ယူကရိန်း၏ ရာနှင့်ချီသော ဒရုန်းများဖြင့် တိုက်ခိုက်ခဲ့မှုအပေါ် Oreshnik ဒုံးများဖြင့် ပြန်လည်တုန့်ပြန်သင့်ဟု ရုရှားအမတ် တိုက်တွန်း

ရုရှားနိုင်ငံအတွင်းရှိ လူနေရပ်ကွက်များနှင့် အရပ်သားအဆောက်အအုံများကို ပစ်မှတ်ထားသည့် ယူကရိန်း၏ ကြီးမားသော ဒရုန်းတိုက်ခိုက်မှုကို တုံ့ပြန်ရန် Oreshnik ဒုံးများဖြင့် ပြန်လည်တိုက်ခိုက်သင့်ကြောင်း ရုရှား အမျိုးသားလွှတ်တော်အမတ်တစ်ဦးက ပြောကြားခဲ့သည်။

ရုရှားနယ်မြေပေါ်တွင် ယူကရိန်း၏ ဒရုန်း ၃၃၇ စင်းကို ညအချိန်တွင် ပစ်ချခဲ့ကြောင်း မော်စကိုရှိ ကာကွယ်ရေးဝန်ကြီးဌာနက မတ်လ ၁၁ ရက်(အင်္ဂါနေ့)နံနက်ပိုင်းတွင် ပြောကြားခဲ့သည်။ ရုရှားမီဒီယာများက ၂၀၂၂ ခုနှစ်၊ ဖေဖော်ဝါရီလတွင် ရုရှားနှင့် ယူကရိန်းကြား ပဋိပက္ခ စတင်ချိန်မှစ၍ ယခုတိုက်ခိုက်မှုသည် ကိယက်ဗ်၏အကြီးဆုံး ဒရုန်း တိုက်ခိုက်မှုဟု ဖော်ပြခဲ့သည်။ မော်စကိုဒေသတွင် အရပ်သား သုံးဦး သေဆုံးပြီး ဒါဇင်ကျော် ဒဏ်ရာရရှိခဲ့ကြောင်း အုပ်ချုပ်ရေးမှူး Andrey Vorobyev က ပြောကြားခဲ့သည်။

ရုရှားသည် Oreshnik ဖြင့် ယူကရိန်းပစ်မှတ်များကို တုံ့ပြန်တိုက်ခိုက်သင့်သလားဟု သတင်းထောက်များက မေးမြန်းရာတွင် ရုရှားနိုင်ငံတော် ဒူးမား ကာကွယ်ရေးကော်မတီဥက္ကဋ္ဌ Andrey Kartapolov က “ဆုံးဖြတ်ချက်သည် စစ်ဦးစီးချုပ် ‘ရုရှားသမ္မတ ဗလာဒီမာပူတင်’ အပေါ် တွင်မူတည်သည်” ဟု ပြောကြားခဲ့သည်။

Oreshnik ဒုံးကျည်မြောက်များစွာဖြင့် ပြန်လည်တုန့်ပြန်တိုက်ခိုက်သင့်သည်ဟု ယခင် ကာကွယ်ရေးဝန်ကြီးဌာန ဒုတိယဝန်ကြီးနှင့် ဗိုလ်ချုပ်ကြီး ရာထူးတာဝန်ထမ်းဆောင်ခဲ့ဖူးသူ အမျိုးသားလွှတ်တော်အမတ်က ပြောကြားခဲ့သည်။

ကိုးကား-RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂