လန်ဒန် Heathrow လေဆိပ်သည် ဓာတ်အားပြတ်တောက်မှုကြောင့် ပိတ်သိမ်းထားရပြီး ကမ္ဘာလုံးဆိုင်ရာ ခရီးသွားလာမှုများ ကမောက်ကမ ဖြစ်

လန်ဒန် Heathrow လေဆိပ်အနီးတွင် မီးလောင်မှုဖြစ်ပွားခဲ့ခြင်းကြောင့် ဓာတ်အားပြတ်တောက်မှုဖြစ်ပွားပြီး ကမ္ဘာ့ခရီးသည် အဝင်အထွက် အများဆုံးလေဆိပ်များထဲမှ တစ်ခုဖြစ်သော Heathrow လေဆိပ်ကို လုံးဝပိတ်သိမ်းထားရကြောင်း ကြေညာခဲ့သည်။

Heathrow လေဆိပ်ပိတ်သိမ်းမှုသည် ခရီးသည် သောင်းနှင့်ချီပြီး နှောင့်နှေး ကြန့်ကြာစေနိုင်ကာ လေယာဉ်ခရီးစဉ် ၁,၃၀၀ ကျော်ကို ထိခိုက်စေမည် ဟု မျှော်မှန်းထားသည်။ လေကြောင်းလိုင်းဆိုင်ရာစီမံခန့်ခွဲမှုကုမ္ပဏီ တစ်ခု က ခရီးသည် ၁၄၅,၀၀၀ ကျော် ထိခိုက်နိုင်ကြောင်း ခန့်မှန်းခဲ့သည်။

လေဆိပ်က လာမည့်ရက်များအတွင်း ခရီးစဉ်နှောင့်နှေးမှုများ ဆက်လက် ဖြစ်ပွားနိုင်ကြောင်း သတိပေးထားသည်။ Heathrow လေဆိပ်တာဝန်ရှိ သူများက လေဆိပ်ပြန်မဖွင့်မီအချိန်ထိ လေဆိပ်သို့ လာရောက်ခြင်း မပြုကြရန်နှင့် ပိုမိုသိရှိလိုပါက သက်ဆိုင်ရာလေကြောင်းလိုင်းများကို ဆက်သွယ်ရန် အကြံပြုထားသည်။

မီးသတ်သမားများက ဓာတ်အားခွဲရုံမီးလောင်မှုကို ငြှိမ်းသတ်နေစဉ် Heathrow လေဆိပ်အနီးရှိ အိမ်ရာအချို့တွင် ဓာတ်အားပြန်လည် ရရှိကြောင်း ပြောကြားခဲ့သည်။

မီးလောင်မှု၏ အကြောင်းရင်းကို စုံစမ်းစစ်ဆေးဆဲဖြစ်ကြောင်း မီးသတ်ဌာန၏ပြောကြားချက်အရ သိရသည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂