ငလျင်ကြောင့် ပြိုကျသွားသည့် စစ်ကိုင်းတံတားဟောင်း(အင်းဝ)ကို ပြန်လည်တပ်ဆင် တည်ဆောက်မှုများစတင်နေပြီဟု ဒေသခံများထံမှ သိရသည်။ ၂၀၂၅ ခုနှစ်၊ မတ်လ ၂၈ ရက် မြန်မာစံတော်ချိန် မွန်းလွဲ ၁၂ နာရီ ၅၀ မိနစ်ဝန်းကျင်တွင် စစ်ကိုင်းမြို့အနီး မြေအောက် ၁၀ ကီလိုမီတာ အနက်တွင် ဗဟိုပြုလှုပ်ခတ်သွားသော ငလျင်အတွင်း အင်းဝတံတား ခေါ် စစ်ကိုင်းတံတားဟောင်း ပြိုကျပျက်စီးမှု ဖြစ်ပွားခဲ့သည်။ မေလ ၁ ရက်နေ့မှစတင်ကာ ပျက်စီးပြုတ်ကျသွားသည့် တံတားအပိုင်းများကို ပြန်လည်တပ်ဆင်ရန် သက်ဆိုင်ရာက ဝန်ချီကရိန်းများဖြင့် စတင် ပြင်ဆင်နေခြင်းဖြစ်သည်။ “တံတားပြန်ပြင်မယ်လို့ သတင်းထွက်နေတာ ကြာပြီ အခုမေလထဲမှာလုပ်ငန်းစလုပ်တာတွေ့ရပါတယ်။ ပြင်ဆင်ချိန် တစ်လလောက်ကြာမယ်လို့ သတင်းတွေလည်းထွက်‌နေပါတယ်” ဟု စစ်ကိုင်းမြို့ခံတစ်ဦးက NP News သတင်းဌာနသို့ဖြေကြားသည်။ စစ်ကိုင်းတံတား(အင်းဝ)ကို ၁၉၂၇ ခုနှစ်တွင် မြန်မာနိုင်ငံ၏ ပထမဆုံး ဘုရင်ခံ ဆာဟာကုတ် ဘတ်တလာက အုတ်မြစ်ချခဲ့သည်။ တံတားမှာ သံပေါင်ပေါင်းကူးတံတားဖြစ်ပြီး ရက်မကြီးကိုးခု၊ ရက်မလတ်တစ်ခု၊ ရက်မငယ်ခြောက်ခုရှိသည်။ ရက်မကြီးတစ်ခုလျှင် အလျားပေ ၃၅၀ အရှည်ရှိပြီး ရက်မလတ်မှာ ပေ ၂၅၀ ရှည်သည်။ အပိုင်းဆက် ရက်မတို မှာ ပေ ၆၀ စီရှည်ပြီး သံတန်ချိန်ပေါင်း ၁၁,၁၄၅ တန် အသုံးပြုခဲ့သည်။ ၁၉၃၄ ခုနှစ်တွင် တည်ဆောက်ပြီးစီးသွားသော အင်းဝတံတားကြီးကြောင့် ၇၂၄ မိုင်ရှည် ရန်ကုန်-မြစ်ကြီးနား မီးရထားလမ်းသည် မန္တလေးမှတစ်ဆင့် အကြားအလတ်မရှိ တောက်လျှောက်ဆက်သွယ်နိုင်ခဲ့သည်။ ဒုတိယကမ္ဘာစစ်အတွင်း ပျက်စီးမှုတစ်ကြိမ်ဖြစ်ပေါ်ခဲ့ပြီး ၁၉၅၄ခုနှစ်တွင် ပြန်လည်ပြင်ဆင်ခဲ့သည်။

ကိုးကား-NP News

မန္တလေးတိုင်းဒေသကြီး တံတားဦးမြို့နယ်၌ မတ်လ၂၈ ရက်ကလှုပ်ခတ်သည့် မန္တလေးငလျင်ကြီး ကြောင့် သေဆုံးသူများ၏ မိသားစုဝင်များအား ပံ့ပိုးငွေပေးအပ်ခြင်း၊ လတ်တလောစားသောက်ရေး အဆင်ပြေစေရန်စားသုံးကုန်ပစ္စည်းများပေးအပ်ခြင်းနှင့် နေအိမ်ပြိုကျပျက်စီးမှုများအား ကယ်ဆယ်ရေးပစ္စည်း ၁၆ မျိုးပံ့ပိုးပေးခြင်းအခမ်းအနားကို မေလ ၁ ရက် နံနက်ပိုင်းတွင် တံတားဦးမြို့ အမှတ်(၂)ရပ်ကွက် ဆုံကုန်းရပ်ရှိ မြို့နယ်ခန်းမ၌ ကျင်းပသည် ။

အခမ်းအနားတွင် ကျောက်ဆည်တပ်နယ်မှ တာဝန်ရှိသူတစ်ဦးက ငလျင်ဘေးကြောင့် တံတားဦး မြို့နယ်မှ သေဆုံးသူများ၏ မိသားစုဝင်များအား ပံ့ပိုးငွေများနှင့် ငလျင်ဘေးဖြစ်ပွားခဲ့သည့် အိမ်ထောင်စု များအတွက် နိုင်ငံတော်မှပေးအပ်သည့် ဆန်၊ ဆီ၊ ဆား၊ ပဲ၊ ငါးပိ တစ်လစာပံ့ပိုးငွေကျပ် ၃၈၀ ဒသမ ၃၁၆ သန်းအား မြို့နယ်သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီဥက္ကဋ္ဌ ဦးဖြိုးဇော်ကိုကိုထံသို့ လွှဲပြောင်းပေးအပ်သည်။

ထို့နောက် တံတားဦးခရိုင်သဘာဝဘေးအန္တရာယ် ဆိုင်ရာစီမံခန့်ခွဲမှုကော်မတီဥက္ကဋ္ဌ ဦးကျော်ငြိမ်းက တံတားဦးမြို့နယ်မှ သေဆုံးသူများ၏ မိသားစုဝင်များအား ပံ့ပိုးငွေနှင့် ကယ်ဆယ်ရေးပစ္စည်း ၁၆ မျိုးကိုလည်းကောင်း၊ မြို့ နယ်ဘေးအန္တရာယ်ဆိုင်ရာ စီမံခန့်ခွဲမှုကော်မတီ တွဲဖက်အတွင်းရေးမှူး ဒေါ်အိဖြူဖြူနှင်းက ကယ်ဆယ်ရေးပစ္စည်း ၁၆ မျိုးကို လည်းကောင်း ပြည်သူများလက်ဝယ်အရောက် ပေးအပ်ကြသည်။

ဆက်လက်၍ တာဝန်ရှိသူများသည် ဘေးသင့် ပြည်သူများနှင့် ရင်းရင်းနှီးနှီးတွေ့ဆုံပြီး အားပေး စကားပြောကြားကာ ပံ့ပိုးငွေများပေးအပ်နေမှုကို လှည့်လည်ကြည့်ရှုအားပေးသည်။

ငလျင်ဘေးကြောင့် သေဆုံးသူ တစ်ဦးလျှင် အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမူ ကော်မတီမှ ငွေကျပ် ၁၀ သိန်း၊ မန္တလေးတိုင်းဒေသကြီး၊ အစိုးရအဖွဲ့မှ ငွေကျပ်ငါးသိန်း၊ ဘေးအန္တရာယ် ဆိုင်ရာစီမံခန့်ခွဲမှုဦးစီးဌာနမှ ငွေကျပ်သုံးသိန်း - စုစုပေါင်းငွေကျပ် ၁၈ သိန်း၊ ပြိုကျပျက်စီးခဲ့သည့် အိမ်ခြေ ၈၁၆ လုံးအား ကယ်ဆယ်ရေးပစ္စည်း ၁၆ မျိုးနှင့် စားနပ်ရိက္ခာအနေဖြင့် တစ်လစာအတွက် ဆန်၊ ဆီ၊ ဆား၊ ပဲ၊ ငါးပိ ရိက္ခာငါးမျိုးအတွက် တန်ဖိုး ငွေကျပ်စုစုပေါင်း ၃၈၀ ဒသမ ၃၁၆ သန်းကိုပေးအပ်ခဲ့ ကြောင်း သိရသည် ။

ဦးရဲတင့်(ပြန်/ဆက်)

တရုတ်နိုင်ငံက အပြာရောင်ဝေလငါးလို့ အမည်ရတဲ့ မောင်းသူမဲ့ရေအောက်သွားယာဉ်တစ်မျိုးကို ရေချလိုက်ပါတယ်။ သူ့ရဲ့အလျားက ၁၁ မီတာနဲ့ တန်ချိန်က ၁၂ တန်ရှိတဲ့ အဲဒီရေယာဉ်က ကမ္ဘာ့အမြန် ဆုံးရေအောက်သွားယာဉ်ဖြစ်တယ်လို့ လည်းဆိုနိုင်ပါတယ်။

သူကရေပေါ်မှာဆိုရင် အမြန်နှုန်းအနေနဲ့ရေမိုင် ၃၆ မိုင်နှုန်းနဲ့သွားနိုင်ပါတယ်။ အဲဒီအရှိန်က ရေတပ်မှာ အသုံးပြုနေတဲ့ ဖျက်သင်္ဘောများရဲ့အရှိန်၊ အကြီးစားတော် ပီဒိုများရဲ့အရှိန်နဲ့အတူတူပင် ဖြစ်တဲ့အပြင် အလွန်ဝေးကွာတဲ့ နေရာဒေသတွေအထိ အလွန်လျင်မြန်စွာဖြန့်ကြက်နိုင်တယ်လို့ ဆိုပါတယ်။

ဒါ့အပြင် သူကသတ်မှတ်ထားတဲ့နေရာကို ရောက်သွားတဲ့အခါမှာ ရေအောက်ကို မီတာ ၆၀ အနက်အထိ ငုပ်လျှိုးနိုင်ပြီး ရေအောက်မှာတင် ရက်ပေါင်း ၃၀ ကြာနေပြီးသူ့ရဲ့လုပ်ငန်းဆောင်တာများကိုအပြည့်အဝလုပ်ဆောင်နိုင်စွမ်းရှိတယ်လို့ ဆိုပါတယ်။

သူ့ရဲ့စွမ်းဆောင်ရည်များအနက် အများနဲ့မတူဘဲသာလွန်တဲ့အချက်က နျူကလီးယားစွမ်းအင်သုံး ရေငုပ်သင်္ဘောများကဲ့သို့ ရေဒါမှာမဖမ်းယူနိုင်တဲ့ကိုယ်ပျောက်စွမ်းရည်လိုမျိုးလည်းပါဝင်ပါတယ်။ ဒီအတွက်ကြောင့် အပြာရောင်ဝေလငါးလို့အမည်ပေးထားတဲ့ အဲဒီရေအောက်သွားယာဉ်က တရုတ်နိုင်ငံအနေနဲ့ အဏ္ဏဝါနည်းပညာ တီထွင်ဖန်တီးမှုမှာ အမှီအခိုကင်းနေပြီလို့ ဆိုနိုင်ကြောင်း ဦးဆောင်သိပ္ပံပညာရှင် ချန်းဒိတ်ကပြောပါတယ်။       

Ref: IE

K.H

Source: https://myawady.net.mm/

နေပြည်တော်၊ မန္တလေးနှင့် စစ်ကိုင်းတို့တွင် ငလျင်ဘေးသင့်ဒေသများ ပြန်လည်ထူထောင်ရေးနှင့် တည်ဆောက်ရေးလုပ်ငန်းများအတွက်လိုအပ်သည့် သံ၊ သံမဏိအပါအဝင် ဆောက်လုပ်ရေးလုပ်ငန်းသုံး ပစ္စည်းများကို သက်သာသောဈေးနှုန်းဖြင့်ရောင်းချပေးမည့် ဈေးရောင်းပွဲတော် ကျင်းပရန် ပြင်ဆင်နေကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

အဆိုပါဈေးရောင်းပွဲတော်ကျင်းပနိုင်ရေးအတွက် စက်မှုဝန်ကြီးဌာန၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနတို့မှ ပြည်ထောင်စုဝန်ကြီးများနှင့် ဒုတိယဝန်ကြီးများအပါအဝင် ဌာနဆိုင်ရာများမှ တာဝန်ရှိသူများ၊ မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်း၊ မြန်မာနိုင်ငံသံမဏိလုပ်ငန်းရှင်များ အသင်း၊ မြန်မာနိုင်ငံသံနှင့်သံမဏိအသင်း၊ ဘိလပ်မြေထုတ်လုပ်သူများအသင်းတို့မှ ဥက္ကဌများနှင့် တာဝန်ရှိသူများဖြင့် ဧပြီ ၂၉ ရက်နေ့မှာ လုပ်ငန်းညှိနှိုင်းအစည်းအဝေးတစ်ရပ်ကို ကျင်းပပြုလုပ်ခဲ့ကြောင်း သိရသည်။

“ငလျင်ဘေးသင့်ဒေသတွေရဲ့ ပြန်လည်ထူထောင်ရေးနဲ့ တည်ဆောက်ရေးလုပ်ငန်း များအတွက် သံမဏိ၊ ဘိလပ်မြေ စတဲ့ ဆောက်လုပ်ရေးလုပ်ငန်းသုံးပစ္စည်းတွေဟာ မဖြစ်မနေလိုအပ်တဲ့ပစ္စည်း တွေဖြစ်ပါတယ်။ ငလျင်ဖြစ်ပွားရာဒေသများကို စုံစမ်းကြည့်ရာမှာ လိုအပ်ချက်အရ ဈေးနှုန်းကြီးမြင့်ကွာခြားမှုတွေ ရှိနေတာကို တွေ့ရှိရပါတယ်။ ဒါကြောင့် ငလျင်ဘေးသင့်ဒေသတွေမှာ တည်ဆောက်ရေးပစ္စည်းများ အရည်အသွေးပြည့်မီပြီး ဈေးနှုန်းမှန်ကန်စွာနဲ့ လုံလောက်စွာရရှိရေး၊ အချိန်မီရရှိနိုင်ရေးတို့အတွက် ဈေးရောင်းပွဲတော် ဖွင့်လှစ်ရောင်းချပေးရန် စီစဉ်နေပါတယ်” ဟု စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက ပြောကြားသည်။

ထို့ကြောင့် သက်ဆိုင်ရာဌာနများနှင့် အသင်းအဖွဲ့များအနေဖြင့် ဈေးရောင်းပွဲတော် အောင်မြင်စွာကျင်းပနိုင်ရေး ပူးပေါင်းဆောင်ရွက်ပေးရန်၊ ငလျင်ဘေးသင့်အဆောက်အအုံများအား ပြင်းအားရစ်(ခ်)တာစကေး ၈ အဆင့်ဒဏ်ခံနိုင်ရန် ပြန်လည်တည်ဆောက်ရာတွင် အရည်အသွေးမှန်ကန်သည့် ပစ္စည်းများကို အသုံးပြုနိုင်ရေး၊ ဈေးနှုန်းသက်သာစေရေး၊ အာမခံချက်ရှိသည့် ပစ္စည်းများကို လွယ်ကူလျင်မြန်စွာ ဝယ်ယူအသုံးပြုနိုင်ရေး၊ အဆောက်အအုံများ မြန်ဆန်စွာဆောက်လုပ်နိုင်ရေး စသည့် ရည်ရွယ်ချက်များဖြင့် ဈေးရောင်းပွဲတော်ဆောင်ရွက်ရန် စီစဉ်ခြင်းဖြစ်ကြောင်းသိရသည်။

အဆိုပါ ဈေးရောင်းပွဲတော်ကို ပြည်ထောင်စုနယ်မြေနေပြည်တော်၊ စစ်ကိုင်းတိုင်း၊ မန္တလေးတိုင်းတို့တွင် ကျင်းပပြုလုပ်သွားမှာဖြစ်ပြီး သက်ဆိုင်ရာအသင်းများ၏ ဦးဆောင်မှုဖြင့် လုပ်ငန်းရှင်များက ပူးပေါင်းပါဝင် ဆောင်ရွက်ကြရန်လည်း တိုက်တွန်းထားခြင်းဖြစ်သည်။

ကိုးကား-NP News

မတ်လ ၂၈ရက်က လှုပ်ခတ်ခဲ့သော ငလျင်ကြီးကြောင့် ထိခိုက်ပျက်စီးသွားသောအဆောက်အအုံများကို နည်းလမ်းသုံးမျိုးဖြင့် ဆောင်ရွက်သွားမည် ဖြစ်ကြောင်း အဆောက်အဦများ ပြန်လည်အသုံးပြုရေးနှင့် အသစ်တည်ဆောက်ရေးကြီးကြပ်မှုကော်မတီဥက္ကဋ္ဌ နိုင်ငံတော်စီမံအုပ်ချုပ်ရေး ကောင်စီအဖွဲ့ဝင် ဒုတိယဝန်ကြီးချုပ်နှင့် ကာကွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီး မောင်မောင်အေးက ပြောကြားခဲ့သည်။

ဧပြီလ ၂၉ ရက်က ကာကွယ်ရေးဝန်ကြီးဌာန အစည်းအဝေးခန်းမတွင် ကျင်းပသော အဆောက်အအဦများ ပြန်လည်အသုံးပြုရေးနှင့် အသစ် တည်ဆောက်ရေးကြီးကြပ်မှုကော်မတီ၏ ပထမအကြိမ် လုပ်ငန်းညှိနှိုင်း အစည်းအဝေးတွင် ဗိုလ်ချုပ်ကြီး မောင်မောင်အေးက ထည့်သွင်းပြောကြား ခဲ့ခြင်းဖြစ်သည်။

အဆိုပါအစည်းအဝေးတွင် ရုံးဌာန ၊ အဆောက်အအုံများအား ပြင်ဆင်ရန် အတွက် မူလတည်ဆောက်ခဲ့သော ကုမ္ပဏီများကို တာဝန်ပေး ဆောင်ရွက်ခြင်း၊ သက်ဆိုင်ရာဝန်ကြီးဌာနများတွင် တည်ဆောက်ရေးလုပ်ငန်းများ လက်ရှိ ဆောင်ရွက်နေသည့် ကုမ္ပဏီများကို တာဝန်ပေးဆောင်ရွက်ခြင်းနှင့် အင်ဂျင်နီယာ အသင်းသုံးသင်းမှ သတ်မှတ်ထောက်ခံပေးထားသည့် ကုမ္ပဏီများအား တာဝန်ပေးဆောင်ရွက်ခြင်းစသည့် နည်းလမ်း သုံးမျိုးဖြင့် ဆောင်ရွက်သွားမည်ဖြစ်ကြောင်း ပြောကြားခဲ့သည်။

ဝန်ထမ်းအိမ်ရာများပြုပြင်ခြင်းအတွက် နေပြည်တော်စည်ပင်သာယာရေးကော်မတီနှင့် သက်ဆိုင်ရာပြည်နယ်နှင့် တိုင်းဒေသကြီး အစိုးရများကတာဝန်ယူဆောင်ရွက်သွားကြရမည်ဖြစ်ကြောင်း ထည့်သွင်းပြောကြားသည်။

ထို့ပြင်ဆောက်လုပ်ရေးဝန်ကြီးဌာနမှ အတည်ပြုပေးသည့် မြို့ပြ အင်ဂျင်နီယာ များပါဝင်သော ပညာရှင်များကို ဖွဲ့စည်းတာဝန်ပေးအပ်၍ ခန့်မှန်းကုန်ကျငွေ (Estimate)များ တွက်ချက်ပြီး သက်ဆိုင်ရာ ပြုပြင် တည်ဆောက်ရေးအဖွဲ့မှတစ်ဆင့် အဆောက်အဦများ ပြန်လည်ပြုပြင်အသုံးပြုရေးနှင့် အသစ်တည် ဆောက်ရေး ကြီးကြပ်မှုကော်မတီသို့ တင်ပြ ရမည်ဖြစ်ကြောင်း သိရသည်။

ထိုသို့တင်ပြကာ ဆောက်လုပ်ရေးဝန်ကြီးဌာန တည်ဆောက်ရေးလုပ်ငန်း စိစစ်ရေးကော်မတီတွင် ခန့်မှန်းကုန်ကျငွေအား လုပ်ငန်းပမာဏအရကွင်းဆင်းစစ်ဆေးခြင်း၊ ဓာတ်ပုံမှတ်တမ်းများဖြင့် စစ်ဆေးခြင်းတို့ဖြင့် တိုက်ဆိုင်စိစစ်ဆောင်ရွက်သွားမည် ဖြစ်ကြောင်း ထည့်သွင်းပြောကြား ခဲ့သည်။

အဆိုပါ ကော်မတီမှတစ်ဆင့် “အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှု ကော်မတီ” သို့ ဆက်လက်တင်ပြဆောင်ရွက်သွားပြီး ယင်း ကော်မတီ၏ ဘဏ္ဍာရေးဆိုင်ရာ လုပ်ထုံးလုပ်နည်းနှင့်အညီ ခွင့်ပြုပေးနိုင်ရေး စီမံပေးခြင်းဖြင့် ငလျင်ဒဏ်သင့်အဆောက်အအုံများပြုပြင်ခြင်းလုပ်ငန်းများအား အမြန်ဆုံး အကောင်အထည်ဖော်ဆောင်ရွက်နိုင်မည့်အပြင် ဘဏ္ဍာငွေ လေလွင့်မှုမရှိစေရေးအတွက် စိစစ်ဆောင်ရွက်သွားနိုင်မည်ဖြစ်ကြောင်း ဆက်လက်ပြောကြားခဲ့သည်။

ကိုးကား-NP News

■ ငလျင်ဒဏ်ကို ပြင်းထန်စွာခံစားခဲ့ရသော တိုင်းဒေသကြီး နှင့် ပြည်နယ်  ခြောက်ခုတို့တွင် ဧပြီ ၂၉ ရက်ထိ သေဆုံးသူ ၃၇၉၈ ဦး၊ ထိခိုက်ဒဏ်ရာရရှိသူ ၅၁၀၆ ဦးနှင့် ပျောက်ဆုံးသူ ၁၀၆ ဦး ရှိ

■ အဆောက်အဦများအတွင်း ပိတ်မိနေသူများအား ရှာဖွေကယ်ဆယ်ခဲ့ရာ ယနေ့အထိ အသက်ရှင်သူ ၆၅၃ ဦး ရှာဖွေကယ်ဆယ်ပေးနိုင်ခဲ့ပြီး သေဆုံးသူ ၇၇၈ ဦး ရှာဖွေပေးနိုင်ခဲ့

မြန်မာနိုင်ငံတွင် မတ် ၂၈ ရက်က လှုပ်ခတ်ခဲ့သော အင်အားအလွန်ပြင်းထန်သည့် ငလျင်ဒဏ်ကို ပြင်းထန်စွာခံစားခဲ့ရသော တိုင်းဒေသကြီး/ပြည်နယ် (၆) ခုတို့တွင် ယနေ့(ဧပြီ ၂၉ ရက်)အထိ  သေဆုံးသူ ၃၇၉၈ ဦး၊ ထိခိုက်ဒဏ်ရာရရှိသူ ၅၁၀၆ ဦးနှင့် ပျောက်ဆုံးသူ ၁၀၆ ဦး ရှိကြောင်း သိရသည်။

မြန်မာနိုင်ငံမီးသတ်တပ်ဖွဲ့ နှင့် ပြည်တွင်းပြည်ပမှ ရှာဖွေကယ်ဆယ်ရေးအဖွဲ့ ဝင်များသည် လိုအပ်သည့်ဒေသများသို့ အချိန်နှင့် တစ်ပြေးညီ ရှာဖွေကယ်ဆယ်ရေးလုပ်ငန်းများ ဆောင်ရွက်ပေးလျက်ရှိပြီး အဆောက်အဦများအတွင်း ပိတ်မိနေသူများအား ရှာဖွေကယ်ဆယ်ခဲ့ရာ ယနေ့ အထိ အသက်ရှင်သူ ၆၅၃ ဦးကို ရှာဖွေကယ်ဆယ်ပေးနိုင်ခဲ့ပြီး သေဆုံးသူ ၇၇၈ ဦး အား ရှာဖွေပေးနိုင်ခဲ့ကြောင်း သိရသည်။

ဘေးသင့်ပြည်သူများသို့ ပြည်တွင်းစေတနာရှင်အလှူရှင်များက ငွေနှင့် အလှူပစ္စည်းများ ထောက်ပံ့လှူဒါန်းလျက်ရှိသကဲ့သို့ ပြည်ပနိုင်ငံများ၊ အဖွဲ့အစည်းများ၊ စေတနာရှင်အလှူရှင်များ က ငွေနှင့် အလှူပစ္စည်းများ ထောက်ပံ့လှူဒါန်းပေးလျက်ရှိရာ ရန်ကုန်အပြည်ပြည်ဆိုင်ရာ လေဆိပ်သို့ ဧပြီ ၂၈ ရက် ည ၇ နာရီမှ ဧပြီ ၂၉ ရက် ညနေ ၅ နာရီအတွင်း မလေးရှားနိုင်ငံ အခြေစိုက် Fo Guang Shani Bussha's Light International Association Yayasan Sin Chew အဖွဲ့ အစည်းများကထောက်ပံ့ပေးသည့် တဘက်၊ သွားတိုက်ဆေး၊ သွားတိုက်တံ၊ စောင်၊ ခြင်ထောင်၊ အိပ်ယာ၊ ဆိုလာမီးအိမ်၊ ရွက်ဖျင်တဲ (၃ ဒသမ ၉၁၈) တန်၊ တရုတ်-မြန်မာစီးပွားရေး ပူးပေါင်းဆောင်ရွက်မှုနှင့် ဖွံ့ဖြိုးတိုးတက်ရေးမြှင့်တင်ရေးအသင်းက ထောက်ပံ့ပေးသည့် ဆေးဝါး (၂ ဒသမ ၁၈၅) တန်၊ Buddhist Tzu Chi Charity Foundation ကထောက်ပံ့ပေးသည့် ခြင်ထောင်၊ အိပ်ယာ (၅ ဒသမ ၅၄၇) တန်၊ Serum Institute of India Pvt Ltd မှပေးပို့သည့် Tetanus Diphtheria (TD) ကာကွယ်ဆေး နှင့် Meases Rubella ကာကွယ်ဆေးများ၊ (၀ ဒသမ ၄၉) တန်၊ ကိုးရီးယားအပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ (KOICA) က ထောက်ပံ့ ပေးသည့် ရွက်ဖျင်တဲများထည့်ထားသော သစ်သားပုံး (၁၀) ပုံး၊ (၇ ဒသမ ၆၃၆) တန်နှင့် ရွက်ဖျင်တဲများ (၂ ဒသမ ၃၄၉) တန် အသီးသီး ရောက်ရှိခဲ့ကြောင်း သိရသည်။

ထောက်ပံ့ရေးပစ္စည်းများကိုလည်း ဘေးသင့်ပြည်သူများ လက်ဝယ်အရောက် အမြန်ဆုံး ခွဲဝေထောက်ပံ့လျက်ရှိပါကြောင်း သိရသည်။

Source: Eleven Media

တစ်နာရီလျှင် (၃၅)မိုင်ခန့်အထိရှိသော မိုးသက်လေပြင်းများတိုက်ခတ်နိုင်၍ သတိပြုနေထိုင်ကြရန် မိုးလေဝသမြန်မာ(ရန်ကုန်ဌာနခွဲ)မှ ယနေ့ ဧပြီ ၂၉ ရက်က မိုးသက်လေပြင်းအန္တရာယ်သတိပေးချက်အဖြစ် သတိပေးထုတ်ပြန်ခဲ့ကြောင်း သိရသည်။

မိုးလေဝသမြန်မာ(ရန်ကုန်ဌာနခွဲ)၏ သတိပေးချက်အရ ယနေ့ ဧပြီ ၂၉ ရက်ယခုအချိန်မှစ၍ မေ ၄ ရက်အတွင်း အရှေ့ဘက်မှလာသော လေပွေလှိုင်းများနှင့် အနောက်နှင့်မြောက်ဘက်မှလာသော လေပွေလှိုင်းများကြောင့် ရန်ကုန်တိုင်း၊ နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ပဲခူး တိုင်း၊ ဧရာဝတီတိုင်း၊ ချင်းပြည်နယ်၊ ရှမ်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် ချိန်ခါမဟုတ် မိုးထစ်ချုန်းရွာသွန်းပြီး ဒေသအလိုက် မိုးကြီးခြင်း၊ နေရာကွက်၍ မိုးကြီးခြင်း၊ လျှပ်စီးလက်ခြင်း၊ မိုးခြိမ်းခြင်း၊ မိုးသီးကြွေခြင်း၊ မိုးကြိုးပစ်ခြင်းနှင့် မိုးသက်လေပြင်းတိုက်ခတ်ခြင်းတို့ဖြစ်ပေါ်နိုင်ကြောင်း သိရသည်။

မိုးသက်လေပြင်းတိုက်ခတ်စဥ် မြေပြင်လေသည် တစ်နာရီလျှင် မိုင်(၃၀)မှ (၃၅)မိုင်ခန့်၊ တစ်ခါတစ်ရံ မိုင်(၄၀)ခန့်အထိတိုက်ခတ်နိုင်၍ မိုးသက်လေပြင်းအန္တရာယ်အားသတိပြုနေထိုင်ကြရန် သတိပေးခဲ့ကြောင်း သိရသည်။

ထို့ပြင် ယနေ့ ဧပြီ ၂၉ ရက်တွင် နေပြည်တော်၊ စစ်ကိုင်းတိုင်း၊ မန္တလေးတိုင်းနှင့် ကချင်ပြည်နယ် (အောက်ပိုင်း)တို့တွင် တိမ်ထူထပ်နေပြီး ဧရာဝတီတိုင်းတွင် နေရာစိပ်စိပ်၊ မကွေးတိုင်း၊ ပဲခူးတိုင်း၊ ရန်ကုန်တိုင်း၊ တနင်္သာရီတိုင်း၊ ရှမ်းပြည်နယ် (မြောက်ပိုင်း)၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကျဲကျဲ၊ ကျန်တိုင်းနှင့်ပြည်နယ်များတွင် နေရာကွက်ကျားမိုးထစ်ချုန်းရွာသွန်းလျက်ရှိသည်ဟုလည်း အသိပေးထုတ်ပြန်ခဲ့သည်။

Source: Popular Myanmar

ငလျင်ဘေးဒဏ်ကြောင့် ယာယီရပ်နားထားသည့် နိုင်ငံကူးလက်မှတ် အွန်လိုင်းမှ လျှောက်ထားမှုကို မေ(၁)တွင် ပြန်ဖွင့်ပေးမည် ဖြစ်ကြောင်း သိရသည်။

ထို့ကြောင့် မေလ (၁)ရက်တွင် အွန်လိုင်းစနစ်ဖြင့် QR Code ရယူနိုင်တော့မည်လည်း ဖြစ်သည်။

ယခင်က QR Code တင်ထားသူများသည် လာမည့် ဇွန်လထိ ရက်ချိန်းရှိသည့်အတွက် ယင်းရက်ချိန်းထိ ရယူထားသူများကို နိုင်ငံကူးလက်မှတ် ပုံမှန်အတိုင်း ထုတ်ပေးနေပြီး ကျန်းမာရေး/ပညာရေးကိစ္စနှင့် အရေးပေါ် နိုင်ငံကူးလက်မှတ်လျှောက်ထားမှုများကို Green Channel ဖြင့် ဆောင်ရွက်ပေးနေကြောင်းလည်း သိရသည်။

ထို့ပြင် ရန်ကုန်၊ မြစ်ကြီးနားနှင့် လားရှိုးမြို့ရှိ မြန်မာနိုင်ငံကူးလက်မှတ်ထုတ်ပေးရေးရုံးများ၌ နိုင်ငံကူးလက်မှတ်ဆောင်ရွက်ရန် Online Appointment Date ရရှိထားသူများသည်လည်း ဆောလျင်စွာ ဆောင်ရွက်နိုင်ရေး Appointment Date များကို ပြင်ဆင်ထားသည့်အတွက် ပြန်လည်စိစစ်နိုင်ရေး အသိပေးထားပြီး ပြောင်းလဲ ပြင်ဆင်ထားသည့်ရက်များ၌ သက်ဆိုင်ရာ ရုံးများအလိုက် နိုင်ငံကူးလက်မှတ် သွားရောက်ပြုလုပ်နိုင်ပြီ ဖြစ်ကြောင်းလည်း ဆိုသည်။

မတ်(၂၈) ရက်က လှုပ်ခတ်ခဲ့သည့် ငလျင်ကြီးကြောင့် ဆက်သွယ်ရေးတာဝါတိုင်များ ပျက်စီးခဲ့ရပြီး Online Appointment System နှင့် နိုင်ငံကူးလက်မှတ် လျှောက်ထားခြင်းကို တစ်လနီးပါးကြာ ယာယီရပ်နားခဲ့ရခြင်းလည်း ဖြစ်သည်။

Source: Popular Myanmar

၂၀၂၅ ခုနှစ်၊ မိုးဦးကာလသည် မေလ (၁၆)ရက်မှ စတင်ကာ အနောက်တောင်မုတ်သုံလေ စတင်ဝင်ရောက်မည်ဖြစ်ကြောင်း မိုးလေ၀သနှင့် ဇလဗေဒညွှန်ကြားမှုဦးစီးဌာနက ခန့်မှန်းထားသည်။

၂၀၂၅ ခုနှစ်၊ မိုးဦးကာလသည် မြန်မာနိုင်ငံအတွင်းသို့ အနောက်တောင် မုတ်သုံလေ စတင်ဝင်ရောက်သည့်နေ့မှ ဇွန်လကုန်အထိ ဖြစ်သည်။

အနောက်တောင်မုတ်သုံလေသည် မေလ (၁၆) ရက်မှ (၂၀) ရက်အတွင်း မြန်မာနိုင်ငံတောင်ပိုင်းဒေသများ၊ မေလ (၂၁) ရက်မှ (၂၅) ရက်အတွင်း မြစ်ဝကျွန်းပေါ်ဒေသများ၊ မေလ (၂၆) ရက်မှ (၃၁) ရက်အတွင်း မြန်မာနိုင်ငံ အလယ်ပိုင်းဒေသများနှင့် ဇွန်လ (၁) ရက်မှ (၅) ရက်အတွင်း မြန်မာနိုင်ငံမြောက်ပိုင်းဒေသများ သို့ဝင်ရောက်မည်ဖြစ်ကြောင်း သိရသည်။

ထို့ပြင် ဘင်္ဂလားပင်လယ်အော်တွင် လေဖိအားနည်းရပ်၀န်း (၃) ကြိမ် ဖြစ်ပေါ်နိုင်ပြီး (၁) ကြိမ်တွင် ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်မည့်အပြင် ယင်းကာလအတွင်း အနောက်တောင် မုတ်သုံလေသည် အားအသင့်အတင့်မှ အားကောင်းနိုင်ကြောင်း အသိပေးထားသည်။

မိုးရွာသွန်းမှု အခြေအနေဖြင့် ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ မွန်ပြည်နယ်နှင့် ရခိုင်ပြည်နယ်တို့တွင် ရွာသွန်းမြဲထက်ပိုနိုင်ပြီး၊ နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကယား ပြည်နယ်၊ ကရင်ပြည်နယ်၊ ချင်းပြည်နယ်နှင့် ရှမ်းပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်ကြောင်း သိရသည်။

မိုးဦးကာလ မေလနှင့် ဇွန်လတို့တွင် ဧရာဝတီမြစ်၊ ချင်းတွင်းမြစ်၊ ဒုဋ္ဌဝတီမြစ်၊ မြစ်သာမြစ်၊ စစ်တောင်းမြစ်၊ ရွှေကျင်မြစ်၊ ပဲခူးမြစ်၊ သံလွင်မြစ်၊ သောင်ရင်းမြစ်၊ ငဝန်မြစ်၊ တိုးမြစ်နှင့် ဘီးလင်းမြစ်တို့တစ်လျှောက်ရှိ မြို့များတွင် မြစ်ရေများသည် လက်ရှိရေမှတ်များအထက် မြင့်တက်လာနိုင်သော်လည်း ယင်းမြို့များ၏ စိုးရိမ်ရေမှတ်အသီးသီးသို့ ရောက်နိုင်ဖွယ်မရှိကြောင်း ဖော်ပြထားသည်။

Source: Popular Myanmar

ငလျင်ဘေးသင့်ခဲ့သည့် ရှမ်းပြည်နယ်တောင်ပိုင်း၊ အင်းလေးဒေသတွင် ယင်လုံအိမ်သာ လိုအပ်ချက် အခက်အခဲဖြစ်ပေါ်နေကြောင်း သိရသည်။

ထိုအခက်အခဲကြောင့် ဒေသခံများအတွက် ကျန်းမာရေးဆိုင်ရာပြဿနာများ ဖြစ်ပွားလာနိုင်ကြောင်းလည်း ကူညီကယ်ဆယ်ရေး လုပ်ဆောင်ပေးနေသူများက ပြောသည်။

ငလျင်ကြောင့် အိမ်ပျက်စီးရာတွင် ယင်လုံအိမ်သာများပါ ပျက်စီးသွားခြင်းကြောင့် လက်ရှိ၌ ကူညီကယ်ဆယ်ရေး လုပ်ဆောင်ပေးနေသူများက ယင်လုံအိမ်သာများကို ယာယီဆောက်လုပ်ပေးနေကြဆဲဖြစ်သည်။

သို့သော် ငလျင်ဘေးသင့်ပြည်သူ များပြားနေသည့်အတွက် လုံလောက်မှုမရှိသေးကာ မိုးတွင်းမတိုင်မီ တည်ဆောက်နိုင်ရန် အင်းလေးဒေသခံများက ကြိုးစားနေကြသည်။

“အလုပ်သမားကလည်း ရှားနေတယ်။ အလုပ်သမားခေါ်မရတာကလည်း တစ်ဒုက္ခဖြစ်နေတာ၊ အိမ်ဆောက်ပစ္စည်းတချို့ လိုအပ်မှုအများကြီးရှိနေသေးတယ်” ဟု ကူညီလုပ်ဆောင်ပေးနေသူတစ်ဦးကလည်း ဆိုထားသည်။

ပြီးခဲ့သည့် မတ် (၂၈)ရက်က လှုပ်ခတ်ခဲ့သည့် မန္တလေး ငလျင်ကြီးကြောင့် အင်းလေးဒေသရှိ ရွာပေါင်း (၂၈)ရွာတွင် ထိခိုက်ပျက်စီးမှုများရှိခဲ့ပြီး ဒေသခံ (၂၀၀)ကျော် ‌သေဆုံးခဲ့ရသည်။

Source: Popular Myanmar