ဇန်နဝါရီလ ၁၉ ရက်က လန်ကာဝီ(Langkawi)ကျွန်း၌ ကျင်းပပြုလုပ်ခဲ့သည့် အာဆီယံဝန်ကြီးများအဆင့်အစည်းအဝေးအပြီး သတင်းစာရှင်းလင်းပွဲတွင်သတင်းထောက်များက နိုင်ငံတော်စီမံအုပ်ချုပ်ရေးကောင်စီမှ အကောင်အထည်ဖော်နေသော ရွေးကောက်ပွဲကိစ္စနှင့်ပတ်သက်ပြီး မလေးရှား၏သဘောထားကိုမေးမြန်းခဲ့ရာတွင် မလေးရှားနိုင်ငံခြားရေးဝန်ကြီးမိုဟာမက်ဟာဆန်က “ရွေးကောက်ပွဲဆိုသည်မှာ အင်အားစုအသီးသီး စုံစုံညီညီပါဝင်ရန်လိုအပ်ပြီး အစုအဖွဲ့တစ်ခုတည်းက သီးခြားကျင်းပ၍မရကြောင်း၊ နိုင်ငံရေးနှင့်ဆက်နွယ်သည့် အင်အားစုအားလုံး အကျုံးဝင်နိုင်ရမည်ဖြစ်ကြောင်း၊ လောလောဆယ် မြန်မာနိုင်ငံ၏ ဦးစားပေးလုပ်ဆောင်ရမည့်ကိစ္စသည် ကြမ်းတမ်းရက်စက်မှုများကို အဆုံးသတ်ရန်နှင့် ငြိမ်းချမ်းရေးကိုပြန်လည်ဖော်ဆောင်ရန်သာဖြစ်သင့်ကြောင်း” မိုဟာမက် က ပြောကြားသွားခဲ့သည်။

ထို့အပြင် ဆွစ်ဇာလန်နိုင်ငံ၊ Davos(ဒါဗို့စ်)မြို့မှာ ဇန်နဝါရီလ ၂၂ ရက်တွင် ကျင်းပပြုလုပ်ခဲ့သော ကမ္ဘာ့စီးပွားရေးဖိုရမ်တွင် အင်ဒိုနီးရှားနိုင်ငံခြားရေးဝန်ကြီး Mr Sugion(ဆူဂီရိုနို) ဆိုသူက “မြန်မာနိုင်ငံရှိ နိုင်ငံရေးပါတီအားလုံးနှင့် အမျိုးသားအဆင့်ဆွေးနွေးပွဲတစ်ရပ်ပြုလုပ်နိုင်ရေးအတွက် ပံ့ပိုးကူညီသွားရန် အင်ဒိုနီးရှားနိုင်ငံအနေဖြင့် ဆုံးဖြတ်ထားကြောင်း၊ မြန်မာနိုင်ငံတွင် ရေရှည်တည်တံ့ခိုင်မြဲသော ငြိမ်းချမ်းရေးနှင့် တည်ငြိမ်ရေးရရှိရန် သက်ဆိုင်သူအားလုံးပါဝင်သည့် အမျိုးသားအဆင့်ဆွေးနွေးပွဲအား ဦးစားပေးလုပ်သွားရမည်ဖြစ်ကြောင်း” ပြောကြားခဲ့ပါသည်။

အဆိုပါပြောဆိုမှုများသည် မြန်မာနိုင်ငံကိုခုတုံးလုပ်ပြီး ထင်ပေါ်ကျော်ကြားလိုသည့်စိတ်ဖြင့် အဆင့်အတန်းမဲ့စွာပြောဆိုခဲ့သည့် ပြောဆိုမှုများသာဖြစ်ပါသည်။ နိုင်ငံတော်စီမံအုပ်ချုပ်ရေးကောင်စီ စတင်တာဝန်ယူခဲ့စဉ်ကတည်းက ရှေ့လုပ်ငန်းစဉ်(၅)ရပ် ချမှတ်အကောင်အထည်ဖော်ဆောင်ရွက်ခဲ့ပြီး လက်ရှိအချိန်တွင်လည်း ပြည်သူများမျှော်လင့်စောင့်စားနေသည့် ပါတီစုံဒီမိုကရေစီအထွေထွေရွေးကောက်ပွဲကြီး ကျင်းပရန်အတွက် ကြိုးပမ်းဆောင်ရွက်နေသကဲ့သို့ တစ်ဖက်တွင်လည်း တိုင်းရင်းသားလက်နက်ကိုင်များကို ငြိမ်းချမ်းရေးဆွေးနွေးရန်အတွက် အကြိမ်ကြိမ်ဖိတ်ခေါ်လျက်ရှိပြီး ငြိမ်းချမ်းရေးအတွက်လည်း အမြဲတမ်းတံခါးဖွင့် ကြိုဆိုလျက်ရှိပါသည်။ ဤကဲ့သို့သော လုပ်ဆောင်ချက်များအပါအဝင် မြန်မာနိုင်ငံ၏ ပြည်တွင်းရေးကိစ္စများကို ဂဃနဏမသိဘဲ ဝင်ရောက်စွက်ဖက်ပြီး ပြောဆိုဝေဖန်စရာအကြောင်းမရှိပေ။

အချုပ်အခြာအာဏာပိုင် နိုင်ငံတစ်ခု၏ ပြည်တွင်းရေးသည် အဆိုပါနိုင်ငံ၏အစိုးရနှင့် ပြည်သူများက စိတ်ကြိုက် စီမံဆုံးဖြတ်ကြခြင်းပင်ဖြစ်ပါသည်။ထို့အတူပင် မြန်မာနိုင်ငံ၏ ပြည်တွင်းရေးကိစ္စအဝဝသည် မြန်မာနိုင်ငံအစိုးရနှင့် မြန်မာပြည်သူများနှင့်သာသက်ဆိုင်ပြီး မည်သည့်အချိန်တွင် ရွေးကောက်ပွဲလုပ်မည်၊ မည်သည့်အချိန်တွင် ငြိမ်းချမ်းရေးလုပ်မည်ဆိုသည်မှာ မြန်မာနိုင်ငံအစိုးရနှင့် ပြည်သူများကသာ စီမံဆုံးဖြတ်ကြရမည်သာဖြစ်သည်။ မည်သည့်ပြည်ပနိုင်ငံကမျှ မြန်မာနိုင်ငံ၏ ပြည်တွင်းရေးကို ဝင်ရောက်စွက်ဖက်ခွင့်မရှိပေ။ အထူးသဖြင့် မလေးရှား၊ အင်ဒိုနီးရှားတို့ကဲ့သို့ အာဆီယံဒေသတွင်းမှ နိုင်ငံခြားရေးဝန်ကြီးများဖြစ်ပါလျက်နှင့် လက်ရှိအစိုးရ၏ လုပ်ဆောင်မှုများကို အပြုသဘောဆောင်ကာ ဝိုင်းဝန်းကူညီဆောင်ရွက်ရမည့်အစား ထင်ပေါ် ကျော်ဇောမှုအတွက် မြန်မာနိုင်ငံ၏ ပြည်တွင်းရေးကို ထင်မြင်ချက်နှင့်ဝေဖန်ပြောဆိုမှုများသည် ရှက်ဖွယ်ကောင်းသော ပြောဆိုမှုများသာဖြစ်ပါသည်။

ကိုးကား-NP News

ဒေါ်နယ်ထရမ့်သမ္မတဖြစ်သည့် ဇန်နဝါရီ ၂၀ ရက်နေ့ တွင်ပင် အမေရိကန်နိုင်ငံအတွင်းမှ အထောက်အထားမဲ့ ရွှေ့ပြောင်းများကိုနှင်ထုတ်ရန် သမ္မတလုပ်ပိုင်ခွင့်အား အသုံးပြုကာ လက်မှတ်ရေးထိုးခဲ့သည်။

ဇန်နဝါရီ ၂၂ ရက်နေ့မှစတင်ကာ အမေရိကန်မြို့များရှိ အထောက်အထားမဲ့ရွှေ့ပြောင်းများကို လူဝင်မှုကြီးကြပ်ရေးကလိုက်လံဖမ်းဆီးပြီး လေယာဉ်ပေါ်တင်ကာ နေရပ်နိုင်ငံသို့ပြန်ပို့ခဲ့သည်။ သို့သော် မက္ကဆီကိုနှင့်ကိုလံဘီယာက ၎င်းတို့နိုင်ငံသားများကို ပြန်လည်လက်မခံဘဲ လေယာဉ်ကိုလည်း ဆင်းခွင့်မပြုခဲ့ပေ။

ထရမ့်အစိုးရအဖွဲ့က လူလက်မခံပါက ၂ နိုင်ငံ ကုန်သွယ်မှု၌ အမေရိကန်ဘက်မှ အခွန်တိုးကောက်မည်ဟု ကြိမ်းဝါးခဲ့သည်။ ယခင်က မက္ကဆီကိုနှင့် ကိုလံဘီယာ နိုင်ငံတို့မှ သွင်းကုန်များကို အမေရိကန်က ၂၅% ကောက်မည်ဟု ဆိုလိုက်ပါသည်။ အိမ်ဖြူတော်က ပထမဦးစွာကုန်သွယ်မှုအပေါ် အခွန်စည်းကြပ်မှု တိုးမြှင့်မည်။ ထို့နောက် စီးပွားရေးပိတ်ဆို့အရေးယူမှုစတင်မည်ဟု ကြေညာလိုက်ရာ ယခုတွင် မက္ကဆီကိုနှင့် ကိုလံဘီယာ ၂ နိုင်ငံစလုံးက အထောက် အထားမဲ့ ရွှေ့ပြောင်းလာသူများ ပြန်ပို့ခြင်းကို လက်ခံလိုက်ရပြီဖြစ်ကြောင်း သိရှိရသည်။

ကိုးကား-Myanmar National Post

ဒီဇင်ဘာလတွင် ခေတ္တသာကြာမြင့်ခဲ့သော စစ်အုပ်ချုပ်ရေးကျင့်သုံးမှုကိုကြေညာပြီး ပုန်ကန်မှုကိုဦးဆောင်ခဲ့သည် ဟူသောစွဲချက်နှင့် သမ္မတ Yoon Suk-yeol ကို တောင်ကိုရီးယား စုံစမ်းစစ်ဆေးရေးအရာရှိများက ဇန်နဝါရီ ၂၆ ရက်နေ့တွင် စွဲချက်တင်ခဲ့ပါသည်။

စုံစမ်းစစ်ဆေးရေးမှူးများ၏ ပူးပေါင်းအဖွဲ့တစ်ဖွဲ့က သမ္မတ ယွန်းဆော့ယိုးကို ထိန်းသိမ်းခဲ့ပြီး ဇန်နဝါရီ ၁၉ ရက်တွင် ဖမ်းဆီးခဲ့ပါသည်။ ၎င်းက စစ်ဆေးမေးမြန်းမှုအတွက် ပူးပေါင်းဆောင်ရွက်ရန် ငြင်းဆိုနေပါသည်။ စုံစမ်းစစ်ဆေးရေးအရာရှိများ စွဲဆိုထားသောအမှုကို ဇန်နဝါရီ ၂၃ ရက်နေ့၌ တရားရုံးကို လွှဲပြောင်းပေးခဲ့သည်။ စုံစမ်းစစ်ဆေးရေးအရာရှိများက စုံစမ်းစစ်ဆေးမှုအခွင့်အာဏာအောက်၌ စစ်ဆေးမေးမြန်းမှုများ ဆက်လက်လုပ်ဆောင်နိုင်ရန် ယွန်းဆော့ယိုးအား ဖမ်းဆီးမှုသက်တမ်းတိုးရန် တရားရုံးကို နှစ်ကြိမ်တိုင်တိုင် တောင်းဆိုခဲ့သော်လည်း တရားရုံးက အဆိုပါတောင်းဆိုချက် နှစ်ကြိမ်လုံးကို ပယ်ချခဲ့သည်။

ထို့နောက်တွင် စုံစမ်းစစ်ဆေးရေးအရာရှိများသည် ယွန်းဆော့ယိုးကို တိုက်ရိုက်မေးမြန်းခွင့်မရရှိဘဲ စွဲချက်တင်နိုင်ရေး ဆုံးဖြတ်ခဲ့ကြသည်။

စွဲချက်တင်ခံထားရပြီးဖြစ်သည့်အချိန်တွင် ကာကွယ်ရေးဝန်ကြီး Kim Yong-hyun အား စစ်ဆေးမေးမြန်းမှုများ အပေါ်အခြေခံပြီး ယွန်းဆော့ယိုးတွင် အပြစ်ရှိကြောင်း သက်သေပြနိုင်သည်ဟု ၎င်းတို့ကပြောကြားခဲ့ပါသည်။

ဤဖြစ်ရပ်သည် တောင်ကိုရီးယား၌ တာဝန်ထမ်းဆောင်ဆဲ သမ္မတတစ်ဦးကို ပထမဆုံးအကြိမ် စွဲချက်တင်လိုက်ခြင်းပင်ဖြစ်သည်။

တောင်ကိုရီးယားသမ္မတများသည် တာဝန်ထမ်းဆောင်စဉ်အတွင်း တရားစွဲဆိုခံရခြင်းမှ ကင်းလွတ်ခွင့်ရှိသော်လည်း ပုန်ကန်မှုမှာ သမ္မတများ ကင်းလွတ်ခွင့်မရှိသည့် ရာဇ၀တ်မှုအနည်းငယ်ထဲမှ တစ်ခုဖြစ်ပါသည်။

တောင်ကိုရီးယားဥပဒေအရ စုံစမ်းစစ်ဆေးရေး အရာရှိများသည် သမ္မတ ယွန်းဆော့ယိုးကို စွဲချက်တင်ပြီးနောက် ၆ လအထိ ထိန်းသိမ်းရေးစခန်း၌ ထိန်းသိမ်းထားနိုင်မည်ဖြစ်သည်။

သမ္မတ ယွန်းဆော့ယိုး၏ ရှေ့နေအဖွဲ့က ၎င်းအပေါ် စွဲဆိုချက်ကို အဆိုးရွားဆုံး ဆုံးဖြတ်ချက်ဖြစ်သည်ဟု ပြောဆိုခဲ့ပြီး သမ္မတတစ်ဦး၏ စစ်အုပ်ချုပ်ရေး ကြေညာမှုသည် မည်သို့မျှပုန်ကန်မှုမဖြစ်နိုင်ဟု ဆိုကြပါသည်။ စစ်ဆေးမှုများ၏ တရားမဝင်မှုကို သက်သေထူရန် တရားရုံးတွင် တရားရင်ဆိုင်မည်ဖြစ်ကြောင်း ရှေ့နေအဖွဲ့ကဆိုပါသည်။

ဖွဲ့စည်းပုံအခြေခံဥပဒေခုံရုံးက သမ္မတ ယွန်းဆော့ယိုးအပေါ် စွဲချက်တင်မှုသည် တရားဝင်ခြင်း ရှိ၊ မရှိ ဆုံးဖြတ်ရန် သီးခြားဆောင်ရွက်နေချိန်တွင် ရာဇ၀တ်မှု ဆိုင်ရာတရားရုံးက ရုံးတင်စစ်ဆေးမှု တစ်ခုပြုလုပ်မည်ဟု မျှော်လင့်ကြောင်းသိရှိရပါသည်။

ကိုးကား-NHK World

ဒေသတွင်း နေတိုးအဖွဲ့၏ လှုပ်ရှားမှုများ တိုးလာနေချိန်၌ ရုရှားနိုင်ငံသည် ဘောလ်တစ်ပင်လယ်တွင် ၎င်း၏အကျိုးစီးပွားကိုကာကွယ်ရန် လိုအပ်သည့် အရာအားလုံးကို လုပ်ဆောင်သွားမည်ဖြစ်ကြောင်း ဒုတိယနိုင်ငံခြားရေးဝန်ကြီး အလက်ဆန်ကာဂရက်ရှ်ကို က ပြောကြားခဲ့သည်။ 

နေတိုးက Baltic Sentry မစ်ရှင်ပြုလုပ်မည်ဟု ဇန်နဝါရီလလယ်က ကြေညာခဲ့ပါသည်။ ယမန်နှစ်က ရေအောက်ကေဘယ်ကြိုးများ ပျက်စီးသွားပြီးနောက် နေတိုးက ဘောလ်တစ်ပင်လယ်ပြင်တွင် ကင်းလှည့်ရန် ရည်ရွယ်ထားကြောင်း ထုတ်ပြန်ခဲ့သည်။ အမေရိကန် ဦးဆောင်သော စစ်ဘက်အစုအဖွဲ့က ဘောလ်တစ်ပင်လယ်ကို ၎င်းတို့၏ စိုးမိုးမှုပိုင်နက်အဖြစ် ပြောင်းလဲရန်အိပ်မက်သည် အကောင်အထည်ပေါ်မည်မဟုတ်ကြောင်းနှင့် ရုရှားက အဆိုပါလုပ်ရပ်ကို ခွင့်ပြုမည်မဟုတ်ကြောင်း ဂရက်ရှ်ကို က ရုရှား 24 TV မှ ဇန်နဝါရီ ၂၄ ရက်နေ့တွင် ပြောဆိုခဲ့ပါသည်။ 

ဘောလ်တစ်ပင်လယ်ဒေသရှိ ၎င်းတို့၏ အကျိုးစီးပွားများကို စိတ်ချယုံကြည်စွာ အကာအကွယ်ပေးနိုင်ရန် လိုအပ်သည့်အရာအားလုံးကို လုပ်ဆောင်သွားမည်ဖြစ်ကြောင်း ၎င်းကဆိုပါသည်။ ရုရှား၏ တိကျသော တန်ပြန်အရေးယူမှုများနှင့်ပတ်သက်၍ နေတိုးနှင့်ဒေသတွင်းရှိ ၎င်း၏ အဖွဲ့ဝင်တစ်နိုင်ငံချင်းစီ၏လုပ်ဆောင်ချက်များကို အခြေခံ၍ ဆုံးဖြတ်မည်ဖြစ်ကြောင်း ၎င်းကဆိုပါသည်။ 

ရုရှား၏ ခန့်မှန်းချက်အရ ဘောလ်တစ် ကင်းထောက်မစ်ရှင်တွင် ခန့်မှန်းခြေရေယာဉ် ၁၀ စီးနှင့် ဧရိယာအား ထိန်းချုပ်နိုင်မည်ဟုသိရှိရပြီး နေတိုးအဖွဲ့၏ ဘောလ်တစ်မစ်ရှင်ကို အနီးကပ်စောင့်ကြည့်သွားမည်ဟုဆိုပါသည်။ နေတိုးအဖွဲ့၏ နောက်ဆက်တွဲပြောဆိုမှုများကိုလည်း ဆက်လက်စောင့်ကြည့်မည်ဖြစ်ပြီး ဘောလ်တစ်ပင်လယ်သည် ပူးပေါင်းဆောင်ရွက်မှုပင်လယ်၊ အပြန်အလှန်ဖလှယ်ရေးပင်လယ်၊ ရာစုနှစ်များကြာအောင် ပြေးဆွဲခဲ့သည့် သင်္ဘောလမ်းကြောင်းများမှတစ်ဆင့် ကုန်သွယ်မှုပြုသည့်ပင်လယ်သာဖြစ်ရမည်ဟု ဂရက်ရှ်ကို ကအလေးပေးပြောကြားသွားပါသည်။ 

ရုရှားလုံခြုံရေးကောင်စီ၏ အကြီးအကဲဟောင်း နီကိုလေး ပါထရူရှေ့ဗ်က အနောက်နိုင်ငံများသည် ဘောလ်တစ်ပင်လယ်ကို ၎င်းတို့အပိုင်ပင်လယ် အဖြစ်ဆောင်ရွက်နေပြီး ဆွီဒင်နှင့်ဖင်လန်တို့သည် နေတိုးအဖွဲ့သို့ ဝင်ရောက်ပြီး ဘောလ်တစ်ကို ၎င်းတို့ပိုင်နက်ဖြစ်ရန်လုပ်ဆောင်နေသည်ဟု ပြောကြားခဲ့ပါသည်။ 

ကိုးကား-Myanmar National Post

ဘယ်လာရုစ်နိုင်ငံသမ္မတရွေးကောက်ပွဲကို ဇန်နဝါရီလ ၂၆ ရက်နေ့တွင် ကျင်းပပြုလုပ်ခဲ့ပြီး ဆန္ဒမဲပေးနိုင်ရန်အတွက် နိုင်ငံတစ်ဝှမ်း မဲရုံပေါင်း ၅,၃၀၀ ကျော် ဖွင့်လှစ်ထားရှိကြောင်း၊ ဆန္ဒမဲပေးနိုင်သည့် ဘယ်လာရုစ် နိုင်ငံသား ၆.၉ သန်းခန့်ရှိကြောင်း၊ ဒေသစံတော်ချိန် နံနက် ၈ နာရီမှ ည ၈ နာရီအချိန် (ဂရင်းနစ်စံတော်ချိန် ညနေ ၅ နာရီ) အထိ မဲရုံများအား ဖွင့်လှစ်ထားမည် ဖြစ်ကြောင်း၊ ရွေးကောက်ပွဲနေ့တွင် မဲရုံများသို့ လာရောက် မဲမပေးနိုင်သည့် နိုင်ငံသားများအတွက် ကြိုတင်ဆန္ဒမဲပေးခြင်းကို ဇန်နဝါရီလ ၂၁ ရက်နေ့မှ ၂၅ ရက်နေ့အထိ ပြုလုပ်ခဲ့ပြီး အဆိုပါ ၅ ရက်အတွင်း ဆန္ဒမဲပေးနိုင်သော နိုင်ငံသား၏ ၄၁.၈၁ ရာခိုင်နှုန်းက ဆန္ဒမဲပေးခဲ့ကြကြောင်း၊ ဘယ်လာရုစ်သမ္မတနိုင်ငံ ဗဟိုရွေးကောက်ပွဲကော်မရှင် (CEC) က သတင်း ထုတ်ပြန် ခဲ့သည်။

ရွေးကောက်ပွဲတွင် ဆန္ဒမဲပေးပိုင်ခွင့်ရှိသူ ပြည်သူထက်ဝက်ကျော်ကထောက်ခံပါက သမ္မတအဖြစ် ရွေးချယ်တင်မြှောက်ခြင်းခံရမည်ဖြစ်ပြီး ရွေးကောက်ပွဲ စောင့်ကြည့်လေ့လာသူ ပြည်တွင်းမှ ၄၄,၀၀၀ ကျော်နှင့် နိုင်ငံတကာမှ ၅၀၀ ခန့်က ရွေးကောက်ပွဲ လုပ်ငန်းစဉ် အား စောင့်ကြည့်လျက်ရှိသည်။

၁၉၉၄ ခုနှစ်ကတည်းက သမ္မတအဖြစ် တာဝန်ယူဆောင်ရွက်ခဲ့သည့် လက်ရှိသမ္မတ Alexander Lukashenko အပါအဝင် ကိုယ်စားလှယ်လောင်း ၅ ဦးတို့ အကြိတ်အနယ်ယှဉ်ပြိုင်လျက်ရှိပြီး အဆိုပါ ကိုယ်စားလှယ်လောင်း ၅ ဦးမှာ လစ်ဘရယ်ဒီမိုကရက်တစ်ပါတီ ခေါင်းဆောင် Oleg Gaidukevich၊ စွန့်ဦး တီထွင် စီးပွားရေးလုပ်ငန်းရှင် Anna Kanopatskaya၊ ကွန်မြူနစ်ပါတီဗဟိုကော်မတီ၏ ပထမအတွင်းဝန် Sergey Syrankov နှင့် အလုပ်သမားနှင့် တရားမျှတမှုဆိုင်ရာ ရီပတ်ဘလစ်ကန် ပါတီခေါင်းဆောင် Alexander Khizhnyak တို့ ဖြစ်ကြပါသည်။

ကိုးကား -TASS

အမေရိကန်နိုင်ငံခြားရေးဝန်ကြီး မာကိုရူဘီယိုသည် ယူကရိန်းနိုင်ငံအတွက် ထောက်ပံ့ကူညီမှု အားလုံးနီးပါးကို ရက် ၉၀ ကြာ ရပ်ဆိုင်းလိုက်ကြောင်း Politico သတင်းဌာန က ဇန်နဝါရီ ၂၄ ရက်နေ့တွင် ဖော်ပြခဲ့သည်။ အမေရိကန်သမ္မတ ဒေါ်နယ်ထရမ့်က နိုင်ငံခြားသို့ ပေးပို့ နေသော အကူအညီအားလုံးကို ပြန်လည်သုံးသပ်ရန် အမိန့်ပေးပြီးနောက် ယခုကဲ့သို့ လုပ်ဆောင်ချက် ထွက်ပေါ်လာခြင်းဖြစ်သည်။

ရူဘီယိုသည် လက်ရှိနိုင်ငံရပ်ခြား အကူအညီအားလုံး နီးပါးအတွက် “ရပ်ဆိုင်းရန်အမိန့်” ထုတ်ပြန်ရန် သံတမန်နှင့်ကောင်စစ်ဝန်ရုံးများကို ညွှန်ကြားခဲ့သည်ဟု Politico က အဆိုပါဌာနမှထုတ်ပြန်ချက်ကိုကိုးကားပြီး ဖော်ပြခဲ့သည်။

Politico ၏အဆိုအရ အဆိုပါအမိန့်သည် နိုင်ငံခြားရေး ဌာနတာဝန်ရှိသူများကို အံ့အားသင့်စေခဲ့ပြီး ၎င်း၏ လမ်းညွှန်ချက်ကို ရင်းနှီးသော လက်ရှိအရာရှိ ၃ ဦး နှင့် ယခင်အရာရှိနှစ်ဦး၏ ပြောကြားချက်ကိုကိုးကား၍ သတင်းဌာနကဖော်ပြခဲ့ခြင်းဖြစ်သည်။

နိုင်ငံခြားရေးဌာန၏ မှတ်ချက်ကို ပြန်လည် သုံးသပ်ထားသည့် BBC သတင်းဌာန၏ သုံးသပ်ချက်မှာ ၎င်းသည် “ဖွံ့ဖြိုးရေးအကူအညီမှသည် စစ်ရေးအကူအညီအထိ အရာအားလုံးကို သက်ရောက်မှု ရှိပုံပေါ်သည်” ဟု ဖော်ပြခဲ့သည်။

ပင်တဂွန်စစ်ဌာနချုပ်သည် အကူအညီများ ရပ်ဆိုင်းထားသော်လည်း ယူကရိန်းအတွက် လုံခြုံရေးအကူအညီကို ထိခိုက်စေမည်မဟုတ်ကြောင်း ယခင်က Voice of America အား ပြောကြားခဲ့သည်။

“ရန်ပုံငွေဆိုင်ရာ တာဝန်အသစ်များအားလုံးကို ခေတ္တရပ်ဆိုင်း၍ နိုင်ငံခြားရေးဌာနနှင့်အမေရိကန် နိုင်ငံတကာဖွံ့ဖြိုးတိုးတက်ရေးအေဂျင်စီ (USAID) တို့မှ ထောက်ပံ့ထားသည့် ရန်ပုံငွေကို နိုင်ငံခြားအကူအညီ အစီအစဉ်များအတွက် ပြန်လည်သုံးသပ်ရန်ဆိုင်းငံ့ထားသည်” ဟု ဂျာနယ်လစ် Ken Klippenstein က Rubio ၏ လမ်းညွှန်ချက်ကို ကိုးကား၍ဖော်ပြထားပါသည်။

ကိုးကား-RT

ဘယ်လာရုစ်သမ္မတ လူကာရှန်ကိုသည် ၎င်း၏ သတ္တမမြောက် သမ္မတသက်တမ်းအတွက် ပြန်လည်အရွေးခံရကြောင်း ထွက်ပေါ်လာသောမဲရလဒ်များအရ သိရှိရပါသည်။

အနောက်နိုင်ငံများတွင် အာဏာရှင်တစ်ဦးအဖြစ် သရော်ထားသော်လည်း ဘယ်လာရုစ်သမ္မတက ၎င်း၏ ခေါင်းဆောင်မှုသည် နိုင်ငံအား တည်ငြိမ်မှုနှင့် လုံခြုံရေးကို ယူဆောင်လာသည်ဟု ပြောဆိုခဲ့ပါသည်။

ဘယ်လာရုစ်သမ္မတ အလက်ဇန်းဒါးလူကာရှန်ကို သည် ၎င်း၏ ဆယ်စုနှစ်သုံးစု အုပ်ချုပ်မှုသက်တမ်းကို နောက်ထပ်ငါးနှစ်သက်တမ်း သက်တမ်းတိုးလိုက်ကြောင်း နိုင်ငံ၏ ရွေးကောက်ပွဲအပြီးတွင် ထွက်ပေါက်လာသော စစ်တမ်းများက ဖော်ပြထားပါသည်။

ဘယ်လာရုစ်နိုင်ငံပိုင်မီဒီယာမှ ထုတ်ပြန်သော မဲဆန္ဒများအရ သမ္မတလူကာရှန်ကိုသည် အခြား ကိုယ်စားလှယ်လောင်းလေးဦးနှင့် ယှဉ်ပြိုင်ရာတွင် မဲရလဒ် ၈၇ ဒသမ ၆ ရာခိုင်နှုန်း အနိုင်ရရှိခဲ့ကြောင်း သိရှိရပါသည်။

ဘယ်လာရုစ်နိုင်ငံ ဗဟိုရွေးကောက်ပွဲကောင်မရှင်သည် ဖေဖော်ဝါရီ ၃ ရက်နေ့တွင် မဲရလဒ်များအား အတည်ပြုကြေညာပြီးနောက်တွင် ဘယ်လာရုစ်သမ္မတ လူကာရှန်ကို သည် ၂၀၃၀ ပြည့်နှစ်အထိ အာဏာဆက်ရှိနေမည်ကို သေချာစေမည်ဖြစ်ပါသည်။ ဘယ်လာရုစ်၏ လွတ်လပ်ရေးရပြီးနောက်ပိုင်း ပထမဆုံးနှင့် တစ်ဦးတည်းသော ခေါင်းဆောင်လူကာရှန်ကိုသည် နိုင်ငံကို ၁၉၉၄ ခုနှစ် ကတည်းက ဦးဆောင်ခဲ့ပြီး ခြောက်ကြိမ်ဆက်တိုက် သမ္မတရာထူးသက်တမ်း ကိုထမ်းဆောင်ခဲ့ပါသည်။

ကိုးကား - RT

ဂျပန်ဝန်ကြီးချုပ် Ishiba သည် အရှေ့အာရှနှင့် ကမ္ဘာတစ်ဝှမ်းတည်ငြိမ်ရေးကို အထောက်အကူပြုစေသည့် ဂျပန်-ရုရှား ဆက်ဆံရေးကို တန်ဖိုးထားပါကြောင်း၊ ရုရှားနိုင်ငံသမိုင်းနှင့် ယဉ်ကျေးမှုအပါအဝင် အခြားသောကိစ္စရပ်များကိုလည်း အသိအမှတ်ပြုပါကြောင်း၊ ရုရှားနိုင်ငံသည် ကမ္ဘာ့အင်အားကြီးနိုင်ငံတစ်နိုင်ငံဖြစ်ပြီး ဂျပန်၏ အိမ်နီးချင်းနိုင်ငံလည်းဖြစ်ကြောင်း အထက်လွှတ်တော်အမတ် Muneo Suzuki က TASS သတင်းဌာနကို ပြောကြားခဲ့ပါသည်။

ရုရှား-ယူကရိန်း စစ်ပွဲစတင်ခဲ့ပြီးနောက် ဂျပန်အစိုးရသည် ရုရှားအပေါ် အမျိုးမျိုးသော ဒဏ်ခတ်ပိတ်ဆို့အရေးယူမှုများ ချမှတ်ခဲ့ပါသည်။ ဂျပန်နိုင်ငံ၏ ဒဏ်ခတ် ပိတ်ဆို့မှုများကို တုံ့ပြန်သည့်အနေဖြင့် ရုရှားနိုင်ငံက တိုကျိုနှင့်ငြိမ်းချမ်း‌ရေးသဘောတူစာချုပ်ချုပ်ဆိုရေး ညှိနှိုင်းဆွေးနွေးခြင်းကို ရပ်ဆိုင်းထားခဲ့ပါသည်။

၂၀၂၄ ခုနှစ် အကုန်တွင် ကျင်းပပြုလုပ်သည့် Valdai အစည်းအဝေးတွင် ရုရှားသမ္မတ ဗလာဒီမာပူတင်က ဂျပန်နိုင်ငံ၏ ဒဏ်ခတ်ပိတ်ဆို့အရေးယူမှုများနှင့်ပတ်သက်၍ စိတ်အနှောက်အယှက်ဖြစ်ရကြောင်း၊ သို့သော် ရုရှားနိုင်ငံက ဂျပန်နိုင်ငံအပေါ် တန်ပြန် အရေးယူ ဒဏ်ခတ်ပိတ်ဆို့မှု မပြုလုပ်ခဲ့ပါကြောင်းနှင့် ဂျပန်နိုင်ငံအနေဖြင့် ရုရှားနှင့် ပြန်လည်ပူးပေါင်းဆောင်ရွက်မည်ဆိုပါက ရုရှား-ဂျပန် နှစ်နိုင်ငံဆက်ဆံရေးကိုပြန်လည်တည်ဆောက်မည်ဖြစ်ပါကြောင်း ပြောကြား ခဲ့ပါသည်။

ဝန်ကြီးချုပ် Ishiba က ဇန်နဝါရီ ၂၄ ရက်နေ့တွင် ကျင်းပခဲ့သည့် လွှတ်တော်အစည်းအဝေးတွင် ဂျပန်-ရုရှား ဆက်ဆံရေးသည် စိန်ခေါ်မှုများစွာ ရှိနေသည့်တိုင် နယ်မြေပိုင်နက်အငြင်းပွားမှုများ ဖြေရှင်းရန်နှင့် နှစ်နိုင်ငံ ငြိမ်းချမ်းရေးသဘောတူစာချုပ်ကို အပြီးသတ်ချုပ်ဆိုသွားမည်ဟု ကတိပြုပြောကြားခဲ့ပြီး ပြီးခဲ့သည့် လွှတ်တော်အစည်းအဝေးတွင်လည်း အဆိုပါကတိကဝတ်နှင့်စပ်လျဉ်း၍ ထပ်တလဲလဲ ထည့်သွင်းပြောကြားခဲ့ပါသည်။ ထို့ပြင် ဂျပန်နိုင်ငံအနေဖြင့် ရုရှားအပေါ် ကန့်သတ်ပိတ်ပင်မှုများ ဆက်လက်ထားရှိမည်ဖြစ်ပြီး ကိယက်ဗ်ကို ကူညီပံ့ပိုးပေးသွားမည် ဟူ၍လည်း ထပ်လောင်း ပြောကြားခဲ့ပါသည်။

 “ဂျပန်နိုင်ငံ၏မူဝါဒသည် ရုရှားနိုင်ငံအပေါ် ရန်လိုသည့် မူဝါဒ” ဖြစ်ကြောင်း ငြိမ်းချမ်းရေးစာချုပ်နှင့်ပတ်သက်ပြီးဂျပန်ဝန်ကြီးချုပ် Ishiba ၏ ပြောကြားချက်အပေါ် ကရင်မလင်နန်းတော် ပြောရေးဆိုခွင့်ရှိသူ Dmitry Peskov က ပြန်လည်ပြောကြားခဲ့ပါသည်။

ဂျပန်နိုင်ငံ လွှတ်တော်အမတ် Suzuki သည် ရုရှား နိုင်ငံနှင့် သံတမန်ဆက်ဆံရေးကြောင့် ထင်ရှားပြီး ဂျပန်ဝန်ကြီးချုပ်ဟောင်း Shinzo Abe လက်ထက်တွင် မော်စကိုနှင့် ပူးပေါင်းဆောင်ရွက်ရေးဆိုင်ရာလုပ်ငန်းများအတွက် အကြံပေးပုဂ္ဂိုလ်အဖြစ် တာဝန်ထမ်းဆောင်ခဲ့သူ ဖြစ်သည်။

ကိုးကား-TASS

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီနှင့် နိုင်ငံရေးပါတီများအစုအဖွဲ့၏ အလုပ်အဖွဲ့တို့ ဒုတိယနေ့ တွေ့ဆုံ ဆွေးနွေးပွဲကို ဇန်နဝါရီ ၂၄ ရက်နေ့ နံနက်ပိုင်းတွင် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာန၌ ဆက်လက် ကျင်းပ ပြုလုပ်သည်။

တွေ့ဆုံဆွေးနွေးပွဲသို့ နယ်စပ်ရေးရာဝန်ကြီးဌာန ပြည်ထောင်စုဝန်ကြီး၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေး ကော်မတီ ဥက္ကဋ္ဌ ဒုတိယဗိုလ်ချုပ်ကြီး ထွန်းထွန်းနောင်နှင့် ညှိနှိုင်းရေးကော်မတီဝင်များ၊ နိုင်ငံရေးပါတီများ အစုအဖွဲ့၏အလုပ်အဖွဲ့ခေါင်းဆောင် ပြည်သူ့ပါတီဥက္ကဋ္ဌ ဦးကိုကိုကြီးနှင့်အလုပ်အဖွဲ့ကိုယ်စားလှယ်များ တက်ရောက်ကြသည်။

တွေ့ဆုံဆွေးနွေးပွဲတွင် တက်ရောက်လာကြသူများက ပထမနေ့ဆွေးနွေးပွဲ၌ မပြီးပြတ်သေးသည့် နှစ်ဖက်အဆိုပြုချက်များကို ဆက်လက်ဆွေးနွေးညှိနှိုင်းကြပြီး နိုင်ငံရေးပါတီများအစုအဖွဲ့၏ အလုပ်အဖွဲ့ ပြင်ဆင်ဖွဲ့စည်းမည့်ကိစ္စအား နိုင်ငံရေးပါတီများ အစုအဖွဲ့ဘက်မှ ရှင်းလင်းတင်ပြသည်။

ဆက်လက်၍ အထွေထွေဆွေးနွေးခြင်းကဏ္ဍ၌ နိုင်ငံရေးပါတီကိုယ်စားလှယ်များက ၂၀၂၅ ခုနှစ် ရွေးကောက်ပွဲ ဆိုင်ရာကိစ္စရပ်များ၊ နိုင်ငံတော်တည်ငြိမ် အေးချမ်းသာယာမှုရရှိရန် လုပ်ဆောင်သင့်သော အစီအမံများအားအကြံပြုဆွေးနွေးခြင်းကိစ္စရပ်များ၊ ပြည်သူများ၏လိုအပ်ချက်များကို ဥပဒေကြောင်းအရ ဖြည့်ဆည်း ပေးနိုင်ရေးကိစ္စရပ်များ၊ လက်ရှိနိုင်ငံရေးအခင်းအကျင်းနှင့် အစိုးရနှင့်ပြည်သူလက်တွဲ၍ ကျော်လွှားနိုင်ရေးကိစ္စ ရပ်များ၊ နိုင်ငံရေးဝါဒမှိုင်းများကြောင့် ဖြစ်ပေါ်လာသော PDF များကို နိုင်ငံတော်ရင်ခွင်သို့ ပြန်လည်ဝင်ရောက်မှုများပြားလာစေရေး အကြံပြုတင်ပြခြင်း ကိစ္စရပ်များ၊ ပြည်သူ့စစ်မှုထမ်းဥပဒေအရအရေအတွက်တိုးမြှင့်ခေါ်ယူရေး အကြံပြုချက်များအား ဆွေးနွေးခဲ့ကြပြီး တက်ရောက်လာကြသူများက မိမိတို့၏ သဘောထားများကို အပြန်အလှန်ဆွေးနွေးခဲ့ကြသည်။

ယင်းနောက် ၂ ရက်တာ တွေ့ဆုံဆွေးနွေး ညှိနှိုင်းချက်များအရ အပြီးသတ်ရရှိသည့် သဘောတူညီချက်များကို အတည်ပြုလက်မှတ်ရေးထိုးခြင်းနှင့် ဆက်လက် ဆွေးနွေးရန် လိုအပ်သည့် နှစ်ဖက်အဆိုပြုချက်များ၊ နှစ်ဖက်ညှိနှိုင်းရရှိသည့် သဘောထားများကို သဘောထားစုစည်းချက်အဖြစ် မှတ်တမ်းတင်ခြင်းတို့ကို ဆောင်ရွက် ခဲ့ကြသည်။

ထို့နောက် နိုင်ငံရေးပါတီများ အစုအဖွဲ့၏ အလုပ်အဖွဲ့ ခေါင်းဆောင် ပြည်သူ့ပါတီဥက္ကဋ္ဌ ဦးကိုကိုကြီးနှင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီဥက္ကဋ္ဌ ဒုတိယ ဗိုလ်ချုပ်ကြီး ထွန်းထွန်းနောင်တို့က နိဂုံးချုပ်အမှာစကားများ ပြောကြားခဲ့ပြီး လက်ဆောင်ပစ္စည်းများအား ပေးအပ်ခဲ့ကြောင်း သိရှိရသည်။

ကိုးကား - နေ့စဉ်ထုတ်သတင်းစာ

ယူကရိန်းပဋိပက္ခတွင် ရုရှားသည် အားသာချက်များရှိပြီး ယူကရိန်းအနေဖြင့် နိုင်ပွဲမရနိုင်ကြောင်း အမေရိကန်အထက်လွှတ်တော်အမတ် Tommy Taberville က ဝန်ခံပြောကြားခဲ့ပါသည်။

ယူကရိန်းပဋိပက္ခတွင် ရုရှား၏ သိသာထင်ရှားသော အားသာချက်များရှိနေကြောင်းကို အမေရိကန် အထက်လွှတ်တော်အမတ် Tommy Taberville မှတ်ချက်ပြုခဲ့ပါသည်။ ၎င်းတို့သည် ယူကရိန်းကို ငွေကြေးထောက်ပံ့ပေးထားသော်လည်း ယူကရိန်းတို့မနိုင်ဘဲ စစ်ပွဲမှာရှုံးနေကြောင်း လွှတ်တော်အမတ်က ပြောကြားခဲ့ပါသည်။

ကိုးကား - TASS

Photo: AP News