မောင်မောင်လွင်၏ သွင်းဂိုးဖြင့် Asean All Stars အသင်းက မန်ချက်စတာယူနိုက်တက်အသင်းကို အနိုင်ရ

ရန်ကုန် မေ ၂၈

Asean All Stars အသင်းနှင့်နာမည်ကြီး အင်္ဂလန်ကလပ် မန်ချက်စတာယူနိုက်တက် အသင်းတို့၏ခြေစမ်းပွဲကိုယနေ့ညပိုင်းက မလေးရှားနိုင်ငံ ကွာလာလမ်ပူမြို့ရှိဘူကစ်ဂျာလီကွင်း၌ကျင်းပရာ Asean All Stars အသင်းမှ မြန်မာတိုက်စစ် ကစားသမား မောင်မောင်လွင်က အနိုင် ဂိုးသွင်းပြီး ၁ ဂိုး ဂိုးမရှိဖြင့် အနိုင်ရခဲ့ သည်။

မန်ချက်စတာယူနိုက်တက်အသင်းနှင့် ခြေစမ်းကစားရန် အာဆီယံဘောလုံးအဖွဲ့ ချုပ်သည် အဖွဲ့ဝင်နိုင်ငံများမှကစားသမားများဖြင့်ဖွဲ့စည်းခဲ့ပြီး မြန်မာနိုင်ငံကိုယ်စား ပြုအဖြစ် မောင်မောင်လွင် ရွေးချယ်ခံခဲ့ရ သည်။ မန်ချက်စတာယူနိုက်တက်အသင်း သည် ပွဲထွက်လူစာရင်းတွင် မက်ဂွိုင်းယား၊ ကက်စမဲရိုး၊ ဟွိုင်လန်း၊ ကိုဘီမိုင်နူး၊ အိုနာနာ စသည့်ကစားသမားများကို အသုံးပြုခဲ့ပြီး ဒုတိယပိုင်းတွင် ဘရူနိုဖာနန်ဒက်စ်၊ ဂါနာချို၊ အာမက်အပါအဝင် တစ်သင်းလုံး အပြောင်း အလဲပြုလုပ်ခဲ့သည်။

မောင်မောင်လွင်သည် ပထမပိုင်းတွင် ပွဲထွက်ကစားခွင့်မရသော်လည်း ဒုတိယ ပိုင်းအစတွင် ကစားခွင့်ရခဲ့ပြီး သမိုင်းဝင် စေမည့်အနိုင်ဂိုးကို မိနစ် ၇၀ တွင်သွင်းယူနိုင်ခဲ့ခြင်းဖြစ်သည်။ ထို့ကြောင့် မောင်မောင် လွင်သည် မန်ချက်စတာယူနိုက်တက် အသင်းဘက်သို့ ဂိုးသွင်းယူနိုင်သည့် ပထမဆုံး မြန်မာကစားသမားအဖြစ်လည်း မှတ်တမ်းဝင်ခဲ့သည်။

ပရီးမီးယားလိဂ်ပြိုင်ပွဲ ပြီးဆုံးချိန်တွင် ဇယားအောက်ပိုင်းရောက်ခဲ့သည့်အပြင် ယူရိုပါလိဂ်ဗိုလ်လုပွဲတွင်ရှုံးနိမ့်ပြီး ချန်ပီယံ ဆုနှင့်လွဲချော်ခဲ့သဖြင့် ဖိအားများနေသည့် မန်ချက်စတာယူနိုက်တက်အသင်းသည် အာရှခရီးစဉ်ပထမဆုံးပွဲတွင် ရှုံးပွဲနှင့် ရင်ဆိုင်ခဲ့ရခြင်းဖြစ်သည်။

မြဝတီ