17 February 2025

အကြမ်းဖက်အုပ်စုအဖြစ်ကြေညာထားသည့် CRPH၊ NUG နှင့် ယင်းတို့၏ လက်ဝေခံ အဖွဲ့အစည်းများ၊ ယင်းတို့နှင့် ဆက်နွှယ်နေသော အဖွဲ့အစည်းများ၊ လူပုဂ္ဂိုလ်များသည် နိုင်ငံတော် တည်ငြိမ်အေးချမ်းရေးကို ပျက်ပြားစေရန်နှင့် အစိုးရယန္တရားများ ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုလုပ်ခဲ့မှုအပေါ် ဥပဒေနှင့်အညီ ထိရောက်စွာ အရေးယူသွားမည်ဖြစ်ကြောင်းနှင့် ထိုသို့ လှုံ့ဆော်သူ၊ ဝါဒဖြန့်သူများအား ဆက်လက်ဖော်ထုတ်အရေးယူသွားမည်ဖြစ်ကြောင်း မိဘပြည်သူများသိရှိနိုင်ရေး အသိပေးသတင်းထုတ်ပြန်ပြီးဖြစ်သည်။

ထိုကဲ့သို့ သတင်းထုတ်ပြန်ခဲ့ပြီးဖြစ်သော်လည်း ၂၀၂၅ ခုနှစ်၊ ဖေဖော်ဝါရီ ၁၃ ရက်တွင် အသိပေးထုတ်ပြန်ချက်အပေါ် မျက်ကွယ်ပြု၍ နိုင်ငံတော်တည်ငြိမ်အေးချမ်းရေးကို ပျက်ပြားစေရန် ရည်ရွယ်ကာ လူမှုကွန်ရက်စာမျက်နှာပေါ်၌ လှုံ့ဆော်ခြင်း၊ ဝါဒဖြန့်ခြင်းများ ပြုမူလုပ်ဆောင်ခဲ့သည့် “Wai Mar Lwin” Facebook အကောင့်ပိုင်ရှင်ဖြစ်သူ ဧရာတီတိုင်းဒေသကြီး၊ ဘိုကလေးမြို့နယ်၊ အမှတ်(၁)ရပ်ကွက်နေ တိုးတိုးအေး၊ “Tint Naung Mg” Facebook အကောင့်ပိုင်ရှင်ဖြစ်သူ အမှတ်(၄)ရပ်ကွက်နေ တင့်နောင်၊ “May Tha Zin Oo” Facebook အကောင့်ပိုင်ရှင်ဖြစ်သူ အမှတ်(၉) ရပ်ကွက်နေ မေသဇင်တို့ သုံးဦးအား မွန်းလွဲ ၃ နာရီ ၁၀ မိနစ်တွင် ဘိုကလေးမြို့မရဲစခန်း၌ တရားဥပဒေနှင့်အညီ ဖမ်းဆီးထိန်းသိမ်း အမှုဖွင့်လှစ် အရေးယူဆောင်ရွက်ခဲ့ကြောင်း သတင်းရရှိသည်။

Source: www.moha.gov.mm 

အစ္စရေးစစ်တပ်က ဟားမက်စ်လက်နက်ကိုင်အဖွဲ့အနေဖြင့် သတ်မှတ်ထားသည့် ဖေဖော်ဝါရီ ၁၅ ရက်အထိ ဖမ်းဆီးထားသည့် အစ္စရေးဓားစာခံများကို ပြန်မလွှတ်ပေးပါက တိုက်ပွဲများ ပြန်လည်ဖြစ်ပွားဖွယ် ရှိနေသည့်အတွက် အရန်တပ်ဖွဲ့ဝင်များ ပြန်လည်ခေါ်ယူသွားမည်ဖြစ်ကြောင်း ထုတ်ဖော်ပြောဆိုလိုက်သည်။

အစ္စရေးနှင့် ဟားမက်စ်လက်နက်ကိုင်အဖွဲ့ကြား တစ်လနီးပါးကြာ အပစ်အခတ်ရပ်စဲရေးရယူနိုင်ခဲ့သော်လည်း လက်ရှိအချိန်တွင် ဟားမက်စ် အဖွဲ့က ဖမ်းဆီးထားသည့် အစ္စရေးဓားစာခံများကို ပြန်လွှတ်ပေးရန် နှောင့်နှေးနေကြောင်း သိရသည်။

အစ္စရေးနှင့်ဟားမက်စ်တို့သည် ဇန်နဝါရီ ၁၉ ရက်တွင် ယာယီအပစ်ခတ် ရပ်စဲရေးရယူနိုင်ခဲ့ပြီး ဖမ်းဆီးထားသူများပြန်လွှတ်ပေးရန် သဘောတူညီမှု ရရှိထားကြောင်းသိရသည်။ 

အစ္စရေးဝန်ကြီးချုပ် နေတန်ရာဟုကလည်း ဟားမက်စ်အဖွဲ့သည် ဖမ်းဆီးထားသူများကို အမြန်ဆုံးပြန်လွှတ်မပေးပါက တိုက်ပွဲများ ပြန်လည်ဖြစ် ပွားဖွယ်ရှိနေကြောင်း ပြီးခဲ့သည့်ရက်ပိုင်းတွင် သတိပေးခဲ့သည်။ ဟားမက်စ် အဖွဲ့က ၎င်းတို့သည် အပစ်အခတ်ရပ်စဲရေး သဘောတူညီချက်ကတိကို ဆက်လက်ထိန်းသိမ်းမည်ဖြစ်သော်လည်း ဖမ်းဆီးထားသူများကို ပြန်လွှတ်ပေးမည်ဆိုသောအချက်ကို အတိအကျပြောဆိုခြင်းမျိုး မရှိသေးကြောင်း သိရသည်။

အစ္စရေးနှင့် ဟားမက်စ်လက်နက်ကိုင်အဖွဲ့ကြား ယာယီ အပစ်အခတ် ရပ်စဲရေးရရှိခဲ့ပြီးနောက် နေရပ်စွန့်ခွာသူများသည် ဂါဇာဒေသသို့ ပြန်လာနေချိန်တွင် တိုက်ပွဲများ တစ်ကျော့ပြန်ထပ်မံဖြစ်ပွားမည်ဆိုလျှင် ပါလက်စတိုင်းလူမျိုးများ ပိုမိုထိခိုက်ရဖွယ်ရှိနေကြောင်း သိရသည်။

ဟားမက်စ်လက်နက်ကိုင်အဖွဲ့သည် ၂၀၂၃ ခုနှစ်၊ အောက်တိုဘာလ အတွင်း အစ္စရေးကို ကြိုတင်ကြေညာခြင်းမရှိဘဲ တိုက်ခိုက်ခဲ့ပြီး အစ္စရေး နိုင်ငံသားများကိုဖမ်းဆီးခဲ့ရာ ဂါဇာဒေသတွင် တိုက်ပွဲများ ဖြစ်လာခဲ့ပြီး ဂါဇာစစ်ပွဲ ၁၅ လကာလအတွင်း အနည်းဆုံး လူပေါင်း ၅ သောင်း နီးပါး သေဆုံးခဲ့ကာ လူပေါင်းသန်းချီ၍ နေရပ်စွန့်ခွာခဲ့ရကြောင်း သိရသည်။

ကိုးကား-NP News

တောင်ကိုရီးယားအစိုးရသည် နိုင်ငံအတွင်း တရုတ်ပိုင် chatbot တစ်ခု ဖြစ်သည့် DeepSeek အသုံးပြုမှုကို ယာယီ ပိတ်ပင်ရန် ဆုံးဖြတ်လိုက်ကြောင်း ကိုယ်ရေးအချက်အလက် ကာကွယ်ရေးကော်မရှင်က ဖေဖော်ဝါရီ ၁၇ ရက်တွင် သတင်းထုတ်ပြန်လိုက်ပါသည်။

 chatbot ဖန်တီးသူများအနေဖြင့် DeepSeek ကို တောင်ကိုရီးယား ဥပဒေနှင့်အညီ လုပ်ဆောင်ချက်ကို အပြောင်းအလဲများပြုလုပ်ပြီးမှသာ အဆိုပါပိတ်ပင်မှုကို ရုတ်သိမ်းသွားမည်ဖြစ်ကြောင်း ပြောကြားထား ပါသည်။

တောင်ကိုရီးယားအာဏာပိုင်များသည် ပြီးခဲ့သည့်လက တရုတ်ဘက်သို့ DeepSeekနှင့်ပတ်သက်၍ တရားဝင်တောင်းဆိုမှုတစ်ခု ကမ်းလှမ်းထားပြီး ကိုယ်ရေးကိုယ်တာ အချက်အလက်များ စုဆောင်းခြင်းအပါအဝင် chatbot ၏ လုပ်ဆောင်ချက်အသေးစိတ်များကို ရှင်းပြရန် တောင်းဆိုခဲ့ခြင်းဖြစ်ကြောင်း ကော်မရှင်က ထောက်ပြထားပါသည်။

တောင်ကိုရီးယား၏ ထိပ်တန်းစွမ်းအင်ကုမ္ပဏီ Korea Hydro & Nuclear Power (KHNP) နှင့် KEPCO KPS တို့မှ ဝန်ထမ်းများ DeepSeek အသုံးပြုခြင်းကို ယခင်ကတည်းက တားမြစ်ခဲ့ပါသည်။

ကိုးကား- TASS

     အာဖဂန်နစ္စတန်နိုင်ငံရှိ ဝန်ကြီးဌာန တစ်ခုအား အသေခံဗုံးခွဲတိုက်ခိုက်ခဲ့ခြင်းသည် ၎င်းတို့၏ လက်ချက်ဖြစ်သည်ဟု IS စစ်သွေးကြွအဖွဲ့က ထုတ်ဖော်ပြောကြားခဲ့ကြောင်း သိရသည်။

IS စစ်သွေးကြွအဖွဲ့မှ အသေခံဗုံးခွဲသူများသည် ကဘူးမြို့တော်ရှိ မြို့ပြဖွံ့ဖြိုး တိုးတက်ရေးနှင့် အိမ်ရာဝန်ကြီးဌာနအတွင်းသို့  ပြီးခဲ့သည့် ရက်သတ္တပတ်အတွင်းက ဝင်ရောက်ရန်ကြိုးပမ်းရာ အစောင့်များက ပစ်ခတ်တိုက်ခိုက်ခဲ့ရာမှ စစ်သွေးကြွများက အသေခံဗုံးခွဲ၍ တိုက်ခိုက်ခဲ့ခြင်းဖြစ်သည်။ ယင်းတိုက်ခိုက်မှုအတွင်း လူတစ်ဦးသေဆုံးပြီး  အနည်းဆုံး  သုံးဦးဒဏ်ရာ ရရှိသွားကြောင်း သိရသည်။

အာဖဂန်နစ္စတန်နိုင်ငံတွင် တာလီဘန်အဖွဲ့ အာဏာရလာပြီးနောက် နိုင်ငံအတွင်း၌   အကြမ်းဖက်မှုများ မြင့်တက်လာပြီး IS  စစ်သွေးကြွအဖွဲ့က  နိုင်ငံအတွင်း၌ ပစ်ခတ်တိုက်ခိုက်မှုနှင့် ဗုံးခွဲတိုက်ခိုက်မှုများ မကြာခဏလုပ်ဆောင်ပြီး   တာလီဘန်အစိုးရ၏ အုပ်ချုပ်မှုကို   စိန်ခေါ်လျက်ရှိသည်။

ထို့ပြင် ဖေဖော်ဝါရီလ ၁၂ ရက်ကလည်း အာဖဂန်နစ္စတန်နိုင်ငံ အတွင်းရှိ ဘဏ်တစ်ခုအား IS စစ်သွေးကြွအဖွဲ့က တိုက်ခိုက်ခဲ့ရာ   အနည်းဆုံး   လူရှစ်ဦး သေဆုံးခဲ့ကြောင်း သိရသည်။

Source: Myawady Web Portal

17 February 2025

     တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍ လည်းကောင်း၊ “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များ အသုံးပြု၍ ရက်စက်စွာ လုပ်ကြံ တိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၁၃ ရက် နံနက် ၁ နာရီတွင် ပဲခူးတိုင်းဒေသကြီး၊ အုတ်တွင်းမြို့နယ်၊ မြေစီးကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦးနှင့် အမျိုးသမီး တစ်ဦးတို့ သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးမြင့်ထွန်း(၄၅)နှစ်နှင့် ဒေါ်ဖြူ(၄၀)နှစ်တို့သည် ၎င်းတို့၏နေအိမ်အသီးသီး၌ ရှိနေစဉ် PDF အမည်ခံ အကြမ်းဖက်သမား လေးဦး(စိစစ်ဆဲ)က ရောက်ရှိလာပြီး သေနတ်ဖြင့် ပစ်ခတ်သတ်ဖြတ်၍ ဒေါ်ဖြူ၏နေအိမ်ရှိ ရွှေလက်ကောက် ၁၀ ကွင်း၊ ရွှေဆွဲကြိုး သုံးကုံး၊ ရွှေနားကပ် တစ်ရံ၊ ငွေကျပ်သိန်း ၃၀၀ နှင့် ဆိုင်ကယ် နှစ်စီးတို့အား လုယက်ယူဆောင်သွားခဲ့သဖြင့် ဦးမြင့်ထွန်းနှင့် ဒေါ်ဖြူတို့တွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
     အလားတူ မွန်းတည့် ၁၂ နာရီတွင် မန္တလေးတိုင်းဒေသကြီး၊ မိတ္ထီလာမြို့နယ်၊ ဝါးရုံစုကျေးရွာအနီး၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေး တပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးကြည်ညွန့်(၇၆)နှစ်သည် ဝါးရုံးစုကျေးရွာမှ ရှမ်းမငယ်ကျေးရွာသို့ ဆိုင်ကယ်ဖြင့် သွားရောက်စဉ် ဝါးရုံစုကျေးရွာအနီးအရောက် PDF အမည်ခံ အကြမ်းဖက်အဖွဲ့ အင်အား(စိစစ်ဆဲ)က သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
     အလားတူ မွန်းလွဲ ၂ နာရီ ၂၀ မိနစ်တွင် မကွေးတိုင်းဒေသကြီး၊ ချောက်မြို့နယ်၊ မကျီးကုန်းကျေးရွာအနီး၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ရာအိမ်မှူး ဦးစတင်း(၄၉)နှစ်သည် ၎င်း၏နေအိမ်၌ရှိနေစဉ် PDF အမည်ခံ အကြမ်းဖက်သမား ၂၀ ဦး(စိစစ်ဆဲ)က ဆိုင်ကယ် ၁၄ စီးဖြင့် ရောက်ရှိလာပြီး ကျေးရွာ၏တောင်ဘက် ငါးဖာလုံခန့်အကွာသို့ ဖမ်းဆီးခေါ်ဆောင်၍ သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဦးစတင်းတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်း ဖြစ်ကြောင်း သိရသည်။
     ထိုသို့ အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm 

17 February 2025

     အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူ သွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၁၃ ရက် မွန်းလွဲ ၃ နာရီ ၅၅ မိနစ်တွင် မကွေးတိုင်းဒေသကြီး၊ ချောက်မြို့နယ်ပြည်သူ့ဆေးရုံသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ချောက်မြို့နယ်၊ ကတောက်ချောင်းကျေးရွာနေ လင်းတကိုင်းကျေးရွာ ကျေးလက်ကျန်းမာရေးဦးစီးဌာနမှ ကြီးကြပ်(၂) ဦးတင်ဌေး(၄၇)နှစ်သည် ကတောက်ချောင်းကျေးရွာမှ ဂွေးပင်လေးကျေးရွာသို့ ဆိုင်ကယ်ဖြင့် သွားရောက်စဉ် ဂွေးပင်လေးကျေးရွာအနောက်မြောက်ဘက် မီတာ ၃၀၀ ခန့်အကွာ အရောက် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံး ပေါက်ကွဲခဲ့မှုကြောင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
     အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm 

17 February 2025

     ၂၀၂၅ ခုနှစ်၊ ဖေဖော်ဝါရီ ၁၃ ရက်က မန္တလေးတိုင်းဒေသကြီး၊ အမရပူရမြို့နယ်၌ ဆိုင်ကယ်နှင့် လက်ကိုင်ဖုန်းခိုးယူသူ မသင်္ကာဖွယ် အမျိုးသား တစ်ဦးအား ဖမ်းဆီးအရေးယူထားကြောင်း သိရသည်။
     ဖြစ်စဉ်မှာ ၂၀၂၅ ခုနှစ်၊ ဖေဖော်ဝါရီ ၁၃ ရက် နံနက် ၈ နာရီ ၃၀ မိနစ်က မန္တလေးတိုင်းဒေသကြီး ရဲတပ်ဖွဲ့မှူးရုံးမှ တပ်ဖွဲ့ဝင်များက နယ်မြေအတွင်းလှည့်ကင်းဆောင်ရွက်နေစဉ် အမရပူရမြို့နယ်၊ စွယ်တော်ကားကွင်းအနီး ၁၄၆ လမ်း၊ ၆၇ လမ်းပေါ်တွင် ပြည်ကြီးတံခွန်မြို့နယ်၊ တံခွန်တိုင်ရပ်ကွက်နေ ရွှေဘုန်းညီ(ခ)ဘုန်းဘုန်း(၂၃)နှစ်အား CANDA WAVE 110 ဆိုင်ကယ်နှင့်အတူ မသင်္ကာဖွယ်တွေ့ရှိသဖြင့် ရပ်တန့်စစ်ဆေးခဲ့ရာ ၎င်းထံမှ Redmi လက်ကိုင်ဖုန်း တစ်လုံးအား တွေ့ရှိပြီး အဆိုပါဆိုင်ကယ်နှင့် လက်ကိုင်ဖုန်းတို့အား ပိုင်ဆိုင်ကြောင်း အထောက်အထားတစ်စုံတစ်ရာ ပြသနိုင်ခြင်းမရှိဘဲ ပြည်ကြီးတံခွန်မြို့နယ်၊ တံခွန်တိုင်ရပ်ကွက်ရှိ နေအိမ် တစ်အိမ်အတွင်းမှ ခိုးယူလာခဲ့ခြင်းဖြစ်ကြောင်း စစ်ဆေးသိရှိရသဖြင့် ရွှေဘုန်းညီ(ခ)ဘုန်းဘုန်းအား ပြည်ကြီးတံခွန်မြို့မရဲစခန်း၌ ဥပဒေနှင့်အညီ အမှုဖွင့်အရေးယူထားကြောင်း သတင်းရရှိသည်။

Source: www.moha.gov.mm 

17 February 2025

     ၂၀၂၅ ခုနှစ်၊ ဖေဖော်ဝါရီ ၁၃ ရက် နံနက် ၉ နာရီ၌  မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည် ကချင်ပြည်နယ်၊ မိုးညှင်းမြို့နယ်၊ ပင်လုံကျေးရွာအုပ်စု၊ နန့်စီးအောင်ကျေးရွာအနီးတွင် TOYOTA NOAH အမျိုးအစား ခရီးသည်တင်မော်တော်ယာဉ်ကို ရပ်တန့်စစ်ဆေးရှာဖွေရာ ယာဉ်ပေါ်ပါခရီးသည် ဒေါ်သူဇာဝင်း သယ်ဆောင်လာသည့် ဘိန်းဖြူ ၁ ဒသမ ၁ ကီလို (တစ်ကီလိုလျှင် ၂၅၀ သိန်းနှုန်းဖြင့် ၎င်းဒေသတန်ဖိုးငွေ ၂၇၅ သိန်း) သိမ်းဆည်းရမိခဲ့သဖြင့် ဒေါ်သူဇာဝင်း (၅၃)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm 
 

17 February 2025

၂၀၂၅ ခုနှစ်၊ ဖေဖော်ဝါရီ ၁၂ ရက် မွန်းလွဲ ၁ နာရီ ၃၀ မိနစ်၌   မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည် ရှမ်းပြည်နယ်၊ မိုင်းဆတ်မြို့နယ်၊ မဟုန်လွယ်ကျေးရွာအုပ်စု၊ မဟုန်လွယ်ကျေးရွာအနီးတွင် အောင်ကျော်စိုး(ခ)အားကျိန်န မောင်းနှင်လာသည့် HONDA CRV အမျိုးအစား မော်တော်ယာဉ်ကို ရပ်တန့်စစ်ဆေးရှာဖွေရာ ယာဉ်ပေါ်မှ စိတ်ကြွရူးသွပ်ဆေးမှုန့် ၉၃ ကီလို (တစ်ကီလိုလျှင် ၄၀ သိန်းနှုန်းဖြင့် ၎င်းဒေသတန်ဖိုးငွေ ၃,၇၂၀ သိန်း) သိမ်းဆည်းရမိခဲ့သဖြင့် အောင်ကျော်စိုး (ခ)အားကျိန်န(၅၃)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm 

17 February 2025

    ၂၀၂၅ ခုနှစ်၊ ဖေဖော်ဝါရီ ၁၃ ရက် နံနက် ၉ နာရီ ၃၀ မိနစ်၌ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည် ရှမ်းပြည်နယ်၊ တာချီလိတ်မြို့၊ ပါဆတ်ရပ်ကွက်တွင် လီထေ့(ခ)လီထောင်း မောင်းနှင်လာသည့် မော်တော်ဆိုင်ကယ်ကို ရပ်တန့်စစ်ဆေးရှာဖွေရာ ၎င်းလွယ်ထားသည့် လွယ်အိတ်အတွင်းမှ စိတ်ကြွရူးသွပ်ဆေးပြား ၁၀,၀၀၀ ပြား (တစ်ပြားလျှင် ၇၀၀ ကျပ် နှုန်းဖြင့် ၎င်းဒေသတန်ဖိုးငွေ ၇၀ သိန်း) သိမ်းဆည်းရမိခဲ့သဖြင့် လီထေ့(ခ)လီထောင်းအား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm