ထိုင်ဝမ် TSMC ကုမ္ပဏီအနေဖြင့် အမေရိကန် Intel ကုမ္ပဏီတွင် ရင်းနှီးမြှုပ်နှံမည့်ကိစ္စနှင့်စပ်လျဉ်း၍ မည်သည့်အချက်အလက်မျှ မရရှိသေးကြောင်း ထိုင်ဝမ်စီးပွားရေးဝန်ကြီးဌာန ထုတ်ပြန်

ထိုင်ဝမ်ချစ်ပ်ထုတ်လုပ်သည့်ကုမ္ပဏီ TSMC အနေဖြင့် အမေရိကန် ချစ်ပ် ထုတ်လုပ်သည့် ကုမ္ပဏီ Intel တွင် ရင်းနှီးမြှုပ်နှံမှုလျှောက်ထားခြင်းဆိုင်ရာ မည်သည့်အချက်အလက်ကိုမျှ မရရှိသေးကြောင်း ထိုင်ဝမ် စီးပွားရေးဝန်ကြီး Kuo Jyh-huei က ၂၅-၂-၂၀၂၄ ရက်နေ့တွင် ပြောကြား ခဲ့သည်။

ကမ္ဘာ့အကြီးဆုံး ချစ်ပ်ထုတ်လုပ်ရေးလုပ်ငန်းဖြစ်ပြီး Apple Inc. နှင့် Nvidia အပါအဝင် ကုမ္ပဏီအများအပြားအတွက် အဓိက ထုတ်လုပ်ပေးနေသည့် Taiwan Semiconductor Manufacturing Co (TSMC) သည် အမေရိကန် ချစ်ပ်ထုတ်လုပ်သူ Intel ကုမ္ပဏီတွင် ရင်းနှီးမြှုပ်နှံရန် ဆွေးနွေးနေကြောင်း အမေရိကန်သတင်းမီဒီယာက ထုတ်ပြန်ခဲ့သည်။

ထိုင်ဝမ်ကုမ္ပဏီတစ်ခုသည် ပင်လယ်ရပ်ခြားရင်းနှီးမြှုပ်နှံမှု ပြုလုပ်လိုပါက အစိုးရ၏ ခွင့်ပြုချက်လိုအပ်ပြီး အထူးသဖြင့် စီးပွားရေးဝန်ကြီးဌာန၊ ရင်းနှီးမြှုပ်နှံမှုပြန်လည် သုံးသပ်ရေးကော်မရှင်၏ ခွင့်ပြုချက် လိုအပ်သည်။

TSMC နှင့် Intel ကုမ္ပဏီတို့ကမူ အဆိုပါရင်းနှီးမြှုပ်နှံမှု ကိစ္စရပ်များနှင့် စပ်လျဉ်းသည့် သတင်းများအပေါ် အတည်ပြု ပြောကြားခဲ့ခြင်းမရှိပေ။

ထိုင်ဝမ်သည် အမေရိကန်၏ semiconductor ချစ်ပ်ထုတ်လုပ်သည့် လုပ်ငန်းဈေးကွက်ကို လုယူသိမ်းပိုက်ထားသည်ဟု အမေရိကန်သမ္မတ ဒေါ်နယ်ထရမ့်က ထပ်တလဲလဲ စွပ်စွဲပြစ်တင်ပြောဆိုခဲ့ပြီး အဆိုပါချစ်ပ် ထုတ်လုပ်မှုလုပ်ငန်းဈေးကွက်ကို အမေရိကန် ပြည်ထောင်စုက ပြန်လည် ရယူလိုကြောင်း ပြောကြားခဲ့သည်။

အမေရိကန်သို့ ချစ်ပ်တင်သွင်းခြင်းနှင့် အမေရိကန်နှင့် ကုန်သွယ်ရေးမညီမျှမှု ကြီးမားသော နိုင်ငံများအပေါ် အကောက်ခွန်စည်းကြပ်မည်ဟု ဒေါ်နယ်ထရမ့်က ခြိမ်းခြောက် ပြောဆိုခဲ့သည်။

ဤလအစောပိုင်းတွင် စီးပွားရေးဝန်ကြီးဌာန၊ ဒုတိယဝန်ကြီးဖြစ်သူ Cynthia Kiang က အမေရိကန်ပြည်ထောင်စုသို့ သွားရောက်၍ ဆွေးနွေးမှုများပြုလုပ်ခဲ့ပြီး အသေးစိတ် ဆွေးနွေးချက်များကို ထုတ်ဖော်ပြောကြားခဲ့ခြင်းမရှိပေ။

ကိုးကား-CNA

Photo: Yahoo Finance

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃