မိမိတို့ လူသားမျိုးနွယ်စုထဲမှာ ရှေးအကျဆုံးသော လူနေမှုစနစ်ကို ဖန်တီးခဲ့သူများက မာယာလူမျိုး များဖြစ်တယ်လို့ သိရှိခဲ့ကြပါတယ်။  သူတို့ ရဲ့ဖြစ်တည်မှုက ရှေးဟောင်းသုတေသန ပညာရှင်များနဲ့ သမိုင်းပညာရှင်များကို အမြဲတမ်းအံ့အားသင့်စေခဲ့တာပါ။ အခုဆိုရင် သူတို့ရဲ့မြို့ဟောင်းနေရာက ယူကာ

တန်ကျွန်းဆွယ်ရဲ့ အပူပိုင်းသစ်တောထဲမှာ တည်ငြိမ်စွာတည်ရှိနေပါပြီ။ ဒါပေမဲ့ သုတေသန ပညာရှင်များရဲ့ လေ့လာစူးစမ်း မှုကတော့ မရပ်တန့်သွားသေးပါဘူး။

အရင်တုန်းက မာယာလူမျိုးများဟာ အရေအတွက်အားဖြင့် အနည်းအကျဉ်းမျှသာရှိမယ်လို့ ပညာရှင်များက ယူဆခဲ့ ကြပါတယ်။ ဒါပေမဲ့ အဲဒီယူဆချက်က မှန်ကန်ရဲ့လားဆိုတာ အခုတွေ့ရှိချက်ကြောင့် မှေးမှိန်သွားရပါတယ်။

ယခုသုတေသနပညာရှင်များရဲ့ တွေ့ရှိချက်အရဆိုရင် မာယာဒေသကြီးတစ်ခု လုံးဟာ ဟိုတစ်စုဒီတစ်စုဖြစ်နေတဲ့ မြို့ပြ နိုင်ငံငယ်လေးတွေနဲ့ တည်ရှိနေတာမျိုးမဟုတ်ဘဲ မြို့ပြနဲ့ ကျေးလက်ဒေသတို့ကို ချိတ်ဆက်ထားတဲ့ လူနေမှုစနစ်ပုံစံတစ်ခု ဖြစ်တယ်လို့ ဆိုပါတယ်။ အခုအချိန်ထိကိုပဲ လူမနေတော့တာ  နှစ်ပေါင်းထောင်ချီ ကြာမြင့်နေပြီဆိုပေမယ့်လည်း မတူးဖော် မဖော်ထုတ်ရသေးတဲ့ နေရာတွေအများ ကြီးကျန်ရှိနေပါသေးတယ်။

ဒါကြောင့် အရင်တုန်းကထုတ်ပြန်ခဲ့ဖူးတဲ့ မာယာလူမျိုးအရေအတွက်ဟာ ဒီကနေ့အချိန်အခါမှာ ယခင်ယူဆခဲ့ဖူးတာ ထက်များစွာပိုနေတယ်ဆိုတာကို ‌အရင်ကထက်ပိုမိုအဆင့်မြင့်မားတဲ့ နည်းပညာ ကိရိယာတွေသုံးပြီး တိုင်းတာမှုများ ပြုလုပ်ခြင်းအားဖြင့် သိလာရတာ ဖြစ်ပါတယ်။

လက်ရှိတွေ့ရှိချက်အပေါ်ယူဆချက်အရ တိုးမြင့်လာတဲ့ မာယာလူဦးရေပမာဏဟာ ၁၆ သန်းလောက်အထိကိုရှိမယ်လို့ ဆိုပါတယ်။ ဒါဟာ ယခင်ယူဆချက်ထက် ၄၆ ရာခိုင်နှုန်း ပိုမိုမြင့်မားလာတာ ဖြစ်ပါတယ်။ ဒါ့အပြင် အရင်အချိန်တွေတုန်းကသတ်မှတ်ထားတဲ့ မာယာလူမျိုးများရဲ့ နယ်မြေထက် အခုတွေ့ရှိတဲ့နယ်မြေက ပိုမိုကြီးမားတာကိုလည်း တွေ့ရှိရပါတယ်။

သုတေသနပညာရှင်များရဲ့တွေ့ရှိချက်အရ မာယာလူမျိုးများနေထိုင်ခဲ့တဲ့ ဒေသတစ်ခုလုံးဟာ စတုရန်းမိုင် ၃၆၀၀၀ အထိရှိတယ်လို့ဆိုပါတယ်။ အခုစူးစမ်းလေ့လာမှုမှာ အသုံးပြုတဲ့နည်းပညာက အဆင့်မြင့်လှတဲ့ LiDar နည်းပညာဖြစ်ပြီး မာယာလူမျိုးတို့နဲ့ပတ်သက်တဲ့ အသစ်အသစ်သော တွေ့ရှိချက်တွေကိုလည်း ထပ်မံတွေ့ရှိဖို့ ရှိနေပါတယ်။

Ref: IE

ကိုထက်

MWD

အင်္ဂလန်နိုင်ငံတစ်ဝန်း၌ နေ့အပူချိန်များ မြင့်တက်လာသည့်အတွက် ကျန်းမာရေး တာဝန်ရှိသူများက အပူနှင့်သက်ဆိုင်သော ကျန်းမာရေးသတိပေးချက်ကို ထုတ်ပြန်ထားကြောင်း သိရသည်။

အင်္ဂလန်နိုင်ငံအနေဖြင့် ယခုနှစ်အတွင်း လေးကြိမ်မြောက်အပူလှိုင်းဖြစ်ပေါ်မှုနှင့် ရင်ဆိုင်နေရခြင်း ဖြစ်ပြီး ဩဂုတ်လ ၁၂ ရက်တွင် ဒေသအချို့၌ အပူချိန်မှာ ၃၄ ဒီဂရီ စင်တီဂရိတ်အထိ မြင့်တက်လာသည်ကို တွေ့ရကြောင်း      မိုးလေဝသဌာနက ထုတ်ပြန်ထားသည်။

ထို့ကြောင့်    ပယင်းရောင်အဆင့် ကျန်းမာရေးသတိပေးချက်ကို အင်္ဂလန်နိုင်ငံရှိ ဒေသငါးခုအတွက် လည်းကောင်း၊ အဝါရောင်အဆင့် ကျန်းမာရေး သတိပေးချက်ကို တစ်နိုင်ငံလုံးအတွက်လည်းကောင်း ထုတ်ပြန်ထားခြင်းဖြစ်သည်။ အချိန်ကာလမှာ ဩဂုတ်လ ၁၂ ရက်မှ ၁၃ ရက် ညအထိဖြစ်သည်။

လေဖိအားများရပ်ဝန်းဖြစ်ပေါ်မှုကြောင့်သာမက    တောင်လေတိုက်ခတ်မှုတို့ပေါင်းဆုံခြင်းကြောင့်   အင်္ဂလန်နိုင်ငံနှင့်ဝေးပြည်နယ်တို့တွင် အပူချိန်များမြင့်တက်နေမည်ဖြစ်ကြောင်း၊ နေရာဒေသအများစု၌ အပူချိန်သည် ၃၀ ဒီဂရီစင်တီဂရိတ်အထက်ရှိနေမည်ဖြစ်ကြောင်း မိုးလေဝသဌာန၏ ထုတ်ပြန်ချက်တွင် ဖော်ပြထားသည်။

ယင်းကဲ့သို့ အပူချိန်များမြင့်တက်လာသည့်အတွက် ကျန်းမာရေးအခြေအနေနှင့် သက်ကြီးရွယ်အို စောင့်ရှောက်ရေး လုပ်ငန်းများအပေါ် သက်ရောက်မှုများရှိလာ နိုင်သောကြောင့် ယခုကဲ့သို့ သတိပေးချက်ထုတ်ပြန်ထားရခြင်း ဖြစ်ကြောင်း တာဝန်ရှိသူများက ပြောသည်။      

 Ref: Xinhua

MWD

ထိုင်းနိုင်ငံ Uthai Thani ပြည်နယ်ရှိ ပုဂ္ဂလိကကျောင်းတစ်ခုတွင် အထက်တန်း ကျောင်းသားတစ်ဦးက ၎င်း၏စာမေးပွဲရလဒ်များကို ကျေနပ်မှု မရှိသဖြင့် ဆရာမတစ်ဦးအား ရိုက်နှက်မှုဖြစ်ပွားခဲ့ပြီး ယခုအခါ ပညာရေး ဝန်ကြီးဌာနက စုံစမ်းစစ်ဆေးမှုများ ချက်ချင်းစတင် လုပ်ဆောင်လျက် ရှိသည်။ 

ပညာရေးဝန်ကြီး Narumon Pinyosinwat က အဆိုပါဖြစ်ရပ်အား ပုဂ္ဂလိကပညာရေးကော်မရှင် (Opec) မှတစ်ဆင့် အရေးယူစုံစမ်းရန် ညွှန်ကြားခဲ့ပြီး ဖြစ်ကြောင်း ထုတ်ပြန်ခဲ့သည်။ ဆရာမမှ မုံချောင်း ရဲစခန်း တွင် အမှုဖွင့်တိုင်ကြားခဲ့ပြီး ကျောင်းသားအား ကျောင်းတက်ရောက်ရန် ယာယီရပ်ဆိုင်းခဲ့ကာ နောက်ပိုင်းတွင် ကျောင်းမှ ထုတ်ပယ်ခဲ့သည်။

ပညာရေးဒုတိယဝန်ကြီး Rinthipond Varinvatchararoj က "ဆရာများ အပေါ် အကြမ်းဖက်မှုကို လုံးဝသည်းမခံပါ" ဟု ပြင်းပြင်းထန်ထန် ရှုတ်ချ ခဲ့ပြီး ကျောင်းသား၏ စိတ်ကျန်းမာရေးအခြေအနေ၊ ပညာရေးဖိအားနှင့် အခြားအချက်များကို နက်နက်နဲနဲ စုံစမ်းသွားမည်ဖြစ်ကြောင်း ပြောကြား ခဲ့သည်။ ထို့အပြင် ပညာရေးစနစ်အတွင်း စိတ်ဖိစီးမှုလျှော့ချရေး နှင့် စိတ်ကျန်းမာရေးပံ့ပိုးမှုများ ပိုမိုလိုအပ်နေကြောင်း ထောက်ပြကာ ကျောင်း များတွင် စိတ်ပညာရှင်များ ပိုမိုထားရှိရန် အကြံပြုခဲ့သည်။

Opec အတွင်းရေးမှူးချုပ် Monthon Phaksuwan က ဖြစ်ရပ်အပြီးတွင် နောင်တွင် အလားတူဖြစ်ရပ်များ ထပ်မံမဖြစ်ပွားစေရန် ကာကွယ်ရေး နည်းလမ်းများ ချမှတ်သွားမည်ဟု ပြောကြားခဲ့သည်။

အဆိုပါဖြစ်ရပ်သည် ထိုင်းနိုင်ငံတွင် ပညာရေးဖိအားနှင့် ကျောင်းသားများ၏ စိတ်ကျန်းမာရေး အပေါ် ပြန်လည်သုံးသပ်မှုများ ပိုမိုလိုအပ်နေကြောင်း ပညာရေးဝန်ကြီးဌာနက အသိအမှတ်ပြုခဲ့သည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ရုရှားတပ်မတော်တွင် အသုံးပြုနေသော ယူနီဖောင်းများနှင့် အခြားဆက်စပ်အဝတ် အထည်များ ပြည်ပမှတင်သွင်းမှုကို ရုရှားအစိုးရက တားမြစ်လိုက်ပြီဖြစ်ကြောင်း သိရသည်။

ရုရှားသမ္မတဗလာဒီမာပူတင်က အဆိုပါ တားမြစ်မိန့်ကို  ဩဂုတ်လ ၁၁ ရက်တွင် လက်မှတ်ရေးထိုးလိုက်ခြင်းဖြစ်ပြီး ယင်းအမိန့်သည် ၂၀၂၆ ခုနှစ် ဇန်နဝါရီလ ၁ ရက် မှစ၍ အသက်ဝင်မည်ဖြစ်သည်။

အဆိုပါအမိန့်တွင်ဖော်ပြထားချက်များ အရ ရုရှားတပ်မတော်အတွက် လိုအပ်နေသော ယူနီဖောင်းများနှင့် ဆက်စပ်အဝတ် အထည်များအားလုံးကို နိုင်ငံအတွင်းရှိ ရုရှားနိုင်ငံပိုင် ကုမ္ပဏီများကသာ ချုပ်လုပ်ပေးရမည်ဖြစ်ကြောင်း၊ ၂၀၂၇ ခုနှစ်မှစ၍ အဝတ်အထည်များ ထုတ်လုပ်ရာ၌ အသုံးပြုသော ချည်မျှင်များနှင့်ကုန်ကြမ်းပစ္စည်းများကိုပါ ရုရှားနိုင်ငံ၌သာ ထုတ်လုပ်ရမည် ဖြစ်ကြောင်းနှင့် နောက်ဆုံးတွင် ပြည်ပမှ တင်သွင်းမှုများအားလုံးကို ရပ်တန့်ရမည် ဖြစ်ကြောင်း သိရသည်။     

Ref: Xinhua

MWD

ထိုင်းအစိုးရသည် ထိုင်း-ကမ္ဘောဒီးယားနယ်စပ်တွင် မကြာသေးမီက ဖြစ်ပွားခဲ့သော ပဋိပက္ခများကြောင့် ပျက်စီးခဲ့ရသည့် အိမ်များအတွက် ယူဘွန်ရာဇဌာနီပြည်နယ်၊ နမ်ယွမ်ခရိုင်ရှိ နေထိုင်သူများအား အသင့်နေ အိမ်များကို စတင်ဖြန့်ဖြူးပေးလျက်ရှိသည်။ ယာယီဝန်ကြီးချုပ်အဖြစ် တာဝန်ထမ်းဆောင်နေသူ Phumtham Wechayachai က တနင်္လာနေ့ (ဩဂုတ် ၁၁) တွင် နယ်စပ်တစ်လျှောက် ပြန်လည်တည်ဆောက်ရေး လုပ်ငန်း များနှင့် ဒေသခံများ၏ အခက်အခဲများကို ဖြည့်ဆည်းရန် တရားရေး ဝန်ကြီး Tawee Sodsong နှင့် ပြည်ထဲရေးဝန်ကြီးဌာန ဒုတိယဝန်ကြီး Theerarat Samrejvanich တို့အား တာဝန်ပေးအပ်ခဲ့ကြောင်း ပြောကြား ခဲ့သည်။ နမ်ယွမ်ခရိုင်တွင် ပြုလုပ်ခဲ့သည့် အစောပိုင်းစစ်တမ်းအရ ပဋိပက္ခ ကာလအတွင်း နေအိမ်ပေါင်း ၈၀ ကျော် ပျက်စီးခဲ့ကြောင်း တွေ့ရှိ ရသည်။

အဆိုပါလုပ်ငန်း၏ ပထမအဆင့်အနေဖြင့် အစိုးရသည် Moo 5 ကျေးရွာရှိ နေထိုင်သူများအတွက် အဆောက်အဦအစိတ်အပိုင်းများဖြင့် ပြုလုပ်ထား သော အိမ် ၁၁ လုံး တည်ဆောက်ပေးခဲ့ပြီး ၎င်းတို့အနက် ၄ လုံးကို ထိခိုက် ခံစားခဲ့ရသည့် ကျေးရွာသားများထံ ပေးအပ်ခဲ့ကြောင်း Phumtham က ပြောကြားခဲ့သည်။ အိမ်တစ်လုံးစီသည် လူ ၂ ဦးမှ ၅ ဦးအထိ နေထိုင် နိုင်ကြောင်း ၎င်းက ဖြည့်စွက်ပြောကြားခဲ့သည်။ 

ပြန်လည်တည်ဆောက်ရေး လုပ်ငန်းများကို ကူညီရန် ယူဘွန်ရာဇဌာနီ ဗဟိုအကျဉ်းထောင်မှ စည်းကမ်းလိုက်နာသူ အကျဉ်းသားများအား ပျက်စီး နေသော အိမ်များကို ပြုပြင်ရန်နှင့် ဖျက်သိမ်းရန် အကူအညီတောင်းခံ ခဲ့ပြီး ၎င်းတို့အား လူမှုအသိုင်းအဝိုင်းအတွက် ပံ့ပိုးကူညီနိုင်စေရန် အခွင့် အလမ်းဖန်တီးပေးခဲ့သည်။

အဆိုပါကြေညာချက်သည် Phumtham ၏ စနေနေ့ (ဩဂုတ် ၉) က Surin သို့ သွားရောက်ခဲ့သည့် ခရီးစဉ်အပြီးတွင် ထွက်ပေါ်လာခြင်းဖြစ်ပြီး ၎င်းသည် Rajamangal University of Technology ရှိ ရွှေ့ပြောင်း နေထိုင်ရသူ များအတွက် ခိုလှုံရာနေရာကို သွားရောက်လည်ပတ်ခဲ့ပြီး Surin ၊ Si Sa Ket ၊ Buri Ram နှင့် Ubon Ratchathani တို့မှ အုပ်ချုပ်ရေးမှူးများနှင့် အစည်းအဝေးတစ်ခု ပြုလုပ်ခဲ့သည်။

Phumtham သည် အုပ်ချုပ်ရေးမှူးများအား ရွှေ့ပြောင်းနေထိုင်ရသူများ ပြန်လည်နေထိုင်နိုင်ရေး၊ ပစ္စည်းဥစ္စာဆုံးရှုံးမှုများကို အကဲဖြတ်ရေး၊ ထိခိုက် ခံစားရသူများအတွက် လျော်ကြေးငွေများ အမြန်ဆုံးပေးအပ်ရေး နှင့် လုံခြုံရေးလုပ်အားပေးသူများအတွက် ထောက်ပံ့ကြေးများ ပေးအပ်ရန် ညွှန်ကြားခဲ့သည်။ ထို့အပြင် ၎င်းသည် စစ်ဒေသ ၂ အား Si Sa Ket တွင် မြေမြှုပ်မိုင်းများကြောင့် ဒဏ်ရာရခဲ့သည့် စစ်သားများ၏ အခြေအနေကို နီးကပ်စွာ စောင့်ကြည့်ရန် အမိန့်ပေးခဲ့သည်။

ယာယီဝန်ကြီးချုပ်ဖြစ်သူက နိုင်ငံခြားရေးဝန်ကြီးဌာနသည် ကမ္ဘောဒီးယား ထံ ကန့်ကွက်စာပေးပို့ခဲ့ပြီး ဖနွမ်းပင်အား မြေမြှုပ်မိုင်းရှင်းလင်းရေး လုပ်ငန်း တွင် ပူးပေါင်းဆောင်ရွက်ရန် တောင်းဆိုခဲ့ကြောင်း ပြောကြားခဲ့သည်။

သီးသန့်အနေဖြင့် ထိုင်းလေကြောင်းလိုင်းအာဏာပိုင်အဖွဲ့သည် ဒရုန်း များ အသုံးပြုမှုဆိုင်ရာ ယာယီတားမြစ်ချက်များကို လျှော့ချပေးခဲ့သည်။ တနင်္လာနေ့ (ဩဂုတ် ၁၁) မှစတင်၍ လယ်သမားများနှင့် စိုက်ပျိုးရေး လုပ်ငန်းများသည် ၎င်းတို့၏ ပိုင်ဆိုင်မှုများကို စစ်ဆေးရန်အတွက် ဒရုန်း များကို တင်းကျပ်သော စည်းမျဉ်းများအောက်တွင် ပြန်လည်အသုံးပြုနိုင် မည်ဖြစ်သည်။

ကိုးကား- Bangkok Post

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ပြင်သစ်နိုင်ငံမြောက်ပိုင်းရှိ နျူကလီးယားစွမ်းအင်စက်ရုံတစ်ခု၏ ရေ လည်ပတ်မှုစနစ်အတွင်းသို့ ဂျယ်လီငါးအုပ်ကြီးဝင်ရောက်မှုကြောင့် ယာယီပိတ်သိမ်းခဲ့ရကြောင်း စက်ရုံက တနင်္လာနေ့ (ဩဂုတ် ၁၁) တွင် ထုတ်ပြန်ခဲ့သည်။

EDF စွမ်းအင်အုပ်စု၏ အဆိုအရ Gravelines ရှိ နျူကလီးယားစက်ရုံ၏ အအေးခံစနစ်တွင် ဂျယ်လီငါးများ စုပြုံဝင်ရောက်ကာ စွန့်ထုတ်စနစ်များ ပိတ်ဆို့ခဲ့သည်။ များပြားသော ဂျယ်လီငါးအုပ်ကြီး အမှတ်မထင် ဝင်ရောက် မှုကြောင့် စက်ရုံ၏ ဓာတ်အားထုတ်လုပ်သည့် ယူနစ် ၄ ခု အလိုအလျောက်ရပ်ဆိုင်းသွားခဲ့သည်။ အခြားယူနစ် ၂ ခုမှာလည်း ပြုပြင် ထိန်းသိမ်းမှုကြောင့် လည်ပတ်နိုင်ခြင်းမရှိသဖြင့် စက်ရုံတစ်ခုလုံး လည်ပတ်မှု ရပ်နားခဲ့ရသည်။

တနင်္ဂနွေနေ့ (ဩဂုတ် ၁၀) ညနက်ပိုင်းက ဖြစ်ပွားခဲ့သော အဆိုပါ ဖြစ်ရပ် သည် "စက်ရုံ၏လုံခြုံရေး၊ ဝန်ထမ်းများ၏ဘေးကင်းရေး သို့မဟုတ် ပတ်ဝန်းကျင်အပေါ် သက်ရောက်မှုမရှိကြောင်း" EDF က ပြောကြားခဲ့ပြီး ဂျယ်လီငါးများသည် "နျူကလီးယားနှင့်မသက်ဆိုင်သော အစိတ်အပိုင်း သို့သာ ရောက်ရှိခဲ့သည်" ဟု ဖြည့်စွက်ခဲ့သည်။

စွမ်းအင်အုပ်စု EDF မှ ဖြည့်စွက်ပြောကြားရာတွင် "စက်ရုံအဖွဲ့များက လုံခြုံစွာပြန်လည်စတင်နိုင်ရန် လိုအပ်သော စစ်ဆေးမှုများနှင့် ပြုပြင်မှု များကို အလျင်အမြန်လုပ်ဆောင်နေပါသည်" ဟု ဖော်ပြခဲ့သည်။

ထိုနျူကလီးယားစက်ရုံသည် မြောက်ပင်လယ်နှင့်ဆက်သွယ်ထားသော ရေလမ်းကြောင်းမှ အအေးခံရေကို စုပ်ယူသုံးစွဲကာ လည်ပတ်လျက်ရှိပြီး ထိုနေရာတွင် ဂျယ်လီငါးမျိုးစိတ်များစွာ နေထိုင်လျက်ရှိသည်။ အဆိုပါ ဖြစ်ရပ်တွင် ပါဝင်နေသော ဂျယ်လီငါးအမျိုးအစားနှင့်ပတ်သက်၍ စက်ရုံက အသေးစိတ်မဖော်ပြခဲ့ပေ။

ကမ္ဘာတစ်ဝှမ်းရှိ နျူကလီးယားနှင့် သာမန်စွမ်းအင်စက်ရုံများ၏ အအေးခံ စနစ်များအတွင်း ဂျယ်လီငါးများ ဝင်ရောက်ခြင်း သို့မဟုတ် ရေစွန့်ထုတ် ပိုက်များ ပိတ်ဆို့ခြင်းများ အကြိမ်ကြိမ်ဖြစ်ပွားခဲ့ဖူးသည်။

Gravelines စွမ်းအင်စက်ရုံသည် ပြင်သစ်နိုင်ငံ၏ အကြီးဆုံး နျူကလီးယား စက်ရုံများထဲမှ တစ်ခုဖြစ်ပြီး ပြင်သစ်နိုင်ငံ၏ လျှပ်စစ်ဓာတ်အား ၇၀% ကို နျူကလီးယားစက်ရုံများမှ ထုတ်လုပ်ပေးလျက်ရှိသည်။ ထိုစက်ရုံရှိ ယူနစ် ၆ ခုတွင် တစ်ခုစီအတွက် အမြင့်ဆုံးဓာတ်အား ထုတ်လုပ်နိုင်မှု စွမ်းရည်မှာ ၉၀၀ မဂ္ဂါဝပ်ရှိပြီး ထိုစက်ရုံတစ်ခုတည်းဖြင့် အိမ်ထောင်စု ပေါင်း ၅ သန်းခန့်အား လျှပ်စစ်ဓာတ်အားပေးနိုင်စွမ်းရှိသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ယူကေ၏ Coulport လက်နက်သိုလှောင်ရုံမှ ရေဒီယိုသတ္တိကြွရေများ စိမ့်ထွက်မှုသည် စကော့တလန်အနောက်ပိုင်းရှိ Loch Long အိုင်ထဲသို့ ပိုက်အဟောင်းများ ကွဲအက်ပြီးနောက် အကြိမ်ကြိမ်ဖြစ်ပွားခဲ့ကြောင်း The Ferret ဝက်ဘ်ဆိုဒ်မှ ထုတ်ပြန်ခဲ့သော စကော့တလန် ပတ်ဝန်းကျင် ကာကွယ်ရေး အေဂျင်စီ (SEPA) ၏ မှတ်တမ်းများအရ သိရသည်။

Royal Naval Armaments Depot တွင် ဗြိတိန်ရေတပ်၏ Trident-class ရေငုပ်သင်္ဘောများအတွက် အဏုမြူထိပ်ဖူးများကို သိုလှောင်ထားခြင်း ဖြစ်ပြီး SEPA ၏ အဆိုအရ ယိုစိမ့်မှုဖြစ်စဉ်များတွင် ရေပိုက် ၁,၅၀၀ အနက် တစ်ဝက်ခန့်သည် ၎င်းတို့၏ သက်တမ်းကုန်ဆုံးနေပြီဖြစ်သည်။ထိုမတော်တဆမှုများသည် ထိန်းသိမ်းမှုအားနည်းချက်ကြောင့်ဖြစ်ပြီးရေဒီယိုသတ္တိကြွ Tritium (အဏုမြူထိပ်ဖူးများတွင် အသုံးပြုသည့် ဒြပ်စင်) အနည်းငယ် စိမ့်ထွက်ကာ ရေကူးသမား၊ ရေငုပ်သမား၊ လှေလှော်သူနှင့် ငါးဖမ်းသမားများ အများဆုံးလာရောက်သည့် Loch Long အိုင်ထဲသို့ ဝင်ရောက်ခဲ့သည်။ Tritium ပမာဏ အနည်းငယ်သည် ပုံမှန်အားဖြင့်အန္တရာယ်မရှိသော်လည်း မြင့်မားသော (သို့) ကြာရှည်ထိတွေ့မှုသည် ကင်ဆာဖြစ်နိုင်ခြေကို မြင့်တက်စေနိုင်သည်။

မှတ်တမ်းများအရ ၂၀၁၀ ပြည့်နှစ် နှင့် ၂၀၁၉ ခုနှစ် တွင် နှစ်ကြိမ် ပိုက်များ ကွဲအက်ခဲ့ကြောင်း ဖော်ပြထားသည်။ ၂၀၁၉ခုနှစ်၊ ဩဂုတ်လတွင် နျူထိပ်ဖူးများသိုလှောင်သည့်နေရာ၌ ရေလျှံမှုဖြစ်ပေါ်ပြီး မသန့်စင်သော ရေများသည် ဆက်စပ်နေသော ရေထုတ်မြောင်းမှတစ်ဆင့် အိုင်ထဲသို့ စီးဝင်ခဲ့သည်။ SEPA က Tritium ပမာဏသည် အလွန်နည်းပါးပြီး ပြည်သူ့ ကျန်းမာရေးအတွက် အန္တရာယ်မရှိကြောင်း ပြောကြားခဲ့သည်။

ဗြိတိန်ကာကွယ်ရေးဝန်ကြီးဌာနသည် ၂၀၂၀ ပြည့်နှစ်တွင် နောက်ထပ် ပိုက်ကွဲအက်မှုများကို ကာကွယ်ရန် အစီအမံများ ချမှတ်ရန် သဘောတူ ခဲ့သော်လည်း SEPA က နောက်ပိုင်းတွင် အဆိုပါ လုပ်ငန်းစဉ်များ နှေးကွေးပြီး စီမံခန့်ခွဲမှုဆိုင်ရာ အားနည်းချက်များ ဆက်လက်ရှိနေကြောင်း ဖော်ပြခဲ့သည်။ ၂၀၂၁ ခုနှစ် တွင် နောက်ထပ် ပိုက်ကွဲအက်မှု နှစ်ကြိမ် ဖြစ်ပွားခဲ့ရာ တစ်ခုမှာ အခြားရေဒီယိုသတ္တိကြွပစ္စည်းများ သိုလှောင်ထားသော နေရာတစ်ခုတွင် ဖြစ်ပွားခဲ့ပြီး ၂၀၂၂ တွင် SEPA က ထပ်မံစစ်ဆေးမှု ပြုလုပ်ခဲ့သည်။

သတင်းတွင် ဖော်ပြချက်အရ အဆိုပါ စာရွက်စာတမ်းများကို စကော့တလန် ၏ သတင်းလွတ်လပ်ခွင့်ဥပဒေအရ ခြောက်နှစ်ကြာ အတိုက်အခံ လုပ်ဆောင် ခဲ့ပြီးနောက်ပိုင်းတွင် ထုတ်ပြန်ခဲ့ခြင်းဖြစ်သည်။ စကော့တလန် သတင်း အချက်အလက်ကော်မရှင်နာ David Hamilton က ဇွန်လတွင် လုံခြုံရေး အတွက် လျှို့ဝှက်ထားရန် လိုအပ်ကြောင်း စစ်တပ်က ကန့်ကွက်သည့် အချက်ကို ပယ်ချပြီး မှတ်တမ်းအများစုကို ပြည်သူသိရှိစေရန် အမိန့် ချမှတ်ခဲ့သည်။

SEPA က ထိုဖြစ်စဉ်များတွင် ရေဒီယိုသတ္တိကြွမှုပမာဏသည် အလွန် နည်းပါးပြီး လူအများ၏ကျန်းမာရေးကို အန္တရာယ်မဖြစ်စေကြောင်းပြောကြားသော်လည်း ထိန်းသိမ်းမှုနှင့် ပိုင်ဆိုင်မှုစီမံခန့်ခွဲမှုဆိုင်ရာအားနည်းချက်များကြောင့် ချိတ်ဆက်ဆောင်ရွက်မှုပျက်ပြားကာ မလို အပ်သော ရေဒီယိုသတ္တိကြွ စွန့်ပစ်ပစ္စည်းများ ယိုစိမ့်ခြင်းကို သွယ်ဝိုက် ဖြစ်စေခဲ့သည်ဟု ဖော်ပြခဲ့သည်။ မေလတွင် The Ferret က Faslane ရေတပ်စခန်းတွင် ၂၀၂၃ မှစ၍ ရေဒီယိုသတ္တိကြွပစ္စည်းများ ယိုစိမ့်ခဲ့သည့် ဖြစ်စဉ် ၁၂ ခု ရှိခဲ့ကြောင်း သတင်းထုတ်ပြန်ခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ဂျပန်၏ အကြီးဆုံးသတင်းစာဖြစ်သည့် Yomiuri ၏ ထုတ်ဝေမှု (၃) မျိုးက AI ကုမ္ပဏီ Perplexity အား ခွင့်ပြုချက်မရှိဘဲ သတင်းဆောင်းပါး များနှင့် ဓာတ်ပုံများကို အသုံးပြုသည်ဟု စွပ်စွဲကာ တရားစွဲဆိုလိုက် ပါသည်။

ဩဂုတ်လ ၁၀ ရက်တွင် Yomiuri က Tokyo District Court သို့ Yomiuri Shimbun၊ Yomiuri Shimbun Osaka နှင့် Yomiuri Shimbun Seibu စာစောင် (၃) ခုအတွက် အမေရိကန် AI ကုမ္ပဏီ Perplexity ကို ၎င်းတို့၏ ကြော်ငြာများနှင့် သတင်းအချက်အလက်များကို ခွင့်ပြုချက်မရှိဘဲ အသုံးပြုခြင်းမှ ရပ်တန့်ရန် နှင့် ယန်း ၂.၁၇ ဘီလီယံ (အမေရိကန်ဒေါ်လာ ၁၅ သန်းနီးပါး) လျော်ကြေးပေးရန် တောင်းဆိုသည့် တရားစွဲဆိုမှု တင်သွင်း ခဲ့ကြောင်း ကြေညာခဲ့သည်။

ဂျပန်၏ အကြီးဆုံးသတင်းဌာနတစ်ခုက အနောက်တိုင်း AI ကုမ္ပဏီ တစ်ခုကို တရားစွဲဆိုသည်မှာ ပထမဆုံးအကြိမ်ဖြစ်သည်။ World Association of Newspapers and News Publishers (WAN-IFRA) ၏ အဆိုအရ Yomiuri သည် ဂျပန်၏ အကြီးဆုံးသတင်းစာဖြစ်ပြီး နေ့စဉ် သတင်းစာစောင်ရေ ၇ သန်းမှ ၉ သန်းအထိ ဖြန့်ချိသည့် ကမ္ဘာ့အကြီးဆုံး ပုံနှိပ်သတင်းစာလည်း ဖြစ်ပါသည်။

တရားစွဲဆိုမှုတွင် Yomiuri သတင်းစာက Perplexity အား ဖေဖော်ဝါရီမှ ဇွန်လအတွင်း ခွင့်ပြုချက်မရှိဘဲ သတင်းစာ၏ ဝက်ဘ်ဆိုက်မှ ဆောင်းပါး ၁၁၉,၄၆၇ ပုဒ်ကို ခိုးယူကူးယူပြီး စာဖတ်သူများအား အလားတူ အကြောင်းအရာများ ပြန်လည်ဖော်ပြခဲ့သည်ဟု စွပ်စွဲထားသည်။ ထိုသို့ ပြုလုပ်ခြင်းသည် ဂျပန်၏ မူပိုင်ခွင့်ဥပဒေကို ချိုးဖောက်သည်ဟု သတင်းစာ က ဆိုသည်။

Yomiuri သည် ဆောင်းပါးတစ်ပုဒ်လျှင် ယန်း ၁၆,၅၀၀ (ပုံမှန် လိုင်စင် ကြေးနှုန်း) တောင်းဆိုထားပြီး နောက်ထပ်စုံစမ်းစစ်ဆေးမှုများ၏ ရလဒ် အရ အဆိုပါ ပမာဏ ပိုမိုမြင့်တက်လာနိုင်သည်။ ထို့အပြင် Perplexity ၏ ခွင့်ပြုချက်မရှိသော အကြောင်းအရာများ ဖြန့်ဝေမှုကြောင့် Yomiuri ၏ ဝက်ဘ်ဆိုက်သို့ ဝင်ရောက်ကြည့်ရှုမှု ကျဆင်းကာ ကြော်ငြာဝင်ငွေများ ထိခိုက်စေခဲ့သည်ဟု သတင်းစာက ဆက်လက်ဆိုသည်။

ထုတ်ပြန်ချက်တောင်းခံမှုကို တုံ့ပြန်သည့်အနေဖြင့် Perplexity မှ "ဂျပန် နိုင်ငံတွင် ဖြစ်ပေါ်စေခဲ့သော အချက်လက်မှားယွင်းမှုအတွက် နားလည်မှု လွဲမှားမှုဖြစ်စေခြင်းအား တောင်းပန်ပါသည်" ဟု ပြောကြားခဲ့သည်။ "မိမိ တို့အနေဖြင့် ယခုကိစ္စကို အလွန်အလေးအနက်ထားပါသည်။ Perplexity အနေဖြင့် AI ခေတ်တွင် ပေါ်ထွက်လာသည့် စီးပွားရေးပုံစံသစ်များမှ ထုတ်ဝေသူများနှင့် သတင်းထောက်များ အကျိုးကျေးဇူးရရှိစေရန် ကတိ ပြုထားပါသည်" ဟု ၎င်းတို့၏ ထုတ်ပြန်ချက်တွင် ဖော်ပြထားသည်။

ကိုးကာ- VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

တရုတ်နိုင်ငံ မြောက်ပိုင်း အတွင်းမွန်ဂိုလီးယားဒေသတွင် မြင်းစီးပြပွဲဖြင့် Nadam fair ပွဲတော် ဖွင့်ပွဲအခမ်းအနားကို ၂၀၂၅ ခုနှစ် ဩဂုတ်လ ၈ ရက်တွင် ကျင်းပပြုလုပ်ခဲ့ကြောင်း ဆင်ဟွာသတင်းဌာနက ဖော်ပြထား ပါသည်။

ကိုးကား- ဆင်ဟွာ

ထိုင်းနိုင်ငံရှိ အကြီးစားပုဂ္ဂလိက ဆေးရုံတစ်ခုအား လူနာမှတ်တမ်း စာရွက်စာတမ်းများကို မုန့်ထုပ်သည့်အိတ်အဖြစ် အသုံးပြုမှု တွေ့ရှိရသည့် ဖြစ်စဉ်ကြောင့် ဘတ်ငွေ ၁.၂ သန်း ဒဏ်ငွေချမှတ်ခဲ့ကြောင်း နိုင်ငံ၏ အချက်အလက် စီမံထိန်းသိမ်းရေးအဖွဲ့က ထုတ်ပြန်ခဲ့သည်။

အဆိုပါဖြစ်စဉ်သည် အစိုးရ၏ ကိုယ်ရေးကိုယ်တာ အချက်အလက် ကာကွယ်ရေးကော်မတီ (PDPC) မှ ထုတ်ပြန်ခဲ့သည့် ဒေတာဥပဒေချိုးဖောက်မှုများအတွက် အရေးယူခံရသော အဖွဲ့အစည်း ၅ ခုအနက် တစ်ခု အပါအဝင်ဖြစ်သည်။

အမည်မဖော်လိုသော ဆေးရုံသည် ၎င်း၏လူနာမှတ်ပုံတင် စာရွက်စာတမ်း များကို ဒေသအခေါ် khanom Tokyo ဟုသိကြသည့် မုန့်ကြွပ်ထုပ်များ အဖြစ် အသုံးပြုနေသည်ကို တွေ့ရှိပြီးနောက် စစ်ဆေးခံခဲ့ရသည်။ကော်မတီ၏ စုံစမ်းစစ်ဆေးမှုအရ ဖျက်ဆီးရန်ပို့ဆောင်ပြီးနောက် ကန့်သတ် ထားသည့်ဖိုင်ပေါင်း ၁,၀၀၀ ကျော် ပျောက်ဆုံးနေကြောင်း ဖော်ထုတ် တွေ့ရှိခဲ့သည်။

ဆေးရုံက စာရွက်စာတမ်းများကိုဖျက်ဆီးရန် မိတ်ဖက်လုပ်ငန်းငယ် တစ်ခုအား အပ်နှံခဲ့သော်လည်း နောက်ဆက်တွဲ ကြပ်မတ်မှု မပြုခဲ့ကြောင်း ဝန်ခံခဲ့သည်။ လုပ်ငန်းပိုင်ရှင်မှ အမှားကိုဝန်ခံကာ စာရွက်စာတမ်းများကို ၎င်း၏နေအိမ်တွင်သိမ်းဆည်းထားစဉ် ပျောက်ဆုံးမှုဖြစ်ပွားခဲ့ကြောင်း ရှင်းလင်းခဲ့သည်။ PDPC မှ ဆေးရုံအား ဘတ်ငွေ ၁.၂၁ သန်း ဒဏ်ငွေ ချမှတ်ခဲ့ပြီး စာရွက်စာတမ်းဖျက်ဆီးရေးလုပ်ငန်းပိုင်ရှင်အား ဘတ်ငွေ ၁၆,၉၄၀ ဒဏ်ငွေချမှတ်ခဲ့သည်။

အခြားဖြစ်စဉ်တစ်ခုတွင် ပြည်သူ့အေဂျင်စီတစ်ခု၏ ဝက်ဘ်အက်ပ်လီကေးရှင်း ကို ဆိုက်ဘာတိုက်ခိုက်မှုခံရပြီး နိုင်ငံသား ၂၀၀,၀၀၀ ကျော်၏ ကိုယ်ရေး ကိုယ်တာအချက်အလက်များ ပေါက်ကြားမှုဖြစ်ပွားခဲ့ကြောင်း ကော်မတီ မှ ဖော်ထုတ်ခဲ့သည်။ အဆိုပါဒေတာများကို နောက်ပိုင်းတွင် တရားမဝင် အင်တာနက်တွင် ရောင်းချခဲ့သည်။ စုံစမ်းစစ်ဆေးမှုတွင် အားနည်းသော စကားဝှက်များ၊ အန္တရာယ်အကဲဖြတ်မှုမရှိခြင်းနှင့် ဝက်ဘ်အက်ပ် ရေးဆွဲသူ နှင့် ဒေတာစီမံခန့်ခွဲမှုသဘောတူညီချက်မရှိခြင်းစသည့် လုံခြုံရေးအားနည်းချက် များကို တွေ့ရှိခဲ့သည်။ အေဂျင်စီနှင့် ၎င်း၏ကန်ထရိုက် လုပ်ငန်းရှင်တို့အား စုစုပေါင်း ဘတ်ငွေ ၁၅၃,၁၂၀ ဒဏ်ငွေချမှတ်ခဲ့သည်။

အခြားဖြစ်စဉ် ၃ ခုတွင် အွန်လိုင်းလက်လီနှင့် ဖြန့်ဖြူးရေးလုပ်ငန်းများမှ ဒေတာပေါက်ကြားမှုများပါဝင်ပြီး ဘတ်ငွေ ၅၀၀,၀၀၀ မှ ၇ သန်းအထိ ဒဏ်ငွေများချမှတ်ခံခဲ့ရသည်။ ၂၀၂၄ ခုနှစ်မှစတင်၍ PDPC သည် ကိုယ်ရေးကိုယ်တာဒေတာချိုးဖောက်မှုဖြစ်စဉ် ၆ ခုကို ဖြေရှင်းခဲ့ပြီး စုစုပေါင်း ဘတ်ငွေ ၂၁.၅ သန်း ဒဏ်ငွေချမှတ်ခဲ့သည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂