“အော့တဝါ မြေမြှုပ်မိုင်း အသုံးပြုမှု တားမြစ်ရေး သဘောတူညီချက်” မှ ယူကရိန်း နုတ်ထွက်

ယူကရိန်း သမ္မတ ဇီလန်စကီးသည် ဇူလိုင် ၁၅ ရက်တွင် ယူကရိန်း အမြင့်ဆုံးလွှတ်တော်က ထိုနေ့၌ အတည်ပြုခဲ့သည့် တရားဥပဒေ စာရွက်စာတမ်းအား လက်မှတ်ရေးထိုးခဲ့ပြီး ယူကရိန်းက “အော့တဝါ မြေမြှုပ်မိုင်း အသုံးပြုမှု တားမြစ်ရေးသဘောတူညီချက်” မှ ယာယီနုတ်ထွက်မှုကို တရားဝင်ခွင့်ပြုခဲ့ သည်။ အဆိုပါလုပ်ရပ်သည် ရုရှား၏ စစ်ရေးဖိအားများ ရင်ဆိုင်ရန်အတွက် ယူကရိန်းဘက်၏ ကာကွယ်ရေးစွမ်းအားကို မြှင့်တင်ရန်ဖြစ်ကြောင်း ၎င်းက ဆိုသည်။

သဘောတူညီချက်မှ နုတ်ထွက်ခြင်းသည် ကာကွယ်ရေးအင်အား၏ တန်းတူညီမျှမှုအား ပြန်လည် ဖော်ဆောင်ရန်ဖြစ်ကြောင်း ဇီလန်စကီးက ထိုနေ့တွင် လူမှုမီဒီယာ၌ ပို့စ်ရေးသား၍ ပြောကြားခဲ့ သည်။ သေကြေဒဏ်ရာရစေနိုင်သော မြေမြှုပ်မိုင်းအပါအဝင် အချို့သောလက်နက်များ အသုံးပြုခြင်း သည် ယူကရိန်းက ရုရှားဘက်အား ရင်ဆိုင်ရာတွင် “စစ်ရေးအင်အားနှင့် စွမ်းအား၏ ဟန်ချက်ညီမှုကို အနည်းဆုံးဖော်ဆောင်နိုင်ရေး” အတွက် အထောက်အကူပြုမည်ဖြစ်ကြောင်း ၎င်းက ပြောကြားခဲ့ သည်။

ယူကရိန်းက အဆိုပါသဘောတူညီချက်မှ နုတ်ထွက်ရခြင်း၏ အဓိကအကြောင်းရင်းတစ်ခုမှာ ယူကရိန်း -ရုရှား နှစ်ဖက်က မြေမြှုပ်မိုင်း တားမြစ်ရေးအပိုင်းတွင် “ညီမျှမှုမရှိ”သည့် အနေအထားကြောင့် ဖြစ်ကြောင်း၊ ယူကရိန်း-ရုရှား စစ်ပွဲအပြည့်အဝမရပ်တန့်မီ ယူကရိန်းအနေဖြင့် အဆိုပါ သဘော တူညီချက်မှ ယာယီနုတ်ထွက်ထားမည်ဖြစ်ကြောင်း ယူကရိန်း အမြင့်ဆုံးလွှတ်တော်၏ သက်ဆိုင်ရာ ရှင်းလင်းချက် စာရွက်စာတမ်းအား ကိုးကား၍ ယူကရိန်းနိုင်ငံပိုင် သတင်းဌာနက ဇူလိုင် ၁၅ ရက်တွင် သတင်းဖော်ပြခဲ့သည်။

“အော့တဝါ မြေမြှုပ်မိုင်း အသုံးပြုမှု တားမြစ်ရေး သဘောတူညီချက်” သည် ၁၉၉၉ ခုနှစ်တွင် တရားဝင် အသက်ဝင်ခဲ့ပြီး လူသေကြေဒဏ်ရာရမှုဖြစ်စေနိုင်သည့် မြေမြှုပ်မိုင်းများ အသုံးပြုခြင်း၊ သိုလှောင်ခြင်း၊ ထုတ်လုပ်ခြင်းနှင့် လွှဲပြောင်းပေးခြင်းအား တားမြစ်ထားသည်။ ၂၀၀၅ ခုနှစ် မေလ တွင် ယူကရိန်း အမြင့်ဆုံးလွှတ်တော်က အဆိုပါသဘောတူညီချက်တွင် ယူကရိန်းပါဝင်ရန် ခွင့်ပြု ခဲ့သည်။ ဇီလန်စကီးက ယခုနှစ် ဇွန်လ ၂၉ ရက်တွင် အမိန့်ကြေညာချက် လက်မှတ်ရေးထိုး၍ ယူကရိန်း အမျိုးသားလုံခြုံရေးနှင့် ကာကွယ်ရေးကောင်စီ၏ “အော့တဝါ မြေမြှုပ်မိုင်း အသုံးပြုမှု တားမြစ်ရေး သဘောတူညီချက်” မှ နုတ်ထွက်ခြင်း ဆုံးဖြတ်ချက်ကို ခွင့်ပြုခဲ့သည်။ ထို့နောက် ယူကရိန်း အစိုးရအဖွဲ့က သဘောတူညီချက်မှ နုတ်ထွက်ခြင်း အစီအစဉ်ကို စတင်ခဲ့သည်။ 

ကိုးကား- ဆင်ဟွာ