တောင်တရုတ်ပင်လယ်အတွင်း ပျံသန်းနေသည့် ဖိလစ်ပိုင် လေယာဉ် သုံးစင်းကို တရုတ်စစ်တပ်မောင်းထုတ်

ဖေဖော်ဝါရီ ၂၀ ရက်တွင် တောင်တရုတ်ပင်လယ်အတွင်း၌ရှိသော စပရက်တလီကျွန်းစုများအနီးရှိ လေပိုင်နက်အတွင်းသို့ တရားမဝင် ကျူးကျော်ဝင်ရောက်လာသောဖိလစ်ပိုင်လေယာဉ်သုံးစင်းကို သတိပေးမှုများလုပ်ဆောင်ကာ မောင်းထုတ်ပစ်ခဲ့ကြောင်း တရုတ်စစ်တပ်က ထုတ်ပြန်ပြောဆိုခဲ့သည်။

တရုတ်စစ်တပ်၏ ထုတ်ပြန်ချက်နှင့်ပတ်သက်ပြီး တရုတ်နိုင်ငံရှိ ဖိလစ်ပိုင် သံရုံးက ချက်ချင်းမှတ်ချက်ပြု တုံ့ပြန်ပြောဆိုခြင်းမျိုး မရှိသေးကြောင်း သိရသည်။ ဖိလစ်ပိုင်လေယာဉ်သုံးစင်းသည် လေပိုင်နက် တရားမဝင်ကျူးကျော်ဝင်ရောက်မှုများကို လုပ်ဆောင်ခဲ့သော်လည်း တရုတ်ဘက်က အောင်မြင်စွာဟန့်တားမှုများ လုပ်ဆောင်နိုင်ခဲ့ကြောင်း တရုတ်တောင်ပိုင်းကွပ်ကဲမှုဌာနချုပ်က ပြောကြားခဲ့သည်။

တောင်တရုတ်ပင်လယ် တစ်ခုလုံးနီးပါးကို ၎င်းပိုင်ဆိုင်ကြောင်း တရုတ်ဘက်က အခိုင်အမာပြောဆိုထားသကဲ့သို့ ဘရုနိုင်း၊ မလေးရှား၊ အင်ဒို နီးရှား၊ ဖိလစ်ပိုင်နှင့် ဗီယက်နမ်တို့ကလည်း တောင်တရုတ်ပင်လယ်အတွင်း တစ်စိတ်တစ်ပိုင်းကို ၎င်းတို့ပိုင်ဆိုင်ကြောင်း အခိုင်အမာပြောဆို ထားကြသည်။

ဖိလစ်ပိုင်နှင့် တရုတ်တို့သည် အငြင်းပွား တောင်တရုတ် ပင်လယ်အတွင်းတွင် ထိပ်တိုက်တွေ့ဆုံမှုများ မကြာခဏဖြစ်ပွားလျက်ရှိပြီး နှစ်နိုင်ငံကြား တင်းမာမှုများ ဆိုးရွားစွာမြင့်တက်လျက်ရှိကြောင်း သိရသည်။ တရုတ် အစိုးရက ၎င်း၏ပိုင်နက်နယ်မြေအတွင်းသို့ ကျူးကျော်ဝင်ရောက်ကာ ရန်စမှုများ လုပ်ဆောင်နေကြောင်း ဖိလစ်ပိုင်ဘက်မှ အခိုင်အမာ စွပ်စွဲ ပြောဆိုထားသလို တရုတ်ဘက်ကလည်း ဖိလစ်ပိုင်အစိုးရသည် ၎င်း၏ ပိုင်နက်နယ်မြေအတွင်း ကျူးကျော်ဝင်ရောက်ကာ ရန်စမှုများကို လုပ်ဆောင်နေကြောင်း ပြန်လည်စွပ်စွဲပြောဆိုထားသည်။

ကိုးကား-NP News