အိန္ဒိယသည် စစ်ဘက်ဆိုင်ရာ စောင့်ကြည့်ရေးဂြိုဟ်တု ၅၂ လုံး လွှတ်တင်ရန် အရှိန်မြှင့်

တနင်္လာနေ့ (ဇွန် ၃၀) ထုတ် မီဒီယာသတင်းများအရ အိန္ဒိယသည် ၎င်း၏ အာကာသအခြေပြု ကာကွယ်ရေးစွမ်းရည်များ မြှင့်တင်ရန်အတွက် စောင့်ကြည့်ရေးဂြိုဟ်တု ၅၂ လုံး လွှတ်တင်ရန် အရှိန်အဟုန် မြှင့်လိုက် ကြောင်း သိရှိရသည်။

India Today သတင်းဌာန၏ ဖော်ပြချက်အရ ပထမဆုံးဂြိုဟ်တုကို ၂၀၂၆ ခုနှစ် ဧပြီလတွင် စတင်လွှတ်တင်မည်ဖြစ်ပြီး အဆိုပါ ဂြိုဟ်တု စနစ် အားလုံး ၂၀၂၉ နှစ်ကုန်တွင် အပြည့်အဝ အလုပ်လုပ်ဆောင်နိုင်ရန် စီစဉ် ထားသည်။ အမေရိကန်ဒေါ်လာ ၃.၅၇ ဘီလီယံ တန်ဖိုးရှိသည့် အဆိုပါ စီမံကိန်းသည် အချိန်နှင့်တစ်ပြေးညီ စောင့်ကြည့်ရေးစွမ်းရည်နှင့် နယ်စပ် လုံခြုံရေးကို မြှင့်တင်ပေးမည်ဖြစ်သည်။

ဂြိုဟ်တုများ လွှတ်တင်ပြီးပါက ကြည်လင်ပြတ်သားသော ပုံရိပ်များကို ရရှိနိုင်မည်ဖြစ်ပြီး ပြန်လည်စောင့်ကြည့်သည့်အချိန် လျော့နည်းစေမည် ဖြစ်ကာ အိန္ဒိယ၏ တပ်မတော် (ကြည်း၊ ရေ၊ လေ) များအား ရန်သူ နယ်မြေအတွင်း လှုပ်ရှားမှုများကို နီးနီးကပ်ကပ် စောင့်ကြည့်နိုင်စေမည်။

အိန္ဒိယ၏ အာကာသအေဂျင်စီအရာရှိများက ပြောကြားချက်အရ ၎င်းတို့သည် မတူညီသောဂြိုဟ်ပတ်လမ်းများတွင် ဂြိုဟ်တုအမျိုးမျိုးကို လွှတ်တင်ခြင်း ဖြင့် ခြိမ်းခြောက်မှုများကို လျှော့ချရန် ရည်ရွယ်ထားပြီး အိမ်နီးချင်း နိုင်ငံ များဖြစ်သည့် တရုတ်နှင့် ပါကစ္စတန်နယ်စပ်တလျှောက် စစ်သည်များ၏ လှုပ်ရှားမှုများနှင့် ကီလိုမီတာထောင်ချီသော နယ်နိမိတ်များကို ဓာတ်ပုံ ရိုက်ကူးနိုင်မည်ဖြစ်သည်။

ပါကစ္စတန်နှင့် မကြာသေးမီက ဖြစ်ပွားခဲ့သည့် စစ်ရေးတင်းမာမှုတွင် အိန္ဒိယသည် ပြည်တွင်းဖြစ်နှင့် စီးပွားဖြစ်ဂြိုဟ်တုများကို အသုံးပြု၍ အိမ်နီးချင်းနိုင်ငံရှိ အကြမ်းဖက်အခြေစိုက်စခန်းများကို ဖျက်ဆီးခဲ့သည် ဟု ဒေသခံမီဒီယာများက ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂