ဥရောပနိုင်ငံတစ်နိုင်ငံဖြစ်သည့် ဆွီဒင်နိုင်ငံအနေဖြင့် ရုရှားနိုင်ငံနှင့် ချုပ်ဆိုထားသော နှစ်နိုင်ငံအကြား အခွန် နှစ်ထပ်ကောက်ခံမှုရှောင်ရှားရေး သဘောတူညီချက်ကို ဖေဖော်ဝါရီ ၁၀ ရက်မှစတင်၍ ဆိုင်းငံ့မည်ဖြစ်ကြောင်း ဆွီဒင်အစိုးရက ကြေညာလိုက်ပါသည်။

ထိုသို့သဘောတူညီချက်ဆိုင်းငံ့ခြင်းကြောင့် ရုရှားကုမ္ပဏီများအနေဖြင့် နှစ်နိုင်ငံအကြား ကုန်သွယ်မှုဆောင်ရွက်ရာတွင်လည်းကောင်း၊ ရင်းနှီးမြှုပ်နှံမှုပြုလုပ်ရာတွင် လည်းကောင်း အခက်အခဲပိုမိုကြုံတွေ့လာနိုင်မည်ဖြစ်ပါသည်။ 

အဆိုပါသဘောတူညီချက်အား ဆိုင်းငံ့ရန် အစိုးရ၏ အဆိုတင်သွင်းခြင်းကို ပြီးခဲ့သည့် ဒီဇင်ဘာလတွင် ဆွီဒင်ပါလီမန်၌ သဘောတူညီခဲ့ကြပါသည်။ ရုရှားနိုင်ငံ သည် ၂၀၂၃ ခုနှစ်၊ ဩဂုတ်လတွင် ဆွီဒင်အပါအဝင် မိမိနိုင်ငံအပေါ် စီးပွားရေးဆိုင်ရာ ဒဏ်ခတ်ပိတ်ဆို့မှုများ ချမှတ်ထားသော နိုင်ငံပေါင်း ၃၈ နိုင်ငံနှင့်ချုပ်ဆိုထားသည့် အခွန်ဆိုင်ရာသဘောတူ စာချုပ်များပါအချက်များကို ဆိုင်းငံ့ခဲ့ပါသည်။

ယခုလိုစာချုပ်ဆိုင်းငံ့ခြင်းသည် အခွန်နှစ်ထပ်ကောက်ခံမှုရှောင်ရှားရေး သဘောတူစာချုပ်အား ရပ်စဲခြင်းမဟုတ်ဘဲ နောင်တချိန်တွင် စာချုပ်ပြန်လည် အသက်ဝင်လာမည် ဖြစ်ကြောင်း ဆွီဒင်အစိုးရက ရှင်းပြထားပါသည်။

ကိုးကား-TASS

Photo: IPleaders

ပြည်ထောင်စုသမ္မတမြန်မာနိုင်ငံတော်၊ နိုင်ငံတော်စီမံအုပ်ချုပ်ရေးကောင်စီသည် အမိန့်အမှတ် (၁၄/၂၀၂၅) အား ဇန်နဝါရီလ(၃၁)ရက်နေ့ ရက်စွဲဖြင့် ထုတ်ပြန်

Source: MRTV

၂၀၂၂ ယူကရိန်း- ရုရှား ပဋိပက္ခ အရှိန်မြင့်လာပြီးနောက် ဥရောပသမဂ္ဂ (အီးယူ)က ဈေးနှုန်းသက်သာသည့် ရုရှား ရေနံနှင့်ဂတ်စ်တင်သွင်းမှုကို အရှိန်မြှင့်ပြီး လျှော့ချရန်အတွက် ကြိုးပမ်းခဲ့ကြပြီး ယခုအခါတွင် အီးယူနိုင်ငံ အချင်းချင်းကြား၌ သဘောထားကွဲလွဲမှုများ စတင် ဖြစ်ပေါ်လာလျက်ရှိသည်။

ယူကရိန်း ပဋိပက္ခဖြေရှင်းရေးကို အာရုံစိုက်လာကြပြီး သဘောတူညီမှုတစ်ခုပြုလုပ်နိုင်ပါက သဘောတူညီမှု၏ အစိတ်အပိုင်းတစ်ရပ်အဖြစ် ရုရှားရေနံနှင့် ဂတ်စ် တင်သွင်းမှု ပြန်လည်စတင်နိုင်ရန်အတွက် ဆွေး‌နွေးမှုများကို အီးယူတာဝန်ရှိသူများ လုပ်ဆောင်နေကြောင်း စီးပွားရေးဆိုင်ရာ သတင်းရင်းမြစ်တစ်ခုက ဖော်ပြခဲ့ ပါသည်။ 

ဂျာမနီနှင့် ဟန်ဂေရီတို့မှ တာဝန်ရှိသူများက ရုရှားမှ သွင်းကုန်များ ပြန်လည်စတင်ခြင်းသည် အီးယူ၏ စွမ်းအင်ကုန်ကျစရိတ်ကို သိသိသာသာလျှော့ချနိုင်ပြီး စေ့စပ်ညှိနှိုင်းမှုများ လုပ်ဆောင်ရန်အတွက် မော်စကိုအစိုးရကို တိုက်တွန်းပေးနိုင်သည်ဟု ပြောဆိုလျက်ရှိနေပါသည်။ ၎င်းတို့က အပစ်ရပ်ရေးအတွက် ရုရှား-ယူကရိန်း ၂ နိုင်ငံစလုံးကို လှုံ့ဆော်ပေးနိုင်မည်ဟု ယုံကြည်နေကြသည်။ 

မော်စကို၏ ပို့ကုန်ဝင်ငွေများတိုးမြင့်လာခြင်းနှင့် ရုရှား စွမ်းအင်အပေါ် အီးယူအဖွဲ့ မှီခိုအားထားမှုအား လျှော့ချနိုင်ရေး ကြိုးပမ်းခဲ့မှုကို ပြန်လည်သုံးသပ်ရန် ဆွေးနွေးနေကြခြင်းဖြစ်ကြောင်း ပြောဆိုလျက်ရှိကြသည်။ 

မော်စကိုအစိုးရဘက်မှလည်း အဆိုပါအစီအစဉ်၏ ဖြစ်နိုင်ခြေနှင့်ပတ်သက်၍ EU သည် မကြာမီ ကာလအတွင်း ရုရှားဓာတ်ငွေ့ဝယ်ယူမှုများကို ပြန်လည် စတင်နိုင်မည့်အခြေအနေမရှိကြောင်း ဒူမားလွှတ်တော် စွမ်းအင်ကော်မတီ ပထမဥက္ကဋ္ဌ အိုင်ဂေါအာနန်စကစ်က ပြည်တွင်းမီဒီယာတစ်ခုကို ပြောကြားခဲ့ပါတယ်။ 

အီးယူမှ ယူကရိန်းနှင့်ပတ်သက်၍ ရုရှားစွမ်းအင်တင်ပို့မှုများအား ပိတ်ဆို့အရေးယူမှုများဆောင်ရွက်ခဲ့ခြင်း၊  Nord Stream ပိုက်လိုင်းကို ၂၀၂၂ ခုနှစ်က ဖျက်ဆီးမှုများလုပ်ခဲ့ခြင်းများကြောင့် ရုရှားက အီးယူနိုင်ငံများသို့ တင်ပို့နေသည့် စွမ်းအင်ပမာဏကိုလျှော့ချခဲ့သည်။ အီးယူနိုင်ငံများသုံးစွဲနေသော စွမ်းအင်ပမာဏ ၄၀% ကျော်သည် ရုရှားထံမှဖြစ်သည်။ မော်စကိုနှင့် သဘောတူညီချက် သက်တမ်းကုန်ဆုံးပြီးနောက် ယူကရိန်းက ၎င်း၏ပိုင်နက်အတွင်း ရုရှားဓာတ်ငွေ့များ စီးဆင်းမှုကို ဇန်နဝါရီ ၁ ရက်က ရပ်တန့်စေခဲ့သည်။ အီးယူသည် အမေရိကန်နှင့် နော်ဝေးကဲ့သို့သော နိုင်ငံများမှ ပိုမိုဈေးကြီးသော သဘာဝဓာတ်ငွေ့အရည် (LNG) တင်သွင်းမှုများကြောင့် စွမ်းအင်ကဏ္ဍအတွက် ကုန်ကျစရိတ်များ ပိုမိုခဲ့ရသည်။ အမေရိကန်သမ္မတ ထရမ့်ကလည်း အမေရိကန်ထုတ် LNG ကို ပိုမိုဝယ်ယူရန် အီးယူနိုင်ငံများကို ယခင်ကတိုက်တွန်းခဲ့ပြီး လိုက်နာခြင်းမရှိပါက အခွန်ကောက်ခံမှုတိုးမြှင့်မည်ဟု  ခြိမ်းခြောက်ထားပါသည်။ မြင့်မားသော စွမ်းအင်ဈေးနှုန်းများက အီးယူစီးပွားရေးကို သိသိသာသာထိခိုက်လာစေပြီး တရားဝင်အချက်အလက်များအရ အီးယူ၏ စီးပွားရေးအင်အားကြီးနိုင်ငံဖြစ်သော ဂျာမနီ၏ စီးပွားရေးသည် ၂၀၂၃ နှင့်၂၀၂၄ ခုနှစ်များတွင် ၂ နှစ်ဆက်တိုက် ကျဆင်းသွားကြောင်း သိရပါသည်။ 

ကိုးကား-RT

အမေရိကန်အစိုးရအနေဖြင့် အမေရိကန် လူဝင်မှုကြီးကြပ်ရေးဥပဒေ ချိုးဖောက်မှုများကြောင့် မြန်မာနိုင်ငံသားများအပါအဝင် လူပေါင်း ၁,၄၄၅,၅၄၉ ဦးကို Non-Detained Docket with Final Orders of Removal အမိန့်အရ မိခင်နိုင်ငံသို့ ပြန်ပို့ခဲ့ကြောင်း သိရသည်။ 

အမေရိကန်လူဝင်မှုကြီးကြပ်ရေးနှင့် အကောက်ခွန်ဌာနလက်အောက်ခံဌာနတစ်ခုဖြစ်သော Enforcement and Removal Operations (ERO) သည် ပြည်သူ့ လုံခြုံရေးနှင့် နိုင်ငံတွင်းလုံခြုံရေးအတွက် ပဋိပက္ခရှိနိုင်သောနိုင်ငံခြားသားများကို စစ်ဆေးမှုပြုလုပ်ခြင်း၊ ဖမ်းဆီးခြင်းနှင့်နိုင်ငံပြန်ပို့ခြင်း (deportation) အဓိကထားလုပ်ဆောင်ရပြီး ၂၀၂၄ ခုနှစ်၊ နိုဝင်ဘာ ၂၄ ရက် အထိ လူပေါင်း ၁,၄၄၅,၅၄၉ ဦးကို အမေရိကန်နိုင်ငံမှ ထွက်ခွာရန် (သို့မဟုတ်) မိခင်နိုင်ငံထံပြန်ပို့ရန် အမိန့် ချမှတ်ထားကြောင်း သိရသည်။

Non-Detained Docket with Final Orders of Removal ဆိုသည်မှာ အမေရိကန်နိုင်ငံသားမဟုတ်သူတစ်ဦး (Non-Citizen) တစ်ဦးသည် ICE (Immigration and Customs Enforcement) မှ ဖမ်းဆီးမခံရသေးသော်လည်း အမေရိကန် နိုင်ငံအတွင်းမှ ထွက်ခွာရန် အမိန့် (Final Order of Removal) ရရှိထားခြင်းမျိုးဖြစ်ကြောင်း သိရသည်။ အမေရိကန်လူဝင်မှုဥပဒေ (Immigration Law) ချိုးဖောက်မှုများကြောင့် Immigration Judge (လူဝင်မှုတရားသူကြီး) က နိုင်ငံပြန်ပို့ခြင်း (Deportation/Removal) ကို ဆုံးဖြတ်ခဲ့ခြင်းဖြစ်ပြီး Asylum (ခိုလှုံခွင့်) တောင်းခံမှုငြင်းပယ်ခံရခြင်း၊ Green Card, Visa သက်တမ်းကုန်ဆုံးပြီး မထွက်ခွာခြင်း၊ Criminal Convictions (ပြစ်မှုကျူးလွန်မှု)ကြောင့် ပြည်နှင်ခြင်း၊ စသည့်အချက်များကြောင့် လူဝင်မှုကြီးကြပ်ရေးဥပဒေချိုးဖောက်သူများအဖြစ် သတ်မှတ်ခံရခြင်းဖြစ်သည်။

(ERO) သည် ပြည်တွင်းတွင် လျှို့ဝှက်နေသော တရားမဝင် နိုင်ငံခြားသားများ ဖမ်းဆီးခြင်း၊ ပြစ်မှုကျူးလွန်သူများ (Criminal Aliens) ကို ဖမ်းဆီးပြီး နိုင်ငံပြန်ပို့ခြင်း၊ လူဝင်မှုကြီးကြပ်ရေးဥပဒေနှင့် စပ်လျဉ်းသောစစ်ဆေးမှုများပြုလုပ်ခြင်း၊ နိုင်ငံခြားသားမိသားစုများနှင့် ကလေးသူငယ်များအတွက် စောင့်ရှောက်မှုနှင့် ကြီးကြပ်မှုများဆောင်ရွက်ခြင်း အမေရိကန်နိုင်ငံအတွင်း လျှို့ဝှက်နေထိုင်သော တရားမဝင် နိုင်ငံခြားသားများကို ရှာဖွေဖမ်းဆီးခြင်းနှင့် နိုင်ငံပြန်ပို့ခြင်းကို အဓိကထား၍ လုပ်ဆောင်ကြောင်း သိရသည်။

(ERO) ဌာန၏ Non-Detained Docket with Final Orders of Removal အမိန့်အရ မိခင်နိုင်ငံသို့ ပြန်ပို့ခံရမည့် လူပေါင်း ၁,၄၄၅,၅၄၉ ဦးထဲတွင် မြန်မာနိုင်ငံသား အနည်းဆုံး ၆၇၉ ဦး ပါဝင်ခဲ့ပြီး အမေရိကန် လူဝင်မှုကြီးကြပ်ရေးဥပဒေ ချိုးဖောက်မှုများကြောင့် မိခင်နိုင်ငံသို့ ပြန်ပို့ခံရမည်ဖြစ်ကြောင်း သိရသည်။ Non-Detained Docket with Final Orders of Removal အမိန့်အရ မိခင်နိုင်ငံသို့ပြန်ပို့ခံရမည့် နိုင်ငံသားများစာရင်းတွင် ဘင်္ဂလားဒေ့ရှ်၊ ဘရူနိုင်း၊ ကမ္ဘောဒီးယားနိုင်ငံသားများ ပါဝင်ခဲ့ပြီး အယ်ဆာဗေးဒိုးနိုင်ငံသားများက မိခင်နိုင်ငံသို့ ပြန်ပို့ခံရမည့်သူများထဲတွင် အများဆုံးဖြစ်ကြောင်း သိရသည်။

အမေရိကန်နိုင်ငံတွင် ဇန်နဝါရီ ၂၀ ရက်က ထရမ့် သမ္မတအဖြစ် ပြောင်းလဲတာဝန်ယူခဲ့ပြီးနောက် ယခင် သမ္မတဟောင်း ဂျိုးဘိုင်ဒင်လက်ထက်က အမိန့် စည်းကမ်းဥပဒေအများစုကို ပြင်ဆင်ပြောင်းလဲ ပယ်ဖျက်ခဲ့ပြီး အမေရိကန်နိုင်ငံအတွင်း တရားမဝင် နေထိုင်နေသူများကိုဖြိုခွင်းရန် အမိန့်များထုတ်ပြန်ခဲ့ကြောင်း သိရသည်။ အမေရိကန်အစိုးရသစ်သည် လက်ရှိအချိန်တွင် အမေရိကန်နိုင်ငံအတွင်း လူဝင်မှုကြီးကြပ်ရေးဥပဒေချိုးဖောက်မှုဖြင့် တရားမဝင် ရောက်ရှိနေထိုင်သူများကို မိခင်နိုင်ငံသို့ ပြန်ပို့နေပြီဖြစ်ရာ ပြီးခဲ့သောရက်ပိုင်းအတွင်း ကိုလံဘီယာ၊ မက္ကဆီကို နိုင်ငံသားများကို မိခင်နိုင်ငံသို့ ပြန်ပို့ခဲ့ကြောင်းသိရသည်။

ကိုးကား-NP News

ဆီးရီးယား၏ခေါင်းဆောင်သစ်များသည် နိုင်ငံနှစ်နိုင်ငံကြား “ယုံကြည်မှုပြန်လည်ရရှိရန်” ရုရှားထံမှ လျော်ကြေးငွေတောင်းခံနေကြောင်း Sana သတင်း အေဂျင်စီက ဖော်ပြခဲ့သည်။ လွန်ခဲ့သော ဒီဇင်ဘာလအတွင်းက ဘာရှာအာဆတ်အစိုးရပြုတ်ကျပြီးနောက် ဇန်နဝါရီ ၂၉ ရက်နေ့က ရုရှားသံတမန်များ၏ ပထမဆုံးခရီးစဉ်အတွင်း ပြောဆိုခဲ့သည်ဟု သိရသည်။ ရုရှားသည် ၂၀၁၁ ခုနှစ်ကတည်းက သမ္မတဟောင်း အာဆတ်ကို ထောက်ခံခဲ့ပြီး ဆီးရီးယားကို လွှမ်းခြုံထားသည့်သူပုန်ထမှုကို ဆန့်ကျင်သည့်စစ်ပွဲများတွင် ပါဝင်ခဲ့သည်။

ယခုအခါ အစ္စလာမ္မစ် ဟေယက်တာဟာအယ်ရှန် (HTS) လှုပ်ရှားမှုကို ဦးဆောင်နေသည့် ဆီးရီးယားအစိုးရသည် မော်စကိုအစိုးရအနေဖြင့် “အတိတ်က အမှားများကို ထည့်သွင်းစဉ်းစားပြီး ဆီးရီးယား ပြည်သူများ၏ဆန္ဒကို လေးစားသင့်သည်” ဟု ထုတ်ဖော်ပြောဆိုခဲ့သည်။

ရုရှားကိုယ်စားလှယ်အဖွဲ့ကလည်း ဆီးရီးယားတွင် အပြုသဘောဆောင်သော အပြောင်းအလဲများအတွက် ၎င်း၏ထောက်ခံမှုကို အတည်ပြုခဲ့ပြီး လျော်ကြေး၊ ပြန်လည်တည်ဆောက်ရေးနှင့်ပြန်လည်ထူထောင်ရေးကဲ့သို့သော ခိုင်မာသောအစီအမံများမှတစ်ဆင့် ဆီးရီးယားပြည်သူများ၏ ယုံကြည်မှု ပြန်လည်တည်ဆောက်ရာတွင် မော်စကိုအစိုးရ၏ အခန်းကဏ္ဍကို အလေးပေး ပြောကြားခဲ့သည်။

တွေ့ဆုံပွဲအပြီးတွင် ရုရှားကိုယ်စားလှယ်အဖွဲ့ကို ဦးဆောင်သည့် ဒုတိယနိုင်ငံခြားရေးဝန်ကြီး မီခေးလ် ဘောဂ်ဒန်နော့ဗ်က မော်စကိုနှင့် ဒမတ်စကတ်တို့ အကြား သမိုင်းကြောင်းအရ တည်ငြိမ်ပြီး အပြန်အလှန်အကျိုးရှိသောဆက်ဆံရေးကို ထိန်းသိမ်းရန် ရည်ရွယ်ထားကြောင်း ပြောကြားခဲ့သည်။

ဆွေးနွေးပွဲများတွင် ဆီးရီးယား၌ ရုရှား၏စစ်ရေးစခန်းများဖြစ်သည့် ခမဲမင်းနှင့်တာတပ်တို့၏ ဆက်လက်တည်ရှိနေမှုအတွက် တိကျသော သဘောတူညီချက်များ မရရှိခဲ့သေးပေ။ မော်စကိုသည် ခမဲမင်းလေတပ်စခန်းနှင့် တာတပ်ရှိ ထောက်ပံ့ပို့ဆောင်ရေးစင်တာတစ်ခုကို မြေထဲပင်လယ်ကမ်းရိုးတန်းတွင် တည်ထားသည်။ ၂၀၁၇ ခုနှစ်က ရုရှားနှင့်ဆီးရီးယားတို့သည် မော်စကို၏ တပ်များကို ၄၉ နှစ်ကြာ တပ်စွဲထားရန် သဘောတူညီခဲ့ကြသည်။ ရုရှားပိုင်အဆောက်အအုံများ၏ အနေအထားမှာ ပြောင်းလဲခြင်းမရှိကြောင်း သံတမန်က ပြောကြားခဲ့သည်။

ရုရှားသံတမန်များက ဆီးရီးယားလျော်ကြေးတောင်းခံမှုအပေါ် လိုက်လိုက်လျောလျောပြောခဲ့သော်လည်း ကရင်မလင်အစိုးရ ပြောခွင့်ရပုဂ္ဂိုလ် ဒီမီထရီပက်စ်ကော့ဗ်ကမူ မှတ်ချက်တစ်စုံတစ်ရာပေးခြင်း မရှိခဲ့ပေ။ ဒမတ်စကတ်အစိုးရဘက်မှ ရုရှားကဲ့သို့ အင်အားကြီးနိုင်ငံနှင့် ဆက်လက်လက်တွဲရန်အတွက် မဟာဗျူဟာမြောက် အစီအစဉ်များရှိကြောင်း ထုတ်ဖော်ခဲ့ဖူးကြောင်း သိရှိရပါသည်။ 

ကိုးကား-Myanmar National Post

ကျူးဘားနိုင်ငံ၊ ဂွာတာနာမိုပင်လယ်အော်ရှိ အမေရိကန် ရေတပ်အခြေစိုက်စခန်းတွင် ထိန်းသိမ်းရေးစခန်းများ တိုးချဲ့ဖွင့်လှစ်ရန် အမေရိကန်သမ္မတ ဒေါ်နယ်ထရမ့်က ညွှန်ကြားခဲ့ပြီး ပြည်နှင်ဒဏ်ခံရသော ထောင်နှင့်ချီသည့်တရားမဝင်ရွှေ့ပြောင်းနေထိုင်သူများကို ထားရှိရန် စီစဉ်ထားသည်ဟု ကြေညာခဲ့သည်။

တရားမဝင်ရွှေ့ပြောင်းနေထိုင်သူများကို ပြည်နှင်ဒဏ်ပေးမည့် Laken Riley Act ကိုပြဋ္ဌာန်းထားပြီး ပြစ်မှုထင်ရှားစီရင်ခြင်းမခံရသေးသော်လည်း ခိုးမှုနှင့် အကြမ်းဖက်ရာဇ၀တ်မှုများဖြင့် စွပ်စွဲခံထားရသော အထောက်အထားမဲ့ပုဂ္ဂိုလ်များကို ဖမ်းဆီးခြင်းနှင့် ပြည်နှင်ဒဏ်ပေးခြင်းတို့ လုပ်ဆောင်မည် ဖြစ်ကြောင်း ပါရှိပြီး သက်ဆိုင်ရာနိုင်ငံများမှ ပြန်လည်လက်မခံသူများကို ဂွာတာနာမိုသို့ ပို့ဆောင်မည်ဖြစ်ကြောင်းနှင့် အကျဉ်းသားဦးရေ ၃၀,၀၀၀ အတွက်ပြင်ဆင်ထားရန် ညွှန်ကြားထားကြောင်းကိုလည်း ထရမ့်က ပြောကြားခဲ့သည်။

ထရမ့်၏ အစိုးရအဖွဲ့သည် ပြည်နှင်ဒဏ်ပေးရေး ကြိုးပမ်းမှုများကို အရှိန်မြှင့်လုပ်ဆောင်ခဲ့ပြီး ဖယ်ရှားရေးခရီးစဉ်များအတွက် စစ်လေယာဉ်များကိုအသုံးပြုကာ ပြည်နှင်ဒဏ်ပေးခံရမှုများကို လက်ခံရန်ငြင်းဆန်သောနိုင်ငံများအတွက် အခွန်စည်းကြပ်မှုနှင့် အခြားအရေးယူမှုများဆောင်ရွက်မည်ဟု ပြောဆိုမှုများရှိနေသည်။

ကိုးကား-RT

ဥရောပသမဂ္ဂအနေဖြင့် ရုရှားနိုင်ငံအပေါ် ၁၆ ကြိမ်မြောက် အရေးယူပိတ်ဆို့မှုပြုလုပ်ရန် ပြင်ဆင်ဆွေးနွေးနေကြောင်း၊ ထိုပိတ်ဆို့မှုတွင် ရုရှားဘဏ် ၁၅ ခုကို SWIFT ဘဏ်စနစ်မှ ဖြတ်တောက်ရန် စီစဉ်နေကြောင်း၊ ရုရှားရေနံတင်သင်္ဘော ၇၄ စင်းကိုလည်း ပိတ်ဆို့မှုစာရင်းတွင် ထည့်သွင်းလာနိုင်ကြောင်း၊ ထို့အပြင် ရုရှားက အလူမီနီယမ်တင်သွင်းမှုကိုလည်း ကန့်သတ်လာနိုင်ကြောင်း၊ ထိုပိတ်ဆို့မှုအဆိုပြုချက်များအတွက် ဥရောပသမဂ္ဂနိုင်ငံများ၏ သဘောတူညီချက်ရယူရန် လိုအပ်ကြောင်း Bloomberg က အစီရင်ခံ ဖော်ပြထားပါသည်။

ကိုးကား-TASS

Photo: UNITED24 Media

Tesla နှင့် SpaceX အမှုဆောင်အရာရှိချုပ် အီလွန်မက်စ် ဦးဆောင်သော သမ္မတ ဒေါ်နယ်ထရမ့် ဖွဲ့စည်းထားသည့် အမေရိကန်အစိုးရစွမ်းဆောင်ရည်ဌာန (DOGE) သည် ဖက်ဒရယ်အသုံးစရိတ်ကို တစ်ရက်လျှင် ဒေါ်လာ ၁ ဘီလီယံခန့် ဖြတ်တောက်ထားနိုင်သည်ဟုဆိုသည်။ ၎င်းအေဂျင်စီသည် တရားဝင် X အကောင့်မှတစ်ဆင့် ကုန်ကျစရိတ်များကို နေ့စဉ် ဒေါ်လာ ၃ ဘီလီယံကျော် လျှော့ချရန် ရည်ရွယ်ထားကြောင်း ဇန်နဝါရီ ၂၉ ရက်နေ့တွင် ထုတ်ပြန်ခဲ့သည်။

DOGE ကို ထရမ့်၏ သမ္မတရွေးကောက်ပွဲ မဲဆွယ်မှုအတွင်း ပထမဆုံးအဆိုပြုခဲ့ပြီး နောက်ပိုင်းတွင် သမ္မတ အကြံပေးကော်မရှင်အဖြစ် တရားဝင်ဖွဲ့စည်းခဲ့သည်။ အေဂျင်စီသည် ပြီးပြည့်စုံသောဗဟိုအလုပ်အမှုဆောင်ဌာနမဟုတ်ဘဲ အစိုးရအသုံးစရိတ်များကိုလျှော့ချရန် စိစစ်သည့် ယာယီအဖွဲ့အစည်းဖြစ်သည်။ ၎င်းအဖွဲ့သည် ၂၀၂၆ ခုနှစ်၊ ဇူလိုင်လတွင် ပြည်ထောင်စုအသုံးစရိတ်ကို ဒေါ်လာ ၂ ထရီလီယံအထိဖြတ်တောက်ရန် ရည်မှန်းထားသည်။

DOGE သည် ဖက်ဒရယ်အစိုးရ၏ အသုံးစရိတ်စာရင်းကို စိစစ်နေခြင်းဖြစ်ပြီး အများစုမှာ မလိုအပ်သော ရာထူးနေရာများအတွက် လူများငှားရမ်းခြင်းကိုရပ်တန့်ခြင်း၊ DEI ဖျက်သိမ်းခြင်းနှင့် နိုင်ငံခြားအဖွဲ့အစည်းများထံ မလျော်ကန်သောငွေပေးချေမှုများကို ရပ်တန့်ခြင်းတို့ ဖြစ်ပြီးလုပ်ငန်းစဉ်အများစုမှာ သမ္မတ၏ ညွှန်ကြားချက်မူဝါဒများအတိုင်း လိုက်နာဆောင်ရွက်ခြင်းဖြစ်သည်ဟု အေဂျင်စီကဆိုပြီး အသေးစိတ်အချက်အလက်များကို မဖော်ပြဘဲ တစ်ရက်လျှင် ဒေါ်လာ ၁ ဘီလီယံခန့် ဖြတ်တောက်နိုင်လျက်ရှိကြောင်းဆိုပါသည်။

ထရမ့် သမ္မတမဖြစ်မီကတည်းက ကြိုတင်စီမံထားသည့် အစီအမံများသည် သမ္မတသက်တမ်း တစ်ပတ်အတွင်း ၌ပင် လုပ်ငန်းဆောင်ရွက်ချက်များကို ပြတ်ပြတ်သားသား ဆောင်ရွက်လျက်ရှိသည်။ အစိုးရအေဂျင်စီတစ်ခုဖြစ်သည့် မတူကွဲပြားမှုနှင့် သာတူညီမျှမှုဆိုင်ရာဌာန DEI သည် အပိုဖြစ်နေသည်ဟု သတ်မှတ်ခဲ့သည့်အတွက် အေဂျင်စီတစ်ခုလုံးကို ဖျက်သိမ်းပစ်လိုက်နိုင်ခဲ့ပြီး နိုင်ငံခြားအဖွဲ့အစည်းများသို့ ပေးနေသော မလျော်ကန်သည့် အထောက်အပံ့များကိုလည်း ပြန်လည်ဆန်းစစ်မှု ဆောင်ရွက်ရန်အတွက် ရက်၉၀ ကြာ ပိတ်ပင်ထားခဲ့သည်။ 

ကိုးကား-Myanmar National Post

ဘိုင်ဒင်အစိုးရအဖွဲ့သည် ၎င်း၏ရာထူးသက်တမ်းအတွင်း ပြည်ထောင်စုဘတ်ဂျက်ကို မဆင်မခြင်သုံးစွဲခဲ့ကြောင်း အိမ်ဖြူတော်သတင်းထောက် ကာရိုလိုင်းလီဗစ်က ဇန်နဝါရီ ၂၈ ရက်နေ့တွင် ပြောကြားခဲ့ပြီး သမ္မတ ဒေါ်နယ်ထရမ့်၏ နိုင်ငံခြားအကူအညီများကို ယာယီ ရပ်ဆိုင်းရန် ဆုံးဖြတ်ချက်ကို ခုခံကာကွယ်ခဲ့သည်။

နိုင်ငံခြားအကူအညီအားလုံးနီးပါးကို ရက် ၉၀ ကြာ ဆိုင်းငံ့ထားသည့် ထရမ့်၏ အမှုဆောင်အမိန့်သည် ဘဏ္ဍာရေးဆိုင်ရာ တာဝန်ယူမှုသေချာစေရန်နှင့်အုပ်ချုပ်ရေး၏"America First" အစီအစဉ်နှင့်အသုံးစရိတ်ကို ချိန်ညှိရန်အတွက်ဖြစ်သည်ဟု သတင်းစာရှင်းလင်းပွဲတစ်ခုတွင် Leavitt မှ ရှင်းလင်းပြောကြားခဲ့သည်။

“လွန်ခဲ့သည့် လေးနှစ်အတွင်း ဘိုင်ဒင် အစိုးရသည် အရက်မူးနေသည့် သင်္ဘောသားများကဲ့သို့ ငွေကြေးများ သုံးဖြုန်းနေသည်ကို တွေ့ခဲ့ရပါကြောင်း၊ ထိုအချက်သည် မိမိတို့နိုင်ငံတွင် ငွေကြေးဖောင်းပွမှု အကျပ်အတည်း ဖြစ်ရသည့် အဓိကအကြောင်းရင်းပါပဲ” ဟု Leavitt က ပြောကြားခဲ့သည်။

Leavitt သည် ဘိုင်ဒင် လက်ထက်တွင် အသုံးစရိတ်များ အလွန်အကျွံ သုံးစွဲခဲ့သည့် ဥပမာများကို ဖော်ပြရှင်းလင်းခဲ့ပြီး ၎င်းတို့တွင် ကမ္ဘာ့ကျန်းမာရေးအဖွဲ့ (WHO) အတွက် လျာထားငွေ ဒေါ်လာ ၃၇ သန်းနှင့်ဂါဇာရှိ ကွန်ဒုံး ဖြန့်ဖြူးရေး အစီအစဉ်များအတွက် ဒေါ်လာ သန်း ၅၀ ပါဝင်သည်။

အဆိုပါလျာထားသုံးစွဲခဲ့မှုများသည် အခွန်ထမ်းများ၏ အခွန်ငွေများကို ဖြုန်းတီးခြင်းဖြစ်ပြီး ယခုကဲ့သို့ရပ်ဆိုင်းလိုက်ခြင်းသည် ပြည်သူ့ဘဏ္ဍာငွေများကို တာဝန်သိသိ အကျိုးရှိရှိသုံးစွဲရန် အုပ်ချုပ်ရေးပိုင်း၏ ဆောင်ရွက်မှုကို ထင်ဟပ်စေကြောင်း သူမက ထပ်လောင်း ပြောကြားခဲ့ပါတယ်။

သမ္မတ ထရမ့်သည် ၎င်း၏ ဒုတိယသက်တမ်းအတွက် ကျမ်းသစ္စာကျိန်ဆိုပြီး မကြာမီ အုပ်ချုပ်ရေးအမိန့်များကိုလက်မှတ်ရေးထိုးထုတ်ပြန်ခဲ့ရာတွင် နိုင်ငံခြား ဖွံ့ဖြိုးရေး အကူအညီနှင့် အခြားအသုံးစရိတ်များကို ရက်ပေါင်း ၉၀ ရပ်ဆိုင်းထားပြီး အသစ်ဖွဲ့စည်းထားသော အစိုးရ စွမ်းဆောင်ရည်ဦးစီးဌာနနှင့် စီမံခန့်ခွဲမှုနှင့် ဘတ်ဂျက်ရုံးတို့က ပြန်လည်သုံးသပ်မှုများကို ဆိုင်းငံ့ထားသည်။ ကင်းလွတ်ခွင့်များတွင် အစ္စရေးနှင့်အီဂျစ်တို့အား စစ်ရေးအကူအညီများအပြင် အရေးပေါ်စားနပ်ရိက္ခာ ထောက်ပံ့ရေး အစီအစဉ်များလည်း ပါဝင်သည်။

အကူအညီများရပ်ဆိုင်းလိုက်ခြင်းကို သံတမန်များနှင့် အဖွဲ့အစည်းအချို့၊ အထူးသဖြင့် ယူကရိန်းနှင့်ဆက်နွှယ်သည့်အစီအစဉ်များတွင် ပါဝင်ပတ်သက်သူများက ဝေဖန်ပြောဆိုခဲ့ကြသည်။ Financial Times ၏ ဖော်ပြချက်အရ ယူကရိန်းတွင် အရေးပါသော ဖွံ့ဖြိုးတိုးတက်ရေးစီမံကိန်းများအတွက် အမေရိကန် သံတမန်အများအပြားက ကင်းလွတ်ခွင့်ပြုရန် တောင်းဆိုခဲ့ကြသည်။ ဤတောင်းဆိုမှုများကို ပြန်လည်သုံးသပ်နေကြောင်း သတင်းရရှိပါသည်။

ကိုးကား-RT

ဒိန်းမတ်အစိုးရသည် ၂၀၂၂ ခုနှစ်က ပျက်စီးမှုဒဏ်ခံခဲ့ရသော ဘောလ်တစ်ပင်လယ် မှ (Nord Stream) နော့စ် စထရိမ်ဓာတ်ငွေ့ပိုက်လိုင်းကို ရုရှား၏ နိုင်ငံပိုင် ဓာတ်ငွေ့ လုပ်ငန်းကုမ္ပဏီ (Gazprom) အား ထိန်းသိမ်းခွင့်ပြု လိုက်ကြောင်းသိရှိရပါသည်။

ဤဆုံးဖြတ်ချက်သည် အမေရိကန်၏ ဂရင်းလန်းကျွန်းကို သိမ်းပိုက်ရန် ထရမ့်အစိုးရလက်ထက် ခြိမ်းခြောက်မှုအား တုံ့ပြန်သည့်အပြင်၊ ဘိုင်ဒင်အစိုးရ၏ နော့စ် စထရိမ်ပိုက်လိုင်းကို ပိတ်ပစ်လိုသည့် ရည်ရွယ်ချက်နှင့် ဆန့်ကျင်နေပါသည်။  Nord Stream ဓာတ်ငွေ့ ပိုက်လိုင်းကို ဗုံးခွဲဖျက်သိမ်းမှုမတိုင်မီ တစ်နှစ်ကတည်းက ဘိုင်ဒင်အစိုးရက ပိတ်သိမ်းရန် ရည်ရွယ်ထားကြောင်း ထုတ်ဖော်ပြောဆိုခဲ့ပါသည်။  ပိုက်လိုင်း၏ အဖျားနှစ်ဖက်တွင် အထူးပြုလုပ်ထားသော အဆို့များတပ်ဆင်ကာ ဓာတ်ငွေ့ယိုစိမ့်မှုနှင့် အောက်ဆီဂျင်ပါသော ပင်လယ်ရေဝင်ရောက်မှုကို ကာကွယ်မည်ဟု ဖော်ပြထားပါသည်။ 

ဒိန်းမတ်၏ဆုံးဖြတ်ချက်သည် အမေရိကန်၏ဂရင်းလန်း သိမ်းပိုက်ရေးမဟာဗျူဟာကိုလက်တုံ့ပြန်မှုအဖြစ် နိုင်ငံရေးသံသယများပိုမိုမြင့်တက်စေခဲ့ပါသည်။

ကိုးကား - PRAVDA