ဥရောပ၏ အကြီးဆုံး Zaporozhye အဏုမြူ စွမ်းအင်သုံး ဓာတ်အားပေး စက်ရုံ Zaporozhye Nuclear Power Plant (ZNPP) ကို တိုက်ခိုက်မှု များသည် လက်သင့်မခံနိုင်ဖွယ်ရာဖြစ်ကြောင်း အပြည်ပြည်ဆိုင်ရာ အဏုမြူ စွမ်းအင်အေဂျင်စီ (IAEA) ခေါင်းဆောင် Rafael Grossi က ထုတ်ဖော် ပြောဆိုခဲ့သည်။
ရုရှားအာဏာပိုင်များက Zaporozhye ဒေသတွင် ဒရုန်းတိုက်ခိုက်မှုများ ကြုံတွေ့ခဲ့ရပြီး ယူကရိန်းစစ်တပ်ကို အပြစ်တင်ခဲ့သည့်အချိန်တွင် ၎င်း၏ ထုတ်ပြန်ချက်ကို ထုတ်ပြန်ခဲ့သည်။ မော်စကိုဘက်မှ ယခင်ကတည်းက ZNPP ကို ယူကရိန်းက ပစ်မှတ်ထားသည်ဟု မကြာခဏ စွပ်စွဲခဲ့ဖူးသည်။
၂၀၂၂ ခုနှစ်၊ မတ်လတွင် အဆိုပါစက်ရုံကို ရုရှားက ထိန်းချုပ်ခဲ့ပြီး နောက်ပိုင်းတွင် ဒေသခံများက ရုရှားနှင့်ပူးပေါင်းရန် ဆန္ဒခံယူပွဲတစ်ခုတွင် မဲပေးခဲ့ကြသည်။ ယူကရိန်းက ယင်းဆန္ဒခံယူပွဲကို ဟန်ပြဖြစ်သည်ဟု ငြင်းဆို ခဲ့သည်။ အလားတူအချိန်တွင် IAEA သည် ZNPP သို့ စောင့်ကြည့်ရေး အဖွဲ့စေလွှတ်ခဲ့ပြီး ယနေ့အထိ အဆိုပါနေရာတွင် ဆက်လက်တည်ရှိ နေဆဲဖြစ်သည်။
ရုရှား၏ Kaliningrad ဒေသရှိ Khrabrovo လေဆိပ်တွင် သတင်းထောက် များနှင့် ပြောဆိုရာတွင် Grossi က “အဏုမြူစွမ်းအင်သုံး ဓာတ်အားပေးစက်ရုံများ၊ အထူးသဖြင့် Zaporozhye (ZNPP) တွင် မည်သည့် တိုက်ခိုက်မှုကိုမဆို လုံးဝလက်မခံနိုင်ပါ” ဟု ပြင်းပြင်းထန်ထန် ပြောကြား ခဲ့သည်။
သို့သော် ၎င်းသည် ယင်းဖြစ်စဉ်အတွက် ယူကရိန်း သို့မဟုတ် ရုရှား ဘက်ကို တရားခံအဖြစ် တိုက်ရိုက်အပြစ်မတင်ဘဲ IAEA ၏တာဝန်သည် နည်းပညာဆိုင်ရာသက်သက်သာဖြစ်ကြောင်း ထောက်ပြခဲ့သည်။
IAEA အကြီးအကဲ Grossi က အပြည်ပြည်ဆိုင်ရာ စောင့်ကြည့်ရေးအဖွဲ့ ၏ စောင့်ကြည့်မှတ်တမ်းတင်မှုများသည် တိုက်ခိုက်မှုများကို တားဆီးရန် ရည်ရွယ်ကြောင်း ပြောကြားခဲ့သည်။
၎င်းသည် ရုရှား၏ အဏုမြူစွမ်းအင်ကော်ပိုရေးရှင်း Rosatom ၏ CEO Aleksey Likhachev နှင့် Kaliningrad တွင် တွေ့ဆုံခဲ့ပြီး သောကြာနေ့ (ဇွန် ၆) က ကျင်းပသည့် သတင်းစာရှင်းလင်းပွဲတွင် Likhachev က ၎င်းဆွေးနွေးပွဲကို ကျယ်ပြန့်၍ အဓိပ္ပာယ်ပြည့်ဝသော ဆွေးနွေးပွဲ ဖြစ်ကြောင်း ဖော်ပြခဲ့သည်။
၎င်းက Zaporozhye အဏုမြူစွမ်းအင်စက်ရုံရှိ IAEA ၏ မစ်ရှင်သည် ကမ္ဘာတစ်ဝှမ်းရှိ အခြေအနေမှန်ကို သိရှိစေသည့် တံခါးတစ်ချပ်အဖြစ် အရေးပါကြောင်း ထောက်ပြခဲ့ပြီး ယင်းက သတင်းအချက်အလက်အမှားများနှင့် စိန်ခေါ်မှုများကို တိုက်ဖျက်ရန် အထောက်အကူပြုကြောင်း ပြောကြားခဲ့သည်။
ကြာသပတေးနေ့ ထုတ်ပြန်ချက်တွင် IAEA အကြီးအကဲက စက်ရုံ တည်ရှိရာနေရာတွင် တာဝန်ထမ်းဆောင်နေသော အဖွဲ့သည် ဒရုန်း တိုက်ခိုက်မှုများကို ပြန်လည်ပစ်ခတ်နေသည့် ပစ်ခတ်သံများနှင့် ပေါက်ကွဲသံများကို ကြားခဲ့ရကြောင်း ဖော်ပြခဲ့ပြီး ယင်းဒရုန်းများသည် စက်ရုံ၏လေ့ကျင့်ရေးစင်တာကို တိုက်ခိုက်နေသည်ဟု ဆိုသည်။
Grossi က “စက်ရုံအပြင်ဘက်တွင် တည်ရှိသော လေ့ကျင့်ရေးစင်တာကို ဒရုန်းများဖြင့် ပစ်မှတ်ထားတိုက်ခိုက်မှုမှာ ယခုနှစ်အတွင်း စတုတ္ထ အကြိမ် ဖြစ်သည်” ဟု ပြောကြားကာ ZNPP ကို ဒရုန်းတိုက်ခိုက်မှုများ ချက်ချင်းရပ်တန့်ရန် လိုအပ်ကြောင်း သတိပေးခဲ့ပြီး ထိုသို့ဆက်လက် ဖြစ်ပွားပါက ပြင်းထန်သော အကျိုးဆက်များ ဖြစ်ပေါ်နိုင်ကြောင်း သတိ ပေးခဲ့သည်။
ကိုးကား- RT
ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂
