နိုင်ငံတော်သမ္မတရုံးဝန်ကြီးဌာနများ Website ၏ နည်းပညာပိုင်းဆိုင်ရာ ပြင်ဆင်မြှင့်တင်မှုများအား ဆောင်ရွက်နေခြင်းကြောင့် (၅-၈-၂၀၂၅)ရက်နေ့ (၁၈၀၀) အချိန်မှစ၍ (၆-၈-၂၀၂၅) ရက်နေ့ (၁၆၀၀) အချိန်အထိ သတင်းလွှင့်တင်မှု ရပ်ဆိုင်းခဲ့ရပြီး ပုံမှန်သတင်းလွှင့်တင်ဖော်ပြမှုများ ဆက်လက်ဆောင်ရွက်သွားမည်ဖြစ်ပါကြောင်း တင်ပြအပ်ပါသည်။

နေပြည်တော် ဇူလိုင် ၃၀

လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနနှင့် အိန္ဒိယသမ္မတနိုင်ငံအစိုးရတို့အကြား ဆောင်ရွက်မည့် မြန်မာနိုင်ငံ Digital Identity အတွက် ရှေ့ပြေးစီမံကိန်း ပူးပေါင်းဆောင်ရွက်ခြင်းဆိုင်ရာ နားလည်မှုစာချွန်လွှာလက်မှတ်ရေးထိုးပွဲအခမ်းအနားကို ယမန်နေ့နံနက် ၁၀ နာရီက နေပြည်တော်ရှိ အဆိုပါဝန်ကြီးဌာနအစည်းအဝေးခန်းမ၌ ကျင်းပသည်။

အခမ်းအနားသို့ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးဦးမြင့်ကြိုင်၊ ဒုတိယဝန်ကြီး ဦးဌေးလှိုင်နှင့် ဒေါက်တာမျိုးသန့်၊ မြန်မာနိုင်ငံဆိုင်ရာ အိန္ဒိယသမ္မတနိုင်ငံ သံအမတ်ကြီး Mr. Abhay Thakur နှင့်တာဝန်ရှိသူများ၊ အမြဲတမ်းအတွင်းဝန်နှင့် တာဝန်ရှိသူများ တက်ရောက်ကြသည်။

ဦးစွာ ပြည်ထောင်စုဝန်ကြီးက မြန်မာနိုင်ငံ၌ e-Government စနစ်ကို ဖော်ဆောင်နေချိန်တွင် အခြေခံအကျဆုံးဖြစ်သည့် e-ID စနစ်အတွက် လိုအပ်သည့် IT နည်းပညာများကို အိန္ဒိယနိုင်ငံအစိုးရက ပံ့ပိုးကူညီပေးခြင်းဖြစ်ရာ နိုင်ငံအတွက်တန်ဖိုးရှိသည့် အကူအညီဖြစ်ပါကြောင်း။

ယခု မြန်မာ-အိန္ဒိယ နှစ်နိုင်ငံ ပူးပေါင်းဆောင်ရွက်မည့် နားလည်မှုစာချွန်လွှာ (MoU) သည် မြန်မာနိုင်ငံ၏ Digital ID ရှေ့ပြေးစီမံကိန်း အကောင်အထည်ဖော်ရာ၌ အိန္ဒိယနိုင်ငံအစိုးရထံမှ နည်းပညာဆိုင်ရာအကူအညီများ မျှဝေဆောင်ရွက်နိုင်ရေးအတွက် ဖြစ်ပါကြောင်း၊ အိန္ဒိယနိုင်ငံအစိုးရအနေဖြင့် မြန်မာနိုင်ငံ၏ Digital Identity ဆိုင်ရာနည်းပညာများနှင့်ပတ်သက်၍ ယခုကဲ့သို့ နားလည်မှုစာချွန်လွှာ(MoU) လက်မှတ်ရေးထိုးကာ လိုအပ်သည်များ ပံ့ပိုးကူညီဆောင်ရွက် ပေးသကဲ့သို့ ပိုမိုကောင်းမွန်သည့် အကြံပြုချက်များ၊ ပိုမိုထိရောက်မြန်ဆန်သည့် အကူအညီများနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးဆိုင်ရာ အတွေ့အကြုံများကို ဆက်လက်ပံ့ပိုးကူညီမျှဝေစေလိုပါကြောင်း ရှင်းလင်းပြောကြားသည်။

ထို့နောက် မြန်မာနိုင်ငံဆိုင်ရာ အိန္ဒိယသမ္မတနိုင်ငံသံအမတ်ကြီး Mr. Abhay Thakur က မြန်မာနိုင်ငံ Digital Identity အတွက် ရှေ့ပြေးစီမံကိန်းလုပ်ငန်းစဉ်များအပေါ် အိန္ဒိယနိုင်ငံအစိုးရက ပံ့ပိုးကူညီ ပူးပေါင်းဆောင်ရွက်သွားမည့်အခြေအနေနှင့် စပ်လျဉ်း၍ ရှင်းလင်းပြောကြားသည်။

ယင်းနောက် ပြည်ထောင်စုဝန်ကြီးနှင့် အိန္ဒိယသမ္မတနိုင်ငံသံအမတ်ကြီးတို့သည် မြန်မာနိုင်ငံ Digital Identity အတွက် ရှေ့ပြေးစီမံကိန်း ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာ (MoU) ကို လက်မှတ်ရေးထိုးကြပြီး အပြန်အလှန်လဲလှယ်ကြသည်။

မြန်မာနိုင်ငံ၌ အကောင်အထည်ဖော်ဆောင်ရွက် နေသည့် e-Government စနစ်၏ အခြေခံအကျဆုံးဖြစ်သည့် e-ID စနစ်အတွက် Digital Unique Identity Program အကောင်အထည်ဖော် ဆောင်ရွက်ရာတွင် အိန္ဒိယနိုင်ငံ၏ နည်းပညာ၊ မူဝါဒ၊ စည်းမျဉ်းစည်းကမ်းနှင့် အတွေ့အကြုံများဖလှယ်ရေး၊ အစိုးရအရာရှိများနှင့် ကျွမ်းကျင်သူများ နည်းပညာဖလှယ်ရေးနှင့် မြန်မာနိုင်ငံ Digital ID Program ကို စမ်းသပ်အကောင်အထည်ဖော်ရာတွင် အပြန်အလှန် ပူးပေါင်း ဆောင်ရွက်ရေးအတွက် ယခုရှေ့ပြေးစီမံကိန်း ပူးပေါင်းဆောင်ရွက်ခြင်းဆိုင်ရာ နားလည်မှုစာချွန်လွှာ (MoU) ကို လက်မှတ်ရေးထိုးဆောင်ရွက်ခြင်းဖြစ်ကြောင်း သိရသည်။

MOI

နေပြည်တော် ဇူလိုင် ၂၉

၂၀၂၅ -၂၀၂၈ ခုနှစ် ကာလအတွက် ပြည်ထောင်စုသမ္မတ မြန်မာနိုင်ငံတော်နှင့် အိန္ဒိယသမ္မတနိုင်ငံတို့အကြား သိပ္ပံနှင့်နည်းပညာ ပူးပေါင်းဆောင်ရွက်မှုအစီအစဉ်- Programme of Cooperation (POC) in Science and Technology လက်မှတ်‌ရေးထိုးပွဲကို ယနေ့နံနက်ပိုင်းတွင် ရုံးအမှတ် (၂၁) သိပ္ပံနှင့် နည်းပညာဝန်ကြီးဌာန အစည်းအဝေးခန်းမ၌ ကျင်းပသည်။

တက်ရောက်

အခမ်းအနားသို့ သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်နှင့်အတူ ဒုတိယဝန်ကြီးဒေါက်တာအောင်ဇေယျ၊ အမြဲတမ်းအတွင်းဝန်နှင့် တာဝန် ရှိသူများ တက်ရောက်ကြပြီး ပြည်ထောင်စုသမ္မတမြန်မာနိုင်ငံဆိုင်ရာ အိန္ဒိယသံအမတ်ကြီး Mr Abhay Thakur နှင့်အတူ အိန္ဒိယသံရုံးမှ တာဝန်ရှိသူများ တက်ရောက်ကြသည်။

ဦးစွာ ပြည်ထောင်စုဝန်ကြီး ဒေါက်တာမျိုးသိန်းကျော်နှင့် အိန္ဒိယသံအမတ်ကြီး Mr Abhay Thakur တို့က သိပ္ပံနှင့်နည်းပညာ ပူးပေါင်းဆောင်ရွက်မှုအစီအစဉ်ကို လက်မှတ်ရေးထိုးကြသည်။

အဆိုပါ Programme of Cooperation (POC) ကို ၂၀၁၂-၂၀၁၅ ခုနှစ်နှင့် ၂၀၁၈-၂၀၂၁ ခုနှစ်တို့အတွက် လက်မှတ်ရေးထိုးခဲ့ကြပြီးဖြစ်ပြီး ယခု ၂၀၂၅ ခုနှစ်မှ ၂၀၂၈ ခုနှစ်ကာလအတွင်း သိပ္ပံနှင့်နည်းပညာနယ်ပယ်တွင် နှစ်နိုင်ငံအကြား ပူးပေါင်းဆောင်ရွက်မှု အားကောင်းစေရန်ရည်ရွယ်၍ လက်မှတ်ရေးထိုးချုပ်ဆိုခြင်းဖြစ်သည်။

အဆိုပါ POC ကို လက်မှတ်ရေးထိုးခြင်းဖြင့် သိပ္ပံနှင့်နည်းပညာဆိုင်ရာနယ်ပယ်များအထူးသဖြင့် အစားအသောက်၊ ဆေးဝါးနှင့်စိုက်ပျိုးရေးအပါအဝင် ဇီဝနည်းပညာ၊ နာနိုနည်းပညာ၊ Smart University အတွက် နည်းပညာများ၊ အစိမ်းရောင်နည်းပညာများ၊ စက်ရုပ်နည်းပညာ၊ ဉာဏ်ရည်တုနည်းပညာနှင့် Blockchain နည်းပညာ၊ Virtual Reality နှင့် Augmented Reality (3D ပုံရိပ်ဖော်နည်းပညာများ)၊ Advanced Material Science၊ ပြန်လည် ပြည့်ဖြိုးမြဲစွမ်းအင်၊ လျှပ်စစ်ကားနည်းပညာ၊ ဓာတ်သတ္တုကဏ္ဍ၊ Geospatial Technology နှင့် သိပ္ပံနှင့်နည်းပညာဆိုင်ရာ မဟာဗျူဟာစီမံကိန်းများ လေ့လာဆန်းစစ်အကဲဖြတ်ခြင်း နယ်ပယ်များတွင် ပူးပေါင်းဆောင်ရွက်သွားကြမည်ဖြစ်ကြောင်း သိရသည်။

MOI

အိုင်တီ၊ ဒီဂျစ်တယ် မီဒီယာပညာရပ်များကို ဟောပြောပို့ချမည့် “သတင်းစာပညာ သိမှတ်ဖွယ်ရာများ “သင်တန်းကို ရန်ကုန်မြို့၊ ဗိုလ်တထောင်မြို့နယ်၊ သိမ်ဖြူလမ်းရှိ သတင်းနှင့်စာနယ်ဇင်းလုပ်ငန်း၊ ရွှေ ဥဒေါင်းခန်းမတွင် ဇူလိုင် ၁၄ ရက်မှ ဇူလိုင် ၁၈ ရက်အထိ ၅ ရက်ကြာ အခမဲ့ ဖွင့်လှစ်ပို့ချသွားမည်ဖြစ်သည်။

သင်တန်းအား ပြန်ကြားရေးဝန်ကြီးဌာန၏ ခွင့်ပြုချက်ဖြင့် မြန်မာနိုင်ငံသတင်းစာဆရာအသင်းမှကြီးမှူး၍ သင်တန်းဆရာနှင့် Guest Speaker များအဖြစ် ဆရာဟိန်းလတ်၊ ဆရာငြိမ်းမင်း၊ ဆရာအောင်စိုးဦး၊ ဆရာကြည်စိုးထွန်း၊ ကိုကို(စက်မှုတက္ကသိုလ်)၊ မောင်မျိုးမင်း(ရင်တွင်းဖြစ်)၊ ဌေးလင်းနှင့် သတင်းမီဒီယာများမှ ဆရာများက ဟောပြောပို့ချသွားမည်ဖြစ်ကြောင်း သိရသည်။

ထို့ကြောင့် မြန်မာနိုင်ငံသတင်းစာဆရာအသင်း အသင်းဝင်များ၊ အသင်းဝင်ရန်ဆန္ဒရှိသူများ၊ သတင်းမီဒီယာပညာကို စိတ်ပါဝင်စားသူများတက်ရောက်နိုင်ပြီး သင်တန်းချိန်အား ပထမပိုင်းအနေဖြင့် နံနက် ၁၀ နာရီမှမွန်းတည့် ၁၂ နာရီထိ ဒုတိယပိုင်းအား မွန်းလွဲ ၁ နာရီမှနေ့လည် ၃ နာရီ အထိလျာထားသတ်မှတ်ထားကာ သင်တန်းပြီးဆုံးပါက သင်တန်း ဆင်းလက်မှတ်ပေးအပ်သွားမည်ဖြစ်ကြောင်း သိရသည်။

သင်တန်းသားဦးရေအား (၃၀)ဦးမှ(၄၀)ဦးအတွင်းသာ လက်ခံသင်ကြားပေးသွားမည်ဖြစ်၍ တက်ရောက်လိုသူများအနေဖြင့် ဦးသိန်းအေး(MJA Office) ဖုန်း – ၀၉ ၇၇၇ ၃၉၀ ၉၈၇ ၊ e-mail : – envoy.theinaye@gmail.com နှင့် MJA ရုံးအဖွဲ့ ဖုန်း – ၀၉ ၂၅၁၀၁၅၁၁၉ တို့သို့ ဇူလိုင် ၁၃ ရက်မွန်းတည့် ၁၂ နာရီနောက်ဆုံးးထားပြီး ဆက်သွယ်စာရင်းပေးသွင်းရမည်ဖြစ်ကြောင်း သိရသည်။

Popular Myanmar

နေပြည်တော် ဇူလိုင် ၈

ဒစ်ဂျစ်တယ်စီးပွားရေးဖွံ့ဖြိုးတိုးတက်မှုကော်မတီ၊ ဆန်းသစ်တီထွင်မှုနှင့် ဒစ်ဂျစ်တယ်အတတ်ပညာမြှင့်တင်ရေးလုပ်ငန်းကော်မတီက ရန်ကုန်ရှိ အစိုးရနည်းပညာကောလိပ်(တောင်ဒဂုံ) တွင် AI ကျင့်ဝတ်နှင့် ဆိုက်ဘာလုံခြုံရေးဆိုင်ရာ အသိပညာပေးဆွေးနွေးပွဲ (၁/၂၀၂၅) ကို ယနေ့ မွန်းလွဲပိုင်းတွင် Hybrid စနစ်ဖြင့် ကျင်းပရာ လုပ်ငန်းကော်မတီဥက္ကဋ္ဌ သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျ တက်ရောက်သည်။

တိုက်တွန်းပြောကြား

ဦးစွာ ဒုတိယဝန်ကြီးက နိုင်ငံ့ရေရှည်အကျိုးစီးပွားကို လွှမ်းခြုံဖော်ဆောင်ပေးနိုင်မည့် ဒစ်ဂျစ်တယ်လူ့အဖွဲ့အစည်း ဖြစ်ထွန်း လာစေရေးအတွက် ဒစ်ဂျစ်တယ် ကျင့်ဝတ်လိုက်နာစောင့်ထိန်းမှုနှင့် ဆိုက်ဘာလုံခြုံရေးထိန်းချုပ်ဆောင်ရွက်မှုတို့ဆိုင်ရာ အသိပညာများ၊ နည်းပညာများ မြှင့်တင်ဆောင်ရွက်မှု၊ စံအရည်အသွေးပြည့်မီသည့် IT နည်းပညာရှင်များ စဉ်ဆက်မပြတ် ပျိုးထောင်ပေးမှုတို့ကို အလေးထားဆောင်ရွက်ရန် လိုအပ်ကြောင်း တိုက်တွန်းပြောကြားသည်။

ထို့နောက် စကားဝိုင်းဆွေးနွေးပွဲကို ကျင်းပရာ မြန်မာနိုင်ငံ လေကြောင်းနှင့်အာကာသပညာ တက္ကသိုလ်မှ တွဲဖက်ပါမောက္ခ ဒေါက်တာအောင်ဝင်းထွဋ်၊ အစိုးရနည်းပညာကောလိပ် (တောင်ဒဂုံ) ကျောင်းအုပ်ကြီး ဒေါက်တာသန်းထိုက်၊ စက်မှုနည်းပညာ လေ့ကျင့်သင်ကြားရေး သင်တန်း ကျောင်းမှ ကထိက ဦးအောင်ခိုင်၊ Myanmar Digital Economy Association (MDEA) အမှုဆောင် ဒါရိုက်တာ ဦးအောင်ကိုကိုဦးနှင့် Nex Bridge Global ကုမ္ပဏီ အမှုဆောင်အရာရှိချုပ် ဦးသက် နောင်စိုးတို့က MSME ဆိုင်ရာ AI မော်ဒယ်များ အသုံးပြုမှု၊ AI ကျင့်ဝတ်နှင့် ဆိုက်ဘာလုံခြုံရေးဆိုင်ရာ အသိပညာများနှင့် နည်းပညာဗဟုသုတများကို ဆွေးနွေးကြပြီး အစိုးရနည်းပညာအထက်တန်းကျောင်း (ရွာမ) ကျောင်းအုပ်ကြီး ဦးဇေယျာအောင်က ဆွေးနွေးပွဲကို ပံ့ပိုးဆောင်ရွက် ပေးသည်။

ယင်းနောက် ဒုတိယဝန်ကြီးက လိုအပ်သည်များ ဖြည့်စွက်ဆွေးနွေးပြီး သုတေသနနှင့်တီထွင် ဆန်းသစ်မှုဦးစီးဌာနရှိ သတင်းအချက်အလက်နှင့်ဆက်သွယ်ရေးနည်းပညာသုတေသနဌာန ဒုတိယ ညွှန်ကြားရေးမှူးချုပ်နှင့် ကျောင်းသားများက သိလိုသည်များကို ရင်းနှီးပွင့်လင်းစွာ အပြန်အလှန် မေးမြန်းဆွေးနွေးကြကာ MDEA အမှုဆောင်ဒါရိုက်တာက Open Academy ၏ Cloud Computing သင်တန်းအတွက် Scholarship ပေးအပ်မည့်အစီအစဉ် ကို မိတ်ဆက်ပြောကြားပြီးဒုတိယဝန်ကြီးက ဆွေးနွေးကြသူများထံ ဂုဏ်ပြုမှတ်တမ်းလွှာများ နှင့် ကျောင်းသားများထံ IT နည်းပညာ၊ သုတနှင့် ရသစာအုပ်များ ပေးအပ်ချီးမြှင့်သည်။

ဆွေးနွေးပွဲသို့ လုပ်ငန်းကော်မတီအတွင်းရေးမှူး၊ နည်းပညာ၊ သက်မွေးပညာနှင့်လေ့ကျင့်ရေးဦးစီးဌာနနှင့် အခြားသောဦးစီးဌာနများမှ တာဝန်ရှိသူများ၊ အစိုးရနည်းပညာကောလိပ်များ၊ အစိုးရစက်မှုလက်မှုသိပ္ပံများနှင့် အစိုးရနည်းပညာအထက်တန်းကျောင်းများမှ ဆရာများနှင့် ကျောင်းသားများ၊ တောင်ဒဂုံရှိစက်မှုဇုန် ခြောက်ခုမှ ဇုန်ဥက္ကဋ္ဌများ၊ MSME လုပ်ငန်းရှင်များ၊ ကျောင်းသားမိဘများနှင့် ဒေသခံပြည်သူများက စိတ်ပါဝင်စားစွာ တက်‌ရောက်ဆွေးနွေးကြကြောင်း သိရသည်။

MOI

နေပြည်တော် ဇူလိုင် ၇

EV (Electric Vehicle) ပြုပြင်ထိန်းသိမ်းမှုသင်တန်း (၂/၂၀၂၅) ဖွင့်ပွဲအခမ်းအနားကို ယနေ့နံနက်ပိုင်းတွင် အစိုးရစက်မှုလက်မှုသိပ္ပံ(အင်းစိန်)၌ ကျင်းပသည်။

ဦးစွာ လျှပ်စစ်သုံးယာဉ်နှင့်ဆက်စပ်ပစ္စည်းများ သုတေသနဖွံ့ဖြိုးရေးနှင့် နည်းပညာပြန့်ပွားရေးလုပ်ငန်းကော်မတီဥက္ကဋ္ဌ သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာ အောင်ဇေယျက EV သုံးစွဲမှုမှ လေထုနှင့်အသံညစ်ညမ်းမှုများ လျှော့ချနိုင်ကာ ကျန်းမာရေးဆုလာဘ်များရရှိခြင်း၊ စက်သုံးဆီနှင့် အင်ဂျင်ပြုပြင်ထိန်းသိမ်းရမှုအတွက် ကုန်ကျစရိတ်လျှော့ချနိုင်ခြင်း၊ ဂေဟစနစ်နှင့် ကိုက်ညီစေခြင်း၊ အဆင့်မြင့် Smart Transportation System ဖြစ်ကာ Smart City များ ဖြစ်ထွန်းလာစေခြင်း စသောအကျိုးကျေးဇူးများအပြင် ရေရှည်စဉ်ဆက်မပြတ် ဖွံ့ဖြိုးတိုးတက်မှုကို EV ကဏ္ဍဖွံ့ဖြိုးလာပါက ဖြစ်ထွန်းစေနိုင်သဖြင့် သင်တန်းသားများသည် EV သုံးစွဲသူပြည်သူများအတွက် အမှန်တကယ်အကျိုးပြုနိုင်မည့် နည်းပညာရှင်များဖြစ်စေရေး သင်တန်းကာလအတွင်း စိတ်ရောကိုယ်ပါနစ်မြှုပ်ကာ ကြိုးပမ်းလေ့ကျင့်ကြရန် လိုအပ်ကြောင်း တိုက်တွန်းမှာကြားသည်။

ယင်းနောက် ဒုတိယဝန်ကြီးသည် EV အလုပ်ရုံသို့သွားရောက်ကာ သင်တန်းသားများ၏ လက်တွေ့လုပ်ငန်းများကို အဆင့်မြင့်သင်ထောက်ကူမော်ကျူးများဖြင့် လေ့ကျင့်သင်ကြားနေမှုများကို လှည့်လည်ကြည့်ရှုအားပေးကာ လိုအပ်သည်များကို မှာကြားသည်။

အခမ်းအနားသို့ သုတေသနနှင့် တီထွင်ဆန်းသစ်မှုဦးစီးဌာန ဒုတိယညွှန်ကြားရေးမှူးချုပ်၊ နည်းပညာတက္ကသိုလ်များနှင့် ကွန်ပျူတာတက္ကသိုလ်များမှ ဒုတိယပါမောက္ခချုပ်များ၊ အစိုးရစက်မှုလက်မှုသိပ္ပံ (အင်းစိန်)နှင့် ရန်ကုန်မြို့ရှိ နည်းပညာ၊ သက်မွေးပညာနှင့်လေ့ကျင့်ရေးဦးစီးဌာနမှ ကျောင်းအုပ်ကြီးများနှင့် တာဝန်ရှိသူများ တက်ရောက်ကြပြီး သင်တန်းသို့ ပြင်ပ EV လုပ်ငန်းများမှ သင်တန်းသား ၁၉ ဦးနှင့် ဌာနဆိုင်ရာများမှ သင်တန်းသားခြောက်ဦး တက်ရောက်ကြကြောင်း သိရသည်။

MOI

နေပြည်တော် ဇူလိုင် ၅

လျှပ်စစ်သုံးယာဉ်နှင့် ဆက်စပ်ပစ္စည်းများ သုတေသနဖွံ့ဖြိုးရေးနှင့် နည်းပညာပြန့်ပွားရေးလုပ်ငန်းကော်မတီဥက္ကဋ္ဌ သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျသည် ယမန်နေ့ညနေပိုင်းတွင် နည်းပညာ၊ သက်မွေးပညာနှင့် လေ့ကျင့်ရေး ဆရာအတတ်သင်ကောလိပ် (TTTC ဘယ်လင်း)တွင် ကျင်းပသည့် EV ပြုပြင်ထိန်းသိမ်းမှုသင်တန်း (၂/၂၀၂၅)ဆင်းပွဲအခမ်းအနားကို ဗီဒီယိုကွန်ဖရင့်စနစ်ဖြင့် တက်ရောက်သည်။

ဦးစွာ ဒုတိယဝန်ကြီးက သင်တန်း ဆင်းများသည် EV နည်းပညာများကို လုပ်ငန်းခွင်များတွင် အကျိုးရှိစွာ ပြန်လည်အသုံးချကြရန်နှင့် EV အသိပညာများကို ပြည်သူများအပါအဝင် EV Stakeholder များ၏ လက်ဝယ်အရောက် ထိရောက်ကျယ်ပြန့်စွာ ဖြန့်ဝေပေးနိုင်ရေး အလေးထားဆောင်ရွက်သွားရန်၊ နိုင်ငံ့ EV ကဏ္ဍဖွံ့ဖြိုးရေး လုပ်ငန်းများတွင် တစ်တပ်တစ်အား ပါဝင်ဆောင်ရွက်သွားရန်လိုအပ်ကြောင်း တိုက်တွန်းမှာကြားသည်။

ယင်းနောက် သင်တန်းဆင်း တစ်ဦးက သင်တန်းဆင်းများကိုယ်စား ကျေးဇူးတင်စကားပြောကြားခဲ့ပြီး (TTTC ဘယ်လင်း) ကျောင်းအုပ်ကြီးက သင်တန်းဆင်းများထံ သင်တန်းဆင်းလက်မှတ်များ ပေးအပ်သည်။

သင်တန်းတွင် လျှပ်စစ်အန္တရာယ်ကင်းရှင်းရေး၊ UNR 100 ၊ ဗို့အားမြင့်မောင်းနှင်ခြင်းစနစ်၊ ဘက်ထရီနည်းပညာ၊ ထိန်းချုပ်စနစ်၊ Special Hand Tools ကိုင်တွယ် အသုံးပြုပုံ၊ ပြစ်ချက်ရှာဖွေခြင်းနှင့် စမ်းသပ်ခြင်း၊ Traction Battery ဖြုတ်တပ်ခြင်းနှင့်စမ်းသပ်ခြင်း၊ Electrical Power Train စနစ်ဖြုတ်တပ်ခြင်းနှင့် စမ်းသပ်ခြင်းဆိုင်ရာ လက်တွေ့လုပ်ငန်းများကို အဆင့်မြင့်သင်ထောက်ကူမော်ကျူးများဖြင့် Electude Digital Learning Management System နှင့် တွဲဖက်ပြီး ဇွန် ၁၆ ရက် မှ ဇူလိုင် ၄ ရက်အထိ သင်တန်း ကာလ သုံးပတ်အတွင်း တစ်ပတ် လျှင်ငါးရက်၊ တစ်ရက်လျှင် ခြောက်နာရီနှုန်းသင်တန်းချိန် နာရီ ၉၀ ဖြင့် လေ့ကျင့်ပေးခဲ့ပြီး နေပြည်တော်၊ ရန်ကုန်နှင့် မန္တလေးတိုင်းဒေသကြီးတို့ရှိ EV ကုမ္ပဏီများနှင့် ကားဝပ်ရှော့များမှ သင်တန်းသား ၂၀ နှင့် ဌာနဆိုင်ရာ သင်တန်းသားခုနစ်ဦး တက်ရောက်ခဲ့ကြကြောင်း သိရသည်။

MOI

မြန်မာနိုင်ငံ၏ ထိပ်တန်းဆက်သွယ်ရေးဝန်ဆောင်မှုလုပ်ငန်းဖြစ်သော Mytel သည် ဇွန်လ (၉) ရက်တွင် Mytel (၇)နှစ်ပြည့် နှစ်ပတ်လည်အခမ်းအနားနှင့်အတူ Mytel၏ ပထမဦးဆုံး AI နည်းပညာသုံး Brand Ambassador များဖြစ်ကြသော “Mi Mi” နှင့် “Mike Mike” တို့ကို အောင်မြင်စွာ တရားဝင် မိတ်ဆက်ခဲ့သည်။

“Mi Mi” နှင့် “Mike Mike” တို့ကို မိတ်ဆက်ခြင်းသည် ရုပ်ပုံများ ထည့်သွင်းခြင်းသက်သက်မဟုတ်ဘဲ၊ Mytel ၏ သုံးစွဲသူများနှင့် ပိုမိုအပြန်အလှန်ချိတ်ဆက်နိုင်ရန်၊ ပိုမိုကောင်းမွန်သော ဝန်ဆောင်မှုနှင့် ပိုမိုထိရောက်သော ဆက်ဆံရေးများအတွက် AI နည်းပညာကို ကောင်းမွန်စွာ အသုံးချခြင်းဖြစ်သည်။

“Mi Mi” နှင့် “Mike Mike” တို့ဟာ Mytel နဲ့ သုံးစွဲသူတွေကြားကို ချိတ်ဆက်ပေးမှာဖြစ်သလို၊ ဝန်ဆောင်မှုတွေ ပေးမယ်၊ ဗဟုသုတတွေ မျှဝေပေးမယ်၊ ပြီးတော့ သုံးစွဲသူတွေရဲ့ ပြဿနာတွေကိုလည်း ကူညီဖြေရှင်းပေးသွားမှာ ဖြစ်ပါတယ်။

သုံးစွဲသူတွေနဲ့ အပြန်အလှန် ဆက်သွယ်ပြောဆိုခြင်း၊ Mytel ရဲ့ ဝန်ဆောင်မှုအသစ်များ မိတ်ဆက်ခြင်း၊ ပျော်စရာကောင်းတဲ့ လှုပ်ရှားမှုတွေနဲ့ ပရိုမိုးရှင်းတွေမှာ အတူတကွ ပူးပေါင်းပါဝင်ခြင်းတွေကို “Mi Mi” နှင့် “Mike Mike” တို့က Mytel ရဲ့ ကိုယ်စားလှယ်တွေအဖြစ် အတူတကွ လုပ်ဆောင်သွားကြမှာပါ။ သုံးစွဲသူတွေရဲ့ လိုအပ်ချက်တွေကို ပိုမိုနားလည်နိုင်ဖို့နဲ့ အကောင်းဆုံးဝန်ဆောင်မှုတွေ ပေးနိုင်ဖို့ အမြဲတမ်း ပူးပေါင်းဆောင်ရွက်သွားမှာပါ။ “Mi Mi” နှင့် “Mike Mike” တို့ကို သင့်ရဲ့ သူငယ်ချင်းကောင်း၊ အကူအညီပေးသူနဲ့ ပျော်ရွှင်မှုတွေ မျှဝေပေးသူအဖြစ် မြင်စေချင်ပါတယ်။ Mytel ရဲ့ နည်းပညာအသစ်တွေ၊ ဝန်ဆောင်မှုတွေနဲ့ ပရိုမိုးရှင်းတွေကို အတူတူ လေ့လာပြီး ရှေ့ဆက်မယ့် ခရီးစဉ်မှာ ပါဝင်ဖို့ ဒီကနေပဲ ဖိတ်ခေါ်လိုက်ရပါတယ်ခင်ဗျာ။

“Mi Mi” နှင့် “Mike Mike” တို့နဲ့အတူ Mytel ရဲ့ Brand Awareness ကို မြှင့်တင်ဖို့နဲ့ သုံးစွဲသူတွေရဲ့ နေ့စဉ်ဘဝတွေကို ပိုမိုလွယ်ကူချောမွေ့စေဖို့ ဆောင်ရွက်သွားမှာပါ။ ဒါကြောင့် Mytel ရဲ့ AI Brand Ambassador များဖြစ်တဲ့ “Mi Mi” နှင့် “Mike Mike” တို့နဲ့အတူ ဒီစိတ်လှုပ်ရှားစရာ ခရီးစဉ်မှာ ပူးပေါင်းပါဝင်ဖို့ ဖိတ်ခေါ်ပါတယ်။

Popular Myanmar