ဇွန်လ ၂၂ ရက်တွင်ဖြစ်ပွားသည့် ဘုရား ရှိခိုးကျောင်းတစ်ခု ဗုံးခွဲတိုက်ခိုက်ခံရမှု၌ ပါဝင်သူများသည် တရားဥပဒေအရစီရင်ခံရမည်ဖြစ်ကြောင်း ဆီးရီးယားယာယီ သမ္မတ အာမတ်အယ်ရှာရာက ဇွန်လ ၂၃ ရက်တွင်ပြောသည်။
ဒမတ်စကပ်မြို့ ဒွဲလာရပ်ကွက်ရှိ ဘုရား ရှိခိုးကျောင်းတစ်ခုတွင် ပစ်ခတ်မှုများနှင့် အသေခံဗုံးခွဲတိုက်ခိုက်မှုတို့ဖြစ်ပွားရာ လူ၂၅ ဦးသေဆုံးပြီး ၆၃ ဦးဒဏ်ရာရှိသည် ဟု ကျန်းမာရေး၀န်ကြီးဌာနက ထုတ်ပြန်ထားသည်။
ထိုင်းဝန်ကြီးချုပ် ပေထုန်ထန်ရှင်နာ၀ပ်သည် ပြည်တွင်း၌ နိုင်ငံရေးအကျပ်အတည်းနှင့်ရင်ဆိုင်နေရစဉ် ဇွန်လ ၂၃ ရက်တွင် အစိုးရအဖွဲ့ကို ပြန်လည်ပြင်ဆင် ဖွဲ့စည်းမှုလုပ်ဆောင်ကြောင်းသိရသည်။
ထိုင်းဝန်ကြီးချုပ်နှင့် ကမ္ဘောဒီးယားဝန်ကြီးချုပ်ဟောင်းတို့ဖုန်းဆက်စကား ပြောထားသည့်အသံဖိုင်ပေါက်ကြားလာပြီးနောက် ထိုင်းညွန့်ပေါင်းအစိုးရအဖွဲ့မှ အဓိကမဟာမိတ်ပါတီဖြစ်သည့် ဘွမ်ဂျိုင် ထိုင်းပါတီက နုတ်ထွက်သွားသည့်အတွက် ထိုင်းအစိုးရအဖွဲ့အနေဖြင့် ပြုတ်ကျရလုနီးပါးဖြစ်လာသည်။ တစ်ချိန်တည်းမှာပင် ပေထုန်ထန်ရှင်နာဝပ်သည် ဝန်ကြီးချုပ်ရာထူးမှဆင်းပေးရန် တောင်းဆိုမှုနှင့်လည်း ရင်ဆိုင်ခဲ့ရသည်။
တရုတ်မိုးလေဝသဌာနက နိုင်ငံ၏ မြို့တော် ပေကျင်းမြို့၌ ဒုတိယအမြင့်ဆုံး အပူချိန်မြင့်တက်မှု သတိပေးချက်ထုတ်ပြန်ထားကြောင်းသိရသည်။ ပေကျင်းမြို့ အပူချိန်သည် ၃၈ ဒီဂရီစင်တီဂရိတ်အထိမြင့်တက်လာနိုင်သည့်အတွက် ပြည်သူများအနေဖြင့် သတိထားရန် မိုးလေဝသ ဌာနက ဇွန်လ ၂၃ ရက်တွင် သတိပေး ချက်ထုတ်ပြန်ထားခြင်းဖြစ်သည်။
ယခုထုတ်ပြန်သော သတိပေးချက်သည် အဝါရောင်အဆင့်သတိပေးချက် ဖြစ်သောကြောင့် ပြည်သူများအနေဖြင့် အမိုးအကာအောက်တွင်သာနေထိုင်ရန် နှင့် အပူလျှပ်ခြင်းမဖြစ်စေရေးအတွက် ရေများများသောက်ရန်လိုအပ်ကြောင်း ထုတ်ပြန်ချက်တွင်ဖော်ပြထားသည်။
ဟင်္သာတ ဇွန် ၂၃
ဧရာဝတီတိုင်းဒေသကြီး ဟင်္သာတမြို့နယ်တွင် ဒေသထွက် သခွားသီးများ အရောင်းအဝယ်ကောင်းမွန်နေကြောင်း ဟင်္သာတမြို့နယ် ကုန်စိမ်းရောင်းဝယ်ရေး ပွဲရုံပိုင်ရှင် ဒေါ်ဝင်းမော် က ပြောပြသည်။