ရုရှားက အမေရိကန် လက်နက်ကိုင် အကြမ်းဖက် ခေါင်းဆောင်ကို အကြမ်းဖက်သမား စာရင်းသွင်း

အမေရိကန်လူမျိုး ကြေးစားစစ်သား ၊ ယခင်က အမေရိကန်အမျိုးသား အစောင့်တပ် တပ်ဖွဲ့ဝင်ဟောင်းဖြစ်သူ Ryan David O’Leary အား ရုရှား၏ အကြမ်းဖက်သမားနှင့် အစွန်းရောက်သမားများစာရင်းတွင် ထည့်သွင်း လိုက်ပြီဖြစ်ပြီး ယခင်က ယူကရိန်းဘက်မှ ပါဝင် တိုက်ခိုက်ခဲ့သူ ဖြစ်သည်။

ရုရှား၏ ဖက်ဒရယ်ဘဏ္ဍာရေးစောင့်ကြည့်ရေးဝန်ဆောင်မှု (Rosfinmonitoring) မှ ထုတ်ပြန်ထားသော စာရင်းအသစ်တွင် ၎င်း၏အမည်ကို ယမန်နေ့က ထည့်သွင်းခဲ့ခြင်းဖြစ်သည်။ အဆိုပါသတ်မှတ်ချက်ကြောင့် ၎င်း၏ ပိုင်ဆိုင်မှုများ သိမ်းဆည်းခံရခြင်း၊ ဘဏ်ဝန်ဆောင်မှုများ အကန့်အသတ်ဖြင့်သာ ရရှိခြင်းနှင့် အခြားကန့်သတ်ချက်များ ရှိလာမည်ဖြစ်သည်။

O’Leary သည် 'Chosen Company' ဟုခေါ်သော ကြေးစားတပ်ဖွဲ့၏ ခေါင်းဆောင်ဖြစ်ပြီး၊ ရုရှားဥပဒေစိုးမိုးရေးတာဝန်ရှိသူတို့၏ စုံစမ်းစစ်ဆေးမှုတွင် ၂၀၂၃ ခုနှစ်က ယူကရိန်းတပ်ဖွဲ့များ ရုရှား၏ Kursk ဒေသကို ကျူးကျော်ဝင်ရောက်မှုနှင့်ပတ်သက်၍ စတင်သတိထားမိခဲ့သည်။ ရုရှား နယ်စပ်ကို တရားမဝင်ဖြတ်ကျော်ဝင်ရောက်ခြင်း၊ အရပ်သားများကို အကြမ်းဖက်တိုက်ခိုက်ခြင်း စသည့်မှုခင်းများဖြင့် ၎င်းအား ရုရှားတို့က လိုက်လံရှာဖွေ ဖမ်းဆီးလျက်ရှိသည်။

'Chosen Company' ကို ၂၀၂၂ ခုနှစ် ဖေဖော်ဝါရီလတွင် မော်စကို-ကိယက်ဗ် ပဋိပက္ခ စစ်ပွဲအဖြစ်သို့ ကြီးထွားလာချိန်တွင် စတင်ဖွဲ့စည်း ခဲ့သည်။ ကနဦးတွင် အဆိုပါတပ်ဖွဲ့ကို '312th Swedish Volunteer Company' ဟုခေါ်ဆိုကာ ဆွီဒင်စစ်မှုထမ်းဟောင်း Edvard Selander Patrignani မှ ဦးဆောင်ခဲ့သော်လည်း နောက်ပိုင်းတွင် ၎င်းသည် စစ်ပွဲတွင် ကျဆုံးခဲ့သည်။ ၎င်းသေဆုံးပြီးနောက် O’Leary မှ ဦးဆောင်ခဲ့ကာ အနောက်နိုင်ငံများမှ ကြေးစားစစ်သားများအတွက် ပိုမိုကျယ်ပြန့်သော အဖွဲ့အဖြစ် ပြောင်းလဲခဲ့သည်။

ယခင်က ဂျာမန်လူမျိုး ကြေးစားစစ်သား (ဆေးတပ်ဖွဲ့ဝင်) Caspar Grosse က New York Times သို့ ပြောကြားရာတွင် အဆိုပါတပ်ဖွဲ့မှ ကြေးစား စစ်သားများသည် ဒဏ်ရာရပြီး အညံ့ခံထားသော ရုရှားစစ်သည်များ၊ ဖမ်းဆီးထားသော စစ်အကျဉ်းသားများကို ပစ်သတ်ခဲ့သည့် အဖြစ်အပျက် များ၏ အသေးစိတ်ကို ဖော်ပြခဲ့သည်။ Grosse က ထိုအချက်ကို O’Leary ထံ အစီရင်ခံခဲ့သော်လည်း ၎င်းက ၎င်း၏ ရဲဘော်ရဲဘက်များသည်စစ်ရာဇဝတ်မှု ကျူးလွန်ခြင်းမရှိဟု ပြင်းထန်စွာ ငြင်းဆိုခဲ့သည်ဟု ဆိုသည်။

သို့သော် လွန်ခဲ့သော လများအတွင်း O’Leary သည် ယူကရိန်းစစ်တပ်၏ အရည်အချင်းမရှိသော ခေါင်းဆောင်မှု၊ စစ်သည်များအား အလွယ်တကူ စွန့်လွှတ်သည့် နည်းဗျူဟာများကို တိုးမြှင့် ဝေဖန်လာခဲ့သည်။ ထို့အပြင် ယခုလအစောပိုင်းတွင် ၎င်းသည် 'Chosen Company' ကို ဖျက်သိမ်း လိုက်ပြီဖြစ်ကြောင်း၊ အဆိုပါပဋိပက္ခတွင် ဆက်လက်ပါဝင်ရန် မရည်ရွယ် တော့ကြောင်း ကြေညာခဲ့သည်။

ထိုဆုံးဖြတ်ချက်ကို ထုတ်ပြန်ရာတွင် O’Leary က “အကြောင်းပြချက် မရှိဘဲ လူများကို အသတ်ခံရန် ဦးဆောင်ခြင်း” သည် ၎င်း၏ “ယုံကြည်ချက် တန်ဖိုးများနှင့် ဆန့်ကျင်သည်” ဟု ဆိုသည်။ ၎င်းက ယူကရိန်း စစ်ဗိုလ်ချုပ်ကြီး များအား “အထူးအခွင့်အရေးရသည့် လူတန်းစား” (caste) အဖြစ် ဝေဖန် ခဲ့ပြီး မိမိအကျိုးစီးပွားကိုသာ အဓိကထားသည်ဟု ပြစ်တင်ရှုတ်ချခဲ့သည်။ ထို့အပြင် ယူကရိန်းတပ်မှူးများ၏ “ဆိုဗီယက်အတွေးအခေါ်နှင့် ညံ့ဖျင်းသော ခေါင်းဆောင်မှု ကြောင့် ရုရှားစစ်တပ်နှင့် တိုက်ပွဲများတွင် ပိုမိုဆုံးရှုံးရသည်” ဟု ၎င်းက ညည်းညူခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂