ပြင်သစ်က ဆီနီဂေါနိုင်ငံမှ စစ်စခန်းကို ပြန်လည်လွှဲပြောင်းပေးအပ်

ပြင်သစ်သံရုံး၏ ကြေညာချက်အရ ပြင်သစ်သည် ဆီနီဂေါနိုင်ငံ အနောက်ပိုင်းရှိ စစ်ဆက်သွယ်ရေးစခန်းတစ်ခုကို ၎င်း၏စစ်တပ်များ ရုပ်သိမ်းပြီးနောက် ဒေသအာဏာပိုင်များထံ လွှဲပြောင်းပေးအပ်လိုက်ပြီဖြစ်သည်။ ဆီနီဂေါသမ္မတ Bassirou Diomaye Faye က ယခင်ကိုလိုနီအာဏာရှင်နိုင်ငံနှင့်ချုပ်ဆိုထားသော ဆယ်စုနှစ်များစွာ ကြာမြင့်ပြီ ဖြစ်သည့် ကာကွယ်ရေးစာချုပ်ကို ပြီးဆုံးရန် လွန်ခဲ့သောနှစ်က တောင်းဆိုခဲ့ပြီး ၎င်းစာချုပ်သည် နိုင်ငံ၏ အချုပ်အခြာအာဏာနှင့် မကိုက်ညီကြောင်း ကြေညာခဲ့သည်။

ဒါကာမြို့ရှိ ပြင်သစ်သံရုံးက ဗုဒ္ဓဟူးနေ့ (ဇူလိုင် ၂) ထုတ်ပြန်ချက်တွင် Rufisque ရှိ ပူးတွဲအသံလွှင့်ဌာနသည် ၁၉၆၀ ပြည့်နှစ်မှစ၍ တောင် အတ္တလန္တိတ်ကမ်းရိုးတန်းတစ်လျှောက် စစ်ဘက်ဆိုင်ရာ ဆက်သွယ်ရေး လုပ်ငန်းများကို တာဝန်ယူဆောင်ရွက်ခဲ့ကြောင်း ဖော်ပြခဲ့သည်။

ပြင်သစ်သည် မတ်လတွင် ဆီနီဂေါမှ စစ်တပ်များရုပ်သိမ်းရန် စတင်ခဲ့ပြီး Marechal နှင့် Saint-Exupery စစ်စခန်းနှစ်ခုကို ဆီနီဂေါအစိုးရထံ လွှဲပြောင်းပေးခဲ့သည်။ မေလတွင် ဒါကာဆိပ်ကမ်းရှိ Contre-Amiral Protet စခန်းကိုလည်း ပြန်လည်ပေးအပ်ခဲ့သည်။ အဆိုပါဖြစ်စဉ်ကို ကြီးကြပ်ရန် နှစ်နိုင်ငံဖွဲ့စည်းထားသော ပူးတွဲကော်မရှင်က စခန်းများ လွှဲပြောင်းခြင်းနှင့် ပြင်သစ်စစ်သည် ၃၅၀ ခန့် ရုပ်သိမ်းခြင်း လုပ်ငန်းစဉ် များကို ၂၀၂၅ နှစ်ကုန်တွင် ပြီးစီးမည်ဟု ကြေညာခဲ့သည်။

သို့ရာတွင် သံရုံးက ဗုဒ္ဓဟူးနေ့ (ဇွန် ၂) တွင် “ပူးတွဲ သဘောတူ အချိန် ဇယားအရ နောက်ဆုံးစခန်းများကို ၂၀၂၅ ဇူလိုင်လကုန်တွင် ပြန်လည် ပေးအပ်မည်” ဟု ဖော်ပြခဲ့ပြီး ကော်မရှင်က နှစ်နိုင်ငံကာကွယ်ရေးနှင့် လုံခြုံရေးပူးပေါင်းဆောင်ရွက်မှုကို အသစ်ပြန်လည်တည်ဆောက်ရန် ဆက်လက်အားထုတ်နေကြောင်း ထည့်သွင်းပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂