အစ္စရေးကာကွယ်ရေးဝန်ကြီး အစ္စရေးကတ်ဇ်က အီရန်ဗဟိုဘဏ်နှင့် အခြားအဖွဲ့အစည်းများကို အကြမ်းဖက်အဖွဲ့အစည်းများအဖြစ် သတ်မှတ်သည့် အမိန့်ကို လက်မှတ်ရေးထိုးခဲ့သည်။

အစ္စရေးထောက်လှမ်းရေးဌာန၏ တောင်းဆိုချက်အရ ကတ်ဇ်က အခြား အီရန်ဘဏ်နှစ်ခု၊ အီရန်လက်နက်ကိုင်တပ်ဖွဲ့များနှင့် ချိတ်ဆက်နေသည့် ကုမ္ပဏီတစ်ခုနှင့် ၎င်း၏ အကြီးတန်းအရာရှိသုံးဦးကိုလည်း အကြမ်းဖက် အဖွဲ့များနှင့် အကြမ်းဖက်လုပ်ဆောင်သူများအဖြစ် သတ်မှတ်ခဲ့သည်။

အီရန်၏နိုင်ငံခြားရေးဝန်ကြီး အဘတ်စ် အာရက်ချီက အမေရိကန်နှင့် အစ္စရေးတို့၏ အဏုမြူစက်ရုံများကို တိုက်ခိုက်မှုများနောက်ပိုင်းတွင် အဏုမြူလက်နက်မပြန့်ပွားရေး အဓိကစာချုပ် (NPT) အဖွဲ့ဝင်အဖြစ်မှ ပြန်လည်စဉ်းစားနိုင်ကြောင်း အရိပ်အမြွက် ပြောကြားလိုက်သည်။

“မိမိတို့၏အဏုမြူစက်ရုံများကို တိုက်ခိုက်မှုသည် အီရန်၏ အနာဂတ်လမ်းကြောင်းအပေါ် ကြီးမားသောသက်ရောက်မှုရှိမည်” ဟု ၎င်းက ကာတာသတင်းဌာန Al Araby Al Jadeed သို့ ပြောကြားခဲ့သည်။

စကော့တလန် အနောက်ဘက်ကမ်းရိုးတန်းအနီးတွင် တည်ရှိသော ရှူးနားကျွန်း (Shuna Island) ကို ပျက်စီးနေသည့် ရဲတိုက်ဟောင်းနှင့်အတူ ပေါင် ၅.၅ သန်း (အမေရိကန်ဒေါ်လာ ၇.၄၈ သန်း) ဖြင့် ရောင်းချ လိုက်ပါသည်။

အိမ်ခြံမြေအကျိုးဆောင်ကုမ္ပဏီ Knight Frank နှင့် Sotheby’s International Realty တို့၏ ကြော်ငြာအရ အဆိုပါကျွန်းကို နှစ် ၈၀ အတွင်း ပထမဆုံးအကြိမ် ရောင်းချခြင်းဖြစ်သည်။

မက္ကဆီကိုသို့ ကားအသစ်များ ပို့ဆောင်နေသော ကုန်တင်သင်္ဘော တစ်စီးသည် သင်္ဘောပေါ်တွင် မီးလောင်မှုဖြစ်ပွားပြီး မီးငြှိမ်းသတ်၍မ ရသည့်အတွက် သင်္ဘောသားများ သင်္ဘောစွန့်ခွာထွက်ပြေးခဲ့ရကာ ရက် သတ္တပတ်အတန်ကြာပြီးနောက် မြောက်ပစိဖိတ်သမုဒ္ဒရာတွင် နစ်မြုပ် သွားခဲ့သည်။

အဆိုပါ "Morning Midas" သင်္ဘောသည် အလာစကာပြည်နယ်ရှိ အလူရှီယန်ကျွန်းစုများအနီး အပြည်ပြည်ဆိုင်ရာရေပိုင်နက်အတွင်းတနင်္လာနေ့ (ဇွန် ၂၃) က နစ်မြုပ်သွားခဲ့ကြောင်း လန်ဒန်အခြေစိုက် Zodiac Maritime သင်္ဘောစီမံခန့်ခွဲမှုကုမ္ပဏီက ထုတ်ပြန်ချက်တွင် ဖော်ပြ ထားသည်။ 

ယူကရိန်းအရာရှိများ၏ ဖော်ပြချက်အရ ရုရှားတပ်များ၏ တိုက်ခိုက်မှု များကြောင့် တနင်္လာနှင့် အင်္ဂါနေ့ (ဇွန် ၂၃ ၊ ၂၄) တို့တွင် ၄၈ နာရီအတွင်း ယူကရိန်းနိုင်ငံသား အရပ်သားဒါဇင်ချီ၍ သေဆုံးခဲ့ပြီး လပေါင်း များစွာ အတွင်း အသေအပျောက်အများဆုံး နေ့ရက်များဖြစ်ခဲ့သည်။

ရုရှား၏တိုက်ခိုက်မှုများတွင် သေဆုံးခဲ့သူများထဲ၌ အသက် ၅ နှစ်အရွယ် ကလေးနှင့် အသက် ၁၁ နှစ်အရွယ်မိန်းကလေးတစ်ဦးလည်း ပါဝင်နေပြီး ယင်းတိုက်ခိုက်မှုများကို ယူကရိန်း၏မဟာမိတ်များ နယ်သာလန်နိုင်ငံတွင် NATO ထိပ်သီး အစည်းအဝေးအတွက် ရောက်ရှိနေချိန် လုပ်ဆောင် ခဲ့ခြင်း ဖြစ်သည်။

UK သည် နျူကလီယားလက်နက်သယ်ဆောင်နိုင်သည့် F-35A တိုက်လေယာဉ် ၁၂ စီးကို အမေရိကန်ထံမှ ဝယ်ယူရန် စီစဉ်နေပါသည်။

ဗြိတိန်ဝန်ကြီးချုပ် ကီယာစတာမာသည် ဗုဒ္ဓဟူးနေ့ (ဇွန် ၂၅) တွင် ကျင်းပမည့် NATO အစည်းအဝေးတွင် အဆိုပါကြေညာချက်ကို ပြုလုပ်မည်ဖြစ်ပြီး NATO အဖွဲ့ဝင်နိုင်ငံများအား မဟာမိတ်အဖွဲ့အတွက် ပိုမို ပံ့ပိုးကူညီရန် တိုက်တွန်းမည်ဖြစ်သည်။

NATO အကြီးအကဲ Mark Rutte က အီရန်ကို အမေရိကန်တို့၏ တိုက်ခိုက်မှုအတွက် ချီးကျူးစကားကို ပြန်မရုပ်သိမ်းဟု ဆိုပါသည်။ 

NATO အတွင်းရေးမှူးချုပ် Rutte က အီရန်တိုက်ခိုက်မှုတွင် ဆုံးဖြတ်ချက်ချမှတ်ပြီး လုပ်ဆောင်နိုင်ခဲ့သည့် အမေရိကန်သမ္မတ ဒေါ်နယ်ထရမ့်ကို ချီးကျူးစကား ပြောကြားခဲ့သည်။

ထရမ့်က ဆိုရှယ်မီဒီယာတွင် ဖော်ပြထားသည့် ပို့စ်၌ Rutte က အမေရိကန်၏ အီရန်အပေါ်တိုက်ခိုက်မှုကို “အလွန်ထူးခြားသော လုပ်ဆောင်မှု” ဟု ချီးကျူးခဲ့ခြင်းဖြစ်သည်။

အမေရိကန်သမ္မတ ဒေါ်နယ်ထရမ့်က ယူကရိန်း၏ ရန်လိုမှုများကို အဆုံးသတ်နိုင်မည့် ရုရှားနှင့် သဘောတူညီမှုတစ်ရပ် ရရှိစေလိုကြောင်း ပြောကြားခဲ့သည်။

အင်္ဂါနေ့ (ဇွန် ၂၄) မွန်းတည့်ပိုင်းက နယ်သာလန်နိုင်ငံ၊ သည်ဟိတ် မြို့တွင် ကျင်းပမည့် NATO အစည်းအဝေးသို့ သွားရောက်စဉ် Air Force One လေယာဉ်ပေါ်၌ သတင်းထောက်များနှင့် ရှင်းလင်းစဉ် ပြောကြား ခဲ့ခြင်း ဖြစ်သည်။

ရုရှားနိုင်ငံဆိုင်ရာ ကုလသမဂ္ဂသံတမန် Vassily Nebenzia က အမေရိကန်နှင့် အစ္စရေးတို့သည် အီရန်၏နျူကလီးယား အစီအစဉ်နှင့်ပတ်သက်၍ မှားယွင်းသောသတင်းများကို ဖြန့်ဝေကာ တိုက်ခိုက်ရန် အကြောင်းပြချက်အဖြစ် အသုံးပြုခဲ့သည်ဟု ပြောကြားခဲ့သည်။

မကြာသေးမီက ကုလသမဂ္ဂလုံခြုံရေးကောင်စီ အစည်းအဝေး၌ ပြောကြား ရာတွင် ၎င်းသံတမန်က အီရန်၏နျူကလီးယားစက်ရုံများကို တိုက်ခိုက်မှုများသည် အပြည်ပြည်ဆိုင်ရာဥပဒေအရ တရားမဝင်ကြောင်း ရှုတ်ချခဲ့ပြီး ယင်းတို့သည် ရေဒီယိုသတ္တိကြွညစ်ညမ်းမှု၏ လက်တွေ့ ခြိမ်းခြောက်မှုကို ဖန်တီးခဲ့သည်ဟု ဆိုခဲ့သည်။

သမ္မတ ဗလာဒီမာ ပူတင်က ယူကရိန်းပဋိပက္ခကြောင့် ရုရှားဈေးကွက်မှ ထွက်ခွာသွားခဲ့သော နိုင်ငံခြားကုမ္ပဏီများ ပြန်လည်ဝင်ရောက်ရန်အတွက် အခြေခံအဆောက်အအုံများ ပြင်ဆင်ရန် ရုရှားအစိုးရအား ညွှန်ကြားခဲ့သည်။