တံတားဦး ၊ ဇွန် - ၂၅
၂၀၂၅ ခုနှစ် ဇွန်လ (၂၆) ရက်နေ့တွင် ကျရောက်မည့် အပြည်ပြည်ဆိုင်ရာမူးယစ်ဆေးဝါး အလွဲသုံးမှုနှင့် တရားမဝင် ရောင်းဝယ်မှု တိုက်ဖျက်ရေးနေ့အထိမ်းအမှတ် လက်ကမ်းစာစောင်များကို မန္တလေးတိုင်းဒေသကြီး၊ တံတားဦး မြို့နယ်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဝန်ထမ်းများက အခြေခံပညာ အထက်တန်းကျောင်း နှင့် မြို့မအခြေခံပညာအလယ်တန်းကျောင်းတို့ ကျောင်းသား/သူများအား လက်ဝယ်အရောက် ဖြန့်ဝေပေးကြောင်း သိရသည် ။
ကျောက်ဆည်၊ ဇွန်-၂၅
မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့ အထွေထွေရောဂါကုပြည်သူ့ဆေးရုံကြီးနှင့် မြို့ပေါ်ရပ်ကွက်များ၊ ရေထိန်းဆည်ရေထိန်းချုပ်ခန်း ရေဝင်ရောက်မှုမရှိစေရေး ဇော်ဂျီရေထိန်းဆည် ရေကာနံရံ များအား ၂၀၂၅-၂၀၂၆ ခုဘဏ္ဍာနှစ်တွင် မြို့နယ်ဆည်မြောင်းနှင့်ရေအသုံးချမှုစီမံခန့်ခွဲ့ရေးဦးစီးဌာနမှ ပြန်လည် ပြုပြင်ပေးလျက်ရှိကြောင်း သိရသည်။
ကျောက်ဆည်မြို့နယ် ၊ ဇွန်-၂၆
မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်၊ မြစ်သားမြို့နယ်၊ စဉ့်ကိုင်မြို့နယ်၊ တံတာဦး မြို့နယ်များရှိတောင်သူများ ဝါသီးနှံပန်းတိုင်အထွက်နှုန်းရရှိရေး တောင်သူပညာပေးကွင်းသရုပ်ပြပွဲကို ယမန့်နေ့ နံနက်ပိုင်းက ကျောက်ဆည်မြို့နယ် ဝါသီးနှံသုတေသနနှင့်နည်းပညာဖွံ့ဖြိုးရေးခြံ(လွန်ကျော်)၌ ကျင်းပ ပြုလုပ် ခဲ့ကြောင်း သိရသည်။
ကျောက်ဆည်၊ဇွန်-၂၅
မန္တလေးတိုင်းဒေသကြီး၊ ကျောက်ဆည်ခရိုင်လူထုအခြေပြုဗဟိုဌာနတွင် ခရိုင်ပြန်ကြားရေးနှင့် ပြည်သူ့ ဆက်ဆံရေး ဦးစီးဌာနနှင့် အခြေခံပညာဦးစီးဌာနတို့ပူးပေါင်း၍ ကျောင်းသား/ကျောင်းသူများ အရေးစွမ်းရည် မြင့်မားပြီး ဘက်စုံဖွံ့ဖြိုးတိုးတက်စေရန် စာစီစာကုံးရေးသားနည်းသင်တန်းကို ဇွန်(၂၅)ရက်နံနက်(၉)နာရီ အခမဲ့ သင်ကြားပေးလျက် ရှိကြောင်း သိရသည်။
ရုရှားနိုင်ငံပိုင် ကာကွယ်ရေးလုပ်ငန်းအဖွဲ့ကြီး Rostec က အလွန် အားကောင်းသော လေဆာရောင်ခြည်ကိုအသုံးပြု၍ မပေါက်ကွဲသေးသောခဲယမ်းများကို ဖျက်ဆီးရန်အတွက် အဝေးထိန်းစနစ်ဖြင့် ထိန်းချုပ်မောင်းနှင်နိုင်သည့် စက်ရုပ်၏ရှေ့ပြေးပုံစံကို ထုတ်ဖော်ပြသခဲ့သည်။ အဆိုပါ စနစ်ကို ရုရှား၏ Tula ဒေသ၌ ကျင်းပသော စက်မှုအင်ဂျင်နီယာပြပွဲတွင် ပြသခဲ့ပြီး Rostec မှ အင်္ဂါနေ့ (ဇွန် ၂၄) တွင် အသေးစိတ်ဖော်ပြ မိတ်ဆက်ခဲ့သည်။
TikTok သည် ကင်ညာနိုင်ငံတွင် မှားယွင်းသော သို့မဟုတ် လှည့်ဖြားသော အကြောင်းအရာများ ဖြန့်ဝေသည့် အဓိကရင်းမြစ်အဖြစ် ရပ်တည် နေကြောင်း တနင်္လာနေ့ (ဇွန် ၂၃) တွင် ထုတ်ပြန်ခဲ့သည့် Reuters Institute Digital News Report 2025 တွင် ဖော်ပြထားသည်။
၂၀၂၅ ခုနှစ် ဖေဖော်ဝါရီမှ မေလအတွင်း အွန်လိုင်းမှတစ်ဆင့် ကင်ညာ နိုင်ငံသား ၂,၀၀၇ ဦးအား ပြုလုပ်ခဲ့သည့် အဆိုပါသုတေသနတွင် ၂၀၂၇ ခုနှစ်တွင်ကျင်းပမည့် သမ္မတရွေးကောက်ပွဲမတိုင်မီ လူမှုမီဒီယာ၏ အခန်း ကဏ္ဍ တိုးမြင့်လာနေသည့်အခြေအနေကို မီးမောင်းထိုးပြထားသည်။
ရုရှား၏ နိုင်ငံပိုင် လျှပ်စစ်ဓာတ်အားတင်ပို့ရေးကုမ္ပဏီ Inter RAO ၏ ခန့်မှန်းချက်အရ ၂၀၂၅ ခုနှစ် ပထမနှစ်ဝက်အတွင်း တရုတ်သို့ လျှပ်စစ် ဓာတ်အား တင်ပို့မှုမှာ ယခင်နှစ်နှင့် နှိုင်းယှဉ်ပါက ကြီးမားစွာ ကျဆင်း သွားခဲ့သည်။ အဆိုပါကျဆင်းမှုသည် ရုရှား၏အရှေ့ဖျားဒေသတွင် လျှပ်စစ် အသုံးပြုမှု တိုးမြင့်လာခြင်းကြောင့် ပြည်တွင်း လိုအပ်ချက်များအတွက် ကန့်သတ်မှုများ ချမှတ်ရခြင်းနှင့် ဆက်စပ်နေသည်။
ဟန်ဂေရီဝန်ကြီးချုပ် ဗစ်တာ အော်ဘန်က အမေရိကန်အပါအဝင် NATO အဖွဲ့ဝင်အချို့နိုင်ငံများသည် နယ်သာလန်နိုင်ငံ သည်ဟိတ်မြို့တွင် ကျင်းပလျက်ရှိသည့် အရေးပါသော ထိပ်သီးအစည်းအဝေးတွင် ယူကရိန်း ခေါင်းဆောင် ဗလာဒီမီယာ ဇီလန်စကီးနှင့် တွေ့ဆုံရန် တမင်တကာ ရှောင်ဖယ်နေကြောင်း ထုတ်ဖော်ပြောကြားခဲ့သည်။
မော်စကိုနှင့် ကိယက်ဗ်တို့သည် လက်ရှိအချိန်တွင် ယခင်သဘောတူညီချက်များ၏ လူသားချင်းစာနာထောက်ထားရေးဆိုင်ရာ အစိတ်အပိုင်းကို အပြည့်အဝအကောင်အထည်ဖော်ရန် ကြိုးပမ်းနေသောကြောင့် ၎င်းတို့၏ ငြိမ်းချမ်းရေးလမ်းညွှန်ချက်များနှင့်ပတ်သက်၍ လက်ရှိတွင် ညှိနှိုင်းဆွေးနွေးမှုများ မရှိသေးကြောင်း ကရင်မလင် ပြောရေးဆိုခွင့်ရှိသူ Dmitry Peskov က ပြောကြားခဲ့သည်။
ဒတ်ချ်ဘုရင် ဝီလီယမ်-အလက်ဇန်းဒါးနှင့် ဘုရင်မ မက်ဆီမားတို့သည် ယနေ့ဟိတ်မြို့တွင် ကျင်းပသည့် နေတိုးထိပ်သီးအစည်းအဝေးသို့ နိုင်ငံ ပေါင်း ၃၂ နိုင်ငံမှ ခေါင်းဆောင်များအား ရိုးရာဓလေ့အရ ကြိုဆိုခဲ့သည်။
NYPost သတင်းစာက ၅၄ နှစ်အရွယ် ဘုရင်မ မက်ဆီမားအား အစိမ်းရောင် ဝတ်စုံနှင့် တောက်ပသော အပြုံးတို့ဖြင့် "ကမ္ဘာ့အစွမ်းထက်ဆုံး ခေါင်းဆောင် အချို့ထက် ပိုမိုထင်ရှားစေခဲ့သည်" ဟု မှတ်ချက်ပြုခဲ့သည်။