လူဝင်မှုကြီးကြပ်ရေးစစ်ဆင်ရေးကြောင့် ဆန္ဒပြမှုများ ဖြစ်ပွားနေသဖြင့် အမေရိကန်သမ္မတ ဒေါ်နယ်ထရမ့်သည် ဇွန်လ ၇ ရက်ညတွင် ကယ်လီဖိုးနီးယားပြည်နယ်၊ လော့စ်အိန်ဂျလိစ်မြို့သို့ National Guard တပ်ဖွဲ့ဝင် ၂,၀၀၀ စေလွှတ်ရန် အမိန့်ပြန်တမ်းတစ်စောင် လက်မှတ်ရေးထိုးခဲ့ကြောင်း အိမ်ဖြူတော်ပြောရေးဆိုခွင့်ရှိသူ Karoline Leavitt က ပြောကြားခဲ့သည်။
အိမ်ဖြူတော်က National Guard စေလွှတ်မည်ကို အတည်ပြုချက် မထုတ်ပြန်မီ တစ်နာရီခန့်အလိုတွင် ဒီမိုကရက်တစ်ပါတီဝင် ကယ်လီဖိုးနီးယားပြည်နယ်အုပ်ချုပ်ရေးမှူး ဂေဗင်နယူဆမ် (Gavin Newsom) က အဆိုပါဆောင်ရွက်ချက်ကို ကန့်ကွက်ကြောင်း ပြောကြားခဲ့သည်။
“ဤသည်မှာ တမင်တကာ စိန်ခေါ်မှုတစ်ရပ်ဖြစ်ပြီး တင်းမာမှုများကိုသာ ပိုမိုမြင့်တက်စေမည်” “မိမိတို့သည် မြို့တော်နှင့် ခရိုင်အရာရှိများနှင့် နီးကပ်စွာ ပူးပေါင်းဆောင်ရွက်နေပြီး လက်ရှိတွင် ဖြည့်ဆည်းမပေးနိုင်သော တောင်းဆိုချက်များ မရှိပါ” ဟု ၎င်းက လူမှုကွန်ရက်ပေါ်တွင် ရေးသား ခဲ့သည်။
National Guard သည် အမေရိကန်လက်နက်ကိုင်တပ်ဖွဲ့များ၏ အရံတပ်ဖွဲ့ဖြစ်သည်။ ပြည်နယ်နှင့် နယ်မြေတစ်ခုစီတွင် ၎င်းတို့၏ ပြည်နယ်အုပ်ချုပ်ရေးမှူး၏ တိုက်ရိုက်ကွပ်ကဲမှုအောက်တွင် National Guard ရှိသည်။ ထို့အပြင် အမေရိကန်သမ္မတသည် စစ်ဖြစ်ပွားချိန် သို့မဟုတ် အမျိုးသားအရေးပေါ်အခြေအနေများတွင် ဖက်ဒရယ်တာဝန်များကို ထမ်းဆောင်ရန် အဆိုပါတပ်ဖွဲ့ကို စုစည်းနိုင်သည်။
အိမ်ဖြူတော်၏ အဆိုပါလုပ်ဆောင်ချက်သည် လော့စ်အိန်ဂျလိစ်မြို့ရှိ ဆန္ဒပြမှုများ ဒုတိယညသို့ ရောက်ရှိလာချိန်တွင် ဖြစ်ပေါ်ခဲ့ပြီး ဇွန် ၆ ရက် က အမေရိကန်လူဝင်မှုကြီးကြပ်ရေးနှင့် အကောက်ခွန်အေဂျင်စီ (ICE) ၏ တရားမဝင် ဝင်ရောက်လာသူများကို နှိမ်နင်းရန် စစ်ဆင်ရေးများကို ဆန္ဒ ပြခဲ့ခြင်းဖြစ်သည်။
မျက်နှာဖုံးစွပ်ထားပြီး လက်နက်ကိုင်ထားသည့် ICE အေးဂျင့်များသည် လော့စ်အိန်ဂျလိစ်မြို့၏ မတူညီသောနေရာများရှိ အလုပ်ခွင်များသို့ ဝင်ရောက်စီးနင်းခဲ့ပြီး အမျက်ဒေါသများဖြင့် နာရီပေါင်းများစွာ တိုက်ခိုက်မှုများကို ဖြစ်ပေါ်စေခဲ့သည်။
ဇွန် ၇ ရက်တွင် Paramount ဧရိယာတွင် တိုက်ခိုက်မှုများ ဆက်လက် ဖြစ်ပွားခဲ့ပြီး ဆန္ဒပြသူများသည် ICE အရာရှိများမှ စုဝေးရာနေရာအဖြစ် အသုံးပြုသည့် စတိုးဆိုင်တစ်ခုအနီးတွင် စုဝေးခဲ့ကြသည်။ ဒေသခံ မီဒီယာများအရ ၎င်းတို့ကို မျက်နှာဖုံး စွပ်ထားပြီး မီးကျည်များနှင့် မျက်ရည်ယို ဗုံးများ အသုံးပြုသည့် အေးဂျင့်များက ရင်ဆိုင်ခဲ့သည်။
ဆန္ဒပြသူများသည် ICE အေးဂျင့်များ ထွက်ခွာရန် အော်ဟစ်ခဲ့ကြကာ အချို့က မက္ကဆီကိုအလံများကို လွှင့်ထူခဲ့ကြပြီး ၎င်းတို့သည် ဘိလပ်မြေအုတ်များနှင့် ဈေးဝယ်လှည်းများဖြင့် ယာယီအတားအဆီးများ ပြုလုပ်ခဲ့ကြသည်။
အနီးရှိ ကားလမ်းမကြီးမှ ထွက်ခွာနေသည့် အမေရိကန်ရဲတပ်ဖွဲ့ (U.S. Marshals Service) ဘတ်စ်ကားတစ်စီးကို လူအုပ်က ဝိုင်းဝန်းခဲ့သည်။ ထို့နောက် အရာရှိများသည် ဆန္ဒပြသူများ ဝင်ရောက်မှုကို တားဆီးရန် ကားလမ်းမကြီး၏ ထွက်ပေါက်များကို ပိတ်ခဲ့သည်။
လော့စ်အိန်ဂျလိစ်မြို့တော်ဝန် ကရင်ဘတ်စ် (Karen Bass) က ICE ၏လုပ်ရပ်များနှင့်ပတ်သက်၍ မြို့သူမြို့သားအချို့ စိတ်မသက်မသာဖြစ်နေကြောင်း ပြောကြားခဲ့သည်။ “လူတိုင်းတွင် ငြိမ်းချမ်းစွာ ဆန္ဒပြပိုင်ခွင့်ရှိသော်လည်း အကြမ်းဖက်မှုနှင့် ပစ္စည်းဖျက်ဆီးမှုများကို လက်သင့်မခံနိုင်ပါ။ တာဝန်ရှိသူများအား တရားဥပဒေအရ အရေးယူဆောင်ရွက်မည်” ဟု ၎င်းက လူမှုကွန်ရက်တွင် ရေးသားခဲ့သည်။ ဖက်ဒရယ်စုံစမ်းရေးဗျူရို (FBI) ၏ ဒုတိယညွှန်ကြားရေးမှူး Dan Bongino က ဇွန် ၆ ရက်တွင် ဖြစ်ပွားခဲ့သော တိုက်ခိုက်မှုများအပြီး လူများစွာကို ဖမ်းဆီးခဲ့ကြောင်း ပြောကြား ခဲ့သည်။
အိမ်ဖြူတော်သို့ ဒုတိယအကြိမ်ပြန်လည်ရောက်ရှိပြီးနောက် ထရမ့် အုပ်ချုပ်ရေးအဖွဲ့သည် လူဝင်မှုထိန်းချုပ်ရေးနှင့် ရွှေ့ပြောင်း အခြေချသူများကို မူရင်းနိုင်ငံသို့ ပြန်လည်ပို့ဆောင်ရေးလုပ်ငန်းများကို တိုးမြှင့် ဆောင်ရွက်လျက်ရှိပြီး ၎င်း၏ ရွေးကောက်ပွဲကတိကဝတ်များထဲမှ တစ်ခု ကို အကောင်အထည်ဖော်နေခြင်းဖြစ်သည်။
လော့စ်အိန်ဂျလိစ်မြို့သည် ရွှေ့ပြောင်းအခြေချသူများအတွက် “အကာအကွယ်မြို့တော်” (sanctuary City) အဖြစ် သတ်မှတ်ခံထားရသည်။ ၂၀၂၄ ခုနှစ်အထိ အဆိုပါမြို့တွင် ရွှေ့ပြောင်းအခြေချသူ ၁.၃၅ သန်းကျော် နေထိုင်ပြီး မြို့၏လူဦးရေ၏ ၃၄% ရှိသည်။
ကိုးကား- VN Express
ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂
