ပြင်သစ်မီဒီယာများ၏ ဖော်ပြချက်အရ ပြင်သစ်စစ်တပ်အကြီးအကဲက ရုရှားသမ္မတ ဗလာဒီမာ ပူတင်သည် ၎င်းတို့နိုင်ငံကို ဥရောပတွင် မော်စကို၏ အဓိကပြိုင်ဘက်အဖြစ် မှားယွင်းစွာ သတ်မှတ်ခဲ့သည်ဟု ဆိုခဲ့သည်။

ပြင်သစ်ကာကွယ်ရေးဦးစီးချုပ် ဗိုလ်ချုပ်ကြီး Thierry Burkhard က ပြီးခဲ့သည့် သောကြာနေ့ (ဇူလိုင် ၁၁) တွင် ယူကရိန်းအား ပြင်သစ်၏ စစ်ရေးထောက်ပံ့မှုများကြောင့် ရုရှားက ပြင်သစ်ကို ဥရောပတိုက်ရှိ ၎င်း၏ အဓိကရန်သူအဖြစ် မှတ်ယူထားသည်ဟု Burkhard က သတင်းထောက်များအား ပြောကြားခဲ့သည်။ 

L’Opinion သတင်းစာ၏ Jean-Dominique Merchet က ယင်းအဆိုကို ပထမဆုံးဝေဖန်တုံ့ပြန်ခဲ့ကာ၊ ၎င်းက စစ်ဦးစီးချုပ်ရုံးသို့ ဆက်သွယ် မေးမြန်းရာတွင် Burkhard ၏ ပြောဆိုချက်မှာ "စကားလုံးအသုံးအနှုန်း" သာဖြစ်ပြီး ရုရှားခေါင်းဆောင်၏ အမှန်တကယ်ထုတ်ပြန်ချက်အပေါ် အခြေမခံဟု ပြန်ကြားခဲ့သည်ဟု လူမှုကွန်ရက်တွင် ဖော်ပြခဲ့သည်။

ပြင်သစ်စစ်တပ်က ဧပြီလတွင် ရုရှားအစိုးရပိုင် လေ့လာရေးအဖွဲ့ VTsIOM က ပြုလုပ်ခဲ့သည့် လူထုထင်မြင်ချက်စစ်တမ်းကို ညွှန်းဆိုခဲ့ပြီး ထိုစစ်တမ်း တွင် ဖြေကြားသူ ၄၅% က ပြင်သစ်နှင့် ရုရှားတို့ကြား ဆက်ဆံရေးတင်းမာမှု (သို့) ရန်လိုမှုရှိသည်ဟု ယူဆကြောင်း တွေ့ရှိခဲ့ရခြင်းသည် ယခင်နှစ်များနှင့်စာလျှင် သိသိသာသာ တိုးလာခြင်းဖြစ်သည်။

မေလတွင် ရုရှား၏ လွတ်လပ်သော Levada Center မှ ပြုလုပ်ခဲ့သည့် သီးခြားစစ်တမ်းတစ်ခုအရ ဂျာမနီသည် ရန်လိုသည့်နိုင်ငံများစာရင်းတွင် ထိပ်ဆုံးနေရာတွင်ရှိနေပြီး ပြင်သစ်မှာ အဆင့် ၅ အတွင်း မပါဝင်ခဲ့ပေ။ ထိုစစ်တမ်းတွင် ဖြေကြားသူ၏ ၃၂% သာ ပြင်သစ်ကို ရန်လိုသည့်နိုင်ငံအဖြစ် သတ်မှတ်ခဲ့သည်။

TF1 ရုပ်သံလိုင်းကလည်း ပူတင်၏ ထိုကဲ့သို့သော ပြောဆိုချက်နှင့်ပတ်သက်၍ ခိုင်လုံသော အထောက်အထားများ မတွေ့ရှိရကြောင်း ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တိုကျို ဇူလိုင် ၁၅

မကြာသေးမီ ကာလအတွင်း နိုင်ငံခြားသား အရေအတွက် ရုတ်တရက် မြင့်တက်လာမှုကြောင့် အများပြည်သူများ၏ စိုးရိမ်စိတ်ကို လျှော့ချရေးအတွက် စီမံအုပ်ချုပ်ရေးဌာနသစ်တစ်ခုကို ဂျပန်နိုင်ငံက ယနေ့တွင် ဖွင့်လှစ်ခဲ့ကြောင်း သိရသည်။

အဆိုပါဌာနသည် နိုင်ငံခြား သားများပါဝင်ပတ်သက်နေသော ရာဇဝတ်မှုများကဲ့သို့ပြဿနာများ ကိုလက်ခံဖြေရှင်းမည်ဖြစ်ကြောင်း ဂျပန်အစိုးရ က သတင်းထုတ်ပြန် ထားသည်။

ဂျပန်နိုင်ငံသည် တင်းကျပ်သည့်လူဝင်မှုဥပဒေများကျင့်သုံး၍ ဂျပန်လူမျိုး လူဦးရေကိုထိန်းထားရန်ကြိုးပမ်းခဲ့သည့်နိုင်ငံဖြစ်သည်။ 
သို့ရာတွင် ဂျပန်လူဦးရေကျုံ့ဝင်လာမှုနှင့် သက်ကြီးလူဦးရေ မြင့်တက်လာမှုတို့ကြောင့် ဂျပန်နိုင်ငံသည် လူဝင်မှုစည်းမျဉ်းများ ကို တဖြည်းဖြည်းလျှော့ချပေးခဲ့ရာ ဂျပန်ပြည်တွင်းသို့ ဝင်ရောက်လာသည့်နိုင်ငံခြားသား အရေအတွက် လည်း မြင့်တက်ခဲ့ရကြောင်း သိရသည်။

ပြီးခဲ့သည့်နှစ်အတွင်း ဂျပန်နိုင်ငံသို့ရောက်ရှိနေသောနိုင်ငံခြားသား အရေအတွက်မှာ ၃ ဒသမ ၈ သန်း သို့မဟုတ် ဂျပန်လူဦးရေ စုစုပေါင်း၏ သုံးရာခိုင်နှုန်းခန့်ထိရှိခဲ့သည်။

ဂျပန်ရောက် နိုင်ငံခြားသားများနှင့်ပတ်သက်နေသော ကိစ္စများကို ကိုင်တွယ်ရေးအတွက် ဌာနသစ်ဖွဲ့စည်းရေးကို လက်ရှိအာဏာရ လစ်ဘရယ်ဒီမိုကရက်တစ်ပါတီ လွှတ်တော်အမတ်များ က အဆိုပြုခဲ့ကြခြင်းဖြစ်ကြောင်း သိရသည်။

Ref: Xinhua

Trs: KKO

YDNB Newspaper
Photo - Reuter

သြစတြေးလျဝန်ကြီးချုပ် အန်‌ထောနှီအယ်ဘာနီးစ်သည် အင်္ဂါနေ့၌ ပေကျင်းတွင် တရုတ်သမ္မတ ရှီကျင့်ဖျင်၊ ဝန်ကြီးချုပ် လီကျင်းတို့နှင့်တွေ့ဆုံရန် မျှော်မှန်းထားပြီး သယံဇာတ၊ ကုန်သွယ်မှု၊ စွမ်းအင်၊ သယ်ယူပို့ဆောင်ရေးနှင့် လုံခြုံရေးဆိုင်ရာကိစ္စများ ကိုအဓိကထား၍ဆွေးနွေးမည် ဖြစ်ကြောင်း၎င်းက ပြောကြားခဲ့သည်။

အယ်ဘာနီးစ်သည် လီနှင့် ခေါင်းဆောင်များ၏ နှစ်စဉ်ဆွေးနွေးပွဲ မတိုင်မီတွင် ရှီနှင့် တွေ့ဆုံသွားမည်ဖြစ်ကာ ယင်းနောက်တွင် ပြည်သူ့ခန်းမ၌ ကျင်းပမည့် စီးပွားရေးစကားဝိုင်းကို တက်ရောက်မည်ဖြစ်သည်။

တရုတ်ခေါင်းဆောင်များနှင့် အပြုသဘောဆောင်သော ဆွေးနွေးမှုကို မျှော်လင့်ထားကြောင်း အယ်ဘာနီးစ်က တနင်္လာနေ့တွင် ပြောကြားခဲ့သည်။

အမေရိကန်ပြည်ထောင်စု၏ အဓိကလုံခြုံရေးမဟာမိတ်အဖြစ် သတ်မှတ်ထားသော သြစတြေးလျသည် အယ်လ်ဘာနီးစ်လက်ထက်တွင် “သဘောထားကွဲလွဲမည်၊ ဟို့‌သော်တတ်နိုင်သမျှ ပူးပေါင်းဆောင်ရွက်မည်” ဟူသော တရုတ်နိုင်ငံဆိုင်ရာ မူဝါဒကို ကျင့်သုံးခဲ့သည်။

တရုတ်နိုင်ငံ၏ စစ်ရေးတည်ဆောက်မှုနှင့် သြစတြေးလျ စာရေးဆရာတစ်ဦးကို ဖမ်းဆီးထောင်ချထားခြင်းကို စိုးရိမ် မကင်းဖြစ်မိကြောင်း သြစတြေးလျက ထုတ်ဖော်ပြောကြားခဲ့ပြီး ပေကျင်းဘက်ကလည်း အရေးပါသော ဓါတ်သတ္ထုများအပေါ် နိုင်ငံခြားရင်းနှီးမြှုပ်နှံမှုများကို ကင်ဘာရာက တင်းတင်းကျပ်ကျပ်စိစစ်ခြင်းနှင့် တရုတ်ကငှားရမ်းထားသော ဆိပ်ကမ်းတစ်ခုကို သြစတြေးလျပိုင်အဖြစ် ပြန်လည်ထိန်းချုပ်ရန် အယ်လ်ဘာနီးစ်က ကတိပြုခဲ့မှုတို့ကို ဝေဖန်ခဲ့သည်။

Popular Myanmar

ယူကရိန်းခေါင်းဆောင် ဗလာဒီမာ ဇီလန်စကီးက နိုင်ငံ၏ တာဝန်ထမ်းဆောင်မှုသက်တမ်းအရှည်ဆုံး ဝန်ကြီးချုပ် ဒီနစ် ရှမီဂယ်ကို ကာကွယ်ရေး ဝန်ကြီးအဖြစ် ခန့်အပ်လိုက်ပြီး ယခုသီတင်းပတ်အတွင်း ပါလီမန်မှ အတည်ပြုရန် မျှော်မှန်းထားသည့် အစိုးရအဖွဲ့ ပြောင်းလဲမှု တစ်စိတ် တစ်ပိုင်းဖြစ်သည်။

၄၉ နှစ်အရွယ် ရှမီဂယ်သည် ၂၀၂၀ ပြည့်နှစ် မှစတင်၍ ဝန်ကြီးချုပ်အဖြစ် တာဝန်ထမ်းဆောင်လျက်ရှိပြီး Covid-19 ကပ်ရောဂါကာလနှင့် ၂၀၂၂ ခုနှစ်တွင် ရုရှားနှင့် ပဋိပက္ခမြင့်တက်လာချိန်များတွင် ဦးဆောင်ခဲ့သည်။ တနင်္လာ (ဇူလိုင် ၁၄) ညနေ ဗီဒီယိုမိန့်ခွန်းတွင် ဇီလန်စကီးက ရှမီဂယ်၏ နိုင်ငံ၏ ကန့်သတ်အရင်းအမြစ်များကို စီမံခန့်ခွဲနိုင်စွမ်းအား ချီးကျူးကာ အဆိုပါအတွေ့အကြုံသည် ၎င်း၏တာဝန်အသစ်အတွက် အထောက်အကူ ရရှိစေမည်ဟု ပြောကြားခဲ့သည်။

ဇီလန်စကီးက ဒုတိယဝန်ကြီးချုပ်နှင့် စီးပွားရေးဝန်ကြီး ယူလီယာ ဆွီရီဒန်ကို ကို ရှမီဂယ်၏ နေရာတွင် ဝန်ကြီးချုပ်အဖြစ် အဆိုပြုထားသည်။ အသက် ၃၉ နှစ်ရှိ ဆွီရီဒန်ကိုသည် အမေရိကန်အား ယူကရိန်း သတ္တု အရင်းအမြစ်များကို ဦးစားပေးအခွင့်အရေးရရှိစေသည့် သဘောတူညီချက် ကို ညှိနှိုင်းပေးခဲ့သည့်အတွက် ကျော်ကြားသူဖြစ်ပြီး သူမသည် မကြာမီ တွင် အဆိုပြုအစိုးရအဖွဲ့နှင့် အစိုးရ၏လုပ်ဆောင်မည့်အစီအစဉ်ကို တင်ပြ မည်ဟု ပြောကြားခဲ့ပါသည်။

အဆိုပါ ပြောင်းလဲမှုအတွက် ရှမီဂယ်က တရားဝင် နုတ်ထွက်ခွင့် လျှောက်ထား ပြီးနောက် ပါလီမန်မှ အတည်ပြုရန် လိုအပ်မည်ဖြစ်သည်။ လက်ရှိ အစိုးရအဖွဲ့ကို ပယ်ဖျက်ရန် မဲခွဲဆုံးဖြတ်မှုကို ဇူလိုင် ၁၆ ရက်နေ့တွင် ပြုလုပ်မည်ဟု သတင်းများက ဖော်ပြထားပါသည်။

အစ္စတန်ဘူလ်တွင် ရုရှားနှင့် ညှိနှိုင်းဆွေးနွေးမှုများ၌ ကိယက်ဗ် ကိုယ်စားလှယ်အဖွဲ့ကို ဦးဆောင်ခဲ့သူ ယခင်ကာကွယ်ရေးဝန်ကြီး ရူစတမ် ဥမာရော့ဖ်အား ယူကရိန်းနိုင်ငံဆိုင်ရာ အမေရိကန် သံအမတ်ကြီး အဖြစ် ခန့်အပ်ရန် လျာထားကြောင်း ဇီလန်စကီးက ပြောကြားခဲ့ပါသည်။

ကာကွယ်ရေးဝန်ကြီးဌာနသည် မကြာသေးမီနှစ်များအတွင်း အကျင့်ပျက် ခြစားမှုများစွာနှင့် ရင်ဆိုင်ခဲ့ရပြီး ၂၀၂၃ ခုနှစ်တွင် စစ်တပ်အတွက် ဈေးမှန်ထက်ပိုမိုမြင့်မားသော အစားအစာ ဝယ်ယူမှုစာချုပ်များနှင့် သက်ဆိုင်သည့် အကျင့်ပျက်ခြစားမှုဖြစ်စဉ်ကြောင့် ယခင်ကာကွယ်ရေး ဝန်ကြီး အလက်ဇီ ရက်ဇနီကော့ဖ် နုတ်ထွက်ခဲ့သည်။ လေးလအကြာတွင် ၎င်း၏ဆက်ခံသူ ဥမာရော့ဖ်က ဝန်ကြီးဌာန၏ အတွင်းရေး စစ်ဆေးမှု တစ်ခုတွင် ခိုးယူမှုနှင့်သက်ဆိုင်သည့် ဒေါ်လာ ၂၆၂ သန်းခန့် ဆုံးရှုံးမှုကို ဖော်ထုတ်နိုင်ခဲ့ကြောင်း ပြောကြားခဲ့သည်။ ဥမာရော့ဖ်ကိုယ်တိုင်လည်း ကာကွယ်ရေးဝယ်ယူမှုများနှင့်ပတ်သက်၍ အာဏာအလွဲသုံးစားလုပ်မှု စွပ်စွဲချက်များဖြင့် အကျင့်ပျက်ခြစားမှုတိုက်ဖျက်ရေးအာဏာပိုင်များက စုံစမ်းစစ်ဆေးနေသည်ဟု သတင်းများတွင် ဖော်ပြထားသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်နိုင်ငံနှင့်ရုရှား နိုင်ငံတို့ကြား ဆက်ဆံရေးသည် အခြားသောနိုင်ငံများနှင့်ဆက်ဆံရေးထက် ပိုမိုတည်ငြိမ်ပြီးခိုင်မာမှု ရှိလာကာ မဟာဗျူဟာမြောက် တန်ဖိုးများကို ထုတ်ဖော်ပြသနေကြောင်း တရုတ်နိုင်ငံခြားရေး ဝန်ကြီးဝမ်ယီက ရုရှားနိုင်ငံခြားရေးဝန်ကြီး ဆာဂျီလက်ရော့နှင့် တွေ့ဆုံစဉ် ပြောသည်။

ဇူလိုင်လ ၁၅ ရက်တွင်ကျင်းပမည့် ယူရေးရှားဒေသ၏ နိုင်ငံခြားရေးဝန်ကြီးများ အစည်းအဝေးသို့တက်ရန် တရုတ်နိုင်ငံ ပေကျင်းမြို့သို့ရောက်ရှိနေသော ရုရှားနိုင်ငံခြားရေးဝန်ကြီးနှင့် တွေ့ဆုံစဉ် ဝမ်ယီကယခုကဲ့သို့ ပြောခြင်းဖြစ်သည်။ အလားတူ တရုတ်နိုင်ငံသို့ချစ်ကြည်ရေး ခရီးလာမည့်  ရုရှားသမ္မတဗလာဒီမာပူတင်၏ ခရီးစဉ်သည် နှစ်နိုင်ငံကြား အရေးကြီးသော အစီအစဉ်များ၌ တစ်ခုအပါအဝင်ဖြစ်ကြောင်း ဝမ်ယီကဆက်ပြောသည်။

ထို့ပြင် နှစ်နိုင်ငံမှ နိုင်ငံခြားရေးဝန်ကြီးများကြား နီးကပ်စွာဆက်ဆံမှုက နှစ်နိုင်ငံခေါင်းဆောင်များကြား ရရှိသည့် သဘောတူညီချက်များကို အကောင်အထည်ဖော်ရာတွင် ပိုမိုအဆင်ပြေချောမွေ့စေခြင်း ဖြစ်သည်ဟု ဝမ်ယီက ဆက်ပြောသည်။

ရုရှားသမ္မတဗလာဒီမာပူတင် အနေဖြင့် တရုတ်နိုင်ငံသို့ ဩဂုတ်လ ၃၁ ရက်မှ စက် တင်ဘာလ ၃ ရက်အထိ လာရောက်ကာ ရှန်ဟိုင်းပူးပေါင်းဆောင်ရွက်ရေး အဖွဲ့၏ ထိပ်သီးအစည်းအဝေးသို့ တက်ရောက်ပြီး တရုတ်သမ္မတနှင့် တွေ့ဆုံမည့်အပြင် ယင်း နိုင်ငံ၌ ကျင်းပမည့် တရုတ်နိုင်ငံ၏နှစ် (၈၀) ပြည့် ခုခံစစ်ပွဲအောင်ပွဲ အခမ်းအနားသို့ တက်ရောက်မည်ဖြစ်ကြောင်း သိရသည်။

MWD Web Portal
 

ယူကရိန်း လွှတ်တော် အမတ် Anna Skorokhod က မော်စကိုနှင့် လက်ရှိပဋိပက္ခတွင် Kyiv ၏ အကြီးမားဆုံး စိန်ခေါ်မှုမှာ အနောက်တိုင်း မှထောက်ပံ့သော လက်နက်များချို့တဲ့ခြင်း မဟုတ်ဘဲ လူအင်အား အလွန်အမင်း လိုအပ်နေခြင်းဖြစ်ကြောင်း ပြောကြားခဲ့သည်။

အမေရိကန် သမ္မတ Donald Trump က တနင်္လာနေ့ (ဇူလိုင် ၁၄) တွင် ဥရောပ NATO နိုင်ငံများ၏ ငွေကြေးဖြင့် ယူကရိန်းအား လက်နက်များ ထပ်မံထောက်ပံ့ရန် ကတိပြုခဲ့ပြီး ရက် ၅၀ အတွင်း ငြိမ်းချမ်းရေး သဘောတူညီချက်မရရှိပါက မော်စကိုအား များပြားသော အကောက်ခွန် များ ချမှတ်မည်ဟု ခြိမ်းခြောက်ခဲ့သည်။

"ကျွန်မတို့၏ အဓိက ပြဿနာက လူအင်အားပါ။ မည်သူကမျှ ကျွန်မ တို့ကို လူအင်အား မထောက်ပံ့ပါ"ဟု Skorokhod က ယူကရိန်း၏ နိုင်ငံရေး YouTube ချန်နယ် Superposition နှင့် တွေ့ဆုံ မေးမြန်းခန်း တွင် ပြောကြားခဲ့သည်။ “ထရမ့် က လက်နက်ထောက်ပံ့ဖို့ ဆုံးဖြတ်နိုင် သော်လည်း စစ်ဆိုတာ အမြဲတမ်း ဖြစ်နေ၍ မဖြစ်ဘူးဆိုသည်ကို ထောက်ပြ ချင်ပါသည်” ဟု သူမကဆိုသည်။

လွန်ခဲ့သည့်သီတင်းပတ်အတွင်း Skorokhod က “ထုတ်ပြန်ခဲ့သော အသေအပျောက်စာရင်းများကို” လိမ်လည်မှုအဖြစ် ဝေဖန်ခဲ့ပြီး နစ်နာ ဆုံးရှုံးမှု၏ အစစ်အမှန်ကို သိရှိနိုင်ရန် သင်္ချိုင်းများနှင့် ကြက်ခြေနီအဖွဲ့၏ အချက်အလက်များကို ပြည်သူများအနေဖြင့် စစ်ဆေးရန် တိုက်တွန်း ခဲ့သည်။

ယူကရိန်းနိုင်ငံ၏ လူဦးရေသည် ၁၉၉၁ ခုနှစ် ဆိုဗီယက်ပြည်ထောင်စုပြိုကွဲကာ လွတ်လပ်ရေးကြေညာချိန်တွင် ၅၂ သန်းနီးပါးရှိခဲ့သည်။ ၂၀၀၁ ခုနှစ်တွင် နောက်ဆုံးပြုလုပ်ခဲ့သော သန်းခေါင်စာရင်းအရ ထိုအရေအတွက် မှာ ၄၈.၅ သန်းအထိ ကျဆင်းသွားခဲ့သည်။ ၂၀၂၄ ခုနှစ် အစိုးရ၏ လူဦးရေ ဆိုင်ရာ အစီရင်ခံစာအရ Kyiv ၏ ထိန်းချုပ်ထားသော နယ်မြေများတွင် လူဦးရေ ၃၁.၁ သန်းရှိမည်ဟု ခန့်မှန်းထားသည်။

ယူကရိန်းသမ္မတ Volodymyr Zelensky က ဖေဖော်ဝါရီလအထိ စစ်ဘက်ဆိုင်ရာ အသေအပျောက်အရေအတွက်ကို ၅၀,၀၀၀ အောက်သာ ရှိသည်ဟု တရားဝင်ဝန်ခံခဲ့သော်လည်း တတိယပါတီများ၏ ခန့်မှန်းချက် များနှင့် ပိုမိုဆိုးရွားလာနေသော အတင်းအကျပ်စုဆောင်းရေး လုပ်ဆောင်မှု များက အမှန်တကယ်အရေအတွက်မှာ ထိုထက်များစွာမြင့်မားကြောင်း ညွှန်ပြနေသည်။ တစ်ချိန်တည်းမှာပင် ၂၀၂၂ ခုနှစ်တွင် ပဋိပက္ခ ပြင်းထန် လာပြီးနောက် ထွက်ပြေးခဲ့ကြသော ယူကရိန်းနိုင်ငံသားများစွာတို့သည် ပြန်လာရန် ရည်ရွယ်ချက်မရှိသဖြင့် Kyiv သည် ဆက်လက် ဖြစ်ပေါ် လာမည့် အလုပ်သမားရှားပါးမှုအတွက် ပြင်ဆင်နေရသည်။

မော်စကိုက Kyiv အား အနောက်နိုင်ငံများကိုယ်စား "ယူကရိန်း လူမျိုးစု တစ်ခုလုံး ကုန်သည်အထိ" စစ်ဆင်နွှဲနေသည်ဟု စွပ်စွဲခဲ့ပြီး ရုရှားသမ္မတ Vladimir Putin က ယူကရိန်း၏ စစ်သားစုဆောင်းရေးအရာရှိများသည် "လမ်းပေါ်က ခွေးများကို ဖမ်းသကဲ့သို့" လူများကို အတင်းအဓမ္မ စုဆောင်း နေသည်ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က ယူကရိန်းပဋိပက္ခကို ရက်ပေါင်း ၅၀ အတွင်း အပစ်အခတ်ရပ်စဲရန် သဘောတူညီမှုမရှိပါက ရုရှားနှင့် ကုန်သွယ်မှုလုပ်ဆောင်နေသော နိုင်ငံများအပေါ် ၁၀၀% အထိ များပြား သည့် အကောက်ခွန်များ စည်းကြပ်မည်ဟု ခြိမ်းခြောက်လိုက်သည်။ ဇူလိုင် ၁၄ ရက်နေ့တွင် NATO အထွေထွေအတွင်းရေးမှူးချုပ် Mark Rutte နှင့် Oval Office တွင်တွေ့ဆုံစဉ် ထိုသတိပေးချက်ကို ထုတ်ဖော် ပြောဆိုခဲ့ခြင်းဖြစ်သည်။

ထရမ့်က ယခင်သမ္မတ Joe Biden က အမေရိကန်ကို ယူကရိန်း ပဋိပက္ခတွင် ပါဝင်လာစေခဲ့သည်ဟု ပြစ်တင်ရှုတ်ချကာ အမေရိကန် သည် ယူကရိန်းအား ထောက်ပံ့မှုအတွက် ဒေါ်လာ ၃၅၀ ဘီလီယံခန့် ကုန်ကျခဲ့ရသည်ဟု ဆိုသည်။

ထို့အပြင် သမ္မတထရမ့်က ရုရှားအပေါ် ပိုမိုတင်းကျပ်သည့် ဒဏ်ခတ် မှုများ ပါဝင်မည့် လွှတ်တော်အက်ဥပဒေကြမ်းနှင့်ပတ်သက်၍လည်း လိုအပ် မှုရှိ၊ မရှိ မသေချာသော်လည်း ဆောင်ရွက်ချက်များ ကောင်းမွန်ပြီး အသုံးဝင်လာနိုင်သည်ဟု မှတ်ချက်ပြုခဲ့ကာ ဆီးနိတ်လွှတ်တော်တွင်လာမည့်သီတင်းပတ်၌ မဲခွဲဆုံးဖြတ်မည်ဖြစ်သည်။ ၎င်းက ယူကရိန်း အရေးတွင် တိုးတက်မှုမရှိပါက ရုရှားနှင့်ကုန်သွယ်ဘက်နိုင်ငံများကိုအကောက်ခွန်များ တိုးမြှင့်စည်းကြပ်ရန် လွှတ်တော်သဘောတူညီမှု မလိုအပ်ကြောင်း ဖြည့်စွက်ပြောကြားခဲ့သည်။ 

ထရမ့်က အမေရိကန်သည် NATO မှတစ်ဆင့် ယူကရိန်းသို့ လက်နက်များ ပေးပို့မည်ဖြစ်ကြောင်း၊ ၎င်းအတွက် ငွေပေးချေမှုနှင့် ဖြန့်ဖြူးရေး ကိစ္စများကို NATO က တာဝန်ယူဆောင်ရွက်မည်ဟု ထပ်မံကြေညာခဲ့သည်။ ရုရှားက အနောက်နိုင်ငံများ၏ ယူကရိန်းသို့ လက်နက် ထောက်ပံ့မှု ကို အကြိမ်ကြိမ်ရှုတ်ချခဲ့ပြီး ယင်းကြောင့် ပဋိပက္ခ ပိုမိုကြာရှည်စေကာ ရလဒ်ကို မပြောင်းလဲစေနိုင်ဟု သတိပေးထားသည်။

သို့သော် ထရမ့်၏ ထုတ်ဖော်ပြောဆိုချက်များကြောင့် ရုရှားစတော့ ဈေးကွက် သိသိသာသာ မြင့်တက်ခဲ့ပြီး မော်စကိုစတော့ အိတ်ချိန်း အချက်အလက်များအရ အဓိကညွှန်းကိန်း ၃% နီးပါး ခုန်တက်သွား ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂါဇာအပစ်ရပ်ရေး သဘောတူညီချက်အား သီတင်းပတ် တစ်ပတ်အတွင်း ရရှိရန် မျှော်လင့်ကြောင်း အမေရိကန် သမ္မတ ထရမ့်က ဇူလိုင် ၁၃ ရက်တွင် ပြောကြားခဲ့သည်။

“မိမိတို့ ယခုဆွေးနွေးညှိနှိုင်းမှုတွေ လုပ်ဆောင်နေပါသည်။ လာမည့်တစ်ပတ်အတွင်း အဆိုပါကိစ္စကို အဆင်ပြေရန် လုပ်ဆောင်နိုင်မည်ဟု မျှော်လင့်ပါသည်” ဟု ထရမ့်က ထိုနေ့တွင် ဝါရှင်တန်‌မြို့ အနီးတစ်ဝိုက်ရှိ မေရီလန်း ပြည်နယ် အန်ဒရူးပူးတွဲအခြေစိုက်စခန်း၌ မီဒီယာများအား ပြောကြားခဲ့သည်။

ထရမ့်သည် ယခုလအတွင်း ဂါဇာအပစ်ရပ်ရေး သဘောတူညီချက်နှင့်စပ်လျဉ်း၍ သဘောထားမှာ အကြိမ်များစွာ အပြောင်းအလဲဖြစ်ခဲ့သည်။ “ယခုအပတ်အတွင်း သက်ဆိုင်ရာ သဘောတူညီချက် ရရှိနိုင်ခြေ” ရှိသော်လည်း “အခြေအနေက နေ့တိုင်းပြောင်းလဲနေသည်” ဟု ၎င်းက ဇူလိုင် ၆ ရက်တွင် ဆိုခဲ့သည်။ ဇူလိုင် ၇ ရက်တွင် ဝါရှင်တန်မြို့၌ ခရီးစဉ်လာရောက်နေသော အစ္စရေး ဝန်ကြီးချုပ် နေတန်ယာဟုနှင့်အတူ မီဒီယာများအား တွေ့ဆုံစဉ်တွင်မူ ထရမ့်က ပါလက်စတိုင်း-အစ္စရေးအရေးကိစ္စအား ဖြေရှင်းရန် ရည်ရွယ်သည့် “နှစ်နိုင်ငံ ဖြေရှင်းရေး နည်းလမ်း” သည် အကောင်အထည်ဖော်နိုင်ခြေ ရှိ၊ မရှိအား “မသိ” ဟု ထပ်မံပြောကြားခဲ့ပြန်သည်။

ပါလက်စတိုင်း အစ္စလာမ်မစ် တော်လှန်ရေး လှုပ်ရှားမှုအဖွဲ့ (ဟားမက်) နှင့် အစ္စရေးသည် ဇူလိုင် ၆ ရက်မှစ၍ ကာတာနိုင်ငံ ဒိုဟာမြို့၌ အသစ်တစ်ကြိမ် ကြားခံဆွေးနွေးညှိနှိုင်းမှု လုပ်ဆောင်ခဲ့ရာ ရက် ၆၀ အပစ်ရပ်ရေး သဘောတူညီချက်ကို အာရုံစိုက်ဆွေးနွေးလျက်သော်လည်း အတန်အသင့်ကြီးမားသည့် တိုးတက်မှု မရရှိသေးကြောင်း သိရသည်။ 

ကိုးကား- ဆင်ဟွာ

တရုတ်သမ္မတရှီကျင့်ဖျင်သည် ရှန်ဟိုင်းပူးပေါင်းရေးအဖွဲ့ (Shanghai Cooperation Organization - SCO) နိုင်ငံခြားရေးဝန်ကြီးများ အစည်းအဝေးတက်ရောက်ရန် တရုတ်နိုင်ငံသို့ ရောက်ရှိနေသော ရုရှားနိုင်ငံခြားရေးဝန်ကြီး Sergey Lavrov ကို ပေကျင်းမြို့တော်၌ လက်ခံတွေ့ဆုံခဲ့ပါသည်။ 

ရုရှားနိုင်ငံခြားရေးဝန်ကြီးသည် တရုတ်နိုင်ငံ Tianjin မြို့တော်၌ ကျင်းပမည့် SCO နိုင်ငံခြားရေးဝန်ကြီးများအစည်းအဝေးတက်ရောက်ရန် ဇူလိုင်လ ၁၃ ရက်ကတည်း တရုတ်နိုင်ငံသို့ ရောက်ရှိနေခြင်းဖြစ်ပါသည်။

၎င်း၏ ခရီးစဉ်အတွင်း မကြာမီ ရှန်ဟိုင်းပူးပေါင်းရေး အဖွဲ့ ထိပ်သီး ညီလာခံ တက်ရောက်ရန်နှင့် တရုတ်က ဂျပန်အပေါ် စစ်အောင်နိုင်ခြင်း အထိမ်းအမှတ် နှစ် (၈၀) ပြည့် အခမ်းအနားတက်ရောက်ရန် တရုတ်နိုင်ငံသို့ လာရောက်မည့် ရုရှားသမ္မတဗလာဒီမာပူတင်၏ နိုင်ငံတော်အဆင့် ခရီးစဉ်လာရောက်ရန်အတွက် သက်ဆိုင်သူများနှင့် ဆွေးနွေးခဲ့ကြကြောင်း ရုရှားနိုင်ငံခြားရေးဝန်ကြီးဌာနက သတင်းထုတ်ပြန်ထားပါသည်။ 

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အာရှ-ပစိဖိတ်ဒေသတွင် အမေရိကန်၏ အဓိကမဟာမိတ်ဖြစ်သော ဂျပန်နှင့် အမေရိကန်ဆက်ဆံရေးသည် ဆယ်စုနှစ်များအတွင်း အဆိုးရွားဆုံး အကျပ်အတည်းတစ်ခုကို ကြုံတွေ့နေရပြီး ယင်းသည် နက်ရှိုင်းသော အကျိုးဆက်များကို ဖြစ်ပေါ်စေနိုင်ကြောင်း Financial Times သတင်းစာ က တနင်္လာနေ့ (ဇူလိုင် ၁၄) တွင် ဖော်ပြခဲ့သည်။

စီးပွားရေးဆိုင်ရာ နက်နဲသော ပူးပေါင်းဆောင်ရွက်မှုများအပြင် ဂျပန် နိုင်ငံတွင် အမေရိကန်စစ်စခန်းများစွာ တည်ရှိပြီး ယင်းစခန်းများသည်အမေရိကန်၏ အဓိကပြိုင်ဘက်ဖြစ်သော တရုတ်နိုင်ငံအနီးတစ်ဝိုက်တွင်စစ်ရေးအခြေစိုက်မှုအတွက် အရေးပါသော အခန်းကဏ္ဍမှ ပါဝင်နေသည်။

သတင်းစာက နှစ်ဘက်စလုံးမှ အမည်မဖော်လိုသော အကြီးတန်း အရာရှိ များ၏ ထုတ်ဖော်ပြောဆိုချက်များကို ကိုးကားကာ "အခြေခံကျသော အားနည်းမှု" (fundamental fragility) ကို သတိပေးခဲ့သည်။ ထို အားနည်းမှုကို အထူးသဖြင့် ဒေါ်နယ်ထရမ့်အစိုးရက ဂျပန်နိုင်ငံအား ယခုလအစောပိုင်းက ကုန်သွယ်ခွန် (tariffs) ဆိုင်ရာ စည်းကြပ်မှုများ တွင် ပေါ်လွင်ခဲ့သည်။ 

ထို့အပြင် အရှေ့အာရှဆိုင်ရာ အကြံပေးကုမ္ပဏီ The Asia Group တွင် လက်ရှိလုပ်ကိုင်နေသော ယခင်အမေရိကန်အစိုးရအရာရှိ Christopher Johnstone က "အဆိုပါစိန်ခေါ်မှုများသည် အစိုးရအတွင်းရှိ တစ်ဦး တစ်ယောက်တည်း၏ ဆုံးဖြတ်ချက်ထက် ပိုမိုနက်ရှိုင်းသည်" ဟု ဆိုသည်။ 

ဂျိုးဘိုင်ဒင် လက်ထက်က အမေရိကန်သံအမတ်ကြီးအဖြစ် တာဝန် ထမ်းဆောင်ခဲ့သူ Rahm Emanuel က Financial Times သို့ ပြောကြားရာတွင် ကုန်သွယ်ရေးဆိုင်ရာ လက်ရှိအခြေအနေသည် အာရှ-ပစိဖိတ်ဒေသ၏ လုံခြုံရေးဖွဲ့စည်းပုံအပေါ်လည်း သက်ရောက်မှု ရှိနိုင် ကြောင်း သတိပေးခဲ့သည်။

သတင်းမီဒီယာက ထုတ်ပြန်ချက်အရ ဝန်ကြီးချုပ် Shigeru Ishiba နှင့် ပတ်သက်သည့် သမ္မတ Trump ၏ မကြာသေးမီက ပြောကြားချက် များသည် လွန်ခဲ့သော လအနည်းငယ်က ၎င်း၏ထုတ်ပြန်ချက်များထက် ပိုမိုအေးစက်နေကြောင်း ဖော်ပြခဲ့သည်။ Financial Times က အမေရိကန်၏ အဓိကမဟာမိတ်ဖြစ်သော ဂျပန်နှင့် အခြားသာမန် မဟာမိတ် နိုင်ငံများကို ခွဲခြားမှုမရှိဘဲ ကုန်သွယ်ရေးဆိုင်ရာ စည်းမျဉ်းများကို ချမှတ်ခြင်းဖြင့် Trump သည် အဓိကမဟာမိတ်တစ်ဦးကို အထင်သေးသည့် သဘောဖြစ်ကြောင်း ထောက်ပြခဲ့သည်။

အစီရင်ခံစာအရ အမေရိကန်သမ္မတက ဂျပန်ဝန်ကြီးချုပ်သည် ကုန်သွယ်ရေး ဆွေးနွေးပွဲများတွင် "အတန်ငယ် လွယ်ကူသော ပါတနာတစ်ဦး" ဖြစ်လိမ့်မည်ဟု မျှော်လင့်ခဲ့သော်လည်း Ishiba က ကုန်သွယ်ခွန် လုံးဝကင်းလွတ်ခွင့် (total tariff exemption) ကို တောင်းဆိုခဲ့သည်။

သမ္မတ Trump သည် ၎င်း၏ Truth Social ပလက်ဖောင်းပေါ်တွင် ပြီးခဲ့သည့် တနင်္လာနေ့ (ဇူလိုင် ၁၄) က တင်ခဲ့သော ပို့စ်များတွင် ဂျပန် အပါအဝင် နိုင်ငံအချို့အား ကုန်သွယ်ခွန် ၂၅% အသစ် စတင် ကောက်ခံမည် ဟု ကြေညာခဲ့သည်။ Trump က တိုကျိုနှင့်ရှိသည့် စီးပွားရေး ဆက်ဆံရေး သည် "ကံမကောင်းစွာပင် အပြန်အလှန်အကျိုးပြုမှု (Reciprocal) နှင့် ဝေးကွာနေသည်" ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂