင့်စာဂကောင်းမွန်သူ၊ အားကိုးအားထားပြုရသူ၊ ကျန်းမာကြံ့ခိုင်သူ၊ ထူးချွန်ထက်မြက်သူ” စသည်ဖြင့် လူကောင်းလူတော်များဖြစ်စေချင်ကြပါသည်။ ထို့ကြောင့် ဆရာ ဆရာမများက “အတတ်လည်းသင်၊ ပဲ့ပြင်ဆုံးမ၊ သိပ္ပမချန်၊ ဘေးရန်ဆီးကာ၊ သင့်ရာအပ်ပို့ ဆရာတို့၊ ကျင့်ဖို့ဝတ်ငါးဖြာ”ကို တစ်သဝေမတိမ်း ဦးထိပ်ပန်ဆင်ထားကြပါသည်။

မိဘတို့၏ သားသမီးများဖြစ်ကြသည့် ဆရာဆရာမတို့၏ တပည့်အပေါင်းတို့ကို ကန်တော်မင်ကျောင်းဆရာတော်ကြီးက “မိဘဆရာ၊ စကားနာ၍၊ ကျမ်းစာသိမြင်၊ တတ်အောင်သင်လော့၊ ပေါ်လွင်မပြု၊ ကောင်းရာတုလျက်၊ ကောင်းမှုမြတ်နိုး၊ ကောင်းအောင်ကြိုး၍၊ ကောင်းကျိုးကိုယ်၌ တည်စေမင်း”ဟူ၍ ပျို့လင်္ကာဖြင့် ဆိုဆုံးမထားခဲ့ပါသည်။ ဆုံးမစာအတိုင်း ကောင်းကျိုးတည်အောင် ကြိုးပမ်းကြရမည့်သူများမှာ မိဘတို့၏ သားသမီးများဖြစ်ကြသည့်၊ ဆရာ ဆရာမတို့၏ တပည့်များကိုယ်တိုင် ဖြစ်ကြပါသည်။ သို့မှသာ ကောင်းကျိုးတည်မည်ဖြစ်ပါသည်။ သို့ရာတွင် လက်ဦးဆရာဟူသည့် မိဘများနှင့် ဒုတိယမိဘများဟူသည့် ဆရာ ဆရာမတို့၏ အခန်းကဏ္ဍကအရေးကြီးလှပေသည်။ သားသမီးတပည့်များကို ကောင်းကျိုးတည်အောင် ကောင်းကျိုးသန္ဓေတည်ပေးကြရာတွင် အဓိကအခရာမှာ မိဘဆရာတို့ပင် မဟုတ်ပါလော။

အချိုးညီညီ ပူးပေါင်းဖွဲ့စည်းထားသည့် “မိဘဆရာအသင်း”

မိဘနှင့် ဆရာဆရာမတို့က လက်တွဲညီညီ ပူးပေါင်းဆောင်ရွက်လျှင် “မိကောင်းဖခင်သားသမီးများ” ဖြစ်ပေါ်လာမည်ဖြစ်သကဲ့သို့ “ဆရာကောင်းတပည့် ပန်းကောင်းပန်သူများ” ဖြစ်ပေါ်လာမည်မှာမလွဲပေ။ ထိုသို့သောသားသမီးများ၊ တပည့်များဖြစ်ပေါ်လာစေရန်အတွက် အခြေခံပညာကျောင်းတိုင်းတွင် ကျောင်းသား ကျောင်းသူတို့၏ မိဘများနှင့် ကျောင်းသား ကျောင်းသူတို့၏ ဆရာ ဆရာမများကို အချိုးညီညီ ပူးပေါင်းဖွဲ့စည်းထားသည့် “မိဘဆရာအသင်း” ရှိပေသည်။ မိဘဆရာအသင်းကို မိဘတို့၏ သားသမီးများဖြစ်ကြပြီး ဆရာ ဆရာမတို့၏ တပည့်များဖြစ်ကြသည့် “ကျောင်းသား ကျောင်းသူတို့၏ ပညာရည်မြင့်မားအောင် ပူးပေါင်းဆောင်ရွက်ရန်” ဟူသော ရည်ရွယ်ချက်ဖြင့် ဖွဲ့စည်းထားခြင်းဖြစ်ပါသည်။ မိဘဆရာအသင်း၏ “မိဘဆရာ ပူးပေါင်း၊ ကလေးပညာကောင်း”ဟူသော ဆောင်ပုဒ်သည် ကျောင်းသား ကျောင်းသူများအား ပညာရည်မြင့်မားအောင် သင်ကြားလေ့ကျင့်ပေးရာတွင် မိဘနှင့် ဆရာ ဆရာမတို့က လက်တွဲညီညီ ပူးပေါင်းဆောင်ရွက်ကြရမည်ကို မီးမောင်းထိုးပြထားခြင်းဖြစ်ပါသည်။

ဗလငါးတန်ကို ဖြည့်တင်းပေး

မိဘနှင့် ဆရာ ဆရာမတို့၏ ပူးပေါင်းဆောင်ရွက်မှုအင်အားသည် ကျောင်းနေအရွယ်ကလေးများအား “ကာယဗလ၊ ဉာဏဗလ၊ ဘောဂဗလ၊ စာရိတ္တဗလ၊ မိတ္တဗလ” တည်းဟူသော ဗလငါးတန်ကို ဖြည့်တင်း ပေးနေခြင်းဖြစ်သည်။ “အခြေခံပညာကျောင်း”များသည် “ပညာအခြေခံကောင်း”များကိုသာမက ဗလငါးတန် အခြေခံကောင်းများကိုပါ သင်ကြားလေ့ကျင့်ပေးနေခြင်းဖြစ်ပါသည်။ မိဘနှင့် ဆရာ ဆရာမများ ပူးပေါင်းလက်တွဲမှု အားကောင်းလေလေရင်သွေးရတနာတို့၏ ဗလငါးတန်ဖွံ့ဖြိုးမှုအားကောင်းလေလေဖြစ်မည်ကို သတိမူအပ်ပေသည်။

ယနေ့မျက်မှောက်ကာလတွင် တိုင်းတစ်ပါးများမှ ကူးစက်လာသည့် မတူညီသောယဉ်ကျေးမှု၊ ဓလေ့ထုံးတမ်းစဉ်လာ၊ စရိုက်လက္ခဏာများ ဝင်လာနေသည်။ မိမိတို့ မြန်မာ့ရိုးရာ စရိုက်လက္ခဏာများနှင့် သွေဖည်ဆန့်ကျင်သည့် ယဉ်ကျေးမှု၊ ဓလေ့ထုံးတမ်းစဉ်လာ၊ စရိုက်လက္ခဏာများဖြစ်ပါသည်။ ထိုစရိုက်လက္ခဏာများ ထိုးဖောက်ဝင်ရောက်လာမှုကြောင့် အချို့က အမျိုးသားရေးစိတ်ဓာတ် ကိုယ်ခံအားနည်းလာကြသည်။ အချို့အနည်းငယ်သော အမျိုးသားရေးစိတ်ဓာတ် ကိုယ်ခံအားနည်းသူများကြောင့် လူကြီးနှင့် လူငယ်ဆက်ဆံရေး၊ မိဘနှင့် သားသမီးဆက်ဆံရေး၊ မိဘနှင့် ဆရာ ဆရာမ ဆက်ဆံရေး၊ ဆရာ ဆရာမနှင့် ကျောင်းသား ကျောင်းသူဆက်ဆံရေးက လက်ပွန်း တတီးဖြစ်ရမည့်အစား မလိုလားအပ်သည့် အဖုအထစ်များဖြစ်လာသည်။ မိဘ ဆရာပူးပေါင်းမှု လျော့ရဲအားနည်းလာရခြင်း၏ အဓိကအကြောင်းရင်းဖြစ်ပါသည်။

မိဘ ဆရာ ပူးပေါင်းမှု အားမကောင်းလျှင် လူငယ်လူရွယ်တို့၏ ဘဝလမ်းကြောင်းသည် အခြေမခိုင်ဘဲ ယိမ်းယိုင်တိမ်းစောင်းသွားပေမည်။ “မျဉ်းလွတ်လျှင်ကိုင်း၊ ဆရာလွတ်လျှင်ရိုင်း” ဆိုရိုး စကားကဲ့သို့ဖြစ်ရပေသည်။ လက်ဦးဆရာ​ဖြစ်သော မိဘနှင့်အခြေခံပညာသင်ဆရာ ဆရာမတို့၏ ဆုံးမ၊ ပဲ့ပြင်၊ သွန်သင်၊ ညွှန်ပြသည်များကို မနာယူ၊ မနာခံ၊ မလိုက်နာကြသော တပည့်များသည် ဆရာလွတ်နေကြသူများဖြစ်ပေသည်။ ထိုသူများသည် အကောင်းနှင့် အဆိုး၊ အကျိုးနှင့်အပြစ်ကို ခွဲခြားမသိမြင်နိုင်ကြပေ။ မနှစ်မြို့စရာအမူအကျင့်များကို ခုံမင်ကာ မိုက်မဲရိုင်းစိုင်းသူများ ဖြစ်လာကြသည်။

အခြေခံပညာကျောင်းများသည် “အမျိုးသား စည်းကမ်းအစ စာသင်ကျောင်းက”ဆိုသည့် ဆောင်ပုဒ်အတိုင်း အမိနိုင်ငံတော်အတွက် စိတ်ဓာတ်၊ စည်းကမ်းကောင်းမွန်သည့် ပညာတတ်လူသား အရင်းအမြစ်ကောင်းများကို မွေးထုတ်ပေးနိုင်ရမည်ဖြစ်ပေသည်။ ယနေ့ကျွန်တော်တို့နိုင်ငံတွင် ဖြစ်ပွားလျက်ရှိသည့် မတည်ငြိမ်မှုများနှင့် အကြမ်းဖက်မှုဖြစ်စဉ်များကို ကြည့်မည်ဆိုပါက ပညာရေးအားနည်းသည့်ဒေသများ၌ ပိုမိုဖြစ်ပွားသည်ကို တွေ့မြင်ကြရမည်ဖြစ်ပေသည်။ အတန်းပညာတတ်မြောက်မှုအားနည်းခြင်း၊ သိမြင်တွေးခေါ်နိုင်မှု အားနည်းခြင်းတို့ကြောင့် အကြမ်းဖက်မှုလုပ်ရပ်များကို လုပ်ဆောင်လာကြခြင်းဖြစ်ပါသည်။ ထိုအကြမ်းဖက်ဖြစ်စဉ်များကြောင့် ဒေသခံနှင့် ဒေသခံများ၏ လူမှုစီးပွားဘဝများကိုပါ ထိခိုက်လာပါသည်။

မိဘတို့၏အားကိုယူကာ ပူးပေါင်းဆောင်ရွက်

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ၂၀၂၅ ခုနှစ် ဇွန်လ ၁၁ ရက်နေ့တွင် ပြင်ဦးလွင်မြို့ အမှတ်(၃) အခြေခံပညာအထက် တန်းကျောင်းစုံညီခန်းမ၌ ဆရာ ဆရာမများနှင့် တွေ့ဆုံကာ “ဆရာ ဆရာမများအနေဖြင့် မိမိတို့သင်ကြားပေးနေရသည့် ကလေးငယ်များအား အတန်းပညာသင်ကြားပေးခြင်းအပြင် အကောင်းအဆိုး၊ အကြောင်းအကျိုးကို ခွဲခြားသိမြင်နိုင်စွမ်းရှိစေမည့် အသိပညာနှင့်အတွေးအမြင်များကို သင်ကြားပေးရမည်ဖြစ်ကြောင်း၊ အနာဂတ်တိုင်းပြည်အတွက် စိတ်ဓာတ်စည်းကမ်းကောင်းမွန်သည့် လူသားအရင်းအမြစ်ကောင်းများ မွေးထုတ်ပေးနိုင်ရန် ဆရာဆရာမများအနေဖြင့် ကြိုးပမ်းဆောင်ရွက်ကြစေလိုကြောင်း၊ နိုင်ငံတော်အနေဖြင့် တစ်နိုင်ငံလုံး ပညာရည်မြင့်မားရေးအတွက် ဆောင်ရွက်ပေးလျက်ရှိသကဲ့သို့ ဆရာ ဆရာမများအနေဖြင့်လည်း ကျောင်းသား ကျောင်းသူများ ပညာရည်မြင့်မားရေးအတွက် ဝိုင်းဝန်းဆောင်ရွက်ပေးကြစေလိုကြောင်း” မှာကြားခဲ့ပါသည်။ နိုင်ငံတော်အကြီးအကဲ၏ လမ်းညွှန်မှာကြားချက်များကို အကောင်အထည်ဖော်ဆောင်ရွက်ရာတွင် ဆရာ ဆရာမများအနေဖြင့် မိဘတို့၏အားကိုယူကာ ပူးပေါင်းဆောင်ရွက်ကြရမည်ဖြစ်ပါသည်။

“သားသမီးမကောင်း မိဘခေါင်း၊ တပည့်မကောင်း ဆရာ့ခေါင်း”ပေါ်သို့ ရောက်လာမည်ကို မိဘတိုင်း၊ ဆရာ ဆရာမတိုင်း သတိမူသင့်လှပေသည်။ မိဘနှင့် ဆရာ ဆရာမများပူးပေါင်းပြီး လက်တွဲညီညီ ရှေ့သို့ချီမှသာ လူငယ်မောင်မယ်တို့၏ အနာဂတ် ဘဝလမ်းဖြောင့်တန်းနေမည်ဖြစ်ပါသည်။ လူငယ် မောင်မယ်အပေါင်းတို့၏ ဘဝလမ်းကြောင်း မတိမ်းစောင်းအောင် ထိန်းကျောင်းပေးကြရမည့်သူများသည်ကား မိဘနှင့် ဆရာ ဆရာမများပင်မဟုတ်ပါလား။ ။

MOI

ဝိဇ္ဇာ/သိပ္ပံဘာသာရပ် ပထဝီဝင်

ကျွန်ုပ်တို့နေထိုင်ရာကမ္ဘာကြီးသည် ထူးဆန်း အံ့ဩဖွယ်ရာများနှင့် ပြည့်နှက်နေပြီး ကမ္ဘာ့ရေထု၊ လေထု၊ မြေထုအကြောင်းများကို ကျောင်းသင်ခန်းစာများတွင် သင်ကြားခဲ့ရသည်မှာ အလွန်စိတ်ဝင်စားဖွယ် ကောင်းလှပေသည်။

နိုင်ငံတစ်ခု၏လူဦးရေ၊ ယဉ်ကျေးမှု၊ နိုင်ငံရေး၊  စီးပွားရေး စသည့်ပညာရပ်များသာမကစိုက်ပျိုးရေး၊ စက်မှုလုပ်ငန်း၊ မြို့ပြဖွံ့ဖြိုးတိုးတက်မှု၊ ရွှေ့ပြောင်း နေထိုင်ခြင်းများ၊ ပထဝီနိုင်ငံရေး စသည့် အကြောင်း အရာတို့အပေါ် လေ့လာသည့်ဘာသာရပ်ကို လူမှုပထဝီဝင်(Human Geography)ဟု ခေါ်ဆိုပြီး ဝိဇ္ဇာဘာသာရပ်အဖြစ်သတ်မှတ်နိုင်သည်။ ကမ္ဘာ့ကုန်းမြေမျက်နှာပြင်၊ရေ၊မြေအမျိုးအစား၊ ရာသီဥတု၊  ဂေဟ စနစ်၊  ကျောက်မြေလွှာလှုပ်ရှားမှုများအကြောင်းကို လေ့လာသည့်ပထဝီဝင်ကို ရူပပထဝီဝင်(Physical Geography)အဖြစ် သတ်မှတ်ထားပြီး သဘာဝသိပ္ပံ၊ဘူမိဗေဒဘာသာရပ်တို့နှင့်လည်း ဆက်နွှယ် လျက်ရှိရာ သိပ္ပံဘာသာရပ်အဖြစ် သတ်မှတ်နိုင်သည်။ မြန်မာနိုင်ငံရှိ ဝိဇ္ဇာ/သိပ္ပံတက္ကသိုလ်များတွင် ပထဝီဝင်ဘာသာရပ်ကို B. A ဘွဲ့၊ M. A ဘွဲ့၊ Ph.D ဘွဲ့လက်မှတ်တို့   ချီးမြှင့်ပေးလျက်ရှိသည်။ဗြိတိန်၊  အမေရိကန်၊ အိန္ဒိယနှင့် ဩစတြေးလျကဲ့သို့သော နိုင်ငံများတွင် ပထဝီဝင်ဘာသာရပ်ကို မိမိတို့ လေ့လာ ခဲ့သည့် ခေါင်းစဉ်အလိုက်  ဝိဇ္ဇာဘွဲ့/မဟာဝိဇ္ဇာဘွဲ့များအဖြစ်လည်းကောင်း၊ သိပ္ပံဘွဲ့/မဟာသိပ္ပံဘွဲ့များ အဖြစ်လည်းကောင်း ပေးအပ်ချီးမြှင့်လျက်ရှိသည်။

ပထဝီဝင်ဘာသာရပ်သည် သဘာဝသိပ္ပံဘာသာရပ်(Ecology)နှင့် လေ့လာမှုနယ်ပယ်တူညီမှုများ ရှိသော်လည်း မတူကွဲပြားခြားနားသည်။ သဘာဝသိပ္ပံပညာရှင်သို့မဟုတ် ဂေဟဗေဒပညာရှင်များက အနာဂတ်ဖြစ်စဉ်များအပေါ် ခန့်မှန်းတွက်ချက်မှုများပြုလုပ်နေစဉ် ပထဝီဝင်ပညာရှင်များက  မည်သို့ စတင်ကာ မည်သို့ပြောင်းလဲဖြစ်ပေါ်လာကြောင်းကိုဖြေရှင်းနိုင်ရန် စူးစမ်းရှာဖွေကြသည်။ ယေဘုယျ အားဖြင့်ပထဝီဝင်ဘာသာရပ်သည်ကမ္ဘာ့မြေမျက်နှာပြင်အကြောင်းကိုအထူးပြု၍ လေ့လာသောသိပ္ပံ ပညာရပ်ဖြစ်ပေသည်။

အချိန်ဇုန်သတ်မှတ်ခြင်း

ကမ္ဘာ့တောင်ခြမ်းနှင့်မြောက်ခြမ်းကို အီကွေတာမျဉ်းကပိုင်းခြားထားပြီး  အရှေ့နှင့်အနောက်ကို ဂရင်းနစ် မျဉ်းကပိုင်းခြားထားသည်။ ဘရာဇီးနိုင်ငံမက်ကာဘာမြို့ကိုအီကွေတာမျဉ်း တိုက်ရိုက် ဖြတ်သန်း သွားပြီး ဂရင်းနစ်မျဉ်းဖြတ်သန်းရာမြို့သည် ဂါနာနိုင်ငံရှိ တီမာမြို့ဖြစ်ပေသည်။ ကမ္ဘာ့အကြီးဆုံးနိုင်ငံဖြစ်သည့် ရုရှားနိုင်ငံတွင် အချိန်ဇုန် ၁၁ ခုထိကျယ်ပြန့်ပြီး မြန်မာနိုင်ငံတွင် အချိန်ဇုန်တစ်ခုသာရှိသည်။  မြန်မာနိုင်ငံ သည်  (UTC+6:30)  တွင်ရှိသဖြင့် အင်္ဂလန်နိုင်ငံလန်ဒန်မြို့(ဆောင်းရာသီတွင် (UTC+0)ထက် ပျမ်းမျှ အားဖြင့် အချိန် ၆ နာရီ ၃၀ မိနစ်ခန့် စောသည်ဟုမှတ်ယူနိုင်သည်။ နေသည် အရှေ့အရပ်မှထွက်၍ အနောက်အရပ်သို့ဝင်သဖြင့် အာရှတိုက်ရှိနိုင်ငံများ နေကိုအရင်မြင်ရပြီးမှ  ကမ္ဘာ့အနောက်ခြမ်းရှိ ဥရောပတိုက်၊ အမေရိကတိုက်နိုင်ငံများကနောက်မှမြင်ရသည့်သဘောပင်ဖြစ်သည်။

Coordinated Universal Time UTC ၏အဓိပ္ပာယ်မှာ အချိန်နာရီများကိုပုံမှန်လည်ပတ်ရန် ကမ္ဘာ့စံတော် ချိန်အဖြစ်အချိန်အားလုံးကိုအခြေခံထားပြီး Zero ဟု သတ်မှတ်ထားခြင်းဖြစ်သည်။ ဥပမာ အရှေ့ဘက် ရှိအိမ်နီးချင်းထိုင်းနိုင်ငံသည် (UTC+7:00) ရှိသဖြင့် မြန်မာစံတော်ချိန်ထက် မိနစ် ၃၀ စောလျက်ရှိ ပေသည်။ မြန်မာနိုင်ငံတွင် ယခုအချိန်သည် မွန်းတည့် ၁၂ နာရီဖြစ်ပါက ထိုင်းနိုင်ငံတွင် ၁၂ နာရီ ၃၀ မိနစ် ရှိနေမည်ဖြစ်သည်။

အလုပ်အကိုင်နှင့်အခွင့်အလမ်းများ

မြို့ပြစီမံကိန်း၊ အခြေခံအဆောက်အဦ၊ မြေယာအသုံးပြုမှုစီမံကိန်းများ စသည့်လုပ်ငန်းနယ်ပယ်များ ပါဝင်သည့် အစိုးရရုံး၊ ဝန်ကြီးဌာနများ၊ အစိုးရမဟုတ်သည့် အခြားအဖွဲ့အစည်းများ(NGO) များတွင် ကျွမ်းကျင်သူ၊ နည်းပညာရှင်များအဖြစ် မိမိတို့လေ့လာခဲ့သည့်ဘာသာရပ်ခွဲ၊  ဒီပလိုမာ၊  ဘွဲ့များအလိုက် အလုပ်အကိုင်အခွင့်အလမ်းများရရှိနိုင်သည်။ထို့ပြင်ပထဝီနိုင်ငံရေးဆိုင်ရာ ခွဲခြမ်းစိတ်ဖြာသူ၊ သုတေသနပညာရှင်၊ သင်ကြားရေးပုဂ္ဂိုလ် စသည့်လုပ်ငန်းနယ်ပယ်များတွင်လည်း အားထုတ်ကြိုးစားမှု နှင့်ကျွမ်းကျင်မှုတို့အလျောက်လုပ်ကိုင်နိုင်မည်ဖြစ်သည်။ပထဝီဝင်ဘာသာရပ်သည်အိမ်ထောင်စု လူဦးရေစာရင်းကောက်ယူခြင်းနှင့်လည်း နက်ရှိုင်းစွာဆက်နွှယ်လျက်ရှိသည်။ လူဦးရေစာရင်း ကောက်ယူရန်အတွက် GIS (Geographic Information System)ကိုအသုံးပြုရပြီး ကျေးလက်နှင့်မြို့ပြ ဆိုင်ရာ နယ်နိမိတ်အပိုင်းအခြားကို တိကျစွာရေးဆွဲနိုင်မှသာအမှန်တကယ်လူဦးရေစာရင်းထက်လျော့နည်းစွာကောက်ယူစာရင်းသွင်းမိခြင်း၊ နှစ်ခါကောက်ယူမိခြင်း စသည့်အန္တရာယ်ကြီးများကို ရှောင်ရှားနိုင်မည်ဖြစ်သည်။

မြေပုံရေးဆွဲခြင်း

ပထဝီဝင်အကြောင်းကိုပြောလျှင် မြေပုံရေးဆွဲခြင်းကိုလည်း ချန်လှပ်ထား၍မရနိုင်ပေ။ အကွာအဝေး၊ မြေအနိမ့်အမြင့်တို့ကို တိုင်းတာနိုင်သည့် ဂြိုဟ်တု၊ ဒရုန်းကဲ့သို့သော နည်းပညာရပ်ဆိုင်ရာ အီလက်ထရွန်နစ်ပစ္စည်းများကိုအသုံးပြု၍ သိပ္ပံနည်းကျတွက်ချက်ကာ ကမ္ဘာ့မြေမျက်နှာပြင်ကို တိကျစွာမြေပုံထုတ်ရေးဆွဲပါက သိပ္ပံဘာသာရပ်ခွဲတစ်ခုအဖြစ် မြေပုံရေးဆွဲခြင်းကို  သတ်မှတ်နိုင်ပေသည်။  သင်္ချာဆိုင်ရာတွက်ချက်မှုများ၊ Geodesy ဟုခေါ်ဆိုသည့် ကမ္ဘာမြေတိမ်းစောင်းမှု၊ ဆွဲငင်အား နယ်ပယ်၊ ပုံပန်းသဏ္ဌာန်တို့ကို သိပ္ပံနည်းကျတိုင်းတာခြင်းများပါဝင်နိုင်သည်။ ကမ္ဘာပေါ်ရှိ နိုင်ငံပေါင်း ၁၉၅ နိုင်ငံအနက် မြန်မာနိုင်ငံသည် ၄၀ ခုမြောက် အကြီးဆုံးနိုင်ငံဖြစ်ပြီး မြောက်လတ္တီကျု ၂၈' ၃၁ ''နှင့် ၉' ၃၂" ကြား၊ အရှေ့လောင်ဂျီကျု ၁၀၁' ၁၀"နှင့် ၉၂' ၁၀" မိနစ်ကြားတို့တွင် တည်ရှိသဖြင့် တောင်မြောက်ရှည်လျားသည့်နိုင်ငံဖြစ်သည်။ မြန်မာနိုင်ငံမြေပုံကို UTM(Universal Transverse Mercator)စနစ်ကို အသုံးပြုရေးဆွဲထားခြင်းဖြစ်ပြီး ၁ : ၁ သန်းမှ ၁ : ၅ သန်းအတွင်း ရေးဆွဲလေ့ရှိကြသည်။  ၁ : ၁ သန်းဆိုသည်မှာ မြေပုံတွင် ၁  စင်တီမီတာသည် မြေပြင်တွင် ၁၀ ကီလိုမီတာဖြစ်သည်။ ဥပမာ မြန်မာပြည်မြောက်ဖျားမှ တောင်ဖျားအကွာအဝေးသည် ၂၁၀၀ ကီလိုမီတာဖြစ်သဖြင့် ၁ : ၁ သန်းဖြင့် မြေပုံရေးဆွဲမည်ဆိုပါက အလျား ၂၁၀ စင်တီမီတာ(၇ ပေခန့်) ရှိမည်ဖြစ်သည်။

မြန်မာ့ပထဝီဝင်

မြန်မာနိုင်ငံ၏အရှေ့ဘက်အစွန်းဆုံးတွင် မိုင်းယောင်းမြို့၊အနောက်ဘက်အစွန်းဆုံးတွင် မောင်တောမြို့၊ မြောက်ဘက်အစွန်းဆုံးတွင် ပန်နန်းဒင်မြို့နှင့် တောင်ဘက်အစွန်းဆုံးတွင် ကော့သောင်းမြို့တို့တည်ရှိသည်။ ရှမ်းပြည်နယ်အရှေ့ပိုင်း တရုတ်၊ လာအိုနယ်စပ်မှ   ရခိုင်ပြည်နယ် အနောက်ဘက် ဘင်္ဂလားပင်လယ်အော်အထိ ၉၂၅ ကီလိုမီတာ (၅၇၅ မိုင်)ကွာဝေးပြီး ကချင်ပြည်နယ်မြောက်ဖျား ဟိမဝန္တာတောင်တန်းများမှ တနင်္သာရီတိုင်းဒေသကြီး မလေး ကျွန်းဆွယ်အထိ ၂၁၀၀ ကီလိုမီတာခန့် (၁၃၀၀ မိုင်)ကွာဝေးသည်။ အကျယ်အဝန်းအားဖြင့်  စတုရန်းမိုင် ၂၆၁၂၂၈ ကျယ်ဝန်းသော  မြန်မာနိုင်ငံသည်  အရှေ့တောင်အာရှနိုင်ငံများတွင်   အင်ဒိုနီးရှားနိုင်ငံပြီးလျှင် ဒုတိယအကြီးဆုံးနိုင်ငံဖြစ်သည်။  မြန်မာနိုင်ငံ၏ မြစ်အများစုသည် မြောက်မှတောင်သို့ စီးဆင်းသော် လည်း မြေမျက်နှာသွင်ပြင်အရ သောင်ရင်းမြစ်၊ ဂျိုင်းမြစ်၊  အတ္ထရံမြစ်၊  ဇော်ဂျီမြစ်၊  မြစ်သာမြစ်၊ တနင်္သာရီမြစ်တို့မှာ တောင်မှမြောက်သို့စီးဆင်းလျက်ရှိသည်။

ပထဝီဝင်ဗဟုသုတတိုးပွားလာပုံလူတို့သည် အရပ်တစ်ပါးသို့ စတင်ခရီးထွက်သည့်အချိန်မှစ၍ ပထဝီဝင် ဗဟုသုတတိုးပွားခဲ့ကြသည်။ ရှေးခေတ်က   ကမ်းခြေအနီးနေထိုင်ကြသော ယဉ်ကျေးမှုမဖွံ့ဖြိုးသေး သည့်လူများသည် တောင်ပေါ်မုဆိုးများထံသွားရောက်၍ ကုန်ပစ္စည်းချင်းဖလှယ်ခဲ့ကြသည်။ ဤသို့ ဖြင့် နေထိုင်ပုံစရိုက်သဘာဝချင်း မတူညီကြသည့်အဖြစ်ကို    သိရှိလာကြသည်။

ဂရိလူမျိုးများသည် ပထဝီဝင်ကို ပထမဆုံးစတင်လေ့လာသူများဖြစ်ပြီး မိမိတို့နေထိုင်ရာပတ်ဝန်းကျင် တောတောင်ရေမြေတို့ကို မြေပုံများရေးဆွဲမှတ်သားခဲ့ကြသည်။ခရစ်တော်မပေါ်မီ ဘီစီ ၂၀၀ ခန့်ကပင် ကမ္ဘာ့အချင်း၊ ဧရိယာတို့ကို တွက်ချက်ခြင်းများရှိခဲ့ပြီဖြစ်သည်။ တစ်နည်း ပထဝီဝင်ဘာသာရပ်သည် လူအများ နယ်ပယ်ဒေသအသစ်များသို့ ခရီးသွားရာမှ ဖြစ်ပေါ်လာသည်ဟု ဆိုနိုင်ပေသည်။

ပထဝီဝင်ဘာသာရပ်၏အရေးပါပုံနိုင်ငံတစ်နိုင်ငံဖွံ့ဖြိုးတိုးတက်ဖို့အတွက်ထဝီဆိုင်ရာအသိအမြင် လိုအပ် သည့်အပြင် လူမှုစီးပွားဘဝနှင့်ဆက်စပ်လျက်ရှိသည့် သဘာဝအရင်းအမြစ်၊ ဒေသန္တရ ကွာခြားမှုနှင့် လူသားအရင်းအမြစ်အခန်းကဏ္ဍများအပေါ် စူးစိုက်စွာသုတေသနပြုသင့်ပြီး အောက်ပါအချက်များ အပေါ်  ယေဘုယျအားဖြင့်အခြေခံသင့်လှပေသည်-

(၁)နိုင်ငံအတွင်းရှိ မြစ်များ၊ ကမ်းရိုးတန်းဒေသများ၊ တောတောင်၊ လွင်ပြင်များအလိုက် သက်ရောက်နိုင်သည့်သယ်ယူပို့ဆောင်ရေးနှင့်အခြေပြုလုပ်ငန်းများ။

(၂)ရာသီဥတုအခြေအနေ(မိုးခေါင်ခြင်း၊ရေကြီးခြင်းစသည်)၊ သီးနှံအထွက်နှုန်း၊ ရေရရှိနိုင်မှုအခြေအနေ များ။

(၃) သီးနှံအထွက်တိုးစေရေး မြေဆီဩဇာနှင့်  စိုက်ပျိုးမြေအသုံးချနိုင်မှုအခြေအနေများ။

(၄) အစိုးရရုံးဌာနများ၊ လူနေတိုက်တာများ စသည့်  အခြေခံအဆောက်အဦများ မဆောက်လုပ်ခင် မြေပုံ ရေးဆွဲခြင်း၊ ငလျင်ဖြစ်လေ့ဖြစ်ထရှိနိုင်သော ဒေသများကိုပါ ထည့်သွင်းတွက်ချက်ခြင်း။

(၅) ဒေသအလိုက်  သဘာဝတွင်းထွက်ပစ္စည်းထွက်ရှိမှုအခြေအနေ၊ ဆည်မြောင်း၊ အလုပ်ရုံ၊ စက်ရုံများ အတွက် ရေပေးဝေနိုင်မှုအခြေအနေ၊ သောက်သုံးရေရရှိနိုင်မှုအခြေအနေ။

(၆)သစ်တောနှင့်ဇီဝမျိုးကွဲများကို ထိန်းသိမ်းစောင့်ရှောက်နိုင်မှု၊  ခရီးသွားလုပ်ငန်းနှင့် မြေယာစီမံခန့်ခွဲမှု ကိစ္စရပ်များ။

(၇) လူဦးရေတိုးပွားလာခြင်းကြောင့် မြို့ပြလူနေထိုင်မှုသိပ်သည်းလာခြင်းအပေါ် အိမ်ရာချထားပေးနိုင်မှု၊   သယ်ယူပို့ဆောင်ရေးနှင့် အလုပ်အကိုင်ဖန်တီးပေးနိုင်မှုအခြေအနေများ။

(၈)စိုက်ပျိုးရေးဇုန်၊ စက်မှုကုန်ထုတ်လုပ်ငန်းများအခြေချရာနေရာ၊ သယ်ယူပို့ဆောင်ရေး လမ်းကြောင်း များ(ကုန်း၊ ရေ၊ လေ)နှင့် နိုင်ငံတကာဈေးကွက်အခြေအနေများ။

(၉)ဆက်သွယ်မှုကွန်ရက်အခြေအနေ၊ လျှပ်စစ်မီးပေးဝေနိုင်မှု၊ ပင်လယ်ရေမြင့်တက်မှု၊ မိုးခေါင်ခြင်းနှင့် အကျိုးသက်ရောက်မှုများ။

ထို့ပြင် ကမ္ဘာ့လှည့်ခရီးသွားများကို ဆွဲဆောင်နိုင်သည့် ရိုးရာယဉ်ကျေးမှု၊ တောတောင်ရေမြေများသည် လည်းခရီးသွားလုပ်ငန်းအောင်မြင်မှုအလားအလာကို ထောက်ပံ့ပေးလျက်ရှိသည့်အတွက် ထိန်းသိမ်း စောင့်ရှောက်ခြင်း၊ UNESCO  အသိအမှတ်ပြု ဒြပ်ရှိ/ဒြပ်မဲ့ယဉ်ကျေးမှုများ ဖြစ်ပေါ်လာစေရန်အားပေးဆောင်ရွက်လျက်ရှိကြောင်း တွေ့ရသည်။

တိုးတက်ခြင်းလမ်းစ

ပညာရပ်တစ်ခုအစဉ်ဖွံ့ဖြိုးရှင်သန်နိုင်ရန် တစ်ခုတည်းသောလမ်းကြောင်းမှာသုတေသနပြုခြင်းသည် အဓိကဖြစ်သည်။ ၎င်းပညာရပ်များကိုထိရောက်စွာအသုံးချနိုင်မည့်လူသားအရင်းအမြစ်များ ကြွယ်ဝပေါများစေခြင်းသည်နိုင်ငံတော်ဖွံ့ဖြိုးရေးအတွက်တိုးတက်ခြင်းလမ်းစပင်ဖြစ်သည်။မည်သည့်ပညာရပ်မဆိုမှန်ကန်သောနည်းလမ်းဖြင့်အကျိုးရှိစွာအသုံးပြုနိုင်မည်ဆိုပါကနိုင်ငံတော်ဖွံ့ဖြိုးတိုးတက်ရေး အတွက် အထောက်အပံ့ကောင်းများရရှိစေနိုင်မည်ဖြစ်သဖြင့်ပထဝီဝင်အကြောင်းသိကောင်းစရာ အဖုံဖုံအား ရေးသားတင်ပြလိုက်ရပါသည်။    ။

 MWD Web Portal

Photo- fb