မန္တလေးမြို့တွင် မေလ (၂၁) ရက် ညပိုင်းက မိုးသည်းထန်စွာ ရွာသွန်းခဲ့မှုကြောင့် ငလျင်ဒဏ်သင့် အဆောက်အဦးတစ်လုံး ပြိုကျခဲ့ကြောင်း ဒေသတွင်း သတင်းရင်းမြစ်များထံမှ သိရသည်။

ယင်းအဆောက်အအုံသည် မဟာအောင်မြေမြို့နယ်၊ ပဲပုတ္တန်းရပ်၊ (၈၉)လမ်း၊ (၃၆) လမ်းနှင့် (၃၇) လမ်းကြားတွင် တည်ရှိသည့် အဆောက်အအုံဖြစ်ကြောင်း မြို့ခံပရဟိတအဖွဲ့တစ်ဖွဲ့ထံမှ သိရသည်။

အဆောက်အဦးပြိုကျခဲ့သော်လည်း လူအထိခိုက်မရှိဘဲ အနီးဝန်းကျင်ရှိ လူနေအိမ်များအနေဖြင့် အရေးပေါ်ပြောင်းရွှေ့ခဲ့ရကြောင်း သိရသည်။

ပြီးခဲ့သည့် မေလ (၁၇) ရက် ညပိုင်းကလည်း ပြင်းအား ၅ ဒသမ ၂ ရှိသည့် ငလျင်လှုပ်ခတ်မှုကြောင့် မန္တလေးမြို့ရှိ ငလျင်ရှောင် ယာယီတဲ သစ်ပင်ပိကာ သားအဖနှစ်ဦး ‌သေဆုံးခဲ့သည့် ဖြစ်စဉ် ဖြစ်ပွားခဲ့သေးသည်။

Source: Popular Myanmar

ဘင်္ဂလားပင်လယ်အော်အခြေအနေ

၁။        အနောက်တောင်မုတ်သုံလေသည် မေလ ၂၁ -  ၂၃ရက်နေ့အတွင်း မြန်မာနိုင်ငံအလယ်ပိုင်းဒေသများသို့ လည်းကောင်း၊ မေလ ၂၄ - ၃၀ရက်နေ့အတွင်း မြန်မာနိုင်ငံတစ်ဝန်းလုံးသို့ လည်းကောင်း အသီးသီး ဝင်ရောက်နိုင်ပါသည်။ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် လေဖိအားနည်းရပ်ဝန်း(၁)ကြိမ် ဖြစ်ပေါ်နိုင်ပြီး၊ ပိုမိုအားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်ပါသည်။ ယင်းကာလအတွင်း အနောက်တောင်မုတ်သုံလေသည် အားအသင့်အတင့်မှ အားကောင်းနိုင်ပါသည်။ ဘင်္ဂလားပင်လယ်အော်မြောက်ပိုင်းတွင် တိမ်အသင့်အတင့်မှ တိမ်ထူထပ်နိုင်ပါသည်

မိုးအခြေအနေနှင့် မိုးရွာရက်

၂။       မိုးရွာသွန်းမှုအ‌ခြေအနေမှာ နေပြည်တော်၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီးအောက်ပိုင်း၊ဧရာဝတီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် ရွာသွန်းမြဲထက် ပိုနိုင်ပြီး၊ စစ်ကိုင်းတိုင်းဒေသကြီးအထက်ပိုင်း၊ တနင်္သာရီတိုင်းဒေသကြီး၊ ကချင်ပြည်နယ်နှင့် ချင်းပြည်နယ်တို့တွင် ရွာသွန်းမြဲခန့် မိုးထစ်ချုန်းရွာနိုင်ပါသည်။

၃။      ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ မွန်ပြည်နယ်နှင့် ရှမ်းပြည်နယ်(မြောက်ပိုင်းနှင့် အရှေ့ပိုင်း)တို့တွင် ၇ ရက်မှ ၉ ရက်ခန့်နှင့် နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ကချင်ပြည်နယ်၊ချင်းပြည်နယ်၊ ရခိုင်ပြည်နယ်နှင့် ရှမ်းပြည်နယ်(တောင်ပိုင်း)တို့တွင် ၄ ရက်မှ ၆ ရက်ခန့် မိုးထစ်ချုန်းရွာနိုင်ပါသည်။

နေ့အပူချိန်

၄။      ရှမ်းပြည်နယ်(အရှေ့ပိုင်း)တို့တွင်မေလပျမ်းမျှအပူချိန်၏ ၁.၅ ဒီဂရီဆဲလ်စီးယပ်အောက် လျော့နည်းပြီး၊ နေပြည်တော်၊ ရန်ကုန်တိုင်း ဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန် ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် မေလပျမ်းမျှအပူချိန်ခန့်သာ ရှိနိုင်ပါသည်။  

မိုးဇလ

EV နှင့် ဆီကား မူဝါဒ မတည်ငြိမ်ခြင်းကြောင့် EV SKD များအရောင်းနှေးကာ လာမည့် နှစ်နှစ် အကြာတွင် အပြီးသတ်ရပ်နားသွားနိုင်ကြောင်း ကားလောကအသိုင်းအဝိုင်းက NP News သို့ သုံးသပ်ပြောဆိုထားသည်။ Pilot Project အဖြစ်လုပ်ဆောင်ခဲ့သည့် နှစ်နှစ်ကျော်ကာလအတွင်း လက်ရှိအချိန်အထိ ပြည်ပမှ EV ကားအစီးလိုက် တင်သွင်းခြင်း (CBU) ကုမ္ပဏီ (၈၀)ကျော်ရှိပြီး တစ်စိတ်တစ်ပိုင်း တပ်ဆင်ထုတ်လုပ်မှု (SKD) ကုမ္ပဏီမှာ (၄) ခုခန့်သာရှိကြောင်း သိရသည်။ သို့သော် Pilot Project ထပ်မံသက်တမ်းတိုးခြင်းကြောင့် EV SKD ကုမ္ပဏီများအနေဖြင့် ကားအစီးရေတင်သွင်းခွင့်များစွာရရှိထားသော (CBU) ကုမ္ပဏီများ၏ EV ကားများ ဈေးကွက်အတွင်း မြန်ဆန်စွာ ရရှိရောင်းချနေရခြင်းကြောင့် ရင်းနှီးမြုပ်နှံမှုများစွာလုပ်ထားရသည့် EV SKD ကုမ္ပဏီများမှာ အခက်ခဲ တွေ့နေကြောင်း အထက်ပါသတင်းရင်းမြစ်က ဆိုသည်။ “ပေါ်လစီကတော့ ၂၀၂၄ ခုနှစ်ကစပြီး SKD ကိုစပြောင်းတယ်။ CBU တွေကို ဦးစားမပေးတော့ဘူး။ လျှော့မယ်။ ဒါက ဟိုးအရင် Pilot Project စတည်းက ကြေညာခဲ့သလိုမျိုး လုပ်ထားခဲ့တာပေါ့နော်။ သို့သော်ငြားလည်း အခု ၂၀၂၅ ထဲရောက်သွားတော့ Pilot Projectကို နောက်တစ်နှစ် သတ်တမ်းတိုးပါတယ်ဆိုပြီး ကြေညာ လိုက်တယ်။ ကြေညာလိုက်တော့ တချို့သူတွေအားလုံးက SKD သွားရမယ်ဆိုပြီးတော့ SKD ကို ဦးတည်ပြီးသွားနေတဲ့သူတွေ ရှိတယ်ပေါ့နော်။ အခုကျွန်တော်တို့က ဘယ်လိုဖြစ်သွားလဲဆိုတော့ CBU သွင်းလည်းဒါပဲ။ SKD သွင်းလည်းဒါပဲ။ CBU သွင်းတဲ့သူက အရေအတွက် နည်းနည်းသွင်း ပေါ့။ နည်းနည်းသွင်းပြီးတော့ Investment လည်းမရှိဘူး။ အဲဒီလိုပုံစံမျိုးနဲ့ သွားနေကြတာ။ SKD သမားတွေကကျတော့ စက်ရုံကြီးတွေရင်း၊ ပစ္စည်းတွေဝယ်။ နောက်ပြီး အော်ဒါတင် အစီး (၃၀ဝ) (၄၀ဝ) နဲ့ သွားလိုက်တဲ့အချိန်မှာ Pilot Project က နောက်တစ်နှစ် သက်တမ်းတိုးတော့ SKD သမားတွေက အကုန်ပက်လက်လေးတွေဖြစ်သွားတာပေါ့” ဟု ၎င်းကပြောသည်။ ထို့ပြင် EV ပေါ်လစီအရ အခွန်အခ အနေဖြင့်လည်း EV SKD ကုမ္ပဏီများနှင့် EV CBU ကုမ္ပဏီများ တန်းတူ အခွင့်အရေးရရှိနေခြင်းက ရင်းနှီးမြှုပ်နှံမှုများစွာ လုပ်ဆောင်ထားရသည့် EV SKD များအတွက် များစွာနစ်ရကြောင်းလည်း ၎င်းက ဆိုသည်။ “ EV CBU သွင်းတဲ့သူကလည်း ဒီဈေးပဲ။ ဒီအခွန်ပဲ။ SKD ကို လုပ်တဲ့သူကလည်း ဒီအခွန်ပဲ ဆိုတော့ အဲဒီလိုဆိုတော့ SKD ကား လုပ်မိတဲ့သူတွေက မှားသယောင်ယောင်တွေ ဖြစ်ကုန်တာပေါ့။ နောက်ပြီး Polit Project ကိုလည်း သက်တမ်း မတိုးတင်နိုင်တော့ဘူး။ ပြီးသွားပြီ အခွန်ကောက်စရာရှိတာကော။ အနည်းဆုံးတော့ EV SKD ကို ရန်ကုန်လိုင်စင်ရှိတဲ့ EV တွေ လမ်းတံတားကြေးပေးစရာမလိုဘူး။ အဲဒီလို တစ်ခုခုလေး လုပ်ပေး ရင်တောင် လူတွေကနည်းနည်းလေး စိတ်သက်သာတာပေါ့။ အခုက CBU သွင်းတဲ့သူလည်းကုမ္ပဏီလည်း အခွန်ပေးစရာမလိုဘူး။ SKD လုပ်တဲ့သူလည်း အခွန်ပေးစရာ မလိုဘူးဆိုတော့ ဘာမှလည်းမထူးတော့ဘူးလေ” ဟု ၎င်းက ဆက်ပြော သည်။ အဆိုပါ ကိစ္စရပ်များသည် ပေါ်လစီ မတည်ငြိမ်ခြင်းကြောင့်ထွက်ပေါ်လာသည့်ဘေးထွက်ဆိုးကျိုးများဖြစ်ပြီး လက်ရှိအခြေနေအတိုင်း ဆက်လက်ရပ်တည်သွားပါက EV SKD ကုမ္ပဏီများသည် နောင် နှစ်နှစ်အကြာအထိပင် ရပ်တည် နိုင်တော့မည်မထင်ကြောင်း ကားအသိုင်းအဝိုင်း သတင်းရင်းမြစ်က သုံးသပ်ပြောဆိုထားသည်။ “ပေါ်လစီက မတည်ငြိမ်ဘူး။ ပြောရင်ပြောတဲ့အတိုင်းလည်း မလုပ်ဘူးလေ။ SKD ထုတ်တဲ့သူတွေက ဒီအချိန်မှာ စက်ရုံတစ်ရုံဆောက်ဖို့ဆို တော်ရုံတန်ရုံဘယ်လိုဆောက်နိုင်မှာတုံး BYD တွေ ဘာတွေပဲ စက်ရုံဆောက်ဦး။ စက်ရုံဆောက်ခတင်ပဲ ဒေါ်လာ(၄)(၅) သန်းကုန်တယ်။ မကုန်ဘူးဆိုတာတောင် အခုလက်ရှိဆောက်လုပ်ရေး ကုန်ကျစရိတ်နဲ့ သိန်း(၈)သောင်း သိန်း (၁) သိန်း ကုန်တယ်။ အဲဒီမှ စက်ရုံကြီးဆောက်ပြီးကာမှ ကားမရောက်သေးဘူး။ ကား part တွေထပ်ဝယ်ရဦးမှာ။ ဝယ်ပြီးတော့မှ အဲဒီကားကို ထုတ်ပြီးမှရောင်းရမယ်ဆိုတော့ အကုန်အကြပ်ရိုက်နေတာပေါ့။ ပေါ်လစီမငြိမ်တာပေါ့” ဟု ၎င်း ကဆိုသည်။ လက်ရှိ ကားဈေးကွက်အတွင်း ကျပ်သိန်း (၃၀ဝ)နှင့် (၁၅၀ဝ) ကြားကားများ အရောင်းအဝယ် ပုံမှန်ဖြစ်နေပြီး ဆီကား SKD များမှာ အရောင်းရဆုံးအဖြစ် နံပါတ် (၁) နေရာတွင် ရပ်တည်နေပြီး ပြည်ပမှအလုံးလိုက် တင်သွင်းသည့် EV CBU မှာ နံပါတ် (၂) နှင့် ပြည်တွင်းတွင် တစ်စိတ်တစ်ပိုင်းတပ်ဆင်သည့် EV SKD ကားများမှာ နံပါတ် (၃) နေရာတွင်သာ ရပ်တည်နေရ ကြောင်း သိရသည်။

ကိုးကား- NP News

မကွေးတိုင်းဒေသကြီးနှင့်စစ်ကိုင်းတိုင်းဒေသကြီးအောက်ပိုင်းတို့တွင် နေရာ ကွက်ကျား၊ မန္တလေးတိုင်းဒေသကြီး၊ ကယားပြည်နယ်နှင့် ရခိုင်ပြည်နယ်တို့တွင် နေရာကျဲကျဲနှင့်ကျန်တိုင်းဒေသကြီးနှင့်ပြည်နယ်တို့တွင် နေရာစိပ်စိပ် မိုးထစ်ချုန်း ရွာပြီး မကွေးတိုင်းဒေသကြီးတွင် နေရာကွက်၍ မိုးကြီးနိုင်သည်။ ရွာရန်ရာနှုန်းပြည့် ဖြစ်သည်။

(မိုး/ဇလ)

အင်အားပြင်းငလျင်ဒဏ်ခံစားခဲ့ရသော ဒေသများမှပြည်သူများအနေဖြင့် ငလျင်ဖြတ်သန်းရာလမ်းကြောင်းတစ်လျှောက်တွင် အဆောက်အအုံများ ပြန်မဆောက်ကြရန် ငလျင်ပညာရှင်များက သတိပေးပြောကြားမှုများ ရှိသည်။ မန္တလေးငလျင်လှုပ်ခတ်ခဲ့ရာ လမ်းကြောင်းတစ်လျှောက်တွင် မြစ်၊ ချောင်း၊ ရေအိုင်နှင့် လျှိုများ ရှိနေပြီး ငလျင်လှုပ်ခတ်ပြီးနောက်မြေအောက်တွင် မည်သို့ပြောင်းလဲမှုများရှိနေသည်ကို မသိနိုင်သည့် အတွက် အဆိုပါ ဖြတ်သန်းရာလမ်းကြောင်းတစ်လျှောက်တွင် နေအိမ်များ ပြန်လည်မဆောက်သင့်ကြောင်း မြန်မာနိုင်ငံ ဘူမိသိပ္ပံအသင်းအဖွဲ့ဝင် ပါမောက္ခဒေါက်တာစန္ဒီချစ်ကိုက ပြောသည်။ 

“ငလျင်ကြောင့် ပျက်စီးသွားသည့် အဆောက်အအုံတွေကို ငလျင်ကြော ဖြတ်သွားသော လမ်းကြောင်းပေါ်မှာ ခွမဆောက်ကြဖို့ လိုပါတယ်။ ဘာလို့လဲဆိုတော့ စစ်ကိုင်းပြတ်ရွေ့က ငလျင် မလှုပ်တာတောင် (၁) နှစ် ကို (၂) စင်တီမီတာလောက် ရွေ့တယ်ဆိုပြီး စာတမ်းတွေမှာ ဖော်ပြထား ပါတယ်။ ဒါ့ကြောင့် ဒီလှုပ်သွားတဲ့ ငလျင်လမ်းကြောင်းကိုတော့ မဖြစ်မနေ ရှောင်ဖို့အတွက် အကြံပြုတာပါ” ဟု ၎င်းက ဆိုသည်။

ငလျင်ပြတ်ရွေ့ပေါ်တွင် နေထိုင်ခြင်းထက် မနေထိုင်ခြင်းက ပိုမို ကောင်းမွန် ကြောင်းနှင့် အကယ်၍ မဖြစ်မနေပြန်လည်နေထိုင်မည်ဆိုပါက အဆောက် အအုံများကို ငလျင်ဒဏ်ခံနိုင်သည့် အဆောက်အအုံအဖြစ် တည်ဆောက် ရမည်ဖြစ်ကြောင်း မြေငလျင်ပညာရှင်တစ်ဦးက ပြောသည်။ “ငလျင်က လူကိုသတ်တာမဟုတ်ဘူး၊ အဆောက်အအုံက လူကိုသတ်တာဆိုတဲ့ အဆိုတစ်ခုလည်း ရှိပါတယ်။ ဒါကြောင့် ငလျင်ကြောပေါ်မှာ မဆောက် တာတော့ အကောင်းဆုံးပေါ့။ ဒါပေမဲ့ မဖြစ်မနေ ဆောက်ရတော့မယ် ဆိုရင်တော့ ငလျင်ဒဏ်ခံနိုင်အောင်နဲ့ ငလျင်ဖြစ်လာရင် ဘယ်လို ရင်ဆိုင်မယ် ဆိုတာတွေကိုပါ ကြိုတင်စီစဉ်ထားဖို့လိုပါလိမ့်မယ်” ဟု ၎င်းက ပြောသည်။

မန္တလေးငလျင်ကြောင့် ကမ္ဘာပေါ်တွင် အရှည်ဆုံးပြတ်ရွေ့ကြောင်းတစ်ခု ဖြစ်ပေါ်ခဲ့ပြီး အဆိုပါ ပြတ်ရွေ့ကြောမှာ ကီမီတာ (၄၆၀) အထိ ရှည်လျား ကာ ရွှေဘိုဘက်မှစတင်ကာ ပျော်ဘွယ်၊ ရမည်းသင်း၊ နေပြည်တော်ကို ဖြတ်၍ ဖြစ်ပေါ်လာခဲ့ခြင်းဖြစ်ကြောင်း မြန်မာနိုင်ငံဘူမိသိပ္ပံအသင်း၏ အင်အားပြင်း ငလျင်ကြီးလှုပ်ခတ်ပြီးနောက်ပိုင်း ဘူမိသိပ္ပံဆိုင်ရာ ကနဦး လေ့လာတွေ့ရှိချက်များအရ သိရသည်။

ကိုးကား- NP News

ဘင်္ဂလားပင်လယ်အော်အ‌ခြေအနေ။  ကပ္ပလီပင်လယ်ပြင်၊  ဘင်္ဂလားပင်လယ်အော်တောင်ပိုင်းနှင့် အရှေ့ အလယ်ပိုင်းတို့တွင် မုတ်သုံလေ အားနည်းနေပြီး၊ ကျန်ဘင်္ဂလားပင်လယ်အော်တွင် တိမ်အသင့်အတင့်မှ တိမ် ထူထပ်နေပါသည်။

ယနေ့ညနေအထိခန့်မှန်းချက်။ မန္တလေးတိုင်းဒေသကြီး၊ မကွေးတိုင်းဒေသကြီးနှင့် စစ်ကိုင်းတိုင်းဒေသကြီး အောက်ပိုင်းတို့တွင် နေရာကွက်ကျား၊ နေပြည်တော်၊ စစ်ကိုင်းတိုင်းဒေသကြီးအထက်ပိုင်း၊ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာကျဲကျဲနှင့် ကျန် တိုင်းဒေသကြီးနှင့် ပြည်နယ်တို့တွင် နေရာစိပ်စိပ် မိုးထစ်ချုန်းရွာမည်။ ရွာရန်ရာနှုန်းပြည့် ဖြစ်ပါသည်။

မြန်မာ့ပင်လယ်ပြင်။ လှိုင်းအသင့်အတင့်ရှိမည်။ လှိုင်းအမြင့်မှာ မြန်မာ့ကမ်းရိုးတန်းတစ်လျှောက်နှင့် ကမ်းလွန် ပင်လယ်ပြင်တို့တွင် ၅ ပေမှ ၇ ပေခန့် ရှိနိုင်ပါသည်။

နောက် ၂ ရက်အတွက်ခန့်မှန်းချက်။ မြန်မာနိုင်ငံအလယ်ပိုင်းဒေသများတွင် ထစ်ချုန်းမည့် အခြေအနေများ ဆက်လက် ဖြစ်ပေါ်နေမည်။

နေပြည်တော်နှင့်အနီးတစ်ဝိုက်အတွက်ယနေ့ညနေအထိခန့်မှန်းချက်။   နေရာကွက်ကျား မိုးထစ်ချုန်းရွာမည်။ ရွာရန်ရာနှုန်းပြည့် ဖြစ်ပါသည်။ 

ရန်ကုန်မြို့နှင့်အနီးတစ်ဝိုက်အတွက်ယနေ့ညနေအထိခန့်မှန်းချက်။    နေရာကွက်ကျား မိုးထစ်ချုန်းရွာမည်။ ရွာရန်ရာနှုန်းပြည့် ဖြစ်ပါသည်။ 

မန္တလေးမြို့နှင့်အနီးတစ်ဝိုက်အတွက်ယနေ့ညနေအထိခန့်မှန်းချက်။  နေရာကွက်ကျား မိုးထစ်ချုန်းရွာမည်။ ရွာရန်ရာနှုန်းပြည့် ဖြစ်ပါသည်။        

Source: www.moezala.gov.mm

မန္တလေးတိုင်းဒေသကြီး၊ တံတားဦးခရိုင် ၊ တံတားဦးမြို့နယ်တွင် တောင်သူများအား ၂၀၂၅ ခုနှစ် မိုးရာသီ စိုက်ပျိုး စရိတ်ချေးငွေများကို မြန်မာ့လယ်ယာဖွံ့ဖြိုးရေးဘဏ်မှ မေလ ၁၉ ရက်နေ့ နံနက်ပိုင်းက စတင်ကာ ထုတ်ချေး ပေးလျက်ရှိကြောင်းသိရသည် ။

ထိုသို့ထုတ်ချေးပေးရာတွင် တောင်သူများအနေဖြင့် စိုက်ပျိုးစရိတ်ချေးငွေများကို အချိန်စေ့ချေးငွေပြေကျေမှသာ (ယခင်ကြွေးကျန်ကင်းရှင်းမှသာ) ချေးငွေအသစ်ထုတ်ချေးခွင့်ရရှိမည်ဖြစ်ကြောင်း မြန်မာ့လယ်ယာဖွံ့ဖြိုးရေးဘဏ်က အသိပေးကြေညာထားသည် ။ ၂၀၂၅ ခုနှစ်မိုးရာသီ စိုက်ပျိုးစရိတ်ချေးငွေများကို ယခင် အရင်း၊ အတိုး ပြေကျေစွာ ပေးဆပ်ပြီးသည့် တောင်သူများကိုသာ မိုးရာသီစိုက်ပျိုးချိန်အမီ  စတင်ထုတ်ချေးပေးကြောင်း ယခင်နှစ်အတိုင်း တစ်နှစ်ကို အတိုးနှုန်း ၅ ရာခိုင်နှုန်းဖြင့် သက်ဆိုင်ရာ မြန်မာ့လယ်ယာဖွံ့ဖြိုးရေးဘဏ်ခွဲများတွင် ထုတ်ချေးပေး ကြောင်းလည်း သိရသည် ။

ထို့နောက် မြို့နယ်လယ်ယာဖွံ့ဖြိုးရေးဘဏ်ခွဲ မန်နေဂျာက တောင်သူများအား ယခုနှစ် မိုးစပါးနှင့် အခြားသီးနှံများ စိုက်ပျိုးစရိတ်ချေးငွေများ ချေးပေးမည့်အစီအစဉ်များနှင့် ချေးငွေများ ပြန်လည်ပေးသွင်းရမည့် ကာလအတွင်း ကြွေးကျန်မရှိစေရေး ချေးငွေရယူလိုသည့်တောင်သူများအနေဖြင့်စပါးသီးနှံ တစ်ဧကလျှင် ငွေကျပ် တစ်သိန်း ငါးသောင်းကျပ်၊ အခြားသီးနှံများအတွက်  တစ်ဧကလျှင် တစ်သိန်းနှုန်းကျပ် ချေးယူနိုင်ကြောင်း အကျယ်တဝင့် ရှင်းလင်းပြောကြားပြီး တံတားဦးမြို့နယ် မြန်မာ့လယ်ယာဖွံ့ဖြိုးရေးဘဏ်ခွဲအနေဖြင့် မေလ ၂၀ ရက်နေ့တွင် ကျပ်ပြင် ကျေးရွာအုပ်စု မှ တောင်သူ(၇၈)ဦး ၊ ဧကပေါင်းအတွက် (၄၃၀)ဧကအတွက် ၂၀၂၅ ခုနှစ် မိုးရာသီ စိုက်ပျိုးစရိတ် ချေးငွေကျပ်သိန်း(၄၃၀)ကို တောင်သူများလက်ဝယ်အရောက် ချေးငွေများကို ထုတ်ချေးပေးခဲ့ကြောင်း ကျန်ရှိသည့် ကျေးရွာအုပ်စုများနှင့် ကျေးရွာများကိုလည်း ထုတ်ချေးရေးကာလအတွင်း ဆက်လက်ထုတ်ချေးပေးသွားမည် ဖြစ်ကြောင်း မြို့နယ်လယ်ယာဖွံ့ဖြိုးရေး ဘဏ်ခွဲမှ တာဝန်ရှိသူတစ်ဦး၏ ပြောကြားချက်အရသိရသည်။ 

ပေးပို့သူ-  ဦးရဲတင့်(ပြန်/ဆက်)

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ်တွင် ၂၀၂၅-၂၀၂၆ ပညာသင်နှစ် ကျောင်းအပ်နှံရေး သီတင်းပတ် မြေစိုက်ပိုစတာ (ဗီနိုင်း) စိုက်ထူပွဲကို မေလ ၁၉ ရက်နေ့၊ နံနက် (၈) နာရီက တံတားဦးမြို့ အမှတ် (၂) ရပ်ကွက် ဆုံကုန်းရပ် တံတားဦး-မြို့သာကားလမ်း မြို့အဝင်ဆိုင်းဘုတ်အနီးတွင် ကျင်းပကြောင်း သိရသည် ။

 ရှေးဦးစွာ မြို့နယ်ပညာရေးမှူးနှင့်ဝန်ထမ်းများ ၊ အခြေခံပညာအထက်တန်း ၊ အလယ်တန်းကျောင်းများမှ ကျောင်းအုပ် ဆရာကြီးများနှင့်ဆရာ ၊ ဆရာမများက ၂၀၂၅-၂၀၂၆ပညာသင်နှစ် ကျောင်းအပ်နှံရေး သီတင်းပတ် မြေစိုက် ပိုစတာ (ဗီနိုင်း)အား စိုက်ထူပေးကြသည် ။ ထို့နောက် မင်္ဂလာအချိန်တွင် တံတားဦးခရိုင် စီမံအုပ်ချုပ်ရေးအဖွဲ့ ဥက္ကဋ္ဌ ဦးကျော်ငြိမ်းနှင့် အဖွဲ့ဝင်များ၊ တံတားဦးမြို့နယ် စီမံအုပ်ချုပ်ရေးအဖွဲ့ ဥက္ကဋ္ဌ ဦးဖြိုးဇော်ကိုကိုနှင့် အဖွဲ့ဝင်များ၊ တံတားဦးခရိုင်၊ ပညာရေးမှူး(တာဝန်ခံ) ဆရာကြီး ဦးစိုးတင့်၊ မြို့နယ်ပညာရေးမှူး ဒေါ်စန်းဥတို့က မြေစိုက်ပိုစတာအား အမွှေးနံ့ရည်များ ပက်ဖြန်းပေးကြပြီး စုပေါင်းအမှတ်တရ ဓါတ်ပုံရိုက်ကူးကြသည်။ မြေစိုက် ပိုစတာတွင် “ကျောင်းနေအရွယ်ကလေးအားလုံး စဉ်ဆက်မပြတ် ပညာသင်ယူဖို့ ကျောင်းအပ်နှံကြပါစို့” ပါရှိပြီး အဆိုပါဆောင်ပုဒ်နှင့်အညီ အခြေခံပညာကျောင်းများ ကျောင်းအပ်လက်ခံခြင်းကို မေ(၂၂)ရက်နေ့မှ ဇွန်(၁) ရက်နေ့အထိ ကျောင်းအပ်နှံရေးသီတင်းပတ်အဖြစ် ဆောင်ရွက်မည်ဖြစ်ကြောင်းသိရသည် ။

အဆိုပါမြေစိုက်ပိုစတာပွဲအခမ်းအနားသို့ ခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များ၊ မြို့နယ်စီမံအုပ်ချုပ်ရေး အဖွဲ့ ဥက္ကဋ္ဌနှင့်အဖွဲ့ဝင်များ ၊ ဌာနဆိုင်ရာများ၊ မြို့နယ်မိခင်နှင့်ကလေးစောင့်ရှောက်ရေးအသင်းဝင်များ၊ မြို့နယ် အမျိုးသမီးရေးရာအဖွဲ့ဝင်များ၊ ခရိုင်/မြို့နယ်ပညာရေးဝန်ထမ်းများ ၊အခြေခံပညာကျောင်းများမှ ဆရာ/ ဆရာမများ၊ ကျောင်းသား/ သူများ တက်ရောက်ကြကြောင်းသိရသည်။

ပေးပို့သူ- ဦးရဲတင့် (ပြန်/ဆက်)

လားရှိုးမြို့တွင်း နေထိုင်သူများအတွက် နိုင်ငံသားစိစစ်ရေးကတ်နှင့် အခြား လူဝင်မှုကြီးကြပ်ရေးကိစ္စများစတင်ပြုလုပ်ပေးနေပြီဖြစ်ကြောင်း လားရှိုး မြို့ခံ အချို့၏ ပြောကြားချက်များအရ သိရသည်။

မေ ၁၉ ရက်မှ စတင်ကာ လားရှိုးမြို့ပေါ်တွင် နေထိုင်သူများအတွက် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက လားရှိုးမြို့နယ် ဦးစီးမှူးရုံးတွင် မှတ်ပုံတင်များပြုလုပ်ပေးခြင်း၊ ပျောက်ဆုံးခဲ့သည့် မှတ်ပုံတင်များ၊ အိမ်ထောင်စုစာရင်းများ၊ မွေးတိုးပြုလုပ်ခြင်းများ၊ UID ကောက်ယူခြင်း အစရှိသည်တို့ကို ပြုလုပ်ပေးနေခြင်းဖြစ်ကြောင်း သိရ သည်။

“ဒီနေ့ကစပြီး လုပ်ပေးနေတယ်။ မှတ်ပုံတင်ပျောက်သွားတဲ့သူတွေ အတွက်ရော၊ တခြားသန်းခေါင်စာရင်း ပျောက်ဆုံးပျက်စီးသွားတာတွေ အတွက်ရော၊ UID ကောက်ယူတာရော ပြန်လုပ်ပေးနေတယ်။ ဒီနေ့ စလုပ်ပေးတာပေါ့” ဟု လားရှိုးမြို့ခံတစ်ဦးက ပြောကြားသည်။

လားရှိုးမြို့၏ အခြေအနေမှာ ဌာနဆိုင်ရာယန္တရားများ ပုံမှန် လည်ပတ်နိုင်ရန် ဆောင်ရွက်လျက်ရှိပြီး လျှပ်စစ်မီးမှာမူ မြို့ပေါ်အချို့ ရပ်ကွက်များတွင်သာ ရရှိသေးကြောင်း သိရသည်။

“လျှပ်စစ်မီးကတော့ ရတဲ့နေရာတွေမှာတောင် ပြတ်နေတယ်။ နေရာ တော်တော်များများတော့ မရသေးဘူး။ ရေကတော့ စည်ပင်က ဖြန့်ဖြူး နိုင်အောင် လုပ်ပေးနေတာတွေ့တယ်။ တခြားဌာနဆိုင်ရာတွေကတော့ ပြန်လည်ပတ်ဖို့ ကြိုးစားနေတာ တွေ့ရတယ်” ဟု လားရှိုးမြို့ခံတစ်ဦးက ပြောကြားသည်။

အလားတူ လားရှိုးမြို့ရှိ ခုတင် (၅၀၀) အထွေထွေရောဂါကုဆေးရုံကြီးရှိ အရေးပေါ်ဌာနကို မေ ၅ ရက်နေ့ နံနက်ပိုင်းမှစတင်ကာ ပြန်လည် ဖွင့်လှစ်ခဲ့ကြောင်း သိရသည်။

ပြည်သူ့ဆေးရုံကြီးသို့ လာရောက်ဆေးဝါးကုသကြသည့်လူနာများကို လတ်တလောတွင် နံနက် ၈ နာရီမှ ၁၂ နာရီ၊ မွန်းလွဲ ၁ နာရီမှ ညနေ ၅ နာရီအထိ ဆရာဝန်ကြီးများနှင့် ကျန်းမာရေးဝန်ထမ်းများက ကြည့်ရှုကုသ ပေးမည်ဖြစ်ကြောင်း သိရသည်။

ကိုးကား- Eleven Media Group

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ်စိုက်ပျိုးရေးဦးစီးဌာနမှ တောင်သူများအား အသိပညာပေးဟောပြောပွဲကို မေလ ၁၉ ရက်နေ့၊ နံနက် (၁၀) နာရီက တံတားဦးမြို့ စိုက်ပျိုးရေးဦးစီးဌာနရုံး အစည်းအဝေးခန်းမရှေ့၌ ကျင်းပကြောင်းသိရသည် ။

အခမ်းအနားတွင် တံတားဦးမြို့နယ် စိုက်ပျိုးရေးဦးစီးဌာန ဦးစီးအရာရှိ ဦးကနေဒီထွန်းက ပြောကြားရာတွင် ပြူကန် ကန်မှ မိုးစပါးစိုက် ရေသောက်စနစ်ဖြင့် စိုက်ပျိုးကြမည့်တောင်သူများအနေဖြင့် ကန်ရေမရရှိမည့် အခြေအနေပေါ်တွင် သက်တမ်းတိုမျိုးများ၊ ရေအနည်းလိုစပါးမျိုးများနှင့် စိုက်နည်းစနစ်များ ပြောင်းလဲစိုက်ပျိုးကြရေး၊တစ်ပိုင်တစ်နိုင်ရေကန်များပြုလုပ်ခြင်းတို့အပြင် စုပေါင်း၍ ပျိုးသင့်ကြောင်းတို့ကို အကျယ်တဝင့် ရှင်းလင်း ပြောကြားသည် ။

ဆက်လက်၍ တောင်သူများ၏ ဆွေးနွေးတင်ပြချက်များအပေါ် မြို့နယ်ဦးစီးအရာရှိနှင့် ဝန်ထမ်းများက လိုအပ်သည်များကို ဖြည့်စွက်ရှင်းလင်းကြပြီး တောင်သူများအား သက်ဆိုင်ရာဝန်ထမ်းများက ပူးပေါင်းဆောင်ရွက်ပေးသွားမည်ဖြစ်ကြောင်းသိရသည်။

ပေးပို့သူ- ဦးရဲတင့် (ပြန်/ဆက်)