ဟနွိုင်း ဇူလိုင် ၁၄
ဗီယက်နမ်နိုင်ငံသည် ရုပ်ကြွင်း လောင်စာသုံးမော်တော်ဆိုင်ကယ် များ ဟနွိုင်းမြို့လယ်၌ စီးနင်းခွင့် ကို ၂၀၂၆ ခုနှစ် ဇူလိုင်လတွင် စတင်ပိတ်ပင်မည် ဖြစ်ကြောင်း နိုင်ငံပိုင်မီဒီယာများက ယနေ့တွင် သတင်းထုတ်ပြန်ထားသည်။

လေထုညစ်ညမ်းမှုပြဿနာ လျှော့ချရေး ပြည်လုံးကျွတ် လှုပ်ရှားမှုအစီအစဉ်အရ ရုပ်ကြွင်းလောင်စာသုံးမော်တော်ဆိုင်ကယ်များ ဟနွိုင်းမြို့လယ်၌ မောင်းနှင် ခွင့်ကိုပိတ်ပင်ရန် ဗီယက်နမ်နိုင်ငံ က စီစဉ်ထားခြင်းဖြစ်သည်။
ဟနွိုင်းမြို့လယ်ပိုင်း၌ ရုပ်ကြွင်း လောင်စာသုံးမော်တော်ဆိုင်ကယ် များစီးနင်းမှုကို ပိတ်ပင်ရန် ဗီယက်နမ်ဝန်ကြီးချုပ် ဖမ်မင်ချင်း က ညွှန်ကြားထားခြင်းဖြစ်သည်။ ကျန်သည့်ဗီယက်နမ်မြို့များ ကဲ့သို့ပင် ဟနွိုင်းမြို့သူ၊ မြို့သား ရှစ်သန်းတို့အတွက် မော်တော် ဆိုင်ကယ်များသည် အဓိက သယ်ယူပို့ဆောင်ရေး ယာဉ်များ ဖြစ်ကြသည်။

ဟနွိုင်းမြို့၌ မော်တော်ယာဉ် အစီးရေမှာ တစ်သန်းကျော်မျှသာ ရှိပြီး မော်တော်ဆိုင်ကယ်အစီးရေ မှာ ခုနစ်သန်းနီးပါးရှိသည်။

ဗီယက်နမ်နိုင်ငံသည် လေထု ညစ်ညမ်းမှုပြဿနာကို လျှော့ချ ရေးအတွက် ရုပ်ကြွင်းလောင်စာ သုံးယာဉ်များကို လျှပ်စစ်စွမ်းအင် သုံးယာဉ်များဖြင့် အစားထိုးရန် ဆန္ဒရှိနေကြောင်း သိရသည်။

Ref: Xinhua

Trs: KKO

YDNB Newspaper
Photo- SCMP

တရုတ်နိုင်ငံက ပေကျင်းမြို့မှ ရှန်ဟိုင်းမြို့သို့ ပုံမှန်အမြန်ရထားဖြင့် သွားလျှင် အချိန် ၅ နာရီခွဲကြာမြင့်မည့်ခရီးကို အချိန်၂ နာရီခွဲအတွင်းသွားနိုင်မည့် နိုင်ငံအတွက် အမြန်ဆုံးဖြစ်သော ရထားတစ်စင်းကို မကြာသေးမီက ထုတ်ဖော်ပြသလိုက်ပြီ ဖြစ်သည်။

တစ်နာရီလျှင် ကီလိုမီတာ ၆၀၀ အမြန် နှုန်းဖြင့်သွားနိုင်မည့် အဆိုပါရထားသည် သံလိုက်အားသုံးရထားတစ်စင်းဖြစ်ပြီး ကမ္ဘာ့အမြန်ဆုံးသော မီးရထားကွန်ရက် ကိုပိုင်ဆိုင်ထားသည့် တရုတ်နိုင်ငံ၏ ဂုဏ်သတင်းကို ဆက်လက်ထိန်းသိမ်း ပေးထားနိုင်စေမည်ဖြစ်သည်။

China Railway Rolling Stock Corporation (CRRC) ကထုတ်လုပ်ထား သော အဆိုပါသံလိုက်အားသုံးရထား၏ ပုံစံမှာ ကျစ်ကျစ်လျစ်လျစ်နှင့် ကြော့မော့မှုရှိပြီး ဦးခေါင်းပိုင်းမှာလည်း လေခွင်းအားကို အကောင်းဆုံးဖြစ်အောင် တည်ဆောက်ထားသည့်အပြင် အတွင်းပိုင်း၌ ခေတ်ရှေ့ပြေးသော  ဗီဒီယိုဖန်သားပြင်တစ်ခု ပါဝင်သည်ကိုတွေ့ရသည်။ထို့ပြင် CRRC မှအင်ဂျင်နီယာများက ၎င်းတို့သည် မြန်နှုန်းမြင့်မီးရထား သွားလာမှုနှင့်   လေကြောင်းခရီးအတွက် လေယာဉ်ပျံသန်းမှုတို့ကြားရှိ အမြန်နှုန်း ကွာဟချက်ကိုလျှော့ချရန် သံလိုက်အားသုံး ရထား၏အမြန်နှုန်းကို ယခုထက်ပိုတိုးမြှင့်သွားနိုင်ရန် ရည်ရွယ်ထားကြောင်း ပြောသည်။ ယခု အသုံးပြုသည့် သံလိုက်အားသုံးရထားက  သမားရိုးကျ ရထားများထက် ပတ်ဝန်းကျင်ပေါ်သက်ရောက်မှု အပါအဝင် အားသာချက်များစွာ ရှိကြောင်း သိရသည်။

 MWD Web Portal

အမေရိကန် နိုင်ငံခြားရေးဝန်ကြီးဌာနသည် ဇူလိုင် ၁၁ ရက်မှစ၍ ဝန်ထမ်းအများအပြား လျှော့ချခဲ့ရာ ပထမဆုံးအသုတ်တွင် လူ ၁,၃၅၀ ကျော် အလုပ်ဖြုတ်မည်ဖြစ်ကြောင်း အမေရိကန်မီဒီယာအများ အပြား၏ သတင်းဖော်ပြချက်အရ သိရသည်။

ပထမဆုံးအသုတ် အလုပ်ဖြုတ်မည့်သူများတွင် အမေရိကန်ပြည်တွင်း၌ အလုပ်လုပ်ကိုင်သူ အစိုးရ ဝန်ထမ်း ၁,၁၀၇ ဦးနှင့် နိုင်ငံခြားရေးရာဝန်ထမ်း ၂၄၆ ဦးပါဝင်ကြောင်း အမေရိကန်မီဒီယာက အတွင်းပိုင်း အသိပေးကြေညာချက်တစ်ခုကို ကိုးကား၍ သတင်းဖော်ပြထားသည်။ အလုပ်ဖြုတ် ခံရသည့် ဝန်ထမ်းသည် အီးမေးလ်မှတစ်ဆင့် အသိပေးချက်တစ်ခု လက်ခံရရှိမည်ဖြစ်သည်။

အမေရိကန်နိုင်ငံခြားရေးဝန်ကြီးဌာန၏ အမေရိကန်ပြည်တွင်း၌ အလုပ်လုပ်ကိုင်သည့် ဝန်ထမ်းပေါင်း ၁၈,၀၀၀ ခန့်အနက် နောက်ဆုံးတွင် လူ ၃,၀၀၀ နီးပါး အလုပ်ဖြုတ်လျှော့ချခံရမည်ဖြစ်ပြီး ၎င်းအနက် မိမိဆန္ဒအလျောက် အလုပ်မှနုတ်ထွက်သူများ ပါဝင်မည်ဖြစ်ကြောင်း၊ တစ်ချိန်တည်းတွင် အမေရိကန် နိုင်ငံခြားရေးဝန်ကြီးဌာနက ၎င်းအနေဖြင့် သံတမန်ရေး ဦးစားပေးလုပ်ငန်းများတွင် အာရုံစိုက် လုပ်ဆောင်နိုင်ရန်အတွက် ပြည်တွင်းအဖွဲ့အစည်းများ ကောင်းမွန်လာအောင် လုပ်ဆောင်မည် ဖြစ်ကြောင်း သိရသည်။

ဝန်ထမ်းလျှော့ချသည့်လုပ်ငန်းသည် အသေးစိတ် စီစဉ်ရေးဆွဲထားခြင်းဖြစ်ပြီး အမေရိကန်နိုင်ငံခြားရေး ဝန်ကြီးဌာန၏ အဓိကလုပ်ဆောင်ချက်မဟုတ်သော၊ ထပ်ခါတလဲလဲ ထူထောင်ထားသော သို့မဟုတ် အပိုဖြစ်နေသော လုပ်ငန်းဌာနများနှင့် လုပ်ငန်းတာဝန်များကို တစ်စုတစ်စည်းတည်း ပေါင်းစုခြင်း သို့မဟုတ် ပေါင်းစပ်၍ စီမံခန့်ခွဲခြင်းဖြင့် လုပ်ငန်းတွင်ကျယ်မှုအား အများအပြားမြှင့်တင်နိုင်သည့် လုပ်ငန်းဌာနများကိုသာ ရည်ရွယ်ကြောင်း အဆိုပါအသိပေးကြေညာချက်တွင် ဖော်ပြထားသည်။

ယခုအကြိမ် ဝန်ထမ်းလျှော့ချမှုသည် အမေရိကန်နိုင်ငံခြားရေးဝန်ကြီးဌာနက ယခုနှစ် ဧပြီလတွင် စတင်သည့် ပြန်လည်ဖွဲ့စည်း၍ ပြုပြင်ပြောင်းလဲသည့် အစိတ်အပိုင်းတစ်ခုဖြစ်ကြောင်း၊ အကြောင်းအရာ များတွင် လုပ်ငန်းဌာန ၁၃၂ ခုအား လျှော့ချပယ်ဖျက်ခြင်းနှင့် လုပ်ငန်းဌာန ၁၃၇ ခုအား ရုံးခန်းလိပ်စာ ရွှေ့ပြောင်းခြင်းတို့လည်း ပါဝင်ကြောင်း အမေရိကန်မီဒီယာက သတင်းဖော်ပြထားသည်။

အမေရိကန်နိုင်ငံခြားရေးဝန်ကြီးဌာန၏ ပမာဏနှင့် အသုံးစရိတ်သည် လွန်ခဲ့သည့် ၁၅ နှစ်အတွင်း အများအပြား တိုးပွားလာကြောင်း၊ ၎င်းကို သမ္မတ ထရမ့်၏ “အမေရိကန် ဦးစားပေးမှု” လုပ်ငန်းစဉ် နှင့် ပိုမိုကိုက်ညီစေရန် အသေးစိတ်လျှော့ချ၍ ပြန်လည်ဖွဲ့စည်းမှု လုပ်ဆောင်ရန် လိုအပ်ကြောင်း အမေရိကန် နိုင်ငံခြားရေးဝန်ကြီး မာကိုရူဘီယိုက ပြောကြားခဲ့ဖူးသည်။

ယခုနှစ် ဖေဖော်ဝါရီလတွင် ထရမ့်က အမိန့်ကြေညာချက်အား လက်မှတ်ထိုးထုတ်ပြန်၍ ဖက်ဒရယ် အစိုးရတွင် ဝန်ထမ်းပမာဏ အများအပြားလျှော့ချမှုလုပ်ဆောင်ခဲ့ရာ စိုက်ပျိုးရေးဝန်ကြီးဌာန၊စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ကျန်းမာရေးနှင့် အများပြည်သူဝန်ဆောင်မှု ဝန်ကြီးဌာန၊ နိုင်ငံခြားရေးဝန်ကြီးဌာန၊ ဘဏ္ဍာရေးဝန်ကြီးဌာန၊ စစ်မှုထမ်းဟောင်းရေးရာဝန်ကြီးဌာန စသည့် ဝန်ကြီးဌာနနှင့် ဖက်ဒရယ်အဖွဲ့အစည်း ၁၀ ခုကျော်တို့ ပါဝင်ကြောင်း သိရသည်။

ကိုးကား- ဆင်ဟွာ 

ကိယက်ဗ်မြို့၏ ကောင်းကင်ယံတွင် AN-124 အကြီးစား သယ်ယူ ပို့ဆောင်ရေး လေယာဉ်ကြီး ပေါ်ထွက်လာပြီးနောက် နိုင်ငံပြင်ပသို့ ပျံသန်းခဲ့ပြီး ယင်းသည် ယူကရိန်းတပ်မတော်၏ စိတ်ဓာတ်တက်ကြွမှုကို မြှင့်တင်ရန် အထောက်အကူဖြစ်စေသည်ဟု ယူဆရသည်။

၃ နှစ်ကျော်အတွင်း ကိယက်ဗ်ကောင်းကင်ယံတွင် AN-124 ကို ပထမဆုံး အကြိမ် တွေ့မြင်ရခြင်းဖြစ်ပြီး ၂၀၂၂ ခုနှစ်အစောပိုင်းတွင် စစ်ပွဲ စတင်ခဲ့ ပြီးနောက် ယူကရိန်းအာဏာပိုင်များသည် စစ်ဘက်သုံးမဟုတ်သော လေယာဉ်အားလုံးအတွက် မြို့တော်၏ လေကြောင်းနယ်နိမိတ်ကို ပိတ် ထားခဲ့သည်။

အမေရိကန်စစ်ဘက်ဆိုင်ရာဝက်ဘ်ဆိုဒ် War Zone ၏ ဂြိုလ်တုဓာတ်ပုံ ဆိုင်ရာဆန်းစစ်ချက်အရ AN-124 သယ်ယူပို့ဆောင်ရေးလေယာဉ်သည် ကိယက်ဗ်ရှိ Svyatoshino လေဆိပ်မှ ပျံတက်ခဲ့ခြင်းဖြစ်နိုင်ကြောင်း ဖော်ပြထားသည်။ ထိုလေဆိပ်တွင် လေယာဉ်သည် လေးနှစ်ကျော်ကြာ ရပ်နားထားခဲ့ပြီး ၎င်းသည် Antonov လေယာဉ်ထုတ်လုပ်ရေးကုမ္ပဏီ၏ ဌာနချုပ်လည်းဖြစ်သည်။

အနီးရှိ Hostomel လေဆိပ်နှင့် ထိုနေရာတွင် ရပ်နားထားသည့် An-225 သယ်ယူပို့ဆောင်ရေး လေယာဉ်အပါအဝင် အခြားလေယာဉ်များစွာကို စစ်ပွဲအစောပိုင်းကာလများတွင် ဖျက်ဆီးခံခဲ့ရသော်လည်း Svyatoshino လေဆိပ်မှာ ထိခိုက်မှုမရှိခဲ့ပေ။ အချက်အလက်များအရ ယူကရိန်း၏ AN-124 လေယာဉ်သည် ဂျာမနီနိုင်ငံ Leipzig မြို့ရှိ Antonov ၏ အခြေစိုက်စခန်းသို့ ဆင်းသက်ခဲ့သည်။ 

ရုရှားစစ်ဘက်ဆိုင်ရာ ဆန်းစစ်သူအချို့က AN-124 လေယာဉ်ကို ရန်သူ၏ တိုက်ခိုက်မှုမှကာကွယ်ရန် ယူကရိန်းတပ်များက Dnipro မြို့မှ အရေးပေါ် ရွှေ့ပြောင်းခဲ့ဟု ယုံကြည်ကြသည်။

Flightradar24 ၏ အချက်အလက်များအရ ယူကရိန်း AN-124 လေယာဉ်သည် ယူကရိန်းအနောက်ပိုင်းနှင့် ပိုလန်နယ်စပ်အနီးမှ ညနေပိုင်းတွင် ပျံသန်းခဲ့သော်လည်း ၎င်း၏ ပျံတက်ရာနေရာအချက်အလက်ကို ဖော်ပြ ထားခြင်းမရှိဘဲ AN-124 သည် ပိုလန်အပေါ်မှ ဖြတ်ကျော်ပျံသန်းပြီး ဂျာမနီနိုင်ငံသို့ ဆင်းသက်ခဲ့သည်။ ယူကရိန်း AN-124 ၏ အဆိုပါ ပျံသန်းမှု သည် ရုရှားစစ်ဘက်ဆိုင်ရာ ဆန်းစစ်သူများအကြား အငြင်းပွားဖွယ် အကြောင်းအရာတစ်ခုဖြစ်လာခဲ့သည်။

ထောက်လှမ်းရေးအချက်အလက် မလုံလောက်မှုနှင့် ကိယက်ဗ်၏ ထူထပ်သည့် လေကြောင်းကာကွယ်ရေးစနစ်များကလည်း AN-124 လေယာဉ် ပျံမတက်မီ ဖျက်ဆီးခြင်းမခံရသည့် အခြားအကြောင်းရင်းများ ဖြစ်နိုင်ကြောင်း War Zone မှ စစ်ရေးသုံးသပ်သူ Howard Altman က ထောက်ပြခဲ့သည်။

"AN-124 ကို နိုင်ငံခြားသို့ ရွှေ့ပြောင်းခြင်းဖြင့် စီးပွားဖြစ် ကုန်စည်သယ်ယူ ပို့ဆောင်ရေးဝန်ဆောင်မှုများ ဆက်လက်လည်ပတ်နိုင်မည်ဆိုပါက ၎င်းသည် Antonov ကုမ္ပဏီအတွက်သာမက ယူကရိန်းနိုင်ငံအတွက်ပါ ကြီးမားသောအောင်ပွဲတစ်ရပ်ဖြစ်လာမည်ဖြစ်ပြီး အဆိုပါ ဝန်ဆောင်မှုများသည် အရေးကြီးသောဝင်ငွေအရင်းအမြစ်ဖြစ်ပြီး စစ်ဆင်ရေးလုပ်ငန်းများကို အထောက်အကူပြုမည်" ဟု Altman က မှတ်ချက်ပြုခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တနင်္ဂနွေနေ့ (ဇူလိုင် ၁၃) တွင် လန်ဒန် Southend လေဆိပ်အတွင်း လေယာဉ်ငယ်တစ်စီး ပျက်ကျခဲ့ပြီး အရေးပေါ်ကယ်ဆယ်ရေးအဖွဲ့များ အမြန်သွားရောက်ခဲ့ကြသည်။ လေယာဉ်၏ ဦးတည်ရာနှင့် လေယာဉ် ပေါ်တွင် လူမည်မျှပါဝင်ခဲ့သည်ဆိုသည့် အချက်အလက်များကို ချက်ချင်း မဖော်ပြခဲ့ပေ။

ရဲတပ်ဖွဲ့၊ အရေးပေါ်ကယ်ဆယ်ရေးအဖွဲ့များနှင့် လေကြောင်းစုံစမ်း စစ်ဆေးရေး အဖွဲ့များက ဖြစ်စဉ်ကို သုံးသပ်နေစဉ် လေဆိပ်သို့ ဆိုက်ရောက် လာမည့်လေယာဉ်များနှင့် ပျံသန်းထွက်ခွာမည့်လေယာဉ်များအားလုံးကို နောက်ထပ်အကြောင်းကြားချက် မရရှိမချင်း ယာယီရပ်ဆိုင်းထားကြောင်း လေဆိပ်က ထုတ်ပြန်ခဲ့သည်။

ဗြိတိန်မီဒီယာများတွင်ဖော်ပြမှုအရ ၎င်းလေယာဉ်သည် နယ်သာလန် နိုင်ငံသို့ ဦးတည်နေသော Beechcraft B200 Super King Air အမျိုးအစား လူနာတင်လေယာဉ်ဖြစ်ပြီး လူနာများသယ်ဆောင်ရန် အထူး ပြုလုပ်ထားသည့် ဆေးဘက်ဆိုင်ရာစနစ်များ တပ်ဆင်ထားပြီး လေယာဉ် ၏ အလျားသည် ၁၂ မီတာ (၃၉ ပေ) ရှိသည်ဟု ဆိုသည်။

ကိုးကား-CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မြောက်ကိုရီးယားနိုင်ငံမြို့တော် ပြုံယမ်းနှင့် တရုတ်နိုင်ငံမြို့တော် ပေကျင်း တို့ကို ချိတ်ဆက်ထားသော ရထားသွားလာရေးလုပ်ငန်းကို ငါးနှစ်ကျော် ကြာ ရပ်ဆိုင်းထားပြီးနောက် ယခုအခါ ပြန်လည်ဖွင့်လှစ်ရန် သဘော တူညီလိုက်ကြကြောင်း NHK သတင်းဌာနက ဖော်ပြထားပါသည်။

ထိုရထားလမ်းပိုင်းမှာ ၂၀၂၀ ပြည့်နှစ် ဇန်နဝါရီလတွင် ကိုရိုနာဗိုင်းရပ်စ် ပြန့်ပွားမှုကြောင့် ယာယီရပ်ဆိုင်းထားခဲ့ခြင်း ဖြစ်ပါသည်။ တရုတ်နှင့်မြောက်ကိုရီးယား ဆက်ဆံရေးနှင့် ရင်းနှီးသော အရင်းအမြစ်များက NHK ကို ပြောကြားချက်အရ နှစ်နိုင်ငံ ရထားအာဏာပိုင်များသည် ပြုံယမ်းနှင့် ပေကျင်းကြား ရထားလုပ်ငန်းကို မကြာမီ ပြန်လည်စတင်ရန် သဘော တူညီခဲ့ကြပြီး နောက်ဆုံးအစီအစဉ်များ ပြုလုပ်နေကြပြီဖြစ်ကာ ဩဂုတ်လအတွင်း ပြန်လည်စတင်နိုင်ကြောင်း သိရပါသည်။

မြောက်ကိုရီးယားသည် ရုရှားနှင့် စစ်ရေးပူးပေါင်းမှုအပါအဝင် ဆက်ဆံရေးကို အရှိန်အဟုန်ဖြင့် နက်ရှိုင်းစွာ တိုးမြှင့်ဖော်ဆောင်လျက်ရှိသည်။ လေ့လာသူအချို့က ပေကျင်း၏ သဘောထားမှာ ကုလသမဂ္ဂ လုံခြုံရေးကောင်စီက မြောက်ကိုရီးယား၏ နျူကလီးယားနှင့် ဒုံးကျည်အစီအစဉ်များ ဆိုင်ရာ ပိတ်ဆို့မှုများကို အကောင်အထည်ဖော်ရန် ဖြစ်သဖြင့် မြောက် ကိုရီးယားသည် တရုတ်နှင့် အလှမ်းဝေးနေဆဲဖြစ်ကြောင်း ဆိုထားကြသည်။

သို့သော် ပြီးခဲ့သည့်မေလမှစ၍ မြောက်ကိုရီးယားမှ တရုတ်သို့ စစ်ဆေးရေးနှင့် လေ့ကျင့်ရေးခရီးစဉ်များ သွားရောက်မှုများ တိုးတက်များပြားလာခဲ့သည်။ နှစ်နိုင်ငံဆက်ဆံရေး တိုးတက်မှုလက္ခဏာများ ရှိလာသော်လည်း ရထားပြန်လည်ဖွင့်လှစ်ခြင်းကြောင့် ၎င်းတို့၏ ဆက်ဆံရေး တွင် အပြည့်အဝပြောင်းလဲမှုရှိမရှိ သတိထားစောင့်ကြည့်ရန် လိုအပ်ကြောင်း ကျွမ်းကျင်သူတစ်ဦးက မှတ်ချက်ပြုပြောကြားထားပါသည်။

ကိုးကား - NHK

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ထိုင်းအာဏာပိုင်များက ဘုန်းကြီးကျောင်းများမှ လှူဒါန်းငွေများ အလွဲ သုံးစားပြုမှုများကြောင့် ပြည်သူများ စိုးရိမ်မှုများ မြင့်တက်လာပြီးနောက် တစ်နိုင်ငံလုံးရှိ ဘုန်းကြီးကျောင်းများ၏ ဘဏ်အကောင့်များတွင် ရှိနေ သည့် စုစုပေါင်းငွေပမာဏကို ကြေညာခဲ့သည်။

ထိုင်းဗဟိုဘဏ်နှင့် အမျိုးသား ဗုဒ္ဓဘာသာရေးရာရုံး (NOB) တို့က ဇူလိုင် ၁၃ ရက်တွင် နိုင်ငံတစ်ဝှမ်းရှိ ဘုန်းကြီးကျောင်း ၃၉,၀၀၀ ၏ ဘဏ် အကောင့် စာရင်းများကို ထုတ်ပြန်ခဲ့ပြီး ၂၀၂၅ ခုနှစ် ပထမ သုံးလပတ်အထိဘတ်ငွေ ၄၁၀ ဘီလီယံ (အမေရိကန်ဒေါ်လာ ၁၁ ဘီလီယံကျော်) ရှိကြောင်း ဖော်ပြခဲ့သည်။

NOB က ဘုန်းတော်ကြီးများအား ကျောင်းတိုက်ရန်ပုံငွေများကို ကိုယ်ပိုင် အသုံးပြုခွင့် မပြုဘဲ အကုန်အကျများအတွက် ရည်ရွယ်ချက်အလိုက် ရှင်းလင်းစွာဖော်ပြရန် စည်းမျဉ်းသတ်မှတ်ထားသည်။ ငွေများကို ကျောင်း ပြင်ဆင်ခြင်း၊ ရဟန်းရှင်လူများ လေ့ကျင့်သင်ကြားရေး၊ ဘာသာရေးအခမ်းအနားများ စသည့် တရားဝင်လုပ်ငန်းများအတွက်သာ အသုံးပြု နိုင်သည်။

ပွင့်လင်းမြင်သာမှု ရှိစေရန်အတွက် ဘုန်းတော်ကြီးတစ်ပါးစီသည် ဘဏ္ဍာရေး စီမံခန့်ခွဲမှုကော်မတီကို ဖွဲ့စည်း၍ အကုန်အကျဆိုင်ရာ ဆုံးဖြတ်ချက် များကို ပူးပေါင်းချမှတ်နိုင်သည်။ တိုင်ကြားမှုများရှိပါက NOB သည် သက်ဆိုင်ရာကျောင်းတိုက်များ၏ စာရင်းများ၊ ငွေစာရင်းများနှင့် သုံးစွဲမှု များကို စစ်ဆေးပိုင်ခွင့်ရှိသည်။

ထိုင်းနိုင်ငံတွင် ဘုန်းကြီးကျောင်းများ၏ ဘဏ္ဍာရေးကိစ္စများသည် လိင်ပိုင်း ဆိုင်ရာ ကျူးလွန်မှုများနှင့် လှူဒါန်းငွေများ အလွဲသုံးစားပြုမှုများ ဆက်တိုက် ဖြစ်ပွားပြီးနောက် လွန်ခဲ့သည့် ရက်သတ္တပတ်အနည်းငယ်အတွင်း ပြင်းထန်စွာ စိစစ်ခံနေရသည်။

မကြာသေးမီက ထိုင်းနိုင်ငံတွင် အထူးစိတ်ဝင်စားမှုအရှိဆုံး အမှုမှာ "ဆီကာဂေါက်ဖ်" အမှုဖြစ်ပြီး အသက် ၃၅ နှစ်အရွယ် အမျိုးသမီး တစ်ဦး သည် အနည်းဆုံးသံဃာ ၈ ပါးနှင့် လိင်ပိုင်းဆိုင်ရာ ဆက်ဆံမှုရှိခဲ့ပြီး ထိုင်း ရဲတပ်ဖွဲ့၏ ထုတ်ပြန်ချက်အရ ၎င်းတို့အနက် ရဟန်း ၃ ပါးမှာ စည်းကမ်း ဖောက်ဖျက်မှု ကြီးမားသဖြင့် သက်ဆိုင်ရာဘာသာရေးအဖွဲ့အစည်းမှ လူဝတ်လဲစေခဲ့သည်။

အဆိုပါအကျင့်ပျက်ခြစားမှုမှာ ထိုင်းနိုင်ငံ၏ သံဃာ့အဖွဲ့အစည်းကို လှုပ်ခတ်သွားစေခဲ့ပြီး ဇူလိုင် ၄ ရက်တွင် နန်ထဘူရီခရိုင်ရှိ ဂေါက်ဖ်၏ နေအိမ်သို့ ရဲများဝင်ရောက်စစ်ဆေးစဉ် သူမ၏ဖုန်း ၅ လုံးမှ ဓာတ်ပုံနှင့် ဗီဒီယိုပေါင်း ၈၀,၀၀၀ ကျော်ကို တွေ့ရှိခဲ့ရသည်။ ထိုဓာတ်ပုံများစွာတွင် သူမသည် ထင်ရှားသောဘုန်းကြီးကျောင်းများရှိ ရဟန်းများနှင့် ရင်းနှီးသော ဆက်ဆံရေးများ ရှိနေသည်ကို တွေ့ရှိရသည်။

ဘုန်းတော်ကြီး ဖရာသဲပ် ဝါချီရာသီရပုံ (Phra Thep Wachiratheeraporn) သည် Phra Phutthachai ကျောင်း၏ ယခင်ဆရာတော်ဖြစ်ပြီး ဂေါက်ဖ် ၏ မိတ်ဆွေများထဲမှ တစ်ဦးဖြစ်ကာ ကျောင်းပိုင်ငွေများကို ဂေါက်ဖ် အတွက် အလွဲသုံးစားလုပ်ခဲ့သည်ဟု စွပ်စွဲခံရပြီး စစ်ဆေးမှုခံနေရသည်။ 

ဇူလိုင် ၁၂ ရက်တွင် ဖရာသဲပ်က ဘုန်းကြီးကျောင်း၏ အရေးကြီး ငွေကြေး စာရွက်စာတမ်းများကို ကျောင်းတိုက်၏ ဆရာတော်အသစ်ထံ လွှဲပြောင်း ပေးခဲ့ပြီး လူထွက်ခဲ့ကြောင်း၊ ဘုန်းကြီးကျောင်း၏ ပစ္စည်းများကို အလွဲသုံးစား မပြုခဲ့ကြောင်း အတည်ပြုပြောကြားခဲ့သည်။ ထို့အပြင် ၎င်းသည် ဂေါက်ဖ် နှင့် သာမန်ထက်ပိုသော ဆက်ဆံရေးရှိခဲ့ပြီး အိမ်ထောင်ပြုရန် စဉ်းစားခဲ့ ဖူးကြောင်း ဝန်ခံခဲ့သည်။

အခြားသော အကျင့်ပျက်ခြစားမှုတစ်ခုဖြစ်သည့် မေလတွင် Nakhon Pathom ပြည်နယ်ရှိ Wat Rai Khing ဘုန်းကြီးကျောင်း၏ သက်တော် ၇၀ အရွယ် ဆရာတော်သည် ငါးနှစ်အတွင်း ဒေါ်လာ ၈ သန်းကျော်ကို စီးပွားဖြစ် လောင်းကစားရန် အလွဲသုံးစားလုပ်ခဲ့သည်ဟု စွပ်စွဲခံရပြီးနောက် ထိုင်းရဲများထံ ကိုယ်တိုင်သွားရောက်အဖမ်းခံခဲ့သည်။ ရဲများသည် ၎င်းနှင့် အွန်လိုင်းလောင်းကစားအကောင့်များအကြား ဘတ်ငွေ ၅၀၀ သန်း (ဒေါ်လာ ၁၅ သန်းကျော်) တန်ဖိုးရှိ ငွေလွှဲပြောင်းမှုများကိုလည်း ရှာဖွေ တွေ့ရှိခဲ့သည်။

နှစ်ပေါင်း ၁၀၀ ကျော် သက်တမ်းရှိပြီဖြစ်သော Wat Rai Khing ဘုန်းကြီး ကျောင်းသည် Nakhon Pathom ပြည်နယ် ၊ Samphran ခရိုင်တွင် တည်ရှိပြီး ထိုင်းနိုင်ငံသားများနှင့် နိုင်ငံတကာခရီးသွားများ အများအပြား လာရောက်လည်ပတ်လေ့ရှိသော ထင်ရှားသည့် ဘုရားဖူးစခန်းတစ်ခု ဖြစ်သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်ကာကွယ်ရေးဌာန (Pentagon) သည် တရုတ်၏ ထိုင်ဝမ် အရေးနှင့်ပတ်သက်၍ စစ်ဖြစ်ပါက အရေးပါသော မဟာမိတ်နိုင်ငံများ ဖြစ်သည့် ဂျပန်နှင့် ဩစတြေးလျတို့အား ၎င်းတို့၏ သဘောထားကို ရှင်းလင်းစွာ ထုတ်ဖော်ရန် ဖိအားပေးနေကြောင်း Financial Times သတင်းစာက တနင်္ဂနွေနေ့ (ဇူလိုင် ၁၃) တွင် ဖော်ပြခဲ့သည်။ 

တရုတ်အစိုးရသည် "တစ်နိုင်ငံတည်း" မူအရ ထိုင်ဝမ်ကို ၎င်း၏ ပိုင်နက် အဖြစ် သတ်မှတ်ကာ နောက်ဆုံးတွင် ပြန်လည်ပေါင်းစည်းရမည်ဟုခိုင်မာစွာ ပြောဆိုလျက်ရှိသည်။ အမေရိကန်သည် တရားဝင်အားဖြင့် ထိုင်ဝမ်အပေါ် တရုတ်၏ အချုပ်အခြာအာဏာကို အသိအမှတ်ပြုထား သော်လည်း တိုင်ပေသို့ လက်နက်များ ဆက်လက် ရောင်းချနေဆဲ ဖြစ်သည်။ 

အမေရိကန် ကာကွယ်ရေးဌာန မူဝါဒဆိုင်ရာ ဒုတိယဝန်ကြီး Elbridge Colby သည် လွန်ခဲ့သော လအနည်းငယ်အတွင်း ဂျပန်နှင့် ဩစတြေးလျ စစ်ဘက်ဆိုင်ရာ အရာရှိများအား ဖြစ်နိုင်ခြေရှိသော ပဋိပက္ခ တစ်ရပ် အတွက် အဆင်သင့်ဖြစ်စေရန် တွန်းအားပေးခဲ့ကြောင်း အမည်မဖော် လိုသူ အရင်းအမြစ်များကို ကိုးကား၍ FT က ရေးသားခဲ့သည်။ 

"ထိုင်ဝမ်အရေးနှင့် သက်ဆိုင်သည့် ရုတ်တရက် အခြေအနေများအတွက် လက်တွေ့ကျသော စစ်ဆင်ရေးအစီအစဉ်များနှင့် လေ့ကျင့်မှုများကို ဂျပန် နှင့် ဩစတြေးလျတို့နှင့် ပူးပေါင်းဆောင်ရွက်လျက်ရှိသည်" ဟု FT က ၎င်း၏ အရင်းအမြစ်တစ်ဦး၏ ပြောကြားချက်ကို ကိုးကားဖော်ပြခဲ့သည်။ သို့သော် အမေရိကန်ကိုယ်တိုင် ထိုင်ဝမ်အား ကန့်သတ်မှုမရှိ အာမခံချက် ပေးထားခြင်း မရှိသောကြောင့် အဆိုပါတောင်းဆိုမှုသည် တိုကျိုနှင့် ကင်ဘာရာတို့အား အံ့အားသင့်စေခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကမ္ဘာ့ထိပ်တန်း ချစ်ပ်ထုတ်လုပ်ရေးကုမ္ပဏီကြီး Nvidia ၏ CEO ဂျန်ဆန် ဟွမ်က "AI နည်းပညာသည် အလုပ်ခွင် ထုတ်လုပ်မှုစွမ်းရည်ကို သိသိသာသာ မြှင့်တင်ပေးနိုင်သော်လည်း စီးပွားရေးလုပ်ငန်းများတွင် ဆန်းသစ်တီထွင်မှု မရှိပါက အလုပ်အကိုင် ဆုံးရှုံးမှုများ ဖြစ်ပေါ်စေနိုင်ကြောင်း" သတိပေး ပြောကြားခဲ့သည်။

Anthropic ၏ CEO Dario Amodei က "AI သည် လူအများအပြား အလုပ်လက်မဲ့ဖြစ်စေနိုင်သည့် အကြီးအကျယ် ပြောင်းလဲမှုများကို ဖြစ်ပေါ် စေမည်" ဟု မကြာသေးမီက ပြောကြားခဲ့မှုနှင့်ပတ်သက်၍ "ကမ္ဘာကြီး တွင် ဆန်းသစ်တီထွင်မှု စိတ်ကူးများ ကုန်ခန်းသွားပါက ထုတ်လုပ်မှု စွမ်းရည် တိုးတက်မှုသည် အလုပ်အကိုင် ဆုံးရှုံးမှုအဖြစ် ပြောင်းလဲသွား နိုင်သည်" ဟု Nvidia ၏ ဂျန်ဆန် ဟွမ်က CNN ၏ Fareed Zakaria နှင့် တွေ့ဆုံမေးမြန်းခန်းတစ်ခုတွင် ပြန်လည်ဖြေကြားခဲ့သည်။

အမိုဒေးက လွန်ခဲ့သော တစ်လက Axios သို့ ပြောကြားရာတွင် "AI သည် အခြေခံအဆင့် ရုံးအလုပ်အကိုင်များ၏ တစ်ဝက်ခန့်ကို ပျောက်ကွယ် စေကာ လာမည့် ငါးနှစ်အတွင်း အလုပ်လက်မဲ့နှုန်း ၂၀% အထိ တက်စေ နိုင်သည်" ဟု သတိပေးခဲ့သည်။

သို့သော် ဟွမ်က ကုမ္ပဏီများတွင် ဆန်းသစ်သော အိုင်ဒီယာများ ရှိနေ သရွေ့ ထုတ်လုပ်မှုစွမ်းရည် တိုးတက်မှုနှင့် အလုပ်အကိုင် အခွင့်အလမ်း များ ဖွံ့ဖြိုးနိုင်ကြောင်း ယုံကြည်သည်။ သို့သော် စိတ်ကူးသစ်၊ ရည်မှန်းချက် သစ်များ မရှိပါက "ထုတ်လုပ်မှုစွမ်းရည် တိုးတက်မှုသည် အလုပ်အကိုင် နည်းပါးစေရန် ဦးတည်သွားနိုင်သည်" ဟု ၎င်းက ရှင်းပြခဲ့သည်။

"အခြေခံအကျဆုံး အချက်မှာ လူ့အဖွဲ့အစည်းတွင် အိုင်ဒီယာအသစ်များ ရှိနေသေးသလား ဆိုသည့်အချက်ဖြစ်သည်။ မိမိတို့တွင် အိုင်ဒီယာများ ရှိနေပြီး ပိုမိုထိရောက်စွာ အလုပ်လုပ်နိုင်ပါက မိမိတို့ ဆက်လက် ရှင်သန် နိုင်မည်" ဟု ၎င်းက ဆိုသည်။

မကြာသေးမီနှစ်များအတွင်း AI ရင်းနှီးမြှုပ်နှံမှုများ တိုးလာခြင်းနှင့်အတူ နည်းပညာတိုးတက်မှုများ ဖြစ်ပေါ်လာစေခဲ့သော်လည်း AI သည် အနာဂတ် တွင် အလုပ်အကိုင်များကို ခြိမ်းခြောက်နိုင်မည် ဆိုသည့် စိုးရိမ်မှုများ လည်း မြင့်တက်လာခဲ့သည်။ ဝန်ထမ်းငှားရမ်းရေး ကုမ္ပဏီ Adecco Group ၏ ၂၀၂၄ စစ်တမ်းအရ CEO များ၏ ၄၁% က "AI သည် လာမည့် ငါးနှစ်အတွင်း ကုမ္ပဏီထောင်ပေါင်းများစွာတွင် အလုပ်သမား အရေအတွက် လျော့နည်းစေမည်" ဟု ဖြေကြားခဲ့ကြသည်။ ကမ္ဘာ့စီးပွားရေးဖိုရမ် (WEF) ၏ ဇန်နဝါရီလစစ်တမ်းတွင် အလုပ်ရှင် ၄၁% က "၂၀၃၀ ပြည့်နှစ်တွင် AI အလိုအလျောက်စနစ်ကြောင့် လူအင်အား လျှော့ချရန် စီစဉ်ထားကြောင်း" ဖော်ပြခဲ့သည်။

ဈေးကွက်တန်ဖိုး ဒေါ်လာ ၄ ထရီလီယံ အထိ ရောက်ရှိခဲ့ဖူးသော Nvidia သည် AI တော်လှန်ရေးကို ဦးဆောင်နေသည့် ကုမ္ပဏီများထဲမှ တစ်ခု ဖြစ်သည်။ ကယ်လီဖိုးနီးယားအခြေစိုက် အဆိုပါ ချစ်ပ်ထုတ်လုပ်ရေး ကုမ္ပဏီ၏ နည်းပညာများကို Microsoft၊ Amazon နှင့် Google စသည့် ကုမ္ပဏီများ၏ AI မော်ဒယ်များနှင့် Cloud ဝန်ဆောင်မှုများ လည်ပတ်ရန် အသုံးပြုသည့် ဒေတာစင်တာများတွင် အသုံးပြုလျက်ရှိသည်။

ဟွမ်က AI ၏ဖွံ့ဖြိုးတိုးတက်မှုကို ကာကွယ်ပြောဆိုကာ လွန်ခဲ့သည့် နှစ် ၃၀၀၊ ၁၀၀ နှင့် ၆၀ အတွင်း၊ ကွန်ပျူတာခေတ်တွင်ပင် အလုပ်အကိုင်နှင့် ထုတ်လုပ်မှုစွမ်းရည် နှစ်ခုစလုံး တိုးတက်လာခဲ့သည်ဟု ရည်ညွှန်း ခဲ့သည်။ ၎င်းက "အိုင်ဒီယာများစွာကို အကောင်အထည်ဖော်နိုင်ခြင်း" နှင့် "ပိုမိုကောင်းမွန်သော အနာဂတ်တစ်ခုကို တည်ဆောက်နည်း" တို့အတွက် နည်းပညာတိုးတက်မှုက အထောက်အကူပြုနိုင်ကြောင်း ဖြည့်စွက် ပြောကြား ခဲ့သည်။

ကိုးကား- CNN

ဘာသာပြန်ဆိုသူ- ဦးဝင်း‌ဇော်ထွန်း၊ ဒုတိယညွှန်ကြားရေးမှူး၊ နစက-၂

Xiaomi ကုမ္ပဏီက လျှပ်စစ်စွမ်းအင်သုံးယာဉ် (EV) ဈေးကွက်ထဲကို အရှိန်အဟုန် နဲ့ဝင်လာတာပါ။ အခုဆိုရင် အချိန်အားဖြင့် ၁၅ လအတွင်းမှာကိုပဲ သူတို့ရဲ့ EV တွေကို အစီးရေသုံးသိန်းအထိ ရောင်းချပေးပြီးပြီ လို့ထုတ်ပြန်လာပါတယ်။

သူတို့ရဲ့ထုတ်ပြန်ချက်အရကြည့်မယ်ဆိုရင် Xiaomi က တစ်ရက်ကို EV ကားအစီးရေ ၆၄၇ စီးအထိကို ရောင်းထွက်နေတယ်လို့ဆိုရမှာပါ။ ဒါ့အပြင် တစ်နာရီကို  ၂၇ စီးနှုန်းနဲ့ရောင်းထွက်နေတာကိုလည်း တွေ့ရမှာဖြစ်ပါတယ်။

Xiaomi ကုမ္ပဏီက သူတို့ရဲ့ပထမဆုံး သော EV ဖြစ်တဲ့ SU7 ကားကို ၂၀၂၄ ခုနှစ် မတ်လ ၂၈ ရက်မှာစတင်ရောင်းချခဲ့တာ ဖြစ်ပြီး ခုနစ်လအတွင်း၊ လေးလအတွင်းနဲ့ သုံးလခွဲအတွင်း အစီးရေတစ်သိန်းစီရောင်း ထွက်ခဲ့တာဖြစ်ပါတယ်။    

MWD Web Portal