ကမ္ဘောဒီးယားအစိုးရသည် ထိုင်းနိုင်ငံနှင့်ဆက်စပ်နေသည့် နယ်စပ်ဂိတ်များမှ တစ်ဆင့် ဝင်ရောက်လာမည့် မည်သည့် ကုန်တင်ယာဉ်ကိုမဆို ဖြတ်သန်းခွင့်မပြုတော့ကြောင်း ကမ္ဘောဒီးယားလူဝင်မှု ကြီးကြပ်ရေးဦးစီးဌာနက ထုတ်ပြန်ထားသည်။

ကမ္ဘောဒီးယားဝန်ကြီးချုပ် ဟွန်မာနက်၏ညွှန်ကြားချက်နှင့်အညီ ယခုလုပ်ဆောင်မှုကို အကောင်အထည်ဖော်ခြင်း ဖြစ်ကြောင်း အဆိုပါဦးစီးဌာန၏ ဇွန်လ ၂၉ ရက် ထုတ်ပြန်ချက်တွင်ဖော်ပြထားသည်။

ထိုင်းနိုင်ငံအနေဖြင့် နိုင်ငံတကာနှင့် နှစ်နိုင်ငံမှကုန်စည်များကူးသန်းရနေရာများဖြစ်သော နယ်စပ်စစ်ဆေးရေးဂိတ်များကို ပိတ်ထားသမျှကာလပတ်လုံး ထို ညွှန်ကြားချက်က အသက်ဝင်နေမည်ဖြစ်သည်ဟု ထုတ်ပြန်ချက်တွင် ဆက်လက်ဖော်ပြထားသည်။ ကမ္ဘောဒီးယားနိုင်ငံနှင့် ထိုင်းနိုင်ငံတို့ကြား တင်းမာမှုများဖြစ်ပွားနေစဉ် နှစ်နိုင်ငံကြားရှိ နယ်စပ်စစ်ဆေးရေးဂိတ်များကို နှစ်ဖက်စလုံးက ပိတ်လာခြင်းဖြစ်ကြောင်းသိရသည်။ 

Ref: TST

MWD Daily Newspaper

Photo -Khmer Times

အနောက်အုပ်စုအနေဖြင့် ရုရှားနိုင်ငံ အပေါ် မည်သည့်အခါမျှအနိုင်ရရှိမည် မဟုတ်ကြောင်း ရုရှားနိုင်ငံခြားရေးဝန်ကြီး ဆာဂျီလက်ရော့က ကာဂျစ်စတန် နိုင်ငံခြားရေးဝန်ကြီးနှင့် ဇွန်လ ၂၉ ရက် တွင်တွေ့ဆုံစဉ်ပြောသည်။

ထို့ပြင် NATO အုပ်စုနှင့် ဥရောပသမဂ္ဂ တို့သည် ရုရှားနိုင်ငံကိုတိုက်ခိုက်နိုင်ရေးအတွက် ယူကရိန်းပဋိပက္ခကို လက်နက်တစ်ခုအနေဖြင့် အသုံးချနေခြင်းဖြစ်သည်  ဟု လက်ရော့က ဆက်ပြောသည်။ 
အနောက်အုပ်စုသည် ရုရှားနိုင်ငံကို စစ်ဆင်နွှဲရန် နောက်တစ်ကြိမ်ဆုံးဖြတ် ချက်ချမှတ်ထားကြောင်း၊ အနောက်အုပ်စု အနေဖြင့် ရုရှားနိုင်ငံအပေါ် ထိုသို့နည်း ဖြင့် မည်သည့်အခါကမျှ အနိုင်ရရှိခဲ့ခြင်း မရှိသကဲ့သို့ ယခုတစ်ကြိမ်တွင်လည်း ရုရှားအပေါ်အနိုင်ရမည်မဟုတ်ကြောင်း လက်ရော့ကဆက်ပြောသည်။

ပြီးခဲ့သည့် ဥရောပသမဂ္ဂ ထိပ်သီး ညီလာခံ၌ အဖွဲ့ဝင်နိုင်ငံအများအပြားသည် ယူကရိန်းကိုထောက်ပံ့မှုပိုပေးကာ ရုရှား ကိုပိတ်ဆို့မှုများပိုမိုချမှတ်ရန် ကြိုးပမ်း ခဲ့ကြောင်းသိရသည်။ 

Ref. RT

MWD Newspaper

အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ၏ အကြီးအကဲ ရာဖေးလ် ဂရိုစီအား သေဒဏ်ပေးရန် အီရန်နိုင်ငံတွင်း တောင်းဆိုမှုများကို အမေရိကန် နိုင်ငံခြားရေးဝန်ကြီး မာကိုရူဘီယိုက ပြင်းပြင်း ထန်ထန် ရှုတ်ချလိုက်သည်။

အီရန်သတင်းစာ Kayhan က ဂရိုစီအား အစ္စရေးအတွက် သူလျှို လုပ်သည်ဟု စွပ်စွဲကာ အကယ်၍ ၎င်းသည် အီရန်နိုင်ငံအတွင်းသို့ ဝင်ရောက် လာပါက အပြစ်ပေးခံရမည်ဖြစ်ပြီး သေဒဏ်ပေးသင့်ကြောင်း အဆိုပြု ခဲ့သည်ဟု သတင်းများတွင် ဖော်ပြထားသည်။

“IAEA ၏ အကြီးအကဲ ဂရိုစီအား ဖမ်းဆီးပြီး သေဒဏ်ပေးရန် အီရန်မှ တောင်းဆိုမှုများသည် လက်မခံနိုင်ဘဲ ပြင်းပြင်းထန်ထန် ရှုတ်ချသင့်သည်” ဟု ရူဘီယိုက စနေနေ့ (ဇွန် ၂၈) တွင် X (တွစ်တာ) တွင် ရေးသားခဲ့သည်။

“မိမိတို့သည် အီရန်ရှိ IAEA ၏ အရေးကြီးသော စိစစ်စောင့်ကြည့်ရေး လုပ်ငန်းများကို ထောက်ခံပြီး အကြီးအကဲနှင့် IAEA တို့၏ အနစ်နာခံမှုနှင့် ကျွမ်းကျင်ပညာရှင်ဆန်မှုတို့ကို အသိအမှတ်ပြုသည်။ အီရန်အနေဖြင့်IAEA ဝန်ထမ်းများ၏ ဘေးကင်းလုံခြုံမှုကို သေချာစေရန် မိမိတို့ အနေဖြင့် တိုက်တွန်းပါသည်” ဟု ၎င်းက ဖြည့်စွက် ပြောကြားခဲ့သည်။

ယခုသီတင်းပတ်အစောပိုင်းတွင် အီရန်လွှတ်တော်က IAEA နှင့် ပူးပေါင်း ဆောင်ရွက်မှုကို ယာယီရပ်ဆိုင်းရန် ဆန္ဒမဲပေးခဲ့ပြီးနောက် အီရန်နိုင်ငံခြားရေး ဝန်ကြီး Abbas Araghchi က IAEA အကြီးအကဲ ရာဖေးလ် ဂရိုစီအား အီရန်နိုင်ငံသို့ ဝင်ရောက်ခွင့်ပြုတော့မည်မဟုတ် ဟု ကြေညာခဲ့သည်။

RT သတင်းဌာနနှင့် စနေနေ့ (ဇွန် ၂၈) တွင် ပြုလုပ်သော တွေ့ဆုံ မေးမြန်းမှုတွင် အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Esmail Baghaei က အီရန်ပြည်သူများသည် အစ္စရေးနှင့် အမေရိကန်တို့၏ အီရန်၏ နျူကလီးယားစက်ရုံများကို မကြာသေးမီက ဗုံးကြဲတိုက်ခိုက်မှုများကိုIAEA ၏ ထုတ်ပြန်ရပ်တည်မှုများအတွက် အမျက်ထွက်နေကြောင်း ပြောကြား ခဲ့သည်။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အိန္ဒိယနိုင်ငံခြားရေးဝန်ကြီးဌာန၏ ထုတ်ပြန်ချက်အရ မြောက်ပိုင်း Waziristan ခရိုင်တွင် ဇွန် ၂၉ ရက်နေ့၊ နံနက်ပိုင်းက ဖြစ်ပွားခဲ့သည့် သေနတ်ကိုင်အကြမ်းဖက် ဗုံးခွဲတိုက်ခိုက်မှုတွင် အိန္ဒိယက ပါဝင် ပတ်သက် နေကြောင်း ပါကစ္စတန်၏စွပ်စွဲချက်ကို “မဟုတ်မမှန်သော လုပ်ကြံ စွပ်စွဲချက်ဖြစ်သည်” ဟု အိန္ဒိယက ပြင်းပြင်းထန်ထန် ငြင်းဆိုလိုက်သည်။ အဆိုပါဖြစ်စဉ်သည် ကားဗုံးခွဲ တိုက်ခိုက်မှုအပြီး ပါကစ္စတန်မှ အိန္ဒိယ အပေါ် အကြမ်းဖက်မှုအားအားပေးသည်ဟု စွပ်စွဲချက်နှင့် တိုက်ရိုက် ဆက်စပ်နေသည်။

အဆိုပါတိုက်ခိုက်မှုတွင် သေနတ်သမားတစ်ဦးသည် ပါကစ္စတန် စစ်ဘက် ဆိုင်ရာယာဉ်တန်းအား ကားဗုံးခွဲတိုက်ခိုက်မှုမပြုမီ သေနတ်ဖြင့် ပစ်ခတ် ခဲ့မှုကြောင့် စစ်သား ၁၃ ဦးသေဆုံးခဲ့ပြီး ကလေး ၂ ဦးအပါအဝင် အရပ်သား ၃ ဦးဒဏ်ရာရရှိခဲ့ကြောင်း ပါကစ္စတန်စစ်တပ်က ထုတ်ပြန် ခဲ့သည်။ အစောပိုင်းတွင် အရပ်သား ၂၉ ဦးဒဏ်ရာရခဲ့ကြောင်း AFP သတင်း ဌာနက အာဏာပိုင်များ၏ထုတ်ပြန်ချက်ကိုကိုးကား၍ ဖော်ပြခဲ့သည်။ 

ဖြစ်စဉ်အပြီး နာရီပိုင်းအတွင်း ပါကစ္စတန်စစ်တပ်၏ ပြည်သူ့ဆက်ဆံရေး ဌာန (ISPR) မှ ထုတ်ပြန်ချက်တွင် အိန္ဒိယသည် အကြမ်းဖက်သမားများကို အားပေးအားမြှောက်ပြုနေကြောင်း စွပ်စွဲခဲ့သည်။ “အိန္ဒိယ အကြမ်းဖက် နိုင်ငံတော်မှ စီစဉ်ပြီး ၎င်း၏ လက်ဝေခံအင်အားစု ‘Fitna al Khwarij' မှ အကောင်အထည်ဖော်ခဲ့သည့် ကြောက်ရွံ့ဖွယ်ရာတိုက်ခိုက်မှုတွင် မြောက်ပိုင်း Waziristan ခရိုင် Mir Ali ဒေသတွင် လုံခြုံရေးတပ်ဖွဲ့များ၏ ယာဉ်တန်း ကို ပစ်မှတ်ထားတိုက်ခိုက်ခဲ့သည်” ဟု စွပ်စွဲခဲ့သည်။ 

ထို့အပြင် ထုတ်ပြန်ချက်တွင် “ပါကစ္စတန်၏လုံခြုံရေးတပ်ဖွဲ့များသည် နိုင်ငံတော်နှင့်အတူ အိန္ဒိယမှအားပေးသော အကြမ်းဖက်ဝါဒကို အပြီးသတ် ရှင်းလင်းရန် ခိုင်မာစွာရပ်တည်နေပြီး မိမိတို့၏ရဲမက်စစ်သည်များနှင့် အပြစ်မဲ့အရပ်သားများ၏ အသက်စွန့်ပေးဆပ်မှုများကို နိုင်ငံတော်မှ အလေးထားတန်ဖိုးထားကာ ကာကွယ်စောင့်ရှောက်ရန် မိမိတို့၏ ခိုင်မာသော ဆုံးဖြတ်ချက်ကို ပိုမိုအားဖြည့်ပေးလျက်ရှိသည်” ဟု ဖော်ပြ ထားသည်။

စစ်ဦးစီးအရာရှိချုပ် Field Marshal Syed Asim Munir သည် Khyber Pakhtunkhwa ပြည်နယ်၏မြို့တော် Peshawar ရှိ စစ်ဌာနချုပ်သို့ သွားရောက်ကာ လက်ရှိလုံခြုံရေးအခြေအနေနှင့် အကြမ်းဖက်ဝါဒ တိုက်ဖျက်ရေးလုပ်ငန်းစဉ်များအပေါ် ရှင်းလင်းတင်ပြမှုများအား ပြန်လည် သုံးသပ် လမ်းညွှန်မှုပြုခဲ့ကြောင်း ဖော်ပြထားသည်။

သတင်းမီဒီယာများ၏ ဖော်ပြမှုများအရ ပါကစ္စတန်အခြေစိုက် တာလီဘန် အုပ်စုခွဲ “Hafiz Gul Bahadur” က အဆိုပါ ဗုံးခွဲတိုက်ခိုက်မှုသည် ၎င်းတို့၏ လက်ချက်ဖြစ်ကြောင်း ကြေညာခဲ့သည်ဟု သိရှိရပါသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဆားဘီးယားနိုင်ငံ၊ ဘဲလ်ဂရိတ်မြို့တွင် စနေနေ့ (ဇွန် ၂၈) က လုပ်ဆောင် ခဲ့သော အစိုးရဆန့်ကျင်ဆန္ဒပြပွဲကြီးအတွင်း ဆန္ဒပြသူများနှင့် ရဲတပ်ဖွဲ့ များ ထိပ်တိုက်ရင်ဆိုင်ခဲ့ကြပြီး အပြန်အလှန် တိုက်ခိုက်မှုများ ဖြစ်ပွား ခဲ့သည်။

ဆန္ဒပြသူများ၏ လွှတ်တော်ဖျက်သိမ်းရန်နှင့် အထွေထွေ ရွေးကောက်ပွဲ အသစ်ကျင်းပရန် တောင်းဆိုချက်အား ဆားဘီးယားအစိုးရက ငြင်းဆန် ခဲ့ပြီးနောက် မကြာမီ အဓိကရုဏ်းများ စတင်ဖြစ်ပွားခဲ့ခြင်းဖြစ်ပြီး ဆန္ဒပြ သူများသတ်မှတ်ထားသော အချိန်ကာလအကန့်အသတ်သည် ည ၉ နာရီတွင် ကုန်ဆုံးသွားခဲ့သည်။

မျက်နှာဖုံးစွပ်ထားသော ဆန္ဒပြသူများသည် ရဲတပ်ဖွဲ့ဝင်များအား ကျောက်ခဲများ၊ မီးခိုးဗုံးများနှင့် အခြားလက်နက်များဖြင့် ပစ်ခတ် တိုက်ခိုက်ခဲ့ကြသည်။ ရဲတပ်ဖွဲ့က ဘဲလ်ဂရိတ်မြို့လမ်းများပေါ်သို့ သံချပ်ကာ ကားများ စေလွှတ်ခဲ့ပြီး အကြမ်းဖက်နေသော လူအုပ်ကို ဖြိုခွင်းနေသည် ကို တွေ့မြင်ရသည်။

ဒိုင်းနှင့် နံပါတ်တုတ်များ ကိုင်စွဲထားသည့် အဓိကရုဏ်း နှိမ်နင်းရေး ရဲတပ်ဖွဲ့ဝင်များသည် ဆန္ဒပြသူများကို အစိုးရရုံးတည်ရှိရာဇုံမှ ဖယ်ရှားနေပြီး လွှတ်တော်အဆောက်အဦအနီးတဝိုက် လုံခြုံရေးအတွက် အလေးထား လုပ်ဆောင်နေခဲ့ကြသည်။

ရဲအရာရှိချုပ် ဒရာဂန်း ဗာဆီလ်ဂျီဗစ်က “ရဲတပ်ဖွဲ့ဝင်များသည် ထိန်းထိန်း သိမ်းသိမ်း ဆောင်ရွက်ခဲ့ကြပြီး အဓိကရုဏ်းမဖြစ်စေရန် အနည်းဆုံး အင်အားသာ အသုံးပြုခဲ့ကြောင်း” ပြောကြားခဲ့သည်။ ရဲတပ်ဖွဲ့ဝင် ၆ ဦး နှင့် အရပ်သား ၂ ဦး ဒဏ်ရာရခဲ့ပြီး ဆန္ဒပြသူအချို့ကို ဖမ်းဆီးထားကြောင်း ၎င်းက ထုတ်ပြန်ခဲ့သည်။

ထိုနေ့အစောပိုင်းတွင် ဆားဘီးယားသမ္မတ အလက်ဇန်ဒါ ဗူချစ်က “နိုင်ငံ ကို ကာကွယ်မည်” ဟု ကတိပြုကာ ဆန္ဒပြမှုများကို “ပြည်ပ အင်အားစု များက လှုံ့ဆော်ခြင်း” ဖြစ်ကြောင်း အစိုးရ၏ ပြောဆိုချက်ကို ထပ်လောင်း အတည်ပြုခဲ့သည်။ ၎င်းက အကြမ်းဖက်မှုလုပ်ဆောင်ရန် ကြိုးပမ်းမည့် ဆန္ဒပြသူများကိုလည်း သတိပေးခဲ့သည်။

အဆိုပါဆန္ဒပြပွဲသည် လွန်ခဲ့သည့် နိုဝင်ဘာလက နိုဗီဆက်မြို့ရှိ ရထားဘူတာတစ်ခုတွင် ကွန်ကရစ်မိုးကာ ပြိုကျမှုကြောင့် လူ ၁၆ ဦး သေဆုံးခဲ့သည့် အဖြစ်အပျက်နှင့်အတူ စတင်ခဲ့သော လပေါင်းများစွာက ကျောင်းသားဦးဆောင်ဆန္ဒပြမှုများ၏ အဆက်ဖြစ်သည်။ ထိုဖြစ်ရပ်ကို တစ်နိုင်ငံလုံးအတိုင်းအတာဖြင့် အမျက်ထွက်ခဲ့ကြပြီး တာဝန်ယူမှု တာဝန်ခံမှုရှိရန် တောင်းဆိုမှုများကို ဖြစ်ပေါ်စေခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အီရန်သည် အမေရိကန်နှင့် အစ္စရေးတို့၏ နျူကလီးယားစက်ရုံများကို လတ်တလော လေကြောင်းတိုက်ခိုက်မှုများ ရှိခဲ့သော်လည်း လပိုင်း အတွင်း ယူရေနီယမ်ထပ်တိုးသန့်စင်မှုကို ပြန်လည်စတင်နိုင်ကြောင်း အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ၏ အကြီးအကဲ ရာဖေးလ် ဂရိုစီက ပြောကြားခဲ့သည်။

တနင်္ဂနွေနေ့ (ဇွန် ၂၉) တွင် ထုတ်လွှင့်ခဲ့သော CBS News ၏ တွေ့ဆုံ မေးမြန်းချက်တစ်ခုတွင် ဂရိုစီက ဖော်ဒိုး၊ နတန်ဇ်နှင့် အစ္စဖာဟန် အပါ အဝင် အီရန်၏ နျူကလီးယားစက်ရုံများကို တိုက်ခိုက်မှုများသည် အလွန် ပြင်းထန်သော ပျက်စီးမှုများဖြစ်စေခဲ့သော်လည်း အချို့သော စက်ပစ္စည်း များမှာ “အခြေအနေကောင်းနေသေးသည်” ဟု ပြောကြားခဲ့သည်။

၎င်းက “သူတို့ (အီရန်) မှာ ရှိနေသည့်စွမ်းရည်တွေက ရှိနေတုန်းပါပဲ။ လအနည်းငယ်အတွင်းမှာပဲ စင်ထရီဖြူးဂျာတွေကို လည်ပတ်ပြီး ယူရေနီယမ် ထပ်တိုး သန့်စင်မှုတွေ လုပ်ဆောင်နိုင်တယ် (သို့မဟုတ်) ဒီထက်လည်း ပိုမြန်နိုင်တယ်” ဟု ဖြည့်စွက်ပြောဆိုခဲ့ပြီး အီရန်တို့ပင် ပျက်စီးမှု၏ အတိုင်းအတာကို အခုအချိန်ထိ အတိအကျမသိသေးဟု ဝန်ခံခဲ့သည်။

IAEA အကြီးအကဲ၏ အဆိုအရ အီရန်သည် လွန်စွာကြီးမားသော နျူစက်မှုလုပ်ငန်းစွမ်းရည်များ ရှိနေဆဲဖြစ်သည်။ “အီရန်သည် နျူကလီးယား နည်းပညာမှာ အဆင့်မြင့်နိုင်ငံတစ်နိုင်ငံဖြစ်သည်မှာ သိသာသည်ကို ပျောက်ကွယ်သွားအောင် လုပ်၍မရပါ။ ရှိထားပြီးသည့် အသိပညာတွေ၊ စွမ်းရည်တွေကို ပြန်ဖျက်၍မရပါ” ဟု ၎င်းက ရှင်းပြခဲ့သည်။

ဂရိုစီက ဆက်လက်၍ အီရန်၏ နျူကလီးယား အစီအစဉ်နှင့် ပတ်သက်သည့် စိုးရိမ်မှုများကို စစ်ရေးဖြေရှင်းနည်းဖြင့် အဆုံးသတ်၍ မရနိုင်ကြောင်း ပြောကြားခဲ့သည်။ “ဒါက မိမိတို့အားလုံး နားလည်သင့်သည့် လှုံ့ဆော်မှုတစ်ခုဖြစ်သင့်ပါသည်။ အဆိုပါကိစ္စကို စစ်ရေးနည်းဖြင့် အပြီးအပိုင် ဖြေရှင်း၍မရပါ။ သဘောတူညီမှုတစ်ခု ရရှိရန်လိုပါသည်” ဟု ၎င်းက ပြောကြားခဲ့ပြီး IAEA စစ်ဆေးရေးများအား မကြာမီ နိုင်ငံ၏ နျူကလီးယား နေရာများသို့ ပြန်လည်ဝင်ရောက်ခွင့်ရရှိမည်ဟု မျှော်လင့်ကြောင်း ဖော်ပြ ခဲ့သည်။

အီရန်သည် IAEA ၏ မကြာသေးမီက အစီရင်ခံစာတွင် အချက်အလက် များကို လှည့်ဖြားခဲ့သည်ဟု စွပ်စွဲကာ စစ်ဆေးရေးများတာဝန်ရှိသူအား ၎င်း၏ နျူကလီးယားစက်ရုံများသို့ ဝင်ရောက်စစ်ဆေးခြင်းကို တားမြစ် ခဲ့ပြီး အဆိုပါ အစီရင်ခံစာသည် အစ္စရေးနှင့် အမေရိကန်တို့၏ တိုက်ခိုက်မှု များအတွက် အကြောင်းပြချက်အဖြစ် အသုံးပြုခံခဲ့ရသည်ဟု တီဟီရန်က ဆိုသည်။ ထိုအချက်ကို ဂရိုစီက “တကယ်တော့ IAEA အစီရင်ခံစာကြောင့် ထိုပဋိပက္ခဖြစ်ကြောင်း မည်သူယုံနိုင်မလဲ ၊ ပြီးတော့ ယင်းအစီရင်ခံစာ ထဲတွင် ပါသည့်အရာက အသစ်မဟုတ်ပါ” ဟု တုံ့ပြန်ခဲ့သည်။

အဆိုပါ မှတ်ချက်များသည် အစ္စရေးနှင့် အီရန်ကြား ၁၂ ရက်ကြာ ပဋိပက္ခ ဖြစ်ပွားပြီးနောက် ထွက်ပေါ်လာခြင်းဖြစ်ကာ ထိုကာလအတွင်း အမေရိကန် နှင့် အစ္စရေးတို့က အီရန်၏ နျူကလီးယားစက်ရုံများကို လေကြောင်း တိုက်ခိုက်မှုများ ပြုလုပ်ခဲ့သည်။

အမေရိကန်သမ္မတ ဒေါ်နယ်ထရမ့်က အဆိုပါ တိုက်ခိုက်မှုများသည် အီရန်၏ နျူကလီးယားစက်ရုံများကို “လုံးဝဖျက်ဆီးပစ်နိုင်ခဲ့သည်” ဟု ဆိုကာ အီရန်က နျူကလီးယားလက်နက်များ ထုတ်လုပ်ပါက နောက်ထပ် တိုက်ခိုက်မှုများ ပြုလုပ်မည်ဟု သတိပေးခဲ့သည်။ သို့သော် အမေရိကန် မီဒီယာအချို့က အီရန်၏ နျူကလီးယားအခြေခံအဆောက်အအုံများ ပျက်စီးမှုမှာ အတိုင်းအတာတစ်ခုအထိသာ ရှိသည်ဟု ဖော်ပြခဲ့သည်။

တီဟီရန်က နျူကလီးယားလက်နက်ထုတ်လုပ်ရန် အစီအစဉ်ရှိကြောင်း ငြင်းဆိုခဲ့ပြီး ၎င်း၏ နျူကလီးယားအစီအစဉ်သည် ငြိမ်းချမ်းစွာ အသုံးပြုရေး ရည်ရွယ်ချက်ဖြင့်သာ ဖြစ်ကြောင်း၊ အရပ်ဘက်သုံး ယူရေနီယမ် ထပ်တိုး သန့်စင်မှု အခွင့်အရေးကို ထိန်းသိမ်းထားလိုကြောင်း အလေးအနက် ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အီရန်နိုင်ငံသည် အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) အား ၎င်း၏နျူကလီးယားစက်ရုံများသို့ လာရောက်စစ်ဆေးခွင့်ကို တားမြစ် လိုက်ပါသည်။ တီဟီရန်အစိုးရက အေဂျင်စီအား မကြာသေးမီက အစီရင်ခံစာတွင် အချက်အလက်များကို လှည့်ဖြားဖော်ပြခဲ့သည်ဟု စွပ်စွဲခဲ့ပြီး ထိုသို့ပြုလုပ်ခြင်းဖြင့် အစ္စရေးနှင့် အမေရိကန်တို့၏ လတ်တလော တိုက်ခိုက်မှုများအတွက် အကြောင်းပြချက်ဖြစ်စေခဲ့သည်ဟု ဆိုပါသည်။

အီရန်လွှတ်တော် ဒုတိယဥက္ကဋ္ဌ ဟာမစ်ဒ် ရီဇာ ဟာဂျီဘာဘာအီက စနေနေ့ (ဇွန် ၂၈) တွင် တီဟီရန်အနေဖြင့် အကြီးအကဲ ရာဖေးလ် ဂရိုစီ အပါအဝင် IAEA တာဝန်ရှိသူများအား ၎င်း၏နျူကလီးယားစက်ရုံများကို စစ်ဆေးခွင့် ဆက်လက်ခွင့်ပြုတော့မည်မဟုတ်ကြောင်း ပြောကြားခဲ့သည်။ အေဂျင်စီ၏ စောင့်ကြည့်ရေးကင်မရာများကိုလည်း စက်ရုံများတွင် ရပ်ဆိုင်း သွားမည်ဖြစ်ကြောင်း ၎င်းက ဖြည့်စွက်ပြောကြားခဲ့သည်။

ယခုသီတင်းပတ်အစောပိုင်းတွင် အီရန်၏ ဖွဲ့စည်းပုံ အခြေခံ ဥပဒေဆိုင်ရာ စောင့်ကြည့်ရေးကောင်စီ (Guardian Council) က ၎င်း၏နျူကလီးယား စက်ရုံများအတွက် လုံခြုံရေးအာမခံချက်မရမချင်း IAEA နှင့် ပူးပေါင်း ဆောင်ရွက်မှုကို ယာယီရပ်ဆိုင်းရန် ဥပဒေကြမ်းတစ်ရပ်ကို ရေးဆွဲခဲ့ပြီး ယခုအခါ ထိုဥပဒေကြမ်းအား အတည်ပြုရန် စောင့်ဆိုင်းနေဆဲဖြစ်သည်။

အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ အက်စ်မာအီးလ် ဘက်ကာအီး က ယခုသီတင်းပတ်အစောပိုင်းက X (Twitter) တွင် IAEA ၏ အစီရင်ခံစာသည် “ဘက်လိုက်သော အစီရင်ခံစာ” ဖြစ်ပြီး အမှန်တရား ကို ဖုံးကွယ်ကာ အစ္စရေးအား အီရန်၏ နျူကလီးယားစက်ရုံများကို တရားမဝင်တိုက်ခိုက်မှုအတွက် အကြောင်းပြချက်ဖန်တီးပေးခဲ့သည်ဟု စွပ်စွဲခဲ့သည်။ ၎င်းက IAEA သည် အစ္စရေးထံ အထိခိုက်မခံနိုင်သောစက်ရုံ၏ အချက်အလက်များကို လက်ဆင့်ကမ်းပေးခဲ့သည်ဟုလည်း ညွှန်းဆိုခဲ့သည်။

အဆိုပါအခြေအနေသည် အီရန်နှင့် အနောက်နိုင်ငံများအကြား နျူကလီးယားသဘောတူညီချက် (JCPOA) ပြန်လည်အသက်သွင်းရေး ဆွေးနွေးမှုများကို ပိုမိုရှုပ်ထွေးစေနိုင်ပြီး ဒေသတွင်း တင်းမာမှုကို ပိုမို မြင့်တက်စေနိုင်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဥရောပ NATO အဖွဲ့ဝင်နိုင်ငံများသည် လက်နက်ပစ္စည်းများ ပြန်လည် တိုးချဲ့ထုတ်လုပ်ရေး လုပ်ငန်းစဉ်အတွင်း အမေရိကန်လက်နက်များ အပေါ် မှီခိုမှု ပိုမိုမြင့်တက်လာခြင်းနှင့်ပတ်သက်၍ စိုးရိမ်မှုများ တိုးပွား လာနေကြောင်း ထုတ်ဖော်ပြောဆိုလာကြသည်ဟု Bloomberg သတင်း ဌာန၏ သောကြာနေ့ထုတ်လွှင့်ချက်အရ သိရှိရသည်။

အထူးသဖြင့် ဒေါ်နယ်ထရမ့် သမ္မတဖြစ်လာပြီးနောက် အမေရိကန်၏ ကာကွယ်ရေးလုပ်ငန်းများအပေါ် မှီခိုမှု ပိုမိုနက်ရှိုင်းလာခြင်းနှင့်ပတ်သက်၍ စိုးရိမ်မှုများ ပေါ်ပေါက်လာကြောင်း Bloomberg က ဖော်ပြသည်။ အမေရိကန်နှင့် ရုရှားအကြား ဆက်ဆံရေး တိုးတက်စေရန် ထရမ့်၏ ကြိုးပမ်းမှုများနှင့် မဟာမိတ်နိုင်ငံများ၏ နယ်မြေများကို သိမ်းပိုက်ရန် ယခင်က ခြိမ်းခြောက်မှုများကြောင့် ဥရောပနိုင်ငံများအနေဖြင့် ပိုမို ကြီးမားသော အန္တရာယ်များနှင့် ရင်ဆိုင်ရနိုင်သည်ဟု ခေါင်းဆောင် များက စိုးရိမ်နေကြသည်။ အမေရိကန်လက်နက်များအပေါ် မှီခိုမှုသည် ဒေသတွင်းတွင် ရောင်းချမှုကို ပိုမိုခက်ခဲလာစေသည်ဟု Bloomberg က မှတ်ချက်ပြုသည်။

ပြင်သစ်သမ္မတ အီမန်နျူရယ် မက်ရွန်က ဥရောပ NATO အဖွဲ့ဝင် နိုင်ငံ များအတွက် ကာကွယ်ရေးဆိုင်ရာ လွတ်လပ်မှု ပိုမိုရရှိရန်အတွက် ရေရှည် တည်တံ့သော စစ်ဘက်ဆိုင်ရာ စက်မှုလုပ်ငန်းများ ဖွံ့ဖြိုးတိုးတက်ရေး လိုအပ်ကြောင်း အလေးပေးပြောဆိုခဲ့သည်။

NATO ၏ အဓိကမဟာမိတ်နိုင်ငံတစ်ခုဖြစ်သော ကနေဒါသည် အမေရိကန် ဦးဆောင်သည့် F-35 တိုက်လေယာဉ်စီမံကိန်းတွင် ပါဝင်မှုကို ပြန်လည် သုံးသပ်နေပြီး ဆွီဒင်၏ တိုက်လေယာဉ်များကို အစားထိုး ရွေးချယ် နိုင်ကြောင်း သတင်းများထွက်ပေါ်နေသည်။ “မိမိတို့၏ ကာကွယ်ရေး အသုံးစရိတ်၏ လေးပုံသုံးပုံကို အမေရိကန်သို့ ဆက်လက်ပေးပို့ရန် မသင့်” ဟု ကနေဒါဝန်ကြီးချုပ် မာ့ခ်ကာနီက ယခုလအစောပိုင်းတွင် ပြောကြားခဲ့သည်။

Bloomberg ၏ ဖော်ပြချက်အရ ဒိန်းမတ်နိုင်ငံသည်လည်း အမေရိကန် နှင့် လက်နက်စာချုပ်များ ချုပ်ဆိုရာတွင် နိုင်ငံရေးအရ အခက်အခဲများ ရှိနေကြောင်း ဝါရှင်တန်သို့ ပြောကြားခဲ့သည်။ အထူးသဖြင့် သမ္မတ ထရမ့်က ဒိန်းမတ်နိုင်ငံ၏ လက်အောက်ခံ ဂရင်းလန်းကျွန်းကို အမေရိကန် က သိမ်းပိုက်သင့်သည်ဟု အဆိုပြုခဲ့သည့် ဖြစ်စဉ်ကြောင့် ဖြစ်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က အီရန်အပေါ် စီးပွားရေး ပိတ်ဆို့မှုများ လျှော့ချပေးရန် အစီအစဉ်များကို ရပ်ဆိုင်းလိုက်ကြောင်း ကြေညာခဲ့ပြီး အစ္စရေးနှင့် မကြာသေးမီက ဖြစ်ပွားခဲ့သည့် တင်းမာမှုတွင် အီရန် ခေါင်းဆောင်၏ အနိုင်ရခဲ့သည်ဟု ပြောဆိုမှုကို ဝေဖန်ခဲ့သည်။

အီရန်၏ အမြင့်ဆုံးခေါင်းဆောင်အဖြစ် အာဏာရှိနေသည့် အယာတိုလာ အလီ ခါမေနီက ကြာသပတေးနေ့ (ဇွန် ၂၆) တွင် အီရန်သည် အစ္စရေးနှင့် အမေရိကန်တို့အပေါ် ၁၂ ရက်ကြာ တိုက်ရိုက်စစ်ဆင်ရေး တိုက်ခိုက်မှု များအပြီး အနိုင်ရခဲ့ကြောင်း ကြေညာခဲ့သည်။ အစ္စရေးက အီရန်၏ အဆင့်မြင့်စစ်ဘက်အရာရှိကြီးများကို သုတ်သင်ပြီး ၎င်း၏နျူကလီးယား စက်ရုံများကို ပစ်မှတ်ထားတိုက်ခိုက်ခဲ့ချိန်မှစ၍ တင်းမာမှုများ မြင့်တက် ခဲ့သည်။ ပစ်ခတ်တိုက်ခိုက်မှုများ အပြန်အလှန်ဖြစ်ပွားပြီးနောက် အမေရိကန် က အီရန်၏ ခိုင်ခံ့သော ဖော်ဒိုးစက်ရုံနှင့် အခြားစက်ရုံနေရာနှစ်ခု (နတန်ဇ် နှင့် အစ္စဖာဟန်)ကို ဗုံးကြဲတိုက်ခိုက်ခဲ့သည်။

အစ္စရေး၏ စစ်ဆင်ရေးကို ထောက်ခံခဲ့သည့် ထရမ့်က ၎င်း၏ Truth Social လူမှုကွန်ရက်စာမျက်နှာတွင် ခါမေနီ၏ အနိုင်ရခဲ့ပြီဟူသော ကြေညာချက်ကို မမှန်ကန်သော အလိမ်အညာစကားဟု ပြင်းပြင်းထန်ထန် ငြင်းဆိုခဲ့သည်။

၎င်းက မကြာသေးမီနေ့များအတွင်းက အမေရိကန်၏ ပြင်းထန်သော အရေးယူမှုများ ရုပ်သိမ်းရန် အလားအလာကို လုပ်ဆောင်နေခဲ့ကြောင်း ပြောကြားခဲ့သော်လည်း ခါမေနီ၏ ပြောဆိုချက်များကို သိရှိပြီးနောက် ဆန့်ကျင်ဘက် လုပ်ဆောင်လိုက်ကြောင်း ဖော်ပြခဲ့သည်။

ယခင်က ခါမေနီသည် “လွယ်ကူသော ပစ်မှတ်တစ်ခုဖြစ်သည်” ဟု ပြောဆိုခဲ့ပြီး ထရမ့်က စစ်ပွဲအတွင်း၌ အမြင့်ဆုံးခေါင်းဆောင်၏ တည်နေရာ အတိအကျကို သိရှိခဲ့သော်လည်း ၎င်းကို တိုက်ခိုက်ရန် ခွင့်မပြုခဲ့ကြောင်း ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနှင့် အိန္ဒိယတို့သည် ရုရှားထုတ် S-400 မိုဘိုင်းလ် လေကာဒုံးပစ် စနစ်များ ထောက်ပံ့ရန် ဆွေးနွေးခဲ့ကြောင်း အိန္ဒိယ ကာကွယ်ရေးဝန်ကြီး ဌာနက သောကြာနေ့ (ဇွန် ၂၇) တွင် ထုတ်ပြန်ခဲ့သည်။

တရုတ်နိုင်ငံ Qingdao တွင် ကျင်းပသည့် ရှန်ဟိုင်း ပူးပေါင်း ဆောင်ရွက်ရေး အဖွဲ့ (SCO) ကာကွယ်ရေးဝန်ကြီးများအစည်းအဝေး၏ ဘေးတိုက် အစည်းအဝေး တစ်ခုအဖြစ် အိန္ဒိယကာကွယ်ရေးဝန်ကြီး Rajnath Singh နှင့် ရုရှား ကာကွယ်ရေးဝန်ကြီး Andrey Belousov တို့ ကြာသပတေးနေ့ (ဇွန် ၂၆) က တွေ့ဆုံစဉ် ဆွေးနွေးခဲ့ကြခြင်းဖြစ်သည်။

အိန္ဒိယ ကာကွယ်ရေးဝန်ကြီးဌာနက “အဆိုပါအစည်းအဝေးသည် နှစ်နိုင်ငံ ခေါင်းဆောင်များအကြား မကြာသေးမီက အရေးပါဆုံး တွေ့ဆုံမှုတစ်ခု ဖြစ်ပြီး 'Operation Sindoor' နှင့် နောက်ဆက်တွဲ ကာကွယ်ရေး ထုတ်လုပ်မှု တိုးမြှင့်ရန် အထူးလိုအပ်ချက်များ (ဥပမာ - လေကာစနစ်၊ ဝေဟင်မှ ဝေဟင်ပစ်ဒုံးများ၊ ခေတ်မီစစ်ဆင်ရေးစွမ်းရည်များ နှင့် တိုက် လေယာဉ်နည်းပညာဆိုင်ရာ စနစ်များ အဆင့်မြှင့်တင်ရေး) ကို နောက်ခံ ထား၍ ကျင်းပခဲ့ခြင်းဖြစ်သည်” ဟု ဖော်ပြခဲ့သည်။

ထို့အပြင် “S-400 စနစ်များ ထောက်ပံ့ရေး၊ Su-30 MKI တိုက် လေယာဉ်များ အဆင့်မြှင့်တင်ရေး နှင့် အရေးကြီးသော ကာကွယ်ရေး ပစ္စည်းများ အမြန်ဆုံးဝယ်ယူရေး” တို့သည် အစည်းအဝေး၏ အဓိက ရလဒ်များဖြစ်ကြောင်း ဖော်ပြခဲ့သည်။

"Operation Sindoor" သည် မေလ ၇ ရက်နေ့တွင် အိန္ဒိယက ပါကစ္စတန်ထိန်းချုပ်ထားသော နယ်မြေရှိ အကြမ်းဖက်စခန်းများကို ဝင်ရောက်တိုက်ခိုက်မှုအား အမည်ပေးထားခြင်းဖြစ်သည်။ အိန္ဒိယဘက် က ဧပြီလတွင် ဂျမူး-ကက်ရှ်မီးယား (Jammu-Kashmir) ဒေသတွင် အကြမ်းဖက်တိုက်ခိုက်မှုကြောင့် ခရီးသွား ၂၆ ဦး အပါအဝင် အရပ်သား များ သေဆုံးခဲ့ရသည့်အတွက် ယင်းစစ်ဆင်ရေးကို ပြန်လည် တုံ့ပြန်ခြင်း ဖြစ်ကြောင်း ဆိုသည်။

S-400 စနစ်များသည် အိန္ဒိယ၏ လေကြောင်းအခြေစိုက်စခန်းများနှင့် အခြားစစ်ရေးအဆောက်အအုံများကို ပါကစ္စတန်၏ ပြန်လည် တိုက်ခိုက်မှုမှ ကာကွယ်ရာတွင် အရေးပါသော အခန်းကဏ္ဍမှ ပါဝင်ခဲ့ပြီး အိန္ဒိယ ဝန်ကြီးချုပ် နာရင်ဒရာမိုဒီ က ချီးကျူးခဲ့သည်။

မေလက အိန္ဒိယဝန်ကြီးချုပ် နာရင်ဒရာမိုဒီ က S-400 စနစ်နောက်ခံတွင် တပ်မတော်သားများအား မိန့်ခွန်းပြောကြားရာတွင် “ခိုင်မာသော လုံခြုံရေးအကာအကွယ်စနစ်သည် အိန္ဒိယ၏ အထူးလက္ခဏာတစ်ရပ် ဖြစ်လာပြီ” ဟု ထည့်သွင်းပြောကြားခဲ့သည်။

အိန္ဒိယသည် ၂၀၁၈ ခုနှစ်က ရုရှားထံမှ ဒေါ်လာ ၅.၄၃ ဘီလီယံဖြင့် ဝယ်ယူခဲ့သော S-400 လေကာဒုံးပစ်စနစ် ၅ စုံအနက် ၃ စုံကို ယခုအခါ လက်ခံရရှိပြီးဖြစ်ကာ ကျန်ရှိသော ၂ စုံကို ၂၀၂၆ ခုနှစ်တွင် ပေးပို့ရန် စီစဉ် ထားသည်။

လက်ရှိတွင် အိန္ဒိယစစ်တပ်၏ စစ်ရေးပစ္စည်းများ၏ ၆၀% ခန့်သည် ရုရှားထုတ်ဖြစ်ပြီး၊ အိန္ဒိယသည် ရုရှားနှင့် နှစ်နိုင်ငံစစ်ရေး ပူးပေါင်း ဆောင်ရွက်မှုကို အလေးထားဆောင်ရွက်လျက်ရှိသည်။ The Hindu သတင်းဌာန၏ ဖော်ပြချက်အရ အိန္ဒိယတွင် Sukhoi Su-30MKI လေယာဉ် ၂၅၉ စီး ရှိပြီး ၎င်းတို့အနက် ၈၄ စီးကို ရုရှား၏ အကူအညီဖြင့် အဆင့်မြှင့်တင်ရန် စီစဉ်ထားသည်။

ကြာသပတေးနေ့ (ဇွန် ၂၆) က ကာကွယ်ရေးဝန်ကြီးများ တွေ့ဆုံစဉ် ရုရှားကာကွယ်ရေးဝန်ကြီး Andrey Belousov က “မော်စကိုနှင့်နယူးဒေလီတို့၏ ရေရှည်မိတ်ဖက်ပြုမှုသည် စစ်ရေးနှင့် နည်းပညာဆိုင်ရာ နယ်ပယ်အထိ ကျယ်ပြန့်စွာ ပူးပေါင်းဆောင်ရွက်လျက်ရှိသည်” ဟု အလေးအနက် ပြောကြားခဲ့သည်။

အဆိုပါဆွေးနွေးပွဲသည် နှစ်နိုင်ငံအကြား ကာကွယ်ရေးနှင့် နည်းပညာ ဆိုင်ရာ ပူးပေါင်းဆောင်ရွက်မှုများကို ပိုမိုအားကောင်းစေရန် ရည်ရွယ်သည့် အရေးပါသော အဆင့်တစ်ခုဖြစ်ကြောင်း သုံးသပ်နိုင်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂