QUAD အဖွဲ့ဝင်နိုင်ငံများဖြစ်သည့် အမေရိကန်၊ ဩစတေးလျ၊ အိန္ဒိယနှင့် ဂျပန်နိုင်ငံတို့သည် ပင်လယ်ပြင်လုံခြုံရေးဆိုင်ရာ ပူးပေါင်းဆောင်ရွက်မှုအား တိုးမြှင့်လုပ်ဆောင်ရန် သဘောတူညီခဲ့ကြပြီး နည်းပညာမြင့်ပစ္စည်းများ တီထွင်ဖန်တီးထုတ်လုပ်ရာတွင် အရေးပါသည့် ဓာတ်သတ္တုပစ္စည်းများနှင့် မြေရှားသတ္တုတင်ပို့ရောင်းချခြင်း ကဏ္ဍတွင် ပူးပေါင်း ဆောင်ရွက်မည်ဖြစ်သည်။ အင်ဒို-ပစိဖိတ်ဒေသကို လွတ်လပ်ပွင့်လင်းသည့်ဒေသ အဖြစ် ဖော်ဆောင်ပေးရန် ရည်ရွယ်၍ Quadrilateral Security Dialogue (QUAD) အဖွဲ့ကို ဖွဲ့စည်းထားခြင်းဖြစ်သည်။

အမေရိကန်သည် ၎င်း၏ကုန်သွယ်ဖက်နိုင်ငံများနှင့် ကုန်သွယ်ရေးနှင့် ကာကွယ်ရေးဆိုင်ရာ ပြဿနာများရှိနေစဉ် အင်ဒိုပစိဖိတ်ဒေသတွင်း နိုင်ငံများအတွင်း ၎င်း၏ဩဇာလွှမ်းမိုးမှုကို မြှင့်တင်၍ တရုတ်နိုင်ငံ၏ ဩဇာလွှမ်းမိုးမှုကို လျှော့ချရန်ရည်ရွယ်၍ QUAD အဖွဲ့ဝင်နိုင်ငံများမှ နိုင်ငံခြားရေးဝန်ကြီးများသည် ဇူလိုင် ၂ ရက်တွင် ဝါရှင်တန်မြို့၌ တွေ့ဆုံ ခဲ့ကြသည်။

ထိုသို့တွေ့ဆုံစဉ် အမေရိကန်နိုင်ငံခြားရေးဝန်ကြီး မာကိုရူဘီယိုက QUAD အဖွဲ့သည် ကြေညာချက်များထုတ်ပြန်ခြင်းထက် လက်တွေ့လုပ်ဆောင်မှုများဖြစ်ရန် လိုအပ်ကြောင်းနှင့် QUAD အဖွဲ့အနေဖြင့် အနာဂတ်တွင် အခိုင်အမာရပ်တည်နေနိုင်ရေးအတွက် ကုန်သွယ်ရေး သည် အရေးကြီးသော အခန်းကဏ္ဍမှ ပါဝင်နေမည်ဖြစ်ကြောင်း ပြောကြား ခဲ့သည်။

QUAD Critical Minerals Initiative အဖွဲ့ကိုလည်း ဖွဲ့စည်းထားပြီး စဉ်ဆက်မပြတ် ဖွံ့ဖြိုးတိုးတက်သည့် စီးပွားရေးဖြစ်စေရေးနှင့် အရေးကြီးသော ဓာတ်သတ္တုပစ္စည်းများ ထုတ်လုပ်တင်ပို့ရောင်းချမှုကွင်းဆက်ကို လုံခြုံစိတ်ချရစေရေး ပူးပေါင်းဆောင်ရွက်မှုများ တိုးမြှင့်လုပ်ဆောင်ရန်အတွက်ဖြစ်ကြောင်း နိုင်ငံခြားရေးဝန်ကြီးလေးဦးက ကြေညာချက်ထုတ်ပြန်ခဲ့သည်။

ကိုးကား - Business Standard

ဘာသာပြန်ဆိုသူ- ‌ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

02 July 2025 

အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာ ရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်းများနှင့် အများပြည်သူသွားလာ အသုံးပြုနေသည့် လမ်းများပေါ်၌ မိုင်းထောင်ထားခြင်း၊ ဖောက်ခွဲခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။ 

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇူလိုင် ၁ ရက် မွန်းလွဲ ၁ နာရီတွင် မွန်ပြည်နယ်၊ ကျိုက်မရောမြို့နယ်၊ အောင်သုခရပ်ကွက်သို့ KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမားများ ပူးပေါင်းအဖွဲ့က အများပြည်သူ ထိခိုက်စေရန် ရည်ရွယ်၍ Drone ဖြင့် Drop Bomb များ ပစ်ချတိုက်ခိုက်ခဲ့ရာ အဆိုပါရပ်ကွက်နေ ဦးတင်မောင်ဦး(၆၆)နှစ်၏ နေအိမ်ခြံဝင်းရှေ့သို့ Drop Bomb တစ်လုံး ကျရောက်ပေါက်ကွဲခဲ့ပြီး ပေါက်ကွဲမှုကြောင့် လူနှင့် အဆောက်အအုံ ထိခိုက်ပျက်စီးမှုမရှိကြောင်း သိရသည်။ 

ထိုသို့ PDF အမည်ခံ အကြမ်းဖက်သမားများက အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်၊ Drop Bomb များဖြင့် ပစ်ခတ်တိုက်ခိုက်ခြင်း၊ အများပြည်သူ သွားလာလှုပ်ရှားနေသည့် နေရာများ၌ မိုင်းထောင်ဖောက်ခွဲခြင်းများအား ဆင်ခြင်တုံတရားကင်းမဲ့စွာ ပြုလုပ်ခဲ့သည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေးနှင့် နယ်မြေဒေသတည်ငြိမ်အေးချမ်းအတွက် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။

MOHA

02 July 2025 

အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။ 

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇူလိုင် ၁ ရက် မွန်းလွဲ ၁၂ နာရီ ၅၀ မိနစ်တွင် မွန်ပြည်နယ်၊ ကျိုက်ထိုမြို့နယ်၊ မုပ္ပလင်ကျေးရွာအနီး ရန်ကုန်-မော်လမြိုင်ကားလမ်း မိုင်တိုင်အမှတ် ၉၄ မိုင် ၃ ဖာလုံနှင့် ၄ ဖာလုံ ကားလမ်းဘေးရှိ ကုက္ကိုပင်အောက်ခြေ၌ KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမားများ ပူးပေါင်းအဖွဲ့ ထောင်ထားသည့် မိုင်း တစ်လုံး ပေါက်ကွဲခဲ့မှုကြောင့် အဆိုပါလမ်းပေါ်သို့ ကုက္ကိုပင်လဲကျပိတ်ဆို့လျက်ရှိပြီး မော်တော်ယာဉ်များ ဖြတ်သန်းသွားလာ၍မရကြောင်း သိရှိရသဖြင့် လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က ပေါက်ကွဲမှုဖြစ်ပွားသည့်နေရာအား ရှင်းလင်းဆောင်ရွက်ခဲ့ရာ မွန်းလွဲ ၃ နာရီတွင် မော်တော်ယာဉ်များ ပုံမှန်ပြန်လည်ဖြတ်သန်းသွားလာနိုင်ခဲ့ကြောင်း သိရသည်။ 

အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိပါသည်။

MOHA

အီရန်၏ စစ်တပ်သည် လွန်ခဲ့သည့်လအတွင်းက ပါရှန်ပင်လယ်ကွေ့တွင် ချထားရန် မိုင်းများကို သင်္ဘောများပေါ်သို့ တင်ဆောင်ခဲ့သည်ဟု ယုံကြည်ရပြီး အစ္စရေးနှင့် ပဋိပက္ခ အကြားတွင် ဟောမုဇ် ရေလက်ကြားကို ပိတ်ဆို့ရန် ကြိုးပမ်းမှုတစ်ခု ဖြစ်နိုင်သည်ဟု သတင်းရရှိသည်။ 

ရိုက်တာသတင်းဌာနက ဇူလိုင် ၂ ရက်နေ့တွင် အမည်ဖော်မပြလိုသော အမေရိကန် အရာရှိ ၂ ဦး၏ ထုတ်ပြန်ချက်ကို ကိုးကား၍ ဇွန် ၁၃ ရက် တွင် အစ္စရေး၏ အီရန်အား စစ်ဆင်ရေးပြုလုပ်ပြီးနောက် နှစ်ဖက်စလုံးမှ အပြန်အလှန် တုံ့ပြန်တိုက်ခိုက်မှုများ ဆက်တိုက်ဖြစ်ပွားခဲ့စဉ် အမေရိကန် ထောက်လှမ်းရေးက အဆိုပါလှုပ်ရှားမှုကို ရှာဖွေတွေ့ရှိခဲ့သည်ဟု ဖော်ပြ ခဲ့သည်။

မိုင်းများကို ရေလက်ကြားတွင် ခင်းကျင်းချထားမှု မပြုသေးသော်လည်း တီဟီရန်သည် ကမ္ဘာ့ရေကြောင်း ဖြတ်သန်းသွားလာမှုအများဆုံး လမ်းကြောင်း တစ်ခုကို ပိတ်ဆို့ရန် အလေးအနက်စဉ်းစားနေသည်ဟု ညွှန်းဆိုနိုင်သည်။ အကယ်၍ အီရန်က ဟောမုဇ် ရေလက်ကြားတွင် မိုင်းခင်းပါက ယခုထိ ထိန်းချုပ်မရသော ပဋိပက္ခကို ပိုမိုဆိုးရွားစေပြီး ကမ္ဘာ့ကုန်သွယ်ရေးကို ဆိုးရွားစွာ နှောင့်ယှက်နိုင်စေသည်။ ကမ္ဘာ့ရေနံနှင့် သဘာဝ ဓာတ်ငွေ့ စီးဆင်းမှု၏ ငါးပုံတစ်ပုံခန့်သည် ဟောမုဇ် ရေလက်ကြားမှ ဖြတ်သန်း စီးဆင်းလျက်ရှိပြီး ထိုနေရာတွင် ပိတ်ဆို့မှုဖြစ်ပါက ကမ္ဘာ့ရေနံ ဈေးနှုန်း များ မလွဲမသွေ မြင့်တက်လာနိုင်သည်။

ဇွန် ၂၂ ရက်တွင် အမေရိကန်က အီရန်၏ အဓိက နျူကလီးယားစက်ရုံ သုံးခုကို တိုက်ခိုက်ပြီးချိန်တွင် အီရန်လွှတ်တော်က ဟောမုဇ် ရေလက်ကြား ပိတ်ဆို့ရေး လုပ်ငန်းစဉ်များကို ထောက်ခံခဲ့သည်ဟု သိရှိရပြီး အဆိုပါ ဆုံးဖြတ်ချက်ကို တရားဝင်မထုတ်ပြန်သေးဘဲ အီရန်၏ အမျိုးသားလုံခြုံရေးကောင်စီကသာ ရေလက်ကြားပိတ်ဆို့မည့် အစီအစဉ်ကို အဆုံးအဖြတ်ပေးမည် ဖြစ်သည်။ အီရန်သည် နှစ်ပေါင်းများစွာ ဟောမုဇ်ရေလက်ကြား ပိတ်ဆို့မည်ဟု ခြိမ်းခြောက်ခဲ့သော်လည်း ယခုအထိ လက်တွေ့ဆောင်ရွက်ခဲ့ခြင်းမရှိသေးပေ။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

The Grayzone သတင်းဌာနက အင်္ဂါနေ့ (ဇူလိုင် ၁) တွင် ထုတ်ပြန်ချက်အရ ဗြိတိန် ထောက်လှမ်းရေးအရာရှိတစ်ဦးသည် အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) အတွင်းသို့ လျှို့ဝှက်ဝင်ရောက်ကာအီရန်အပေါ် အနောက်နိုင်ငံများ၏ ပိတ်ဆို့အရေးယူမှုများကို ပူးပေါင်း ကူညီခဲ့သည်ဟု ဆိုသည်။

လျှို့ဝှက်စာရွက်စာတမ်းများတွင် MI6 အေးဂျင့် Nicholas Langman ၏ IAEA အတွင်းရှိ လုပ်ဆောင်ချက်များကို ဖော်ပြထားပြီး Torchlight ဟုခေါ်သော ဗြိတိန် ထောက်လှမ်းရေးအဖွဲ့အစည်းနှင့်သက်ဆိုင်သည့် လိမ်လည်မှုမှတ်တမ်းများတွင် Langman ၏ ကိုယ်ရေးရာဇဝင်ကို တွေ့ရှိခဲ့သည်ဟု သတင်းရရှိသည်။

Langman သည် မင်းသမီး Diana ၏ သေဆုံးမှုတွင် ဗြိတိန် ထောက်လှမ်းရေး ၏ ပါဝင်မှုကို ဖုံးကွယ်ရန် ကူညီခဲ့သူဖြစ်ပြီး ဂရိအာဏာပိုင်များက အေသင် ရှိ ပါကစ္စတန်လူမျိုး ရွှေ့ပြောင်းနေထိုင်သူများအား ပြန်ပေးဆွဲညှင်းပန်းမှုတွင် ပါဝင်ခဲ့သည်ဟု စွပ်စွဲခံထားရသူလည်း ဖြစ်သည်။

၎င်း၏ ကိုယ်ရေးမှတ်တမ်းအရ IAEA နှင့် ဓာတုလက်နက် တားဆီးရေး အဖွဲ့ (OPCW) တို့ကို ပံ့ပိုးကူညီရန်အပါအဝင် “နျူကလီးယား၊ ဓာတုနှင့် ဇီဝလက်နက်နည်းပညာများ ပျံ့နှံ့မှုကို ဖော်ထုတ်တားဆီးရန် အေဂျင်စီ အချင်းချင်း ပူးပေါင်းအဖွဲ့များကို ဦးဆောင်ခဲ့သည်” ဟု ဖော်ပြထားသည်။

၂၀၁၀ ပြည့်နှစ် မှ ၂၀၁၂ ခုနှစ် အတွင်း Langman သည် အီရန်အပေါ် ပိတ်ဆို့အရေးယူမှုများ စီစဉ်ရာတွင် အဓိကအခန်းကဏ္ဍမှ ပါဝင်ခဲ့သည် ဟု ဆိုသည်။ အမေရိကန်၊ ဥရောပနှင့် အရှေ့အလယ်ပိုင်းနိုင်ငံများရှိအဆင့်မြင့်အရာရှိများနှင့် နိုင်ငံတော်အဆင့်ထိ ထိရောက်သောဆက်ဆံရေးများ တည်ဆောက်ကာ မဟာဗျူဟာချမှတ်ရာတွင် ကူညီ ခဲ့သည်ဟု သိရှိရသည်။ ထို့အပြင် “အီရန် နျူကလီးယားနှင့် ပိတ်ဆို့မှု သဘောတူညီချက်အား ကြီးမားသော သံတမန်အောင်မြင်မှုအဖြစ် ရောက်ရှိ စေရန် အထောက်အကူပြုခဲ့သည်” ဟု ၎င်းက ဂုဏ်ယူစွာ ဖော်ပြခဲ့သည်။

Langman သည် UK နိုင်ငံခြားရေးဝန်ကြီးဌာန၏ Counter-Proliferation Center တွင် တာဝန်ထမ်းဆောင်စဉ်အချိန်ကာလသည် အီရန်သိပ္ပံပညာရှင်များအပေါ် အနောက်နိုင်ငံများ၏ ပိတ်ဆို့မှုနှင့် လျှို့ဝှက် လုပ်ဆောင်ချက်များ တိုးမြင့်လာချိန်နှင့် ကိုက်ညီခဲ့သည်။ ထိုကာလအတွင်း အစ္စရေးက လုပ်ကြံသတ်ဖြတ်မှုများနှင့် တိုက်ခိုက်မှုများ မြင့်တက်လာခဲ့ပြီး အီရန် အပေါ် အမေရိကန်နှင့် EU တို့က ပြင်းထန်သော စီးပွားရေးဆိုင်ရာ အရေးယူမှုများ ချမှတ်ခဲ့သည်။

အီရန်သည် ကြာမြင့်စွာကတည်းက IAEA အား ၎င်း၏ရန်သူများနှင့် ပေါင်းဖက်ခဲ့သည်ဟု စွပ်စွဲခဲ့ပြီး တီဟီရန်မှ အရာရှိများက IAEA သည် အစ္စရေးထံသို့ အီရန်၏ နျူကလီးယားသိပ္ပံပညာရှင်များ၏ ကိုယ်ရေးအချက်အလက်များနှင့် အဓိကစက်ရုံများအကြောင်း ထောက်လှမ်းရေး အချက်အလက်များ ပေးပို့ခဲ့သည်ဟု ဆိုသည်။ ယင်းစက်ရုံများကို ပြီးခဲ့သည့်လက အမေရိကန်နှင့် အစ္စရေးတပ်ဖွဲ့များက ဗုံးကြဲတိုက်ခိုက်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဖူးခက်ပြည်နယ်ရဲတပ်ဖွဲ့သည် ခရီးသွားကမ်းခြေကျွန်းပေါ်ရှိ လုံခြုံရေးကို မြှင့်တင်ရန်ရည်ရွယ်၍ "Phuket Eye" လုံခြုံရေးစနစ်ကို ချဲ့ထွင်ရန် ပြင်ဆင်နေသည်။ ရဲတပ်ဖွဲ့မှူး ဗိုလ်မှူးကြီး ဆင်လတ် ဆူခမ်းက Phuket Eye စနစ်သည် Phuket Model စီမံချက်၏ တစ်စိတ်တစ်ပိုင်းဖြစ်ပြီး ရာဇဝတ်မှုနှိမ်နင်းရေး၊ ခရီးသွားလုံခြုံရေးစစ်ဆေးခြင်းနှင့် ယာဉ်ကြော စီမံခန့်ခွဲမှု တို့ကို ဦးစားပေးသည့် ပူးပေါင်းဆောင်ရွက်ရေး စီမံချက် တစ်ခုဖြစ်ကြောင်း ပြောကြားခဲ့သည်။

မကြာသေးမီက ကျင်းပခဲ့သော ခြောက်လပတ် အစီရင်ခံစာ ရှင်းလင်းပွဲ တွင် ဗိုလ်မှူးကြီး ဆင်လတ်က ဇန်နဝါရီ ၁ ရက်နေ့မှစ၍ Phuket Eye စနစ်ကြောင့် နိုင်ငံခြားသား ၃၆၉ ဦးကို ဖမ်းဆီးနိုင်ခဲ့ကြောင်း ဖော်ပြ ခဲ့သည်။ ထို နိုင်ငံခြားသား ၃၆၉ ဦးအနက် ၈၇ ဦးကို တရားမဝင် နယ်စပ်ဖြတ်ကျော်ဝင်ရောက်မှု၊ ၆၅ ဦးကို အရက်သေစာသောက်စားပြီး ယာဉ်မောင်းနှင်မှု၊ ၂၇ ဦးကို တားမြစ်ထားသောအလုပ်အကိုင်လုပ်ကိုင်မှု နှင့် ၂၃ ဦးကို မူးယစ်ဆေးဝါးဆိုင်ရာဖောက်ဖျက်မှုဖြင့် စွဲချက်တင် ခဲ့ကြောင်း ရဲမှူးကြီးက ပြောကြားခဲ့သည်။

ထို့အပြင် ရဲတပ်ဖွဲ့သည် ယာဉ်စည်းကမ်း ဖောက်ဖျက်မှုဖြင့် နိုင်ငံခြားသား ၂၈,၈၀၉ ဦးကို ဖမ်းဆီးခဲ့ရာ ရုရှားနိုင်ငံသား ၃,၁၂၁ ဦး၊ တရုတ်နိုင်ငံသား ၁,၇၂၁ ဦး၊ ဗြိတိန်နိုင်ငံသား ၁,၄၁၉ ဦး၊ ပြင်သစ်နိုင်ငံသား ၁,၃၆၅ ဦး နှင့် အိန္ဒိယနိုင်ငံသား ၁,၀၆၉ ဦး တို့ ပါဝင်ကြောင်း သိရှိရသည်။ ရဲတပ်ဖွဲ့ သည် ဆိုင်ကယ်စီး ဦးထုပ်ဆောင်းရန် အားပေးလှုံ့ဆော်ခြင်းနှင့် အများ ပြည်သူဆိုင်ရာ ယာဉ်စည်းကမ်း စီမံခန့်ခွဲမှုအပါအဝင် ယာဉ်ကြောထိန်း ချုပ်ရေး အစီအမံများတွင် အောင်မြင်မှုရရှိခဲ့ကြောင်း ထုတ်ပြန်ခဲ့သည်။

ဗိုလ်မှူးကြီး ဆင်လတ်က ယခုနှစ် သင်္ကြန် (ဆုန်ခရမ်ပွဲတော်) ကာလ အတွင်း ယာဉ်တိုက်မှုကြောင့် သေဆုံးသူ မရှိဘဲ ၊ မတော်တဆမှု ၄၅ ကြိမ် နှင့် ဒဏ်ရာရသူ ၄၅ ဦးသာ ရှိခဲ့ကြောင်း ဖော်ပြခဲ့သည်။ အနာဂတ် အစီအစဉ်များနှင့်ပတ်သက်၍ ဗိုလ်မှူးကြီး ဆင်လတ်က ဖူးခက် ပြည်နယ် ရဲတပ်ဖွဲ့သည် လာမည့်နှစ်အတွင်း ကျွန်းတစ်ဝှမ်းရှိ CCTV ကင်မရာ အရေအတွက်ကို ၂၂၃ ခုမှ ၅၀၃ ခုအထိ တိုးချဲ့ရန် ဘတ်ငွေ ၉၈ သန်း (အမေရိကန်ဒေါ်လာ ၂.၇ သန်း) အကုန်ကျခံမည်ဟု ပြောကြားခဲ့သည်။ ထိုကင်မရာများကို ဖူးခက်ပြည်နယ်ရဲတပ်ဖွဲ့၏ ဒေတာဘေ့စ်နှင့် ချိတ်ဆက် ထားမည်ဖြစ်ပြီး ရိုက်ကူးထားသော ဗီဒီယိုများကို ၃၀ ရက်အထိ သိမ်းဆည်းထားနိုင်မည်ဟု ၎င်းက ရှင်းပြခဲ့သည်။

“ပြည်နယ်ရဲတပ်ဖွဲ့သည် ခရီးသွားများ၏ လုံခြုံရေးအတွက် လုပ်ငန်း ဆောင်တာများကို အရှိန်မြှင့်ဆောင်ရွက်ကာ ဖူးခက်၏ ကမ္ဘာ့အဆင့်မီ လုံခြုံသော ခရီးသွားဆွဲဆောင်မှုပုံရိပ်ကိုလည်း မြှင့်တင်သွားမည်” ဟု ဗိုလ်မှူးကြီး ဆင်လတ်က ပြောကြားခဲ့သည်။ ဖူးခက်သည် ထိုင်းနိုင်ငံ၏ အဓိက ခရီးသွားဆွဲဆောင်ရာဒေသဖြစ်ပြီး နိုင်ငံတကာစံချိန်စံညွှန်းမီ လုံခြုံရေးစနစ်များ တည်ဆောက်ရန် ကြိုးပမ်းနေခြင်း ဖြစ်ပါသည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဒိန်းမတ်နိုင်ငံတွင် အမျိုးသမီးများအား မဝင်မနေရ စစ်မှုထမ်းဆောင်ရန် ခေါ်ယူမည့် ဥပဒေပြင်ဆင်ချက်ကို လွန်ခဲ့သော ရက်သတ္တပတ် အနည်းငယ် က ပါလီမန်မှ အတည်ပြုလိုက်ပါသည်။ အဆိုပါ ဆုံးဖြတ်ချက်သည် ဒိန်းမတ်နိုင်ငံက အဖွဲ့ဝင်အဖြစ်ပါဝင်သော NATO ၏ ၂၀၂၂ ခုနှစ် ဖေဖော်ဝါရီလတွင် ယူကရိန်းပဋိပက္ခ စတင်ချိန်မှစ၍ ရုရှား၏ ခြိမ်းခြောက် မှုကို ကာကွယ်ရန် စစ်ရေးပြင်ဆင်မှုများ တိုးမြှင့်လာခြင်းနှင့် ဆက်စပ် နေပါသည်။ ပြီးခဲ့သော သီတင်းပတ်က နယ်သာလန်နိုင်ငံ၊ The Hague တွင် ကျင်းပသော NATO အစည်းအဝေးတွင် အဖွဲ့ဝင်နိုင်ငံများက ကာကွယ်ရေး အသုံးစရိတ်များ တိုးမြှင့်ရန် သဘောတူညီခဲ့ကြသည်။ 

၂၀၂၃ ခုနှစ် မေလတွင် ဥရောပသမဂ္ဂသည် ၎င်း၏ စစ်ရေး တည်ဆောက်မှုအတွက် ယူရို ၁၅၀ ဘီလီယံ (အမေရိကန်ဒေါ်လာ ၁၇၁ ဘီလီယံ) ချေးငွေ အစီအစဉ်ကို အတည်ပြုခဲ့သည်။ ရုရှားအစိုးရကမူ အနောက်နိုင်ငံများ၏ ရန်လိုသည်ဟူသော စွပ်စွဲချက်များအား အဓိပ္ပာယ်မရှိသော အကြောင်း ပြချက်များဟု ပယ်ချလျက် ရှိပါသည်။

ဒိန်းမတ်၏ ပြင်ဆင်ပြဋ္ဌာန်းလိုက်သော ဥပဒေအသစ်အရ “စစ်မှုထမ်းခြင်း တွင် အမျိုးသားနှင့် အမျိုးသမီး တန်းတူညီမျှရေး အာမခံချက်ပါဝင်ပြီး ၂၀၂၅ ခုနှစ် ဇူလိုင်လ ၁ ရက်နေ့နှင့် နောက်ပိုင်း အသက် ၁၈ နှစ် ပြည့်သော အမျိုးသမီးများအား စာရင်းသွင်းကာ စစ်မှုထမ်းရန် လိုအပ်ပါက ရွေးချယ်ခေါ်ယူမည်” ဟု ဖော်ပြထားသည်။ အမျိုးသမီးစစ်မှုထမ်းများ သည် အမျိုးသားများနှင့် တူညီသော စည်းကမ်းချက်များဖြင့် ထမ်းဆောင် ရမည်ဖြစ်သည်။ သတင်းများအရ အဆိုပါဥပဒေပြင်ဆင်ချက်တွင် စစ်မှုထမ်း ကာလကို ၄ လမှ ၁၁ လအထိ တိုးမြှင့်ထားသည်ဟု သိရသည်။

ဒိန်းမတ် တပ်မတော်သည် စေတနာ့ဝန်ထမ်းများနှင့် မဖြစ်မနေ ခေါ်ယူ သည့် စစ်မှုထမ်းများကို အားထားရပြီး စေတနာ့ဝန်ထမ်းအရေအတွက် မလုံလောက်ပါက စစ်မှုထမ်းဆောင်ရန် ခေါ်ယူလေ့ရှိသည်။ ၂၀၂၄ ခုနှစ် တွင် ဒိန်းမတ်နိုင်ငံသား ၄,၇၀၀ ခန့်သည် စစ်မှုထမ်းဆောင်ပြီးစီးခဲ့ပြီး ၎င်းတို့အနက် အမျိုးသမီးများ၏ အချိုးမှာ ၂၄% ခန့်ရှိသည်။ ဝန်ကြီးချုပ် Mette Frederiksen က မတ်လတွင် အမျိုးသမီးများအား စစ်မှုမထမ်း မနေရ အစီအစဉ်ကို ကြေညာခဲ့ပြီး အဆိုပါဆုံးဖြတ်ချက်ကို “ကျား/မ အပြည့်အဝတန်းတူညီမျှမှု” တစ်ခုအဖြစ် ရှုမြင်ရန် တိုက်တွန်း ခဲ့သည်။

NATO အဖွဲ့ဝင်နိုင်ငံဖြစ်သော လတ်ဗီးယားသည်လည်း ၂၀၂၈ ခုနှစ် မတိုင်မီ အမျိုးသမီးများအား စစ်မှုမထမ်းမနေရ အစီအစဉ်ကို ကျင့်သုံးရန် စီစဉ်နေသည်။ ထိုနိုင်ငံသည် ၂၀၀၆ ခုနှစ်တွင် စစ်မှုမထမ်းမနေရစနစ်ကို ဖျက်သိမ်းခဲ့သော်လည်း ၂၀၂၃ ခုနှစ်တွင် ပြန်လည်ကျင့်သုံးခဲ့သည်။ နော်ဝေနှင့် ဆွီဒင်နိုင်ငံတို့သည် အသီးသီး ၂၀၁၅ နှင့် ၂၀၁၈ ခုနှစ်များတွင် ကျားမတန်းတူ စစ်မှုမထမ်းမနေရစနစ်ကို အကောင်အထည်ဖော်ခဲ့ပြီး ဖြစ်သည်။ ဂျာမနီနိုင်ငံ၏ ကာကွယ်ရေးဝန်ကြီး Boris Pistorius ကလည်း ၂၀၁၁ ခုနှစ်တွင် ဖျက်သိမ်းခဲ့သော အမျိုးသားများအတွက် စစ်မှုမထမ်း မနေရစနစ်ကို ပြန်လည်ကျင့်သုံးရန် အဆိုပြုထားသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပင်တဂွန်မှ အမေရိကန်ထုတ် လက်နက်အမျိုးအစားများကို ယူကရိန်းသို့ ပို့ဆောင်မှုများ ယာယီရပ်ဆိုင်းလိုက်ကြောင်း Politico နှင့် NBC News တို့က ဖော်ပြခဲ့သည်။ အမေရိကန်ကာကွယ်ရေးဝန်ကြီး Pete Hegseth ၏ အမိန့်အရ အမေရိကန်၏ လက်နက်သိုလှောင်ရုံများအား ပြန်လည် စစ်ဆေးသုံးသပ်ပြီးနောက် အဆိုပါဆုံးဖြတ်ချက်ချမှတ်ခဲ့ခြင်းဖြစ်ပြီးလက်နက်များ အလျင်အမြန်လျော့နည်းလာမှုနှင့်ပတ်သက်၍ စိုးရိမ်မှုများ တိုးပွားလာနေသည်။ 

အဆိုပါဆုံးဖြတ်ချက်သည် Patriot ဒုံးပျံတိုက်ဖျက်ရေးစနစ်၊ Stinger နှင့် AIM ဝေဟင်မှဝေဟင်ပစ်ဒုံးကျည်များ၊ Hellfire နှင့် GMLRS စနစ်များ အပါအဝင် ယခင်က ဝါရှင်တန်မှ ကိယက်ဗ်အား ကတိပြုထားသည့် 155mm အမြောက်ကျည်များစွာကိုပါ သက်ရောက်မှုရှိစေသည်။ NBC ၏ ဖော်ပြချက်အရ အချို့လက်နက်များမှာ ဥရောပတွင် အဆင်သင့် တပ်ဆင်ထားပြီးဖြစ်သော်လည်း ယူကရိန်းတပ်များထံ မလွှဲပြောင်းမီ ယာယီထိန်းချုပ်ထားခြင်းဖြစ်သည်။

Politico ၏ ဖော်ပြချက်အရ Trump အစိုးရသစ်သည် ယူကရိန်းအတွက် အပိုရံပုံငွေတောင်းခံမှုများ မပြုလုပ်သေးဘဲ လက်ရှိရန်ပုံငွေများမှာ လ အနည်းငယ်သာ ဆက်လက်ခံနိုင်ရည်ရှိမည်ဟု ခန့်မှန်းထားသည်။

အိမ်ဖြူတော်ဒုတိယပြောရေးဆိုခွင့်ရှိသူ Anna Kelly က ယင်းဆုံးဖြတ်ချက်အား အမေရိကန်၏ကာကွယ်ရေးလိုအပ်ချက်များကို ဦးစားပေးရန် လိုအပ်သောခြေလှမ်းအဖြစ် ကာကွယ်ပြောဆိုခဲ့ပြီး အသေးစိတ် အချက်အလက်များကိုမူ ထုတ်ပြန်ခြင်းမပြုခဲ့ပေ။

ကိယက်ဗ်သည် ဝါရှင်တန်ထံမှ လျော့နည်းလာသော ထောက်ပံ့မှုများနှင့်ပတ်သက်၍ စိတ်မသက်မသာဖြစ်ရကြောင်း ထပ်တလဲလဲ ဖွင့်ဟခဲ့သည်။ ယူကရိန်းခေါင်းဆောင် Vladimir Zelensky သည် လွန်ခဲ့သည့် သီတင်းပတ်က The Hague တွင် ကျင်းပသော NATO ထိပ်သီး အစည်းအဝေးတွင် သမ္မတ Donald Trump နှင့်တွေ့ဆုံခဲ့သော်လည်း ခိုင်မာသောကတိကဝတ်များကို မရရှိခဲ့ပေ။ Trump က Patriot စနစ် များသည် "ရရှိရန်အလွန်ခက်ခဲသည်" ဟုပြောကြားခဲ့ပြီး အမေရိကန်နှင့် အစ္စရေးတို့၏ကာကွယ်ရေးအတွက် လိုအပ်ကြောင်း ထည့်သွင်းပြောဆို ခဲ့သည်။

ထရမ့်က မော်စကိုနှင့် စစ်ပြေငြိမ်းရေး ညှိနှိုင်းပြီး ပဋိပက္ခအဆုံးသတ်ရန် ရည်ရွယ်ကြောင်း အကြိမ်ကြိမ်ထုတ်ဖော်ပြောဆိုခဲ့သည်။ လွန်ခဲ့သော လအတွင်း Hegseth က အိမ်ဖြူတော်သည် "America First" နည်းဗျူဟာ၏အစိတ်အပိုင်းအဖြစ်နှင့် သံတမန်နည်းကျ ဖြေရှင်းနိုင်ရေးရရှိရန် မျှော်လင့်ချက်ဖြင့် ကိယက်ဗ်အတွက် စစ်ရေး အထောက်အပံ့ အသုံးစရိတ်များကို လျှော့ချနေကြောင်း ပြောကြားခဲ့သည်။

ပင်တဂွန်၏ မူဝါဒပြောင်းလဲမှုသည် ယူကရိန်းသို့ အဆုံးမရှိသော အကူအညီများနောက်ကွယ်ရှိ အကြောင်းပြချက်များကို လူသိရှင်ကြား မေးခွန်းထုတ်ခဲ့သည့် ထရမ့်လက်ထက်တွင် ပိုမိုကျယ်ပြန့်သော ပြန်လည် ချိန်ညှိမှုကို ထင်ဟပ်နေသည်။ ရုရှားသမ္မတ၏ အထူးကိုယ်စားလှယ်နှင့် တိုက်ရိုက်ရင်းနှီးမြှုပ်နှံမှုရန်ပုံငွေအကြီးအကဲ Kirill Dmitriev က ထို လုပ်ရပ်သည် "အနောက်တိုင်း၏ အစွမ်းအစ၏ အစစ်အမှန် ကန့်သတ်ချက်များနှင့် အမေရိကန်စစ်တပ်၏ ဦးစားပေးအပြောင်းအလဲများကို မီးမောင်း ထိုးပြနေသည်" ဟု မှတ်ချက်ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

နေပြည်တော် ဇူလိုင် ၂

ရန်ကုန်တိုင်းဒေသကြီး၊ လှိုင်သာယာ(အရှေ့ပိုင်း)မြို့မရဲစခန်း၌ အကြမ်းဖက်မှုတိုက်ဖျက်ရေးဥပဒေပုဒ်မ ၅၀(ည)ဖြင့် ဖမ်းဆီးထားသည့် အချုပ်တရားခံ ဇွန်ပွင့်လှိုင်(၃၀)နှစ်၊ (ဘ) ဦးလှမင်းအား ရဲတပ်ဖွဲ့မှ လုံခြုံရေးတာဝန်ရှိသူများက၂၀၂၅ ခုနှစ်၊ ဇူလိုင် ၁ ရက် ညပိုင်းတွင် ကျောက်ကပ်ရောဂါအရေးပေါ်ကုသရန် အမှတ်(၅)ရပ်ကွက်၊ ဗိုလ်ချုပ်လမ်းရှိ သပြေအထူးကုဆေးခန်းသို့ ပို့ဆောင်ပေးပြီးအပြန် လှိုင်သာယာ(အရှေ့ပိုင်း)မြို့နယ်ရှိ Ocean Center သို့ ဝင်ရောက်ဆေးဝယ်ကာ ပြန်ထွက်လာစဉ် ကားပါကင်အနီးသို့အရောက်၌ PDF အမည်ခံ အကြမ်းဖက်သမားများက လက်နက်ငယ်များဖြင့် စောင့်ကြိုပစ်ခတ်ခဲ့ရာ ဆေးခန်းသို့လိုက်ပါပို့ဆောင်သည့် ရဲတပ်ဖွဲ့ဝင်များအား လက်နက်ငယ်ကျည်များထိမှန်၍ ထိခိုက်မှုများဖြစ်ပေါ်ခဲ့ပြီး အချုပ်တရားခံ ဇွန်ပွင့်လှိုင်အား ခေါ်ဆောင်ထွက်ပြေးသွားကြောင်း သိရှိရသည်။

အဆိုပါ အချုပ်တရားခံနှင့် ခေါ်ဆောင်ထွက်ပြေးသွားသူများအား အမြန်ဆုံး ပြန်လည်ဖမ်းဆီးရမိနိုင်ရေးအတွက် ပိတ်ဆို့ရှာဖွေမှုများပြုလုပ်ခဲ့ရာ ယနေ့နံနက်ပိုင်းတွင် သန်လျင်မြို့နယ်၊ ဘုရားကုန်းကျေးရွာ၊ (၆)လမ်းသွားလမ်းဆုံနေရာ၌ ဇွန်ပွင့်လှိုင်အပါအဝင် ရဲလုံခြုံရေးတပ်ဖွဲ့ဝင်များအား လက်နက်ငယ်များဖြင့် ပစ်ခတ်ခဲ့သည့် ဘားအံမြို့နယ်၊ တောင်ဝိုင်းကျေးရွာနေ ချစ်ဇင်လင်း(ခ) စောအယ်ထူး (၃၈)နှစ်(ဘ)ဦးစိန်မင်းနှင့်လှိုင်သာယာ(အနောက်ပိုင်း)၊ မြို့နယ်(၁၃) ရပ်ကွက်နေ သီဟသူ (၂၃)နှစ် (ဘ) ဦးဘိုဘိုသူတို့ကိုလည်းကောင်း၊ စစ်ပစ်ကွင်းကျေးရွာအနီး သန်လျင်-သုံးခွကားလမ်းရှိ စစ်ပင်ကွင်း ကားမှတ်တိုင်၌ ကျောက်တံခါးမြို့နယ်၊ သမင်အင်းကုန်းကျေးရွာနေ သုခပြည့်စုံ (ခ)ဖိုးခွား (၂၀)နှစ် (ဘ) ဦးနေထွန်း၊ လှည်းကူးမြို့နယ်၊ ရိပ်သာရပ်ကွက်နေ သူရဝင်း (၃၅)နှစ် (ဘ) ဦးသန်းဇော်နှင့် မုံရွာမြို့နယ်၊ မြို့သစ်ရပ်ကွက်နေ အောင်စန်းမိုး (ခ) ပေါင်မုန့် (၂၂)နှစ် (ဘ) ဦးမိုးသီးတို့ကိုလည်းကောင်း၊ ပစ္စတို ၂ လက်၊ ကျည်မျိုးစုံ ၄၃ တောင့်၊ ကျည် အိမ် ၃ ခု၊ လက်ပစ်ဗုံး ၄ လုံးတို့နှင့်အတူ အသီးသီးဖမ်းဆီးရမိခဲ့သည်။

အဆိုပါ အချုပ်တရားခံ ဇွန်ပွင့်လှိုင်အပါအဝင် လက်နက်ခဲယမ်းများနှင့်အတူ ဖမ်းဆီးရမိသည့် PDF အမည်ခံ အကြမ်းဖက်သမား ၆ ဦးကို တရားဥပဒေနှင့်အညီ အရေးယူဆောင်ရွက်နိုင်ရေးအတွက် လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း မြန်မာနိုင်ငံရဲတပ်ဖွဲ့မှ သတင်းရရှိသည်။

MOI

02 July 2025

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲတိုက်ခိုက်ခြင်းများအား လုပ်ဆောင်လျက်ရှိသည့်အပြင် အေးချမ်းစွာနေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက် ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇူလိုင် ၁ ရက် မွန်းလွဲ ၂ နာရီတွင် ရှမ်းပြည်နယ်၊ ရွာငံမြို့နယ်၊ တပင်ပျော်ကျေးရွာသို့ PDF အမည်ခံ အကြမ်းဖက်အဖွဲ့ အင်အား(စိစစ်ဆဲ) ရောက်ရှိလာပြီး အဆိုပါကျေးရွာရှိ ဘုန်းကြီးကျောင်းမှ ကျောင်းထိုင်ဆရာတော် ဘဒ္ဒန္တပညာသာမိ သက်တော်(၆၀)နှစ်၊ ဝါတော်(၂၂)ဝါအား ဘုန်းကြီးကျောင်း၌ တပ်ဆင်ထားသည့် CCTV မှတ်တမ်း သိမ်းဆည်းထားသည့် System ပုံး တစ်ပုံး၊ အလှူငွေများပါရှိသည့် အလှူခံပုံး တစ်ပုံးနှင့် ကျောင်းပိုင် မော်တော်ယာဉ် တစ်စီးတို့နှင့်အတူ ဖမ်းဆီးခေါ်ဆောင်သွားခဲ့ကြောင်း သိရသည်။

ထိုသို့ သာသနာ့အနွယ်ဝင် သံဃာတော်အား ဖမ်းဆီး၍ ဘုန်းကြီးကျောင်းပိုင် မော်တော်ယာဉ်နှင့် ပစ္စည်းများအား လုယက်ယူဆောင်သွားခဲ့သည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေးနှင့် ဖမ်းဆီးခေါ်ဆောင်ခံရသည့် သံဃာတော်အား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA