ဖနွမ်းပင်၊ ဆက်ဆံရေး

ထိုင်းနိုင်ငံနှင့်ကမ္ဘောဒီးယားနိုင်ငံတို့  ကြားနယ်စပ်ဒေသအရေးတင်းမာမှုဖြစ်ပွားနေစဉ်တွင် ထိုင်းနိုင်ငံရှိ ကမ္ဘောဒီးယားနိုင်ငံမှ ရွှေ့ပြောင်းလုပ်သားများအားလုံးကို ပြန်ခေါ်နိုင်ရေးအတွက် လိုအပ်သည်များကို အသင့်ပြင်ဆင်ထားသည်ဟု ကမ္ဘောဒီးယား နိုင်ငံဝန်ကြီးချုပ် ဟွန်မာနတ်က ဇွန်လ ၁၄ ရက်တွင်ပြောသည်။

ထို့ပြင် သက်ဆိုင်ရာဝန်ကြီးဌာနများ အနေဖြင့် ထိုင်းနိုင်ငံနှင့်နယ်စပ်ဂိတ်ခုနစ်ခုမှပြန်ဝင်လာမည့် ကမ္ဘောဒီးယား နိုင်ငံသားများကို ကြိုဆိုလက်ခံနေရာချထား ရေးအတွက် လိုအပ်သည်များပြင်ဆင်ထားပြီးဖြစ်ကြောင်း ၎င်းကပြောသည်။ လက်ရှိ ထိုင်း-ကမ္ဘောဒီးယား ပူးတွဲ နယ်ခြားကော်မရှင်က ဇွန်လ ၁၄ ရက်တွင် ဖနွမ်းပင်မြို့၌တွေ့ဆုံ၍ မကြာသေးမီကဖြစ်ပွားခဲ့သည့် နှစ်နိုင်ငံကြားနယ်စပ် ပဋိပက္ခများနှင့်ပတ်သက်၍ ဆွေးနွေးမှု များလုပ်ဆောင်နေကြောင်း သတင်းဌာန များကထုတ်ပြန်ထားသည်။

Ref: Xinhua

Photo - Khmer Times

အမေရိကန်သမ္မတ ဒေါ်နယ်ထရမ့်အစိုးရသည် နိုင်ငံပေါင်း ၃၆ နိုင်ငံမှ နိုင်ငံသားများအား အမေရိကန်ပြည်ထောင်စုသို့ ဝင်ရောက်ခွင့် တားမြစ်ခြင်း သို့မဟုတ် ကန့်သတ်ခြင်းများ ပြုလုပ်နိုင်သည်ဟု The Washington Post သတင်းစာက အမေရိကန် နိုင်ငံခြားရေးဝန်ကြီးဌာန၏ လျှို့ဝှက်စာရွက် စာတမ်းများကို ကိုးကား၍ ဖော်ပြထားပါသည်။ 

အဆိုပါသတင်းအရ ဗီဇာထုတ်ပေးခြင်း သို့မဟုတ် ပြည်ဝင်ခွင့်ဆိုင်ရာ အခြားကန့်သတ်ချက်များနှင့် ရင်ဆိုင်ရနိုင်သည့် နိုင်ငံစာရင်းတွင် အီဂျစ်၊ ဂျီဘူတီ အပါအဝင် အာဖရိကနိုင်ငံ ၂၅ နိုင်ငံနှင့် ဗဟိုအာရှ၊ ကာရေဘီယံ ဒေသမှ နိုင်ငံများ ပါဝင်ပါသည်။ ထိုကိစ္စနှင့်ပတ်သက်သည့် ရုံးတွင်း မှတ်တမ်းစာကို နိုင်ငံခြားရေးဝန်ကြီး မာကိုရူဘီယို က လက်မှတ်ရေးထိုး ပြီး စာရင်းပါနိုင်ငံများအတွက် တာဝန်ရှိသံတမန်များထံ ပေးပို့ခဲ့ပါသည်။

ထရမ့်သည် မကြာမီက အာဖဂန်နစ္စတန်၊ ဟေတီ၊ အီရန်၊ ယီမင်၊ လစ်ဗျာ၊ မြန်မာ၊ ကွန်ဂို၊ ဆိုမာလီယာ၊ ဆူဒန်၊ ချဒ်၊ အီကွေတာဂီနီနှင့် အီရီထရီးယား စသည့် နိုင်ငံ ၁၂ နိုင်ငံမှ နိုင်ငံသားများအား အမေရိကန်သို့ ဝင်ရောက်ခွင့် အပြည့်အဝ တားမြစ်ထားပြီး၊ ဘူရွန်ဒီ၊ ဗင်နီဇွဲလား၊ ကျူးဘား၊ လာအို၊ ဆီယာရာလီယွန်၊ တိုဂိုနှင့် တာ့ခ်မင်နစ္စတန် စသည့် နိုင်ငံ ၇ နိုင်ငံမှ နိုင်ငံသားများအတွက် ကန့်သတ်ချက်အချို့  ချမှတ်ထားပါသည်။

ကိုးကား- Tass

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်သမ္မတ ဒေါ်နယ်ထရမ့်က အစ္စရေး၏ အီရန်အပေါ် တိုက်ခိုက်မှု ကို ထောက်ခံခြင်းသည် အရှေ့အလယ်ပိုင်းဒေသတွင် “စစ်ပွဲကြီး ဖြစ်ပွား စေနိုင်ကြောင်း” အမေရိကန်သတင်းသမား Tucker Carlson က သတိ ပေးခဲ့သည်။

၂၀၂၄ ခုနှစ် သမ္မတရွေးကောက်ပွဲအတွင်း ထရမ့်၏ အဓိက မဟာမိတ် ဖြစ်ခဲ့သော ကားလ်ဆန်က “ဒေသတွင်းစစ်ပွဲကြီးမဖြစ်ပွားမီ နောက်ဆုံး သတင်းလွှာ ဖြစ်နိုင်သည်” ဟု ၎င်း၏ ရေးသားချက်တွင် ဖော်ပြခဲ့ပြီး အမေရိကန်သည် “တိုက်ခိုက်မှုများနှင့်ပတ်သက်၍ အဓိက တာဝန်ရှိသူ ဖြစ်သည်” ဟု ဝေဖန်ခဲ့သည်။

“အမေရိကန်စစ်တပ်က ကိုယ်တိုင်တိုက်ခိုက်ခြင်း မရှိသော်လည်း ဒေါ်နယ်ထရမ့်က Truth Social တွင် မကြာသေးမီက ကြွားဝါခဲ့သည့် အစ္စရေးကို နှစ်ပေါင်းများစွာ ငွေကြေးနှင့်လက်နက်များ ထောက်ပံ့ခြင်း က အမေရိကန်ကို အဆိုပါဖြစ်ရပ်များ၏ အဓိကတာဝန်ရှိသူအဖြစ် မလွဲ မသွေ ရှိနေစေပါသည်” ဟု ကားလ်ဆန်က ရေးသားခဲ့သည်။

“ဝါရှင်တန်က အဆိုပါတိုက်ခိုက်မှုများ ဖြစ်လာမည်ကို သိခဲ့သည်။ ၎င်းတို့ က အစ္စရေးအား အဆိုပါလုပ်ရပ်များ ဆောင်ရွက်ရန် ကူညီခဲ့သည်။ “အမေရိကန် ဦးစားပေး” ဟု ကြွေးကြော်နေသော နိုင်ငံရေးသမားများ သည် ယခု ထိုကိစ္စနှင့် မည်သို့မျှ သက်ဆိုင်ခြင်းမရှိဟု ယုံကြည်စိတ်ချစွာ ပြောဆိုနိုင်မည် မဟုတ်ပါ” ဟု ၎င်းက ဖြည့်စွက်ရေးသားခဲ့သည်။

Tucker Carlson က အီရန်-အစ္စရေး ပဋိပက္ခနှင့်ပတ်သက်၍ “စစ်ပွဲ လိုလားသူများ” နှင့် “ငြိမ်းချမ်းရေးလိုလားသူများ” အကြား ကွဲလွဲမှု ရှိကြောင်း X (တွမ်တာ) တွင် ဝေဖန်ရေးသားခဲ့သည်။

၎င်း၏ရေးသားမှုများတွင် “အစစ်အမှန်ကွဲလွဲမှုသည် အစ္စရေးနှင့် အီရန် ထောက်ခံသူများအကြား မဟုတ်ဘဲ စစ်ပွဲလိုလားသူများနှင့် ငြိမ်းချမ်းရေး လိုလားသူများကြားတွင်သာ ရှိသည်” ဟု ရေးသားခဲ့သည်။

ကားလ်ဆန်၏ ဝေဖန်မှုသည် အမေရိကန်နိုင်ငံရေးနှင့် မီဒီယာအပေါ် ထိုးနှက်ချက် တစ်ရပ်ဖြစ်ကာ စစ်ရေးအရ ပါဝင်မှုကို ဆန့်ကျင်သော ရပ်တည်မှုကို ကိုယ်စားပြုနေသည်။ အီရန်နှင့် အစ္စရေးတို့၏ တင်းမာမှု မြင့်တက်နေစဉ် အဆိုပါပဋိပက္ခ၏ နောက်ဆက်တွဲအကျိုးဆက်များကို တစ်ကမ္ဘာလုံးက စိုးရိမ်စွာ စောင့်ကြည့်နေရသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရုရှားသမ္မတ ဗလာဒီမာ ပူတင်နှင့် အမေရိကန်သမ္မတ ဒေါ်နယ်ထရမ့် တို့သည် စနေနေ့ (ဇွန် ၁၄) တွင် ဖုန်းဖြင့်ဆက်သွယ်ပြီး အီရန်နှင့် အစ္စရေး တို့အကြား တိုက်ခိုက်မှုများနှင့် ယူကရိန်းပဋိပက္ခကို ဆွေးနွေးခဲ့ကြောင်း ကရင်မလင်ထံမှ သိရသည်။ ဖုန်းဆက်ပြောဆိုဆွေးနွေးမှုမှုသည် တစ်နာရီ ခန့် ကြာမြင့်ခဲ့သည်။

ရုရှားသမ္မတ၏ အကြံပေး Yuri Ushakov က အဆိုပါဆွေးနွေးမှုကို “အဓိပ္ပာယ်ရှိပြီး ပွင့်လင်းကာ အလွန်အကျိုးရှိသော ဆွေးနွေးမှု” ဟု အမွှမ်းတင်ခဲ့သည်။ ပူတင်က အစ္စရေး၏ တိုက်ခိုက်မှုကို ပြစ်တင် ရှုတ်ချ ခဲ့ပြီး အထူးသဖြင့် ဇွန် ၁၅ ရက်တွင် အီရန်နှင့် အမေရိကန်တို့ စီစဉ် ထားသော နျူကလီးယားညှိနှိုင်းမှုမတိုင်မီ ဖြစ်ပွားခဲ့သည်ကို ထောက်ပြ ခဲ့သည်။ “ထိုကဲ့သို့ ရှုပ်ထွေးသော အခြေအနေတွင် ရုရှားနှင့် အမေရိကန် သမ္မတတို့သည် အီရန်နျူးကလီးယားအစီအစဉ်နှင့်ပတ်သက်၍ ညှိနှိုင်းမှု လမ်းကြောင်းသို့ ပြန်လည်ရောက်ရှိရန် ဆက်လက်လုပ်ဆောင်သွားမည် ဖြစ်သည်”ဟု ပူတင်၏ အကြံပေးက ဖြည့်စွက်ပြောကြားခဲ့သည်။

သောကြာနေ့ (ဇွန် ၁၃) တွင် အီရန်က အစ္စရေး၏ တိုက်ခိုက်မှုကြောင့် အစ္စလာမ်မစ် တော်လှန်ရေး တပ်မတော် (IRGC) ခေါင်းဆောင် ဗိုလ်ချုပ် Hossein Salami နှင့် အီရန်တပ်မတော်၏ စစ်ဦးစီးချုပ် ဗိုလ်ချုပ် Mohammad Bagheri အပါအဝင် နျူကလီးယား သိပ္ပံပညာရှင် အချို့ သေဆုံးခဲ့ကြောင်း အတည်ပြုခဲ့သည်။ အပြန်အလှန်အနေဖြင့် တီဟီရန်မှ အစ္စရေးသို့ ဒုံးကျည်များဖြင့် ပစ်လွှတ်တိုက်ခိုက်ခဲ့ရာ အချို့သည် လေကြောင်း ကာကွယ်ရေးစနစ်ကို ဖောက်ထွင်းနိုင်ခဲ့သည်ဟု သတင်းများတွင် ဖော်ပြ ထားသည်။

ပူတင်နှင့် ထရမ့်တို့သည် မော်စကိုနှင့် ကိယက်ဗ်အကြား နောက်ဆုံး အကျဉ်းသားလဲလှယ်မှုကိစ္စရပ်များကိုလည်း ဆွေးနွေးခဲ့ကြသည်။ ရုရှား သမ္မတက ဇွန် ၂၂ ရက်နေ့နောက်ပိုင်းတွင် ယူကရိန်းနှင့် ဆက်လက် ညှိနှိုင်းရန် အဆင်သင့်ဖြစ်ကြောင်းလည်း အတည်ပြုခဲ့သည်။

ဇွန် ၂ ရက်က အစ္စတန်ဘူလ်တွင် ကျင်းပခဲ့သော နောက်ဆုံးအကြိမ် တိုက်ရိုက်ဆွေးနွေးပွဲတွင် နှစ်ဖက်သည် အထူးသဖြင့် ပြင်းထန်စွာ ဒဏ်ရာ ရသူများ၊ နာမကျန်းသူများနှင့် အသက်ငယ်သော အကျဉ်းသားများကို အဓိကထား၍ အကျဉ်းသားလဲလှယ်မှုများ ပြုလုပ်ရန် သဘောတူညီခဲ့ ကြသည်။ ရုရှားဘက်မှလည်း လူသားချင်းစာနာထောက်ထားမှုအရ ယူကရိန်း တပ်မှ ကျဆုံးသူ ၆,၀၀၀ ကျော်၏ အလောင်းများကို တစ်ဖက်သတ် ပြန်လည်အပ်နှင်းရန် ဆုံးဖြတ်ခဲ့သည်။

ယူရီ ဥရှာကော့ဗ်က ပူတင်မှ စနေနေ့ (ဇွန် ၁၄) တွင် အသက် ၇၉ နှစ် ပြည့်မည့် ထရမ့်အား မွေးနေ့မင်္ဂလာဆုတောင်းများ ပေးပို့ခဲ့ကြောင်းလည်း ဖော်ပြခဲ့သည်။ “သမ္မတ နှစ်ဦးစလုံးသည် နှစ်ဦးနှစ်ဖက်ညှိနှိုင်းမှုများဖြင့် ဆက်သွယ်ဆောင်ရွက်နိုင်ပြီး နှစ်နိုင်ငံဆိုင်ရာနှင့် နိုင်ငံတကာမှ အရေးတကြီး ကိစ္စရပ်များကို မည်မျှပင်ရှုပ်ထွေးစေကာမူ ဖြေရှင်းနိုင်ရန် မိမိတို့၏ ပုဂ္ဂိုလ်ရေးဆက်ဆံရေးအပေါ် ကျေနပ်မှုကို ဖော်ပြခဲ့ကြသည်” ဟု ပူတင် ၏ အကြံပေးက ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မော်စကို၊ ငြိမ်းချမ်းရေး

ရုရှားနှင့်ယူကရိန်းနိုင်ငံတို့က ဇွန်လ ၁၄ ရက်တွင် နောက်တစ်ကြိမ်အဖြစ် အကျဉ်းသားများကို အပြန်အလှန်လဲလှယ်မှု ပြုလုပ်ကြောင်း ရုရှားကာကွယ်ရေးဝန်ကြီး ဌာနကထုတ်ပြန်ထားသည်။

ယခုကဲ့သို့အကျဉ်းသားများလဲလှယ်မှု သည် အစ္စတန်ဘူမြို့၌ ဇွန်လ ၂ ရက်တွင် လုပ်ဆောင်သော ရုရှား-ယူကရိန်းမျက်နှာ ချင်းဆိုင်ဆွေးနွေးမှု၏ ရလဒ်တစ်ခုဖြစ် သည်။ အဆိုပါဆွေးနွေးပွဲတွင် ဒဏ်ရာ အပြင်းအထန်ရရှိထားသူများ၊ ကျန်းမာ ရေးမကောင်းသူများနှင့် လူငယ်များကို အဓိကထား၍ အပြန်အလှန်လဲလှယ်ရန်သဘောတူညီမှုရရှိခဲ့ခြင်းဖြစ်သည်။

ထိုသဘောတူညီမှုအပြင်  ကရုရှားနိုင်ငံလူသားချင်းစာနာထောက်ထားမှုကို အကြောင်းပြု၍ ကျဆုံးသွားသောယူကရိန်း  စစ်သည် ၆၀၀၀ ကျော်၏ရုပ်အလောင်း များကိုပါ လွှဲပြောင်းပေးမည်ဖြစ်သည်။

ယခုအကျဉ်းသားများလဲလှယ်မှုကို ဇွန်လ ၁၄ ရက်နံနက်အစောပိုင်းတွင်လုပ် ဆောင်ခြင်းဖြစ်ကြောင်း၊ ယူကရိန်းထိန်း ချုပ်ထားသောနယ်မြေအတွင်းမှ ရုရှား စစ်သည်နောက်တစ်သုတ်သည် အိမ်သို့ ပြန်လာပြီဖြစ်ကြောင်းနှင့် အရေအတွက် ဖော်ပြထားခြင်းမရှိကြောင်း သိရသည်။

Ref: RT

Photo - Sky News

တောင်ကိုရီးယားနိုင်ငံ သမ္မတလီဂျေး မြောင်က မြောက်ကိုရီးယားနိုင်ငံနှင့် ဆက်ဆံရေး   ပြန်လည်သင့်မြတ်စေရန် ရည်ရွယ်၍ တောင်ကိုရီးယားနိုင်ငံ အတွင်းမှ မြောက်ကိုရီးယားနိုင်ငံကို  ဆန့်ကျင်သည့် လက်ကမ်းစာစောင်များ လွှတ်တင်မှုကို တားမြစ်လိုက်ကြောင်းနှင့် ထိုတားမြစ်ချက် ဖောက်ဖျက်သူကို အပြစ်ပေးသွားမည်ဖြစ်ကြောင်း  တောင်ကိုရီးယား သမ္မတရုံးက ဇွန်လ ၁၄ ရက်တွင် ဖော်ပြထားသည်။

တောင်ကိုရီးယားနိုင်ငံမှ အရပ်ဘက်အဖွဲ့အစည်း တစ်ခုက နှစ်နိုင်ငံနယ်စပ်မှနေ၍ မြောက်ကိုရီးယားကို ဆန့်ကျင်သည့် လက်ကမ်းစာစောင်များကို ဇွန်လ ၁၄ ရက် နံနက်ပိုင်းတွင် မြောက်ကိုရီးယားဘက်သို့ လွှတ်တင် လိုက်ပြီးနောက် သမ္မတကယခု ကဲ့သို့အမိန့်ကို ထုတ်ပြန်လိုက်ခြင်းဖြစ်ကြောင်း တောင်ကိုရီးယား သမ္မတရုံးမှ ပြောရေးဆိုခွင့်ရှိသူက ပြောသည်။

တောင်ကိုရီးယားအနေဖြင့် ထိုကဲ့သို့ လက်ကမ်းစာစောင်များ လွှတ်တင်ကြဲချမှုများကို ရပ်တန့်သင့်ကြောင်း၊ ထိုကဲ့သို့ လွှတ်တင်နေမှုများသည် နှစ်နိုင်ငံနယ်စပ်ရှိ ပြည်သူများ၏ နေ့စဉ်ဘဝများကို ဘေးသင့်ထိခိုက်စေနိုင်ကြောင်း၊ ထို့ပြင် ကိုရီးယားကျွန်းဆွယ်၌   စစ်ရေးအရတင်းမာမှုများကိုလည်း    ပိုမိုမြင့်တက်စေနိုင်ကြောင်း သမ္မတရုံးမှ ပြောရေးဆိုခွင့်ရှိသူ ကန်ယူ ဂျန်းကပုံမှန် သတင်းစာရှင်းလင်းပွဲတွင် ပြောထားသည်။

ထို့ကြောင့် သက်ဆိုင်ရာဝန်ကြီးဌာနများအနေဖြင့် အဆိုပါကိစ္စရပ်များကို တားဆီးနိုင်ရေးနှင့် အပြစ်ပေးအရေးယူနိုင်ရေး မည်ကဲ့သို့လုပ်ဆောင်ရမည်နှင့် ပတ်သက်၍ လာမည့်သီတင်းပတ် အစည်းအဝေး၌ တင်ပြရမည် ဖြစ်ကြောင်း ၎င်းကဆက် ပြောထားသည်။  

MWD Web Portal

စနေနေ့ (ဇွန် ၁၄) က ရုရှားသမ္မတ ဗလာဒီမာပူတင်နှင့် တယ်လီဖုန်းဖြင့် စကားပြောဆိုကြရာတွင် အီရန်နိုင်ငံနှင့်ပတ်သက်သည့် အခြေအနေကို အသေးစိတ်ဆွေးနွေးခဲ့ပြီး ယူကရိန်းအရေးကိစ္စအတွက် အချိန် အနည်းငယ် သာ ပေးခဲ့ကြောင်း ပြောကြားခဲ့ပါသည်။

ထရမ့်က ၎င်း၏ Truth Social စာမျက်နှာတွင် “သမ္မတပူတင်က နံနက်တုန်းကဖုန်းဆက်ပြီး မိမိကို မွေးနေ့မင်္ဂလာ ပါးလာပါတယ်။ ဒါပေမယ့် ပိုအရေးကြီးတာက အီရန်အရေးကို ဆွေးနွေးဖို့ပါ။ သူက အီရန် နိုင်ငံကို အလွန်နားလည်ပေးတဲ့သူပါ။ မိမိတို့ အကြာကြီး ဆွေးနွေးခဲ့ ကြပါတယ်။ ရုရှား-ယူကရိန်းအရေးကိုတော့ အချိန်အနည်းငယ်ပဲ ပေးခဲ့ပါတယ်။ ဒါကို နောက်အပတ်မှာ ဆက်ဆွေးနွေးမယ်” ဟု ရေးသား ဖော်ပြ ထားပါသည်။ 

ထို့ပြင် ရုရှားနှင့် ယူကရိန်းတို့သည် အကျဉ်းသားလဲလှယ်ရေး အစီအစဉ် များကို လုပ်ဆောင်နေပြီး အကျဉ်းသားအများအပြား လဲလှယ်နေကြကြောင်း အမေရိကန်သမ္မတက ဖြည့်စွက်ပြောကြားခဲ့ပါသည်။ “ပူတင်ကလည်း မိမိလိုပဲ အစ္စရေး-အီရန်စစ်ပွဲကို အဆုံးသတ်သင့်တယ်လို့ ခံစားမိတယ်။ ဒါပေမယ့် သူ့စစ်ပွဲ (ယူကရိန်း) ကိုလည်း အဆုံးသတ်သင့်တယ်လို့ မိမိ ရှင်းပြခဲ့တယ်” ဟု ထရမ့်က ရေးသားထားပါသည်။

အစောပိုင်းတွင် ကရင်မလင်အကြံပေးပုဂ္ဂိုလ် ယူရီအုရှာကော့ဗ် က ပူတင် သည် ထရမ့်နှင့် ဖုန်းစကားပြောဆိုရာတွင် ဇွန် ၂၂ ရက်နောက်ပိုင်း၌ ယူကရိန်းနှင့် ဆက်လက်ညှိနှိုင်းဆွေးနွေးရန် မော်စကို အဆင်သင့်ရှိကြောင်း အတည်ပြုပြောကြားခဲ့သည်ဟု သတင်းထောက်များအား ပြောကြားခဲ့သည်။

ကိုးကား- Tass

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရီပတ်ပလီကန်ပါတီ၏ ကျော်ကြားသည့် အဖွဲ့ဝင်တစ်ဦးဖြစ်သူ Arnold Schwarzenegger က အမေရိကန်တွင် လက်ရှိဖြစ်ပွားနေသည့် ICE ဝင်ရောက်စီးနင်းမှုများနှင့်ပတ်သက်၍ ၎င်း၏အမြင်ကို ပြောကြားခဲ့သည်။

Netflix ရုပ်သံဇာတ်လမ်းတွဲ "Fubar" အတွက် ကျင်းပသည့် အခမ်းအနားတစ်ခုတွင် ကယ်လီဖိုးနီးယား ရီပတ်ပလီကန် အုပ်ချုပ်ရေးမှူးဟောင်း Schwarzenegger အား လက်ရှိသမ္မတ Donald Trump ၏ အမိန့်ဖြင့် လော့စ်အိန်ဂျလိစ်သို့ အမျိုးသားအစောင့်တပ်ဖွဲ့နှင့် ရေတပ်သားများစေလွှတ်ခြင်းအပေါ် ၎င်း၏အမြင်ကို ထုတ်ဖော်ပြောဆိုခဲ့သည်။ ထိုစစ်ဆင်ရေးသည် လက်ရှိ ကယ်လီဖိုးနီးယားအုပ်ချုပ်ရေးမှူး Gavin Newsom နှင့် LA မြို့တော်ဝန် Karen Bass တို့၏ ဆန္ဒကိုလျစ်လျူရှုကာ လူဝင်မှုကြီးကြပ်ရေးစစ်ဆင်မှုများကို ဆန္ဒပြမှုများကို နှိမ်နင်းရန် ဖြစ်သည်။

Schwarzenegger က Variety သို့ ပြောကြားရာတွင် “မိမိအမြင်မှာ နိုင်ငံရေးသမားများ၏ တာဝန်က ထိုကိစ္စထက် လူဝင်မှုကြီးကြပ်ရေး ပြုပြင် ပြောင်းလဲမှုများ လုပ်ဆောင်ရန် ဖြစ်ပါသည်။ သို့မှသာ ယခုလို အခြေ အနေမျိုး ကြုံရမည်မဟုတ်ပါ” ဆိုသည်။ 

ထို့ပြင် ၎င်းက” အဆိုပါပြဿနာက ဒီမိုကရက်တစ်နှင့် ရီပတ်ပလီကန်တို့ လူဝင်မှုပြုပြင်ရေးမှာ သဘောတူညီမှုမရနိုင်သည့် အကျိုးဆက်ပါ။ မိမိတို့ အနေဖြင့် မည်သူတွေက ဒီနိုင်ငံမှာရှိနေသည်၊ မည်သူတွေက အလုပ်လုပ်နေသည်၊ ယာယီအလုပ်လုပ်ခွင့်ရှိသူနှင့် အမြဲတမ်း အလုပ်လုပ်ခွင့် ရှိ သူများကို ခွဲခြား၍ သိရမည်။ သို့မှသာ လူတွေကို အရင်ဆုံး ဖမ်းစရာ မလိုဘဲ ဖြေရှင်းနိုင်မည်” ဟု ရှင်းပြခဲ့သည်။

လော့စ်အိန်ဂျလိစ်တစ်ဝှမ်းတွင် U.S. Immigration and Customs Enforcement (ICE) ၏ ဝင်ရောက်စီးနင်းမှုများကြောင့် ဆန္ဒပြမှုများ ဖြစ်ပွားခဲ့ပြီး ထရမ့် က အမျိုးသားအစောင့်တပ်ဖွဲ့ ၂၀၀၀ ကို စေလွှတ်ခဲ့သည်။ အစိုးရသည် နိုင်ငံအတွင်းရှိ အထောက်အထားမပြည့်စုံသည့် အလုပ်သမားများ၏ အကြောင်းအချက်အလက်များကိုလည်း စုဆောင်း နေသည်။

Schwarzenegger က ထိုအချက်ကိုလည်း ထောက်ပြခဲ့ပြီး “မိမိတို့ အနေဖြင့် ဒီနိုင်ငံမှာ မည်သူတွေရှိနေမှန်းတောင်မသိပါ၊ ဆယ်စုနှစ်တွေ ချီပြီး နိုင်ငံရေးသမားများက အဆိုပါအကြောင်းကို ရှောင်နေခဲ့ပါသည်။ ဘာကြောင့်လဲဆိုပါက ထိုကိစ္စကို မဖြေရှင်းဘဲနေခြင်းက နှစ်ဖွဲ့စလုံး အတွက် အကျိုးရှိနေသောကြောင့်ဖြစ်ပါသည်။ ထို့ကြောင့် ၎င်းတို့ အားလုံး သည် ပြည်သူ့ဝန်ထမ်းများမဟုတ်ဘဲ ပါတီကိုဦးစားပေးသူများပါ” ဟု ဝေဖန်ခဲ့သည်။

Schwarzenegger တစ်ဦးတည်းသာမက "Fubar" ဇာတ်လမ်းတွဲမှ ၎င်း၏ အပေါင်းအဖော်များကပါ လက်ရှိဖြစ်ရပ်များအပေါ် ထင်မြင်ချက်များ ပေးခဲ့ကြသည်။

"Fubar" ၏ ပထမရာသီတွင် အတူပါဝင်ခဲ့ပြီး "The Last of Us" ဇာတ်လမ်းတွဲတွင်လည်း ပါဝင်နေသည့် Gabriel Luna က Variety သို့ ပြောကြားရာတွင် “ICE ၏ လုပ်ဆောင်မှုများသည် လမ်းလွဲနေပါသည်” ဟု ဆိုသည်။

၎င်းက ဆက်လက်၍ “ဤလူဝင်မှုပြဿနာကို ကိုင်တွယ်ဖြေရှင်းရန် ထိုအရင်းအမြစ်တွေကို ပိုမိုထိရောက်သည့်နည်းလမ်းတွေမှာ အသုံးပြုသင့်ပါသည်၊ Home Depot ၏ ကားပါကင်မှာ နံနက် ၅ နာရီကတည်းက အလုပ်အတွက်စောင့်နေသည့် လူ ၁၅ ဦးသည် စိုးရိမ်စရာ မလိုသည့်သူများ ဖြစ်သော်လည်း အဆိုပါပုဂ္ဂိုလ်များပဲ အဖမ်းခံခဲ့ရသည်” ဟု ဝေဖန် ခဲ့သည်။

Schwarzenegger သည် ၂၀၀၃ ခုနှစ် မှ ၂၀၁၁ခုနှစ် အထိ ကယ်လီ ဖိုးနီးယားပြည်နယ်၏ အုပ်ချုပ်ရေးမှူးအဖြစ် တာဝန်ထမ်းဆောင်ခဲ့သူ ဖြစ်သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ထိုင်းနိုင်ငံက တရုတ်ဦးဆောင်သည့် BRICS အဖွဲ့ဝင်အသစ်ဖြစ်ရေးအတွက် လျှောက်ထားရာမှာ အင်ဒိုနီးရှားနိုင်ငံ၏ သဘောတူညီချက်ကို ယခုလက်ခံရရှိပြီဖြစ်ပါသည်။  သမ္မတ ပရာဘိုဝို ဆူဘီအန်တို သည် အဆင့်မြင့်အရာရှိ တွေ့ဆုံပွဲအဖြစ် ထိုင်းဝန်ကြီးချုပ် ပေတုံတန် ရှင်နာဝပ်ထရာနှင့် တွေ့ဆုံရန် အတွက် ဘန်ကောက်မြို့သို့ ရောက်ရှိနေပါသည်။ အင်ဒိုနီးရှားနိုင်ငံသည် BRICS အဖွဲ့၏ နောက်ဆုံး အဖွဲ့ဝင်ဖြစ်ပြီး၊ လွန်ခဲ့သည့်သုံးလခန့်က တင်းပြည့်အဖွဲ့ဝင်ဖြစ်ရေးအတွက် ဆောင်ရွက်ခဲ့ရပြီး ဖြစ်ပါသည်။ အာဆီယံအဖွဲ့ဝင် အိမ်နီးချင်းနိုင်ငံ တစ်နိုင်ငံဖြစ်သည့် ထိုင်းနိုင်ငံသည် အင်ဒိုနီးရှားနိုင်ငံ၏ လမ်းစဉ် အတိုင်း လိုက်ပါဆောင်ရွက်လိုသဖြင့် ပရာဘိုဝို၏ ထောက်ခံမှုကို ရယူလိုပါကြောင်း၊  “အင်ဒိုနီးရှားသည် ထိုင်းနိုင်ငံအနေဖြင့် BRICS အဖွဲ့ဝင်ဖြစ်လာစေရေး ကြိုးပမ်းမှုကို အပြည့်အဝ ထောက်ခံပါကြောင်း၊ မိမိတို့အနေဖြင့်(ထိုင်းနိုင်ငံကို) အဖွဲ့ဝင်ဖြစ်ရေးအတွက် ပံ့ပိုးကူညီသွားမည်ဖြစ်ကြောင်း” ပရာဘိုဝိုက ပြောကြားပါသည်။

အပြည့်အစုံဖတ်ရှုရန်- https://sacministry.gov.mm/my/subject/7018

အစ္စရေးဝန်ကြီးချုပ် ဘင်ဂျမင် နေတန်ယာဟုက အီရန်နိုင်ငံသားများအား ၎င်းတို့၏ အစိုးရကို ဖယ်ရှားရန် တိုက်တွန်းလိုက်ပါသည်။ အဆိုပါ တိုက်တွန်းမှုသည် နှစ်နိုင်ငံအကြား အပြန်အလှန်တိုက်ခိုက်မှုများ မြင့်တက်လာချိန်၌ ထွက်ပေါ်လာခြင်းဖြစ်ပါသည်။

နေတန်ယာဟု၏ အဆိုပါတိုက်တွန်းချက်ကို အစ္စရေးလေယာဉ်များက အီရန်နိုင်ငံအနှံ့ရှိ နျူကလီးယားနှင့် စစ်ရေးအဆောက်အအုံများကို ဗုံးကြဲ တိုက်ခိုက်ပြီး နာတန်ဇ်မြို့မှ ယူရေနီယမ်သန့်စင်ရေးစက်ရုံနှင့် အကြီးတန်း စစ်ဘက်အရာရှိကြီးများ၊ နျူကလီးယားသိပ္ပံပညာရှင်များကို ချေမှုန်း တိုက်ခိုက်ပြီးနောက် နာရီပိုင်းအတွင်း ထုတ်လွှင့်ခဲ့ခြင်းဖြစ်သည်။ အီရန် ဘက်ကလည်း ကာမီကာဇီဒရုန်းများ၊ ပဲ့ထိန်းဒုံးကျည်များနှင့် တုံ့ပြန် တိုက်ခိုက်ခဲ့ပြီး အချို့ဒုံးကျည်များသည် တယ်လ်အဗစ်မြို့ကို ထိမှန်ခဲ့ပါသည်။

“ယခုအချိန်သည် သင်တို့အတွက် အာဏာရှင်စနစ်၏ ဖိနှိပ်မှုကနေ လွတ်မြောက်ရန် သမိုင်းဝင်အမွေအနှစ်နှင့် အလံတော်အောက်မှာ စည်းလုံးစွာ ရပ်တည်ရန် အချိန်ကောင်းပါပဲ။ ယခုအခါမှာ အာဏာရှင် စနစ်ဟာ အရင်ကထက် အားနည်းနေပါပြီ” ဟု နေတန်ယာဟုက ဗီဒီယို သတင်းစကားတွင် ပြောကြားခဲ့ပါသည်။

“ဒါဟာ သင်တို့၏ အသံတွေကို ကမ္ဘာကကြားစေဖို့ ရပ်တည်ရမည့် အခွင့်အရေးပါ” ဟု ၎င်းက ဖြည့်စွက်ပြောဆိုခဲ့ပါသည်။

နေတန်ယာဟုက “Operation Rising Lion” အမည်ရှိ တိုက်ခိုက်မှု၏ ရည်ရွယ်ချက်သည် “အစ္စရေးကို ခြိမ်းခြောက်နေသည့် နျူကလီးယားနှင့် ဒုံးပျံအန္တရာယ် နှစ်မျိုးစလုံးကို အပြီးသတ်ဖယ်ရှားရန်ဖြစ်သည်” ဟု ထပ်လောင်းပြောကြားခဲ့ပါသည်။

အီရန်က အဆိုပါတိုက်ခိုက်မှုကို စစ်ရေးကျူးလွန်မှုအဖြစ် ပြင်းပြင်း ထန်ထန် ရှုတ်ချပြီး “ပြင်းထန်သည့် အပြစ်ပေးမှု” ချမှတ်မည်ဟု ကတိပြု ခဲ့ပါသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂