ဂျပန်နိုင်ငံအနောက်ပိုင်း၌ လေပြင်းတိုက်ခတ်မှုကြောင့် တောမီးလောင် ကျွမ်းမှုများ အရှိန်မြင့်

ဂျပန်နိုင်ငံအနောက်ပိုင်းစီရင်စုနှစ်ခု၌ မတ်လ ၂၆ ရက်က လေပြင်း တိုက်ခတ်မှုကြောင့် တောမီးလောင်ကျွမ်းမှု ပိုမိုပြင်းထန်လာခဲ့ကာ စုစုပေါင်း ဟက်တာ ၉၀၀ ကျော် လောင်ကျွမ်းခဲ့ပြီး အနည်းဆုံး အဆောက်အဦ ၁၅ လုံးထိ ပျက်စီးခဲ့ကြောင်း သိရပါသည်။

အာမီစီရင်စုရှိ အိုင်မာဘာရီနှင့် ဆိုင်ဂျို၌ ဟက်တာ ၄၁၀ ကျော် မီးလောင် ကျွမ်းခဲ့ပြီး အိမ် ၇ လုံးနှင့် ဂိုဒေါင် ၂ လုံး မီးလောင်ပျက်စီးခဲ့သည်။ တစ်ချိန် တည်း၌ အိုကာယာမစီရင်စုတွင် ခန့်မှန်းခြေအားဖြင့် ဟက်တာ ၅၄၀ ခန့် နှင့်အဆောက်အဦ ၆ လုံး မီးလောင်ခဲ့သည်။ စီရင်စုနှစ်ရပ်စလုံး၌မီးလောင်ကျွမ်းမှုကို ထိန်းချုပ်ရန် မီးသတ်သမားများနှင့် ကိုယ်ပိုင် ကာကွယ်ရေးတပ်ဖွဲ့တို့ ပူးပေါင်းဆောင်ရွက်နေကြပြီး ဒေသခံများကို ဘေးလွတ်ရာသို့ ရွှေ့ပြောင်းကြရန် ထုတ်ပြန်ထားပါသည်။ ဝန်ကြီးချုပ် ရှီဂီရုအစ်ဟီဘာသည် သက်ဆိုင်ရာအေဂျင်စီများက မီးလောင်ကျွမ်းမှုကို ထိန်းချုပ်နိုင်မည်ဟုမျှော်လင့်လျက်ရှိပြီး ဓာတ်အားပြတ်တောက်မှု ဖြစ်နိုင်ခြေရှိနိုင်ခြင်းကြောင့် ဓာတ်အားထောက်ပံ့ရေးယာဉ်များ ဖြန့်ကြက် ချထားရေးကိုလည်း ဝန်ကြီးချုပ်ကအမိန့်ပေးထားပါသည်။

ရဟတ်ယာဉ်များအသုံးပြု၍ မီးငြှိမ်းသတ်မှုများ ဆောင်ရွက်လျက်ရှိပြီး တောမီးလောင်မှုသည် လူအသေအပျောက်မရှိသေးသော်လည်း အန္တရာယ် ရှိနေဆဲဖြစ်ကြောင်း ကြေညာထားပါသည်။ မီးသတ်နှင့် ဘေး အန္တရာယ်ဆိုင်ရာစီမံခန့်ခွဲမှု အေဂျင်စီကလည်း အရေးပေါ် မီးသတ် တပ်ဖွဲ့ဝင်များ စေလွှတ်ရန် စီရင်စု ရှစ်ခုကို ဆက်လက် တောင်းဆိုထား ပါသည်။ လက်ရှိ အိုင်မာဘာရီနှင့် ဆိုင်ဂျိုရှိ အိမ်ခြေ ၃,၈၀၀ ကျော်မှ လူ ၇,၅၀၀ နီးပါးကို ဘေးလွတ်ရာသို့ရွှေ့ပြောင်းရန် အမိန့်ထုတ်ထားသည်။

မတ်လ ၂၅ ရက်မှ စလောင်ကျွမ်းခဲ့သည့် မီယာဇာကီမြို့၏ သီးခြား မီးလောင်ကျွမ်းမှုကိုလည်း မတ် ၂၆ ရက်နေ့၊ ညနေပိုင်းက ထိန်းချုပ်နိုင် ခဲ့ပြီး အဆိုပါဒေသရှိ အိမ်ထောင်စု ၇၀ ကို ဘေးလွတ်ရာသို့ပြောင်းရွှေ့ရန် အမိန့်ထုတ်ထားကြောင်း သိရပါသည်။

ကိုးကား-NP News