ကုန်သွယ်ရေးစစ်ပွဲ ပြင်းထန်လာချိန် အမေရိကန်စတော့ဈေးကွက် ဆိုးရွားစွာကျဆင်း

တနင်္လာနေ့ (ဧပြီ ၇) က အမေရိကန်စတော့ဈေးကွက် ဆိုးရွားစွာ ကျဆင်းခဲ့ပြီးနောက် အနည်းငယ်ပြန်တက်လာခဲ့ပါတယ်။ သမ္မတ Trump က တင်သွင်းကုန်အားလုံးကို အကောက်ခွန်တိုးမြှင့်ခြင်းအပြင် တရုတ် နိုင်ငံပေါ် ပိုမိုမြင့်မားသည့် အခွန်စည်းကြပ်မှုများ ချမှတ်ရန် ခြိမ်းခြောက် လိုက်ခြင်းကြောင့် ကုန်သွင်းရေးစစ်ပွဲ ရှည်လျားလာမည့် အရေးကို စီးပွားရေးဆိုင်ရာကျွမ်းကျင်သူများက စိုးရိမ်လျက်ရှိကြသည်။

ဒေါင်းဂျုန်းအညွှန်းကိန်း (Dow Jones) သည် တနင်္လာနေ့ (ဧပြီ ၇) ၌ တစ်ရက်အတွင်း ၁,၂၀၀ ပွိုင့် (သို့) ၃% အထိ ကျဆင်းခဲ့ပြီး၊ လွန်ခဲ့သောသီတင်းပတ်က ဆက်တိုက် ၁,၅၀၀ ပွိုင့်ကျဆင်းမှုနှင့်အတူ သမိုင်းတလျှောက် ပထမဆုံးအကြိမ် နှစ်ရက်ဆက် အဆိုးရွားဆုံး ကျဆင်းမှုကို ရင်ဆိုင်ခဲ့ရပါသည်။ Standard & Poor's 500 Index သည် ၄.၇% အထိ ကျဆင်းကာ Nasdaq သည်လည်း ၃% ကျဆင်းပြီး Bear market အတွင်းသို့ ခေတ္တမျှကျဆင်းသွားခဲ့ပါသည်။ 

ယင်းနေ့ နေ့လယ်ပိုင်း၌ စတော့များ အနည်းငယ်ပြန်တက်လာပြီး အစောပိုင်း ဆုံးရှုံးမှုများကို ပြန်ဖြည့်နိုင်ခဲ့ပါသည်။ ဒေါင်းဂျုန်းသည် ၃၄၉ ပွိုင့်နိမ့်ကျပြီး ဈေးပိတ်ခဲ့ကာ၊ S&P 500 နှင့် Nasdaq သည် သုည အမှတ်နှင့် အနည်းငယ်တက်ပြီး ဈေးပိတ်ခဲ့ပါသည်။

စနေနေ့(ဧပြီ ၆)က Trump ၏ တဖက်သတ် ၁၀% အကောက်ခွန်သစ် စတင်အသက်ဝင်လာခဲ့ပြီး၊ ထိုရက်ပိုင်းအတွင်း ညှိနှိုင်းဆွေးနွေးမှုများ တိုးတက်မှုလာမည်ဟု မျှော်လင့်ထားသူများ စိတ်ပျက်ခဲ့ရသည်။ တရုတ် အစိုးရကလည်း ပြန်လည်တုန့်ပြန်ခဲ့ပြီး Trump က ပိုမိုပြင်းထန်သည့် အရေးယူမှုများ လုပ်ဆောင်မည်ဟု ပြောဆိုခဲ့ပါသည်။

“တရုတ်နိုင်ငံသည် ၎င်းတို့၏ရေရှည်ကုန်သွယ်ရေး အလွဲသုံးစားမှုများ အပေါ် ၃၄% တိုးမြှင့်မှုကို ၂၀၂၅ ခုနှစ်၊ ဧပြီလ ၈ ရက်နေ့အထိ ရုပ်သိမ်းခြင်းမရှိပါက အမေရိကန်ပြည်ထောင်စုက ဧပြီလ ၉ ရက်နေ့၌ ၅၀% အပိုအကောက်ခွန်များ ထပ်မံကျင့်သုံးမည်” ဟု Trump က တနင်္လာနေ့ (ဧပြီ ၇) က Truth Social ပေါ်၌ ရေးသားခဲ့ပါသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂