ဆီးနိတ်ဒီမိုကရက်များက လူမှုဖူလုံရေး အလုပ်အကိုင်များလျှော့ချမှုကို ပြင်းပြင်းထန်ထန် ဝေဖန်ပြီး အီလွန်မက်စ်ကို တိုက်ခိုက်
News Image
ဆီးနိတ်ဒီမိုကရက်ခေါင်းဆောင်များသည် မတ်လ ၃ ရက်(တနင်္လာ) နေ့တွင် လူမှုဖူလုံရေးအကျိုးခံစားခွင့်များကို ထောက်ခံသည့် သဘောထားကို ထုတ်ဖော်ပြောဆိုခဲ့ကြပြီး ယင်းသည် လူမှုဖူလုံရေးအေဂျင်စီက လုပ်သား အင်အားအများအပြားလျှော့ချမှု၏ တစ်စိတ်တစ်ပိုင်းအနေဖြင့် အလုပ်အကိုင် ၇,၀၀၀ ကို လျှော့ချရန် စီစဉ်နေကြောင်း ကြေညာချက်အပြီးတွင် ပြောဆိုခဲ့ခြင်းဖြစ်သည်။
“ယခု မိမိတို့ ဆီးနိတ်ဒီမိုကရက်များအနေဖြင့် ကြာမြင့်စွာ စိုးရိမ်ခဲ့ရသည့် အရာတစ်ခုသည် အမှန်တကယ် ဖြစ်လာတော့မည်ဖြစ်ကြောင်းနှင့် လူမှု ဖူလုံရေးကို တိုက်ခိုက်ခံနေရပြီး အန္တရာယ်များလည်း ရင်ဆိုင်နေရပါကြောင်း" ဆီးနိတ်အမျိုးသားဒီမိုကရက်တစ်ပါတီ ခေါင်းဆောင် ချက်ရှူးမားက Capitol Hill ရှိ သတင်းစာရှင်းလင်းပွဲတွင် ပြောကြား ခဲ့သည်။
ထိုသတင်းစာရှင်းလင်းပွဲတွင် ချက်ရှူးမားအပြင်၊ ဆီးနိတ် ဘဏ္ဍာရေး ကော်မတီ၏ အကြီးတန်းအဖွဲ့ဝင် ရောန်ဝိုင်ဒင် (ဒီ-အိုရီဂွန်) ၊ ဆီးနိတ် ဘဏ္ဍာရေးကော်မတီ၏ ဒုတိယဥက္ကဋ္ဌ ဆီးနိတ်တာ ပက်တီမာရေ (ဒီ-ဝါရှင်တန်) နှင့် ဆီးနိတ်တာ အေမီကလိုဘူချာ (ဒီ-မင်နီဆိုတာ) တို့လည်း တက်ရောက်ခဲ့ကြပြီး လူမှုဖူလုံရေး လုပ်သားအင်အား လျှော့ချမှုများသည် ရီပတ်ဘလီကင်တို့၏ အရေးကြီးသည့်အကျိုးခံစားခွင့်စနစ်ကို ပုဂ္ဂလိကပိုင် ဖြစ်စေရေး လမ်းကြောင်းပေါ်ဦးတည်ရန် အစီအစဉ်တစ်ခုသာ ဖြစ်သည် ဟု ဆိုခဲ့ကြသည်။
“မိမိအမြင်ပြောကြားရမည်ဆိုပါက DOGE ၏ လူမှုဖူလုံရေးကို တိုက်ခိုက်မှုသည် လူမှုဖူလုံရေးကို ပုဂ္ဂလိကပိုင်ဖြစ်စေရေး လမ်းကြောင်းပေါ်က ပထမဆုံးခြေလှမ်းပါပဲ" ဟု ရောန်ဝိုင်ဒင်က အီလွန်မက်နှင့် အစိုးရ စွမ်းဆောင်ရည်မြှင့်တင်ရေးဌာန (DOGE) ကို ရည်ညွှန်းကာ ပြောကြားခဲ့သည်။
ကိုးကား-ABC News
ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂
