ကျောက်ဆည်၊ ဇူလိုင်-၁၁

မန္တလေးတိုင်းဒေသကြီး၊ ကျောက်ဆည်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတွင် ကျောက်ဆည် ခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနတို့နှင့်ပူးပေါင်းကာ ယမန်နေ့မွန်းလွဲ(၂)နာရီက ခရိုင်လူထုအခြေပြု ဗဟိုဌာနတွင် သဘာဝဘေးအန္တရာယ်ကာကွယ်ရေး အသိပညာပေးဟောပြောပွဲ ကျင်းပပြုလုပ်ခဲ့ပြီး လက်ကမ်း စာစောင်များ ဖြန့်ဝေခဲ့ကြောင်းသိရသည်။

အသိပညာပေးဟောပြောပွဲတွင် ကျောက်ဆည်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ လက်ထောက် ညွှန်ကြားရေးမှူး ဒေါ်တင်တင်ထွေးက ရေဘေးအတွက်ကြိုတင် ပြင်ဆင်ရန်အချက်များ၊ ငလျင်ဘေးအတွက် ကြိုတင်ပြင်ဆင်ရန်အချက်များကို ဟောပြောခဲ့ပြီး ကျောက်ဆည်ခရိုင်ဘေးအန္တရာယ်စီမံခန့်ခွဲမှုဦးစီးဌာနမှ လက်ထောက်ညွှန်ကြားရေးမှူး ဒေါ်စန်းစန်းဝင်းက  မြေပြိုခြင်းအတွက် ကြိုတင်ပြင်ဆင်ရန်အချက်များ၊ မြေပြိုမှု ဖြစ်ပေါ်နေချိန်တွင်ပြုလုပ်ရန်အချက်များ၊ မြေပြိုမှုဖြစ်ပေါ်ပြီးချိန်တွင် ပြင်ဆင်ရန်အချက်များ၊ လေပြင်းဘေး အတွက် ကြိုတင်ပြင်ဆင်ရန်အချက်များ၊ လေပြင်းဘေး သတိပေးချက်ရလျှင် ဆောင်ရွက်ရန်အချက်များ၊ လေပြင်းဖြစ်ပေါ်နေစဉ်အတွင်းလိုက်နာရန်အချက်များ၊ ရှောင်ရှားရမည့်အချက်များနှင့် လေပြင်းတိုက်ခိုက်ပြီးနောက် ဆောင်ရွက်ရန်အချက်များအား အသိပညာပေးဟောပြောခဲ့ပြီး ကျောင်းသား/သူများက ကျောက်ဆည်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခင်းကျင်းပြသထားသည့် သုတ၊ ရသ စာအုပ်စာစောင်များ စိတ်ဝင်စားစွာ ဖတ်ရှု့လေ့လာခဲ့ကြပြီး လေပြင်းဘေး၊ မုန်တိုင်းဘေး၊ ငလျင်ဘေး၊ မြေပြိုဘေး အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သိရသည်။ 

သက်မောင်(ကျောက်ဆည်)

ယနေ့မြန်မာစံတော်ချိန် ၀၆ : ၃၀ နာရီအချိန် တိုင်းထွာချက်အရ သံလွင်မြစ်ရေသည် ဘားအံမြို့တွင် ယင်းမြို့၏ စိုးရိမ်ရေမှတ်အောက် ၁ပေခွဲကျော်တွင် ရောက်ရှိနေပါသည်။ အဆိုပါ မြစ်ရေသည် နောက် ၃၆ နာရီအတွင်း ယင်းမြို့၏ စိုးရိမ်ရေအမှတ်သို့ ရောက်ရှိနိုင်ပါသည်။

သို့ဖြစ်ပါ၍ ဘားအံမြို့နယ်အတွင်းရှိ မြစ်ကမ်းအနီးနှင့် မြေနိမ့်ပိုင်း နေထိုင်သူများအနေဖြင့် ကြိုတင်သတိပြုနိုင်ပါရန်နှင့် မြစ်ရေမြင့်တက်လာပါက အချိန်မီ‌ ရှောင်ရှားနိုင်ပါရန် သတိပေးနှိုးဆော်အပ်ပါသည်။

မိုး/ဇလ

ရန်ကုန်-မန္တလေးအမြန်လမ်းမကြီးတွင် (၆) လအတွင်း ယာဉ်မတော်တဆမှုပေါင်း (၉၄) ခု ဖြစ်ပွားခဲ့ကြောင်း အမြန်လမ်းရဲတပ်ဖွဲ့မှူးရုံးမှ သိရသည်။

၂၀၂၅ ခုနှစ် ဇန်နဝါရီလမှ ဇွန်လအထိ အမြန်လမ်းမကြီးတစ်လျှောက်တွင် ယာဉ်မတော်တဆမှုပေါင်း (၉၄) ခု ဖြစ်ပွားခဲ့ကာ အမျိုးသား (၁၁၉) ဦး၊ အမျိုးသမီး (၁၀၀) ဦး ထိခိုက်ဒဏ်ရာရရှိခဲ့ပြီး ပျက်စီးဆုံးရှုံးမှု တန်ဖိုးအနေဖြင့် သိန်းပေါင်း(၄၀၀၀) ကျော် ပျက်စီးဆုံးရှုံးခဲ့ကြောင်း သိရသည်။

ဖြစ်ပွားခဲ့သည့် ယာဉ်မတော်တဆမှု ဖြစ်စဉ်အများစုသည် မဆင်မခြင် အရှိန်ပြင်းမောင်းနှင်မှုကြောင့် ပိုများကြောင်း သိရသည်။

ရန်ကုန်- မန္တလေး အမြန်လမ်းမကြီးတစ်လျှောက်တွင် ယာဉ်အန္တရာယ်၊ လမ်းအန္တရာယ်ကင်းရှင်းစေရန် သတ်မှတ်အရှိန်နှုန်းထက် ကျော်လွန်မောင်းနှင်သည့် မော်တော်ယာဉ်များကို အမြန်လမ်းမကြီး ရဲတပ်ဖွဲ့က အရှိန်နှုန်းတိုင်းတာစက်များဖြင့် တိုင်းတာစစ်ဆေး အရေးယူနေကြောင်း သိရသည်။

Popular Myanmar

ယနေ့မြန်မာစံတော်ချိန် ၁၂း၃၀ နာရီအချိန် တိုင်းထွာချက်အရ ချင်းတွင်းမြစ်ရေသည် မုံရွာမြို့တွင် ယင်းမြို့၏ စိုးရိမ်ရေမှတ်သို့ ရောက်ရှိနေပြီး နောက် ၁ ရက်အတွင်း ၁ ပေခန့် မြင့်တက်လာနိုင်ကာ ယင်းမြို့၏ စိုးရိမ်ရေအမှတ်အထက် ဆက်လက်တည်ရှိနိုင်ပါသည်။

သို့ဖြစ်ပါ၍ မုံရွာမြို့နယ်အတွင်းရှိ မြစ်ကမ်းအနီးနှင့် မြေနိမ့်ပိုင်း နေထိုင်သူများအနေဖြင့် ရေဘေးလွတ်ရာနေရာများသို့ ရှောင်ရှားနိုင်ပါရန် သတိပေးနှိုးဆော်အပ်ပါသည်။

မိုး/ဇလ

ကျောက်ဆည်၊ ဇူလိုင် - ၁၀

လိုင်စင်မဲ့မော်တော်ယာဉ်များနှင့် မော်တော်ဆိုင်ကယ်များ စီးနင်းသွားလာမှု ရှိ/မရှိ စစ်ဆေးခြင်းကို ကျောက်ဆည် မြို့နယ်အတွင်း မြို့ဝင်/မြို့ထွက်နေရာများနှင့် လမ်းဆုံလမ်းခွများတွင် ယနေ့နံနက် (၉) နာရီက စစ်ဆေးခြင်းများ ဆောင်ရွက်လျက်ရှိကြောင်း သိရသည်။

ထို့သို့စစ်ဆေးရာတွင် ကျောက်ဆည်မြို့နယ် လုံခြုံရေးအရာရှိ ဗိုလ်မှူး ဟိန်းကိုကိုလတ်နှင့် တပ်ဖွဲ့ဝင်များ၊ ကျောက်ဆည်မြို့နယ်ရဲတပ်ဖွဲ့မှ ဒုရဲမှူး ရွှေစင်ဝင်းနှင့်တပ်ဖွဲ့ဝင်များ၊ အမှတ်(၉၂)ယာဉ်ထိန်းရဲတပ်ဖွဲ့စုမှ ရဲအုပ် မိုးကျော်စိုးနှင့်တပ်ဖွဲ့ဝင်များ၊ သက်ဆိုင်ရာ ဌာနဆိုင်ရာအဖွဲ့အစည်းများနှင့် ရပ်ကွက်/ ကျေးရွာအုပ်ချုပ်ရေးမှူး များ ပူးပေါင်း၍ကျောက်ဆည်မြို့နယ်အတွင်း မောင်တော်ယာဉ်လိုင်စင်၊  ယာဉ်မောင်းလိုင်စင်နှင့် သတ်မှတ် ထားသည့် စည်းကမ်းချက်များပြည့်စုံမှု ရှိ/မရှိ စစ်ဆေးဆောင်ရွက်ခြင်းများ ဆောင်ရွက်လျက်ရှိ‌ကြောင်း သိရသည်။

ပေးပို့သူ- အောင်ပိုင်ပိုင်ကျော်(ကျောက်ဆည်)

ရန်ကုန် ဇူလိုင် ၈

တက္ကသိုလ်တွင်း စိမ်းလန်းစိုပြည်ရေးအတွက် မိုးရာသီသစ်ပင် စိုက်ပျိုးပွဲအခမ်းအနားကို ယမန်နေ့ ညနေပိုင်းက နိုင်ငံ့ဝန်ထမ်းတက္ကသိုလ် (အောက်မြန်မာပြည်) ၌ ကျင်းပရာ ပြည်ထောင်စုရာထူးဝန်အဖွဲ့ အဖွဲ့ဝင် ဦးစိုးတင့် တက်ရောက်သည်။

အခမ်းအနားတွင် ပြည်ထောင်စုရာထူးဝန်အဖွဲ့ အဖွဲ့ဝင် ဦးစိုးတင့်က အမှာစကားပြောကြားပြီး ပါမောက္ခချုပ်နှင့် သင်တန်းသား၊ သင်တန်းသူ၊ ကိုယ်စားလှယ် များကို ပျိုးပင်များပေးအပ်၍ အဖွဲ့ဝင် ဦးစိုးတင့်က မဟော်ဂနီပျိုးပင်ကို ဦးဆောင်စိုက်ပျိုးပေးသည်။ အဆိုပါ မိုးရာသီသစ်ပင်စိုက်ပျိုးပွဲသို့ နိုင်ငံ့ဝန်ထမ်းတက္ကသိုလ် (အောက်မြန်မာပြည်) မှ ပါမောက္ခချုပ်နှင့် ဒုတိယပါမောက္ခချုပ်များ၊ ဌာနကြီးမှူးများ၊ ပါမောက္ခ (ပညာဌာနမှူး) များ၊ အရာထမ်း၊ အမှုထမ်းများ၊ သင်တန်းသား သင်တန်းသူများ တက်ရောက်ကာ ကျွန်းပင် ၁၀၀၊ ပျဉ်းကတိုးပင် ၁၂၅ ပင်၊ ပိတောက်ပင် ၁၀ ပင်၊ မဟော်ဂနီ ၂၅ ပင်နှင့် မန်ဂျန်ရှား ၉၄၀ စုစုပေါင်း ပျိုးပင် ၁၂၀၀ ကို စုပေါင်းစိုက်ပျိုးခဲ့ကြကြောင်း သိရသည်။

MOI

ကျောက်ဆည်၊ ဇူလိုင်-၁၀

မန္တလေးတိုင်းဒေသကြီး၊ ကျောက်ဆည်ခရိုင် ကျေးလက်လမ်းဖွံ့ဖြိုးရေးဦးစီးဌာနမှ ကျေးလက်နေ ပြည်သူများ၏ ပညာရေး၊ ကျန်းမာရေး၊ လူမှုစီးပွားဘဝဖွံ့ဖြိုးတိုးတက်ရေး၊ ဒေသထွက်ကုန်များနှင့်ထုတ်ကုန်လုပ်ငန်းများ အချိန်တိုအတွင်း ကုန်ကျစရိတ်သက်သာစွာဖြင့် သယ်ယူနိုင်ပြီး ဘက်စုံဖွံ့ဖြိုးတိုးတက်စေရန်အတွက် လမ်း၊ တံတားများကို ရာသီမရွေးသွားလာနိုင်ရေး နှစ်စဉ်အကောင်အထည်ဖော်ဆောင်ရွက်ပေးလျက်ရှိရာ ၂၀၂၅-၂၀၂၆ ဘဏ္ဍာနှစ်တွင် လမ်းလုပ်ငန်း(၁၆)ခုနှင့် တံတားလုပ်ငန်း(၃)ခု စုစုပေါင်း(၁၉)ခု ဆောင်ရွက်ပေးလျက်ရှိကြောင်း သိရသည်။

အဆိုပါလမ်းတံတားများ ဆောင်ရွက်ပေးရာ၌ ပြည်ထောင်စု(ငွေလုံးငွေရင်း) ခွင့်ပြုရန်ပုံ ငွေ(၉၀၁.၅၂၃) ကျပ်သန်းဖြင့် ကျောက်ဆည်မြို့နယ်တွင် လမ်းလုပ်ငန်း(၃)ခု၊ မြစ်သားမြို့နယ်တွင်လမ်းလုပ်ငန်း (၃)ခုနှင့် တံတားလုပ်ငန်း(၁)ခု၊ မန္တလေးတိုင်းဒေသကြီး(ငွေလုံးငွေရင်း)ခွင့်ပြုရန်ပုံငွေ (၂၆၄၃.၀၁၇)ကျပ်သန်းဖြင့် ကျောက်ဆည် မြို့နယ်တွင် လမ်းလုပ်ငန်း(၁)ခု၊ စဉ့်ကိုင်မြို့နယ်တွင် လမ်းလုပ်ငန်း(၄)ခု၊ တံတားဦးမြို့နယ်တွင် လမ်းလုပ်ငန်း (၂) ခု နှင့်တံတားလုပ်ငန်း(၁)ခု၊ မြစ်သားမြို့နယ်တွင် လမ်းလုပ်ငန်း(၃)ခုနှင့်တံတားလုပ်ငန်း(၁)ခု စုစုပေါင်း လုပ်ငန်း(၁၉)ခုဖြစ်ကြောင်း သိရသည်။

ကျေးလက်လမ်းဖွံ့ဖြိုးရေးဦးစီးဌာနအနေဖြင့် ၂၀၃၀ ပြည့်နှစ်တွင် မြန်မာနိုင်ငံရှိ ကျေးရွာအားလုံး၏ (၈၀) ရာခိုင်နှုန်းနှင့် နိုင်ငံအတွင်းရှိလူဦးရေ(၉၀)ရာခိုင်နှုန်း ရာသီမရွေးသွားလာနိုင်သည့် ကျေးလက်လမ်းများအဖြစ် အသုံးပြုနိုင်ရန်အတွက် အကောင်အထည်ဖော် ဆောင်ရွက်ပေးလျက်ရှိကြောင်း သိရသည်။        

သက်မောင်၊(ကျောက်ဆည်)

နေပြည်တော် ဇူလိုင် ၇

သီရိလင်္ကာနိုင်ငံ၊ ကိုလံဘိုမြို့အခြေစိုက် ကိုလံဘိုစီမံကိန်း (Colombo Plan) သည် ကမ္ဘာ့တောင်ပိုင်းနိုင်ငံများ ပူးပေါင်းဆောင်ရွက်မှုနှင့် လူသားအရင်းအနှီး ဖွံ့ဖြိုးတိုးတက်မှုတို့ကို မြှင့်တင်ရန် စီမံကိန်းများနှင့် စွမ်းဆောင်ရည်မြှင့်တင်မှု အစီအစဉ်များကို အလေးထားဆောင်ရွက်သည့် အဖွဲ့ဝင်နိုင်ငံ ၂၈ နိုင်ငံပါဝင်သော အပြည်ပြည်ဆိုင်ရာ အစိုးရအဖွဲ့အစည်းတစ်ခုဖြစ်ပြီး ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန၊ နိုင်ငံခြားစီးပွားဆက်သွယ်ရေး ဦးစီးဌာနသည် ကိုလံဘိုစီမံကိန်း၏ မြန်မာနိုင်ငံဆိုင်ရာ Coordinating Agency အဖြစ် တာဝန်ယူဆောင်ရွက်လျက်ရှိသည်။

ကိုလံဘိုစီမံကိန်းတွင် လက်ရှိတာဝန်ထမ်းဆောင်နေသည့် အတွင်းရေးမှူးချုပ်ရာထူးနေရာသည် ၂ဝ၂၆ ခုနှစ်၊ ဧပြီလကုန်တွင် သက်တမ်းပြည့်မည်ဖြစ်၍ ၂၀၂၆ ခုနှစ်၊ မေလမှ ၂၀၃၀ ပြည့်နှစ်၊ ဧပြီလအထိ ၄ နှစ်သက်တမ်းအတွက် ကိုလံဘိုစီမံကိန်း အဖွဲ့ဝင်နိုင်ငံများမှ ကိုယ်စားလှယ်တစ်ဦး အဆိုပြုလျှောက်ထားရန် ကိုလံဘိုစီမံကိန်း အတွင်းရေးမှူးချုပ်ရုံးမှ ဖိတ်ခေါ်စာနှင့် လုပ်ငန်းစဉ်လမ်းညွှန် ဖြန့်ဝေထားရှိသည်။

အပြည့်အစုံဖတ်ရှုရန်- https://www.mdn.gov.mm/my/kiulnbhiuciimnkine-attngremuukhupraathuuneraaattk-leaakthaaniung

နေပြည်တော် ဇူလိုင် ၇

(၆၃)ကြိမ်မြောက် တပ်မတော်ကာကွယ်ရေးဦးစီးချုပ်ဒိုင်း တပ်မတော်(ကြည်း၊ ရေ၊ လေ) သေနတ်ပစ်ပြိုင်ပွဲဖွင့်ပွဲကို ယနေ့နံနက်ပိုင်းက ပြင်ဦးလွင်မြို့ရှိ တပ်မတော်စက်ပစ်ကွင်း၌ ပြုလုပ်ရာ အလယ်ပိုင်းတိုင်းစစ်ဌာနချုပ် တိုင်းမှူး ဗိုလ်မှူးချုပ် ကျော်ကိုထိုက်နှင့် အဖွဲ့ဝင်များ၊ အရာရှိ၊ စစ်သည်၊ မိသားစုများ၊ ဖိတ်ကြားထားသူများ၊ ဒိုင်အဖွဲ့ဝင်များနှင့် ပြိုင်ပွဲဝင်အသင်းများ တက်ရောက်ကြသည်။

ဦးစွာ တပ်မတော်ကာကွယ်ရေးဦးစီးချုပ်ကိုယ်စား တိုင်းမှူးက အမှာစကားပြောကြားပြီး မိုးပျံပူဖောင်းကို ပစ္စတိုသေနတ်ဖြင့် ပစ်ဖောက်၍ ပြိုင်ပွဲကိုဖွင့်လှစ်ပေးသည်။ ထို့နောက် တိုင်းမှူးနှင့် တက်ရောက်လာကြသူများက ကာကွယ်ရေးဦးစီးချုပ်ရုံး(ရေ)ကိုယ်စားပြု (အမျိုးသား)အသင်းနှင့် အရှေ့ပိုင်းတိုင်းစစ်ဌာနချုပ် ကိုယ်စားပြု(အမျိုးသား)အသင်း၊ ကာကွယ်ရေးဦးစီးချုပ်ရုံး(ကြည်း)စခန်းမှူးရုံး ကိုယ်စားပြု(အမျိုးသမီး)နှင့် အလယ်ပိုင်းတိုင်းစစ်ဌာနချုပ်ကိုယ်စားပြု (အမျိုးသမီး)အသင်းတို့၏ ထိလဲပြား ပစ်ခတ်စဉ် သရုပ်ပြပစ်ခတ်ခြင်းတို့ကို ကြည့်ရှုအားပေးကြပြီး တိုင်းမှူးနှင့် တာဝန်ရှိသူများက ဂုဏ်ပြုဆုငွေများ ချီးမြှင့်ပေးအပ်သည်။

အဆိုပါ တပ်မတော်ကာကွယ်ရေးဦးစီးချုပ်ဒိုင်း တပ်မတော် (ကြည်း၊ ရေ၊ လေ) သေနတ်ပစ်ပြိုင်ပွဲကို ပြိုင်ပွဲဝင်အသင်း ၁၈ သင်းဖြင့် ဇူလိုင် ၂၀ ရက်အထိ ယှဉ်ပြိုင်ပစ်ခတ်သွားမည်ဖြစ်ကြောင်း သတင်းရရှိသည်။

MOI

ကျောက်ဆည်၊ ဇူလိုင်-၈

မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်တွင် တိုက်နယ်(၁၂)ခုရှိပြီး ရေရရှိရေး နည်းလမ်းဖြင့် တိုက်နယ်(၃)မှ ကျေးရွာအုပ်စု(၁၀)အုပ်စုတွင် နွေသီးနှံမျိုးစုံ (၅၈၁၇)ဧက စိုက်ပျိုးခဲ့ကြောင်း မြို့နယ်မြေစာရင်းဦးစီးဌာနမှ သိရသည်။ 

ထိုသို့ ရေရရှိရေးနည်းလမ်းဖြင့် နွေသီးနှံမျိုးစုံ စိုက်ပျိုးရာ၌ လက်ပန်ပင်ကျေးရွာအုပ်စုတွင် နွေစပါး၊ နွေနှမ်း၊ မိုးကြိုပဲတီစိမ်း(၁၇၆)ဧက၊ မယ်ဇယ်ပင်ကျေးရွာတွင် နွေစပါး၊ နွေနှမ်း၊ မိုးကြိုပဲတီစိမ်း၊ မိုးကြိုနေကြာ (၁၉၀) ဧက၊ တံစိုးကျေးရွာအုပ်စုတွင် နွေနှမ်း၊ မိုးကြိုပဲတီစိမ်း(၃၅၂)ဧက၊ သူငယ်တော်ကျေးရွာအုပ်စုတွင် နွေနှမ်း၊ မိုးကြို ပဲတီစိမ်း(၁၉၅)ဧက၊ ပွတ္တိုင်ကျေးရွာအုပ်စုတွင် နွေစပါး၊ နွေနှမ်း၊ မိုးကြိုပဲတီစိမ်း၊ဟင်းသီး ဟင်းရွက်(၁၄၂၄)ဧက၊ မြောင်းဦးကျေးရွာအုပ်စုတွင် နွေစပါး၊ နွေနှမ်း၊ မိုးကြိုပဲတီစိမ်း၊ ကျွဲနွားစာ၊ မိုးကြိုနေကြာ (၆၆၀)ဧက၊ အနောက်သာဂရကျေးရွာအုပ်စုတွင် နွေစပါး၊ နွေနှမ်း၊ မိုးကြိုပဲတီစိမ်း၊ ငရုပ်သီးနှံ၊ ကျွဲနွားစာ (၉၈၅) ဧက၊ ရွာပုလဲ ကျေးရွာအုပ်စုတွင် နွေနှမ်း၊ မိုးကြိုပဲတီစိမ်း၊ ငရုပ်သီးနှံ(၅၄၁)ဧက၊ ကတဲကျေးရွာ အုပ်စုတွင် နွေစပါး၊ နွေနှမ်း၊ မိုးကြိုပဲတီစိမ်း၊ ဟင်းသီးဟင်းရွက်(၉၀၄)ဧက၊ ပနန်ကျေးရွာအုပ်စုတွင် နွေနှမ်း(၃၈၀)ဧက စုစုပေါင်း (၅၈၀၇)ဧက စိုက်ပျိုးခဲ့ကြောင်း မြို့နယ်မြေစာရင်းဦးစီးဌာနမှ ၂၀၂၅ ခုနှစ် ဧပြီ(၄)ရက်နေ့ ထုတ်ပြန်သည့် စာရင်း များအရ သိရသည်။

နွေသီးနှံနှင့်မိုးကြိုသီးနှံများ လျာထားချက်ပြည့်မီကျော်လွန်ရေးနှင့် မျှော်မှန်းအထွက်နှုန်းရရှိရေး မြို့နယ်စိုက်ပျိုးရေး ညှိနှိုင်းမှုအဖွဲ့နှင့်  တောင်သူများနှင့်ပူးပေါင်းဆောင်ရွက်ခဲ့ကြောင်းနှင့် သက်ဆိုင်ရာဦးစီးဌာနများမှ ဒေသနှင့် ကိုက်ညီသည့်မျိုးများ၊ စိုက်နည်းစနစ်များ၊ အပင်ပြုစုနည်းများ စနစ်တကျကူညီပေးလျက်ရှိပြီး  စိုက်ပျိုးရေများ လုံလောက်စွာ ပေးဝေလျက်ရှိကြောင်း သိရသည်။ 

သက်မောင်၊(ကျောက်ဆည်)