လွန်ခဲ့သည့် ၂၀၂၀ ရွေးကောက်ပွဲတွင် ရှုံးခဲ့သော ဒေါ်နယ်ထရမ့်ကို ထောက်ခံခဲ့သည့် ၎င်း၏အမာခံ ပရိသတ် ထောင်ပေါင်းများစွာတို့သည် ထိုစဉ်က အနိုင်ရ ခဲ့သည့် ဂျိုးဘိုင်ဒန်ကို ကန့်ကွက်သည့်အနေဖြင့် ၂၀၂၁ ဇန်နဝါရီလ ၆ ရက်နေ့က ကယ်ပီတယ် အဆောက်အအုံကို သိမ်းပိုက်မှုလုပ်ခဲ့ပြီး အမြောက်အမြား ဖမ်းဆီးခံခဲ့ရသည်။ အဆိုပါဖမ်းဆီးခံခဲ့ရသူများတွင်  ဂျိုးဘိုင်ဒန်သမ္မတသက်တမ်း ၄ နှစ်ပြည့်မြောက်သွားသည့်တိုင် မလွတ်သေးသောသူများရှိနေခြင်းကြောင့် ထရမ့် သမ္မတဖြစ်ဖြစ်ချင်း ၎င်းကိုထောက်ခံသူများကို ချက်ချင်း လွှတ်ပေးခဲ့ခြင်းဖြစ်ပါသည်။

အိမ်ဖြူတော်ရှိ သမ္မတရုံးခန်းတွင် စတင်တာဝန်ထမ်းဆောင်သည်နှင့် လွတ်ငြိမ်းချမ်းသာခွင့်အမိန့်ကို လက်မှတ်ထိုးထုတ်ပြန်လိုက်ပြီး ခန့်မှန်းခြေအားဖြင့် လူပေါင်း ၁,၅၀၀ ခန့် ပါဝင်ကြောင်း ဒေါ်နယ်ထရမ့် က ပြောခဲ့ပါသည်။

ယခုနှစ်ဇန်နဝါရီလ အစောပိုင်းအထိ ဇန်နဝါရီ ၆ ရက် အမှုနှင့်ဆက်စပ်၍ ပြည်ထောင်စုတရားရုံးတွင် လူပေါင်း ၁၅၈၀ ကျော်ကို ရာဇဝတ်မှုဖြင့် စွဲချက်တင်ခဲ့ပြီး ၁၀၀၀ ကျော်က အပြစ်ရှိကြောင်း ဝန်ခံထားသည်ဟု တရားရေးဌာနမှ သိရှိရသည်။

ရဲတပ်ဖွဲ့ဝင် ၁၀၀ ကျော် ဒဏ်ရာရပြီး ငြိမ်းချမ်းစွာအာဏာလွှဲပြောင်းရေးကို ခြိမ်းခြောက်ခဲ့သည့် ဇန်နဝါရီ ၆ ရက် တိုက်ခိုက်မှုသမိုင်းကို ပြန်လည်ရေးသားရန် ဒေါ်နယ်ထရမ့်က လုပ်ဆောင်မည်ဖြစ်ကြောင်း သိရှိရပြီး အမေရိကန်သမိုင်းတွင် အမှောင်မိုက်ဆုံးနေ့ရက်များထဲမှ တစ်ခုအဖြစ် ဖော်ပြခံထားရသည့် အဆိုပါ အမှုနှင့်ပတ်သက်၍ ပါဝင်သူများကို တာဝန်ခံရန်တရားရေးဌာန၏ ကြိုးပမ်းအားထုတ်မှုအပေါ် ကြီးမားသော ထိုးနှက်ချက် ဖြစ်နေပါသည်။ 

အိမ်ဖြူတော်သို့ ပြန်လည်ရောက်ရှိလာသည့် ရက်သတ္တပတ်များအတွင်း ထရမ့်က ဇန်နဝါရီ ၆ ရက် တရားခံများ၏ အမှုတွဲတစ်ခုချင်းအလိုက် ကြည့်ရှုလိုကြောင်း ပြောကြားထားပါသည်။ သို့သော် ကယ်ပီတယ် အဓိကရုဏ်းအတွင်းအကြမ်းဖက်မှုများအတွက် တာဝန်ရှိသူများကို ခွင့်လွှတ်ခြင်းမပြုသင့်ဟု ဒုသမ္မတ ဂျေဒီဗန့်စ် က မကြာသေးမီရက်ပိုင်းက ပြောခဲ့ပါသည်။ 

ကိုးကား-Myanmar National Post

အမေရိကန် သမ္မတနှင့် ဇနီး၊ ဒုတိယ သမ္မတ ဇနီးမောင်နှံတို့သည် အိမ်ဖြူတော်၌ ရာထူးရယူခြင်း အထိမ်းအမှတ်အဖြစ် ကပြဖျော်ဖြေခဲ့ကြပါသည်။ 

ကိုးကား- The White House

အမေရိကန်ရွေးကောက်ပွဲတွင် အနိုင်ရရှိခဲ့သည့် ရွေးကောက်ခံသမ္မတဒေါ်နယ်ထရမ့်သည်  ဇန်နဝါရီလ ၂၀ ရက်တွင် အမေရိကန်ပြည်ထောင်စု၏ ၄၇ ဦးမြောက်သမ္မတအဖြစ် ကျမ်းသစ္စာကျိန်ဆိုခဲ့ကြောင်းသိရသည်။

ထရမ့်အနေဖြင့် ၎င်း၏ကျမ်းသစ္စာကျိန်ဆိုပွဲကို မူလက Capitol အဆောက်အအုံ၏ ရှေ့မှောက်တွင် ကျင်းပရန်စီစဉ်ခဲ့သော်လည်း  ရာသီဥတုအေးမြမှုကြောင့် ဝါရှင်တန်မြို့လယ်ကောင်ရှိ Capital One arena ၏ အတွင်းပိုင်း၌သာ လုံခြုံရေးအထူးတင်းကျပ်၍ ကျင်းပခဲ့ရသည်။

အဆိုပါကျမ်းသစ္စာကျိန်ဆိုပွဲသို့ အမေရိကန်ကွန်ဂရက်လွှတ်တော်အမတ်များ၊တရားရုံးချုပ်မှတရားသူကြီးများ၊ အနာဂတ်အမေရိကန်အစိုးရအဖွဲ့တွင် ပါဝင်မည့်အရာရှိကြီးများ၊ အမေရိကန်နည်းပညာနှင့် စီးပွားရေးလုပ်ငန်းရှင်များနှင့် တရုတ်ဒုတိယသမ္မတအပါအဝင် နိုင်ငံ့ခေါင်းဆောင်များတက်ရောက်ခဲ့ကြောင်းသိရသည်။

ထရမ့်သည် သမ္မတအဖြစ် ပထမအကြိမ်သက်တမ်းကို ၂၀၁၇ ခုနှစ်တွင် စတင်ထမ်းဆောင်ခဲ့ပြီး  ယခုတစ်ကြိမ်တွင် ဒုတိယအကြိမ်အဖြစ် ဆက်လက်ထမ်းဆောင်ခြင်းဖြစ်သည်။

Source: Myawady Web Portal

ဂါဇာကမ်းမြောင်ဒေသတွင် အပစ်အခတ်ရပ်စဲမှုစတင်ပြီး ဖမ်းဆီးထိန်းသိမ်းခံရသူများအားလွှတ်ပေးခြင်းအပေါ်ကြိုဆိုကြောင်း ကုလသမဂ္ဂ အထွေထွေ အတွင်းရေးမှူးချုပ် ဂူတာရက်စ် က ဇန်နဝါရီ ၁၉ ရက်တွင် လူမှုမီဒီယာ၌ ထုတ်ဖော် ရေးသားခဲ့သည်။ ဂါဇာကမ်းမြောင်ဒေသတွင် အပစ်အခတ် ရပ်စဲမှုစတင်ပြီး ဖမ်းဆီးထိန်းသိမ်းခံရသူများအား လွှတ်ပေးခြင်းအပေါ် ကုလသမဂ္ဂက အချိန်မရွေး ထောက်ခံအားပေးကြောင်း၊ အခက် အခဲကြုံတွေ့နေရဆဲဖြစ်သော ပါလက်စတိုင်း ပြည်သူများစွာအတွက် လူသားချင်းစာနာထောက်ထားမှုအကူအညီများ စဉ်ဆက်မပြတ် ထောက်ပံ့ပေးနိုင်ရန် တိုးမြှင့်လုပ်ဆောင်သွားမည်ဖြစ်ကြောင်း ဂူတာရက်စ်က ပြောကြားခဲ့သည်။ လက်ရှိအရေးကြီးဆုံးမှာ ဂါဇာကမ်းမြောင်ဒေသသို့ လူသားချင်းစာနာထောက်ထားမှုအကူအညီများ ထောက်ပံ့ရာတွင် ရင်ဆိုင်ရသည့် ကြီးမားသော လုံခြုံရေးနှင့် နိုင်ငံရေးအတားအဆီးများကို အပစ်အခတ်ရပ်စဲမှုက ဖယ်ရှားပေးရန်ဖြစ်သည်ဟု ၎င်းကဆိုသည်။ အစ္စရေးနှင့်ပါလက်စတိုင်း အစ္စလာမ်မစ် တော်လှန်ရေးလှုပ်ရှားမှုအဖွဲ့ (ဟားမက်စ်) တို့သည် ဂါဇာကမ်းမြောင်ဒေသတွင် အပစ်အခတ်ရပ်စဲရေးနှင့် စပ်လျဉ်း၍ သဘောတူညီချက်ရရှိခဲ့ပြီးဖြစ်ကြောင်း ကာတာဝန်ကြီးချုပ်နှင့် နိုင်ငံခြားရေးဝန်ကြီး Mohammed bin Abdulrahman bin Jassim Al Thani က ဇန်နဝါရီ ၁၅ ရက် ညပိုင်းတွင် ထုတ်ပြန်ကြေညာခဲ့သည်။ အဆိုပါသဘောတူညီချက်၏ ပထမအဆင့်ကို ဇန်နဝါရီ ၁၉ ရက်တွင် စတင်အကောင်အထည်ဖော်ဆောင်မည်ဖြစ်ကာ အစ္စရေးမှလွှတ်ပေးမည့် ဖမ်းဆီးထိန်းသိမ်းခံထားရသော ပါလက်စတိုင်းများနှင့် လဲလှယ်ရန်အတွက် ဟားမက်စ်သည် ၎င်းတို့ ဖမ်းဆီးထိန်းသိမ်းထားသူ ၃၃ ဦးကို လွှတ်ပေးသွားမည်ဖြစ်သည်။ ဟားမက်စ် ဘက်မှပေးပို့သော ဇန်နဝါရီ ၁၉ ရက်တွင် လွှတ်ပေးမည့် ဖမ်းဆီးထိန်းသိမ်းခံရသူ ၃၃ ဦး၏ အမည်စာရင်းကို လက်ခံရရှိပြီးဖြစ်ကာ ဂါဇာ အပစ်အခတ်ရပ်စဲ၍ အကျဉ်းသားလဲလှယ်သည့် စာချုပ်သည် ဒေသစံတော်ချိန် ဇန်နဝါရီ ၁၉ ရက် ၁၁ နာရီ ၁၅ မိနစ်တွင် စတင်အသက်ဝင်မည်ဟု အစ္စရေး ဝန်ကြီးချုပ်ရုံးက ဇန်နဝါရီ ၁၉ ရက်တွင် ထုတ်ပြန်ကြေညာခဲ့သည်။

ကိုးကား- ဆင်ဟွာ

Photo: www.aa.com.tr

အီလွန်မတ်စ်သည် ထရမ့်သမ္မတကျမ်းသစ္စာဆိုပွဲသို့ တက်ရောက်လာကြသော ထရမ့်ထောက်ခံသူများအား ကျေးဇူးတင်ရှိကြောင်းပြောခဲ့ပြီး ထူးထူးခြားခြား ဖက်ဆစ်ပုံစံအလေးပြုခဲ့ပါသည်။

“ယခုဆိုလျှင် အမေရိကန်နိုင်ငံသည် လူကြီးမင်းတို့ကြောင့် လုံခြုံမှုရှိသည့်နိုင်ငံ ဖြစ်လာမည်ဖြစ်ကြောင်း၊ လုံခြုံသည့် နယ်နိမိတ်နှင့် မှန်ကန်သော ဘဏ္ဍာငွေသုံးစွဲမှုများကို လုပ်ဆောင်သွားမည်ဖြစ်ပါကြောင်း” အီလွန်မတ်စ်က ထရမ့်ထောက်ခံသူများအား အလေးပြုရင်း ပြောကြား ခဲ့ပါသည်။

အီလွန်မတ်စ်၏ ဖက်ဆစ်ပုံစံအလေးပြုခဲ့သည့် အပြုအမူအပေါ် နယူးယောက်တက္ကသိုလ်မှ သမိုင်းပညာရှင် Ruth Ben- Ghiat က “ထိုအပြုအမူသည် နာဇီ အလေးပြုသည့်ပုံစံဖြစ်ပြီး ရိုင်းစိုင်းသည့် အပြုအမူ ဖြစ်ကြောင်း” ဝေဖန်ခဲ့ပါသည်။

ထိုကိစ္စနှင့်စပ်လျဉ်း၍ အီလွန်မတ်စ်က တရားဝင် တုံ့ပြန်ပြောဆိုခဲ့ခြင်းမရှိသော်လည်း ၎င်း၏ X ဆိုရှယ် မီဒီယာတွင် အပြုသဘောဆောင်သည့် မှတ်ချက်များအား ပြန်လည်ရေးသားခဲ့ကြောင်းသိရှိရပါသည်။

ကိုးကား -The Guardian

အမေရိကန်သမ္မတ ဒေါ်နယ်ထရမ့်သည် သမ္မတရာထူး စတင်တာဝန်ယူသည့် ၂၀-၁-၂၀၂၅ ရက်တွင် ၎င်းကတိပြုထားသည့် ဖက်ဒရယ်အစိုးရ အသွင် ကူးပြောင်းမှု အရှိန်အဟုန်ဖြင့် စတင်ဆောင်ရွက်နိုင်ရန် စီမံခန့်ခွဲရေးဆိုင်ရာ လုပ်ဆောင်ချက်အများအပြားကို ပထမခြေလှမ်းအဖြစ် လုပ်ဆောင်လိုက်ပြီဖြစ်သည်။

ပါရီရာသီဥတုသဘောတူညီချက်မှ အမေရိကန် နုတ်ထွက်ရေး၊ ဖက်ဒရယ်အလုပ်သမားများ ရုံးဌာနများသို့ ပြန်လည်ဝင်ရောက်လာရေး အစရှိသည့် သမ္မတစီမံ အုပ်ချုပ်ရေးအမိန့်များကို လက်မှတ်ရေးထိုးထုတ်ပြန် နိုင်ရေး ဆောင်ရွက်ခဲ့ပါသည်။

ထို့ပြင် သမ္မတအိမ်တော်ရှိ ဘဲဥပုံ အစည်းအဝေးခန်းမ၌ နာရီများစွာကြာ ဆွေးနွေးပြီးနောက် ၂၀၂၁ ခုနှစ်၊ ဇန်နဝါရီ ၆ ရက်က အမေရိကန်လွှတ်တော် အဆောက်အဦထဲ စီးနင်းဝင်ရောက် ဖျက်ဆီးခဲ့သည့် ရာဇဝတ်ကျူးလွန်သူများကို လွတ်ငြိမ်းချမ်းသာခွင့်ပေးခြင်း၊ တရုတ်ပိုင် TikTok ပိတ်ပင်မှု ဆိုင်းငံ့ခြင်း၊ အမေရိကန် လူဝင်မှုကြီးကြပ်ရေးစနစ် ပြန်လည်ပြင်ဆင်ခြင်းအစရှိသည့်ကိစ္စရပ်များအတွက် ၎င်း၏ စီမံအုပ်ချုပ်ရေးအမိန့်များကို လက်မှတ်များ ရေးထိုးလိုက်ပါသည်။ 

ကိုးကား-CNN

ကိယက်ဗ်အတွက် ဝါရှင်တန်သည် နောက်ထပ်အကူအညီများ တိုးမြှင့်သင့်သည်ဟု အမေရိကန်ပြည်သူ ၁၇% က သာ ယုံကြည်ကြောင်း New York Times/ Ipsos စစ်တမ်းက ဖော်ပြထားသည်။

မကြာသေးမီက New York Times/ Ipsos ၏ စစ်တမ်းအရ ယူကရိန်းအတွက် အမေရိကန်အစိုးရသည် အကူအညီများ အလွန်အကျွံသုံးစွဲနေသည်ဟု အမေရိကန် နိုင်ငံသားအများစုက ယုံကြည်ကြကြောင်းဖော်ပြခဲ့သည်ဟု သိရှိရပါသည်။

လေ့လာတွေ့ရှိချက်များအရ ဖြေဆိုသူ ၅၁% က ကိယက်ဗ်ထောက်ပံ့မှုအတွက် အမေရိကန်သည် အလွန်အကျွံ သုံးစွဲနေသည်ဟု ယူဆကြပြီး ၂၈% က လက်ရှိပမာဏသည် သင့်လျော်သည်ဟု ယုံကြည်ကြသည်။ ၁၇% က ယူကရိန်းထောက်ပံ့မှုအသုံးစရိတ်ကို မြှင့်တင်သင့်သည်ဟုဆိုသည်။

အလားတူ အစ္စရေးကို အမေရိကန်ထောက်ပံ့ကူညီမှုအတွက် စစ်တမ်းကောက်ယူမှုတွင် ၅၃% က အလွန်အကျွံထောက်ပံ့သည်ဟု ဆိုကြပြီး ၃၀% က လုံလောက်သည်ဟု ယူဆကြသည်။ စစ်တမ်းတွင်ပါ၀င်သော လူထု၏ သဘောထားတွင် အမေရိကန်အများစုသည် ဝါရှင်တန်ကို နိုင်ငံခြားအကူအညီများ ထက် ပြည်တွင်းပြဿနာများကို ဦးစားပေးလုပ်ဆောင် စေလိုကြောင်း အကြံပြုထားသည်။ 

ကိုးကား-RT

တရုတ်၏ ကြားဝင်ညှိနှိုင်းမှုဖြင့် တရုတ်နိုင်ငံ၊ ကူမင်းမြို့တွင် ဒုတိယအကြိမ် တွေ့ဆုံဆွေးနွေးခဲ့ကြသည့် မြန်မာ့တပ်မတော်နှင့် MNDAA တို့အကြား အပစ်အခတ်ရပ်စဲရေးသဘောတူညီမှု ရပြီဖြစ်ကြောင်း တရုတ်နိုင်ငံခြားရေးဝန်ကြီးဌာနပြောခွင့်ရသူ မော်နင်က ယနေ့ ဇန်နဝါရီ (၂၀) ရက်တွင် သတင်းထောက်များကို အသိပေးပြောကြားခဲ့သည်။

တရုတ်၏ ကြားဝင်မှုဖြင့် နှစ်ဘက်တာဝန်ရှိသူများ ကူမင်းမြို့တွင် အပစ်အခတ်ရပ်စဲရေးဆွေးနွေးမှုကို ဒုတိယအကြိမ်အနေဖြင့် ဇန်နဝါရီ (၁၆)ရက်နှင့် (၁၇)ရက်တို့တွင် လုပ်ဆောင်ခဲ့ခြင်းဖြစ်သည်။

ယင်းဆွေးနွေးမှုအရ တစ်နှစ်ကျော်ကြာ စစ်ရေးတင်းမာခဲ့သည့် မြန်မာ့တပ်မတော် နှင့် MNDAA တို့ အကြား တရားဝင် အပစ်အခတ်ရပ်စဲရေး သဘောတူညီမှုကို လက်မှတ်ရေးထိုးနိုင်ခဲ့ခြင်းဖြစ်ပြီး ယင်းသဘောတူညီမှုသည် ဇန်နဝါရီ (၁၈) ရက်တွင် စတင်အသက်ဝင်ကြောင်း သိရသည်။

၁၀၂၇ စစ်ဆင်ရေးအမည်ဖြင့် စတင်ခဲ့သည့် ရှမ်းမြောက်တိုက်ပွဲများအတွင်း MNDAA က လောက်ကိုင်နှင့် လားရှိုးအပါအဝင် ရှမ်းမြောက်ရှိ မြို့အချို့ကို ထိန်းချုပ်ထားပြီး နယ်မြေပိုင်းခြားမှုများနှင့်ပတ်သက်၍ မည်သည့် သဘောတူညီမှုများ ရယူခဲ့သည်ဆိုသည့်အချက်ကို လက်ရှိအချိန်ထိ မသိရသေးပေ။

ပြီးခဲ့သည့် ၂၀၂၄ ခုနှစ် ဒီဇင်ဘာလလယ်ပိုင်းကလည်း ပထမအကြိမ်ဆွေးနွေးမှုကို တရုတ်နိုင်ငံ ကူမင်းမြို့တွင်ပင် ပြုလုပ်ခဲ့ပြီး နှစ်ဘက်ဆွေးနွေးမှု မပြေလည်ခဲ့သည့်အတွက် တစ်လအကြာတွင် ဒုတိယအကြိမ်ထပ်မံဆွေးနွေးခဲ့ကြခြင်းဖြစ်သည်။

Source: Popular Myanmar

ဆက်စပ်သတင်း- https://sacministry.gov.mm/my/news/1818

အမေရိကန်သမ္မတ ဒေါ်နယ်ထရမ့်သည် ကမ္ဘာ့ကျန်းမာရေးအဖွဲ့ (WHO) မှ အမေရိကန်နုတ်ထွက်ရေးလုပ်ငန်းစဉ်စတင်ရန် အမိန့်ကို လက်မှတ်ရေးထိုးခဲ့သည်။ အဆိုပါ လက်မှတ် ရေးထိုးမှုသည် ထရမ့် ရာထူးတက်သည့်နေ့တွင် လက်မှတ်ရေးထိုးထားသည့် ဒါဇင်များစွာသော လုပ်ဆောင်ချက်များအနက်တစ်ခုဖြစ်ပြီး WHO ကနေ အမေရိကန် နုတ်ထွက်ရန် ထရမ့် က ဒုတိယအကြိမ် အမိန့်ပေးလိုက်ခြင်း ဖြစ်ပါသည်။

ထရမ့်သည် နိုင်ငံတကာအဖွဲ့၏ Covid-19 ကပ်ရောဂါ ထိန်းချုပ်ကိုင်တွယ်ပုံကို ဝေဖန် ခဲ့ပြီး ကူးစက်ရောဂါကာလအတွင်း ဂျနီဗာအခြေစိုက်အဖွဲ့အစည်းမှ နုတ်ထွက်ခြင်းလုပ်ငန်းစဉ်ကို စတင်ခဲ့သော်လည်း ဂျိုးဘိုင်ဒင်လက်ထက်တွင် အဆိုပါ ဆုံးဖြတ်ချက်ကို ပြောင်းပြန်လှန်ခဲ့ ပါသည်။ ထရမ့် သမ္မတရာထူးရယူသည့် ပထမနေ့တွင် အဆိုပါလုပ်ဆောင်ချက်ကို ဆောင်ရွက် ခြင်းဖြင့် အမေရိကန်သည် ကမ္ဘာလုံးဆိုင်ရာအေဂျင်စီမှ တရားဝင်ထွက်ခွာသွားဖွယ်ရှိပါသည်။

တရုတ်နိုင်ငံ၊ ဝူဟန်တွင် စတင်ပေါ်ပေါက်လာခဲ့သည့် ကိုဗစ်-၁၉ ကပ်ရောဂါကို လွဲမှားစွာ ကိုင်တွယ်ဖြေရှင်းမှု၊ အခြားကမ္ဘာ့ကျန်းမာရေးအကျပ်အတည်းများ၊ အရေးပေါ်လိုအပ်သော ပြုပြင်ပြောင်းလဲမှုများကို ချမှတ်ရန် ပျက်ကွက်ခြင်းနှင့် WHO အဖွဲ့ဝင်နိုင်ငံများ၏ နိုင်ငံရေး လွှမ်းမိုးမှုများကြောင့် WHO အဖွဲ့မှ အမေရိကန် နုတ်ထွက်ခြင်းဖြစ်ကြောင်း အမိန့် ထုတ်ပြန် ခဲ့သည်။ ထို့အပြင် WHO သို့ အမေရိကန်မှ ပေးဆောင်ခဲ့သော "မမျှတသော အခကြေးငွေများ" ကြောင့် ဖြစ်သည်ဟုလည်း အမိန့်တွင် ဖော်ပြထားပါသည်။

WHO သည် Covid-19 ရောဂါဖြစ်ပွားစဉ်အတွင်း လမ်းညွှန်ချက်ထုတ်ပြန်ရာတွင် တရုတ်နိုင်ငံအပေါ် ဘက်လိုက်မှုရှိကြောင်း ထရမ့်က စွပ်စွဲခဲ့သည်။ ဂျိုးဘိုင်ဒင်လက်ထက်တွင် အမေရိကန် သည် WHO ၏ အကြီးဆုံးရန်ပုံငွေထောက်ပံ့သူ အဖြစ်ဆက်လက်တည်ရှိနေပြီး ၂၀၂၃ ခုနှစ်တွင် WHO ဘတ်ဂျက်၏ ငါးပုံတစ်ပုံနီးပါးကို ထည့်ဝင်ခဲ့ပါသည်။

အဖွဲ့အစည်း၏ နှစ်စဉ်ဘတ်ဂျက်မှာ ဒေါ်လာ ၆.၈ ဘီလီယံ (ပေါင် ၅.၅ ဘီလီယံ) ဖြစ်ပါသည်။ WHO မှ အမေရိကန် နုတ်ထွက်ပါကရန်ပုံငွေထောက်ပံ့မှု ရပ်တန့်သွားနိုင်ပြီး ရန်ပုံငွေကွာဟချက်အတွက် မည်သည့်နိုင်ငံက ဆက်လက်ထောက်ပံ့မည်ဆိုသည်ကို ရှင်းလင်းစွာ မသိရပေ။ အမေရိကန်နုတ်ထွက်ခြင်းသည် အီဘိုလာဖြစ်ပွားခြင်း သို့မဟုတ် MPOX ကဲ့သို့သော အရေးပေါ်အခြေအနေများကို WHO ၏ တုံ့ပြန်နိုင်စွမ်းအပေါ် သက်ရောက်မှုရှိနိုင်ပြီး အခြား Covid-19 ကဲ့သို့ ကပ်ရောဂါပုံစံမျိုးအတွက် ဆိုဖွယ်မရှိပါ။ ငှက်ဖျား၊ တီဘီ၊ HIV နှင့် AIDS ကဲ့သို့သော ကူးစက်ရောဂါများကို တိုက်ဖျက်ရာတွင် အမေရိကန်တို့၏ ကျန်းမာရေးအတွက် အခြားသော အကျိုးဆက်များရှိလာနိုင်ကြောင်း ပြည်သူ့ကျန်းမာရေးကျွမ်းကျင်သူများက အကြံပြုထားသည်။

အမေရိကန်၏ နုတ်ထွက်မှုသည် ကမ္ဘာလုံးဆိုင်ရာအဖွဲ့အစည်းအပေါ် တရုတ်၏ သြဇာလွှမ်းမိုးမှု ပိုမိုအားကောင်းလာစေရန် တံခါးဖွင့်ပေးမည်ကို စိုးရိမ်မှုများလည်း ရှိပါသည်။ ထိုကဲ့သို့သော ဖြစ်ရပ်ဖြစ်လာပါက အမေရိကန်ကိုကျောခိုင်းဖို့ လုံလောက်ပါကြောင်း၊ သို့သော် ဝါရှင်တန်မှ ထွက်ပေါ်လာသည့် လေသံက အမေရိကန်အား နိုင်ငံတကာကျန်းမာရေးအဖွဲ့မှ နုတ်ထွက်ရန် သမ္မတ ထရမ့်၏ ဒုတိယအကြိမ် ကြိုးပမ်းမှုကို ပြန်လည်ထည့်သွင်းစဉ်းစားမည် မဟုတ်ကြောင်း အကြံပြုထားသည်။

ကိုးကား-BBC

သမ္မတ ထရမ့် ၏ ပထမဆုံး တာဝန်ထမ်းဆောင်သည့်နေ့၌ အစိုးရဝန်ထမ်းများထဲမှ မဟာမိတ်မဟုတ်သော အစိုးရအရာရှိ ၁၀၀၀ ကျော်ကို ပစ်မှတ်ထားပြီး ကျမ်းသစ္စာကျိန်ဆိုပြီးနောက် နာရီပိုင်းအတွင်း ရာထူးများမှ ဖယ်ရှားခဲ့သည်။ 

အဆိုပါ ထုတ်ပယ်ခံရသူများထဲတွင် ပင်တဂွန်စစ်ဌာန ချုပ်မှ ပူးတွဲစစ်ဦးစီးချုပ်ဟောင်း Mark Milley လည်း ပါဝင်ခဲ့သည်။ 

ကိုးကား - Truth Social Media