မြောက်ကိုရီးယားရှိ Wonsan Kalma Super Resort တွင် တစ်ပတ်ကြာ အားလပ်ရက်ကုန်ဆုံးပြီးနောက် ရုရှားခရီးသွား Anastasiya Samsonova သည် သဲသောင်ဖြူဖြူ ကမ်းခြေနှင့် အသစ်စက်စက် ဟိုတယ်တို့အပေါ် နှစ်သက်ကျေနပ်မှုကို ဖော်ပြခဲ့သည်။

Anastasiya Samsonova သည် ဇွန်လကုန်ပိုင်းတွင် ဖွင့်လှစ်ခဲ့သော မြောက်ကိုရီးယား၏ ကမ်းခြေ အပန်းဖြေနေရာသစ်ဖြစ်သည့် Wonsan Kalma Super Resort သို့ ရောက်ရှိခဲ့သည့် ပထမဆုံး နိုင်ငံခြားခရီးသွားများထဲမှ တစ်ဦးဖြစ်သည်။

HR နယ်ပယ်တွင် အလုပ်လုပ်ကိုင်နေသော အသက် ၃၃ နှစ်အရွယ် Samsonova က "ကျွန်မတို့အဖွဲ့က မြောက်ကိုရီးယားတွင် ပုံမှန်မဟုတ်သည့် မည်သည့်အရာကိုမှ မမြင်ခဲ့ပါ၊ အန္တရာယ်လည်း မရှိခဲ့ပါ၊ ပွင့်ပွင့်လင်းလင်း ပြောရပါက အားလုံး အရမ်းနှစ်သက်ခဲ့ကြပါသည်" ဟု ပြောကြားခဲ့သည်။

ခရီးသွား ၁၅ ဦးပါဝင်သည့် Samsonova နှင့် အဖွဲ့သားအားလုံးမှာ ရုရှားနိုင်ငံသားများသာ ဖြစ်သည်။ သူမ၏အားလပ်ရက်ဓာတ်ပုံများတွင် သဲဖြူဖြူကမ်းခြေများနှင့် အထပ်မြင့်ဟိုတယ်များကို တွေ့မြင်နိုင်ပြီး Wonsan Kalma သည် လက်ရှိတွင် ရုရှားခရီးသွားများမှအပ အခြားနိုင်ငံခြားသား များအား ဝင်ရောက်ခွင့်မပြုသောကြောင့် လဲလျောင်းသူကင်းမဲ့နေသော နေလှန်းခုံများကို မြင်တွေ့ ရပြီး ခမ်းနားလှသည့်ဧည့်ခန်းမကြီးမှာလည်း လူကင်းမဲ့နေသည်။

"ဟိုတယ်က အသစ်စက်စက်ပါ။ အရာအားလုံး အလှပဆုံးလုပ်ထားပါသည်။ အတွင်းပိုင်းဒီဇိုင်းက ခေတ်မီပြီး အခြေခံအဆောက်အအုံတွေလည်း အဆင့်မှီပါသည်" ဟု Anastasiya က ပြောကြားရင်း အပန်းဖြေကမ်းခြေ၏ လူသူကင်းမဲ့မှုကိုပင် ဂရုမစိုက်နိုင်ခဲ့ပေ။

ထိုင်း သို့မဟုတ် တူရကီကဲ့သို့သော အခြားနေရာများသို့ မသွားရသည့် အကြောင်းရင်းနှင့်ပတ်သက်၍ မေးမြန်းမှုကို "မြောက်ကိုရီးယား၏ လူနေမှုဘဝကို ပိုမိုသိရှိလိုခဲ့ခြင်းကြောင့်" ဟု Anastasiya က ဖြေကြားခဲ့သည်။ "မြောက်ကိုရီးယားမှာ ဘာလုပ်လို့ရတယ်၊ ဘာလုပ်လို့မရဘူး၊ ဘယ်လိုနေထိုင် ရမည်ဆိုသည့် အယူအဆအမှားတွေ အများကြီးရှိသော်လည်း တကယ်တမ်းကျ ကျွန်မတို့ လုံးဝလွတ်လွတ်လပ်လပ်နေခဲ့ရပါသည်" ဟု သူမက ဆိုသည်။

မြောက်ကိုရီးယားနှင့် ရုရှားတို့ ဆက်ဆံရေး ခိုင်မာလာသည်နှင့်အမျှ အိမ်နီးချင်းနိုင်ငံဖြစ်သော   မြောက်ကိုရီးယားသို့ လာရောက်လည်ပတ်သည့် ရုရှားခရီးသွားအရေအတွက်မှာ တဖြည်းဖြည်း တိုးပွား လာနေသည်။ ယခုနှစ်အတွင်း မြောက်ကိုရီးယားတပ်ဖွဲ့များသည် ရုရှား၏ Kursk ဒေသတွင် စစ်ရေး အကူအညီများပေးခဲ့ပြီး ယခုအခါ စီးပွားရေးပူးပေါင်းဆောင်ရွက်မှုများလည်း စတင်လျက် ရှိသည်။ မြောက်ကိုရီးယား၏ ပန်းသီးနှင့် ဘီယာကဲ့သို့သော ကုန်ပစ္စည်းများမှာ ရုရှား၏ အရှေ့ဖျားဒေသ ကုန်စုံဆိုင်များတွင် စတင်ပေါ်ထွက်လာပြီဖြစ်သည်။

လွန်ခဲ့သော တစ်လက မော်စကိုမှ မြို့တော် ပြုံယမ်းသို့ ဆယ်စုနှစ်များအတွင်း ပထမဆုံးအကြိမ် ခရီးသည်တင်လေယာဉ်ခရီးစဉ်ကို စတင်ခဲ့သည်။ Vostok Intur ခရီးသွားအေဂျင်စီ၏ မော်စကိုရုံးမှ ကိုယ်စားလှယ်တစ်ဦးက အနာဂတ်တွင် မြောက်ကိုရီးယားသည် လူကြိုက်များသော ခရီးသွားနေရာ တစ်ခုဖြစ်လာမည်ဟု ယုံကြည်ထားသည်။ လက်ရှိတွင် ယင်းကုမ္ပဏီသည် တစ်ပတ်လျှင် နှစ်ကြိမ် မြောက်ကိုရီးယားခရီးစဉ်များကို စီစဉ်ပေးနေပြီး သွားရောက်လိုသူများအား ရှာဖွေဆွဲဆောင်နေသည်။

"မြောက်ကိုရီးယားသည် အံ့သြဖွယ်ကောင်းသည့်နိုင်ငံပါ။ ကမ္ဘာပေါ်မှာ မည်သည့်နေရာနှင့်မျှမတူပါ။ ထိုနိုင်ငံရှိ လမ်းပေါ်တွင် ကြော်ငြာဆိုင်းဘုတ်တစ်ခုတောင်မတွေ့ရပါ။ ပြီးတော့ အရမ်းသန့်ရှင်း ပါသည်။ လမ်းတွေကိုတောင် ဆေးကြောထားပါသည်" ဟု Vostok Intur ၏ ဒါရိုက်တာ Irina Kobeleva က စိတ်အား ထက်သန်စွာပြောကြားခဲ့သည်။ 

Kobeleva သည် မြောက်ကိုရီးယား၏ လှပသောဓာတ်ပုံများ ၊ ဆွဲဆောင်မှုရှိသော ခရီးစဉ်များ ၊ ဂေါက်ကွင်းများနှင့် နှင်းလျှောစီးစခန်းများပါဝင်သည့် လက်ကမ်းကြော်ငြာများစွာကို ဖန်တီးခဲ့သည်။ သူမက ကုမ္ပဏီ၏ခရီးစဉ်များသည် တစ်လလျှင် ကြိုတင်မှာယူမှု ၄၀၀ အထိ တိုးတက်လာနေ ကြောင်း အတည်ပြုခဲ့သည်။

"ကျွန်မတို့ခရီးသွားတွေထဲမှာ အဓိကအနေဖြင့် ၎င်းတို့ငယ်ဘဝက ဆိုဗီယက်ခေတ်ကို ပြန်သွားချင်သည့် အသက်ကြီးသည့်သူများပါ။ အကြောင်းမှာ မြောက်ကိုရီးယားသည် အမှန်ပင် ဆိုဗီယက် ယူနီယံခေတ်နှင့် တူနေပါသည်။ ထို့အပြင် လူငယ်တွေကလည်း စူးစမ်းချင်စိတ်ရှိပြီး မြောက်ကိုရီးယား နိုင်ငံကို လာချင်ကြပါသည်" ဟု သူမက ဖြည့်စွက်ပြောကြားခဲ့သည်။

ကမ္ဘာတစ်ဝှမ်း ခရီးစဉ်များစွာသွားခဲ့ဖူးသော လူငယ်ခရီးသွား ဘလော့ဂါ Pavel အတွက်မူ မြောက်ကိုရီးယားသည် ၎င်း၏ ၈၉ ခုမြောက် ခရီးသွားနိုင်ငံ ဖြစ်လာမည်ဖြစ်သည်။ "ထိုနိုင်ငံက ကျွန်တော်တို့အတွက် တံခါးဖွင့်ပေးထားပါသည်။ ထို့ကြောင့် အခွင့်အရေးကို အသုံးချမည်" ဟု ၎င်းက ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီးဌာန-၂

ကရင်ပြည်နယ်တွင် ခရီးသွားပြည်သူများအကြား ရေပန်းစားနေသည့် ဘားအံခရီးစဉ်ဒေသသည် သဘာ၀အလှတရားများနှင့် စိမ်းစိုနေသဖြင့် လာရောက်လည်ပတ်သူများ ပြားလျက်ရှိကြောင်း ဒေသခံများ၏ ပြောပြချက်အရ သိရသည်။

” မိုးတွင်းဆိုရင် ဘားအံဒေသက လည်လို့အကောင်းဆုံးပဲ။ မိုးရာသီဆို လာတဲ့သူများတယ်။ ခရီးသွားဧည့်သည်တွေအဝင်များတော့ ဒေသခံတွေအတွက်လည်း ဝင်ငွေရတာပေါ့။ ပြည်တွင်းခရီးသွားက ပိုများပါတယ်” ဟု ဘားအံရှိ ဒေသခံတစ်ဦးကဘပေါ်ပြူလာနယူးစ်သို့ ပြောသည်။

ဘားအံဒေသသို့ လာရောက်လည်ပတ်ပါက သံလွင်မြစ်ဘေးရှိ ရွှေရင်မျှော် စေတီ၊ ဘားအံမြို့ထဲရှိ ကန်သာယာ ရေကန်ကြီး၊ ဘားအံမြို့ တောင်ဘက် (၇) မိုင်ခန့်တွင် ပင်လယ်ရေမျက်နှာပြင် အထက် အမြင့်ပေ (၃,၂၇၂) ပေရှိ ဇွဲကပင်တောင်၊ ဘားအံမြို့ တောင်ဘက် (၇) မိုင်ရှိ ကျောက်ကလပ်စေတီ၊ ဘုရင့်ညီဂူ နှင့် ရေပူစမ်းရှိကြောင်း သိရသည်။

Popular Myanmar

ဧရာဝတီတိုင်းဒေသကြီး၊ ငပုတောမြို့နယ် ဟိုင်းကြီးကျွန်းမြို့၊ တင်းချောင်းကျေးရွာအနီးရှိ ငွေတောင်ကမ်းခြေသို့ ပြီးခဲ့သည့် ဧပြီလအတွင်းက ခရီးသွားဧည့်သည် (၃၇,၅၆၆) ဦးအထိ လာရောက်လည်ပတ်ခဲ့ကြောင်း ငပုတောမြို့နယ် ခရီးသွားလုပ်ငန်းအသင်းမှ သိရသည်။

ပြီးခဲ့သည့် မတ်လက ခရီးသွားဧည့်သည် (၁၆,၁၅၅) ဦးသာ လာရောက်လည်ပတ်ခဲ့ပြီး ဧပြီလ (၁) ရက်မှ (၃၀)ရက်ထိ တစ်လတာကာလအတွင်းမှာ ခရီးသွားဧည့်သည် (၃၇,၅၆၆) ဦးအထိ လာရောက်လည် ပတ်ခဲ့ကြောင်း သိရသည်။

လာရောက်လည်ပတ်အပန်းဖြေသည့် ခရီးသွားဧည့်သည်များတွင် ရန်ကုန်တိုင်းဒေသကြီးက အများဆုံးဖြစ်ပြီး ကမ်းခြေသို့လာရောက်အပန်းဖြေသည့် ခရီးသွား ဧည့်သည်များအနေဖြင့် ခရီးစဉ်အဆင်ပြေစေရန်၊ သန့်ရှင်းမှုရရှိစေရန်၊ စနစ်တကျအနားယူနိုင်ရန်၊ လုံခြုံရေးနှင့်စည်းကမ်းထိန်းသိမ်းရေး စသည့် လုပ်ငန်းများကို ခရီးသွားလုပ်ငန်းရှင်များ၊ သက်ဆိုင်ရာတာဝန်ရှိသူများ၊ ဒေသခံများက ပူးပေါင်းဆောင်ရွက်ပေးလျက်ရှိကြောင်း သိရသည်။

Source: Popular Myanmar

ကျိုက်ထီးရိုး စေတီတော်မြတ်ကြီးသို့ ၂၀၂၄ ခုနှစ်၊ အောက်တိုဘာလမှ ၂၀၂၅ ခုနှစ်၊ မေလ (၁၉)ရက်အထိ ပြည်တွင်းပြည်ပခရီးသွားဧည့်သည် (၁,၁၇၀,၀၀၀)ကျော်ဝင်ရောက်ခဲ့ကြောင်း စေတီတော်ဘဏ္ဍာတော်ထိန်း ဂေါပကအဖွဲ့ထံမှ သိရသည်။

ဆံတော်ရှင် ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်ကို သီတင်းကျွတ်လပြည့်နေ့မှ ကဆုန်လပြည့်နေ့အထိ ကျင်းပရာ အနယ်နယ်အရပ်ရပ်မှ ဘုရားဖူးပြည်သူများ စည်ကားသိုက်မြိုက်စွာဖြင့် နေ့စဉ်လာရောက်ဖူးမြော်ခဲ့ကြပြီး ပြီးခဲ့သည့် ၂၀၂၄ ခုနှစ် ဒီဇင်ဘာလတွင် လာရောက်သူအများဆုံးဖြစ်ကြောင်း သိရသည်။

ဘုရားဖူးလာရောက်ကြသည့် ပြည်သူများ၊ အန္တရာယ်ကင်းဝေးစေရန်နှင့် စိတ်ချမ်းမြေ့စွာ ဘုရားဖူးမြော်နိုင်ရန်အတွက် စေတီတော် ဘဏ္ဍာတော်ထိန်းဂေါပကအဖွဲ့နှင့် တာဝန်ရှိသူများက လုံခြုံရေး၊ အခမဲ့တည်းခိုနေထိုင်ရေး၊ စားသောက်ရေးနှင့် ကျန်းမာရေးစောင့်ရှောက်မှုများကို ကြပ်မတ်ဆောင်ရွက်ပေးလျက်ရှိကာ တောင်တက် မော်တော်ယာဉ်အစီးရေ (၁၅၀) ကိုလည်း နေ့စဉ်ပြေးဆွဲပေးနေကြောင်း သိရသည်။

ကျိုက်ထီးရိုး‌ တောင်တော်တလျှောက် အထင်ကရနေရာများဖြစ်သည့် မုဆိုးတောင်တော်၊ ကျီးကန်းပါးစပ် လိုဏ်ဂူတော်၊ ကျောက်ထပ်ကြီး စေတီတော်၊ ရေတံခွန် စသည့်နေရာများ၊ ရင်ပြင်တော် ဈေးဆိုင်တန်းတစ်လျှောက်ရှိ ထမင်းဆိုင်များ၊ အမှတ်တရအရောင်းဆိုင်များ၌ ဘုရားဖူးများဖြင့် စည်ကားလျက်ရှိကြောင်းလည်း သိရသည်။

Source: Popular Myanmar

ကော့သောင်းခရိုင်အတွင်းမှ ဝါးအလယ်ကျွန်းသဘာဝအခြေခံအပန်းဖြေစခန်းသည် ကုန်းနေရေနေသယံဇာတကြွယ်ဝပြီး သဘာဝအလှများစွာမပျက်စီးဘဲ တည်ရှိမှုကြောင့် ပြည်တွင်းခရီးသွားများသာမက ပြည်ပခရီးသွားများပါ လာရောက်အပန်းဖြေလေ့လာကြသည့်   ခရီးစဉ်ဒေသတစ်ခုဖြစ်သည်။         

လန်ပိအဏ္ဏဝါအမျိုးသားဥယျာဉ်အတွင်း ဧရိယာ ၁၀၀ ဒသမ ၁၅ ဧကအကျယ်တွင် ဝါးအလယ်ကျွန်းအပန်းဖြေစခန်းကို ဖွင့်လှစ်ထားရှိပြီး  ရုက္ခ၊ ဇီဝနှင့် အဏ္ဏဝါဆိုင်ရာသဘာဝ ကုန်းနေ/ ရေနေ တောရိုင်းတိရစ္ဆာန်များ ရှင်သန်ကြွယ်ဝခြင်း၊ ဆလုံတိုင်းရင်းသားတို့၏  လူမှုဘဝကို အနီးကပ်လေ့လာနိုင်ခြင်းနှင့် သဘာဝအခြေခံခရီးသွားအရင်းအမြစ်များစွာ   တည်ရှိနေခြင်းတို့ကြောင့် ပြည်တွင်းပြည်ပခရီးသွားများ  စိတ်ဝင်တစား လာရောက်လည်ပတ်လျက်ရှိသည်။

“မနှစ်က ဝါးအလယ်ကျွန်းကို ခရီးသွားရာသီမှာ ခရီးသွား ၂၀၀ ကျော်ဝင်တယ်၊ အခန်းမလောက်လို့ ပြန်သွားရတာတွေရှိတယ်။ အရင်နှစ်နဲ့စာရင် ဒီနှစ်မှာ ခရီးသွားနည်းပေမယ့် ခရီးသွားဧည့်သည် လုံးဝပြတ်သွားတာမျိုးတော့မရှိပါဘူး။  ပြည်ပခရီးသွားအနေနဲ့ အမေရိကန်၊ ရုရှား၊ ဗြိတိန်၊ အီတလီ၊ ထိုင်း၊ ဖီလစ်ပိုင် နိုင်ငံတွေက လာကြတာများတယ်။ တခြားနိုင်ငံ တွေကလည်း လာရောက်ကြပါတယ်။ ဝါးအလယ်ကျွန်းရဲ့ ထူးခြားချက်က ကုန်းနေ/ရေနေ သယံဇာတ ကြွယ်ဝတာ၊  သဘာဝအတိုင်းပြုပြင်မထားဘဲတည်ရှိနေတာတွေပါ။ ဒီလို သဘာဝ အတိုင်း လှပတဲ့အတွက်  ပြည်ပခရီးသွားတွေက နှစ်သက်ကြတယ်။”ဟု လန်ပိအဏ္ဏဝါ အမျိုး သားဥယျာဉ် အုပ်ချုပ်ရေးမှူး ဦးကြည်ဦးက ပြောသည်။

ဝါးအလယ်ကျွန်းသဘာဝအခြေခံအပန်းဖြေစခန်းသို့ သင်္ကြန်ကာလတွင်လည်းပြည်တွင်းပြည်ပခရီးသွားဝင်ရောက်မှုများကြောင်း အဆိုပါ အပန်းဖြေစခန်းမှ သိရသည်။

ဝါးအလယ်ကျွန်းသို့ ပြည်တွင်း၊ ပြည်ပခရီးသွားများ လာရောက်လည်ပတ်ပါက ရေအောက်သန္တာကျောက်တန်းများအလှကို ကြည့်ရှုခြင်း၊ လှိုင်းစီးခြင်း၊ ကယက်လှေစီးခြင်း၊ ဒီရေတောနှင့်အမြဲစိမ်းတောအလှကို ကြည့်ရှုခြင်း၊ ရေနေ/ကုန်းနေသတ္တဝါများ၊ ရှားပါးအပင်များနှင့် ပင်လယ်လိပ်များကို ကြည့်ရှုခြင်း၊ အဏ္ဏဝါအလှနှင့် နေဝင်ဆည်းဆာသဘာဝအလှကို ကြည့်ရှုခံစားခြင်းနှင့် အေးချမ်းလှပသည့် ပင်လယ်ပြင်နှင့် ကျွန်း၏ သဘာဝအလှကို ကြည့်ရှုလေ့လာခြင်းတို့  ဆောင်ရွက်ကြလေ့ရှိကြောင်း သိရသည်။

သစ္စာ(MNA)၊ ဓာတ်ပုံ - လန်ပိ အဏ္ဏဝါအမျိုးသားဥယျာဉ်     

Source: https://myawady.net.mm/

မိုင်းရှူးမြို့နယ်ရှိ ဟိုက်ပါရေတံခွန်သည် သွားရောက်လည်ပတ်သင့်သော ခရီးစဉ်တစ်ခုဖြစ်ကြောင်း ဟိုတယ်နှင့်ခရီးသွားလာ‌ရေးဝန်ကြီးဌာနက ဇန်နဝါရီလ ၂၁ ရက်တွင် အသိပေးထားခြင်းဖြစ်သည်။

မြန်မာနိုင်ငံတွင် ရိုးရာယဉ်ကျေးမှုအမွေအနှစ်များ၊ သဘာဝအတိုင်း မပျက်စီးသေးဘဲ ရေမြေတောတောင်သဘာဝအလှအပများဖြင့် ခရီးသွားများအတွက် ဆွဲဆောင်မှုရှိသော ကမ္ဘာက အသိအမှတ်ပြုသည့် ခရီးစဉ်ဒေသများစွာရှိကြောင်း သိရသည်။

ကမ္ဘာပေါ်တွင် နာမည်ကျော်ကြားလူသိများသော ရေတံခွန်များနှင့်အပြိုင် လှပနေသည့် မိုင်းရှူးမြို့နယ်ရှိ ဟိုက်ပါရေတံခွန်သည် အရှေ့တောင်အာရှတွင် အလှပဆုံးဟု တင်စားခေါ်ဝေါ်ကြပြီး ခရီးသွားပြည်သူများအနေဖြင့် စိတ်ချမ်းမြေ့ကြည်နူးစွာ သွားရောက်လည်ပတ်သင့်သော ခရီးစဉ်ဒေသတစ်ခုဖြစ်ကြောင်း ဝန်ကြီးဌာနကဆိုသည်။

သွားရောက်လည်ပတ်လိုသူများအနေဖြင့် ရှမ်းပြည်နယ် (တောင်ပိုင်း)၊ မိုင်းရှူးမြို့နယ်ရှိ ဟိုက်ပါရေတံခွန်သို့ နမ့်စန်မြို့တွင် ညအိပ်ရပ်နား၍ နေ့ချင်းပြန်သွားရောက်လည်ပတ်နိုင်ပါကြောင်း ဟိုတယ်နှင့်ခရီးသွားလာရေးဝန်ကြီးဌာနက အသိပေးထုတ်ပြန်ထားသည်။

ကိုးကား-NP News

ပြင်ဦးလွင်မြို့ အမျိုးသားကန်တော်ကြီးဥယျာဉ် နှစ် (၁၀၀) ပြည့် အထိမ်းအမှတ် (၁၇) ကြိမ်မြောက် ပန်းပွဲတော်ကို ရက်တိုးဖွင့်လှစ်ထားကြောင်း နိုင်ငံတော်စီမံအုပ်ချုပ်ရေး ကောင်စီ၏ သတင်းထုတ်ပြန်ချက်အရသိရသည်။

အဆိုပါ ပန်းပွဲတော်ကို ၂၀၂၄ ခုနှစ်၊ ဒီဇင်ဘာလ ၁၄ ရက်မှ ၂၀၂၅ ခုနှစ်၊ ဇန်နဝါရီလ ၁၂ ရက်၊နံနက် (၈) နာရီမှ ညနေ (၅) နာရီအထိ ကျင်းပရန်သတ်မှတ်ခဲ့ရာမှ လာမည့် ဇန်နဝါရီလ ၁၉ ရက်အထိ ထပ်မံတိုးမြှင့် ဖွင့်လှစ်ပေးထားခြင်းဖြစ်ကြောင်းသိရသည်။

အမျိုးသားကန်တော်ကြီးဥယျာဉ် နှစ် (၁၀၀) ပြည့် အထိမ်းအမှတ် (၁၇) ကြိမ်မြောက် ပန်းပွဲတော်တွင် ဆန်းသစ်သည့် မြေယာရှုခင်းပုံစံများ၊ပြည်တွင်းပြည်ပ ပန်းမျိုးစိတ်မျိုးစုံ၊ ဒေသပန်းမျိုးများ ပြသသည့် ဇုန်တစ်ဇုန်အပါအဝင် ဇုန်ရှစ်ဇုန်ပါဝင်၍ ရာသီပန်းမျိုးစိတ် ၂၅ မျိုးခန့်၊ ဒေသပန်းမျိုးစိတ်မျိုး ၂၀ ခန့် စုစုပေါင်း ပန်းပင်နှစ်သိန်းကျော် စိုက်ပျိုးပြသထားကြောင်း သိရ သည်။

ထို့အပြင် ဖျော်ဖြေရေးအစီအစဉ်များ၊ ဈေးရောင်းပွဲတော်၊ ဒေသထွက်ကုန်ပြခန်းများနှင့်ဆိုင်ခန်းများဖြင့် ရောင်းချ ပေးသည့်အစီအစဉ်များ၊ အမျိုးသားကန်တော်ကြီးဥယျာဉ်နှစ် (၁၀၀) ပြည့်အထိမ်းအမှတ် (၁၇) ကြိမ်မြောက် ပန်းပွဲတော်၊ ပွဲကောက်ရေတံခွန် အပန်းဖြေစခန်းနှင့် အထင်ကရနေရာများသို့ အနယ်နယ်အရပ်ရပ်မှ လာရောက်လည်ပတ်အပန်းဖြေအနားယူသူများဖြင့် အထူး စည်ကားလျက်ရှိကြောင်း နိုင်ငံတော်စီမံအုပ်ချုပ်ရေးကောင်စီ၏ ထုတ်ပြန်ချက်အရသိရှိရသည်။

ကိုးကား-NP News

ကျိုက်ထို   ဒီဇင်ဘာ ၂၅

မွန်ပြည်နယ် ကျိုက်ထိုမြို့နယ်ရှိ ဆံတော်ရှင်ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်ကို သီတင်းကျွတ်လပြည့်နေ့မှ ကဆုန်လပြည့်နေအထိ ကျင်းပလျက်ရှိရာ အနယ်နယ်အရပ်မှ ဘုရားဖူးပြည်သူများစည်ကားသိုက်မြိုက်စွာဖြင့် နေ့စဉ်လာရောက်ဖူးမြော်နေကြပြီး ယခု(ဒီဇင်ဘာလ)တွင် လာရောက်ဖူးမြော်သူ ၂၂၈၉၂၉ ဦးရှိကြောင်း စေတီတော် ဘဏ္ဍာတော်ထိန်းဂေါပကအဖွဲ့ထံမှ သိရသည်။

“သီတင်းကျွတ်လပြည့်နေ့ အောက်တိုဘာ ၁၇ ရက်ကနေ ဒီဇင်ဘာ ၂၄ ရက်အထိ ဘုရားဖူး ၄၉၉၁၄၅ ဦးရှိပြီး ပြည်တွင်းဘုရားဖူး ၄၉၇၂၃၀ နဲ့ ပြည်ပဘုရားဖူးက ၁၉၁၅ ဦးရှိပါတယ်။ နိုင်ငံခြားသားပြည်ပဘုရားဖူးတွေထဲမှာ ထိုင်းနိုင်ငံနဲ့ ဗီယက်နမ်က အများဆုံးပါပဲ။ အခုလို စနေ၊ တနင်္ဂနွေနဲ့ အများပြည်သူအလုပ်ပိတ်ရက်တွေမှာ အများဆုံးလာကြပါတယ်” ဟု ဂေါပကအဖွဲ့တာဝန်ရှိသူက ပြောသည်။

ကျိုက်ထီးရိုးစေတီတော်မြတ်ကြီးသို့ ဘုရားဖူးလာရောက်ကြသည့် ပြည်သူများ၊ အန္တရာယ်ကင်းဝေးစေရန်နှင့် စိတ်ချမ်းမြေ့စွာ ဘုရားဖူးမြော်နိုင်ရန်အတွက် စေတီတော်ဘဏ္ဍာတော်ထိန်း ဂေါပကအဖွဲ့နှင့် တာဝန်ရှိသူများက လုံခြုံရေး၊ အခမဲ့တည်းခိုနေထိုင်ရေး၊ စားသောက်ရေးနှင့် ကျန်းမာရေးစောင့်ရှောက်မှုများကို ကြပ်မတ်ဆောင်ရွက်ပေးလျက်ရှိကြောင်းနှင့် တောင်တက်မော်တော်ယာဉ် အစီး ၁၅၀ ကိုနေ့စဉ်ပြေးဆွဲပေးနေပြီး သတ်မှတ်လူဦးရေနှင့် ယာဉ်စီးနင်းခများကိုလည်း သတ်မှတ်နှုန်းထားဖြင့် အလွယ်တကူ လိုက်ပါစီးနင်းနိုင်ရန် စီမံထားကြောင်း သိရသည်။

ဘုရားဖူးပြည်သူများ စည်ကားများပြားသည့်အတွက် ကျိုက်ထီးရိုးတောင်တော်တစ်လျှောက် အထင်ကရနေရာများဖြစ်သည့် မုဆိုးတောင်တော်၊ ကျီးကန်းပါးစပ်လိုဏ်ဂူတော်၊ ကျောက်ထပ်ကြီးစေတီတော်၊ ရေတံခွန် စသည့်နေရာများ၊ ရင်ပြင်တော်ဈေးဆိုင်တန်းတစ်လျှောက်ရှိ ထမင်းဆိုင်များ အမှတ်တရ အရောင်းဆိုင်များ၌ ဘုရားဖူးများဖြင့် စည်ကားနေသည့်အပြင် အခမဲ့နှင့် အခပေးတည်းခိုဆောင်များ၊ ရင်ပြင်တော်၌လည်း တည်းခိုနေထိုင်သူများပြားလျက်ရှိကြောင်း တွေ့ရသည်။

ကျိုက်ထို(ပြန်/ဆက်)

Source: မြန်မာ့အလင်း

လာမည့်ခရီးသွားရာသီတွင် ပုဂံယဉ်ကျေးမှုနယ်မြေသို့ ပြည်ပခရီးသွား ပိုမိုဝင်ရောက်မည်ဟု ခန့်မှန်းထားကြောင်း ဟိုတယ်နှင့်ခရီးသွားညွှန်ကြားမှုဦးစီးဌာန (ပုဂံရုံးခွဲ) မှ သိရသည်။

“ပုဂံကို ပြည်ပခရီးသွား ၁၀၀၀၀ နီးပါး ၂၀၂၃ ခုနှစ်မှာ စက်တင်ဘာလအထိ ဝင်ရောက်ခဲ့တယ်။ ကာလတူနှိုင်းယှဉ်ရင် ၂၀၂၄ ခုနှစ်မှာ ၁၀၀၀၀ ကျော်အထိ ရှိခဲ့ပါတယ်။ ပြီးခဲ့တဲ့ သီတင်းကျွတ်ပွဲတော်ကာလမှာလည်း ပြည်တွင်းပြည်ပခရီးသွားတွေ လာရောက်မှုများခဲ့တယ်။ ဒါကြောင့် လာမယ့်ခရီးသွားကာလမှာ ပုဂံယဉ်ကျေးမှုနယ်မြေကို ပြည်ပခရီးသွား ပိုမိုဝင်ရောက်မယ်လို့ ခန့်မှန်းထားပါတယ်။ ပုဂံဒေသဟာ ပြည်တွင်းခရီးသွားသာမက ပြည်ပခရီးသွားတွေ နှစ်ခြိုက်တဲ့ မြန်မာနိုင်ငံရဲ့ ယဉ်ကျေးမှုအမွေအနှစ်ဒေသမို့ လာရောက်လည်ပတ်ဖို့ နွေးထွေးစွာ ဖိတ်ခေါ်ပါတယ်” ဟု ဟိုတယ်နှင့်ခရီးသွားညွှန်ကြားမှုဦးစီးဌာန (ပုဂံရုံးခွဲ) မှ ဒုတိယညွှန်ကြားရေးမှူး ဦးဝင်းအောင်က ပြောသည်။

ပုဂံရှေးဟောင်းယဉ်ကျေးမှုနယ်မြေသည် ကမ္ဘာတွင် ထင်ရှားသည့် ရှေးဟောင်းယဉ်ကျေးမှုအမွေအနှစ်များ ပေါကြွယ်ဝသောနေရာတစ်ခုဖြစ်သည့်အတွက် နှစ်စဉ် ပြည်တွင်း၊ ပြည်ပခရီးသွားများ လာရောက် လည်ပတ်လျက်ရှိပြီး ဒေသရှိ ယဉ်ကျေးမှုအမွေအနှစ်များ ရေရှည်တည်တံ့ရေးအတွက် ရှေးဟောင်းရေကန်များနှင့် ဘုရား၊ စေတီ၊ ပုထိုးများ ပြုပြင်ထိန်းသိမ်းခြင်းလုပ်ငန်းကို စဉ်ဆက် မပြတ်ဆောင်ရွက် လျက်ရှိသည်။

ခရီးသွားအေဂျင်စီများသည် ပုဂံခရီးစဉ်အတွက် ပြည်ပခရီးသွားများအား ဝန်ဆောင်မှုပေးရာတွင် ပုပ္ပားတောင်နှင့် ပုပ္ပားတောင်အမျိုးသားဘူမိဥယျာဉ်တို့ကိုပါ တစ်ဆက်တည်း ဝင်ရောက်လည်ပတ်သော ခရီးစဉ်ဒေသများအဖြစ် ဝန်ဆောင်မှုပေးလျက်ရှိကြောင်း သိရသည်။

ပြီးခဲ့သည့် သီတင်းကျွတ်ကာလတွင် ပုဂံနှင့်ပုပ္ပားသို့ ခရီးသွားဝင်ရောက်မှုများပြားခဲ့ပြီး လာမည့်တန်ဆောင်တိုင်ပွဲတော်ကာလတွင်လည်း ခရီးသွားဝင်ရောက်မှု များပြားနိုင်သည့်အတွက် ဒေသရှိ ဟိုတယ်၊ တည်းခိုခန်း၊ ဒေသထွက်ကုန်၊ အစားအသောက်နှင့် ခရီးသွားဝန်ဆောင်မှုလုပ်ငန်းများသည် ကြိုတင်ပြင်ဆင်မှုများ ဆောင်ရွက်လျက်ရှိကြောင်း သိရသည်။

“သီတင်းကျွတ်ပွဲတော်ကာလ ပိတ်ရက်တွေမှာ ဟိုတယ်အခန်းအားလုံးပြည့်တဲ့အထိ ခရီးသွားများ ခဲ့ပါတယ်။ လာမယ့်တန်ဆောင်တိုင်ပွဲတော်ကာလပိတ်ရက်အတွက် အခန်းကြိုတင်စာရင်းပေးတာလည်း ပြည့်နေပါပြီ။ ကျွန်တော်တို့ဆီမှာ ပြည့်နေတဲ့အတွက် တခြားဟိုတယ်တွေကို လွှဲပြောင်းပေးရတာ ရှိပါတယ်။ ပုဂံဒေသဟာ ခရီးသွားအကြိုက် ဒေသတစ်ခုဖြစ်တဲ့အတွက် ခရီးသွားအားလုံးကို ဝန်ဆောင်မှုကောင်းတွေနဲ့ စောင့်ကြိုနေပါတယ်” ဟု ပုဂံဟိုတယ်မှ တာဝန်ရှိသူတစ်ဦးက ပြောသည်။

ညိမ်းသူ(သတင်းစဉ်)၊ ဓာတ်ပုံ - ကနူး 

Source- မြန်မာ့အလင်း