မင်နီဆိုးတား Star Tribune မှ ရရှိသော ရာဇ၀တ်မှုဆိုင်ရာ တရား စွဲဆိုချက် သတင်းများအရ စနေနေ့ (ဇွန် ၁၄) အစောပိုင်းက လုပ်ကြံခံခဲ့ရသော မင်နီဆိုးတားလွှတ်တော်အမတ် Melissa Hortman ၏ အိမ်တွင် ကျန်ရစ်ခဲ့သည့် ယာဉ်အတွင်း AK-47 တိုက်ခိုက်ရေးသေနတ် သုံးလက်နှင့် ပစ္စတိုတစ်လက် တွေ့ရှိရကြောင်း ရဲတပ်ဖွဲ့က ထုတ်ပြန်ခဲ့သည်။
သောကြာ (ဇွန် ၁၃) နေ့မှစတင်ကာ အစ္စရေးတပ်များက အီရန် စစ်ရေး အဆောက်အအုံများကို ပစ်ခတ်တိုက်ခိုက်မှုများတွင် နျူကလီးယား စက်ရုံများလည်း ပါဝင်ခဲ့ပြီး ယင်းဖြစ်စဉ်က အီရန်၏နျူကလီးယားစီမံကိန်းကို အပြီးတိုင်ဖျက်ဆီးနိုင်ဖွယ်ရှိ၊မရှိ မေးခွန်းများကို ပြန်လည် အသက်ဝင်စေခဲ့ပြီး Royal United Services Institute ၏ မတ်လအတွင်း အစီရင်ခံစာအရ ယင်းကဲ့သို့ပြုလုပ်ရန် မလွယ်ကူကြောင်း ဖော်ပြထားသည်။
အစ္စရေး၏ အရေးပေါ်ကယ်ဆယ်ရေးအဖွဲ့ Magen David Adom ထုတ်ပြန်ချက်အရ အီရန်၏ ညဘက်ဒုံးကျည် ပစ်ခတ်တိုက်ခိုက်မှုများကြောင့် မြောက်ပိုင်း Haifa မြို့တွင် လူ ၃ ဦး သေဆုံးခဲ့သည်။
အီရန်၏ ညဘက်ပစ်ခတ်တိုက်ခိုက်မှုများကြောင့် သေဆုံးသူစုစုပေါင်း ၈ ဦး ရှိလာခဲ့ပြီဖြစ်ပြီး ယခင်က Bnei Brak (အစ္စရေးအလယ်ပိုင်းမြို့) တွင် ၁ ဦး၊ Petah Tikva တွင် ၄ ဦး သေဆုံးခဲ့သည်။
ဆန္ဒပြအဖွဲ့များ၏ထုတ်ပြန်ချက်အရ စနေနေ့ (ဇွန် ၁၄) က အမေရိကန် နိုင်ငံတစ်ဝှမ်းကျင်းပသည့် ထရမ့်ဆန့်ကျင်ရေးလှုပ်ရှားမှုများတွင် လူဦးရေ ငါးသန်းကျော် ပါဝင်ခဲ့ကြောင်းသိရှိရပါသည်။ 'No Kings' ဆန္ဒပြပွဲများသည် သမ္မတ၏ တင်းကျပ်သည့် လူဝင်မှုဆန့်ကျင်ရေးမူဝါဒများနှင့် အစိုးရဝန်ထမ်းများ အလုပ်မှထုတ်ပယ်ခံရမှုများကို ဦးတည်ခဲ့သည်။