နေပြည်တော် ဖေဖော်ဝါရီ ၈

မန္တလေးတိုင်းဒေသကြီး၊ မန္တလေးနန်းမြို့ရိုးအနောက်ဘက်၊ စည်ရှည်တံခါးအနီး၌ ရှေးမူမပျက် အသစ်ပြန်လည်တည်ဆောက်ပြီးစီးခဲ့သည့် စည်ရှည်တံတားဖွင့်ပွဲအခမ်းအနားကို ယနေ့နံနက်ပိုင်းတွင်ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ဖွင့်လှစ်ပေးသည်။

ဖွင့်ပွဲအခမ်းအနားသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ဇနီးဒေါ်ကြူကြူလှ၊ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ကောင်စီအဖွဲ့ဝင်များနှင့် ဇနီးများ၊ ပြည်ထောင်စုဝန်ကြီးများနှင့်ဇနီးများ၊ မန္တလေးတိုင်းဒေသကြီးဝန်ကြီးချုပ်၊ ကာကွယ်ရေးဦးစီးချုပ်ရုံးမှ အဆင့်မြင့်တပ်မတော် အရာရှိကြီးများနှင့်ဇနီးများ၊ အလယ်ပိုင်းတိုင်းစစ်ဌာနချုပ်တိုင်းမှူး၊ မန္တလေးတိုင်းဒေသကြီး အစိုးရအဖွဲ့ဝင်များနှင့်ဌာနဆိုင်ရာတာဝန်ရှိသူများ၊ တိုင်းရင်းသားလူငယ် မောင်မယ်များနှင့် ဒေသခံပြည်သူများတက်ရောက်ကြသည်။

ဦးစွာ မန္တလေးတိုင်းဒေသကြီးအစိုးရအဖွဲ့၊ စည်ပင်သာယာရေးဝန်ကြီး၊ မန္တလေးမြို့တော် စည်ပင်သာယာရေးကော်မတီဥက္ကဋ္ဌ မြို့တော်ဝန်ဦးကျော်ဆန်းက စည်ရှည်တံတား တည်ဆောက်ခဲ့မှု အခြေအနေများနှင့်ပတ်သက်၍ ရှင်းလင်းတင်ပြသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ထံ မန္တလေးတိုင်းဒေသကြီးဝန်ကြီးချုပ် ဦးမျိုးအောင်က စည်ရှည်တံတားဖွင့်ပွဲ အထိမ်းအမှတ်လက်ဆောင်အား ဂါရဝပြုပေးအပ်သည်။

ထို့နောက် သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးတင်ဦးလွင်၊ မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ ကာကွယ်ရေးဦးစီးချုပ်ရုံး (ကြည်း)မှ ဒုတိယဗိုလ်ချုပ်ကြီး ကိုကိုဦး၊ စစ်အင်ဂျင်နီယာညွှန်ကြားရေးမှူးရုံး ညွှန်ကြားရေးမှူး ဗိုလ်ချုပ်ဇော်နိုင်ဦးနှင့် မန္တလေးမြို့တော်ဝန် ဦးကျော်ဆန်းတို့က စည်ရှည်တံတားအား ဖဲကြိုးဖြတ်ဖွင့်လှစ်ပေးသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က တံတားကမ္ပည်းမော်ကွန်းကျောက်စာအား စက်ခလုတ်နှိပ်ဖွင့်လှစ်ပေးပြီး အမွှေးနံ့သာရည်များ ပက်ဖျန်းပေးသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး အခမ်းအနားတက်ရောက်လာကြသူများသည် စည်ရှည်တံတားအား လှည့်လည်ကြည့်ရှုကြပြီး တိုင်းရင်းသားမောင်မယ်များနှင့် ဒေသခံပြည်သူများအား ရင်းရင်းနှီးနှီးနှုတ်ဆက်သည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး အခမ်းအနားတက်ရောက်လာကြသူများသည် စုပေါင်းမှတ်တမ်းတင်ဓာတ်ပုံ ရိုက်ကြသည်။

အဆိုပါ မန္တလေးနန်းမြို့ရိုးအနောက်ဘက်ရှိ စည်ရှည်တံတားသည် မြန်မာသက္ကရာဇ် ၁၂၂၁ ခုနှစ်တွင် မင်းတုန်းမင်းတရားကြီးလက်ထက်၌ မြနန်းစံကျော်ရွှေနန်းတော်နှင့်အတူ တည်ဆောက်ခဲ့ခြင်းဖြစ်ပြီး ဒုတိယကမ္ဘာစစ်ကာလအတွင်း စစ်ဘေးဒဏ်ကြောင့် ပျက်စီးခဲ့ရကြောင်း၊ စည်ရှည်တံတားသည် မန္တလေးနန်းမြို့ရိုး၏ အနောက်ဘက်ထွက်ပေါက် ပင်မတံတားတစ်စင်းဖြစ်ကြောင်း၊ တံတားအား မူလပုံစံအတိုင်း ရှေးမူမပျက် တည်ဆောက်နိုင်ရေးနှင့် ရေရှည်တည်တံ့ခိုင်မြဲစေရေးတို့အတွက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်၏လမ်းညွှန်ချက်ဖြင့် တည်ဆောက်ရေးလုပ်ငန်းများကို စစ်အင်ဂျင်နီယာညွှန်ကြားရေးမှူးရုံးမှ ၂၀၂၄ ခုနှစ် ဩဂုတ်လအတွင်း ဆောင်ရွက်ခဲ့ခြင်းဖြစ်ပြီး ယနေ့တွင်ဖွင့်ပွဲအခမ်းအနားကို အောင်မြင်စွာ ကျင်းပပြုလုပ်နိုင်ခဲ့ခြင်းဖြစ်ကြောင်း၊ မန္တလေးနန်းတော်ကြီး၏ လေးပြင်လေးရပ်တို့တွင် တစ်ဖက်လျှင်တံခါးပေါက်ကြီး ၃ ပေါက်စီဖြင့် တံခါးပေါက် ၁၂ ပေါက် တည်ဆောက်ထားပြီး ထို ၃ ပေါက်၏ အလည်တံခါးကို ဓာတ်နာမ်များဖြင့် မှည့်ခေါ်ထားခဲ့ကြောင်းနှင့် ယခုကဲ့သို့အနောက်ဘက်အရပ်ရှိ စည်ရှည်တံတားကြီးကို ပြန်လည်တည်ဆောက်ခြင်းအားဖြင့် အမျိုးသားယဉ်ကျေးမှုအမွေအနှစ်ဖြစ်သည့် မြနန်းစံကျော် ရွှေနန်းတော်ကြီး၏အင်္ဂါရပ်ကို ပြန်လည်၍ပိုမိုပြည့်စုံစေမည်ဖြစ်ကြောင်း သတင်းရရှိသည်။

Source: www.moi.gov.mm

အမေရိကန်နိုင်ငံတွင် ရောက်ရှိနေသည့် နေထိုင်ခွင့် အထောက်အထားမဲ့ မြန်မာနိုင်ငံသားများကို အပြန်ခရီးအတွက် မည်သူမည်ဝါဖြစ်ကြောင်း သက်သေခံ လက်မှတ်လျှောက်ထားနိုင်ကြောင်း အမေရိကန်နိုင်ငံ၊ ဝါရှင်တန် မြို့ ရှိ မြန်မာသံရုံးက အသိပေးထုတ်ပြန်ထားသည်။

အမေရိကန်နိုင်ငံရောက် မြန်မာနိုင်ငံသားများအနေဖြင့် အကြောင်းအမျိုးမျိုးကြောင့် နေထိုင်ခွင့် ဗီဇာစသည့် တရားဝင်အထောက်အထားများ သက်တမ်းကုန်ဆုံးခြင်းများ ကြုံတွေ့နေရပါက အထောက်အထားမဲ့ နိုင်ငံခြားသား နေရပ်ရွှေ့ပြောင်းသူအဖြစ် သတ်မှတ်ခံရကာ ပြည်နှင်မည့်အနေအထားများ ဖြစ်ပေါ်လာနိုင်သဖြင့် ကာယကံရှင်များ၏ ပုဂ္ဂလိကအစီအစဉ်ဖြင့် နေထိုင်ခွင့်ရရှိရေး ကြိုတင်ဆောင်ရွက်နိုင်ရန် မြန်မာသံရုံးက အသိပေးထားသည်။

ထို့အပြင် နေထိုင်ခွင့် အထောက်အထားမဲ့ (သို့မဟုတ်) တရားမဝင်ရောက်ရှိနေသူဖြစ်ပါက အိမ်ရှင်အစိုးရ၏ တာဝန်ရှိသူများက ပြည်နှင်ချိန်မှထွက်ခွာခြင်းထက်ကြိုတင်ထွက်ခွာသင့်ကြောင်း ထုတ်ပြန်ချက်တွင် ထည့်သွင်းဖော်ပြထားသည်။

၎င်းတို့အနေဖြင့် မြန်မာနိုင်ငံအပြန်ခရီးအတွက် မည်သည့် ခရီးသွားလက်မှတ်အမျိုးအစားမျှ မရှိပါက (သို့မဟုတ်)နိုင်ငံကူးလက်မှတ်သည် ကာလကြာမြင့်စွာ သက်တမ်းလွန်နေပါက မည်သူမည်ဝါဖြစ်ကြောင်း သက်သေခံလက်မှတ်လျှောက်ထားနိုင်ကြောင်း မြန်မာသံရုံးက ထုတ်ပြန်ထားသည်။

လျှောက်ထားရန်ပုံစံနှင့် လိုအပ်ချက်များအား မြန်မာသံရုံး၏ ဝက်ဘ်ဆိုက်မှရယူဖြည့်စွက်၍ အီးမေးလ်/ ဖုန်းတို့ဖြင့် ဆောလျင်စွာ ဆက်သွယ်ဆောင်ရွက်နိုင်ကြောင်း ဝါရှင်တန်မြို့ရှိ မြန်မာသံရုံးက အသိပေးထားသည်။

ကိုးကား-NP News

မြန်မာ-ထိုင်းနယ်စပ်၌ ထိုင်းနိုင်ငံမှ လျှပ်စစ်မီးရယူထားသည့် မြဝတီမြို့၊ ရွှေကုက္ကိုမြို့၊ တာချီလိတ်မြို့နှင့် ဘုရားသုံးဆူမြို့များတွင် ဖေဖော်ဝါရီလ ၅ရက်၊ နံနက်ပိုင်းမှစ၍ လျှပ်စစ်မီးပြတ်တောက်သွားပြီဖြစ်ကြောင်း ဒေသခံများထံမှ သိရသည်။

မြန်မာနိုင်ငံတွင်းရှိ ရှမ်းပြည်နယ်၊ တာချီလိတ်မြို့နယ်တွင် နေရာ(၂)နေရာ၊ မွန်ပြည်နယ်၊ ဘုရားသုံးဆူဒေသ၊ ကရင်ပြည်နယ် မြဝတီမြို့နယ်တွင်းရှိ နေရာ(၂)နေရာတို့သည် ထိုင်းနိုင်ငံမှပေးပို့သော လျှပ်စစ်ဓာတ်အားကို ရယူသုံးစွဲနေရခြင်းဖြစ်ကြောင်း သိရသည်။ “လျှပ်စစ်မီး သည် ထိုင်းစံတော်ချိန် ၉နာရီ၊ မြန်မာစံတော်ချိန် ၈နာရီ ခွဲမှာစပြီး ပြတ်သွားခြင်းဖြစ်ကြောင်း” ဘုရားသုံးဆူ ဒေသခံအမျိုးသားတစ်ဦးက NP News ကို ပြောသည်။

ထို့ပြင် ထိုင်းဘက်မှ နယ်စပ်ဂိတ်တွင် လုံခြုံရေး တင်းကျပ်စွာချထားသည်များ ရှိကြောင်းလည်း သိရသည်။ အလားတူ တာချီလိတ်မြို့တွင်လည်း ယနေ့နံနက်ပိုင်း မှစ၍ အမှတ် (၁) ချစ်ကြည်ရေးတံတားထိပ်နှင့် Mungdang ရပ်ကွက်တို့ရှိ အဓိက လျှပ်စစ်မီးဓာတ်အား သွယ်တန်းထားသောနေရာတို့ မီးဖြတ်တောက်လိုက်ပြီ ဖြစ်ကြောင်း သိရသည်။

မြန်မာနိုင်ငံအတွင်းရှိ မြဝတီမြို့၊ ရွှေကုက္ကိုနှင့် KK Park ဒေသသို့ပေးထားသော လျှပ်စစ်မီးဖြတ်တောက်ရန် ထိုင်းအစိုးရမှ PEA (ပြည်နယ်လျှပ်စစ်အာဏာပိုင်)ကို ပြီးခဲ့သည့်ရက်ပိုင်းက အမိန့်ပေးခဲ့ပြီး လက်ရှိတွင်လျှပ်စစ်မီးများ စတင်ဖြတ်တောက်လာခဲ့ခြင်းဖြစ်ကြောင်း သိရသည်။

ပြီးခဲ့သည့် ဇန်နဝါရီ ၃ ရက်ကလည်း မြန်မာ-ထိုင်း နယ်စပ်တစ်လျှောက်ရှိ မြဝတီမြို့နယ်အတွင်းမှ ကျားဖြန့်ဂိုဏ်းများ ထိုင်းနိုင်ငံ၏ လျှပ်စစ်ဓာတ်အားကို ရယူအသုံးပြုနေကြောင်း သံသယရှိသည့် ဧရိယာတစ်ဝိုက်ကို လျှပ်စစ်မီး (၅၀) ရာခိုင်နှုန်းအထိ ဖြတ်တောက်သွားမည်ဖြစ်ကြောင်း ထိုင်းဒုတိယဝန်ကြီးချုပ်က ပြောကြားခဲ့သည်။

ကိုးကား-NP News

ပုဂံအမွေအနှစ်ဒေသအတွင်းရှိ ပုဂံမြို့ဟောင်း သရပါ တံခါးအား ဖေဖော်ဝါရီ ပထမပတ်ကစတင်ကာ မတ်လ စတုတ္ထပတ်အထိ ခေတ္တယာယီပိတ်ထားမည် ဖြစ်ကြောင်း ရှေးဟောင်းသုတေသနနှင့် အမျိုးသား ပြတိုက်ဦးစီးဌာန (ပုဂံဌာနခွဲ)မှ သိရသည်။ ပုဂံဒေသ အတွင်း ရေကြီး၊ ရေဝပ်ခြင်းများ လျော့ချနိုင်စေရန်နှင့် ရေစီးရေလာကောင်းမွန်ရေးလုပ်ငန်းများ လုပ်ဆောင်ရန် အတွက် ပုဂံမြို့ဟောင်း သရပါတံခါးကို ခေတ္တ ပိတ် ထားမည်ဖြစ်ကြောင်း သိရသည်။

“သဘာဝဘေးအန္တရာယ်ဆိုင်ရာစီမံခန့်ခွဲမှုတစ်ရပ်အနေဖြင့် ပုဂံဒေသအတွင်း ရေကြီးရေဝပ်ခြင်းများ လျှော့ချ နိုင်ရန်နှင့် ရေစီးရေလာကောင်းမွန်ရန် ဆောင်ရွက် နေခြင်းဖြစ်ပါကြောင်း၊ ယခုလိုဆောင်ရွက်ရာတွင် ပုဂံခေတ် မူလရေလမ်းကြောင်းများကို ပြန်လည် ဖော်ထုတ်ထိန်းသိမ်းသည့် လုပ်ငန်းများ ပါဝင်သော ကျုံးမှ ဧရာဝတီမြစ်အထိ စီးဆင်းရေ လမ်းကြောင်းရှိ ကျုံးဧရိယာကို ရေစီးဆင်းမှုကောင်းမွန်စေရန် ဆောင်ရွက် နေခြင်းဖြစ်သလို၊ လိုအပ်သည့်နေရာများတွင် ရေပြွန်များ ပြုပြင်ခြင်းများကို ၂၀၂၅ခုနှစ် ၊ ဖေဖော်ဝါရီ ပထမ ပတ်ကနေ မတ်လ စတုတ္ထပတ်အတွင်း  လုပ်ဆောင် သွားမည်ဖြစ်ပါသည်။ ထို့အတွက် ပုဂံမြို့ဟောင်း သရပါ တံခါးကို ခေတ္တပိတ်ထားမည်ဖြစ်ပါကြောင်း” ရှေးဟောင်း သုတေသနနှင့်အမျိုးသားပြတိုက်ဦးစီးဌာန (ပုဂံဌာနခွဲ) က ထုတ်ပြန်ပြောကြားထားသည်။

ယင်းကဲ့သို့ လုပ်ဆောင်စဉ်ကာလအတွင်း လမ်း အသုံးပြုခြင်းများ ခေတ္တယာယီပိတ်ထားမည်ဖြစ်သည်။ လမ်းအသုံးပြုခြင်း ခေတ္တယာယီပိတ်ထားသည့် ကာလ အတွင်း အများပြည်သူသွားလာနိုင်စေရန်အတွက် ညောင်ဦးမြို့မှတစ်ဆင့် ပုဂံမြို့ဟောင်းသို့သွားရောက်လိုသူများသည် သရပါတံခါးအရှေ့ဘက်ရှိ အာနန္ဒာဘုရားအဝင်လမ်းမှတစ်ဆင့် အနော်ရထာလမ်းမကြီး၊ တစ်ဖန် ပုဂံမြို့ဟောင်းလမ်းအတိုင်း သွားလာနိုင်မည်ဖြစ်ကြောင်း သိရသည်။ ဧရာဝတီမြစ်ဆိပ်မှတစ်ဆင့် ပုဂံမြို့ဟောင်းသို့ သွားရောက်မည့်သူများအတွက် မြောက်ဘက်ကျုံးဘေးလမ်းရှိ  တောင်ဘီရွာအတွင်းလမ်းမှဖြစ်စေ၊ သရပါဟိုတယ်အနောက်ဘက်လမ်းမှဖြစ်စေ ဖြတ်သန်း သွားလာနိုင်မည်ဖြစ်ကြောင်း သိရသည်။

သွားလာသူများ အဆင်ပြေစေရန်အတွက် ဖြတ်သန်းသွားလာနိုင်မည့် လမ်းကြောင်းပြ အသိပေးဆိုင်းဘုတ်များကိုလည်း အများပြည်သူမြင်သာသည့်နေရာများ၌ စိုက်ထူပေးထားမည်ဖြစ်ကြောင်း သိရသည်။ ပုဂံဒေသ ၏ အမွေအနှစ်တစ်ရပ်ဖြစ်သည့် သရပါတံခါး၊ နတ် မောင်နှမနတ်ကွန်းများကို အနော်ရထာမင်းနှင့် ကျန်စစ်မင်းနန်းတော်ရာ အနောက်ဘက်ကားလမ်းမှ တစ်ဆင့် လာရောက်ပူဇော်နိုင်မည်ဖြစ်ပြီး ရိုးရာ အစဉ်လာမပျက် အများပြည်သူ ပူဇော်ပသနိုင်ရန် အတွက်လည်း သီးသန့်ဧရိယာများ ထားရှိပေးသွားမည်ဟုရှေးဟောင်းသုတေသနနှင့် အမျိုးသားပြတိုက်ဦးစီးဌာန(ပုဂံဌာနခွဲ)မှ သိရသည်။

ကိုးကား-NP News

ရာဂီမုန်တိုင်းနှင့် ဆက်စပ်ဖြစ်ပွားခဲ့သည့် သဘာဝဘေးအတွင်း သေဆုံးခဲ့သူ (၄၄၀) ကျော်အတွက် ငွေကျပ်သန်း (၄၀၀) ကျော် ထောက်ပံ့ပေးခဲ့ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌက အသိပေးပြောကြားသည်။

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ဇန်နဝါရီ ၃၁ ရက်တွင် နေပြည်တော် ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး အစည်းအဝေးခန်းမတွင်ပြုလုပ်ခဲ့သည့် အမျိုးသားကာကွယ်ရေးနှင့် လုံခြုံရေးကောင်စီအစည်းအဝေး၌အထက်ပါကဲ့သို့ ပြောကြားခဲ့ခြင်းဖြစ်သည်။

မြန်မာနိုင်ငံတွင် ပြီးခဲ့သည့် ၂၀၂၄ ခုနှစ်၊ စက်တင်ဘာလအတွင်းဖြစ်ပေါ်ခဲ့သည့် ရာဂီမုန်တိုင်းနှင့် ဆက်စပ်ဖြစ်ပွားသည့် မိုးသည်းထန်စွာရွာသွန်းခဲ့မှုကြောင့် ပြည်နယ်နှင့်တိုင်းဒေသကြီး (၈) ခုရှိ မြို့နယ် (၁၀၆) ခု တွင် ရေကြီးရေလျှံမှုများဖြစ်ပွားခဲ့သည်။

အဆိုပါသဘာဝဘေးအတွင်း သေဆုံးခဲ့ရသူဦးရေ (၄၄၀) ကျော်အတွက် ငွေကျပ် (၄၄၇ ဒသမ ၁) သန်း‌ ထောက်ပံ့ပေးခဲ့ပြီး လူနေအိမ်ပျက်စီးမှုများအတွက်ငွေကျပ် (၂၁ ဒသမ ၂) ဘီလီယံကျော်ကိုလည်း ထောက်ပံ့ပေးခဲ့ကြောင်းသိရသည်။

ထို့အပြင် အခြားထောက်ပံ့ခြင်းများအဖြစ် ငွေကျပ် (၃၈ ဒသမ ၉) ဘီလီယံကျော်ကိုလည်း ထောက်ပံ့ပေးနိုင်ခဲ့ပြီး လက်ရှိတွင် တိုက်ပွဲရှောင်ပြည်သူများ အင်အားစာရင်းကိုလည်း ပြုစုလျက်ရှိကာ ထောက်ပံ့ပေးနိုင်ရေးစီစဥ်နေကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌက ပြောကြားခဲ့သည်။

သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေအရ အကြမ်းဖက်မှု၊ လက်နက်ကိုင်သောင်းကျန်းမှုဖြစ်ပွားခြင်းကြောင့် ပြည်သူများ၏ ဆုံးရှုံးမှုများသည်လည်း သဘာဝဘေးအန္တရာယ် သတ်မှတ်ချက်ထဲတွင် အကျုံးဝင်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌက ထည့်သွင်းပြောကြားထားသည်။

နိုင်ငံတော်အနေဖြင့် တိုက်ပွဲရှောင်ပြည်သူများကို ထောက်ပံ့ပေးသွားမည်ဖြစ်ကြောင်း သိရှိရပါသည်။

ကိုးကား-NP News

မြန်မာစာပေပညာရှိအဖြစ်ထင်ရှားသော စာရေးဆရာ မောင်ခင်မင်(ဓနုဖြူ) သည် ဇန်နဝါရီ ၂၈ ရက် သန်းခေါင် ၁၂ နာရီခွဲအချိန်တွင် ရုတ်တရက် ကွယ်လွန်သွားပြီ ဖြစ်ကြောင်း မိသားစုဝင်များက ထုတ်ပြန်လိုက်ပါသည်။

ဆရာကြီးမောင်ခင်မင်(ဓနုဖြူ)သည် ရန်ကုန်တက္ကသိုလ်၊ မြန်မာစာဌာန၏ ပါမောက္ခအဖြစ် တာဝန် ထမ်းဆောင်ခဲ့ပြီး မြန်မာစာပေနှင့်ပတ်သက်၍ စာအုပ်၊ ဆောင်းပါး ပေါင်းများစွာကိုရေးသားခဲ့သူဖြစ်ပါသည်။ ဆရာကြီး၏ စကားပြေ သဘောတရား၊ စကားပြေအတတ်ပညာ စာအုပ်သည် ထင်ရှားသော စာအုပ်ဖြစ်ပြီး မြန်မာစာအတွက် ကျမ်းကိုးပြုရသည့် စာအုပ်အဖြစ် ထင်ရှားပါသည်။ 

၁၉၄၀ ပြည့်နှစ် ၊ ဇန်နဝါရီ ၂၄ ရက်နေ့တွင် ဧရာဝတီတိုင်း၊ ဓနုဖြူမြို့ ကျုံတစ်နီးကျေးရွာမှာမွေးဖွားခဲ့ပြီးအမည်ရင်း ဦးခင်အေးဖြစ်ပါသည်။ ဆရာကြီး ကွယ်လွန်ချိန်တွင် အသက် ၈၆ နှစ်ရှိပြီဖြစ်ပါသည်။   

ဆရာကြီးသည် အမျိုးသားစာပေဆု၊ စာပေဗိမာန် စာပေဆုများအပါအဝင် ဂုဏ်ထူးဆောင် စာပေပါရဂူ ဘွဲ့ကိုချီးမြှင့်ခံထားရသူဖြစ်ပါသည်။ ထို့ပြင် ၂၀၁၃ ခုနှစ် အမျိုးသားစာပေတစ်သက်တာဆုရှင်လည်း ဖြစ်ပါသည်။

ကိုးကား-Facebook

ကော့သောင်းမြို့ရှိနေအိမ်ကို ရောင်းချပြီး ဓမ္မစေတီ ခေါင်းလောင်းကြီးအား ထပ်မံဆယ်ယူရန် ကြိုးပမ်းနေကြောင်း ဦးစံလင်းက NP News သို့ ပြောသည်။

ဦးစံလင်းသည် ပြီးခဲ့သည့်ကာလများက ဓမ္မစေတီခေါင်းလောင်းကြီးကို ဖော်ယူရန်အတွက် တိုင်းသိပြည်သိဆောင်ရွက်ခဲ့ဖူးသူဖြစ်ပြီး ယခုတစ်ကြိမ်တွင် ထပ်မံ ကြိုးပမ်းလာခြင်းဖြစ်ကာ ပြီးခဲ့သည့်ကာလများတွင် ခေါင်းလောင်းကြီးကို ဆယ်ယူရန်အတွက် အကြိမ်ကြိမ်စာတင်ခဲ့ဖူးကြောင်းသိရသည်။ ဓမ္မစေတီခေါင်းလောင်းကြီးသည် သမိုင်းတစ်လျှောက် အမှန်တကယ် ရှိ၊ မရှိ စသည်ဖြင့် အငြင်းပွားနေသော ပစ္စည်းတစ်ခုဖြစ်ပြီး အများပြောစမှတ်ပြုကြသောစကားများအရ အဆိုပါ ခေါင်းလောင်းကြီးကို သန်လျင်စား ငဇင်ကာခေါ် ဒီဘရစ်တိုက အမြောက်သွန်းလုပ်ရန် ရွှေတိဂုံစေတီတော် မှ ရေကြောင်းဖြင့်သယ်ယူလာစဉ် ရန်ကုန်မြစ်ဝအတွင်း ပျောက်ဆုံးခဲ့သည်ဟူ၍ ဖြစ်သည်။

အဆိုပါ ခေါင်းလောင်းကြီးသည် ရေအောက် (၂၇) ပေ၊ မြေကြီးအောက် (၂၅) ပေ၊ စုစုပေါင်း ရေအောက် အနက် (၅၂) ပေတွင် နစ်မြုပ်နေခြင်းဖြစ်ပြီး (၁၀) ရက်အတွင်း ကြိုးချည်ကာ ကျန် (၁၀) ရက်အတွင်း ကုန်းပေါ်အရောက်တင်မည်ဖြစ်ကြောင်း ဦးစံလင်းကပြောသည်။ လက်ရှိတွင် ကော့သောင်းမြို့မှ နေအိမ်ကို ရောင်းနေကာ အဆိုပါ ရောင်းရငွေကို ခေါင်းလောင်းဆယ်ယူရာတွင် ထည့်သွင်းအသုံးပြုမည်ဖြစ်ကြောင်းနှင့် ဆယ်ယူခွင့်ပြုရန် တင်ပြစာကို ဇန်နဝါရီလ (၉) ရက်က တာဝန်ရှိသူများ ထံ တင်ပြထားကြောင်း ဦးစံလင်းကပြောသည်။

ဓမ္မစေတီခေါင်းလောင်းကြီး ပေါ်ချိန်တန်ပြီဖြစ်သော်လည်း နှောင့်နှေးကြန့်ကြာနေခြင်းအပေါ် စိတ်မကောင်းဖြစ်မိကြောင်းနှင့် ခေါင်းလောင်းကြီးကို ဖော်ထုတ်ရန်အတွက် မြန်မာနိုင်ငံတွင် ပစ္စည်းအစုံအလင်ရှိသောကြောင့် မည်သည့်နိုင်ငံကိုမျှ အားကိုးရန်မလိုအပ်ကြောင်းကိုပါ ဦးစံလင်းက တင်ပြစာတွင် ဖော်ပြထားကြောင်း သိရသည်။

ကိုးကား-NP News

နေပြည်တော် ဇန်နဝါရီ ၂၃

ရခိုင်ပြည်နယ် တောင်ကုတ်မြို့နယ်ရှိ မြန်မာ့သစ်လုပ်ငန်းဆင်ဝိုင်းမှ ဆင်မဇာနန်းလှ အသက် ၃၃ နှစ်က ဆင်ဖြူတော် (အထီး)ကလေး (၁)စီးအား ၂၀၂၂ ခုနှစ် ဇူလိုင် ၂၃ ရက်နံနက် မင်္ဂလာအချိန် ၆ နာရီခွဲတွင် မွေးဖွားခဲ့ပြီး အဆိုပါ ဆင်ဖြူတော်လေးသည် မွေးဖွားစတွင် အရပ် အမြင့် ၂ ပေ ၅ လက်မ၊ ကိုယ်လုံး လုံးပတ် ၃ ပေ ၁ လက်မ၊ ကိုယ်အလေးချိန် ပေါင် ၁၈၀ ခန့် ရှိသည်။

ဆင်ဖြူတော်ကလေး၏ ဘွဲ့နာမံတော်မှာ “ရဋ္ဌနန္ဒက” ဖြစ်ပြီး အဆိုပါ ဆင်ဖြူတော်လေးသည် ရတနာဆင်ဖြူတော်များ၏ ကြန်အင်လက္ခဏာ ၈ ချက် အနက် မျက်လုံးပုလဲရောင်ဖြစ်ခြင်း၊ ကျောကုန်းမှာ ငှက်ပျောကိုင်းသဏ္ဍာန်ဖြစ်ခြင်း၊ အမွှေးအဖြူရောင်ဖြစ်ခြင်း၊ အမြီးတံခါးပိတ်ဖြစ်ခြင်း၊ အရေပြားမှာသြဇာကွက်ဖြစ်ခြင်း၊ အသားအရေပန်းရောင်ဖြစ်ခြင်း၊ ခြေဖဝါးတွင်ရှေ့ခြေသည်း ၅ခုစီနှင့် နောက်ခြေသည်း၄ခုစီပါရှိခြင်း၊ နားကြီးခြင်းစသည့် ရတနာဆင်ဖြူတော်များ၏ ကြန်အင်လက္ခဏာ ၇ ချက်ကိုက်ညီသော ဆင်ဖြူတော်လေးဖြစ်သည်။

အထက်ပါဆင်ဖြူတော်လေး “ရဋ္ဌနန္ဒက”သည် ယခုအသက် ၂ နှစ်၊ ၆ လသားအရွယ်တွင် အရပ်အမြင့် ၄ ပေ ၉ လက်မ ၊ ကိုယ်လုံးလုံးပတ် ၇ ပေ ၄ လက်မ၊ ကိုယ်အလေးချိန် ၁၄၇၄ ပေါင်ရှိလာပြီး ရတနာဆင်ဖြူတော် ထိန်းသိမ်းစောင့်ရှောက်ရေးဥယျာဉ်၊ နေပြည်တော်ရှိ ရတနာဆင်ဖြူတော်ဆောင်တွင် မိခင်ဆင်မကြီးနှင့်အတူ ကျန်းမာပျော်ရွှင်လျက်ရှိကြောင်းနှင့် ဆင်ဖြူတော်လေး “ရဋ္ဌနန္ဒက” သည် ငယ်စဉ်ကတည်းကပင် လူနှင့်ယဉ်ပါးသည့် ဆင်ဖြူတော်လေးဖြစ်ပြီး ပိုမိုယဉ်ပါးလာစေရန် ဆင်နှင့်လူသားတို့အကြား ကောင်းမွန်စွာ ဆက်ဆံတတ်စေရန် လေ့ကျင့်သင်ကြားခြင်းစနစ် “Peace Human and Elephant Interaction Training” ဖြင့် လေ့ကျင့်သင်ကြားပေးလျက်ရှိကြောင်း သတင်းရရှိသည်။

Source: Myanmar Digital News

တစ်နှစ်တာကာလအတွင်း တစ်နိုင်ငံလုံးအတိုင်းအတာအနေဖြင့် ယာဉ်တိုက်မှုကြောင့် လူ (၂၀၀၀) ကျော် သေဆုံးခဲ့ကြောင်း ကုန်းလမ်းပို့ဆောင်ရေးညွှန်ကြားမှုဦးစီးဌာန၏ အချက်အလက်များအရသိရှိရသည်။

၂၀၂၄ ခုနှစ်၊ ဇန်နဝါရီလမှ ဒီဇင်ဘာလအထိ ယာဉ်တိုက်မှုပေါင်း (၃၈၇၅) ကြိမ်ဖြစ်ပွားခဲ့ရာ တစ်ရက်လျှင် ပျမ်းမျှအားဖြင့် (၁၀)ကြိမ်ကျော်ဖြစ်ပွားခဲ့ကြောင်း သိရသည်။ အဆိုပါယာဉ်တိုက်မှုများကြောင့် သေဆုံးသူ (၂၀၁၁) ဦး နှင့် ထိခိုက်ဒဏ်ရာရရှိသူ(၅၅၇၆) ဦး ရှိခဲ့ကြောင်းသိရှိရသည်။

ယာဉ်တိုက်မှုများအနက် ရန်ကုန်တိုင်းဒေသကြီးတွင် ယာဉ်တိုက်မှုအကြိမ်ရေ (၈၄၃) ကြိမ်ဖြင့် အများဆုံးဖြစ်ပွားခဲ့ပြီး သေဆုံးသူ (၄၄၆) ဦး နှင့် ထိခိုက် ဒဏ်ရာရရှိသူ (၉၄၄) ဦး ရှိခဲ့ကြောင်း သိရသည်။ ထို့ပြင် ဧရာဝတီတိုင်းဒေသကြီးတွင် ယာဉ်တိုက်မှုပေါင်း (၅၇၄) ကြိမ်ဖြင့် ဒုတိယအများဆုံးဖြစ်ပွားခဲ့ရာ သေဆုံးသူ (၂၀၅) ဦး နှင့် ဒဏ်ရာရရှိသူ (၉၁၈) ဦး ရှိခဲ့ကြောင်းသိရှိရသည်။

အလားတူ ရန်ကုန်-မန္တလေးအမြန်လမ်းတွင် ယာဉ်တိုက်မှု ပေါင်း (၂၀၃) ကြိမ် ဖြစ်ပွားခဲ့ရာ (၃၆၀) ဦး ထိခိုက်ဒဏ်ရာရရှိခဲ့ပြီး (၈၈) ဦး သေဆုံးခဲ့ကြောင်းသိရှိရသည်။

မြန်မာနိုင်ငံတစ်ဝန်း ၂၀၂၄ ခုနှစ်၌ စုစုပေါင်း ယာဉ်တိုက်မှုပေါင်း (၃၈၇၅) ကြိမ် ဖြစ်ပွားခဲ့ရာ ၂၀၂၃ ခုနှစ်တွင် ယာဉ်တိုက်မှု (၄၇၇၂) ကြိမ်နှင့် နှိုင်းယှဉ်ပါက (၈၉၇) ကြိမ် လျော့ကျသွားခဲ့ပြီး သေဆုံးသူ (၄၁၁) ဦး လျော့ကျသွားခဲ့ကြောင်းသိရှိရပါသည်။

ကိုးကား-NP News

လူများ၏ ပါးစပ်ဖျားတွင် ​အောင်မြင်ကျော်ကြား လူကြိုက်များခဲ့သည့် သီချင်းများစွာကို သီဆိုခဲ့သူ အဆိုတော်ကြီး မာရဇ္ဇဟာ ဇန်နဝါရီ လ ၂၃ ရက်နေ့ ညဘက်တွင် ကွယ်လွန်သွားခဲ့ကြောင်း သိရှိရပါသည်။

အဆိုတော် မာရဇ္ဇ ကွယ်လွန်သွားခြင်းနှင့်ပတ်သက်ပြီး ကိုနိုင်ဇော်က “မိမိ၏juke-boxBand နှင့် လက်တွဲခဲ့သည့် အဆိုကျော်(ကို)မာရဇ္ဇ မနေ့ညက ကွယ်လွန်သွားကြောင်းသိရသဖြင့် မိသားစုနှင့် ထပ်တူကြေကွဲရပါကြောင်း” ၎င်း၏ဖေ့ဘုတ်စာမျက်နှာတွင် ရေးသားထားပါသည်။

ကိုးကား-အင်တာနက်စာမျက်နှာ