အမေရိကန်တွင် TikTok ပြန်လည်အသုံးပြုနိုင်ပြီ ဖြစ်သဖြင့် ဒေါ်နယ်ထရမ့်အား ကျေးဇူးတင်ကြောင်း ပြောကြား

News Image

  • အမေရိကန်တွင် TikTok ပြန်လည်အသုံးပြုနိုင်ပြီ ဖြစ်သဖြင့် ဒေါ်နယ်ထရမ့်အား ကျေးဇူးတင်ကြောင်း ပြောကြား

အမေရိကန်ပြည်ထောင်စုတွင် အမျိုးသားလုံခြုံရေးကို အကြောင်းပြ၍ TikTok ပိတ်ပင်သော ဉပဒေ အတည်ပြုခဲ့သောကြောင့် ခဏတာ ရပ်ဆိုင်းခဲ့သော TikTok မှာ ဇန်နဝါရီ ၁၉ ရက်တွင် အမေရိကန်ပြည်ထောင်စု၌ ပြန်လည် အသုံးပြုနိုင်ခဲ့ပြီဖြစ်ပါသည်။

ဇန်နဝါရီ ၁၉ ရက်တွင် ရာထူး သက်တမ်းကုန်သွားပြီ ဖြစ်သည့် ဘိုင်ဒင်အစိုးရ၏ ပိတ်ပင်မှုအပေါ် ပြောင်းပြန်ဖြစ်သွားစေရန် ဆောင်ရွက်ပေးသည့်အတွက် ဒေါ်နယ်ထရမ့် ကို TikTok က ချီးကျူးလိုက်ပါသည်။ 

တရုတ်ပိုင် ByteDance ၏ TikTok ကို တရုတ် နိုင်ငံသားမဟုတ်သူထံရောင်းချရန် နောက်ဆုံးသတ်မှတ်ချိန်ဟု သတ်မှတ်ထားသော ဇန်နဝါရီ ၁၈ ရက် ညနေပိုင်းတွင် Tik Tok သည် အမေရိကန် ပြည်ထောင်စု၌ ပိတ်သွားခဲ့ပါသည်။ ဇန်ဝါရီ ၁၉ ရက် နံနက်အစောပိုင်းတွင် တုန်လှုပ်ချောက်ချားနေသော အသုံးပြုသူ သန်းပေါင်းများစွာက TikTok သုံးမရရန် ပိတ်ပင်ခံထားသည်ကို ကြုံတွေ့ရသဖြင့် ထရမ့်က သဘောတူညီမှုရရှိအောင် ဆောင်ရွက်ရန် အချိန်ဆွဲထားမည့်သမ္မတအမိန့် ထုတ်ပေးမည်ဟု ကတိပြုပြောကြားထားပါသည်။ 

TikTok ကို အမေရိကန်နှင့် တရုတ်ပူးတွဲ ပိုင်ဆိုင်မှု ပုံစံအဖြစ် အမေရိကန်က ၅၀ ရာခိုင်နှုန်း ပိုင်ဆိုင်စေ လိုကြောင်း၊ TikTok၏ တန်ဖိုးမှာ ဒေါ်လာဘီလီယံ ရာချီထိုးတက်သွားနိုင်ပြီး ထရီလီယံအထိပင် ရောက်ရှိသွားနိုင်ကြောင်း ဒေါ်နယ်ထရမ့်က ၎င်း၏ Truth Social တွင် တိုက်တွန်းထားပါသည်။

“ယခုလို လုပ်ဆောင်လိုက်ခြင်းက TikTok ကို ကယ်တင်ရန် ကောင်းကောင်းမွန်မွန်စီမံလိုက်ခြင်း ဖြစ်ပါကြောင်း” ထရမ့်က ရေးသားထားပါသည်။ 

အမေရိကန်တွင် ဇန်နဝါရီ ၁၉ ရက် မွန်းလွဲပိုင်း အချိန်တွင် TikTok ပြန်လည်အသုံးပြုနိုင်ပြီဖြစ်သဖြင့် အမေရိကန်ပြည်သူသန်း ၁၇၀ ကျော်ကို ဝန်ဆောင်မှု ပေးနေသည့် TikTok အပေါ် ပြစ်ဒဏ်ရင်မဆိုင်ရစေရန် ပံ့ပိုးကူညီပေးလိုက်သည့် သမ္မတဒေါ်နယ်ထရမ့်ကို ကျေးဇူးတင်ပါကြောင်း TikTok က ထုတ်ပြန်ချက်တွင် ဖော်ပြထားပါသည်။ 

ကိုးကား-CNA

Photo: ABC News- The Walt Disney Company