11 February 2025

     ၂၀၂၅ ခုနှစ်၊ ဖေဖော်ဝါရီ ၁ ရက် ညနေ ၅ နာရီ ၃၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည်  မန္တလေးတိုင်းဒေသကြီး၊ ပြည်ကြီးတံခွန်မြို့နယ်၊ ၅၃ လမ်း၊ ၁၄၂ x ၁၄၃ လမ်းကြားတွင် မူးယစ်ဆေးဝါးအရောင်းအဝယ် ပြုလုပ်မည်ဖြစ်ကြောင်း သတင်းအရ စောင့်ဆိုင်းနေစဉ် ရောက်ရှိလာသူ ဇော်မင်းနိုင်နှင့် ဇင်ကိုကိုလွင်တို့ နှစ်ဦးအား LIGHT TRUCK မော်တော်ယာဉ် တစ်စီး၊ မော်တော်ဆိုင်ကယ် တစ်စီး၊ ဘိန်းဖြူ ၁၁ ကီလိုတို့နှင့်အတူ ဖမ်းဆီးရမိခဲ့ကြောင်း၊ ကွင်းဆက်ဖော်ထုတ်ချက်အရ ဘိန်းဖြူများ အရောင်းအဝယ်ပြုလုပ်ရာတွင် ၁၀ ရာခိုင်နှုန်း အကျိုးဆောင်ခဖြင့် ပွဲစားပြုလုပ်ပေးသူ မကျော့ကေခိုင်(ခ)နန်းမွေလျန်းအား ပြည်ကြီးတံခွန်မြို့နယ်၊ ၇၈ လမ်းနှင့် ၁၁၅ လမ်းထောင့်တွင်လည်းကောင်း၊ ပူးပေါင်းပါဝင်သူများဖြစ်သည့် အိုက်စိုင်းအား ၇၂(A)လမ်း၊ ၁၁၇ x ၁၁၈ လမ်းကြားတွင် စိတ်ကြွရူးသွပ်ဆေးပြား ၂၀၀ ပြားနှင့်လည်းကောင်း၊ ခွန်မြတ်(ခ)နောနော်နှင့် စိုင်းသိန်းမြတ်(ခ)စိုင်းလေးတို့အား ၁၅၁ လမ်း၊ ၇၁(A) လမ်းထောင့်တွင် PRADO မော်တော်ယာဉ် တစ်စီးနှင့်လည်းကောင်း အသီးသီး ဆက်လက်ဖမ်းဆီးရမိခဲ့ကြောင်း၊ ၎င်းတို့၏ ဖော်ထုတ်ချက်အရ ဘိန်းဖြူများရောင်းချခိုင်းသူ စိုင်းအိုက်ယုံအား ၁၁၂(B)၊ ၅၀ x ၅၁ လမ်းကြားရှိ နေအိမ်၌ ဘိန်းဆီခဲ ၂၅ ဂရမ်နှင့်အတူ ဆက်လက်ဖမ်းဆီးရမိခဲ့ပြီး ၎င်း၏ဖော်ထုတ်ချက်အရ ၆၁ လမ်း၊ ၁၂၄ x ၁၂၅ လမ်းကြားရှိ ဂိုဒေါင်မှ စိတ်ကြွရူးသွပ်ဆေးပြား ၄၆ ဒသမ ၉၄ သိန်း ထပ်မံသိမ်းဆည်းရမိခဲ့ကြောင်း သတင်းရရှိပါသည်။
     စစ်ဆေးဖော်ထုတ်ချက်များအရ ရှမ်းပြည်နယ်(တောင်ပိုင်း)၊ ကျေးသီးမြို့နယ်၊ ဝမ်ဟိုင်းကျေးရွာနေ အိုက်ပေါင်း၏ အစီအမံဖြင့် မန္တလေးတိုင်းဒေသကြီး၊ ပြည်ကြီးတံခွန်မြို့နယ်၊ ၆၁ လမ်း၊ ၁၂၄ x ၁၂၅ လမ်းကြားရှိ ဂိုဒေါင်ကို ငှားရမ်း၍ ကိုအောင်အား မူးယစ်ဆေးဝါးများ ထိန်းသိမ်းထားစေကြောင်း၊ စိုင်းမွန်း(ခ)စိုင်းမွန်လောဝ်နှင့် စိုက်အိုက်ယုံတို့မှ မကျော့ကေခိုင်(ခ)နန်းမွေလျန်းအား ပွဲစားခ ၁၀ ရာခိုင်နှုန်းပေး၍ မူးယစ်ဆေးဝါးများ အရောင်းအဝယ်ပြုလုပ်ခြင်းဖြစ်ကြောင်း၊ အိုက်စိုင်း၊ ခွန်မြတ်(ခ)နောနော်နှင့် စိုင်းသိန်းမြတ်(ခ)စိုင်းလေးတို့သည် မူးယစ်ဆေးဝါးများ သယ်ယူပို့ဆောင်ခြင်းနှင့် ရောင်းရငွေများအား အဆင့်ဆင့် လွှဲပြောင်းလက်ခံယူသူများဖြစ်ကြောင်း သိရှိရပြီး စုစုပေါင်းဒေသကာလ တန်ဖိုးငွေကျပ် ၇ ဒသမ ၃ ဘီလီယံကျော်တန်ဖိုးရှိ ဘိန်းဖြူ ၁၁ ကီလို၊ စိတ်ကြွရူးသွပ်ဆေးပြား ၄၆ ဒသမ ၉၄၂ သိန်းနှင့် ဘိန်းဆီခဲ ၂၅ ဂရမ်တို့ကို မူးယစ်ဆေးဝါးအရောင်းအဝယ် ပြုလုပ်ရာတွင် အသုံးပြုသည့် မော်တော်ယာဉ် သုံးစီး၊ ဆိုင်ကယ် တစ်စီးတို့အား သိမ်းဆည်းရမိခဲ့ကြောင်း သိရှိရသဖြင့် ၎င်းမူးယစ်မှောင်ခိုဂိုဏ်းအဖွဲ့ဝင်များအား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm

ဂါဇာကမ်းမြောင်ဒေသ Netzarim စင်္ကြံမှ အစ္စရေးတပ်များ ဆုတ်ခွာသွားပြီဖြစ်ကြောင်း ပါလက်စတိုင်း အစ္စလမ်မစ်တော်လှန်ရေး လှုပ်ရှားမှုအဖွဲ့(ဟားမက်စ်) အရာရှိတစ်ဦးက ဖေဖော်ဝါရီ ၉ ရက်တွင် ပြောကြားခဲ့သည်။

Netzarim စင်္ကြံရှိ စစ်ကင်းစခန်းများကို အစ္စရေးတပ်က ဖျက်သိမ်းသွားပြီဖြစ်ပြီး ဂါဇာကမ်းမြောင် တောင်-မြောက်ဆက်သွယ်ရာလမ်းဖြစ်သည့် Salah al-Din လမ်းရှိ တင့်ကားများ ဆုတ်ခွာကာ ကားလမ်းကြောင်း နှစ်ဖက်တွင် မော်တော်ယာဉ်များကို လွတ်လပ်စွာသွားလာခွင့်ပြုထားကြောင်း ဟားမက်စ် အရာရှိတစ်ဦးက အေအက်ဖ်ပီ သတင်းဌာနကို ပြောကြားခဲ့သည်။

အစ္စရေးနှင့် ဟားမက်စ် သဘောတူညီချက်ရရှိထားသည့် ဂါဇာကမ်းမြောင် အပစ်ရပ်ရေးသဘောတူညီချက်အရ အစ္စရေးစစ်တပ်က ယင်းနေ့တွင်Netzarim စင်္ကြံမှ ဆုတ်ခွာရမည်ဖြစ်ကြောင်း အမည်မဖော်လိုသည့်အစ္စရေးတပ် အရာရှိတစ်ဦးက အေပီသတင်းဌာန သတင်းထောက်ကို ဖေဖော်ဝါရီ ၉ ရက်တွင် အတည်ပြု ပြောကြားခဲ့သည်။

Netzarim စင်္ကြံသည် လူဦးရေသိပ်သည်းသည့် ဂါဇာကမ်းမြောင် တောင်ဘက်တွင် တည်ရှိရာ ၆ ကီလိုမီတာ အရှည်ရှိသည့် ယင်းစင်္ကြံသည် မြေထဲ ပင်လယ်ကမ်းခြေမှ အစ္စရေးနယ်စပ်အထိရှိပြီး ဂါဇာကမ်းမြောင်ဒေသကို တောင်နှင့်မြောက် နှစ်ပိုင်းခွဲခြားထားသည်။ ယခုအကြိမ် ပါလက်စတိုင်း-အစ္စရေး ပဋိပက္ခဖြစ်ပွားသည့် ကနဦးကာလတွင် အစ္စရေးစစ်တပ်က ဂါဇာကမ်းမြောင်ဒေသမြောက်ပိုင်း၌ နေထိုင်သူအားလုံး တောင်ပိုင်းသို့ ရွှေ့ပြောင်းရန် တောင်းဆိုခဲ့ပြီးနောက် Netzarim စင်္ကြံကို သိမ်းပိုက် ခဲ့သည်။

အပစ်ရပ်ရေး သဘောတူညီချက်အရ အစ္စရေးစစ်တပ်သည် ဇန်နဝါရီ ၂၇ ရက် နံနက် ၇ နာရီမှစ၍ ဂါဇာကမ်းမြောင်ဒေသ ပြည်သူလူထုအား Netzarim စင်္ကြံကို ဖြတ်သန်းကာ ၎င်းတို့၏နေရပ်ဖြစ်သော ဂါဇာ မြောက်ပိုင်းသို့ ပြန်သွားရန် ခွင့်ပြုခဲ့သည်။

နေရပ်ပြန်သွားသည့် လူအများအပြားက မိမိတို့၏နေထိုင်ရာ ရပ်ကွက်သည် စစ်မြေတလင်း ဖြစ်နေသည်ကိုတွေ့ရသဖြင့် လူအချို့သည် တောင်ပိုင်း ဒေသသို့ ပြန်လည်ခရီးနှင်ကြသကဲ့သို့ အချို့က ဖျက်ဆီးခံရသော မိမိတို့၏ နေအိမ်ဘေးတွင်း ရွက်ဖျင်တဲထိုး၍နေထိုင်ကြကြောင်း မီဒီယာများ၏ သတင်းများအရသိရသည်။

ဂါဇာကမ်းမြောင် အပစ်ရပ်ရေးသည် ဇန်နဝါရီ ၁၅ ရက်တွင် သဘော တူညီချက်ရရှိပြီး ဇန်နဝါရီ ၁၉ ရက်တွင် အသက်ဝင်ခဲ့ခြင်းဖြစ်သည်။ အပစ်ရပ်ရေး ပထမအဆင့်ကို ရက်သတ္တပတ် ၆ ပတ် ဆက်တိုက် ဆောင်ရွက်ရာ ဟားမက်စ်အနေဖြင့် ဖမ်းဆီးထိန်းသိမ်းခံထားရသူ ၃၃ ဦး ကိုပြန်လွှတ်ရန် သဘောတူညီခဲ့ပြီး အစ္စရေးက ဖမ်းဆီးထိန်းသိမ်းထားသော ပါလက်စတိုင်း ၁,၀၀၀ ကျော်ကို ပြန်လွှတ်ပေးမည်ဖြစ်သည်။

လက်ရှိတွင် ပထမအဆင့်ကာလသည် တစ်ဝက်ကျော်ရှိပြီ ဖြစ်သည်။ ဒုတိယအဆင့် တွေ့ဆုံဆွေးနွေးမှုများကို ယခုရက်ပိုင်းများတွင် စတင်ပြီ ဖြစ်ရာ ဘက်ပေါင်းစုံအနေဖြင့် အခြားသော ထိန်းသိမ်းခံထားရသူများအား ပြန်လွှတ်ပေးရေးနှင့် အစ္စရေးတပ်ရုပ်သိမ်းရေးကိစ္စရပ်များကို ဆွေးနွေး မည်ဖြစ်သည်။ အေပီသတင်းဌာန၏ သတင်းများအရ အစ္စရေးအနေဖြင့် ကြားဝင်စေ့စပ်ညှိနှိုင်းပေးသော ကာတာနိုင်ငံသို့ စေလွှတ်သည့်ကိုယ်စားလှယ်အဖွဲ့အနေဖြင့် အပြောင်းအလဲဖြစ်မည့် ရလဒ်ရရှိရန် ခဲယဉ်းနိုင်သည်ဟု ပြင်ပလောကက ခန့်မှန်းကြကြောင်း သိရသည်။

ထို့အပြင် ယခုကာလများတွင် အမေရိကန်ဘက်မှ ဂါဇာကမ်းမြောင်ကို ရှင်းလင်းရန်နှင့် လက်လွှဲယူရန် မျှော်လင့်ကြောင်းအဆိုပြုခဲ့ရာ ထိုအဆိုပြုချက်အပေါ် ပါလက်စတိုင်းနှင့် အခြားနိုင်ငံအများအပြားက ပြင်းပြင်းထန်ထန် ဆန့်ကျင်ကန့်ကွက်ခဲ့ကြသည်။

ကိုးကား-Myanmar National Post

ထိုင်းဝန်ကြီးချုပ်သစ် Paetongtarn Shinawatra သည် ၂၀၂၅ ခုနှစ်၊ ဖေဖော်ဝါရီ ၅ ရက်မှ ၈ ရက်အထိ တရုတ်ပြည်သူ့သမ္မတနိုင်ငံသို့ ပထမဆုံးခရီးစဉ်အဖြစ် သွားရောက်ခဲ့ပြီး ဖေဖော်ဝါရီ ၆ ရက်တွင် ပေကျင်းမြို့၌ တရုတ်သမ္မတရှီကျင့်ဖျင်နှင့် တွေ့ဆုံခဲ့ပါသည်။ 

ထိုသို့တွေ့ဆုံရာတွင် နယ်စပ်တစ်လျှောက် တရားမဝင် အွန်လိုင်း လောင်းကစားနှင့် ငွေကြေးလိမ်လည်မှုများတိုက်ဖျက်ရန် ပူးပေါင်းဆောင်ရွက်သွားမည်ဖြစ်ကြောင်း ဆွေးနွေးခဲ့ကြသည်။

နယ်စပ်ဒေသရှိ တရားမဝင်အွန်လိုင်းလောင်းကစားနှင့် ငွေကြေးလိမ်လည်မှုများတိုက်ဖျက်ရေး အစီအစဉ်များအတွက် တရုတ်နိုင်ငံအနေဖြင့် မြန်မာ၊ ထိုင်းတို့နှင့် တက်တက်ကြွကြွ ပူးပေါင်းဆောင်ရွက်လျက်ရှိကြောင်း တရုတ်အစိုးရပြောခွင့်ရပုဂ္ဂိုလ် Lin Jian က ပြောကြားထားပါသည်။ 

ကိုးကား- နိုင်ငံခြားရေးဝန်ကြီးဌာန၊ တရုတ်ပြည်သူ့သမ္မတနိုင်ငံ

ရုရှားသည် အိန္ဒိယ၏ ကာကွယ်ရေးနယ်ပယ်တွင် ရေရှည်ယုံကြည် စိတ်ချရသော မိတ်ဖက်နိုင်ငံတစ်နိုင်ငံအဖြစ် ရှုမြင်နေကြောင်း အိန္ဒိယ ကာကွယ်ရေးဝန်ကြီး ရာဂ်နက်ဆင်း (Rajnath Singh) က ရုရှား နိုင်ငံပိုင် သတင်းအေဂျင်စီ TASS သို့ ပြောကြားထားပါသည်။

အိန္ဒိယတွင် ကာကွယ်ရေးနယ်ပယ်ကို ပြည်သူပိုင်ကုမ္ပဏီ (Corporatization) ပုံစံပြောင်းလဲခဲ့ပြီးနောက် မိမိတို့ပြည်သူပိုင် ကာကွယ်ရေးကုမ္ပဏီများက (ရုရှား)လက်နက်များ ထုတ်လုပ်နေကြကြောင်း ၎င်းက ပြောကြားထားပါသည်။

အိန္ဒိယသည် ၂၀၂၁ ခုနှစ်တွင် ကာကွယ်ရေးထုတ်လုပ်မှုအခန်းကဏ္ဍကို ကုမ္ပဏီ(ပြည်သူပိုင်)ပုံစံပြောင်းလဲခဲ့ပြီး ကာကွယ်ရေးဝန်ကြီးဌာန အောက်တွင် ပြည်သူပိုင်လုပ်ငန်း ၇ ခုကို စတင်ဖွဲ့စည်းခဲ့သည်။

လာမည့် ဖေဖော်ဝါရီ ၁၇ ရက်(တနင်္လာနေ့)တွင် အိန္ဒိယနိုင်ငံ တောင်ပိုင်းရှိ Yelahanka လေတပ်စခန်း၌ ပြုလုပ်မည့် ၂၀၂၅ အပြည်ပြည်ဆိုင်ရာလေကြောင်းပြပွဲ (Aero India 2025) တွင် အဓိက ပြသမှုများထဲတွင် ရုရှား၏ ဆဌမမျိုးဆက် Su-57 တိုက်လေယာဉ်များ ပါဝင်ပါသည်။

ကိုးကား-TASS

Photo: Pravda

အီရန်၏ အစ္စလမ္မစ်တော်လှန်ရေးအစောင့်တပ် (IRGC) မှ အကြီးတန်း တပ်မှူးများသည် နျူလက်နက်ဖွံ့ဖြိုးတိုးတက်မှုနှင့် အသုံးပြုမှုကို တားမြစ်ထားသည့် ၎င်း၏ကာလရှည်ကြာ တည်ရှိနေသော Fetwa (အစ္စလမ်ဘာသာရေးခေါင်းဆောင်တစ်ဦးမှ ပေးအပ်သော ဥပဒေဆိုင်ရာ သဘောထား (သို့) အမိန့်) ကို ရပ်ဆိုင်းရန် ခေါင်းဆောင် အယာတိုလာ အလီခါမေနီအား တိုက်တွန်းခဲ့ကြောင်း The Telegraph က ဖေဖော်ဝါရီ ၉ ရက်နေ့တွင် ဖော်ပြခဲ့သည်။

အနောက်တိုင်းရန်ဘက်များ၏ ဖိအားများကြားတွင် အဏုမြူဗုံးများ ကိုင်ဆောင်ထားရန်မှာ မရှိမဖြစ်လိုအပ်ကြောင်း ၎င်းတို့ကစောဒက တက်ခဲ့ကြောင်း သိရသည်။

အယာတိုလာ ခါမေနီ၏ Fetwa သည် ၁၉၉၀ ပြည့်လွန်နှစ်များ အလယ်ပိုင်းတွင် ထုတ်ပြန်ခဲ့ပြီး ၂၀၀၃ ခုနှစ်တွင် လူသိရှင်ကြား ကြေညာခဲ့ကာ အဏုမြူလက်နက်ထုတ်လုပ်ခြင်း၊ သိုလှောင်ခြင်းနှင့် အသုံးပြုခြင်းကို အတိအလင်းတားမြစ်ထားပြီး ၎င်းကိစ္စရပ်များသည် အစ္စလမ့်မူ များကို ဆန့်ကျင်သည်ဟုဆိုပါသည်။ ၎င်းအမိန့်သည် နျူကလီယား လက်နက်တပ်ဆင်ရေးဆိုင်ရာ အီရန်၏ တရားဝင်ရပ်တည်မှု အုတ်မြစ်ဖြစ်ပါသည်။

သို့သော်လည်း တီဟီရန်မြို့အနီးရှိ အီရန်စစ်ဘက်ဆိုင်ရာ အဆောက်အအုံများကို အစ္စရေးကလေကြောင်းမှ တိုက်ခိုက်မှုများအပါအဝင် ဒေသတွင်း တင်းမာမှုများ မကြာသေးမီက တိုးမြင့်လာခဲ့ရာ အမျိုးသားကာကွယ်ရေး မဟာဗျူဟာများနှင့်ပတ်သက်၍ ပြည်တွင်း၌ အချေအတင်ဆွေးနွေးမှုများ ပြင်းထန်လာခဲ့ကြောင်း AP သတင်းတွင်ဖော်ပြထားသည်။ အီရန်၏ ဒုံးကျည်ထုတ်လုပ်မှုနှင့် ယခင်နျူကလီးယားသုတေသနနှင့် ဆက်စပ်နေသည့်နေရာများကို ပစ်မှတ်ထားသည့် တိုက်ခိုက်မှုများသည် နိုင်ငံ၏ ကာကွယ်ရေးဆိုင်ရာ အခြေခံအဆောက်အအုံများ၏ အားနည်းချက်များကို မီးမောင်းထိုးပြခဲ့ကြောင်း သုံးသပ်ဖော်ပြခဲ့သည်။

အဆိုပါအခြေအနေများကြောင့် IRGC ခေါင်းဆောင်များသည် Fetwa ကိုလိုက်နာခြင်းဖြင့် အီရန်၏ဖြစ်တည်မှုဆိုင်ရာ ခြိမ်းခြောက်မှုများကို တန်ပြန်နိုင်ရန်အတွက် ရန်သူများကိုဟန့်တားနိုင်ရေး နျူလက်နက်များ ဝယ်ယူခြင်းကိစ္စရပ်များနှောင့်နှေးမည်ကို စိုးရိမ်ကြောင်းဖော်ပြကြသည်။

ကိုးကား-RT

ရုရှားနိုင်ငံအား တိုက်ခိုက်ရာတွင် အသုံးပြုရန်အတွက် ယူကရိန်းနိုင်ငံသို့ လက်နက်များထောက်ပံ့‌ပေးမည့်ကိစ္စမှာ လုံးဝမဖြစ်သင့်ကြောင်း ဖေဖော်ဝါရီ ၁၀ ရက်တွင် CSU / CDU (Christian Democratic Union) ပါတီမှ ပြိုင်ဘက် Friedrich Merz နှင့် ရွေးကောက်ပွဲဆိုင်ရာ စကားစစ် ထိုးပွဲပြုလုပ်စ‌ဥ် ဂျာမနီဝန်ကြီးချုပ် Olaf Scholz က ပြောကြားလိုက်ပါသည်။

အစောပိုင်းကာလကလည်း ကီလိုမီတာ ၅၀၀ ခန့်အကွာအဝေးအထိ ရောက်ရှိနိုင်သော ဝေဟင်ပစ် Taurus အမျိုးအစား ခရုဇ်ဒုံးပျံများအား မြို့တော်ကိယက်ဗ်ကိုထောက်ပံ့ပေးရန် အစီအစဉ်ကို ဂျာမနီ ဝန်ကြီးချုပ် က ကန့်ကွက်ခဲ့ပြီး အဆိုပါ လက်နက်များ‌ထောက်ပံ့ခြင်းကြောင့် စစ်ပွဲ အရှိန်အဟုန် ပိုမိုပြင်းထန်စေနိုင်ကြောင်း မှတ်ချက်ပြုပြောကြားခဲ့သည်။ 

အနောက်နိုင်ငံများ၏ တာဝေးပစ်လက်နက်များ အသုံးပြု၍ ရုရှားနိုင်ငံအား တိုက်ခိုက်ခြင်းမှာ ရုရှား-ယူကရိန်းပဋိပက္ခတွင် နေတိုးတပ်ဖွဲ့က တိုက်ရိုက်ပါဝင်ပတ်သက်နေသည့် အဓိပ္ပာယ်သက်ရောက်‌စေမည်ဖြစ်ကြောင်း ပြီးခဲ့သည့် နိုဝင်ဘာလတွင် ကျင်းပခဲ့သည့် အမျိုးသားလုံခြုံရေးဆိုင်ရာပူးပေါင်းသဘောတူစာချုပ်အဖွဲ့ (CSTO) ထိပ်သီး အစည်းအဝေးတွင် ရုရှားသမ္မတ ဗလာဒီမာပူတင်က ထပ်တလဲလဲ ထောက်ပြ ပြောဆိုခဲ့ပါသည်။

ကိုးကား-TASS

  တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များအသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၆ ရက် နံနက် ၈ နာရီ ၃၀ မိနစ်တွင် ပဲခူးတိုင်းဒေသကြီး၊ အုတ်တွင်းမြို့နယ်၊ အနောက်ဘိုကုန်းကျေးရွာ၌ သေနတ်ဖြင့် ပစ်ခတ်ခံရ၍ အမျိုးသားတစ်ဦး သေဆုံးသွားခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးထွန်းထွန်းဝင်း(၂၈)နှစ်သည် ၎င်း၏နေအိမ်၌ရှိနေစဉ် KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမား လေးဦး(စိစစ်ဆဲ)က ဆိုင်ကယ် နှစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဦးထွန်းထွန်းဝင်းတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
     အလားတူ မွန်းလွဲ ၃ နာရီ ၄၅ မိနစ်တွင် မန္တလေးတိုင်းဒေသကြီး၊ ညောင်ဦးမြို့နယ်၊ ကုက္ကိုချောင်းကျေးရွာအနီး၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးဖိုးကျော်(ခ)ဆန်းကျော်(၄၈)နှစ်သည် ကျေးရွာ၏အရှေ့မြောက်ဘက် လေးဖာလုံခန့်အကွာရှိ ယာခင်းအတွင်းရှိနေစဉ် PDF အမည်ခံ အကြမ်းဖက်သမား ငါးဦး(စိစစ်ဆဲ)က ဆိုင်ကယ် သုံးစီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဦးဖိုးကျော်(ခ)ဆန်းကျော်တွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
     ထိုသို့ အပြစ်မဲ့ အရပ်သားပြည်သူများအား “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm

     ၂၀၂၅ ခုနှစ်၊ ဖေဖော်ဝါရီ ၄ ရက် ည ၉ နာရီ ၃၀ မိနစ်တွင်  မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည် ချမ်းအေးသာစံမြို့နယ်၊ ရန်မျိုးလုံရပ်ကွက်၊ ၇၁ လမ်း၌ တူးမိုင် မောင်းနှင်လာသည့် မော်တော်ဆိုင်ကယ်ကို ရပ်တန့်စစ်ဆေးရှာဖွေရာ ၎င်းထံမှ စိတ်ပြောင်းဆေးဝါး Happy Water ၀ ဒသမ ၀၂ ကီလို သိမ်းဆည်းရမိခဲ့ပြီး စစ်ဆေးချက်အရ ည ၁၀ နာရီတွင် အောင်မြေသာစံမြို့နယ်၊ ပုလဲငွေရောင်ရပ်ကွက်ရှိ ၎င်း၏နေအိမ်ကို ဆက်လက်ရှာဖွေရာ စိတ်ပြောင်းဆေးဝါးများဖြစ်သည့် ကက်တမင်း ၂ ဒသမ ၅ ကီလို၊ Happy Water ၁ ဒသမ ၂၆ ကီလို၊ အက်တက်စီ ဆေးပြား ၄၅၀ ပြား၊ Happy Water အရည် ၀ ဒသမ ၀၁၈ လီတာ ထပ်မံသိမ်းဆည်းရမိခဲ့ပြီး ဒေသကာလတန်ဖိုး ငွေကျပ် ၂,၄၅၈ သိန်းတန်ဖိုးရှိ သိမ်းဆည်းရမိ စိတ်ပြောင်းဆေးဝါးများအား မန္တလေးမြို့ပေါ်ရှိ KTV/ CLUB/ BAR နှင့် ENTERTAINMENT များတွင် ဖြန့်ဖြူးရောင်းချခြင်းဖြစ်ကြောင်း သိရှိရသဖြင့် တူးမိုင်(၃၈)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm

     ၂၀၂၅ ခုနှစ်၊ ဖေဖော်ဝါရီ ၆ ရက် နံနက် ၁၁ နာရီ ၃၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည် မကွေးတိုင်းဒေသကြီး၊ ငဖဲမြို့နယ်၊ ပဒါန်းကျေးရွာအုပ်စု၊ ပဒါန်းကျေးရွာအနီးရှိ ဦးချောက်၏ နေအိမ်တဲကို ဝင်ရောက်ရှာဖွေရာ ၎င်းထံမှ  ဒေသကာလတန်ဖိုး ၁၀၅ သိန်းကျော်တန်ဖိုးရှိ စိတ်ကြွရူးသွပ်ဆေးပြား ၄,၂၀၀ ပြားနှင့် ဘိန်းစိမ်း သုည ဒသမ ၀၃ ကီလို သိမ်းဆည်းရမိခဲ့သဖြင့် ဦးချောက်(၅၆)နှစ်အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm

     အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၆ ရက် မွန်းလွဲ ၁၂ နာရီ ၄၅ မိနစ်တွင် မကွေးတိုင်းဒေသကြီး၊ ပွင့်ဖြူမြို့နယ်၊ ဖလံကျင်းကျေးရွာအနီး၌ ပေါက်ကွဲမှုဖြစ်ပွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးဇင်မင်းထွန်း(၃၉)နှစ်နှင့် တစ်ရွာတည်းနေ ဦးကျော်ဌေးဝင်း(၃၂)နှစ်တို့သည် ဖလံကျင်းကျေးရွာတောင်ဘက် တစ်မိုင်ခွဲခန့်ရှိ ဇီးသီးခြံသို့ သွားရောက်စဉ် ဇီးသီးခြံအနီးအရောက် PDF အမည်ခံ အကြမ်းဖက်အဖွဲ့က ထောင်ထားသည့် မိုင်းတစ်လုံးအား နင်းမိပေါက်ကွဲခဲ့သဖြင့် ၎င်းတို့နှစ်ဦးတွင် မိုင်းပေါက်ကွဲစထိမှန် ဒဏ်ရာများရရှိခဲ့၍ ဆေးကုသနိုင်ရေး မင်းဘူးမြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
     အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm