ကင်ရှာဆာ   ဒီဇင်ဘာ ၅

ကွန်ဂိုဒီမိုကရက်တစ်သမ္မတနိုင်ငံ၌ မကြာသေးမီရက်သတ္တပတ်များအတွင်း အမည်မသိရောဂါတစ်မျိုး ကူးစက်မှုကြောင့် လူပေါင်း ၈၀ နီးပါး သေဆုံးခဲ့ကြောင်း ကျန်းမာရေးအာဏာပိုင်များက ပြောကြားသည်။

ပျံ့နှံ့လျက်ရှိ

တုပ်ကွေးကဲ့သို့သော ရောဂါလက္ခဏာများဖြစ်ပွားစေသည့် အဆိုပါရောဂါသည် အောက်တိုဘာ ၂၄ ရက်မှစပြီး အနောက်တောင်ပိုင်း ကွန်ဂိုပြည်နယ်၌ ပျံ့နှံ့လျက်ရှိကြောင်း သိရသည်။

လက်ရှိအချိန်အထိ အတည်ပြုလူနာ ၃၇၆ ဦးရှိပြီး ၇၉ ဦး သေဆုံးခဲ့ကြောင်း ကျန်းမာရေးအာဏာပိုင်များက ပြောသည်။ သေဆုံးသူအများစုမှာ ဆယ်‌ကျော်သက်အရွယ်များဖြစ်ကြောင်း သိရသည်။

ရောဂါလက္ခဏာများမှာ အဖျားတက်ခြင်း၊ ခေါင်းကိုက်ခြင်း၊ နှာရည်ယိုခြင်း၊ ချောင်းဆိုးခြင်း၊ အသက်ရှူရခက်ခဲခြင်းနှင့် သွေးအားနည်းခြင်းတို့ ပါဝင်သည်။

ကွန်ဂိုအစိုးရက ကမ္ဘာ့ကျန်းမာရေးအဖွဲ့၏ အကူအညီများရယူကာ ရောဂါဖြစ်ပွားမှု၏ အကြောင်းရင်းနှင့်ပတ်သက်သည့် အချက်အလက်များကို ရှာဖွေစုဆောင်းရန် ကျွမ်းကျင် ပညာရှင်အဖွဲ့တစ်ဖွဲ့ကို ညွှန်ကြားထားကြောင်း သိရသည်။

ကိုးကား- အင်န်အိတ်ချ်ကေ

ဘာသာပြန်- အောင်ကျော်ကျော်

Source- ကြေးမုံသတင်းစာ

လူမှုကွန်ရက်များ ထွန်းကားလာပြီးနောက် အိမ်တွင်ဖြစ်ဖြစ်၊ စားသောက်ဆိုင်တွင်ဖြစ်ဖြစ် ထူးထူးခြားခြား တစ်ခုခု စားသောက်ပြီဆိုလျှင် လူမစားခင်ဖုန်းက အရင်စားခြင်းမှာ ယနေ့ခေတ်၏ အလေ့အထတစ်ခုလို ဖြစ်နေပါပြီ။

ယခုတွင် သိပ္ပံပညာရှင်များက ထိုသို့ အစာစားနေစဉ် ဖုန်းသုံးခြင်းသည် ယဉ်‌ကျေးမှုမရှိရုံသာမကဘဲ ဖုန်းတွင် ကပ်ပါလာသည့် ရောဂါပိုးမွှားများကြောင့် ဘေးသင့်စေနိုင်ကြောင်း သတိပေးနေပြီဖြစ်သည်။

ချက်စတာ တက္ကသိုလ်မှ ခန္ဓာဗေဒပညာရှင် ဒေါက်တာ ဂါရက်သ်နေးက “အဓိကအားဖြင့် ဝမ်းပျက်ဝမ်းလျှောလို၊ အော့အန်တာလို၊ အစာအိမ်အောင့်တာလို အစာအိမ်နဲ့ အူလမ်းကြောင်းဆိုင်ရာ ရောဂါတွေ ဖြစ်စေနိုင်ပါတယ်။ လူတွေမှာ ရောဂါခုခံနိုင်စွမ်းအား အထိုက်အလျောက်ရှိတယ်ဆိုပေမယ့် အသက်အန္တရာယ်ထိခိုက်နိုင်တဲ့ သွေးအဆိပ်တက်တာလို၊ အဆုတ်ရောင်လို ရောဂါပိုးတွေ ဝင်သွားရင် အန္တရာယ်ကြီးပါတယ်” ဟုဆိုသည်။

လူ၏ လက်သည် နေ့စဉ် အရာဝတ္ထု အမျိုးပေါင်း ၁၅၀ နီးပါးထိတွေ့နေရပြီး ဟိုဟိုဒီဒီ သွားလာနေရသူများဆိုလျှင် ထို့ထက်ပိုများနိုင်ကြောင်း လေ့လာမှုများက ချပြထားသည်။ ထိုသို့ ထိတွေ့နေသလို ဖုန်းနှင့်လည်း အစဉ်အမြဲနီးပါး ထိတွေ့နေကြရာ ဖုန်းများတွင် ဗက်တီးရီးယားများ ကပ်ပါလာနိုင်ခြေ အလွန်များသောကြောင့် အစာစားနေစဉ် ဖုန်းကို ဝေးဝေးထားရန် ပညာရှင်များက သတိပေးလာကြခြင်းဖြစ်သည်။

အစာစားနေစဉ် ဖုန်းသုံးခြင်းသည် လူမှုဆက်ဆံ‌ရေး ထိခိုက်နိုင်စေခြင်း၊ စိတ်ကျန်းမာရေးထိခိုက်နိုင်စေခြင်း၊ ကလေးများအပေါ်တွင် ထိရောက်မှုကြီးမားခြင်း၊ စိတ်ပါလက်ပါ မစားသောက်ခြင်းကြောင့် အာဟာရကျဆင်းနိုင်ခြင်း၊ အာရုံစူးစိုက်မှု အားနည်းလာခြင်းတို့ဖြစ်နိုင်ကြောင်း သိပ္ပံပညာရှင်များက သတိပေးထားခဲ့ပြီး ယခုအချိန်တွင် ကူးစက်ရောဂါများပါ ဖြစ်နိုင်ကြောင်း အရေးတကြီး သတိပေးလာခြင်းလည်းဖြစ်သည်။

Ref: Daily Mail

Source- ကြေးမုံသတင်းစာ

နယူး‌ယောက်‌ အောက်တိုဘာ ၂၄

ကာဘိုဟိုက်ဒရိတ် ပါဝင်မှုနည်းပါးသော ဓာတ်စာများသည် ပုံစံ-၂ ဆီးချိုရောဂါ လူနာများ သွေးအတွင်း သကြားဓာတ်ပါဝင်မှုအဆင့်ကို ထိန်းချုပ်ရာတွင် အထောက်အကူပြုနိုင်ဖွယ် ရှိကြောင်း အောက်တိုဘာ ၂၃ ရက်သတင်းများအရ သိရသည်။

ထို့ပြင် ကာဘိုဟိုက်ဒရိတ်ပါဝင်မှုနည်းပါးသော ဓာတ်စာများစားသုံးပါက ပုံစံ-၂ ဆီးချိုရောဂါ လူနာများအနေဖြင့် ဆီးချိုဆေးများ သုံးစွဲရမှုကိုလည်း လျှော့ချပေးနိုင်ဖွယ်ရှိကြောင်း အမေရိကန် နိုင်ငံ အလာဘားမားတက္ကသိုလ်မှ သိပ္ပံပညာရှင်များက ပြောကြားသည်။

အမေရိကန် သုတေသနပညာရှင်များ၏ အဆိုအရ ကစီဓာတ်သို့မဟုတ် ကာဘိုဟိုက်ဒရိတ်ပါဝင်မှု ကန့်သတ်ထားသော အစားအစာများသည် ပန်ကရိယအင်္ဂါအတွင်းရှိ ဘီတာဆဲလ်ခေါ် ဆဲလ်များ၏ လုပ်ငန်းလည်ပတ်မှုကို မြှင့်တင်ပေးနိုင်ကြောင်း သိရသည်။

သွေးအတွင်း သကြားဓာတ်ပါဝင်မှုကို ထိန်းညှိပေးသည့် အင်ဆူလင် ဟော်မုန်းများကို ထုတ်ပေး နေသော ဘီတာဆဲလ်များ ပျက်စီးပါက ပုံစံ-၂ ဆီးချိုရောဂါဖြစ်ပွားတတ်သည်။

သို့ရာတွင် မိမိတို့၏ လေ့လာတွေ့ရှိချက်အရ ကာဘိုဟိုက်ဒရိတ်နည်းပါးသည့် ဓာတ်စာများသည် ဘီတာဆဲလ်များ လုပ်ငန်းလည်ပတ်မှုကို မြှင့်တင်ပေးခြင်းဖြင့် ပုံစံ-၂ ဆီးချိုလူနာများ သွေးအတွင်း သကြားဓာတ်ပါဝင်မှုကို ထိန်းချုပ်ရာ၌ အထောက်အကူပြုနိုင်ဖွယ်ရှိကြောင်း အမေရိကန်သုတေ သန ပညာရှင်များက ပြောကြားသည်။

ဘာသာပြန်- KKO

Source- မြန်မာ့အလင်း

သီရိလင်္ကာနိုင်ငံ၌ ယခုနှစ်အတွင်း လက်ရှိအချိန်အထိ သွေးလွန်တုပ်ကွေးရောဂါ ဖြစ်ပွားသူ ပေါင်း ၄၀၀၀၀ ကျော်ရှိကြောင်း အမျိုးသားသွေးလွန်တုပ်ကွေးရောဂါ ထိန်းချုပ်ရေးဌာန၏ အင်္ဂါနေ့ ထုတ်ပြန်သော အချက်အလက်များအရ သိရသည်။

အဆိုပါဌာနက သွေးလွန်တုပ်ကွေးရောဂါ ကူးစက်ဖြစ်ပွားသူပေါင်း ၄၀၁၀၉ ဦး ရှိကြောင်း နှင့် သေဆုံးသူ ၁၉ ဦး ရှိကြောင်း ပြောသည်။ သွေးလွန်တုပ်ကွေးရောဂါအဖြစ်အများဆုံး ပြည်နယ်မှာ အနောက်ပိုင်းပြည်နယ်ဖြစ်ပြီး ရောဂါကူးစက်ဖြစ်ပွားမှုပေါင်း၏ ၄၂ ဒသမ ၃ ရာခိုင်နှုန်း ရှိကြောင်း သိရသည်။

ထို့အပြင် မြောက်ပိုင်းပြည်နယ်မှာ ဒုတိယမြောက် သွေးလွန်တုပ်ကွေးရောဂါအဖြစ် အများဆုံးဖြစ်ပြီး ၁၂ ရာခိုင်နှုန်းရှိကြောင်းနှင့် အလယ်ပိုင်းပြည်နယ်မှာ တတိယမြောက် သွေးလွန် တုပ်ကွေးရောဂါ အဖြစ်အများဆုံးဖြစ်ပြီး ၁၀ ဒသမ ၃ ရာခိုင်နှုန်း ရှိကြောင်း သိရသည်။

အနောက်ပိုင်းပြည်နယ်တွင် ရောဂါကူးစက်ဖြစ်ပွားမှု အများဆုံးမှာ ကိုလံဘိုခရိုင်မှ ဖြစ်ပြီး ၁၀၀၂၇ ဦး ရှိသည်ဟု ဆိုသည်။

ဆင်ဟွာ

Source- မြန်မာ့အလင်း

ကွန်ဂိုဒီမိုကရက်တစ်သမ္မတနိုင်ငံ ဂိုမာမြို့၌ အောက်တိုဘာ ၅ ရက်မှစတင်ကာ မျောက်ကျောက်ရောဂါ ကာကွယ်ဆေးထိုးနှံမှု စတင်ခဲ့ကြောင်း သိရသည်။ ကနဦးတွင် ကျန်းမာရေးဝန်ထမ်းများနှင့် မျောက်ကျောက်ရောဂါ တိုက်ဖျက်ရေးရှေ့တန်းမှ ပါဝင်ကြသည့် လုပ်သားများကို အဓိကထား၍ ကာကွယ်ဆေးထိုးသည့် အစီအစဉ်ဖြစ်ကြောင်း ကျန်းမာရေး အာဏာပိုင်များက ပြောသည်။

ထို့ပြင် အတည်ပြုလူနာနှင့် ထိတွေ့မှုရှိသူများ အခြားသော ထိခိုက်လွယ်သည့် အသက် အပိုင်းအခြားအုပ်စုများကို ကာကွယ်ဆေးထိုးပေးသွားမည်ဟု သိရသည်။ ကာကွယ်နိုင်ပြီး ကုသ၍ ရနိုင်သော ရောဂါကို အလုံးစုံတိုက်ဖျက်သွားမည်ဟု ကျန်းမာရေးဝန်ကြီးဌာန ဝန်ထမ်းအကြီး အကဲဖြစ်သူ ရိုမိန်းမူဘိုရာရီ က ကာကွယ်ဆေးစတင်ထိုးနှံပေးသည့် ဖွင့်ပွဲအခမ်းအနားတွင် ပြောသည်။

ကွန်ဂိုဒီမိုကရက်တစ်သမ္မတနိုင်ငံသည် မျောက်‌ကျောက်ရောဂါဖြစ်ပွားမှု၏ အဓိကဗဟို ချက်မနေရာဖြစ်ပြီး အာဖရိကဒေသ ရောဂါဖြစ်ပွားမှု၏ ၉၀ ရာခိုင်နှုန်းမှာ ကွန်ဂိုဒီမိုကရက်တစ် သမ္မတနိုင်ငံမှ ဖြစ်သည်ဟု ကမ္ဘာ့ကျန်းမာရေးအဖွဲ့ကြီး၏ ပြောကြားချက်အရ သိရသည်။ 

မျောက်ကျောက်ရောဂါသည် မျောက်ကျောက်ဗိုင်းရပ်စ်ပိုးကြောင့် ဖြစ်ပွားကူးစက်သည့် ရောဂါဖြစ်ပြီး ဖျားနာခြင်း၊ ရောင်ရမ်းခြင်း၊ လည်ချောင်းနာခြင်း၊ ကြွက်သားများနာကျင် ကိုက်ခဲခြင်း၊ ခါးနာခြင်း၊ အရေပြားများနီမြန်းခြင်း အစရှိသည့် ရောဂါလက္ခဏာများရှိသည်။

ဆင်ဟွာ

Source- ကြေးမုံ

အသည်းရောင်စီပိုးက ကလာပ်စည်းများကို မည်ကဲ့သို့ ကူးစက်သည်နှင့်ပတ် သက်၍ သိပ္ပံပညာရှင်များက ဖော်ထုတ် နိုင်ပြီဖြစ်သောကြောင့် အဆိုပါပိုးကူးစက် မှုအတွက် ကာကွယ်ဆေး ထုတ်လုပ်နိုင်တော့မည် ဖြစ်ကြောင်း သိရသည်။

လက်ရှိကမ္ဘာတစ်ဝန်းတွင် အသည်းရောင်စီပိုး ကူးစက်ခံထားရသူ ၅၈ သန်းမျှ ရှိကြောင်းနှင့် ထိုရောဂါပိုးကြောင့် နှစ်စဉ် သေဆုံးသူ သုံးသိန်းခန့်ရှိကြောင်း ပညာ ရှင်များက ပြောသည်။

ထို့ပြင် လတ်တလောတွင် အသုံးပြုနေသည့် ကုသမှုများမှာလည်း ကမ္ဘာတစ်ဝန်းတွင် အသည်းရောင်စီပိုးဖြစ်ပွားမှုကို ဟန့်တားနိုင်ခြင်း မရှိသောကြောင့် ပညာရှင်များက ထိရောက်မှုရှိသည့် နည်းလမ်းကို ရှာဖွေလာကြခြင်းဖြစ်သည်။

အစောပိုင်းတွင် ရောဂါပိုးကို ကလာပ်စည်းများအတွင်း ဝင်ခွင့်ပြုသည့် ပရိုတင်း ရှုပ်ထွေးမှုကို ကောင်းစွာနားမလည်သောကြောင့်  ဆေးဝါးထုတ်လုပ်ရေးကို နှောင့်နှေးမှုများဖြစ်ပေါ်စေသည်။

ယခုအခါ ကိုပင်ဟေဂင်တက္ကသိုလ်မှ သုတေသနပညာရှင်များက ရောဂါပိုး၏ မျက်နှာပြင်ရှိ ပရိုတင်းအကြောင်း ကောင်းစွာ နားလည်သွားပြီဖြစ်ကြောင်း၊ ၎င်း၏ အလုပ်လုပ်ပုံမှာ ကိုရိုနာဗိုင်းရပ်ရှိ စပိုက်ပရိုတင်း၏ အလုပ်လုပ်ပုံနှင့် အတူတူပင် ဖြစ်ကြောင်း ဦးဆောင် သုတေသီဂျန်းနစ် ပရန်တိုကပြောသည်။

ထိုသို့သောအခြေအနေကို နားလည်ပြီဖြစ်သောကြောင့်    ထိရောက်မှုရှိသော ကာကွယ်ဆေးကို ထုတ်လုပ်နိုင်တော့မည် ဖြစ်သည်ဟု သုတေသီများက ပြောသည်။

Source- Myawady Webportal

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး မောင်မောင်အေး၊ ကာကွယ်ရေးဦးစီးချုပ် (ရေ) ဒုတိယဗိုလ်ချုပ်ကြီးထိန်ဝင်း၊ ကာကွယ်ရေးဦးစီးချုပ် (လေ) ဗိုလ်ချုပ်ကြီး ထွန်းအောင်၊ ပြည်ထောင်စုအဆင့်ပုဂ္ဂိုလ်များ၊ ကာကွယ်ရေး ဦးစီးချုပ်ရုံးမှ အဆင့်မြင့်တပ်မတော်အရာရှိကြီးများနှင့် တာဝန်ရှိသူများလိုက်ပါ၍ ၂၀၂၄ခုနှစ်၊ သြဂုတ်လ ၂၃ ရက်နေ့ မွန်းလွဲပိုင်းတွင် တောင်ပိုင်းတိုင်း စစ်ဌာနချုပ်နယ်မြေအတွင်း နယ်မြေတည်ငြိမ်အေးချမ်းရေး ဆိုင်ရာ ဆောင်ရွက်ထားရှိမှုများကို စစ်ဆေးသည်။

ရှင်းလင်းတင်ပြ

ဦးစွာ တောင်ပိုင်းတိုင်းစစ်ဌာနချုပ် အစည်းအဝေးခန်းမတွင် တိုင်းမှူးဗိုလ်ချုပ်ကြည်သိုက်က တောင်ပိုင်း တိုင်းစစ်ဌာနချုပ် နယ်မြေအတွင်း EAO အဖွဲ့အချို့ နှင့် PDF အမည်ခံအကြမ်းဖက်သောင်းကျန်းသူများက နယ်မြေတည်ငြိမ်အေးချမ်းမှု ပျက်ပြားအောင်ဆောင်ရွက်နေမှုအခြေအနေများ၊ အများပြည်သူသွားလာ လျက်ရှိသည့် ဆက်သွယ်ရေးလမ်းကြောင်းများ၊ တံတားများနှင့် မီးရထားလမ်းများအား မိုင်းထောင် ဖောက်ခွဲလျက်ရှိမှုအခြေအနေများနှင့် တပ်မတော်နှင့် မြန်မာနိုင်ငံရဲတပ်ဖွဲ့ဝင်များအနေဖြင့် နယ်မြေ တည်ငြိမ်အေးချမ်းရေးအတွက် လုံခြုံရေးလုပ်ငန်းများဆောင်ရွက်လျက်ရှိမှုအခြေအနေများနှင့်ပတ်သက် ၍ ရှင်းလင်းတင်ပြသည်။

လမ်းညွှန်မှာကြား

ရှင်းလင်းတင်ပြမှုများအပေါ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေး ဦးစီးချုပ် က အများပြည်သူလုံခြုံရေးနှင့် ဒေသအတွင်းတည်ငြိမ်အေးချမ်းရေးအတွက် လုံခြုံရေးလုပ်ငန်းများကို စနစ်တကျဆောင်ရွက်သွားရန်လိုကြောင်း၊ အကြမ်းဖက်မှုလုပ်ငန်းများနှင့် ဆက်စပ်လျက်ရှိသည့် အကြမ်းဖက်သောင်းကျန်းသူများ၏ သတင်းကွင်းဆက်များအားဖော်ထုတ်၍ အကြမ်းဖက်မှုလုပ်ရပ်များ လျော့နည်းပပျောက်သွားအောင် ဆောင်ရွက်သွားရန်လိုကြောင်း၊ နယ်မြေတည်ငြိမ်အေးချမ်းရေးနှင့် လမ်းပန်းဆက်သွယ်မှုများ လုံခြုံချောမွေ့ကောင်းမွန်စေရေးအတွက် ဆောင်ရွက်ရာတွင် ရေရှည် အတွက် ထည့်သွင်းစဉ်းစား ဆောင်ရွက်သွားရန်လိုကြောင်းနှင့် အခြားနယ်မြေဒေသလုံခြုံရေးနှင့် တည်ငြိမ် အေးချမ်းရေးဆိုင်ရာများနှင့်ပတ်သက်၍ လိုအပ်သည်များကို လမ်းညွှန်မှာကြားခဲ့သည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ်နှင့် အဖွဲ့ဝင် များသည် တောင်ငူမြို့ရှိ နယ်မြေခံတပ်မတော်ဆေးရုံ၌ တက်ရောက်ကုသမှု ခံယူလျက်ရှိသည့် နိုင်ငံတော်ကာကွယ်ရေးနှင့် လုံခြုံရေးတာဝန်များ ထမ်းဆောင်စဉ် ထိခိုက်ဒဏ်ရာရရှိခဲ့သော အရာရှိ၊ စစ်သည်များနှင့် မြန်မာနိုင်ငံရဲတပ်ဖွဲ့ဝင်များအား သွားရောက် ကြည့်ရှုအားပေးစကား ပြောကြားသည်။

ထိုသို့ အားပေးစကားပြောကြားရာတွင် ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော် ကာကွယ်ရေးဦးစီးချုပ်သည် နိုင်ငံတော်ကာကွယ်ရေးနှင့် လုံခြုံရေးတာဝန်များ ထမ်းဆောင်စဉ် ထိခိုက် ဒဏ်ရာရရှိခဲ့သော အရာရှိ၊ စစ်သည်များနှင့် မြန်မာနိုင်ငံရဲတပ်ဖွဲ့ဝင်များအား ထိခိုက်ဒဏ်ရာရရှိခဲ့မှု အခြေအနေများ၊ ရောဂါကုသပျောက်ကင်းမှု အခြေအနေများကို တစ်ဦးချင်းလိုက်လံတွေ့ဆုံ၍ ရင်းနှီးနွေး ထွေးစွာ မေးမြန်းပြီး အားပေးစကားပြောကြားကာ အရာရှိ၊ စစ်သည်များနှင့် မြန်မာနိုင်ငံရဲတပ်ဖွဲ့ဝင်များ၏ တင်ပြချက်များအပေါ် လိုအပ်သည်များ ဖြည့်ဆည်းဆောင်ရွက်ပေးသည်။

ဂုဏ်ပြုချီးမြှင့်ငွေနှင့် လက်ဆောင်ပစ္စည်းများပေးအပ်

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ်နှင့် အဖွဲ့ဝင် များသည် ဆေးရုံတက်ရောက်ကုသမှုခံယူလျက်ရှိသည့် အရာရှိ၊ စစ်သည်များနှင့် မြန်မာနိုင်ငံ ရဲတပ်ဖွဲ့ဝင် များအား ဂုဏ်ပြုချီးမြှင့်ငွေနှင့် လက်ဆောင်ပစ္စည်းများပေးအပ်သည်။

ဆက်လက်၍ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ်သည် ဆေးရုံ လိုအပ်ချက်များအားမေးမြန်း၍ လိုအပ်သည်များ ဖြည့်ဆည်းဆောင်ရွက်ပေးခဲ့ကြောင်း သတင်းရရှိသည်။ 

Source- www,moi.gov.mm