ဗီယက်နမ်နိုင်ငံသည် ဘဏ္ဍာရေးအသုံးစရိတ်များကို လျှော့ချရန်နှင့် စီမံခန့်ခွဲရေးဆိုင်ရာ စွမ်းဆောင်ရည်မြှင့်တင်ရန် ကြိုးစားနေချိန်တွင် အစိုးရယန္တရားကို ငါးပုံတစ်ပုံအထိ လျှော့ချမည့် ဗျူရိုကရေစီ ပြုပြင် ပြောင်းလဲရေးအစီအစဉ်ကို ဖေဖော်ဝါရီ ၁၈ ရက်(အင်္ဂါနေ့)တွင် ဗီယက်နမ် လွှတ်တော်မှ အတည်ပြုခဲ့သည်။

မတ်လ ၁ ရက်နေ့မှစတင်၍ အစိုးရဝန်ကြီးဌာန အရေအတွက်ကို လက်ရှိ ၁၈ ခုမှ ၁၄ ခုသို့ လျှော့ချသွားမည်ဖြစ်ကြောင်း အဆိုပါအစည်းအဝေး ထုတ်ပြန်ချက်တွင် ဖော်ပြထားသည်။

ရုရှားတောင်ပိုင်းရှိ ရေနံပန့်စက်ရုံတစ်ခုသည် ယူကရိန်းဒရုန်း တိုက်ခိုက်မှုများကြောင့် ပျက်စီးခဲ့ရာ ထိုစက်ရုံ၏ ပူးတွဲပိုင်ရှင်များ ဖြစ်သော အနောက်နိုင်ငံများက ပြုပြင်ရန်စရိတ်ကို ကျခံသင့်ကြောင်း ရုရှားသမ္မတ ဗလာဒီမာပူတင်က အဆိုပြုခဲ့သည်။ ထိုစက်ရုံလည်ပတ်မှုကို Caspian Pipeline Consortium (CPC) မှ လုပ်ကိုင်ဆောင်ရွက်ပြီး ၎င်းကို အမေရိကန်နှင့် ဥရောပသမဂ္ဂကုမ္ပဏီများက တစ်စိတ်တစ်ပိုင်း ထိန်းချုပ် ထားသည်။

ငြိမ်းချမ်းရေးအကြောင်းပြကာ ယူကရိန်း ပိုင်နက်အတွင်း NATO အဖွဲ့ဝင်နိုင်ငံများမှ တပ်ဖြန့်ထားရေးသဘောတူညီမှုအား လက်မခံကြောင်း ရုရှားနိုင်ငံခြားရေးဝန်ကြီးက သတိပေးလိုက်သည်။

ဆော်ဒီအာရေးဗီးယားတွင် ပြုလုပ်ခဲ့သည့် အမေရိကန်နှင့် ယူကရိန်း ရုရှားစစ်ပွဲ အဆုံးသတ်ရေးဆွေးနွေးပွဲအပြီးတွင် ရုရှားနိုင်ငံခြားရေး ဝန်ကြီး ဆာဂေးလက်ဗ်ရော့ဗ်က ယခုလိုပြောဆိုခဲ့ခြင်းဖြစ်သည်။ 

ယူကရိန်းတွင် အခြားနိုင်ငံများ၏ အလံအောက်မှ စစ်တပ်တချို့ ရောက်ရှိ နေရုံဖြင့် အခြေအနေ ကွာခြားသွားမည်မဟုတ်ဘဲ လုံးဝ လက်ခံမည်မဟုတ်ကြောင်း ၄င်းကဆိုသည်။