ဂျာမနီသည် ရုရှားကို တိုက်ခိုက်ရန် ယူကရိန်းသို့ လက်နက်များ ထောက်ပံ့ခြင်းဖြင့် နာဇီအတိတ်ကို ပြန်လည်ရှင်သန်စေနေသည် ဟု ရုရှားနိုင်ငံ၊ ဒူမား ဥက္ကဋ္ဌ Vyacheslav Volodin က ပြောကြားခဲ့သည်။ ဒုတိယကမ္ဘာစစ်အပြီး ဆယ်စုနှစ်များအကြာတွင် ဘာလင်၏ သဘောထားသည် မော်စကိုနှင့် လက်နက်ကိုင်ပဋိပက္ခအသစ်ကို ဖြစ်ပေါ်စေ နိုင်ကြောင်း အဆိုပါအကြီးအကဲက သတိပေးခဲ့သည်။

ဗိုလိုဒင် သည် ဗုဒ္ဓဟူးနေ့ (ဇွန် ၁၁) တွင် ဒူမား၏တရားဝင် ဝက်ဘ်ဆိုက်၌ ထုတ်ပြန်ခဲ့သော စာတစ်စောင်တွင် ယူကရိန်းသို့ ဂျာမနီ၏ စစ်ရေးအကူအညီ ဆက်လက်ထောက်ပံ့မှုအပေါ် အမျက်ထွက်နေသည်ဟု ဖော်ပြခဲ့သည်။

“ရုရှားပြည်သူများကို တိုက်ခိုက်ရာတွင် အသုံးပြုနေသော ယူကရိန်းရှိ နီယိုနာဇီအာဏာရှင်စနစ်သို့ ဂျာမနီက လက်နက်များ လွှဲပြောင်းပေးခြင်းသည် မိမိတို့နှစ်နိုင်ငံအကြား ပဋိပက္ခဖြစ်စေရန် အကြောင်းအရင်း တစ်ခုပင်ဖြစ်သည်” ဟု ၎င်းက ပြောကြားခဲ့သည်။

ဗိုလိုဒင်က ဒုတိယကမ္ဘာစစ်အပြီးတွင် ပထမဆုံးအကြိမ်အဖြစ် ဂျာမန် တင့်ကားများ မကြာသေးမီက ယူကရိန်း၏ Kursk ဒေသစစ်ဆင်ရေးတွင် ရုရှားနယ်မြေပေါ်သို့ ရောက်ရှိလာခဲ့မှုကို ထောက်ပြခဲ့သည်။ ဘာလင် တွင် မော်စကိုအထိ ဝေးကွာသော ပစ်မှတ်များကို တိုက်ခိုက်နိုင်သည့် Taurus ဒုံးပျံများ ယူကရိန်းသို့ ပေးပို့ရန် ဆွေးနွေးမှုများ ရှိနေသည်မှာ ပိုမိုအရှိန်မြှင့်တင်နေခြင်းဖြစ်ကြောင်း ၎င်းက သတိပေးခဲ့ပြီး အဆိုပါ အဆင့်မြင့်လက်နက်များကို အသုံးပြုရန် ဂျာမန်စစ်သားများ လိုအပ်မည် ဖြစ်သည်ဟု ၎င်းကဆိုသည်။

“ဂျာမန်ဒုံးကျည်များနှင့် ရုရှားကို တိုက်ခိုက်ရန် လုပ်ဆောင်မှုကို ဂျာမန် အရာရှိများကသာ လုပ်ဆောင်နိုင်မည်ဖြစ်ပြီး ထိုကဲ့သို့သော လုပ်ဆောင်မှုသည် ဂျာမနီနှင့် ဂျာမန်လူမျိုးများကို ရုရှားနှင့် နောက်ထပ်တစ်ဖန် လက်နက်ကိုင်ပဋိပက္ခဆီသို့ ထပ်မံတွန်းပို့နေသည်” ဟု ၎င်းက သတိပေးခဲ့ပြီး ဘွန်ဒက်စတက် (Bundestag) အမတ်များတွင် ရုရှားနှင့်စစ်ဖြစ်ရန် ဂျာမန်မဲဆန္ဒရှင်များထံမှ ထောက်ခံမှုရရှိထားခြင်းရှိ ၊ မရှိ မေးခွန်းထုတ် ခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဆာခရာမန်တို၊ ပြည်တွင်းရေး

အမေရိကန်ပြည်ထောင်စုရှိ ကယ်လီဖိုးနီးယားပြည်နယ်က သမ္မတ ဒေါ်နယ်ထရမ့်၏အစိုးရအဖွဲ့ကို ဇွန်လ ၉ ရက်တွင် တရားစွဲဆိုလိုက်ကြောင်းသိရသည်။ လော့ အိန်ဂျလိမြို့၌ဖြစ်ပွားနေသော ဆူပူဆန္ဒပြမှုများကိုထိန်းသိမ်းရန် ထရမ့်အစိုးရအဖွဲ့က အမျိုးသားအစောင့်တပ်ဖွဲ့ကိုစေလွှတ်မှုနှင့်ပတ်သက်၍ ကယ်လီဖိုးနီးယားပြည်နယ်က တရားစွဲဆိုခြင်းဖြစ်သည်။

ထရမ့်အစိုးရအဖွဲ့က နိုင်ငံအတွင်းရှိတရားမဝင်နေထိုင်သူများကို ဖမ်းဆီးနှင်ထုတ်ရန်လုပ်ဆောင်နေစဉ်လော့အိန်ဂျလိမြို့၌ ဆန္ဒပြမှုများဖြစ်ပွားရာမှ ဆူပူမှုအထိရောက်ရှိလာသည့်အတွက် ထိုပဋိပက္ခကို ထိန်းသိမ်းရန် အမျိုးသားအစောင့်တပ်ဖွဲ့ကို စေလွှတ်လိုက်ခြင်းဖြစ်သည်။

သို့သော် အမျိုးသားအစောင့်တပ်ဖွဲ့ကို စေလွှတ်ခြင်းသည် တရားမဝင်ကြောင်းနှင့် မလိုအပ်သည့်ဆောင်ရွက်ချက်ပင်ဖြစ်ကြောင်း၊ ယင်းကြောင့်မလိုလားအပ်သည့် ပဋိပက္ခအခြေအနေများကို ပိုမိုမြင့်တက်လာစေခြင်းဖြစ်ကြောင်း ကယ်လီဖိုးနီးယားပြည်နယ်အုပ်ချုပ်ရေးမှူးနှင့်ရှေ့နေချုပ်တို့ ကပြောထားသည်။

အဆိုပါတရားစွဲဆိုမှုတွင် သမ္မတ ဒေါ် နယ်ထရမ့်၊ ကာကွယ်ရေးဝန်ကြီး ပိဟက်ဆက်နှင့် ကာကွယ်ရေးဝန်ကြီးဌာနတို့ကို ဖွဲ့စည်းပုံအခြေခံဥပဒေကိုချိုးဖောက်မှု၊ အခန်း(၁၀) တွင်ပါဝင်သော သမ္မတ၏ လုပ်ပိုင်ခွင့်ကို ကျော်လွန်လုပ်ဆောင်မှုတို့ ဖြင့် တရားစွဲဆိုထားခြင်းဖြစ်ကြောင်း သိရသည်။

Ref: Xinhua

Photo - AP News

အီလွန်မက်က ဗုဒ္ဓဟူးနေ့ (ဇွန် ၁၁) တွင် သမ္မတ ဒေါ်နယ်ထရမ့်နှင့် ပတ်သက်သည့် ၎င်း၏လတ်တလော ဆိုရှယ်မီဒီယာပို့စ်အချို့ကို နောင်တရမိကြောင်း ပြောကြားခဲ့သည်။

“လွန်ခဲ့သည့်သီတင်းပတ်က သမ္မတနှင့်ပတ်သက်သည့် မိမိ၏ ပို့စ်တချို့ ကို နောင်တရမိပါသည်။ ထိုပို့စ်များက ထောက်ပြသင့်သည်ထက် ကျော်လွန်သွားခဲ့ပါသည်” ဟု မက်စ်က X တွင် ရေးသားခဲ့သည်။

လွန်ခဲ့သည့်သီတင်းပတ်က ၎င်းတို့နှစ်ဦး၏ ဆိုရှယ်မီဒီယာ ပလက်ဖောင်းများပေါ်တွင် အပြန်အလှန်ဝေဖန်မှုများ ပြုလုပ်ခဲ့သည့်အတွက် မက်နှင့် ထရမ့်တို့၏ ဆက်ဆံရေး သိသိသာသာ ပျက်ပြားခဲ့သည်။

မကြာသေးမီကာလအထိ မက်သည် ထရမ့်၏ အစိုးရအဖွဲ့တွင် အလွန် နီးကပ်သော မဟာမိတ်ဖြစ်ခဲ့ပြီး အစိုးရ၏ “အစိုးရစွမ်းဆောင်ရည်ဌာန” (Department of Government Efficiency) ၏ ခေါင်းဆောင်အဖြစ် တာဝန်ထမ်းဆောင်ကာ ဖက်ဒရယ်အလုပ်သမားများအား အစုလိုက် အပြုံလိုက် လျှော့ချမှုများကို ဦးဆောင်ခဲ့သည်။

သို့သော် ထရမ့်၏ အခွန်လျှော့ချမှုနှင့် ပြည်တွင်းမူဝါဒဆိုင်ရာ ဥပဒေကြမ်းအား “ရွံစရာကောင်းသော အကျင့်ပျက်မှု” (Disgusting Abomination) ဟု မက် က ဝေဖန်ခဲ့သည့်အခါတွင် ၎င်းတို့၏ ဆက်ဆံရေး ပျက်ပြားခဲ့သည်။ အဆိုပါဥပဒေကြမ်းသည် အမေရိကန်အစိုးရ၏ ဘဏ္ဍာရေးအပေါ် ဆိုးကျိုးသက်ရောက်မည်ဟု မျှော်မှန်းခဲ့ကြသည်။

တက်စလာ CEO ဖြစ်သူ မက် သည် အမေရိကန်အစိုးရ၏ ငွေကြေးအသုံးစရိတ်နှင့် ဘတ်ဂျက်လိုငွေပြမှုများအပေါ် စိုးရိမ်မှုများ ဖြစ်ပေါ်စေ ခဲ့သည့် ထရမ့်နှင့် အခြားရီပတ်ပလီကန်ဥပဒေပြုသူများ၏ လွန်ခဲ့သော နှစ်များက မှတ်ချက်များကို မျှဝေခြင်းဖြင့် ဝေဖန်မှုများကို ပိုမို ပြင်းထန်စွာ ပြုလုပ်ခဲ့သည်။

တက်စလာ (TSLA) ရှယ်ယာဈေးနှုန်းများသည် အီလွန်မက်၏ X တွင် ဝေဖန်မှုများကို ပြန်လည်ရုပ်သိမ်းခြင်းနှင့်အတူ နောက်တစ်နေ့ ဈေးကွက် မတိုင်မီ ကုန်သွယ်မှုတွင် ၂% တက်လာခဲ့သည်။

ကိုးကား- CNN

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မြောက်ကိုရီးယားဘက်သို့ အသံချဲ့စက်များဖြင့် ဝါဒဖြန့်ချိမှုများ ထုတ်လွှင့် ခြင်းကို တောင်ကိုရီးယားစစ်တပ်က ရပ်ဆိုင်းလိုက်ပြီဖြစ်သည်။ ထိုသို့ ပြုလုပ်ခြင်းမှာ သမ္မတသစ် လီဂျေမြောင် (Lee Jae-myung) က ရွေးကောက်ပွဲအတွင်း ကတိပြုထားသည့်အတိုင်း ဖြစ်သည်။

“အထက်အမိန့်အရ အသံချဲ့ထုတ်လွှင့်မှုကို ရပ်ဆိုင်းလိုက်ပါပြီ” ဟု တောင်ကိုရီးယားသတင်းဌာန ယွန်ဟတ် (Yonhap) က ဇွန် ၁၁ ရက်တွင် စစ်အရာရှိတစ်ဦး၏ ပြောကြားချက်ကို ကိုးကားဖော်ပြခဲ့သည်။

တောင်ကိုရီးယား ကာကွယ်ရေးဝန်ကြီးဌာနက အသံချဲ့စက်ဖြင့် ဝါဒ ဖြန့်ချိမှုများ ရပ်ဆိုင်းရခြင်းမှာ ကိုရီးယားနှစ်နိုင်ငံအကြား ငြိမ်းချမ်းရေးနှင့် ယုံကြည်မှု ပြန်လည်တည်ဆောက်ရေး ကတိကဝတ်ကို လက်တွေ့ အကောင်အထည်ဖော်ခြင်းဖြစ်ကြောင်း ပြောကြားခဲ့သည်။

ရွေးကောက်ပွဲအတွင်း လီဂျေမြောင်က ၎င်း သမ္မတဖြစ်လာပါက မြောက် ကိုရီးယားနှင့် တင်းမာမှုလျှော့ချရန် နယ်စပ်ရှိ ဝါဒဖြန့်ချိမှုများကို ရပ်တန့်မည်ဟု ကတိပြုခဲ့သည်။ သမ္မတရာထူး စတင်ရယူပြီး တစ်ပတ်အတွင်း ထိုကဲ့သို့ လုပ်ဆောင်ချက်ကို ပြုလုပ်လိုက်ခြင်းဖြစ်သည်။

တောင်ကိုရီးယား ပြန်လည်ပေါင်းစည်းရေး ဝန်ကြီးဌာနကလည်း ဇွန် ၉ ရက် က အရပ်ဘက်အဖွဲ့အစည်းများအား မြောက်ကိုရီးယားဘက်သို့ ကြွေးကျော်စာစောင်များ မပျံ့နှံ့စေရန် တောင်းဆိုခဲ့သည်။ ထိုသို့အစီအမံများသည် နှစ်နိုင်ငံအကြား ဆွေးနွေးမှုများအတွက် အနှောင့်အယှက်ကင်းသော ပတ်ဝန်းကျင်တစ်ရပ် ဖန်တီးရန် ရည်ရွယ်ဟန်ရှိသည်။

မကြာသေးမီက ၂၀၂၄ ခုနှစ်၊ ဇွန်လတွင် မြောက်ကိုရီးယားက ပြုံယမ်း အနေဖြင့် တောင်ကိုရီးယားနယ်မြေအတွင်းသို့ အမှိုက်များပါသည့် လေပူဖောင်းများ အကြိမ်ကြိမ်လွှတ်တင်ခဲ့သည်ကို တုန့်ပြန်မှုအဖြစ် တောင်ကိုရီးယားဘက်က နယ်စပ်တွင် အသံချဲ့စက်ဖြင့် ဝါဒဖြန့်ချိမှုများ ပြန်လည် စတင်ခဲ့ခြင်းဖြစ်သည်။

တောင်ကိုရီးယား၏ ဝါဒဖြန့်ချိမှုများတွင် K-Pop တေးဂီတနှင့် ရောစပ် ထားသော ကမ္ဘာ့သတင်းများ ပါဝင်ပြီး မြောက်ကိုရီးယားဘက်သို့ ဦးတည်ထားသည့် အသံချဲ့စက်များစွာဖြင့် ထုတ်လွှင့်လေ့ရှိသည်။ အဆိုပါ အသံချဲ့စက်များမှ အသံသည် မြောက်ကိုရီးယားနယ်မြေအတွင်းသို့ ကီလိုမီတာ ၂၀ ကျော်အထိ ပျံ့နှံ့နိုင်သည်ဟု သိရသည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတက Los Angeles ကို ပြင်ပအင်အားစုများ ဝင်ရောက် နှောင့်ယှက်နေသည်ဟု ပြောကြားကာ တပ်မတော်အား တည်ငြိမ်စေရန် နှင့် လုံခြုံရေးပြန်လည်ထူထောင်ရန် လိုအပ်ကြောင်း ထုတ်ဖော်ပြောဆို ခဲ့သည်။

“မိမိတို့သည် Los Angeles ကိုပြန်လည်တည်ငြိမ်အေးချမ်းစေမည်။ အဆိုပါမြို့တော်အား ၎င်း၏လွတ်လပ်မှု၊ ၎င်း၏အလှတရားနှင့် လုံခြုံမှု ကို ပြန်လည်ပေးအပ်မည်” ဟု အမေရိကန်သမ္မတ Donald Trump က ဇွန် ၁၀ ရက်နေ့တွင် North Carolina ရှိ Fort Bragg ၌ California ပြည်နယ်၏ တင်းမာမှုများနှင့်ပတ်သက်၍ မှတ်ချက်ပြုခဲ့သည်။

လွန်ခဲ့သည့်ရက်အနည်းငယ်အတွင်း သမ္မတ Trump သည် California ပြည်နယ်အုပ်ချုပ်ရေးမှူး Gavin Newsom နှင့် မြို့တော်ဝန် Karen Bass တို့၏ ကန့်ကွက်မှုများကို လျစ်လျူရှုကာ လူဝင်မှုကြီးကြပ်ရေးဆိုင်ရာ ကန့်သတ်မှုများကို ဆန္ဒပြမှုများကို နှိမ်နင်းရန် Los Angeles သို့ အမျိုးသားကာကွယ်ရေးတပ်အင်အား ၄,၀၀၀ နှင့် မရိန်းတပ်သား ၇၀၀ ကို စေလွှတ်ခဲ့သည်။

Fort Bragg ရှိ တပ်သားများအား ပြောကြားရာတွင် သမ္မတ Trump က ဖက်ဒရယ်ပစ္စည်းများနှင့် တာဝန်ရှိသူများအား ကာကွယ်ရန် တပ်ဖွဲ့ဝင် များစေလွှတ်မှုသည် လိုအပ်ကြောင်း ပြောကြားခဲ့ပြီး တပ်မတော်၏ ဝင်ရောက်စွက်ဖက်မှုမရှိပါက မြို့တော်သည် မီးလောင်ပျက်စီးသွားမည် ဟု ၎င်းက ဆိုခဲ့သည်။

“ထိုအစိုးမရသည့် အခြေအနေကို မိမိတို့အနေဖြင့် ဆက်လက်ခွင့်ပြု၍ မရပါ။ ဖက်ဒရယ်အေးဂျင့်တွေကို ဆက်တိုက်ခိုက်ခွင့်၊ အမေရိကန် မြို့ တစ်မြို့ကို အခြားနိုင်ငံက ရန်သူတွေက ကျူးကျော်သိမ်းပိုက်ခွင့် မည်သည့် အခါမျှ ပေးမည်မဟုတ်ပါ” ဟု သမ္မတ Trump က ပြောကြားခဲ့ပြီး ဆန္ဒပြ သူများကို အမေရိကန်အလံအစား အခြားနိုင်ငံများ၏အလံများကို “ဂုဏ်ယူစွာ သယ်ဆောင်လာသည့်” ရန်လိုသူများအဖြစ် သရုပ်ဖော် ခဲ့သည်။

သမ္မတသည် “ထိုနိုင်ငံခြားရန်သူ” ဆိုသည်မှာ အဘယ်နည်းဟု တိတိကျကျ မဖော်ပြခဲ့သော်လည်း Los Angeles တွင် မက္ကဆီကန် အလံများ ကိုင်ဆောင်ထားသည့် ဆန္ဒပြသူများစွာကို ရည်ညွှန်းဟန်ရှိသည်။ အမေရိကန်၏ ဒုတိယအကြီးဆုံးမြို့ဖြစ်သော Los Angeles တွင် လူဦးရေ ၁.၃၅ သန်းကျော်ရှိသည့် ရွှေ့ပြောင်းနေထိုင်သူများအနက် အများစုမှာ မက္ကဆီကန်မျိုးနွယ်ဝင်များဖြစ်သည်။

သမ္မတက Los Angeles ရှိ ဆန္ဒပြမှုများသည် “ထိန်းချုပ်မရနိုင်သော ရွှေ့ပြောင်းနေထိုင်မှု” ကြောင့်ဖြစ်ပြီး ဥရောပတွင် ဖြစ်ပျက်ခဲ့သည် များနှင့် ဆင်တူကြောင်း ပြောကြားခဲ့သည်။ ၎င်းက ထိန်းချုပ်မရသော ရွှေ့ပြောင်းနေထိုင်မှုသည် ကမ္ဘာတစ်ဝှမ်းမည်သည့်နေရာတွင်မဆို ပရမ်း ပတာဖြစ်မှု၊ အုပ်ချုပ်ရေးပျက်ပြားမှုနှင့် စီးပွားရေးကျဆင်းမှုတို့ကို အမြဲဖြစ်ပေါ်စေကြောင်း အတိအလင်းပြောကြားခဲ့သည်။

“ယနေ့ California ရှိ အခြေအနေသည် အခြားနိုင်ငံ၏ အလံများ ကိုင်ဆောင်ထားသော အဓိကရုဏ်းသမားများမှ မိမိတို့၏ငြိမ်းချမ်းရေး၊ ပြည်သူ့အေးချမ်းသာယာရေးနှင့် အမျိုးသားအချုပ်အခြာအာဏာကို ဆက်လက်ကျူးကျော်ဝင်ရောက်ရန် ရည်ရွယ်ချက်ဖြင့် လုပ်ဆောင် နေသော တိုက်ခိုက်မှုတစ်ခုဖြစ်သည်” ဟု Trump ကကြေညာခဲ့သည်။

North Carolina မှ Washington သို့ပြန်လာစဉ် သမ္မတ Trump က Los Angeles သို့တပ်ဖြန့်ချိမှုသည် ပြဿနာမဖြစ်စေကြောင်း ထပ်လောင်း အတည်ပြုကာ “တပ်မတော်၏ ရှိရင်းစွဲကပင် တင်းမာမှုများကို လျော့ပါးစေမည်” ဟု ပြောကြားခဲ့သည်။

“ငြိမ်းချမ်းမှုကိုသာ မိမိ မြင်လိုပါသည်။ ငြိမ်းချမ်းသွားရင် မိမိတို့ ထွက်သွားမည်။ မငြိမ်းချမ်းသေးရင် ငြိမ်းချမ်းသည့်အထိ မိမိတို့နေမည်။ များများစားစားဖမ်းဆီးခံနေရသည်။ အဆိုပါပြဿနာရှာသူတွေ ဘယ်လို ခေါ်ခေါ်၊ သူတို့နားလည်သင့်တာက အများကြီးဖမ်းခံရမည်၊ ထောင်ဒဏ် ကြာကြာချမည်” ဟု သမ္မတ Trump က ကြေညာခဲ့သည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လော့စ်အိန်ဂျလိစ်မြို့၌ ဆူပူမှုများဖြစ်ပွားနေစဉ် သမ္မတ ဒေါ်နယ်ထရမ့်၏ စစ်သားများစေလွှတ်ရန် ဆုံးဖြတ်ချက်ကို ကယ်လီဖိုးနီးယားပြည်နယ် အုပ်ချုပ်ရေးမှူး ဂေဗင် နယူးဆမ်၏ ရှေ့နေ့က စွဲချက်တင်သွင်းလိုက်သည့် အမှုကို ဇွန် ၁၂ ရက်နေ့တွင် အမေရိကန်တရားရုံးတွင် ကြားနာစစ်ဆေးမည် ဖြစ်ပါသည်။

တရားရုံးကြားနာစစ်ဆေးမှုကို ဇွန် ၁၂ ရက် ဒေသစံတော်ချိန် နေ့လယ် ၁နာရီ ၃၀ အချိန်တွင် ပြုလုပ်မည်ဖြစ်ပြီး နှစ်ဖက်အဖွဲ့များအနေဖြင့် ဗီဒီယိုကွန်ဖရင့်စနစ်ဖြင့် တက်ရောက်နိုင်ကြောင်း သိရပါသည်။

လော့စ်အိန်ဂျလိစ်မြို့တွင် ဇွန် ၆ ရက်မှ စတင်၍ နိုင်ငံကူး လက်မှတ် မရှိသော ရွှေ့ပြောင်းနေထိုင်သူများအား အစုလိုက်ဖမ်းဆီးမှုများ ပြုလုပ် ခဲ့ပါသည်။ ဇွန် ၇ ရက် ညနေခင်းတွင် လူ ၄၄ ဦးအား နိုင်ငံကူးလက်မှတ် ဥပဒေချိုးဖောက်မှုဖြင့် ဖမ်းဆီးထားပြီးဖြစ်ပါသည်။ ထိုဖမ်းဆီးမှုများကို ဆန့်ကျင်သည့်အနေဖြင့် မြို့သူမြို့သားများ လမ်းများပေါ်သို့ ဆန္ဒပြ ထွက်လာခဲ့ကြပါသည်။ CBS သတင်းဌာန၏ ဖော်ပြချက်အရ ဆန္ဒပြ သူများသည် ရဲတပ်ဖွဲ့၏လုပ်ငန်းဆောင်တာများကို ဟန့်တားရန် ကြိုးစား ခဲ့ပြီး လမ်းများပိတ်ဆို့ကာ အမေရိကန်လူဝင်မှုကြီးကြပ်ရေးနှင့် အကောက်ခွန် ဌာနအရာရှိများအား ကျောက်တုံးများနှင့် မီးကျည်များ ပစ်ခတ်ခဲ့ကြ ပါသည်။ လော့စ်အိန်ဂျလိစ်ရဲတပ်ဖွဲ့သည် ပြီးခဲ့သည့် သီတင်းပတ်ကုန် တွင် လူ ၅၆ ဦးအား ဖမ်းဆီးခဲ့သည်။

သမ္မတထရမ့်သည် ကယ်လီဖိုးနီးယားပြည်နယ်အုပ်ချုပ်ရေးမှူး ဂေဗင် နယူးဆမ်နှင့် တိုင်ပင်ခြင်းမပြုဘဲ အမျိုးသားကာကွယ်ရေးတပ်ဖွဲ့ဝင် ၂၀၀၀ အား ဆူပူမှုများထိန်းသိမ်းရန် လော့စ်အိန်ဂျလိစ်သို့ စေလွှတ်ရန် အမိန့်ပေးခဲ့သည်။ နယူးဆမ်သည် နောက်ပိုင်းတွင် ၎င်း၏ခွင့်ပြုချက်မရှိဘဲ တပ်များစေလွှတ်မှုအတွက် သမ္မတထရမ့်နှင့် ကာကွယ်ရေး ဝန်ကြီး ပီတာဟက်စ်ကို တရားစွဲဆိုခဲ့ပါသည်။ CNN ရုပ်သံလိုင်း၏ ဖော်ပြချက်အရ အမျိုးသားကာကွယ်ရေးတပ်ဖွဲ့ဝင် ၁၇၀၀ ခန့်ကို လော့စ်အိန်ဂျလိစ်သို့ စေလွှတ်ခဲ့ပြီး အမေရိကန် ကာကွယ်ရေးဝန်ကြီး ဌာနသည် ဆူပူမှုများကို ထိန်းသိမ်းရန် ရေတပ် စစ်သား ၇၀၀ ခန့် ကို လည်း စေလွှတ်ခဲ့ပါသည်။

ကိုးကား- TASS

ဘာသာပြန်ဆိုသူ - ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

လော့စ်အိန်ဂျလိစ်မြို့တွင် ဖက်ဒရယ်လူဝင်မှုကြီးကြပ်ရေးအဖွဲ့များ၏ စစ်ဆေးဖမ်းဆီးမှုများကို ဆန္ဒပြမှုများသည် ညအချိန် ညမထွက်ရအမိန့် ထုတ်ထားခြင်းနှင့် သမ္မတထရမ့်က အမေရိကန်အမျိုးသားအစောင့်တပ် (National Guard) နှင့် ရေတပ်သားများ (Marine) စေလွှတ်ရန် ခွင့်ပြုထားသည့်တိုင် ဆက်လက်ဖြစ်ပွားနေသည်။

လော့စ်အိန်ဂျလိစ်ရဲတပ်ဖွဲ့၏ ထုတ်ပြန်ချက်အရ တရားမဝင် နေထိုင်သူများအား ဖမ်းဆီးမှုများ စတင်ချိန်တွင်ဖြစ်ပွားခဲ့သည့် အဓိကရုဏ်းတွင် ပါဝင်သူများက မြို့လယ်ခေါင်တွင် ဆက်လက်စုဝေးနေကြောင်း သိရသည်။

ထရမ့်၏ လူဝင်မှုကြီးကြပ်ရေးတင်းကြပ်မှုများနှင့်ဆက်စပ်ကာ ဖက်ဒရယ် အေးဂျင့်များက လူများအား ဖမ်းဆီးခဲ့ပြီးနောက် သောကြာနေ့ (ဇွန် ၆) က ဆန္ဒပြမှုများ စတင်ခဲ့သည်။ ထိုဆန္ဒပြမှုများသည် အလျင်အမြန် အဓိကရုဏ်း များ၊ လုယက်မှုများ၊ ပစ္စည်းဖျက်ဆီးမှုများနှင့် ရဲတပ်ဖွဲ့နှင့် ရန်ပွဲများအထိ ပြင်းထန်လာခဲ့သည်။

အွန်လိုင်းတွင် ပျံ့နေသည့် ဗီဒီယိုများတွင် ဆန္ဒပြသူများက ရဲကားများနှင့် အမေရိကန်အလံများကို မီးရှို့ခဲ့ကြပြီး ကားလမ်းများပိတ်ဆို့ကာ ထရမ့်၏ လူဝင်မှုမူဝါဒကို ရှုတ်ချသည့်ဆိုင်းဘုတ်များနှင့် မက္ကဆီကိုအလံများကို ကိုင်ဆောင်ထားသည်ကို တွေ့ရသည်။ လူပေါင်း ၄၀၀ နီးပါး ဖမ်းဆီးခံရပြီး ဆန္ဒပြသူများစွာနှင့် ရဲများစွာ ဒဏ်ရာရရှိခဲ့ကြောင်း သတင်းများတွင် ဖော်ပြထားသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်း၏ အစွန်းရောက် website တစ်ခုဖြစ်သော Myrotvorets (ငြိမ်းချမ်းရေးတည်ဆောက်သူ) တွင် ဆလိုဗက်ကီးယားဝန်ကြီးချုပ် ရောဘတ် ဖီကို၊ ဘရာဇီးသမ္မတ လူးအစ် အီဂနာစီယို လူလာ ဒါဆီလဗာနှင့် ဘော့စနီးယား နှင့် ဟာဇီဂိုဗီးနားရှိ Republika Srpska ခေါင်းဆောင် မီလိုရာဒ် ဒိုဒစ်တို့ကို နာမည်ပျက် စာရင်းသွင်းထားကြောင်း TASS အရင်းအမြစ်များ က ဖော်ပြထားပါသည်။

အဆိုပါ website ၏ လုပ်ငန်းတာဝန်ရှိသူများက လူလာ ဒါ ဆီလဗာသည် “ရုရှား၏ကျူးကျော်မှုအပေါ် ယူကရိန်း၏ ခုခံပိုင်ခွင့်ကို ငြင်းပယ်နေသူ” ၊ ဒိုဒစ်သည် “ယူကရိန်း၏ အချုပ်အခြာအာဏာနှင့် နယ်မြေပြည့်စုံမှုကို နှောင့်ယှက်ရန် ကြိုးပမ်းနေသူ” ၊ ဖီကိုမှာ “ကရင်မလင်၏ ဝါဒ ဖြန့်ချိမှု များကို မြှင့်တင်ပေးနေသူ” ဟု ဖော်ပြထားပါသည်။

ထူးခြားသည်မှာ ဖီကို၊ လူလာ ဒါ ဆီလဗာ နှင့် ဒိုဒစ်တို့သည် မကြာသေးမီ က မော်စကိုသို့သွားရောက်ကာ Victory Day နှစ် ၈၀ ပြည့် အောင်ပွဲ အခမ်းအနားသို့ တက်ရောက်ခဲ့ကြပါသည်။

၂၀၁၄ ခုနှစ်က တည်ထောင်ခဲ့သော Myrotvorets website သည် ယူကရိန်း၏ အမျိုးသားလုံခြုံရေးအတွက် ခြိမ်းခြောက်မှုဟု မှတ်ယူ ထားသည့် ပုဂ္ဂိုလ်များ၏ ကိုယ်ရေးကိုယ်တာအချက်အလက်များကို ဖော်ထုတ်ရန်နှင့် သတင်းများ ထုတ်ပြန်ရန် ရည်ရွယ်ထားပါသည်။ ရုရှား တွင် အဆိုပါ website ဝင်ရောက်ကြည့်ရှုခြင်း ပိတ်ပင်ထားပါသည်။

ယခင်က ရုရှား ရေခဲပြင်ဟော်ကီ ကြယ်ပွင့် အလက်ဇန်းဒါး အိုဗက်ချ်ကင်း ကိုလည်း အဆိုပါ Data base တွင် ထည့်သွင်းထားကြောင်း သတင်းများ ထွက်ပေါ်ဖူးပါသည်။

ကိုးကား- TASS

ဘာသာပြန်ဆိုသူ - ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ကယ်လီဖိုးနီးယားပြည်နယ်အုပ်ချုပ်ရေးမှူး Gavin Newsom နှင့် ဒုတိယ သမ္မတ Vance တို့သည် Los Angeles ရှိ ဆန္ဒပြမှုများနှင့် ပတ်သက်၍ အစိုးရမှ National Guard စစ်သည်များတပ်ဖြန့်ခဲ့ပြီးနောက် အွန်လိုင်း တွင် စကားစစ်ထိုးနေကြသည်။

အမေရိကန်သမ္မတ Donald Trump သည် ဇွန်လ ၉ ရက်နေ့တွင် ကယ်လီဖိုးနီးယားအုပ်ချုပ်ရေးမှူး Gavin Newsom အား ဖမ်းဆီးရန်အမေရိကန်နယ်စပ်ကာကွယ်ရေးတာဝန်ရှိသူ Tom Homan အားထောက်ခံကြောင်း ထုတ်ဖော်ပြောဆိုခဲ့သည်။ ထိုနေ့မွန်းလွဲပိုင်းတွင် California ခေါင်းဆောင်များက X (Twitter) တွင် တုံ့ပြန်ခဲ့ကြသည်။

Newsom က “အမေရိကန်သမ္မတက လက်ရှိအုပ်ချုပ်နေသည့် ပြည်နယ် အုပ်ချုပ်ရေးမှူးတစ်ဦးကို ဖမ်းဆီးဖို့ တိုက်တွန်းလိုက်ပါပြီ၊ အမေရိကမှာ ဘယ်တော့မှ မဖြစ်စေချင်တဲ့ အခြေအနေပါ၊ သမ္မတက ဒီမိုကရက်လား၊ ရီပတ်ဘလီကန်လား ကျွန်တော်ဂရုမစိုက်ပါ၊ ဒါဟာ နိုင်ငံတစ်နိုင်ငံအနေဖြင့် မကျော်လွှားသင့်သည့် နယ်နိမိတ်ပါ၊ ဒါဟာ အာဏာရှင်စနစ် ဆီကို ရှေ့တစ်လှမ်းတိုးလိုက်တာပါ” ဟု ရေးသားခဲ့သည်။

နှစ်နာရီအကြာတွင် ဒုတိယသမ္မတ Vance က Newsom ၏ ရေးသားချက်ကို တုံ့ပြန်ကာ “သင့်တာဝန်ကို ထမ်းဆောင်ပါ၊ ဒါပဲ ကျွန်တော်တို့ တောင်းဆိုတာပါ” ဟု ပြန်လည်ရေးသားခဲ့သည်။

Newsom ကလည်း “သင့်တာဝန်ကို သင် ထမ်းဆောင်ပါ၊ Trump မကိုင်တွယ်ခင် အဆင်ပြေနေတာပါ၊ National Guard ရုပ်သိမ်းပြီးCalifornia ကို ထိန်းချုပ်ခွင့် ပြန်ပေးပါ” ဟု ညနေပိုင်းတွင် တုံ့ပြန် ခဲ့သည်။

ဒုတိယသမ္မတ JD Vance ၏ ရုံးနှင့် အိမ်ဖြူတော်တို့သည် အဆိုပါ စကားစစ်ထိုးမှုနှင့်ပတ်သက်၍ မည်သည့်မှတ်ချက်မျှ မပြုသေးပေ။

ဇွန်လ ၇ ရက်တွင် သမ္မတ Trump က Los Angeles၊ California ရှိ ရွှေ့ပြောင်းနေထိုင်သူများအား ဖမ်းဆီးမှုကို ဆန့်ကျင်သည့် ဆန္ဒပြမှု များကြောင့် ဖြစ်ပေါ်နေသော ဥပဒေမဲ့အခြေအနေကို ကိုင်တွယ်ရန် National Guard တပ်ဖွဲ့ဝင် ၂,၀၀၀ ကို စေလွှတ်ရန် အမိန့်စာချွန်လွှာ လက်မှတ်ရေးထိုးခဲ့သည်။

ဇွန်လ ၉ ရက်တွင် Trump က National Guard တပ်ဖွဲ့ဝင် ၂,၀၀၀ ထပ်မံ စေလွှတ်ခဲ့သည်။ ပြည်နယ်အုပ်ချုပ်ရေးမှူး Newsom က အဆိုပါ ဆောင်ရွက်ချက်အား ပြင်းထန်စွာ ဝေဖန်ခဲ့သည်။ National Guard အပြင် အမေရိကန်စစ်တပ်ကလည်း ဖက်ဒရယ်ဝန်ထမ်းများနှင့် ပစ္စည်း များကို ကာကွယ်ရန် Los Angeles သို့ မရိန်းတပ်သား ၇၀၀ ကို စေလွှတ် ခဲ့သည်။

ကယ်လီဖိုးနီးယား ပြည်နယ်အုပ်ချုပ်ရေးမှူး Newsom နှင့် ပြည်နယ် ရှေ့နေချုပ် Rob Bonta တို့က ဇွန်လ ၉ ရက်နေ့တွင် ဆန်ဖရန်စစ္စကိုရှိ ဖက်ဒရယ်တရားရုံးသို့ တရားစွဲဆိုခဲ့ပြီး၊ သမ္မတ Trump ၏ National Guard စေလွှတ်ရေး အမိန့်ကို တားမြစ်ပေးရန် တောင်းဆိုခဲ့သည်။၎င်းတို့က အဆိုပါအမိန့်သည် အမေရိကန်ဖွဲ့စည်းပုံအခြေခံဥပဒေ ဆယ်ကြိမ်မြောက်ပြင်ဆင်ချက် (10th Amendment) အရ ပြည်နယ်၏ အာဏာကို ချိုးဖောက်သည်ဟု ဆိုသည်။

ထို့အပြင် ပြည်နယ်အုပ်ချုပ်ရေးမှူး Newsom က ပြည်နယ်နှင့် ဒေသ ဆိုင်ရာ ရဲတပ်ဖွဲ့ဝင် ၈၀၀ ကျော်အား “ပြည်သူများ၏ ဘေးကင်းရေးအတွက် စေလွှတ်မည်” ဟု ကြေညာခဲ့သည်။

“Trump လိုချင်တာက ရှုပ်ထွေးမှုပါ ၊ အခု California က ဒီပြဿနာကို ရှင်းရမယ့်အချိန်ရောက်ပြီ” ဟု ပြည်နယ်အုပ်ချုပ်ရေးမှူး Newsom က ပြောကြားခဲ့သည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဆန်ဖရန်စစ္စကိုရဲတပ်ဖွဲ့၏ ထုတ်ပြန်ချက်အရ၊ တနင်္လာနေ့ (ဇွန် ၁၀) ညပိုင်းတွင် ထောင်နှင့်ချီသောလူများသည် Civic Center နှင့် Mission ရပ်ကွက်များအနီး၌ အလွန်အေးချမ်းစွာ ဆန္ဒပြမှုများ ပြုလုပ်ခဲ့သည်။ CNN ၏ အဖွဲ့အစည်းဖြစ်သော KGO သတင်းဌာန၏ ဖော်ပြချက်အရ ဆန္ဒပြသူများသည် တစ်နိုင်ငံလုံးအတိုင်းအတာဖြင့် ICE (လူဝင်မှု ကြီးကြပ်ရေး) ၏ ဝင်ရောက်စီးနင်းမှုများကို ကန့်ကွက်ရန်နှင့် ရွှေ့ပြောင်း အခြေချနေထိုင်သူ အသိုင်းအဝိုင်းများ၏ စည်းလုံးညီညွတ်မှုကို ပြသခဲ့ ကြသည်။

ဆန်ဖရန်စစ္စကိုရဲတပ်ဖွဲ့က “ညနေခင်းနှောင်းပိုင်းတွင် အုပ်စုငယ် နှစ်စု ကွဲထွက်ကာ ပစ္စည်းဖျက်ဆီးမှုနှင့် အခြားရာဇဝတ်မှုများ ကျူးလွန်ခဲ့သည်” ဟု ထုတ်ပြန်ခဲ့သည်။ ရဲများက အမိန့်နာခံရန် ငြင်းဆန်သူများကို ဖမ်းဆီး ထိန်းသိမ်းခဲ့ပြီး လက်ရှိတွင် ပြဿနာတစ်ခုကို ဖြေရှင်းနေဆဲဖြစ်ကြောင်း ပြောကြားခဲ့သည်။

“MELT ICE” ဟူသော ဆိုင်းဘုတ်ကိုင်ဆောင်ထားသည့် Holly Minch က “လော့စ်အိန်ဂျယ်လ်စ်နှင့် တစ်နိုင်ငံလုံးမှာ ဖြစ်နေတာတွေကို ကျွန်မ အရမ်းစိုးရိမ်နေပါတယ်။ ကယ်လီဖိုးနီးယားဟာ မတူကွဲပြားမှုကြောင့် ပိုကောင်းတဲ့နေရာဖြစ်ပြီး၊ ကျောင်းဘွဲ့နှင်းသဘင်တွေကနေ မိသားစု တွေနဲ့ ခွဲခွာရတာ၊ ကလေးတွေနဲ့ ကွဲကွာရတာတွေဟာ မှားယွင်းပါတယ်။ ဒါကို လူတွေသိအောင် ကျွန်မတို့ ဒီမှာထွက်ပြီးပြောဖို့လိုပါသည်” ဟု KGO သို့ ပြောကြားခဲ့သည်။

ဆန်ဖရန်စစ္စကို မြို့တော်ဝန် Daniel Lurie ၏ ဦးဆောင်မှုဖြင့် ရဲတပ်ဖွဲ့ သည် ပြည်သူ့လုံခြုံရေးအဖွဲ့အစည်းများနှင့် ညှိနှိုင်းကာ ထိခိုက်နိုင်သည့် ရပ်ကွက်များတွင် “ဖွဲ့စည်းပုံပြင်ဆင်ချက်ပထမအပိုဒ် (လွတ်လပ်စွာ ထုတ်ဖော်ပြောဆိုခွင့်) လုပ်ဆောင်ချက်များကို ကာကွယ်ရန်” ကြိုးပမ်း ခဲ့သည်။

တနင်္ဂနွေနေ့က၊ အသက် ၁၈ နှစ်အောက် အချို့ပါဝင်သည့် လူ ၁၅၀ ခန့် ကို လူဝင်မှုကြီးကြပ်ရေးအဆောက်အဦအနီးတွင် ဖမ်းဆီးခဲ့သည်။ ဆန္ဒပြ သူများသည် ဖျက်သိမ်းရန် အမိန့်ကို လျစ်လျူရှုကာ အကြမ်းဖက်မှုနှင့် ပစ္စည်းဖျက်ဆီးမှုများ ပြုလုပ်ခဲ့သည်ဟု ရဲတပ်ဖွဲ့က ဆိုသည်။

ICE ဆန့်ကျင်ရေး ဆန္ဒပြမှုများသည် နယူးယောက်၊ အတ္တလန်တာ၊ ဆီယက်တယ်၊ ဒါးလက်စ်နှင့် လူဝီဗီးလ်စ်မြို့များအပါအဝင် တစ်နိုင်ငံလုံးတွင် ပေါ်ပေါက်လျက်ရှိသည်။

ကိုးကား- CNN

Photo: Los Angeles Times

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂