နယူးဒေလီ၊ သံတမန်ရေး

အိန္ဒိယနိုင်ငံနှင့်ပါကစ္စတန်နိုင်ငံတို့က သံတမန်များကို အပြန်အလှန်နှင်ထုတ်လိုက်ကြောင်းသိရသည်။ နှင်ထုတ်ခံရသည့်သံတမန်များသည် သူလျှိုလုပ်ငန်း များကိုလုပ်ဆောင်သည်ဟူသော စွပ်စွဲချက်များဖြင့် နှင်ထုတ်ခံရခြင်းဖြစ်သည် ဟု နှစ်နိုင်ငံစလုံးမှတာဝန်ရှိသူများကပြောသည်။

အိန္ဒိယအစိုးရသည် နယူးဒေလီမြို့ရှိပါကစ္စတန်သံရုံးမှ တာဝန်ရှိသူတစ်ဦးကို နှင်ထုတ်လိုက်ကြောင်းနှင့် ၂၄ နာရီအတွင်း နိုင်ငံအတွင်းမှထွက်သွားရန်လည်းတောင်းဆိုလိုက်ကြောင်း ထုတ်ပြန်ထားသည်ဟု အိန္ဒိယသတင်းဌာနတစ်ခုကဖော်ပြထားသည်။

အလားတူ ပါကစ္စတန်အစိုးရကလည်း အစ္စလာမ်မာဘတ်မြို့ရှိ အိန္ဒိယသံရုံးမှ အိန္ဒိယတာဝန်ရှိသူတစ်ဦးကို နှင်ထုတ်လိုက်ပြီး ၂၄ နာရီအတွင်း နိုင်ငံအတွင်းမှ ထွက်သွားရန်တောင်းဆိုထားကြောင်း ပါကစ္စတန်နိုင်ငံခြားရေးဝန်ကြီးဌာနက ထုတ်ပြန်ထားသည်။ နှင်ထုတ်ခံရသူများသည် သက်ဆိုင်ရာနိုင်ငံအတွက် မလိုလားအပ်သူများအဖြစ်လည်း ကြေညာခံလိုက်ရကြောင်းသိရသည်။

Ref: Xinhua

Source: Myawady Daily Newspaper

ဒေလီ    မေ ၁၄

အရူနာချယ်ပရာဒေ့ရှ်ပြည်နယ်အတွင်းရှိနေရာများအား တရုတ်နိုင်ငံက အမည်ပြောင်းလဲမှုကို အိန္ဒိယအစိုးရက ယနေ့တွင် ပယ်ချခဲ့ကြောင်း သိရသည်။

အိန္ဒိယနိုင်ငံအရှေ့မြောက်ပိုင်းပြည်နယ်တစ်ခုဖြစ်သည့် အရူနာချယ်ပရာဒေ့ရှ် ပြည်နယ်သည် တရုတ်နိုင်ငံနှင့် နယ်မြေချင်းထိစပ်နေသည့်ပြည်နယ်ဖြစ်သည်။

သို့ရာတွင် အရူနာချယ်ပရာဒေ့ရှ်ပြည်နယ်ကို တိဗက်တောင်ပိုင်း၏ အစိတ်အပိုင်းအဖြစ် တရုတ်နိုင်ငံက ပိုင်ဆိုင်ခွင့်တောင်းဆိုထားရာ ၎င်းတောင်းဆိုချက်ကို အိန္ဒိယအစိုးရကလည်း ပယ်ချခဲ့သည်။

တရုတ်နိုင်ငံအနေဖြင့် အရူနာချယ်ပရာဒေ့ရှ်ပြည်နယ်အတွင်းရှိ အချို့နေရာများ၏ အမည်များကို ပြင်ဆင်ထားကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ယနေ့တွင် ထုတ်ဖော်ပြောကြားထားသည်။

သို့ရာတွင် တရုတ်နိုင်ငံ၏ အဆိုပါလုပ်ဆောင်ချက်ကို အိန္ဒိယနိုင်ငံခြားရေးဝန်ကြီးဌာနက ပယ်ချခဲ့ပြီး အရူနာချယ်ပရာဒေ့ရှ် ပြည်နယ်မှာ အိန္ဒိယအချုပ်အခြာပိုင်နယ်မြေသာဖြစ်ကြောင်း ပြောကြားခဲ့သည်။

ရှေးယခင်က တရုတ်နိုင်ငံသည် အရူနာချယ်ပရာဒေ့ရှ် ပြည်နယ်အတွင်းရှိ နေရာများကို အမည်များ ပြောင်းလဲပြင်ဆင်ရန် ကြိုးစားခဲ့ဖူးကြောင်း သိရသည်။

Source: ရတနာပုံသတင်းစာ

အမေရိကန်က ယူကရိန်းခေါင်းဆောင် ဇီလန်စကီးအား လာမည့်လတွင် ကျင်းပမည့် NATO ထိပ်သီးအစည်းအဝေးသို့ ဖိတ်ကြားမည့်အစီအစဉ်ကို ကန့်ကွက်နေကြောင်း အီတလီသတင်းဌာန ANSA က အမည်မဖော်လိုသော သံတမန်အရင်းအမြစ်များကို ကိုးကား၍ ဗုဒ္ဓဟူးနေ့ (မေ ၁၄) တွင် ဖော်ပြခဲ့သည်။

ကိယက်ဗ်သည် ကာလကြာမြင့်စွာကတည်းက အမေရိကန်ဦးဆောင်သော စစ်ရေးမဟာမိတ်အဖွဲ့တွင် ပါဝင်ရန် ကြိုးပမ်းနေခဲ့ပြီး ၎င်းကိစ္စကို ရုရှား က ၎င်း၏ အမျိုးသားလုံခြုံရေးအတွက် အခြေခံကျသော ခြိမ်းခြောက်မှု တစ်ရပ်အဖြစ် ရှုမြင်သည်။ ရုရှားသမ္မတ ပူတင်က ယူကရိန်းပဋိပက္ခတွင် မော်စကို၏ အဓိကရည်မှန်းချက်များထဲမှတစ်ခုမှာ ထိုသို့သော အခြေအနေမဖြစ်ပေါ်စေရန် တားဆီးရေးဖြစ်ကြောင်း အကြိမ်ကြိမ် ပြောဆိုခဲ့ သည်။

ဒေါ်နယ်ထရမ့်သည် ဇန်နဝါရီတွင် သမ္မတရာထူးကို ရယူပြီးနောက် အနာဂတ်တွင် ယူကရိန်း NATO အဖွဲ့ဝင်ဖြစ်လာရေးကို အကြိမ်ကြိမ် ပယ်ချခဲ့သည်။

ANSA ၏ သတင်းတွင် “လတ်တလောတွင် ခေါင်းဆောင်အဆင့် NATO-ယူကရိန်း ကောင်စီအစည်းအဝေးကို စီစဉ်ထားခြင်းမရှိသေးသော်လည်း ဆုံးဖြတ်ချက် မချမှတ်ရသေးပါ” ဟု ဖော်ပြထားသည်။ ထို့အပြင် ဇွန် ၂၄-၂၅ ရက်များတွင် ကျင်းပမည့်အစည်းအဝေးအချို့သို့ ကိယက်ဗ်က ပါဝင်နိုင်သော်လည်း နိုင်ငံခြားရေးနှင့် ကာကွယ်ရေးဝန်ကြီးများအဆင့်သာဖြစ်မည်ဟု ဆိုသည်။

လတ်တလော ဖိတ်ကြားခံရသည့် အဖွဲ့ဝင်မဟုတ်သော နိုင်ငံများမှာ ဂျပန်၊ တောင်ကိုရီးယား၊ ဩစတြေးလီးယားနှင့် နယူးဇီလန်တို့ဖြစ်ကြောင်း အီတလီသတင်းဌာနက ဖော်ပြခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားအစိုးရက ယူကရိန်းနှင့်ပြုလုပ်မည့် တိုက်ရိုက်ဆွေးနွေးမှုအတွက် အစ္စတန်ဘူ မြို့သို့ကိုယ်စားလှယ်အဖွဲ့ကိုစေလွှတ်သွားမည်ဖြစ်ကြောင်း၊ ယူကရိန်းဘက်က လည်း အလားတူလုပ်ဆောင်မည်ဟု မျှော်လင့်ကြောင်း ရုရှားသမ္မတရုံးမှ ပြောရေးဆိုခွင့်ရှိသူ ဒီမီထရီပက်စကော့ ကပြောသည်။

ရုရှားသမ္မတ ဗလာဒီမာပူတင်က ယူကရိန်းနှင့်တိုက်ရိုက်ဆွေးနွေးမှုကို မေလ ၁၅ ရက်တွင် တူကီယဲနိုင်ငံ အစ္စတန်ဘူ မြို့၌ပြန်လည်စတင်ရန် အဆိုပြုထား

သော်လည်း ယခုအချိန်အထိ ယူကရိန်း ဘက်က ဆွေးနွေးပွဲသို့ကိုယ်စားလှယ်ကို စေလွှတ်မှုရှိ၊ မရှိနှင့်ပတ်သက်၍ မည်သို့မျှ မထုတ်ပြန်ထားစဉ် ပက်စကော့ကယခု ကဲ့သို့ပြောလာခြင်းဖြစ်သည်။

ပူတင်၏ကမ်းလှမ်းမှုကို အမေရိကန် သမ္မတဒေါ်နယ်ထရမ့်ကကြိုဆိုထားပြီး ယူကရိန်းသမ္မတဇီလန်စကီးက ဆွေးနွေးမှုအတွက် အသင့်ရှိသည်ဟုပြောဆိုထား သော်လည်း ပူတင်နှင့်သာတိုက်ရိုက်ဆွေးနွေးလိုသည်ဟု ထုတ်ပြန်ထားကြောင်း သိရသည်။

Ref: RT

Source: Myawady Daily Newspaper

အမေရိကန်သမ္မတ ဒေါ်နယ်ထရမ့်က ကြာသပတေးနေ့ (မေ ၁၅) တွင် အစ္စတန်ဘူလ်မြို့၌ ကျင်းပမည့် ရုရှား-ယူကရိန်းဆွေးနွေးပွဲမှ အပြုသဘောဆောင်သော တိုးတက်မှုများ ရှိလာမည်ဟု မျှော်လင့်ကြောင်း ပြောကြားခဲ့သည်။ ၂၀၂၂ ခုနှစ်က ယူကရိန်းပဋိပက္ခ စတင်ခဲ့သည့်နောက်ပိုင်း ပထမဆုံးအကြိမ်အဖြစ် နှစ်ဖက်တိုက်ရိုက်ညှိနှိုင်းမှုများ ပြုလုပ်ရန် ပြင်ဆင်နေကြသည်။

လွန်ခဲ့သော သီတင်းပတ်က ရုရှားသမ္မတ ပူတင်က ပဋိပက္ခ၏ အရင်းခံအကြောင်းရင်းများကို ဖြေရှင်းနိုင်မည့် ရေရှည်တည်တံ့သော အဖြေရှာရန် မော်စကိုနှင့် ကိယက်ဗ်အကြား တိုက်ရိုက်ဆွေးနွေးပွဲများ ပြန်လည် စတင်ရန် အဆိုပြုခဲ့သည်။ ယခင်က မော်စကိုနှင့် မည်သည့်ဆွေးနွေးပွဲမျှ မလုပ်ဆောင်ဟု ငြင်းဆိုခဲ့သည့် ယူကရိန်းခေါင်းဆောင် ဇီလန်စကီးကလည်း အစ္စတန်ဘူလ်သို့ သွားရောက်ရန် ဆန္ဒရှိကြောင်း ဖော်ပြခဲ့သည်။

ဇီလန်စကီးက ပူတင်နှင့်သာ တိုက်ရိုက်တွေ့ဆုံဆွေးနွေးလိုသည်ဟု ပြောကြားခဲ့သော်လည်း ရုရှားသမ္မတဘက်မှ တူရကီသို့ သွားရောက်မည့် အစီအစဉ်အပေါ် မည်သည့်အချက်အလက်မျှ ဖော်ပြခြင်း မရှိသေးပေ။

ဗုဒ္ဓဟူးနေ့ (မေ ၁၄) တွင် Qatari Emir Sheikh Tamim bin Hamad Al-Thani နှင့် ဒိုဟာမြို့၌ တွေ့ဆုံစဉ် ထရမ့်က “ဒီနေ့၊ မနက်ဖြန်နှင့် သောကြာနေ့ (မေ ၁၅) မှာ အဲဒီကနေ သတင်းကောင်းတွေ ထွက်လာမည်ဟု မိမိထင်ပါသည်။ ဒါပေမယ့် စောင့်ကြည့်ရမည်” ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားသမ္မတ ဗလာဒီမာပူတင်နှင့် မလေးရှားဝန်ကြီးချုပ် အန်ဝါ အီဘရာဟင် တို့အကြား စေ့စပ်ညှိနှိုင်းမှုများကို ကရင်မလင်နန်းတော်တွင် စတင် ဆွေးနွေးလျက်ရှိပါသည်။

“မလေးရှားသည် မိမိတို့၏ကာလကြာရှည် ယုံကြည်စိတ်ချရပြီး အရေးကြီးသည့် မိတ်ဖက်ဖြစ်ပါသည်” ဟု ရုရှားသမ္မတက အစပိုင်းတွင် မှတ်ချက်ပြုပြောကြားခဲ့ပါသည်။

နှစ်နိုင်ငံ နိုင်ငံရေးနှင့် ကုန်သွယ်ရေး-စီးပွားရေး ပူးပေါင်းဆောင်ရွက်မှုဆိုင်ရာ အဓိကကိစ္စရပ်များကို အသေးစိတ်ဆွေးနွေးရန်နှင့် ရုရှား-မလေးရှား ပူးပေါင်းဆောင်ရွက်မှု ပိုမိုနက်ရှိုင်းစေမည့် ခြေလှမ်းများကို ဆွေးနွေးရန် စီစဉ်ထားကြောင်း သိရှိရပါသည်။

ကိုးကား- ကရင်မလင်

Photo: The Moscow Times

တရုတ်နိုင်ငံက လက်တင်အမေရိကနှင့် ကာရေဘီယံနိုင်ငံ ၅ နိုင်ငံပေါ် ဗီဇာကင်းလွတ်ခွင့်မူဝါဒ ကျင့်သုံးရန် ဆုံးဖြတ်ထားကြောင်း၊ ထို့ပြင် အဆိုပါ မူဝါဒလွှမ်းခြုံသော ဒေသတွင်းနိုင်ငံ အတိုင်းအတာကို အလျဉ်းသင့်သလို တိုးချဲ့သွားမည်ဖြစ်ကြောင်း တရုတ်နိုင်ငံ သမ္မတ ရှီကျင့်ဖျင်က မေ ၁၃ ရက်တွင် ပြောကြားခဲ့သည်။

ရှီကျင့်ဖျင် က ပေကျင်းမြို့၌ ကျင်းပသော တရုတ်-လက်တင်အမေရိကနှင့် ကာရေဘီယံနိုင်ငံများ အသိုက်အဝန်း (CELAC) ဖိုရမ် စတုတ္ထအကြိမ်မြောက် ဝန်ကြီးအဆင့် အစည်းအဝေး ဖွင့်ပွဲအခမ်းအနားသို့ တက်ရောက်၍ အဓိကမိန့်ခွန်း ပြောကြားစဉ်တွင် အထက်ပါအတိုင်း မှတ်ချက်ပြု ပြောကြားခဲ့ခြင်း ဖြစ်ကြောင်း သိရသည်။

ကိုးကား- ဆင်ဟွာ

ရုရှားသမ္မတ ဗလာဒီမာ ပူတင်သည် ရုရှားနိုင်ငံသို့ အလည်အပတ် ရောက်ရှိနေသော မလေးရှားဝန်ကြီးချုပ် အန်ဝါ အီဗရာဟီမ်နှင့် ကရင်မလင်တွင် ကျင်းပသော အစည်းအဝေး၌ တွေ့ဆုံစဉ် မလေးရှားဘုရင် အီဗရာဟီမ် အစ်စကန်ဒါကို ရုရှားသို့ လာရောက်လည်ပတ်ရန် ဖိတ်ကြားပါကြောင်း ပြောကြားလိုက်ပါသည်။

“မိမိအနေဖြင့် တောင်းဆိုစရာရှိပါသည်။ ကျေးဇူးပြု၍ နိုင်ငံတော်အကြီးအကဲ ဆူလတန် အီဗရာဟီမ်ထံ မိမိ၏ အကောင်းဆုံး ဆုမွန်ချီးကျူးစကားကို ပြောကြားပေးပါ၊ မိမိတို့အနေဖြင့် ၎င်းကို ရုရှားသို့ လာရောက် လည်ပတ်ရန် စောင့်မျှော်နေပါသည်” ဟု ပူတင်က မလေးရှား ဝန်ကြီးချုပ်ကို ပြောကြားခဲ့ပါသည်။

မလေးရှားနိုင်ငံသည် ဖက်ဒရယ် ရွေးကောက်တင်မြှောက်သော ဘုရင်စနစ်ဖြင့် အုပ်ချုပ်သည့် နိုင်ငံဖြစ်သည်။ နိုင်ငံတော်အကြီးအကဲဖြစ်သော ဘုရင်ကို နိုင်ငံရှိ ပြည်နယ် (၉) ခုမှ မျိုးရိုးဆက်ခံ အုပ်ချုပ်သူများထဲမှ ငါးနှစ်လျှင် (၁) ကြိမ် ရွေးချယ်တင်မြှောက်လေ့ရှိပါသည်။ ဂျိုဟိုးမှ အီဗရာ ဟီမ် အစ်စကန်ဒါသည် ၂၀၂၄ ခုနှစ်မှစ၍ နိုင်ငံတော်အကြီးအကဲ ဘုရင်အဖြစ် တာဝန်ထမ်းဆောင်လျက်ရှိသည်။

ကိုးကား- TASS

Photo: New Straits Times

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အရှေ့တရုတ်ပင်လယ်တွင်း နှစ်နိုင်ငံအကြား အလယ်မျဉ်းအနီး၌ တည်ဆောက်မှုအသစ်တစ်ခုကို တွေ့ရှိပြီးသည့်နောက် ဂျပန်က တရုတ်ကို ပြင်းပြင်းထန်ထန် ကန့်ကွက်ခဲ့ပါသည်။

တရုတ်သည် အဆိုပါမျဉ်း၏ တရုတ်ဘက်အခြမ်း၌ တည်ဆောက်ရေးလုပ်ငန်းကို စတင်ခဲ့ခြင်းကို အတည်ပြုခဲ့သည်ဟု ဂျပန်နိုင်ငံခြားရေးဝန်ကြီးဌာနက အင်္ဂါနေ့ (မေ ၁၃) တွင် ပြောခဲ့ပါသည်။

ဂျပန်နှင့် တရုတ်အစိုးရတို့သည် အဆိုပါနေရာ၌ သဘာဝဓာတ်ငွေ့သိုက်များကို ပူးတွဲထုတ်လုပ်ရန် ၂၀၀၈ ခုနှစ်တွင် သဘောတူညီခဲ့ကြသော်လည်းသဘောတူညီချက်အတွက် ဆွေးနွေးညှိနှိုင်းမှုများ ရပ်တန့်နေချိန်တွင် တရုတ်နိုင်ငံက ဆောက်လုပ်ရေးလုပ်ငန်းများကို ဆက်လက်လုပ်ဆောင်နေခြင်းဖြစ်သည်။

ဂျပန်နိုင်ငံခြားရေးဝန်ကြီးဌာန၊ အာရှနှင့် အိုးရှင်းနီးယားရေးရာဗျူရို ညွှန်ကြားရေးမှူးချုပ် Kanai Masaaki က တရုတ်၏ တစ်ဖက်သတ်တည်ဆောက်မှုများသည် အလွန်စိတ်ပျက်ဖွယ်ကောင်းသည်ဟု ဂျပန် နိုင်ငံရှိ တရုတ်သံရုံး တာဝန်ရှိသူတစ်ဦးကို ပြောဆိုခဲ့ပါသည်။

၂၀၀၈ ခုနှစ် သဘောတူညီချက်ကိုအခြေခံပြီး တရုတ်အစိုးရအနေဖြင့် စေ့စပ်ညှိနှိုင်းရေးစားပွဲကို အမြန်ပြန်လာရန် မစ္စတာ Kanai က တောင်းဆိုခဲ့ပါသည်။

အဆိုပါအဆောက်အအုံသည် တရုတ်က တည်ဆောက်သည့် ၁၉ ခု မြောက် အဆောက်အအုံ ဖြစ်လာမည်ဟု အဆိုပါဝန်ကြီးဌာနက ပြောပါသည်။

ကိုးကား-NHK World

အမေရိကန်သမ္မတ ဒေါ်နယ်ထရမ့်က ဆီးရီးယားအပေါ် ဒဏ်ခတ်အရေးယူမှုများကို ရုပ်သိမ်းမည်ဟု ကြေညာလိုက်ပြီး ဒမတ်စကပ် အစိုးရအား ဖိအားပေးရန်ရည်ရွယ်ခဲ့သည့် ဆယ်စုနှစ်ကျော်မျှ ကြာမြင့်ခဲ့သော မူဝါဒကို ပြောင်းလဲလိုက်ခြင်းဖြစ်သည်။ ထို့အပြင် ၎င်းက Ahmed al-Sharaa ၏ အသွင်ကူးပြောင်းရေးအစိုးရနှင့်အတူ ဆီးရီးယား၏ တိုးတက်မှု အခွင့်အလမ်းသစ်များ ရှိလာမည်ဟု မျှော်လင့်ကြောင်း ဖြည့်စွက် ပြောကြားခဲ့သည်။

Al-Sharaa သည် အယ်လ်ကိုင်ဒါနှင့် ဆက်နွှယ်နေသော အစ္စလာမ်မစ် အဖွဲ့အစည်း Hayat Tahrir al-Sham (HTS) ၏ ခေါင်းဆောင်အဖြစ် နာမည်ကြီးလာသူဖြစ်ပြီး ယခင်နှစ်က ဆီးရီးယားကို ကာလရှည်ကြာစွာ ဦးဆောင်ခဲ့သူ Bashar Assad အား ဖယ်ရှားခဲ့သည့် အတိုက်အခံအဖွဲ့ များ၏ မဟာမိတ်အဖွဲ့ကို ဦးဆောင်ခဲ့သူဖြစ်သည်။

“နိုင်ငံကို တည်ငြိမ်အောင် ထိန်းသိမ်းနိုင်မည့် အစိုးရအသစ်တစ်ရပ် ပေါ်ထွန်းလာမည်ဟု မျှော်လင့်ရပါသည်” ဟု ထရမ့်က ရီယက်တွင် ကျင်းပသည့် ရင်းနှီးမြှုပ်နှံမှုဖိုရမ်တစ်ခုတွင် ပြောကြားခဲ့သည်။ “၎င်းတို့အား ကြီးကျယ်ခမ်းနားစွာ ရပ်တည်နိုင်ရေး အခွင့်အလမ်းပေးရန်အတွက် ဆီးရီးယားအပေါ် ဒဏ်ခတ်အရေးယူမှုများကို ရပ်ဆိုင်းရန် အမိန့်ပေးမည်” ဟု ၎င်းက ဖြည့်စွက်ပြောကြားခဲ့သည်။

အမေရိကန်သမ္မတသည် ဆော်ဒီအာရေဗျတွင် ဗုဒ္ဓဟူးနေ့(မေ ၁၄)၌ Al-Sharaa နှင့် တွေ့ဆုံရန် အစီအစဉ်ရှိသည်ဟု သတင်းများအရ သိရသည်။ “အမေရိကန်နှင့် ပူးပေါင်းဆောင်ရွက်ရန် အဆင်သင့်ဖြစ်နေပြီဖြစ်ပြီး၊ ၎င်းသည် အပြန်အလှန်လေးစားမှု၊ ယုံကြည်မှုနှင့် အကျိုးစီးပွားမျှဝေမှုတို့အပေါ် အခြေခံထားသည်” ဟု ဆီးရီးယားနိုင်ငံခြားရေးဝန်ကြီး Asaad al-Shibani က Reuters သို့ ပြောကြားခဲ့သည်။ ထရမ့်က “သမိုင်းဝင် ငြိမ်းချမ်းရေးသဘောတူညီချက်နှင့် ဆီးရီးယားရှိ အမေရိကန် အကျိုးစီးပွားအတွက် အောင်ပွဲတစ်ခု” ကို ရရှိနိုင်မည်ဟု ဖြည့်စွက်ပြောကြားခဲ့သည်။

လွန်ခဲ့သည့်သီတင်းပတ်က ပြင်သစ်သမ္မတ Emmanuel Macron နှင့် တွေ့ဆုံရန် ပါရီသို့ သွားရောက်ခဲ့သည့် Al-Sharaa က ဆီးရီးယားအား ၁၅ နှစ် နီးပါးကြာ ပြည်တွင်းစစ်မှ ပြန်လည်ထူထောင်ရာတွင် အဟန့်အတားဖြစ်စေသည့် ဒဏ်ခတ်မှုများကို ဆက်လက်ထိန်းသိမ်းထားရန် “အကြောင်းပြချက်မရှိ” ဟု ပြောကြားခဲ့သည်။

ကိုးကား- RT 

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂