CITIC Group (Myanmar) ကုမ္ပဏီက နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌရုံးဝန်ကြီး ဌာန (၂) မှ ငလျင်ဘေးဒဏ်သင့် ဝန်ထမ်းများအတွက် စားသောက်ကုန်နှင့် အသုံးအဆောင်ပစ္စည်းများ ပေးအပ်လှူဒါန်းပွဲကို နေပြည်တော်၊ ရုံးအမှတ် (၄၁) တွင် ဧပြီ ၉ ရက်နေ့က ကျင်းပသည်။

အခမ်းအနားတွင် CITIC Group (Myanmar) ကုမ္ပဏီ ဒုတိယဥက္ကဋ္ဌများ ဖြစ်ကြသည့် Mr. Piao Bo၊ Mr. Ma Chuanfu နှင့် Mr. Zhang Yue တို့က ငလျင်ဘေးဒဏ်သင့်ဝန်ထမ်းများအတွက် စားသောက်ကုန်နှင့် အသုံး အဆောင်ပစ္စည်းများကို လာရောက်ပေးအပ်လှူဒါန်းရာ ပြည်ထောင်စု ဝန်ကြီး ဦးကိုကိုလှိုင်က လက်ခံရယူပြီး ကျေးဇူးတင်စကားပြောကြားသည်။

ထိုသို့လှူဒါန်းရာတွင် ငလျင်ဘေးဒဏ်သင့် ဝန်ထမ်းများအတွက် ဆန် (၁၂ ကီလို) အိတ် ၂၂၀ အိတ်၊ ဆီ (၁ လီတာ) ၂၃၀ ဗူး၊ ရေသန့် (၁ လီတာ) ၃၆၀၀ ဗူး၊ ခြင်ထောင် ၃၀ လုံး၊ ယာယီတဲ ၁၀ လုံး တို့ကို ပေးအပ် လှူဒါန်းခဲ့ကြောင်း သိရသည်။

ကိုးကား- နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီး ဌာန (၂)

မန္တလေးမြို့တွင် ငလျင်ကြောင့် ပြိုကျခဲ့သော မဟာမြတ်မုနိ ဗုဒ္ဓရုပ်ပွားတော် မြတ်ကြီး ဂန္ဓကုဋိတိုက်၏ စိန်ဖူးတော်နှင့် ဌာပနာပစ္စည်းများအား ရှာတွေ့သည့် လုပ်အားပေးဝန်ထမ်းများက တာဝန်ရှိသူများထံ ပြန်လည် အပ်နှံခဲ့ကြောင်း နိုင်ငံတော်စီမံအုပ်ချုပ်ရေးကောင်စီ၏ ထုတ်ပြန်ချက် အရ သိရသည်။

မန္တလေးငလျင်ကြီးကြောင့် မဟာမြတ်မုနိဗုဒ္ဓရုပ်ပွားတော်မြတ်ကြီး၏ မကိုဋ်တော်စောင်းသွားခြင်း၊ ရွှေသားထီးတော်ကြီး၏ အနောက်ဘက် စောင်းသွားခြင်း၊ စိန်ဖူးတော်မြေခခြင်းများအပြင် မဟာမုနိဗုဒ္ဓ ရုပ်ပွား တော်မြတ်ကြီး ကိန်းဝပ် စံပါယ်တော်မူသော ဂန္ဓကုဋိတိုက်၏ အရပ်လေး မျက်နှာရှိ စမြင်များ၊ တန်ဆောင်းနေရာများနှင့် နေရာအချို့တွင်လည်း ပြိုကျပျက်စီးမှုများ ဖြစ်ပေါ်ခဲ့ကြောင်း သိရသည်။

ပြိုကျပျက်စီးသွားမှုများကြောင့် မဟာမြတ်မုနိဘုရားကြီး၏ ရင်ပြင်တော် ၌ တပ်မတော်သားများက ဘုရားကြီးဂေါပကအဖွဲ့မှ တာဝန်ရှိများနှင့် ပူးပေါင်း၍ စက်ယန္တရားများ၏ အကူအညီရယူကာ အပျက်အစီးများအား ဖယ်ရှားရှင်းလင်းခြင်းဆောင်ရွက်ခဲ့ကြောင်း သိရသည်။

မတ်လ ၂၈ ရက်မှ ဧပြီ ၁ ရက်အထိ ကျောင်းတော်ကြီး၏ အနောက်ဘက် ရင်ပြင်တော်ရှိ အဆောက်အဦ အပျက်အစီးများကြားမှ ရတနာပစ္စည်း ၁၅၂ မျိုး (၃၈ ကျပ်သား၊ ၄ ပဲ၊ ၄ ရွေး) နှင့် (အတွင်း) စိန်ဖူးတော်ကို လည်းကောင်း၊ ဧပြီလ ၂ ရက်တွင် ရတနာပစ္စည်း ၁၅၂ မျိုး(၂၇ ကျပ်သား၊ ၄ ပဲ၊ ၇ ရွေး)နှင့် (အပြင်)စိန်ဖူးတော် (အောက်ခြမ်း) ကိုလည်းကောင်း၊ ဧပြီ ၃ ရက်တွင် ရတနာပစ္စည်း ၈၃ မျိုး (၁၀ ကျပ်သား၊ ၁၁ ပဲ၊ ၄ ရွေး) ကိုလည်းကောင်း တွေ့ရှိခဲ့ကြောင်း သိရသည်။

ဧပြီ ၄ ရက်တွင်လည်း ရတနာပစ္စည်း ၂၉၅ မျိုး (၄၂ ကျပ်သား၊ ၉ ပဲ၊ ၆ ရွေး)နှင့် အပြင်စိန်ဖူးတော်(အပေါ်ခြမ်း)(စိန် ၇ ရတီ ပါ) ကိုလည်းကောင်း၊ ဧပြီ ၅ ရက်တွင် ရတနာပစ္စည်း ၂၆၄ မျိုး(၄၇ ကျပ်သား၊ ၁၅ ပဲ၊ ၅ ရွေး) ကိုလည်းကောင်း၊ ဧပြီ ၆ ရက်တွင် ရတနာပစ္စည်း ၈၄ မျိုး (၁၄ ကျပ်သား၊ ၂ ပဲ၊ ၃ ရွေး) ကိုလည်းကောင်း၊ ဧပြီ ၇ ရက် တွင် ရတနာပစ္စည်း ၁၂၄ မျိုး (၁၈ ကျပ်သား၊ ၁၄ ပဲ၊ ၂ ရွေး)ကိုလည်းကောင်း၊ ဧပြီ ၈ ရက် တွင် ရတနာ ပစ္စည်း ၆၄ မျိုး (၇ ကျပ်သား၊ ၅ ပဲ) တို့ကိုလည်းကောင်း ထပ်မံ တွေ့ရှိ ခဲ့ကြောင်း သိရသည်။

ထို့ကြောင့် ငလျင်လှုပ်ခတ်ပြီး (၁၂ ရက်အကြာတွင် စုစုပေါင်း ရတနာ ပစ္စည်းမျိုးစုံ ၁၂၅၀ မျိုး၊ (၂၀၇ ကျပ်သား၊ ၃ ပဲ၊ ၇ ရွေး) တို့ တွေ့ရှိခဲ့သဖြင့် တာဝန်ရှိသူများက ဘုရားကြီးဂေါပကထံသို့ စနစ်တကျလွှဲပြောင်း အပ်နှံ ခဲ့ကြောင်း သိရသည်။

လက်ရှိတွင် ငလျင်ဒဏ်ကြောင့် ပျက်စီးခဲ့ရသည့် မဟာမြတ်မုနိဘုရားကြီး၏ မကိုဋ်တော်၊ စိန်ဖူးတော်နှင့် ရွှေသားထီးတော်ကြီး တည့်မတ်ရေး လုပ်ငန်းများ၊ မဟာမြတ်မုနိကျောင်းတော်ကြီးပြုပြင်ရေးလုပ်ငန်းများအားအမြန်ဆုံးဆောင်ရွက်နိုင်ရေးအပြင် သာသနိကအဆောက်အဦများ ပြုပြင်ရေး လုပ်ငန်းများလုပ်ဆောင်လျက်ရှိကြောင်း သိရသည်။

ကိုးကား-NP News

ငလျင်ဒဏ်ကြောင့် ပျက်စီးခဲ့သည့် ရန်ကုန်-မန္တလေး အမြန်လမ်း ၁၆၅ မိုင်၁ ဖာလုံနှင့် ၁၆၅ မိုင် ၃ ဖာလုံကြားရှိ ဆွာချောင်းတံတားပေါ်မှ လက်ရှိတွင် ၅ တန်အောက် ယာဉ်များသာ သွားလာနိုင်သေးသော်လည်း ဧပြီ ၉ ရက်နေ့မှ စတင်၍ တန် ၂၀ မော်တော်ယာဉ်ကြီးများ ဖြတ်သန်းသွားလာနိုင်တော့မည်ဖြစ်ကြောင်း နိုင်ငံတော်စီမံအုပ်ချုပ်ရေး ကောင်စီ က ထုတ်ပြန်သောသတင်းအရ သိရသည်။

အဆိုပါ ဆွာချောင်းတံတားသည် ပြီးခဲ့သည့် မတ်လ ၂၈ ရက်က လှုပ်ခတ်ခဲ့သော အင်အားပြင်းမြေငလျင်ကြောင့် ထိခိုက်ပျက်စီးမှုများ ဖြစ်ပေါ်ခဲ့သဖြင့် ပြန်လည်တည်ဆောက်ရေးလုပ်ငန်းများကို ဆောက်လုပ်ရေးဝန်ကြီးဌာန တံတားဦးစီးဌာန တည်ဆောက်ရေးအဖွဲ့ (၃) တံတားအထူးအဖွဲ့ (၁၀) က တာဝန်ယူဆောင်ရွက်နေခြင်းဖြစ်သည်။

ထိုသို့ ဆွာချောင်းတံတား အသွားလမ်း ပေ (၈၁၀) ပြင်ဆင်ထိန်းသိမ်းခြင်းလုပ်ငန်းများ ဆောင်ရွက်နေမှု၊ P7 ကို ဗဟိုထား၍ ၂ လွှာ ၁ ထပ် ယာယီဘေလီတံတား ပေ (၁၉၀) တပ်ဆင်ခြင်းလုပ်ငန်း ဆောင်ရွက်ပြီးစီးမှု အခြေအနေနှင့် ပေ (၄၀) ၃ လွှာ ၃ ထပ် ဘေလီငြမ်းထောက်ခြင်း လုပ်ငန်းဆောင်ရွက်နေမှု အခြေအနေများကို နိုင်ငံတော်စီမံအုပ်ချုပ်ရေး ကောင်စီဒုတိယဥက္ကဋ္ဌ ဒုတိယဝန်ကြီးချုပ်၊ ဒုတိယဗိုလ်ချုပ်မှူးကြီး စိုးဝင်းနှင့် အဖွဲ့ဝင်များက ဧပြီ ၇ ရက်တွင် သွားရောက်ကြည့်ရှုစစ်ဆေးခဲ့ကြောင်း သိရသည်။

ပဲခူးတိုင်းဒေသကြီးအတွင်း၌ ငလျင်ဒဏ်ကြောင့် ထိခိုက်ပျက်စီးသေဆုံးမှုအနေဖြင့် ကနဦးစာရင်းများအရ ဘုရားစေတီ ၇၁ ဆူ၊ ဘုန်းတော်ကြီးကျောင်း ၁၈၆ ကျောင်း၊ စာသင်ကျောင်း ၉၂ ကျောင်း၊ အခြားဘာသာရေးကျောင်း ၁၅ ကျောင်း၊ ဌာနဆိုင်ရာ အဆောက်အဦ ၂၀၀၊ အခြားအဆောက်အဦ ၂၈၉ ခု၊ လူနေအဆောက်အဦ ၁၇၃၆ လုံးနှင့် လမ်းတံတား အချို့ ထိခိုက်ပျက်စီးခဲ့ပြီး သေဆုံးသူ ၄၄ ဦး၊ ဒဏ်ရာရရှိသူ ၂၃၄ ဦး ရှိကြောင်းလည်း သိရသည်။

ကိုးကား-MHT

မကြာသေးမီက လှုပ်ခတ်ခဲ့သော မြန်မာ့ငလျင်ကြောင့် ဒဏ်ရာရရှိသူများ အနက် လူပေါင်း ၃၀၀ ကျော်ကို ရုရှားနိုင်ငံ အရေးပေါ်ဆိုင်ရာဝန်ကြီး ဌာန၏ ရွေ့လျားဆေးရုံအဖွဲ့က ကုသပေးခဲ့ကြောင်း ထိုဝန်ကြီးဌာနက သတင်းထုတ်ပြန်ထားပါသည်။

အကြီးစား ခွဲစိတ်ကုသမှု ၄ ခုအပါအဝင် ခွဲစိတ်မှုပေါင်း ၆၃ ခု ပြုလုပ်ခဲ့ပြီး လူပေါင်း ၃၀၀ ကျော်ကို ဆေးကုသပေးခဲ့ကြောင်း၊ ပြိုကျပျက်စီးနေသော အဆောက်အအုံ ၈၂ လုံး၏ ၁၂၆,၀၀၀ စတုရန်းမီတာကျော်ကို ရှာဖွေ ကယ်ဆယ်ခဲ့ကြောင်း၊ ကယ်ဆယ်ရေးသမားများက ဒရုန်းများ၊ လေ့ကျင့် ထားသော ခွေးများအသုံးပြုခဲ့ကြကြောင်း ထုတ်ပြန်ချက်တွင် ဖော်ပြထား ပါသည်။

မတ် ၂၈ ရက်က မြန်မာနိုင်ငံ၌ လှုပ်ခတ်သည့်ငလျင်ကို ထိုင်း မိုးလေဝသ ဌာနက အင်အား ၈.၂ ရစ်ချက်စကေးအဆင့် ရှိကြောင်း ဖော်ပြထားကြ ပါသည်။ ထိုငလျင်ကြောင့် လက်ရှိအချိန်ထိ သေဆုံးသူဦးရေမှာ လူပေါင်း ၃၆၀၀ ကျော်လာ ပြီဖြစ်ကြောင်း ဖော်ပြထားပါသည်။

မတ် ၂၈ ရက်က လှုပ်ခတ်ခဲ့သော ငလျင်ကြောင့် ရုရှားသမ္မတဗလာဒီမာ ပူတင်က မြန်မာနိုင်ငံ ဝန်ကြီးချုပ်အတွက် ဝမ်းနည်းကြောင်း ဖော်ပြခဲ့ ပြီးနောက် ရုရှားအရေးပေါ်ဆိုင်ရာဝန်ကြီးဌာနမှ ကယ်ဆယ်သမားများ၊ ကျွမ်းကျင်သူများနှင့် ဆေးဘက်ဆိုင်ရာဝန်ထမ်းများကို မြန်မာနိုင်ငံသို့ စေလွှတ်ပေးခဲ့ပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

မြန်မာနိုင်ငံတွင် ငလျင်လှုပ်ခတ်မှုကြောင့် သေဆုံးသူ ၃,၆၀၀ ဦးအထိ ရှိလာပြီဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ သတင်း ထုတ် ပြန်ရေး အဖွဲ့က ဧပြီ ၇ ရက် ညပိုင်းက ထုတ်ပြန်သော သတင်းအရ သိရသည်။ ငလျင်ကြောင့် လူပေါင်း ၅,၀၁၇ ဦး ဒဏ်ရာရရှိခဲ့ပြီး လူ ၁၆၀ ဦး ပျောက်ဆုံးနေဆဲဖြစ်ကြောင်း သိရသည်။ 

ကိုးကား-Xinhua

ဘင်္ဂလားပင်လယ်အော်အခြေအနေ။

ယနေ့မြန်မာစံတော်ချိန် ၁၀:၃၀ နာရီအချိန် တိုင်းထွာချက်များအရ ဘင်္ဂလားပင်လယ်အော်တောင်ပိုင်းတွင် ဖြစ်ပေါ် နေသော လေဖိအားနည်းရပ်ဝန်း (Low Pressure Area) သည် ဘင်္ဂလားပင်လယ်အော် အနောက်တောင်ပိုင်းနှင့် ယင်းနှင့်ဆက်စပ်လျက်ရှိသော ဘင်္ဂလားပင်လယ်အော်အရှေ့တောင်ပိုင်းတို့တွင် ဆက်လက်တည်ရှိနေပါသည်။ အဆိုပါ လေဖိအားနည်းရပ်ဝန်းသည် မြောက်ယွန်းယွန်းသို့ ရွေ့လျားပြီး ၁၀-၄-၂၀၂၅ ရက်နေ့တွင် ဘင်္ဂလား ပင်လယ်အော် အနောက်အလယ်ပိုင်းသို့ ရောက်ရှိနိုင်သည်ဟု ခန့်မှန်းရပါသည်။ ကပ္ပလီပင်လယ်ပြင်တွင် တိမ်အသင့်အတင့် ဖြစ်ထွန်းနေပြီး၊ ဘင်္ဂလားပင်လယ်အော်တွင် တိမ်အသင့်အတင့်မှ တိမ်ထူထပ်နေပါသည်။

ယနေ့ညနေအထိခန့်မှန်းချက်။

စစ်ကိုင်းတိုင်းဒေသကြီးအထက်ပိုင်းနှင့် ကချင်ပြည်နယ်တို့တွင် နေရာကွက်ကျား၊ ပဲခူးတိုင်းဒေသကြီး၊ မကွေးတိုင်း ဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန် ပြည်နယ်၊ ရခိုင်ပြည်နယ်နှင့် ရှမ်းပြည်နယ် (မြောက်ပိုင်းနှင့် အရှေ့ပိုင်း) တို့တွင် နေရာကျဲကျဲနှင့် ကျန်တိုင်းဒေသကြီး နှင့် ပြည်နယ်တို့တွင် နေရာစိပ်စိပ် မိုးထစ်ချုန်းရွာမည်။ ရွာရန်ရာနှုန်း ၈ဝ ဖြစ်ပါသည်။

မြန်မာ့ပင်လယ်ပြင်။

လှိုင်းအနည်းငယ်မှ လှိုင်းအသင့်အတင့်ရှိမည်။ လှိုင်းအမြင့်မှာ မြန်မာ့ကမ်းရိုးတန်းတလျှောက်နှင့် ကမ်းလွန် ပင်လယ်ပြင်တို့တွင် ၄ ပေမှ ၈ ပေခန့် ရှိနိုင်ပါသည်။ 

နောက် ၂ ရက်အတွက်ခန့်မှန်းချက်။ 

နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ ဧရာဝတီ တိုင်းဒေသကြီး၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာမည်။

နေပြည်တော်နှင့်အနီးတစ်ဝိုက်အတွက်ယနေ့ညနေအထိခန့်မှန်းချက်။

တိမ်အသင့်အတင့် ဖြစ်ထွန်းပြီး၊ မိုးထစ်ချုန်း၍ နေရာကွက်ကျား မိုးရွာမည်။ ရွာရန်ရာနှုန်း ၈၀ ဖြစ်ပါသည်။

ရန်ကုန်မြိုနှင့်အနီးတစ်ဝိုက်အတွက်ယနေ့ညနေအထိခန့်မှန်းချက်။

တိမ်အသင့်အတင့် ဖြစ်ထွန်းပြီး၊ မိုးထစ်ချုန်း၍ နေရာကွက်ကျား မိုးရွာမည်။ ရွာရန်ရာနှုန်း ၈၀ ဖြစ်ပါသည်။

မန္တလေးမြိုနှင့်အနီးတစ်ဝိုက်အတွက်ယနေ့ညနေအထိခန့်မှန်းချက်။

တိမ်အသင့်အတင့် ဖြစ်ထွန်းပြီး၊ မိုးထစ်ချုန်း၍ နေရာကွက်ကျား မိုးရွာမည်။ ရွာရန်ရာနှုန်း ၈၀ ဖြစ်ပါသည်။

ကိုးကား-မိုးလေဝသနှင့်ဇလဗေဒညွှန်ကြားမှုဦးစီးဌာန

(၂၀၂၅ ခုနှစ်၊ ဧပြီလ ၈ ရက်နေ့၊ နံနက် ၁၀:၃၀ နာရီအချိန်ထုတ်ပြန်ချက်)

ဘင်္ဂလားပင်လယ်အော်အ‌ခြေအနေ- ယနေ့မြန်မာစံတော်ချိန် ၀၆:၃၀ နာရီ အချိန် တိုင်းထွာချက်များအရ ဘင်္ဂလားပင်လယ်အော် တောင်ပိုင်းတွင် ဖြစ်ပေါ်နေသော လေဖိအားနည်းရပ်ဝန်း(Low Pressure Area)သည် ဆက်လက်တည်ရှိနေပါသည်။ အဆိုပါ လေဖိအားနည်းရပ်ဝန်းသည် အနောက်မြောက်ဘက်သို့ ရွေ့လျားနိုင်ကာ၊ နောက် ၁၈ နာရီအတွင်း ဘင်္ဂလားပင်လယ်အော် အနောက်တောင်ပိုင်းသို့ရောက်ရှိပြီး နောက်မြောက် ယွန်းယွန်းသို့ ရွေ့လျားကာ ၁၀-၄-၂၀၂၅ ရက်နေ့တွင် ဘင်္ဂလား ပင်လယ်အော် အနောက်အလယ်ပိုင်းသို့ ရောက်ရှိနိုင်သည်ဟု ခန့်မှန်းရပါသည်။ ကပ္ပလီ ပင်လယ်ပြင်နှင့် ဘင်္ဂလားပင်လယ်အော်တို့တွင် တိမ်အသင့်အတင့်မှ တိမ်ထူထပ်နေပါသည်။

ရန်ကုန်မှ တနင်္သာရီကမ်းရိုးတန်းတစ်လျှောက် ပင်လယ်ပြင်ခရီးအတွက် မိုးလေဝသခန့်မှန်းချက် 

ယနေ့မွန်းတည့်မှ နောက် (၂၄) နာရီအတွင်း ခန့်မှန်းချက်

မိုးလေဝသအ‌ခြေအနေ- နေရာကွက်ကျား မိုးထစ်ချုန်းရွာမည်။

အမြင်တာ- ၄ မိုင်၊ မိုးရွာစဉ် ၁ မိုင်ခန့်။

ရေပြင်လေ- အရှေ့ (သို့) အရှေ့တောင်၊ တစ်နာရီပင်လယ်မိုင် ၁၀-၁၅ မိုင်၊ တစ်ခါတစ်ရံ မိုင် ၂၀ မှ ၂၅ မိုင်။

လှိုင်းအ‌ခြေအနေ- လှိုင်းအနည်းငယ်မှ လှိုင်းအသင့်အတင့်ရှိမည်။

လှိုင်းအမြင့်- ၄ ပေမှ ၇ ပေခန့်။

ရန်ကုန်မှ ရခိုင်ကမ်းရိုးတန်းတစ်လျှောက် ပင်လယ်ပြင်ခရီးအတွက် မိုးလေဝသခန့်မှန်းချက်

ယနေ့မွန်းတည့်မှ နောက် (၂၄) နာရီအတွင်း ခန့်မှန်းချက်

မိုးလေဝသအ‌ခြေအနေ- နေရာကွက်ကျား မိုးထစ်ချုန်းရွာမည်။

အမြင်တာ- ၄ မိုင်၊ မိုးရွာစဉ် ၁ မိုင်ခန့်။

ရေပြင်လေ- မြောက် (သို့) အနောက်မြောက်၊ တစ်နာရီပင်လယ်မိုင် ၁၀-၁၅ မိုင်၊ တစ်ခါတစ်ရံ ၂၅ မိုင်။

လှိုင်းအ‌ခြေအနေ- လှိုင်းအသင့်အတင့်ရှိမည်။

လှိုင်းအမြင့်- ၅ ပေမှ ၈ ပေခန့်။

ကိုးကား-မိုးလေဝသနှင့်ဇလဗေဒညွှန်ကြားမှုဦးစီးဌာန

တည်နေရာ     - မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် အနီးတဝိုက်ဒေသများ
အချိန်              - ဒေသစံတော်ချိန် ၁၂:၅၀ နာရီ
အနက်             - ၁၀ ကီလိုမီတာ

အဓိကထိခိုက်မှုများ

၁။ လူသားအသက်အန္တရာယ်

• ငလျင်ပြင်းထန်မှုအဆင့် (VI နှင့်အထက်) ခံစားခဲ့ရသည့် လူဦးရေ ၉ သန်းကျော်
• အဆိုးရွားဆုံးထိခိုက်သည့် တိုင်းဒေသကြီးများ -
  • မန္တလေး (၄.၆ သန်း)
  • စစ်ကိုင်း (၂.၇ သန်း)
  • မကွေး (၈၆၆,၇၇၇ ဦး)
• အထိခိုက်ဆုံးခရိုင်များ - မန္တလေး၊ ရွှေဘို၊ ပြင်ဦးလွင်၊ မိတ္ထီလာ၊ ပခုက္ကူ၊ မုံရွာနှင့် မြင်းခြံ

၂။ စိုက်ပျိုးမြေနှင့် စီးပွားရေးထိခိုက်မှု

• ငလျင်ဒဏ်ခံစားခဲ့ရသည့် စိုက်ပျိုးမြေ ၃.၇ သန်းဟက်တာ
• အဓိကထိခိုက်သည့် တိုင်းဒေသကြီးများ (စိုက်ပျိုးမြေဧရိယာအလိုက်) -
  • စစ်ကိုင်း (၁.၅ သန်းဟက်တာ)
  • မန္တလေး (၁.၄ သန်းဟက်တာ)
  • ရှမ်း (၄၃၁,၀၀၀ ဟက်တာ)
  • မကွေး (၃၈၉,၀၀၀ ဟက်တာ)
• စိုက်ပျိုးမြေ ဟက်တာ ၈၀,၀၀၀ ကျော် ထိခိုက်သည့် မြို့နယ်များ -
  • ကန့်ဘလူ၊ ဝက်လက်၊ နောင်ချို၊ ဝမ်းတွင်း၊ နတ်တလင်း၊ တဘက်ဆင်၊ ခင်ဦး၊ ရွှေဘို၊ ဘုတလင်၊ မြိုင်၊ စစ်ကိုင်း

၃။ သီးနှံစိုက်ပျိုးမှုနှင့် မွေးမြူရေးထိခိုက်မှု

• ဆီထွက်သီးနှံ အဓိကထိခိုက်သည့် မြို့နယ်များ -
  • ရွှေဘို၊ ကျောက်ဆည်၊ ပခုက္ကူ၊ စစ်ကိုင်း၊ မြင်းခြံ
• ဆန်စပါး အဓိကထိခိုက်သည့် မြို့နယ်များ -
  • ပခုက္ကူ၊ မဟာအောင်မြေ၊ ပုလဲ၊ ပြင်ဦးလွင်၊ စဉ့်ကူး၊ စစ်ကိုင်း၊ ပုသိမ်ကြီး၊ မြစ်သား၊ ကျောက်ဆည်၊ ရေစကြို၊ မတ္တရာ
• ထိုမြို့နယ်များရှိ ဆီထွက်သီးနှံနှင့် ဆန်စပါးစိုက်ဧရိယာသည် မန္တလေး၊ မကွေး၊ စစ်ကိုင်းတိုင်းများရှိ စုစုပေါင်းစိုက်ဧရိယာ၏ ၆၅% ဖြစ်သည်။
• မွေးမြူရေးထိခိုက်မှု -
  • ငလျင်ဒဏ်ခံစားခဲ့ရသည့် နွား ၃.၆ သန်းကျော်
  • အဓိကထိခိုက်သည့် မြို့နယ်များ :
    • မတ္တရာ၊ စဉ့်ကူး၊ ငါန်းဇွန်၊ မြစ်သား၊ ကျောက်ဆည်၊ စစ်ကိုင်း၊ အရာတော်၊ ပုသိမ်ကြီး၊ စဉ့်ကူး၊ ရွှေဘို၊ ရေစကြို၊ ဝမ်းတွင်း

အကဲဖြတ်ချက်

ကုလသမဂ္ဂစားနပ်ရိက္ခာနှင့် စိုက်ပျိုးရေးအဖွဲ့ (FAO) ၏ DIEM အဖွဲ့က ဂြိုဟ်တုဓာတ်ပုံများဖြင့် စောင့်ကြည့်ဆန်းစစ်ခဲ့ရာတွင် ဤငလျင်သည် စိုက်ပျိုးရေး၊မွေးမြူရေးနှင့် ကျေးလက်ဒေသ အသက်မွေး ဝမ်းကျောင်းမှုများကို ကြီးမားစွာထိခိုက်စေနိုင်ကြောင်း ဖော်ပြထားသည်။

(ဤအစီရင်ခံစာသည် FAO ၏ StoryMap မှ အချက်အလက်များကို အခြေခံထားပြီး ကနဦးအကဲ ဖြတ်ချက်သာဖြစ်သည်။)

Source: https://storymaps.arcgis.com/

မြန်မာနိုင်ငံတွင် မတ်လ ၂၈ ရက် ငလျင်လှုပ်ခတ်ပြီးနောက် ကပ်ဘေး ကယ်ဆယ်ရေး ရွက်ဖျင်တဲများသည် တရုတ်နိုင်ငံ၊ မန်စီမြို့ အပြည်ပြည် ဆိုင်ရာလေဆိပ်သို့ ဧပြီ ၆ ရက် ညနေပိုင်းတွင် ရောက်ရှိခဲ့သည်။ ယင်း ရွက်ဖျင်တဲများမှာ မြန်မာနိုင်ငံ၊ ရန်ကုန်မြို့သို့ ရောက်ရှိပြီးနောက် မြန်မာ နိုင်ငံ၏ ဆိုးရွားစွာ ငလျင်ဒဏ်သင့်သောဒေသများသို့ အသုတ်ခွဲပို့ဆောင် မည် ဖြစ်သည်။

ယခုအကြိမ် လှူဒါန်းမှုသည် တရုတ်နိုင်ငံ North Petroleum & Chemical Group Co., Ltd (NPCC) နှင့် China Vast Xin Hai Industrial Development Company Limited တို့ အတူလက်တွဲ စတင် ဆောင်ရွက် ခဲ့ခြင်း ဖြစ်ကြောင်း သိရသည်။

မြန်မာနိုင်ငံတွင် မတ် ၂၈ ရက် ငလျင်လှုပ်ခတ်ပြီးနောက် NPCC ကုမ္ပဏီ အနေဖြင့် ကပ်ဘေးကူညီကယ်ဆယ်ရေးလုပ်ငန်းများကို ဦးစွာ အလျင်အမြန် ဆောင်ရွက်ခဲ့ကြောင်း သိရသည်။ NPCC ကုမ္ပဏီသည် ၂၀၂၅ ခုနှစ်၊ မတ် ၃၀ ရက်တွင် မြန်မာ-တရုတ် ချစ်ကြည်ရေးအသင်းထံ ကပ်ဘေး ကယ်ဆယ်ရေးအတွက် မြန်မာကျပ်ငွေ သိန်း ၁၀၀ ကိုလည်းကောင်း၊ မတ် ၃၁ ရက်တွင် တရုတ်နိုင်ငံဆိုင်ရာ မြန်မာနိုင်ငံသံရုံးသို့ လှူဒါန်းငွေ ယွမ် ၅၀,၀၀၀ ကို လည်းကောင်း လှူဒါန်းခဲ့သည်။ ဧပြီ ၁ ရက်က NPCC ကုမ္ပဏီမှစေလွှတ်သော ရှေ့တန်းတွင် ကူညီကယ်ဆယ်ရေး ဆောင်ရွက်မည့်အဖွဲ့ဝင် ၈ ဦးသည် မြန်မာနိုင်ငံ၊ နေပြည်တော်သို့ ရောက်ရှိခဲ့ကြောင်း သိရသည်။

ကိုးကား-Xinhua

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

နေပြည်တော် ဧပြီ ၇

အမျိုးသားလုံခြုံရေးဆိုင်ရာ အကြံပေးပုဂ္ဂိုလ်နှင့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန(၁) ပြည်ထောင်စုဝန်ကြီး  ဗိုလ်ချုပ်ကြီးမိုးအောင်သည် မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur ဦးဆောင်သည့် ကိုယ်စားလှယ်အဖွဲ့အား ယနေ့မွန်းလွဲပိုင်းတွင် လက်ခံတွေ့ဆုံသည်။

ထိုသို့တွေ့ဆုံစဉ်  ယခုကဲ့သို့  မိမိတို့နိုင်ငံတွင် ပြင်းထန်ငလျင်လှုပ်ခတ်မှုကြောင့် ထိခိုက်ပျက်စီးမှုများအပေါ် အိန္ဒိယနိုင်ငံအနေဖြင့် ကူညီဆောင်ရွက်ပေးမှုများအပေါ် များစွာကျေးဇူးတင်ရှိပါကြောင်း၊ လုံခြုံရေးဆိုင်ရာကိစ္စရပ်များနှင့် နှစ်နိုင်ငံကြား ပူးပေါင်းဆောင်ရွက်လျက်ရှိသည့် နယ်ပယ်ကဏ္ဍများအလိုက်  အမြင်ချင်းဖလှယ် ရင်းနှီးပွင့်လင်းစွာ  ဆွေးနွေးခဲ့ကြသည်။

အဆိုပါတွေ့ဆုံပွဲသို့  နိုင်ငံတော်စီမံအုပ်ချုပ်ရေးကောင်စီရုံးနှင့်   အိန္ဒိယနိုင်ငံ သံရုံးတို့မှ တာဝန်ရှိသူများ  တက်ရောက်ခဲ့ကြသည်။

Source: https://myawady.net.mm/stories