အမေရိကန်နှင့် နေတိုးတို့အနေဖြင့် ရုရှား၏သဘောထားကို လေးစားရန် မျှော်လင့်ဟုဆို

ရုရှားနိုင်ငံခြားရေး ဒုတိယဝန်ကြီး Sergey Ryabkov က ယူကရိန်း ပဋိပက္ခ နှင့်ပတ်သက်၍ ရုရှား၏သဘောထားကို အမေရိကန်နှင့် နေတိုးတို့မှ လေးစားစွာတုံ့ပြန်ရန် မျှော်လင့်ကြောင်း ပြောကြားခဲ့သည်။ မော်စကို သည် မည်သည့်ဖိအားပေးမှုကိုမဆို လက်မခံကြောင်းလည်း ၎င်းက ဖြည့်စွက်ပြောဆိုခဲ့သည်။

အဆိုပါကြေညာချက်သည် အမေရိကန်သမ္မတ Donald Trump က ယူကရိန်း ပဋိပက္ခကို ရက်ပေါင်း ၅၀ အတွင်း အဖြေရှာရန် တိုးတက်မှုမရှိပါက ရုရှား၏ကုန်သွယ်ဖက်နိုင်ငံများအား အခွန်စည်းကြပ်မှု ၁၀၀% အထိ ချမှတ်မည်ဟု ခြိမ်းခြောက်ခဲ့ပြီးနောက် ထွက်ပေါ်လာခြင်းဖြစ်သည်။ Trump က ဝါရှင်တန်သည် လက်နက်များကို နေတိုးမှတစ်ဆင့် ငွေပေး ချေမှုနှင့် ဖြန့်ဖြူးမှုများ ဆောင်ရွက်ပေးမည်ဖြစ်ပြီး ကိယက်ဗ်သို့ လက်နက် များ ဆက်လက်ပေးပို့မည်ဟုလည်း ကြေညာခဲ့သည်။

အင်္ဂါနေ့ (ဇူလိုင် ၁၅) က သတင်းစာရှင်းလင်းပွဲတွင် Ryabkov က မည်သည့် တောင်းဆိုမှုမျိုးကိုမဆို “အထူးသဖြင့် မော်စကိုအတွက် နောက်ဆုံး သတ်မှတ်ချက်များ ပြုလုပ်ခြင်းကဲ့သို့သော လုပ်ဆောင်မှုများကို” လက်မခံ နိုင်ဟု အတိအလင်း ပြောကြားခဲ့သည်။

၎င်းက ရုရှားသည် ညှိနှိုင်းဆွေးနွေးရန် အဆင်သင့်ဖြစ်ပြီး သံတမန် နည်းလမ်းကို ဦးစားပေးသည်ဟု ထပ်လောင်းအလေးပေးပြောဆိုခဲ့ သော် လည်း၊ မော်စကို၏ ညှိနှိုင်းလိုစိတ်ကို သင့်တင့်သောတုံ့ပြန်မှုမရှိပါက စစ်ရေးနည်းလမ်းဖြင့် မိမိတို့၏ရည်မှန်းချက်များကို ဆက်လက် အကောင် အထည်ဖော်မည်ဖြစ်ပြီး ယူကရိန်းပဋိပက္ခ ဆက်လက်ရှိနေမည်ဟု သတိပေးခဲ့သည်။

"အဆိုပါသဘောထားသည် မပြောင်းလဲနိုင်ပါ" ဟု Ryabkov က အတိအလင်းပြောကြားခဲ့ပြီး၊ မော်စကိုအနေဖြင့် "ဝါရှင်တန်နှင့် နေတိုး တစ်ခုလုံးက အဆိုပါသဘောထားကို လေးစားစွာ တုံ့ပြန်ဆက်ဆံပေးရန် မျှော်လင့်ကြောင်း" ဖြည့်စွက်ပြောကြားခဲ့သည်။

ရုရှားနိုင်ငံခြားရေးဝန်ကြီး Sergey Lavrov ကလည်း Trump ၏ ရက် ၅၀ အချိန်ကာလနှင့်ပတ်သက်၍ ပိုမိုအသေးစိတ်ရှင်းလင်းချက်ကို မော်စကို က မျှော်လင့်ကြောင်း ပြောကြားခဲ့ပြီး အမေရိကန်သမ္မတသည် ယခင်ကတည်းက အချိန်ကာလအမျိုးမျိုး သတ်မှတ်ပြီးဖြစ်ကြောင်း ထောက်ပြ ခဲ့သည်။ "ယခင်က ၂၄ နာရီ၊ ရက် ၁၀၀ စသည်ဖြင့် သတ်မှတ်ဖူးပြီး မိမိတို့သည် အမေရိကန်သမ္မတ၏ လှုံ့ဆော်မှုအကြောင်းရင်းကို အမှန်တကယ် နားလည်လိုပါသည်" ဟု Lavrov က ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂