(CNN ၊ ဇူလိုင် ၉)

မကြာသေးမီက အမေရိကန်သမ္မတ ဒေါ်နယ်ထရမ့်နှင့် ရုရှားသမ္မတ ဗလာဒီမာပူတင်တို့ ယူကရိန်း ငြိမ်းချမ်းရေးဆွေးနွေးပွဲ မအောင်မမြင်ဖြစ်ခဲ့ပြီးနောက်  နိုင်ငံခြားရေးဝန်ကြီး Marco Rubio သည် ကြာသပတေးနေ့၌ ရုရှား နိုင်ငံခြားရေးဝန်ကြီး ဆာဂျေ လာရော့ဗ်နှင့် တွေ့ဆုံစီစဉ်လျက်ရှိကြောင်း အမေရိကန် နိုင်ငံခြားရေးဝန်ကြီးဌာန အကြီးတန်းအရာရှိတစ်ဦး၏ ပြောကြားချက်ကို ကိုးကား၍ ဇူလိုင်လ ၉ ရက်နေ့ CNN သတင်းတွင်ဖော်ပြပါသည်။

အဆိုပါတွေ့ဆုံမှုကို အရှေ့တောင်အာရှနိုင်ငံများအသင်း (အာဆီယံ) အစည်းအဝေး၏ ဘေးဘန်း ဆွေးနွေးမှုအဖြစ် မလေးရှားနိုင်ငံတွင် ကျင်းပပြုလုပ်ရန်ရှိပါသည်။ 

ယခုအကြိမ်သည် Rubio နှင့် ရုရှား နိုင်ငံခြားရေးဝန်ကြီးတို့ တွေ့ဆုံမှု ဒုတိယအကြိမ် တွေ့ဆုံခြင်း ဖြစ်ပြီး၊ ပထမအကြိမ်ကို ဆော်ဒီအာရေဗျတွင် ယခုနှစ် အစောပိုင်းက တွေ့ဆုံခဲ့ကြပါသည်။  မကြာ သေးမီလများက အမေရိကန်နိုင်ငံ၏ ရုရှားနှင့် ယူကရိန်းအကြား အပစ်အခတ်ရပ်စဲရေး အောင်မြင်မှု ရရှိစေရန်အတွက် တွန်းအားပေး ဆောင်ရွက်လျက်ရှိရာ ၎င်းတို့နှစ်ဦးသည် တယ်လီဖုန်းမှတစ်ဆင့် ကြိမ်ဖန်များစွာ ပြောဆိုခဲ့ကြပါသည်။ 

၎င်း၏ ဒုတိယသက်တမ်း၏ ပထမလအနည်းငယ်အတွင်း ထရမ့်က ယူကရိန်းစစ်ပွဲအဆုံးသတ်ရေး သဘောတူလာစေရန် ရည်ရွယ်၍ ပူတင်နှင့် ပိုမိုညှိနှိုင်းမှုပြုရန် နည်းလမ်းများရှာဖွေခဲ့သည်။  ယခု ရုရှား၏ ယူကရိန်းအပေါ် ဆက်လက်တိုက်ခိုက်နေမှုသည် ထရမ့်အနေဖြင့် စိုးရိမ်စိတ်ကြီးထွားမှု ဆက်လက်ဖြစ်ပေါ်နေရာ Rubio နှင့် လာရော့ဗ်တို့အကြား တွေ့ဆုံမှုသည် တင်းမာနိုင်ခြေရှိသော တွေ့ဆုံမှုတစ်ရပ် ဖြစ်လာနိုင်ပါသည်။ 

ကိုးကား- CNN

ဘာသာပြန်ဆိုသူ- ဦးခိုင်ထွဋ်လှ

(Bloomberg ၊ ဇူလိုင် ၁၀)

အမေရိကန်နိုင်ငံခြားရေးဝန်ကြီး Marco Rubioနှင့် တရုတ်နိုင်ငံခြားရေးဝန်ကြီး တို့သည် သောကြာနေ့ (ဇူလိုင် ၁၁) မလေးရှားတွင် ကျင်းပပြုလုပ်မည့် အစည်းအဝေးတွင်း၌ သမ္မတနှစ်ဦးတို့၏ထိပ်သီး အစည်းအဝေးမတိုင်မီ ပထမအကြိမ် လူကိုယ်တိုင် တွေ့ဆုံ ညှိနှိုင်း ဇာတ်တိုက် ဆွေးနွေးကြဖွယ် ရှိပါသည်။

အမေရိကန်ထိပ်တန်းကိုယ်စားလှယ်နှင့် တရုတ်နိုင်ငံခြားရေးဝန်ကြီး ဝမ်ယိတို့တွေ့ဆုံမည့် အစီအစဉ်မှာ ကွာလာလမ်ပူမြို့ ဒေသစံတော်ချိန် မွန်းလွဲ ၃ နာရီဖြစ်ကြောင်း Rubio ၏ Public Schedule အရ သိရပါသည်။ နှစ်ဖက်အရာထမ်းများသည် သောကြာနေ့တွင် ပြီးဆုံး မည့် အရှေ့တောင်အာရှ နိုင်ငံများအသင်း အစည်းအဝေးတွင် ရောက်ရှိနေကြပါသည်။ 

ယင်းသည် သမ္မတ ဒေါ်နယ်ထရမ့် အိမ်ဖြူတော်သို့ ပြန်လည်ရောက်ရှိပြီးချိန်မှစ၍ ကျင်းပ ပြုလုပ်ရန်ရှိသည့် အဆင့်မြင့်ဆုံး အစည်းအဝေးဖြစ်ပါသည်။   အဆင့်မြင့် ကိုယ်စားလှယ်များသည် အပြုသဘောဆောင်သော ဆွေးနွေးမှုများ ပြုလုပ်သွားဖွယ်ရှိပြီး ခေါင်းဆောင်များ၏ ထိပ်သီး အစည်းအဝေးအတွက် တိုးတက်မှုများဖော်ဆောင်ကာ နှစ်နိုင်ငံကြား ကုန်သွယ်ရေးတင်းမာမှု၊ ပွတ်တိုက်မှုများကိုလည်း တင်းမာမှုများ ဖြေလျော့သွားစေနိုင်လိမ့်မည်ဖြစ်ပါသည်။

Rubio က ကြာသပတေးနေ့တွင် သတင်းသမားများကို “တရုတ်သည် ရုရှား၏ ဆောင်ရွက် ချက်များကို အားပေးထောက်ခံနေသည်မှာ သေချာကြောင်း၊ မိမိအနေနှင့် ၎င်းတို့က မည်သည့် အကျိုးကိုမျှ မျှော်ကိုးခြင်းမရှိဘဲ၊ အကူညီပေးလိုသည့် ဆန္ဒရှိနေကြမည်ဟု ထင်ကြောင်း” ပြောကြားပါသည်။ 

ယူကရိန်းကို ကျူးကျော်မှု ပြုခဲ့သည့် နောက်ပိုင်း ပေကျင်းသည် စီးပွားရေးအရ၊ သံတမန် ရေးအရ မော်စကိုကို ထောက်မပေးနေခြင်းသည် ကမ္ဘာ့စီးပွားရေးအင်အားကြီး နိုင်ငံ နှစ်ခု၏ ဆက်ဆံရေးအတွက် အတားအဆီးတစ်ခု ဖြစ်နေပါသည်။

ဇန်နဝါရီလ နောက်ဆုံးတယ်လီဖုန်းခေါ်ဆိုမှုတွင် Rubioက တရုတ်၏ တိုင်ဝမ်အပေါ် ပြုမူ နေမှုများသည် တောင်တရုတ်ပင်လယ်အရေးကို စိုးရိမ်ပူပန်မှု မြင့်တက်စေကြောင်း ပြောကြား ခဲ့ပြီး၊ ဝမ်က အမေရိကန်သည် တိုင်ဝမ်နှင့်ပတ်သက်၍ သတိထား ကိုင်တွယ် ဆောင်ရွက်ရန် သတိပေးပြောကြားခဲ့ပါသည်။ ယခုနှစ်အတွင်း တရုတ်သမ္မတ ရှီကျင့်ဖျင်နှင့် တွေ့ဆုံလိုကြောင်း ထရမ့်က ပြောကြားခဲ့ကြောင်းနှင့် အဆင့်မြင့် တရုတ်အရာရှိများက ယခင် ရက်သတ္တပတ်က နှစ်နိုင်ငံဆက်ဆံရေးအပေါ် အပြုသဘော ဖော်ပြခဲ့ကြပါသည်။ 

ဇွန်လ အစောပိုင်း တယ်လီဖုန်းဆက်သွယ်ပြောဆိုမှုတွင် ရှီက ထရမ့်ကို တရုတ်နိုင်ငံသို့ လာရောက် လည်ပတ်ရန် ဖိတ်ကြားခဲ့ပါသည်။ အမေရိကန်အစိုးရအဖွဲ့ စီးပွားရေးဆိုင်ရာ အမှုဆောင် အဖွဲ့သည် ယခုနှစ်အတွင်း တရုတ်ပြည်သို့ လိုက်ပါသွားဖွယ်ရှိကြောင်း ယခင် ရက်သတ္တပတ် က Bloomberg သတင်းတွင်ဖော်ပြပါသည်။

ဖေဖော်ဝါရီလအတွင်း ဝမ်သည် ကုလသမဂ္ဂ လုံခြုံရေးကောင်စီ အစည်းအဝေးတက်ရောက် ရန် နယူးယောက်မြို့သို့ သွားရောက်ခဲ့သော်လည်း၊ ထရမ့်အစိုးရအဖွဲ့နှင့် နှစ်နိုင်ငံ ဆွေးနွေးပွဲ ကျင်းပပြုလုပ်ခဲ့ခြင်းမရှိပေ။   နောက်ရက်သတ္တပတ်များအတွင်း ဆန်ပေးမှ ဆီရမည် (tip-for-tat) ဆိုသည့် လုပ်ဆောင်မှုမျိုးဖြင့် တရုတ်ထုတ်ကုန်များအပေါ် အမေရိကန်၏ အကောက် အခွန် စည်းကြပ်မှုသည် မေလညှိနှိုင်းမှုအပြီး ရက်ပေါင်း ၉၀ ကြာ ဆိုင်းငံ့ခြင်း မပြုမီ ၁၄၅ ရာခိုင်နှုန်း အထိ မြင့်တက်သွားခဲ့ပါသည်။ 

ကိုးကား- Bloomberg

ဘာသာပြန်ဆိုသူ- ဦးခိုင်ထွဋ်လှ

ပြီးခဲ့သည့် ဗုဒ္ဓဟူးနေ့ (ဇူလိုင် ၉) က အမေရိကန် သမ္မတ ဒေါ်နယ်ထရမ့် သည် အာဖရိကခေါင်းဆောင်များနှင့် တွေ့ဆုံချိန် လိုက်ဘေးရီးယား သမ္မတ ဂျိုးဇက်ဘိုကိုင်၏ အင်္ဂလိပ်စကားပြော ကောင်းမွန်မှုကို ချီးကျူး ပြောကြားလိုက်ပါသည်။ 

“လိုက်ဘေးရီးယားသည် အမေရိကန်ပြည်ထောင်စု၏ သမိုင်း ရှည်လျားသော မိတ်ဆွေဖြစ်ပြီး မိမိတို့ကလည်း အမေရိကန် ပြန်လည်ကြီးပွားစေရေး မူဝါဒကို ယုံကြည်ပါကြောင်း၊ လိုက်ဘေးရီးယားနိုင်ငံသို့လည်း အမေရိကန် ရင်းနှီးမြှုပ်နှံမှုများ တိုးမြှင့်ရန် တောင်းဆိုအပ်ပါကြောင်း၊ ယခုလို အခွင့် အလမ်းများ အတွက်လည်း ကျေးဇူးတင်ပါကြောင်း” လိုက်ဘေးရီးယား သမ္မတဂျိုးဇက်ဘိုကိုင်က အိမ်ဖြူတော်တွေ့ဆုံပွဲတွင် အင်္ဂလိပ်ဘာသာ ဖြင့် ပြောကြားလိုက်ပါသည်။ 

ထိုသို့ လိုက်ဘေးရီးယားသမ္မတ၏ ပြောကြားချက်ကို နားထောင်ပြီးနောက် အမေရိကန်သမ္မတဒေါ်နယ်ထရမ့်က “အလွန်ကောင်းသည့် အင်္ဂလိပ် စကားပဲ၊ ပြောသွားတာ အတော်လည်း လှပပါသည်၊ ဘယ်မှာ သင်ယူခဲ့တာလဲ” ဟု ချီးကျူးမေးမြန်းခဲ့ပါသည်။ “လိုက်ဘေးရီးယားမှာ သင်ထားတာလား” ဟု ထရမ့်၏ မေးမြန်းချက်အပေါ် သမ္မတဘိုကိုင်က “ဟုတ်ကဲ့ပါ သမ္မတကြီး” ဟု ဖြေကြားသွားခဲ့ပါသည်။ 

ထရမ့်သည် ဂါဘွန်၊ ဂီနီ၊ လိုက်ဘေးရီးယား၊ မော်ရီတေးနီးယားနှင့် ဆီနီဂေါမှ ခေါင်းဆောင်များကို ဗုဒ္ဓဟူးနေ့ (ဇူလိုင် ၉) တွင် အိမ်ဖြူတော်၌ လက်ခံဧည့်ခံခဲ့ပြီး အမေရိကန်၏ အာဖရိကဆိုင်ရာမူဝါဒကို အကူအညီမှ ကုန်သွယ်ရေးသို့ ပြောင်းလဲမည်ဖြစ်ကြောင်း၊ အမေရိကန်သည် တရုတ် ထက် အာဖရိကအတွက် ပိုမိုကောင်းမွန်သော မိတ်ဖက်ဖြစ်ကြောင်း ပြောကြားခဲ့သည်။ တွေ့ဆုံပွဲရှိ ခေါင်းဆောင်အများစုသည် ၎င်းတို့၏ မိခင်ဘာသာစကားဖြင့် ဘာသာပြန်များမှတစ်ဆင့် ပြောကြားခဲ့ကြသည်။

ထရမ့်က ၎င်း၏ အစိုးရအဖွဲ့သည် အာဖရိကရှိ မိတ်ဆွေဖွဲ့မှုများကို အားကောင်းလာစေရန် ကတိပြုထားကြောင်း၊ အနာဂတ်တွင် အာဖရိကသို့ သွားရောက်လည်ပတ်ရန် မျှော်လင့်ကြောင်း ပြောကြားခဲ့ပါသည်။

အင်္ဂလိပ်ဘာသာစကားသည် လိုက်ဘေးရီးယား၏ ရုံးသုံးဘာသာစကား ဖြစ်ပါသည်။

ကိုးကား- The Guardian

Photo: CBS News

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်၏ NATO မဟာမိတ်နိုင်ငံများသည် အမေရိကန်ထုတ် လက်နက်များအတွက် ကျသင့်ငွေအပြည့်အဝ ပေးချေရမည်ဟု အမေရိကန် သမ္မတ ဒေါ်နယ်ထရမ့်က ပြောကြားခဲ့ပြီး ၎င်းလက်နက်များထဲမှ အချို့ ကို ယူကရိန်းသို့ လွှဲပြောင်းပေးအပ်နိုင်ကြောင်း ညွှန်းဆိုခဲ့သည်။

အမေရိကန်သမ္မတသည် ၎င်း၏ ပထမသက်တမ်းအတွင်းကတည်းက ဥရောပ NATO အဖွဲ့ဝင်များအား ၎င်းတို့၏ကာကွယ်ရေးအတွက် တာဝန်ယူရန် ဖိအားပေးခဲ့ပြီး ယခု ဒုတိယသက်တမ်းအတွင်းတွင်လည်း ကာကွယ်ရေး အသုံးစရိတ်များ တိုးမြှင့်ရန် တွန်းအားပေးလျက်ရှိသည်။

သောကြာနေ့ (ဇူလိုင် ၁၁) တွင် ထုတ်ပြန်ခဲ့သည့် NBC နှင့်အင်တာဗျူး တစ်ခုတွင် အမေရိကန် သမ္မတက အနာဂတ်တွင် စစ်ရေးမဟာမိတ် အဖွဲ့အစည်းသို့ လက်နက်များပေးပို့ရန် ၎င်း၏ ချဉ်းကပ်မှုကို ရှင်းပြ ခဲ့သည်။

“အမေရိကန်က NATO ကို လက်နက်များ ပို့ဆောင်ထောက်ပံ့မည်ဖြစ်ပြီး NATO က အဆိုပါလက်နက်များ၏ တန်ဖိုးအပြည့်အဝကို ပေးချေရမည်” ဟု ၎င်းက ပြောကြားခဲ့သည်။

ထို့အပြင် ဝါရှင်တန်၏ NATO မဟာမိတ်များအနေဖြင့် လက်နက်များ ရရှိပြီးနောက် “NATO က အဆိုပါလက်နက်များကို ယူကရိန်းကို ထောက်ပံ့ နိုင်မည်” ဟု ၎င်းက ဖြည့်စွက်ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဗြိတိန်နှင့် ပြင်သစ်တို့သည် ဥရောပအတွင်း လုံခြုံရေးခြိမ်းခြောက်မှုများ တိုးမြင့်လာသည်ဟု ရှုမြင်သည့်အတွက် ၎င်းတို့၏ နျူကလီးယား လက်နက်များကို ပိုမိုပူးပေါင်းအသုံးပြုရန် သဘောတူညီမှုအသစ်ကို ကြေညာခဲ့သည်။ မော်စကိုမှ အဆိုပါလုပ်ရပ်ကို NATO ၏ ရုရှား ဆန့်ကျင်ရေး ပွင့်လင်းမြင်သာသောမူဝါဒ၏ အစိတ်အပိုင်းတစ်ခုအဖြစ် သတ်မှတ်ကာ ယင်းသဘောတူညီမှုကို ၎င်း၏ စစ်ရေးအစီအစဉ်များတွင် ထည့်သွင်းစဉ်းစားသွားမည်ဟု သတိပေးခဲ့သည်။

ကြာသပတေးနေ့ (ဇူလိုင် ၁၀) တွင် ထုတ်ပြန်ခဲ့သော ပူးတွဲကြေညာချက်တွင် အစိုးရနှစ်ရပ်က ဗြိတိန်နှင့် ပြင်သစ်၏ အဏုမြူလက်နက်များသည် နိုင်ငံနှစ်ခု၏ အဓိကအကျိုးစီးပွားများကို ကာကွယ်ရန်ရည်ရွယ်ကြောင်း၊ ၎င်းတို့၏ နျူကလီးယားတပ်ဖွဲ့များသည် လွတ်လပ်သော်လည်း ညှိနှိုင်း ဆောင်ရွက်နိုင်ပြီး NATO အဖွဲ့၏ စုပေါင်းလုံခြုံရေးအတွက် အရေး ပါသော အခန်းကဏ္ဍမှ ပါဝင်နိုင်ကြောင်း ဖြည့်စွက်ပြောကြားခဲ့သည်။

ပြင်သစ်သမ္မတ အီမန်နျူရယ် မက်ခရွန်နှင့် ဗြိတိန်ဝန်ကြီးချုပ် ကီယာ စတာမာက အဆိုပါသဘောတူညီမှုကို “Northward ကြေညာချက်” အဖြစ် ဂုဏ်ပြုခဲ့ပြီး NATO ၏ ပြိုင်ဘက်များအား “ဥရောပတိုက်အတွက် မည်သည့်ပြင်းထန်သော ခြိမ်းခြောက်မှုမဆို မိမိတို့နှစ်နိုင်ငံထံမှ တုံ့ပြန်မှု ကို ဖြစ်ပေါ်စေမည်” ဟု သတိပေးခဲ့သည်။

လန်ဒန်နှင့် ပါရီတို့သည် ၎င်းတို့၏ ပူးပေါင်းတပ်ဖွဲ့များကို ချဲ့ထွင်ရန်နှင့် အနာဂတ်ပြိုင်ဘက်များအား ဟန့်တားရန် (သို့) ကာကွယ်ရန်အတွက် အပြည့်အဝစစ်တိုက်နိုင်သည့် အဆင့်သို့ ရောက်ရှိရန် ကတိပြုခဲ့ကြသည်။

စတော့ဟုမ်း အပြည်ပြည်ဆိုင်ရာငြိမ်းချမ်းရေး သုတေသနအင်စတီကျု (SIPRI) ၏ အချက်အလက်များအရ ဗြိတိန်သည် နျူထိပ်ဖူး ၂၂၅ ခုခန့်၊ ပြင်သစ်တွင် ၂၉၀ ခန့် ပိုင်ဆိုင်ထားသည်ဟု ခန့်မှန်းရပြီး အမေရိကန်နှင့် ရုရှားနိုင်ငံတို့တွင် နျူထိပ်ဖူး ၅၀၀၀ ကျော်စီ ပိုင်ဆိုင်ထားသည်။

တုံ့ပြန်သည့်အနေဖြင့် ရုရှားနိုင်ငံခြားရေးဝန်ကြီးဌာန ဒုတိယဝန်ကြီး ဆာဂေး ရီယာဘ်ကော့ဗ်က မော်စကိုအနေဖြင့် ဝါရှင်တန်၏ အနီးကပ် NATO မဟာမိတ်များဖြစ်သော ဗြိတိန်နှင့် ပြင်သစ်တို့၏ ပေါင်းစည်းအား ကို လျစ်လျူရှုမထားကြောင်း သတိပေးခဲ့သည်။

မတ်လအတွင်းက မက်ခရွန်က ပြင်သစ်၏ နျူကလီးယား အကာအကွယ်ကို ဥရောပရှိ ပါရီ၏မဟာမိတ်များအထိ ချဲ့ထွင်ရန် အဆိုပြုခဲ့သော်လည်း စတာမာက နျူကလီးယားလက်နက်များ နိုင်ငံသစ်များသို့ ပျံ့နှံ့မှုကို ကန့်ကွက်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်သည် ပထမဆုံးအကြိမ်အဖြစ် ပင်တဂွန် ၏ လက်နက်သိုလှောင်ရုံများမှ ယူကရိန်းသို့ လက်နက်များ တိုက်ရိုက် ပေးပို့ရန် ၎င်း၏အခွင့် အာဏာကို အသုံးပြုမည်ဟု Reuters က ကြာသပတေးနေ့ (ဇူလိုင် ၁၀) တွင် ခိုင်လုံသော အရင်းမြစ်များ၏ ပြောကြားချက်ကို ကိုးကား၍ ဖော်ပြခဲ့သည်။

ထရမ့်အစိုးရသည် ယခုအချိန်အထိ သမ္မတဟောင်း ဂျိုးဘိုင်ဒင် လက်ထက် က အတည်ပြုထားသော လက်နက်များကိုသာ ပေးပို့ခဲ့သော်လည်း၊ Presidential Drawdown Authority (PDA) သည် ထရမ့်အား အရေးပေါ် အခြေအနေတွင် ယူကရိန်းသို့ လက်နက်များ ထောက်ပံ့ခွင့်ပြုထားသည်။

အဆိုပါအသစ်ပေးပို့မည့်လက်နက်များသည် ဒေါ်လာ သန်း ၃၀၀ ခန့် တန်ပြီး Patriot လေကြောင်းရန်ကာကွယ်ရေးစနစ်သုံး ဒုံးကျည်များနှင့် တာလတ်ပစ်ဒုံးကျည်များ ပါဝင်နိုင်သည်ဟု သတင်းများက ဆိုသည်။

အဆိုပါ လုပ်ဆောင်ချက်သည် ပြည်တွင်းလက်နက်သိုလှောင်ရုံများ ကုန်ခန်းမည်ကိုစိုးရိမ်ရသည့် ပင်တဂွန်၏ မကြာသေးမီက အချို့လက်နက်ပို့ဆောင်မှုများကို ရပ်ဆိုင်းခဲ့သည့် ဆုံးဖြတ်ချက်ကို ဆန့်ကျင်သည့် လုပ်ရပ်ဖြစ်လာမည်ဖြစ်သည်။ Kiev သို့ အကူအညီတိုးမြှင့်ပေးရန် ကြာရှည်စွာ က သံသယရှိခဲ့သူ ကာကွယ်ရေးဝန်ကြီး Pete Hegseth သည် ထရမ့်နှင့် တိုင်ပင်ခြင်းမရှိဘဲ ယာယီရပ်ဆိုင်းရန် အမိန့်ပေးခဲ့သည်ဟု သိရသည်။

သမ္မတထရမ့်က ယခုသီတင်းပတ်အစောပိုင်းတွင် ယူကရိန်းသို့ လက်နက် များ ထပ်မံပေးပို့မည်ဟု အတည်ပြုခဲ့ပြီး၊ နောက်ပိုင်းတွင် နိုင်ငံခြားရေး ဝန်ကြီး Marco Rubio က သတင်းထောက်များအား ယာယီရပ်ဆိုင်းမှု သည် “ကံမကောင်းစွာဖြင့် အဓိပ္ပာယ်လွဲမှားစွာ ဖော်ပြခံခဲ့ရကြောင်း” ပြောကြားခဲ့သည်။

ရွေးကောက်ပွဲကမ်ပိန်းအတွင်း ထရမ့်သည် ဘိုင်ဒင် ၏ ယူကရိန်းအား ကန့်သတ်ချက်မရှိ ထောက်ပံ့မှုများကို ဝေဖန်ခဲ့ပြီး ယူကရိန်း ခေါင်းဆောင် Zelensky အား ဒီမိုကရက်များကို လက်နက်များ ဆက်လက်ပေးပို့ရန် ဖြားယောင်းသွေးဆောင်နိုင်သူအဖြစ် “ကမ္ဘာ့အကြီးကျယ်ဆုံး အရောင်းသမား” ဟု သရော်ခဲ့သည်။

ယူကရိန်းတပ်များသည် ရုရှားထံမြေပိုင်ဆိုင်မှုများ ပြန်လည်ဆုံးရှုံးနေရပြီး အရံတပ်သားအသစ်များ ဖြည့်တင်းရာတွင် ခက်ခဲမှုများ တိုးပွားလာနေချိန်တွင် လက်နက်ထောက်ပံ့မှုများမှာ အရေးပါဆဲဖြစ်သည်။

မော်စကိုကမူ နိုင်ငံခြားအထောက်အပံ့လက်နက်များသည် ၎င်း၏ရည်မှန်းချက်များ အောင်မြင်ရန် ဟန့်တားနိုင်မည်မဟုတ်ဟု အခိုင်အမာ ဆိုထားသည်။ လွန်ခဲ့သည့်လက သမ္မတဗလာဒီမာ ပူတင်က အနောက်နိုင်ငံများ၏ ယူကရိန်းသို့လက်နက်ထောက်ပံ့မှုကို “ပဋိပက္ခတွင် တိုက်ရိုက်ပါဝင်မှု” အဖြစ် ရုရှားက မှတ်ယူကြောင်း ထပ်လောင်းပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနှင့် မလေးရှားတို့အကြား ကောင်းမွန်သော နှစ်နိုင်ငံဆက်ဆံရေး တည်ဆောက်ရာတွင် ပညာရေးသည် "ပျော့ပြောင်းသော သံတမန်ရေး" အဖြစ် အရေးပါကြောင်း မလေးရှားနိုင်ငံ၊ ပီနန်ပြည်နယ်မှ ရုရှားဖက် ဒရေးရှင်း၏ ဂုဏ်ထူးဆောင် ကောင်စစ်ဝန် Teoh Seng Lee က RT သို့ ပြောကြားခဲ့သည်။ ရုရှားတက္ကသိုလ်များမှ ဘွဲ့ရသူများသည် အနောက် တိုင်းမီဒီယာများ၏ ရုရှားအပေါ်အမြင်နှင့် ကွဲပြားသောအမြင်ကို မျှဝေ လိမ့်မည်ဟု ၎င်းက ရှင်းပြခဲ့သည်။

ကြာသပတေးနေ့ (ဇူလိုင် ၁၀) က ကွာလာလမ်ပူမြို့တွင် ကျင်းပသည့် အာဆီယံဖိုရမ် အခမ်းအနားအပြီးတွင် ရုရှားနိုင်ငံခြားရေးဝန်ကြီး Sergey Lavrov က Teoh Seng Lee အား "For Interaction" ဂုဏ်ပြုဆု တံဆိပ်အပ်နှင်းခဲ့သည်။ ၎င်းသည် နှစ်နိုင်ငံကြား ကုန်သွယ်ရေး၊ စီးပွားရေး နှင့် လူသားချင်းစာနာမှုဆိုင်ရာ ဆက်ဆံရေးများ မြှင့်တင်ရာတွင် ဆယ်စု နှစ်များစွာ အားထုတ်ခဲ့သည့် ဂုဏ်ထူးဆောင် သံတမန်တစ်ဦးအတွက် အသိအမှတ်ပြုခြင်းဖြစ်သည်။

Teoh Seng Lee ၏ အဆိုအရ လွန်ခဲ့သော နှစ် ၃၀ အတွင်း နှစ်နိုင်ငံ ဆက်ဆံရေး ခိုင်မာစေရန်အတွက် ၎င်း၏ အကြီးမားဆုံး အောင်မြင်မှုမှာ မလေးရှားကျောင်းသားများအား ရုရှားတွင် ပညာသင်ကြားခွင့် ဖန်တီး ပေးခြင်း ဖြစ်သည်။

“ယခုအခါတွင် ရုရှားမှ ဘွဲ့ရထားသော ဆရာဝန်များ၊ အင်ဂျင်နီယာများ မလေးရှားတွင် ထောင်နှင့်ချီ ရှိနေပါပြီ” ဟု ဆုတံဆိပ် အပ်နှင်းပွဲ အပြီးတွင် ၎င်းက RT နှင့် တွေ့ဆုံမေးမြန်းခန်းတွင် ပြောကြားခဲ့သည်။

“ပညာရေးသည် ပျော့ပြောင်းသော သံတမန်ရေး ဟု တင်စားခေါ်ဆိုကြပါသည်။ ပညာရေးမှတစ်ဆင့်သာ မိမိတို့သည် အလွန် ကောင်းမွန်သော ဆက်ဆံရေးများကို တည်ဆောက်နိုင်ပါသည်” ဟု ဂုဏ်ထူးဆောင် ကောင်စစ်ဝန်က ဆိုသည်။ ထို့အပြင် ပညာသင်ပြီး ပြန်လာသူ ကျောင်းသား များစွာသည် “ရုရှားနိုင်ငံအပေါ် ကောင်းမွန်သော အမှတ်တရများ” ရှိကြသည်ဟု ၎င်းက ဖြည့်စွက်ပြောကြားခဲ့သည်။

Teoh Seng Lee က မီဒီယာများတွင် ပျံ့နှံ့နေသော “အပျက် သဘော ဆောင်သည့် လုပ်ကြံဇာတ်လမ်းများ” ကို ကာကွယ်ရန်အတွက် ထိုအချက်မှာ အရေးကြီးကြောင်း ပြောကြားခဲ့သည်။ ရုရှားမှ ပညာသင်ယူခဲ့သူအများအပြားသည် “ထိုအချည်းနှီးသော သတင်းများကို ကြားရသည့် အခါ အံ့အားသင့်သွားကြသည်” ဟု ၎င်းက ဆိုသည်။

မလေးရှား ဘွဲ့ရများသည် သတင်းများတွင် တွေ့မြင်ရသည့် ရုရှား၏ သဏ္ဍာန်နှင့် ကွဲပြားသော အမြင်တစ်ခုဖြင့် ပြန်လာကြမည်ဖြစ်ပြီး ထိုအရာသည် အရေးကြီးသည်ဟု ၎င်းက ဖြည့်စွက်ပြောကြားခဲ့သည်။

“ထိုထက်ပို၍ အရေးကြီးသည်မှာ ၎င်းတို့လုပ်ကိုင်နေသည့် အလုပ်၏ အရည်အသွေးပင် ဖြစ်သည်။ မိမိတို့၏ ဘွဲ့ရအများအပြားသည် ယခု အခါတွင် သက်ဆိုင်ရာနယ်ပယ်များတွင် ကျွမ်းကျင်သူများ ဖြစ်လာကြပြီ” ဟု Teoh Seng Lee က ပြောကြားခဲ့သည်။ ထို့အပြင် ၎င်း၏ ပုဂ္ဂိုလ်ရေး နှလုံးအထူးကုဆရာဝန်သည်လည်း ထိုအုပ်စုထဲမှ တစ်ဦးဖြစ်ကြောင်း ဖော်ပြခဲ့သည်။

ဂုဏ်ထူးဆောင် ကောင်စစ်ဝန်သည် ရုရှားအစိုးရအနေဖြင့် မလေးရှားနှင့် ပညာရေးဖလှယ်ရေးလုပ်ငန်းများကို ပိုမိုချဲ့ထွင်ကာ ပညာသင်ဆုများ ပိုမိုဖိတ်ခေါ်ပေးရန် မျှော်လင့်ကြောင်း ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တရုတ်နိုင်ငံသည် ထိုင်း-ကမ္ဘောဒီးယားနှစ်နိုင်ငံ ငြိမ်းချမ်းစွာအတူ ယှဉ်တွဲ နေထိုင်ရေးအတွက် အပြုသဘောဆောင်သည့် အခန်းကဏ္ဍမှ ပါဝင် ဆောင်ရွက်ရန် အဆင်သင့်ရှိကြောင်း တရုတ်နိုင်ငံခြားရေးဝန်ကြီး ဝမ်ရိ က ထိုင်းနိုင်ငံခြားရေးဝန်ကြီး Maris Sangiampongsa အား ပြောကြား ခဲ့သည်။ 

ဝန်ကြီး ဝမ်ရိက ထိုင်း-ကမ္ဘောဒီးယား နယ်နိမိတ်အရေးကိစ္စနှင့် ပတ်သက်၍ တရုတ်နိုင်ငံအနေဖြင့် “ဘက်လိုက်မှုမရှိဘဲ တရားမျှတသော” ရပ်တည်ချက်ကို ထိန်းသိမ်းသွားမည်ဖြစ်ကြောင်း၊ အရှေ့တောင်အာရှ နိုင်ငံနှစ်ခုဖြစ်သည့် ထိုင်းနှင့် ကမ္ဘောဒီးယားတို့အနေဖြင့် အဆိုပါကိစ္စကို မိတ်ဖက်ပီပီ ညှိနှိုင်းဆွေးနွေး၍ ဖြေရှင်းနိုင်ရန် မျှော်လင့်ကြောင်း ပြောကြားခဲ့သည်။ 

ကြာသပတေးနေ့ (ဇူလိုင် ၁၁ ရက်) တွင် မလေးရှားနိုင်ငံ၌ ကျင်းပသည့် အရှေ့တောင်အာရှနိုင်ငံများအသင်း (အာဆီယံ) ထိပ်သီးအစည်းအဝေး ဘေးဘက်တွင် ဝန်ကြီး ဝမ်ရိနှင့် ထိုင်းနိုင်ငံခြားရေးဝန်ကြီး Maris Sangiampongsa တို့ တွေ့ဆုံဆွေးနွေးစဉ် အထက်ပါအတိုင်း ပြောကြားခြင်း ဖြစ်သည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အီတလီနိုင်ငံခြားရေးဝန်ကြီး Antonio Tajani က နိုင်ငံတကာ အကျပ် အတည်းများက ၎င်းအား ဝန်ပိစေသည်ဟု ညည်းညူကာ “၎င်းသည် သမိုင်းတစ်လျှောက် ကံအဆိုးဆုံး ဝန်ကြီး” ဟု ရည်ညွှန်းခဲ့သည်။

အီတလီပါလီမန်တွင် ကျင်းပသည့် မြေထဲပင်လယ်ဒေသ ဒီမိုကရေစီနှင့် လွှတ်တော်စနစ်ဆိုင်ရာ အစည်းအဝေးသို့ နောက်ကျမှ ရောက်ရှိ ပြီးနောက် ဝန်ကြီး Tajani က ထိုသို့ ပြောကြားခဲ့ခြင်းဖြစ်သည်။

ယူကရိန်းပဋိပက္ခ၊ အရှေ့အလယ်ပိုင်းတင်းမာမှုများ အရှိန်မြှင့်တင်မှုနှင့် အမေရိကန်နှင့် ကုန်သွယ်ရေးတင်းမာမှုများကို ရည်ညွှန်းကာ ၎င်းသည် သမိုင်းတွင် ကံအဆိုးဆုံးဝန်ကြီးဖြစ်သည်ဟု ဆိုသည်။

ယခုသီတင်းပတ်အတွင်း Tajani က Formiche မီဒီယာတွင် ဖော်ပြ ခဲ့သည့် ဆောင်းပါးတစ်ပုဒ်တွင် ယူကရိန်းစစ်ပြီးခေတ် ပြန်လည် ထူထောင်ရေး လုပ်ငန်းများတွင် အီတလီ၏ အခန်းကဏ္ဍကို ထပ်လောင်း အတည်ပြု ခဲ့သည်။ Reuters ၏ ဖော်ပြချက်အရ အဆိုပါ ပြန်လည် တည်ဆောက်ရေး လုပ်ငန်းများတွင် ပါဝင်သည့် ကုမ္ပဏီများအတွက် ငွေကြေးထောက်ပံ့မှု များကို ရောမအစိုးရက မကြာမီ ကြေညာမည်ဖြစ်သည်။

ဂါဇာစစ်ပွဲသည် အီတလီအပါအဝင် EU အစိုးရများအတွက် ဒုတိယ အကြီးဆုံး သံတမန်ရေး စိန်ခေါ်မှုတစ်ရပ်ဖြစ်နေဆဲဖြစ်သည်။ အထူးသဖြင့် စစ်ရပ်စဲရေး တောင်းဆိုမှုများနှင့် အစ္စရေးသို့ အနောက်နိုင်ငံများ၏ လက်နက်ရောင်းဝယ်မှု ဆက်လက်လုပ်ဆောင်နေခြင်းတို့အကြား ကြား ညပ်နေသည့် အခြေအနေတွင် ဖြစ်သည်။

Tajani ၏ ထုတ်ဖော်ပြောဆိုချက်များသည် အမေရိကန်၏ အကြီးဆုံး ကုန်သွယ်ရေးမိတ်ဖက် EU အနေဖြင့် သမ္မတ Donald Trump ၏ ဧပြီလ ၂ ရက်က ကြေညာခဲ့သည့် ' Liberation Day ' ကမ္ဘာလုံးဆိုင်ရာ အကောက်ခွန် များ အကောင်အထည်ဖော်နိုင်သည့် အလားအလာကို ရင်ဆိုင်နေရချိန် တွင် ထွက်ပေါ်လာခြင်းဖြစ်သည်။

Trump က EU အား “ဆက်ဆံရန် အလွန်ခက်ခဲသော” အဖွဲ့အစည်း ဟုလည်းကောင်း၊ အမေရိကန်၏ ကုန်သွယ်ရေးလိုငွေပြမှုများအား လုံးဝ လက်မခံနိုင်သော အခြေအနေဟုလည်းကောင်း ထပ်လောင်း သုံးသပ် ခဲ့သည်။ ထရမ့်သည် EU ထုတ်ကုန်အားလုံးကို ၂၀% ၊ ကားနှင့် သတ္တု ပစ္စည်းများကို ၂၅% အကောက်ခွန် စည်းကြပ်မှုများ ချမှတ်ခဲ့သည်။ ၂၀% အကောက်ခွန်ကို ဧပြီ ၉ ရက်တွင် ၉၀ ရက်ကြာ ရွှေ့ဆိုင်းခဲ့သော်လည်း ၁၀% အခြေခံအကောက်ခွန်မှာမူ ဆက်လက်ကျင့်သုံးလျက်ရှိသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဟန်ဂေရီဝန်ကြီးချုပ် Viktor Orban က ဥရောပကော်မရှင်ဥက္ကဋ္ဌ Ursula von der Leyen အား ရာထူးမှ နုတ်ထွက်ရန် တောင်းဆိုလိုက်ပြီး ဥရောပပါလီမန်တွင် မဲခွဲဆုံးဖြတ်မည့် ယုံကြည်မှုမရှိကြောင်း ဆုံးဖြတ်ချက် မတိုင်မီ သရော်စာပုံတစ်ပုံကို မျှဝေခဲ့သည်။ ကြာသပတေးနေ့ (ဇူလိုင် ၁၀) တွင် ကျင်းပမည့် အဆိုပါဆုံးဖြတ်ချက်သည် COVID-19 ကာကွယ်ဆေး ဝယ်ယူမှုဆိုင်ရာ သူမ၏ စီမံခန့်ခွဲမှုကို ဦးတည်ထားသည်။ 

အော်ဘန်သည် Time မဂ္ဂဇင်း၏ မျက်နှာဖုံး ဒီဇိုင်းရေးဆွဲထားသော ပုံတစ်ပုံကို အင်္ဂါနေ့ (ဇူလိုင် ၈) တွင် မျှဝေခဲ့ပြီး အနီရောင်နောက်ခံတွင် နောက်သို့ဆုတ်နေသော Von der Leyen ၏ ပုံနှင့်အတူ "time to go" (ထွက်ခွာရန် အချိန်တန်ပြီ) ဟူသော စာတန်းပါရှိသည်။

ထိုပုံသည် ၂၀၂၄ ခုနှစ်က အမေရိကန်သမ္မတဟောင်း ဘိုင်ဒင်၏ ရွေးကောက်ပွဲ မှ နုတ်ထွက်မည်ဟု ကြေညာပြီးနောက် ထွက်ပေါ်လာသော Time မဂ္ဂဇင်း၏ သရော်ပုံတစ်ပုံဖြစ်သည်။

အော်ဘန်သည် ကာလကြာမြင့်စွာပင် Von der Leyen ကို အပြင်းထန် ဆုံး ဝေဖန်သူများထဲမှ တစ်ဦးဖြစ်ကာ သူမအား EU အဖွဲ့အစည်းများကို အားနည်းစေရန် လုပ်ဆောင်ခြင်းနှင့် အဖွဲ့ဝင်နိုင်ငံများ၏ ပြည်တွင်းရေး ကိစ္စများတွင် ဝင်ရောက်စွက်ဖက်မှုများပြုလုပ်သည်ဟု စွပ်စွဲခဲ့သည်။ ဥပဒေစိုးမိုးရေးနှင့် ပတ်သက်သော အငြင်းပွားမှုများနှင့် ပိတ်ဆို့မှု မူဝါဒ များကြောင့် ဘရပ်ဆဲလ်နှင့် မကြာခဏဆိုသလို တင်းမာမှုများရှိခဲ့ပြီး EU ခေါင်းဆောင်များက ဟန်ဂေရီနိုင်ငံကို နိုင်ငံရေးအရ သီးခြားဖယ်ထားရန် ကြိုးစားခဲ့သည်ဟု ၎င်းက ဆိုသည်။

EU အတွင်း၌ Von der Leyen သည် COVID-19 ကပ်ရောဂါ ကာလအတွင်း သူမ၏ လုပ်ရပ်များနှင့်ပတ်သက်၍ ပိုမိုများပြားလာသော ဝေဖန်မှုများနှင့် ရင်ဆိုင်နေရသည်။ ကာကွယ်ဆေးဝယ်ယူမှုဆိုင်ရာ ဆွေးနွေးမှုများ အတွင်း Pfizer ၏ CEO Albert Bourla နှင့် ဖလှယ်ခဲ့သော သီးသန့် အထောက်အထားများကို ထုတ်ပြန်ရန် ငြင်းဆန်ခဲ့ခြင်းကလည်း ဆက်လက် ဖြစ်ပွားနေသော အငြင်းပွားမှုများကို တွန်းအားပေးခဲ့သည်။ ဥရောပ တရားရုံးတစ်ရုံးက ယခုနှစ်အစောပိုင်းတွင် ထိုအပြန်အလှန် ပြောဆိုမှု များကို ဖုံးကွယ်ထားသည့် တရားဝင်အကြောင်းပြချက်တစ်ခုကို သူမ၏ ရုံးက မပေးနိုင်ခဲ့ဟု ဆုံးဖြတ်ခဲ့သည်။ 

နိုင်ငံရေးအရ လက်ဝဲနှင့်လက်ယာ နှစ်ဖက်စလုံးမှ ဝေဖန်သူများအပြင် ဥရောပသမဂ္ဂကို ယုံကြည်မှုနည်းသူများကလည်း Von der Leyen အပေါ် အာဏာစည်းမျဉ်းစည်းကမ်းများကို ဗဟိုချုပ်ကိုင်ရန် ကြိုးပမ်းခြင်း၊ သမားရိုးကျကော်မရှင် လုပ်ထုံးလုပ်နည်းများနှင့် ပါလီမန်ကြီးကြပ်မှုကို ကျော်လွှားခြင်း၊ အထိခိုက်မခံသော ကိစ္စရပ်များတွင် အဖွဲ့ဝင်နိုင်ငံများ၏ အချုပ်အခြာအာဏာကို မထီမဲ့မြင်ပြုခြင်းများ ရှိသည်ဟု စွပ်စွဲခဲ့ကြသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂