ပင်တဂွန်မှ လက်နက်သိုလှောင်ရုံများတွင် ခဲယမ်းများ လျော့နည်းလာမှုကြောင့် ကိယက်ဗ်သို့ လက်နက်ထောက်ပံ့မှုများ ရပ်ဆိုင်း

ပင်တဂွန်မှ အမေရိကန်ထုတ် လက်နက်အမျိုးအစားများကို ယူကရိန်းသို့ ပို့ဆောင်မှုများ ယာယီရပ်ဆိုင်းလိုက်ကြောင်း Politico နှင့် NBC News တို့က ဖော်ပြခဲ့သည်။ အမေရိကန်ကာကွယ်ရေးဝန်ကြီး Pete Hegseth ၏ အမိန့်အရ အမေရိကန်၏ လက်နက်သိုလှောင်ရုံများအား ပြန်လည် စစ်ဆေးသုံးသပ်ပြီးနောက် အဆိုပါဆုံးဖြတ်ချက်ချမှတ်ခဲ့ခြင်းဖြစ်ပြီးလက်နက်များ အလျင်အမြန်လျော့နည်းလာမှုနှင့်ပတ်သက်၍ စိုးရိမ်မှုများ တိုးပွားလာနေသည်။ 

အဆိုပါဆုံးဖြတ်ချက်သည် Patriot ဒုံးပျံတိုက်ဖျက်ရေးစနစ်၊ Stinger နှင့် AIM ဝေဟင်မှဝေဟင်ပစ်ဒုံးကျည်များ၊ Hellfire နှင့် GMLRS စနစ်များ အပါအဝင် ယခင်က ဝါရှင်တန်မှ ကိယက်ဗ်အား ကတိပြုထားသည့် 155mm အမြောက်ကျည်များစွာကိုပါ သက်ရောက်မှုရှိစေသည်။ NBC ၏ ဖော်ပြချက်အရ အချို့လက်နက်များမှာ ဥရောပတွင် အဆင်သင့် တပ်ဆင်ထားပြီးဖြစ်သော်လည်း ယူကရိန်းတပ်များထံ မလွှဲပြောင်းမီ ယာယီထိန်းချုပ်ထားခြင်းဖြစ်သည်။

Politico ၏ ဖော်ပြချက်အရ Trump အစိုးရသစ်သည် ယူကရိန်းအတွက် အပိုရံပုံငွေတောင်းခံမှုများ မပြုလုပ်သေးဘဲ လက်ရှိရန်ပုံငွေများမှာ လ အနည်းငယ်သာ ဆက်လက်ခံနိုင်ရည်ရှိမည်ဟု ခန့်မှန်းထားသည်။

အိမ်ဖြူတော်ဒုတိယပြောရေးဆိုခွင့်ရှိသူ Anna Kelly က ယင်းဆုံးဖြတ်ချက်အား အမေရိကန်၏ကာကွယ်ရေးလိုအပ်ချက်များကို ဦးစားပေးရန် လိုအပ်သောခြေလှမ်းအဖြစ် ကာကွယ်ပြောဆိုခဲ့ပြီး အသေးစိတ် အချက်အလက်များကိုမူ ထုတ်ပြန်ခြင်းမပြုခဲ့ပေ။

ကိယက်ဗ်သည် ဝါရှင်တန်ထံမှ လျော့နည်းလာသော ထောက်ပံ့မှုများနှင့်ပတ်သက်၍ စိတ်မသက်မသာဖြစ်ရကြောင်း ထပ်တလဲလဲ ဖွင့်ဟခဲ့သည်။ ယူကရိန်းခေါင်းဆောင် Vladimir Zelensky သည် လွန်ခဲ့သည့် သီတင်းပတ်က The Hague တွင် ကျင်းပသော NATO ထိပ်သီး အစည်းအဝေးတွင် သမ္မတ Donald Trump နှင့်တွေ့ဆုံခဲ့သော်လည်း ခိုင်မာသောကတိကဝတ်များကို မရရှိခဲ့ပေ။ Trump က Patriot စနစ် များသည် "ရရှိရန်အလွန်ခက်ခဲသည်" ဟုပြောကြားခဲ့ပြီး အမေရိကန်နှင့် အစ္စရေးတို့၏ကာကွယ်ရေးအတွက် လိုအပ်ကြောင်း ထည့်သွင်းပြောဆို ခဲ့သည်။

ထရမ့်က မော်စကိုနှင့် စစ်ပြေငြိမ်းရေး ညှိနှိုင်းပြီး ပဋိပက္ခအဆုံးသတ်ရန် ရည်ရွယ်ကြောင်း အကြိမ်ကြိမ်ထုတ်ဖော်ပြောဆိုခဲ့သည်။ လွန်ခဲ့သော လအတွင်း Hegseth က အိမ်ဖြူတော်သည် "America First" နည်းဗျူဟာ၏အစိတ်အပိုင်းအဖြစ်နှင့် သံတမန်နည်းကျ ဖြေရှင်းနိုင်ရေးရရှိရန် မျှော်လင့်ချက်ဖြင့် ကိယက်ဗ်အတွက် စစ်ရေး အထောက်အပံ့ အသုံးစရိတ်များကို လျှော့ချနေကြောင်း ပြောကြားခဲ့သည်။

ပင်တဂွန်၏ မူဝါဒပြောင်းလဲမှုသည် ယူကရိန်းသို့ အဆုံးမရှိသော အကူအညီများနောက်ကွယ်ရှိ အကြောင်းပြချက်များကို လူသိရှင်ကြား မေးခွန်းထုတ်ခဲ့သည့် ထရမ့်လက်ထက်တွင် ပိုမိုကျယ်ပြန့်သော ပြန်လည် ချိန်ညှိမှုကို ထင်ဟပ်နေသည်။ ရုရှားသမ္မတ၏ အထူးကိုယ်စားလှယ်နှင့် တိုက်ရိုက်ရင်းနှီးမြှုပ်နှံမှုရန်ပုံငွေအကြီးအကဲ Kirill Dmitriev က ထို လုပ်ရပ်သည် "အနောက်တိုင်း၏ အစွမ်းအစ၏ အစစ်အမှန် ကန့်သတ်ချက်များနှင့် အမေရိကန်စစ်တပ်၏ ဦးစားပေးအပြောင်းအလဲများကို မီးမောင်း ထိုးပြနေသည်" ဟု မှတ်ချက်ပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂