ဇွန်လ ၁၅ ရက် (တနင်္ဂနွေနေ့) တွင် အစ္စရေးနှင့် အီရန်တို့အကြား ပစ်ခတ် တိုက်ခိုက်မှုများ ထပ်မံပြုလုပ်ခဲ့ခြင်းကြောင့် ဇွန်လ ၁၆ ရက် (တနင်္လာနေ့) တွင် အာရှစျေးကွက်အတွင်း ရေနံစျေးများ မြင့်တက်လာခဲ့သည်။ ထိုကဲ့သို့ အစ္စရေး-အီရန်စစ်ပွဲ အရှိန်မြင့်တက်လာခြင်းသည် ဒေသတွင်း နိုင်ငံများကို သက်ရောက်မှုရှိစေရုံသာမက အရှေ့အလယ်ပိုင်းမှ ရေနံတင်ပို့မှုများကို ပိုမိုနှောင့်နှေးစေနိုင်သည်ဟူသော စိုးရိမ်ပူပန်မှုများ ပိုမိုမြင့်တက်လာသည်။
ကမ္ဘောဒီးယားအစိုးရသည် ထိုင်းနိုင်ငံနှင့် နယ်နိမိတ်အငြင်းပွားမှု ဖြစ်ပွား နေသော ဒေသ (၄) ခုအတွက် အပြည်ပြည်ဆိုင်ရာတရားရုံး (ICJ) သို့ တရားဝင်အဆိုပြုလွှာ တင်သွင်းကာ ဖျန်ဖြေရေးတောင်းဆိုလိုက်သည်။
တနင်္လာနေ့ (ဇွန် ၁၆) တွင် Military Watch Magazine ၏ ဖော်ပြချက်အရ အမေရိကန်ပြည်ထောင်စုသည် လောင်စာဖြည့်လေယာဉ် ၃၀ ကျော်ကို အတ္တလန်တိတ်သမုဒ္ဒရာကိုဖြတ်ကာ အရှေ့အလယ်ပိုင်းဒေသသို့ စေလွှတ်ခဲ့ကြောင်း သိရှိရပါသည်။ ယင်းဂျာနယ်က ဤကဲ့သို့သော ထောက်ပံ့မှုသည် ယခင်က မရှိခဲ့ဖူးကြောင်းနှင့် အမေရိကန်သည် အစ္စရေး-အီရန် စစ်ပွဲတွင် ပိုမိုနက်ရှိုင်းစွာ ပါဝင်လာနိုင်ကြောင်း ညွှန်းဆိုထားပါသည်။
ရုရှားသည် စစ်ပွဲအတွင်းကျဆုံးခဲ့သော ယူကရိန်းစစ်သည် ၆၀၀၀ ကျော် ၏ ရုပ်ကြွင်းများကို ပြန်လည်အပ်နှင်းခဲ့ပြီဖြစ်ကြောင်း ယူကရိန်း ပဋိပက္ခနှင့် ပတ်သက်သည့် မော်စကို၏ ညှိနှိုင်းရေးအဖွဲ့ခေါင်းဆောင် ဗလာဒီမာ မက်ဒင်စကီက ပြောကြားခဲ့သည်။