နိုင်ငံရေးအမြတ်ထုတ်ကာ ဘင်္ဂါလီများအတွက် လွတ်လပ်သည့် ပြည်နယ်ထူထောင်ရေး Jamaat-e-Islami ပါတီက အဆိုပြုသည့်ကိစ္စကို နိုင်ငံတော်စီမံအုပ်ချုပ်ရေးကောင်စီ ကန့်ကွက်

နိုင်ငံရေး အမြတ်ထုတ်ကာ ရခိုင်ပြည်နယ်တွင် ဘင်္ဂါလီများအတွက် လွတ်လပ်သည့်ပြည်နယ်ထူထောင်ရေး Jamaat-e-Islami ပါတီက အဆိုပြုသည့်ကိစ္စကို ကန့်ကွက်ကြောင်း နိုင်ငံတော်စီမံအုပ်ချုပ်ရေး ကောင်စီက ဧပြီလ ၃၀ ရက် ညပိုင်းတွင် ထုတ်ပြန်ပြောကြားသည်။ တရုတ် ကွန်မြူနစ် ပါတီနှင့် တွေ့ဆုံစဉ် ဘင်္ဂလားဒေ့ရှ်နိုင်ငံမှ Jamaat-e-Islami ပါတီက ရခိုင်ပြည်နယ်ကို သီးခြားနိုင်ငံအဖြစ် အသိအမှတ်ပြုရန်နှင့် ဘင်္ဂါလီများအတွက် လွတ်လပ်သော ပြည်နယ်ထူထောင်ရေးအတွက် အဆိုပြုပြောကြားခဲ့ခြင်းဖြစ်သည်။ “Jamaat-e-Islami ပါတီသည် ဘင်္ဂလားဒေ့ရှ်နိုင်ငံရှိ အစ္စလာမ်ဘာသာရေးအခြေခံ နိုင်ငံရေး ပါတီတစ်ခု ဖြစ်သည်။ ယခင်အစိုးရလက်ထက်တွင် ပါတီကိုတရားစွဲဆိုခံရပြီး ၂၀၁၄ ခုနှစ်မှစ၍ ရွေးကောက်ပွဲဝင်ခွင့်မရခဲ့သည်ကိုတွေ့ရှိရသည်။ ယခု ကြားဖြတ်အစိုးရ လက်ထက် ၂၀၂၄ ခုနှစ်၊ ဩဂုတ်လအတွင်းက ၎င်းပါတီအပေါ် စွပ်စွဲထားမှုများအား ရုတ်သိမ်းပေးခဲ့ကြောင်းတွေ့ ရှိရသည်။ လွန်ခဲ့သည့် ဧပြီလ ၂၇ ရက်နေ့က ဒါကာမြို့ရှိ Hotel Westinတွင် Jamaat-e-Islami ပါတီ ဗဟိုကော်မတီအဖွဲ့ဝင် Dr. Syed Abdullah Muhammad Taher ဦးဆောင်သော ကိုယ်စားလှယ်အဖွဲ့ နှင့် တရုတ်ကွန်မြူနစ်ပါတီမှ ကိုယ်စားလှယ်အဖွဲ့တို့ တွေ့ဆုံဆွေးနွေးခဲ့ကြောင်း၊ ဆွေးနွေးရာတွင် မြန်မာနိုင်ငံ၏ အချုပ်အခြာ အာဏာပိုင်ဆိုင်မှုကို ထိခိုက်စေသည့် ဆွေးနွေးတောင်းဆိုမှုများ ပါရှိကြောင်းတွေ့ရှိရသည်” ဟု နိုင်ငံတော်စီမံအုပ်ချုပ်ရေးကောင်စီ၏ ထုတ်ပြန်စာတွင် ဖော်ပြထားသည်။ မြန်မာနိုင်ငံ၏ ဘင်္ဂါလီဒုက္ခသည် ပြန်လည်လက်ခံရေး ကိစ္စနှင့်ပတ်သက်သည့် သဘောထားရပ်တည်ချက်များကို အစဉ်သဖြင့် ပြောကြားထားပြီးဖြစ်ကြောင်း၊ ဘင်္ဂလားဒေ့ရှ်နိုင်ငံ၊ နိုင်ငံခြားရေးဝန်ကြီးဌာန၊ ဒုတိယဝန်ကြီးနှင့် မြန်မာနိုင်ငံ၊ နိုင်ငံခြားရေးဝန်ကြီးဌာန၊ ဒုတိယဝန်ကြီးတို့သည် တရုတ်နိုင်ငံ ကူမင်းမြို့၌ တွေ့ဆုံပြီး လက်ခံရေးကိစ္စများ၊ ပြန်လည်ထောက်ပံ့ရေးကိစ္စများကို ပုံမှန်တွေ့ဆုံ ဆွေးနွေးခဲ့ပြီး ပဋိပက္ခများ ဖြစ်ပွားချိန်မှ ရပ်တန့်သွားခဲ့ခြင်းဖြစ်ပါကြောင်း ရေးသားထားသည်။ မြန်မာနိုင်ငံအနေဖြင့် ဘင်္ဂါလီဒုက္ခသည်များကို စာရင်းတိုက်ဆိုင်စိစစ်ပြီး ပြန်လည်လက်ခံမည်ဆိုသည့် အခြေခံမူဝါဒရှိပြီး ဖြစ်သကဲ့သို့ ဒုက္ခသည်များ ပြန်လည်ဝင်ရောက်နေထိုင်နိုင်ရန်အတွက် လုံလောက်သည့် အဆောက်အအုံများကိုလည်း တရုတ်နိုင်ငံ၏ အကူအညီဖြင့် တည်ဆောက်ပြီး ဖြစ်သည်ကို နိုင်ငံတကာသံတမန်များသို့လည်း ရှင်းလင်းပြသပြီးဖြစ်ကြောင်း၊ Jamaat-e-Islami ပါတီသည် နိုင်ငံရေး အမြတ်ထုတ်လိုမှုအတွက် တရုတ်ကွန်မြူနစ်ပါတီနှင့် တွေ့ဆုံစဉ်ပြောကြားခဲ့မှုများသည် မြန်မာနိုင်ငံ၏ အချုပ်အခြာအာဏာကို ထိပါးသည့် ပြောဆိုချက် ဖြစ်သည့်အတွက် မြန်မာနိုင်ငံအနေဖြင့် လက်မခံကြောင်းနှင့် ရှုတ်ချကန့်ကွက်ပါကြောင်း ပြောကြားလိုသည်ဟု ထုတ်ပြန်ချက်တွင် ဖော်ပြထားသည်။ ဝေဖန်မှုများ ရှိခဲ့သည့် ၎င်းတို့၏ ပြောကြားချက်နှင့်ပတ်သက်၍ Jamaat-e-Islami ပါတီက ထုတ်ပြန်ချက်ထုတ် ရှင်းလင်းရာတွင် ဘင်္ဂလားဒေ့ရှ်ရောက် ဘင်္ဂါလီ (မူရင်းတွင် ရိုဟင်ဂျာဟု ဖော်ပြ) များသည် လူမဆန်သော အခြေအနေတွင် နေထိုင်နေကြရကြောင်းနှင့် အစားအသောက်နှင့် အဝတ်အစားပေးခြင်း မှာ ဖြေရှင်းချက်မဟုတ်ကြောင်း၊ အမြဲတမ်း ဖြေရှင်းချက်မှာ နေရပ်ပြန်ရေးနှင့် ပြန်လည်ထူထောင်ရေးဖြစ်သည်ဟု ဖော်ပြထားသည်။

ကိုးကား-NP News