မအူပင်မြို့နယ်၌ ယခုဆောင်းသီးနှံစိုက်ပျိုးရာသီတွင် ပဲတီစိမ်း ၂၀၃၆ ဧကစိုက်ပျိုးပြီးစီးနေပြီး လျာထားဧက ရာနှုန်းပြည့်စိုက်ပျိုးနိုင်ရေးဆောင်ရွက်လျက်ရှိ
News Image
မအူပင် ဇန်နဝါရီ ၂၇
ဧရာဝတီတိုင်းဒေသကြီး မအူပင် မြို့နယ်၌ ယခုဆောင်းသီးနှံစိုက်ပျိုး ရာသီတွင် ပဲတီစိမ်း ၂၀၃၆ ဧကစိုက်ပျိုး ပြီးစီးနေပြီး လျာထားဧက ရာနှုန်းပြည့် စိုက်ပျိုးနိုင်ရေး ဆောင်ရွက်လျက်ရှိကြောင်း မအူပင်မြို့နယ် စိုက်ပျိုးရေးဦးစီးဌာန ဦးစီးမှူး ဦးဇော်မင်းထွန်း၏ ပြောပြချက်အရ သိရသည်။
မအူပင်မြို့နယ်၌ ယခုဆောင်းသီးနှံ စိုက်ပျိုးရာသီတွင် ပဲတီစိမ်းလျာထား ၂၃၄၈ ဧကကို ၂၀၂၄ ခုနှစ် နိုဝင်ဘာလ ဒုတိယပတ်က စတင်စိုက်ပျိုးခဲ့ရာ လက်ရှိအချိန်ထိပဲတီစိမ်း ၂၀၃၆ ဧက စိုက်ပျိုးပြီးစီးပြီဖြစ်ကြောင်း၊ အဆိုပါ စိုက်ပျိုးနေသည့် ပဲတီစိမ်းများ လျာထား ဧက ရာနှုန်းပြည့်စိုက်ပျိုးနိုင်ရန် စိုက်ပျိုးရေးဦးစီးဌာနနှင့် ဒေသခံတောင်သူများ ပူးပေါင်းဆောင်ရွက်လျက်ရှိကြောင်း သိရ သည်။
'' ဒီဆောင်းသီးနှံ စိုက်ပျိုးရာသီမှာ ပဲတီစိမ်းကို ၂၃၄၈ ဧကလျာထား စိုက်ပျိုးနေပါတယ်။ လက်ရှိ ပဲတီစိမ်း ၂၀၃၆ ဧကစိုက်ပျိုးပြီးစီးပြီဖြစ်ပါတယ်။ ပဲတီစိမ်းတွေ လျာထားဧက ရာနှုန်းပြည့် စိုက်ပျိုးနိုင်ဖို့အတွက် မြို့နယ်စိုက်ပျိုးရေးဦးစီးဌာနက စိုက်ပျိုးရေးနည်းပညာတွေ နဲ့ တခြားလိုအပ်တာတွေကို ဆောင်ရွက်ပေးနေပါတယ်။ အထွက်နှုန်းကောင်းစေဖို့၊ ပိုးမွှားအန္တရာယ်မကျရောက်စေဖို့ စိုက်နည်းစနစ်မှန်ကန်စေဖို့စတဲ့လုပ်ငန်းတွေကို တောင်သူတွေနဲ့ပူးပေါင်းဆောင်ရွက်သွားမှာဖြစ်ပါတယ်'' ဟု ဦးဇော်မင်းထွန်း ကပြောသည်။
မအူပင်မြို့နယ် စိုက်ပျိုးရေးဦးစီးဌာနအနေဖြင့် ပဲတီစိမ်းစိုက်ပျိုးရာတွင် ဒေသနှင့်ကိုက်ညီပြီး အထွက်နှုန်းကောင်းစေရေး၊ အရည်အသွေးကောင်းမွန်စေရေး၊ မျိုးကောင်းမျိုးသန့်များရရှိစေရေးနှင့် စိုက်နည်းစနစ်မှန်ကန်စေရေးစသည့် တောင်သူအသိပညာပေးလုပ်ငန်းများကို ဆောင်ရွက်ပေးလျက်ရှိကြောင်း၊ နိုင်ငံတော်အစိုးရမှ စိုက်ပျိုးထုတ်လုပ်သူများအား လိုအပ်ချက်မရှိအောင် ကူညီဆောင်ရွက်ပေးလျက်ရှိရာ မိမိတို့လုပ်ငန်းများ ပိုမိုအောင်မြင်ရေးကို အားသွန်ခွန်စိုက် ကြိုးပမ်းဆောင်ရွက်ကြရမည်ဖြစ်ကြောင်း သိရသည်။
Source: Myawady Web Portal
