ရှမ်းပြည်နယ်၊ ဖယ်ခုံမြို့နယ်၊ ဖယ်ခုံရှမ်းကျောင်းမှ ပရဟိတ ဆရာတော် ကို “ဒလန်” ဟု စွပ်စွဲကာ ပျားစစ်ကြောင်းအမည်ခံ PDF အကြမ်းဖက် အဖွဲ့ကသတ်ဖြတ်ကြောင်း ဝန်ခံချက်ထုတ်ပြန်ထားကြောင်း သိရသည်။

ပြီးခဲ့သည့် မတ်လ ၄ ရက်၊ ညနေ ၄ နာရီအချိန်ခန့်က ဖယ်ခုံမြို့နယ် ဖယ်ခုံရှမ်းကျောင်း ဆရာတော် ဦးဓမ္မသာရနှင့် အိုက်ပီး တို့ကို PDF အဖွဲ့က ဆိုင်ကယ် (၄) စီးဖြင့် ရောက်ရှိလာကာ သေနတ်ဖြင့် ပစ်ခတ် သတ်ဖြတ်ခဲ့ခြင်းဖြစ်ကြောင်း သိရသည်။

ထို့နောက် ဖယ်ခုံမြို့နယ် ပြည်သူလုံခြုံရေးတပ်ဖွဲ့ - PK Police ဟု ၎င်းတို့ ဘာသာအမည်ပေးထားသော PDF အဖွဲ့၏ ထုတ်ပြန်ချက်တွင် ဆရာတော် အား “ဒလန်” ဟု စွပ်စွဲကာ စစ်ဆေးရန်ခေါ်စဉ် မလိုက်သောကြောင့် စိတ်မထိန်းနိုင်ဖြစ်ကာ ပျားစစ်ကြောင်းဆိုသည့်အကြမ်းဖက် PDF အဖွဲ့မှ သေနတ်ဖြင့် ပစ်ခတ်ခဲ့ခြင်းဖြစ်ကြောင်း ဝန်ခံချက်ထုတ်ပြန်ထားသည်။

ဆရာတော်သည် သက်တော် (၄၈) နှစ် ဝါတော် (၂၈) ဝါရှိ ကျောင်းထိုင် ဆရာတော်တစ်ပါးဖြစ်ပြီး ပရဟိတလုပ်ငန်းများနှင့် စစ်ရှောင်များအား ကူညီနေသည့်အပြင် ရွှေဓမ္မရောင်ခြည် အခမဲ့လူမှုကူညီရေး အသင်းကို လည်း ဖွဲ့စည်းတည်ထောင်ထားသူဖြစ်ကြောင်း သိရသည်။

အလားတူ ပြီးခဲ့သည့် အောက်တိုဘာလကလည်း ဖယ်ခုံမြို့နယ်တွင်းက KNDF ထိန်းချုပ်နယ်မြေဖြစ်သော လအိကျေးရွာအနီးရှိစေတီမှ ဗုဒ္ဓရုပ်ပွားဆင်းတုတော် (၁၆) ဆူအနက် (၈) ဆူတွင် ဦးခေါင်းတော်များ အဖြတ်ခံရသည့်ဖြစ်စဉ်တစ်ခုဖြစ်ပွားခဲ့ဖူးသည်။

ထို့အတူ ၂၀၂၃ ခုနှစ်၊ အောက်တိုဘာလ ၂၃ ရက်ကလည်း ဖယ်ခုံမြို့နယ်၊ မြို့ကုန်းရပ်ကွက်တွင် အမျိုးသား (၂) ဦး ကို PDF အဖွဲ့က သေနတ်ဖြင့် ပစ်ခတ်သတ်ဖြတ်ခဲ့ကြောင်း သိရသည်။

ကိုးကား-NP News

အမေရိကန် သမ္မတ ဒေါ်နယ်ထရမ့်သည် မဟာဗျူဟာရေး အရ ဂျာမနီရှိ အမေရိကန်တပ်များကို ပြန်လည်ရုတ်သိမ်းပြီး ဟန်ဂေရီသို့ ပြောင်းရွှေ့ရန် စဉ်းစားနေကြောင်းThe Daily Telegraph သတင်းစာက ဒေါ်နယ်ထရမ့် အစိုးရနှင့် နီးစပ်သည့် အရင်းအမြစ်များကို ကိုးကား၍ ဖော်ပြထား ပါသည်။

လက်ရှိတွင် ဂျာမနီတွင် အမေရိကန်တပ်ဖွဲ့ ၃၅,၀၀၀ ဦးခန့်  တာဝန်ထမ်း ဆောင်လျက်ရှိသည်။

သမ္မတ ဒေါ်နယ်ထရမ့်က “ဥရောပတိုက်သည် စစ်ပွဲကို ရှေးရှု လိုလားနေကြကြောင်း  ယူဆထားပြီး တဖြည်းဖြည်း မကျေနပ်တော့သည့် အခြေအနေ ရှိလာသည်” ဟု သတင်းစာ၏ အရင်းအမြစ်အရ ဆိုထားပါသည်။

ကိုးကား- TASS

Photo: Report.az

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ မတ် ၈ ရက် နံနက် ၆ နာရီ ၁၀ မိနစ်တွင် တနင်္သာရီတိုင်းဒေသကြီး၊ လောင်းလုံးမြို့နယ်၊ (က)ရပ်ကွက်အတွင်းသို့ PDF အမည်ခံ အကြမ်းဖက်အဖွဲ့က အများပြည်သူထိခိုက်စေရန် ရည်ရွယ်၍ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ  ရပ်ကွက်အတွင်း လက်နက်ကြီးဗုံးသီးများ ကျရောက်ပေါက်ကွဲခဲ့မှုကြောင့် အဆိုပါရပ်ကွက်နေသူများ ဖြစ်ကြသည့် မြို့ဦးထိန်သစ်ဘုန်းကြီးကျောင်းမှ ဆရာတော် ဥူးဝါသဝ(ခ)စိုးကျော်ထွေး(၃၅)နှစ် ၄ ဝါ၊ ဦးမျိုးဦး(၅၃)နှစ်၊ ဒေါ်ထွေးကြည်(၈၉)နှစ်နှင့် မပန်းအိသွယ်(၈)နှစ်တို့တွင် ဗုံးသီးပေါက်ကွဲစ ထိမှန်ဒဏ်ရာများရရှိခဲ့၍ ဆေးကုသနိုင်ရေး ထားဝယ်မြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
 အလားတူ ည ၆ နာရီ ၂၀ မိနစ်တွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးပြည်သူ့ဆေးရုံကြီးသို့ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များ သွားရောက်စစ်ဆေးခဲ့ရာ နွားထိုးကြီးမြို့နယ်၊ ကန်ဦးကျေးရွာသို့ PDF အမည်ခံ အကြမ်းဖက်အဖွဲ့က အများပြည်သူထိခိုက်စေရန် ရည်ရွယ်၍ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ ကျေးရွာအတွင်းသို့ လက်နက်ကြီးဗုံးသီး တစ်လုံး ကျရောက်ပေါက်ကွဲခဲ့မှုကြောင့် အဆိုပါကျေးရွာနေ ဒေါ်အေးဝင်း(၄၃)နှစ်တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
 ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော မြို့၊ ရပ်ကွက်၊ ကျေးရွာအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် သာသနာ့အနွယ်ဝင် သံဃာတော်များ၊ အပြစ်မဲ့ ပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။

Source: www.moha.gov.mm

ရုရှားနိုင်ငံ၊ Kherson ဒေသ၊ Veliky Kopani မြို့ရှိ ဈေးတစ်ခုကို ယူကရိန်းစစ်တပ်မှ HIMARS ဒုံးကျည်ဖြင့် တိုက်ခိုက်ခဲ့ပြီး ပြည်သူများ သေဆုံးဒဏ်ရာရရှိခဲ့ကြောင်း ဒေသဆိုင်ရာ အုပ်ချုပ်ရေးမှူး Vladimir Saldo က ပြောကြားခဲ့သည်။

ယူကရိန်းစစ်တပ်သည် မတ်လ ၉ ရက် တွင် ရုရှားနိုင်ငံ၊ Kherson ဒေသ၊ Veliky Kopani မြို့ရှိ ဈေးတစ်ခုကို HIMARS ဒုံးကျည် နှစ်စင်းဖြင့် တိုက်ခိုက်ခဲ့ပြီး ပြည်သူများ သေဆုံးဒဏ်ရာရရှိခဲ့ကြောင်း ဒေသဆိုင်ရာ အုပ်ချုပ်ရေးမှူး Vladimir Saldo က ပြောကြားခဲ့သည်။ Saldo ၏ အဆိုအရ ဤတိုက်ခိုက်မှုတွင် ပြည်သူများသေဆုံးပြီး များစွာ ဒဏ်ရာ ရရှိ ခဲ့သည်ဟု ဆိုသည်။

Saldo ၏ Telegram ပို့စ်တွင် ဖော်ပြချက်အရ အမေရိကန်မှ ထောက်ပံ့ထားသော M142 HIMARS ဒုံးကျည်များဖြင့် တိုက်ခိုက်ခံရချိန်တွင် ဈေးအတွင်း ပြည်သူများစွာ ရှိနေခဲ့ကြောင်း ဖော်ပြထားသည်။

ဒေသဆိုင်ရာ ကျန်းမာရေးဝန်ကြီး Elena Borchaninova က TASS သတင်းဌာနအား ပြောကြားရာတွင် ဒေသခံ အရေးပေါ် ကျန်းမာရေး ဝန်ဆောင်မှုမှ ဆေးဘက်ဆိုင်ရာဝန်ထမ်းနှင့် ယာဉ်မောင်းတစ်ဦးလည်း ဤတိုက်ခိုက်မှုတွင် ဒဏ်ရာရရှိခဲ့ကြောင်း ဖော်ပြခဲ့သည်။ ဝန်ကြီးဌာန၏ ပြောရေးဆိုခွင့်ရှိသူက ဤတိုက်ခိုက်မှုတွင် ပြည်သူအနည်းဆုံး ခုနစ်ဦး ဒဏ်ရာရရှိခဲ့ပြီး တစ်ဦးမှာဒဏ်ရာဒဏ်ချက်များကြောင့် သေဆုံးခဲ့ကြောင်း ဖော်ပြခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မော်စကို၊ လက်နက်ထိန်းချုပ်ရေး

လက်နက်ထိန်းချုပ်ရေးနှင့်စပ်လျဉ်း၍အမေရိကန်ပြည်ထောင်စုနှင့်ဆွေးနွေးရန် ရုရှားနိုင်ငံက အသင့်ရှိသည်ဟု ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီပက်စကော့က ပြောကြားလိုက်ကြောင်းသိရသည်။

နျူကလီးယားဖျက်သိမ်းရေးနှင့် မဟာဗျူဟာမြောက်တည်ငြိမ်မှုတို့သည် ရုရှားအစိုးရ၏ လုပ်ငန်းစဉ်များအနက် အဓိကကျသည့် ကိစ္စရပ်များဖြစ်ပြီး နျူကလီးယားလက်နက်များအား ထိန်းချုပ်နိုင်ရန်အတွက် ရုရှားနှင့်အမေရိကန်တို့ကြား တွေ့ဆုံဆွေးနွေးရန်  လိုအပ်လျက်ရှိသည်ဟု ပက်စကော့က မတ်လ ၇ ရက်တွင် ကျင်းပသည့် သတင်းစာရှင်းလင်းပွဲ၌ ပြောကြားခြင်းဖြစ်သည်။

ပက်စကော့၏အဆိုပါပြောကြားချက်သည် ကမ္ဘာ့နျူကလီးယားအင်အားကြီးနိုင်ငံများအနေဖြင့် ၎င်းတို့၏လက်နက်များကို ထိန်းချုပ်ကြရန် အမေရိကန်သမ္မတဒေါ်နယ်ထရမ့်က  ၎င်းနိုင်ငံများကို တိုက်တွန်းပြောကြားပြီးနောက်ပိုင်း ထွက်ပေါ်လာခြင်းဖြစ်သည်။

ကမ္ဘာပေါ်ရှိ အင်အားကြီးနိုင်ငံများက၎င်းတို့၏နျူကလီးယားလက်နက်များအားစွန့်လွှတ်မည်ဆိုပါက အလွန်ကောင်းမွန်မည်ဖြစ်သည်ဟု ထရမ့်က အိမ်ဖြူတော်၌မတ်လ ၆ ရက်တွင် တိုက်တွန်းပြောကြားခဲ့ကြောင်းသိရသည်။

လက်ရှိတွင် နျူကလီးယားလက်နက်အများစုကို အမေရိကန်နှင့်ရုရှားနိုင်ငံတို့က ပိုင်ဆိုင်ထားပြီး တရုတ်နိုင်ငံက လာမည့်၄ နှစ် သို့မဟုတ် ၅ နှစ်အတွင်း၌ အဆိုပါအင်အားကြီးနှစ်နိုင်ငံအား အမီလိုက်လာနိုင်ကြောင်း ထရမ့်ကဆက်ပြောသည်။

ထို့ပြင်  နျူကလီးယားလက်နက်များစွန့်လွှတ်ရေးနှင့်စပ်လျဉ်း၍ အမေရိကန်အစိုးရက ရုရှား၊တရုတ်နိုင်ငံတို့နှင့် ဆွေးနွေးမှုများကို စတင်သွားမည်ဟု ထရမ့်ကပြောကြားခဲ့ကြောင်း   သိရသည်။

သို့သော်   လက်နက်ထိန်းချုပ်ရေးဆွေးနွေးပွဲတွင် ရုရှား၊ အမေရိကန်နှင့် တရုတ်နိုင်ငံတို့သာမက ပြင်သစ်နှင့် ဗြိတိန်ကဲ့သို့သော ဥရောပနျူကလီးယားအင်အားကြီးနိုင်ငံများကပါ    ပါဝင်သင့်သည်ဟုပက်စကော့က ထပ်လောင်းပြောကြားထားသည်။

Ref: RT

Source: https://myawady.net.mm/

ထိပ်တန်းဥရောပနိုင်ငံများက ဂါဇာပြန်လည်တည်ဆောက်ရေးအတွက် အီဂျစ်မှရေးဆွဲပြီး အာရပ်များက ထောက်ခံသည့်အစီအစဉ်ကို ထောက်ခံ ကြောင်း ပြောကြားခဲ့သည်။ ထိုအစီအစဉ်သည် ဒေါ်လာ ၅၃ ဘီလီယံ (ပေါင် ၄၁ ဘီလီယံ) ကုန်ကျမည်ဖြစ်ပြီး ပါလက်စတိုင်းလူမျိုးများကို ထို နယ်မြေမှ ရွှေ့ပြောင်းခြင်းမှ ရှောင်ရှားမည်ဖြစ်သည်။

အီဂျစ်မှ ရေးဆွဲပြီး အာရပ်ခေါင်းဆောင်များက ထောက်ခံခဲ့သည့် အဆိုပါ အစီအစဉ်ကို အစ္စရေးနှင့် အမေရိကန်သမ္မတ ဒေါ်နယ်ထရမ့်တို့က ပယ်ချ ခဲ့သည်။ 

စနေနေ့တွင် ပြင်သစ်၊ ဂျာမနီ၊ အီတလီနှင့် ဗြိတိန်နိုင်ငံခြားရေး ဝန်ကြီး များက ဂါဇာကို ငါးနှစ်အတွင်း ပြန်လည်တည်ဆောက်ရန် တောင်းဆိုထားသည့် အဆိုပါအစီအစဉ်ကို "လက်တွေ့ကျသော" အစီအစဉ်အဖြစ် ကြိုဆိုခဲ့သည်။

ထုတ်ပြန်ချက်တွင် ၎င်းတို့က ဤအဆိုပြုချက်သည် ဂါဇာပြည်သူများ၏ “ကြီးမားသော နေထိုင်မှုအခြေအနေများကို လျင်မြန်စွာနှင့် ရေရှည် တည်တံ့စွာ မြှင့်တင်ပေးနိုင်မည်” ဟု ဆိုသည်။

အဆိုပါအစီအစဉ်တွင် ဂါဇာကို လွတ်လပ်သော ကျွမ်းကျင်သူများ ပါဝင်သည့် ကော်မတီမှ ယာယီအုပ်ချုပ်ရန်နှင့် နယ်မြေသို့ နိုင်ငံတကာ ငြိမ်းချမ်းရေးတပ်ဖွဲ့များ စေလွှတ်ရန် တောင်းဆိုထားသည်။

ကော်မတီသည် လူသားချင်းစာနာမှုဆိုင်ရာ အကူအညီများကို ကြီးကြပ်ရန်နှင့် ပါလက်စတိုင်းအာဏာပိုင်များ၏ ကြီးကြပ်မှု အောက်တွင် ဂါဇာ၏ ကိစ္စရပ်များကို ယာယီအုပ်ချုပ်ရန် တာဝန်ရှိမည်ဖြစ်သည်။

ဂါဇာ၏ အားနည်းသော အပစ်အခတ်ရပ်စဲရေးသဘောတူညီချက်သည် မတ်လ ၁ ရက်နေ့တွင် ပထမအဆင့် ခြောက်ပတ်ကုန်ဆုံးပြီးနောက် ပြိုလဲ သွားနိုင်သည်ဟု စိုးရိမ်မှုများ တိုးပွားလာချိန်တွင် အဆိုပါအဆိုပြုချက်ကို ရေးဆွဲခဲ့ခြင်းဖြစ်သည်။

ဥရောပနိုင်ငံလေးနိုင်ငံက စနေနေ့တွင် ထုတ်ပြန်ခဲ့သည့် ထုတ်ပြန်ချက်တွင် ၎င်းတို့သည် "အာရပ်အစီအစဉ်နှင့် ပူးပေါင်းဆောင်ရွက်ရန် ကတိကဝတ်ပြုထားကြောင်း" နှင့် ၎င်းတို့သည် အာရပ်နိုင်ငံများက ဂါဇာကို ဖွံ့ဖြိုးတိုးတက်စေရန်ပေးပို့ခဲ့သည့် လက်တွေ့ကျသော အစီအစဉ်အတွက် ကျေးဇူးတင်ကြောင်းဖော်ပြထားသည်။

ကိုးကား-BBC

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

ယူကရိန်းစစ်တပ်အနေဖြင့် Starlink အင်တာနက်စနစ်အပေါ်တွင် လုံးလုံးလျားလျား အားကိုးမှီခိုနေကြရကြောင်း၊ ထိုစနစ်ကို ပိတ်လိုက်ပါက လက်ရှိယူကရိန်းစစ်တပ်မှာ လုံးဝ ပြိုလဲသွားမည်ဖြစ်ကြောင်း Tesla နှင့် Space X အမှုဆောင်အရာရှိချုပ် အီလွန်မက်က ထုတ်ဖော် ပြောကြားလိုက်ပါသည်။

Starlink သည် ရုရှား-ယူကရိန်းစစ်ပွဲ ဖြစ်ပွားရာ ၂၀၂၂ ခုနှစ်မှစ၍ ယူကရိန်းစစ်တပ်ကို အင်တာနက် ပံ့ပိုးမှု ဆောင်ရွက်ပေးခဲ့ပါသည်။ ထိုအချိန်မှစ၍ Terminal ၄၀,၀၀၀ ကျော်ကို ပေးပို့ခဲ့ပြီး လက်ရှိအခြေအနေတွင် Starlink အင်တာနက်စနစ်မှာ ယူကရိန်းစစ်တပ်အတွက် မရှိမဖြစ် လိုအပ်နေသော အရာတစ်ခုဖြစ်ကြောင်း အီလွန်မက်က ဆိုထား ပါသည်။ 

ယူကရိန်းစစ်တပ်အတွက် စစ်ပွဲဦးဆောင်မှု Commend and Control (C2) စနစ်အတွက် အထူးအရေးပါသော အင်တာနက် အရင်းအမြစ်တစ်ခု ဖြစ်ပြီး အစောပိုင်းက အခမဲ့ပံ့ပိုးခဲ့သော်လည်း နောက်ပိုင်းတွင် အစိုးရအဖွဲ့များ၏ ချေးငွေဖြင့် ဝယ်ယူသုံးစွဲနေကြောင်း သိရှိရပါသည်။

ကိုးကား- RT

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

၂၀၂၅ ခုနှစ်၊ မတ် ၈ ရက် နံနက် ၅ နာရီတွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မန္တလေးတိုင်းဒေသကြီး၊ သာစည်မြို့နယ်၊ ကျွဲတပ်ဆုံကျေးရွာအုပ်စု၊ ကျွဲတပ်ဆုံကျေးရွာအနီး HIGER အမျိုးအစား ခရီးသည်တင်မှန်လုံယာဉ်ကို ရပ်တန့်စစ်ဆေးရှာဖွေရာ ယာဉ်ပေါ်ပါခရီးသည် မနန်းရီ သယ်ဆောင်လာသည့် ကြွပ်ကြွပ်အိတ်အတွင်းမှ စိတ်ကြွရူးသွပ်ဆေးပြား ၁၀,၀၀၀ ပြား (တစ်ပြားလျှင် ငွေ ၁၅၀၀ ကျပ်နှုန်းဖြင့် ၎င်းဒေသတန်ဖိုးငွေ ၁၅၀ သိန်း) အား သိမ်းဆည်းရမိခဲ့သဖြင့် မနန်းရီ(၆၀)နှစ်အားလည်းကောင်း။
အလားတူ မတ် ၇ ရက် ညနေ ၃ နာရီ ၁၅ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ ရှမ်းပြည်နယ်၊ ကွန်ဟိန်းမြို့နယ်၊ ကာလိမြို့၊ ရပ်ကွက်(၅)ရှိ မအီစိန်၏နေအိမ်အား ရှာဖွေရာ နေအိမ်အိပ်ခန်းထဲရှိ သံသေတ္တာအတွင်းမှ စိတ်ကြွရူးသွပ်ဆေးပြား ၆၄,၁၀၀ ပြား(တစ်ပြားလျှင် ငွေ ၅၀၀ ကျပ်နှုန်းဖြင့် ၎င်းဒေသတန်ဖိုးငွေ ၃၂၀ ဒသမ ၅ သိန်း) သိမ်းဆည်းရမိခဲ့သဖြင့် မအီစိန်(၅၇)နှစ်အားလည်းကောင်း။အလားတူ မတ် ၇ ရက် နံနက် ၉ နာရီ ၃၀ မိနစ်တွင် လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့သည် ရှမ်းပြည်နယ်၊ တာချီလိတ်မြို့နယ်၊ မိုင်းဖုံး(ခ)ကျေးရွာအုပ်စု၊ ပါခုတ်ကျေးရွာအနီးတွင် သက်နိုင်ဝင်း(ခ)ကိုသက် မောင်းနှင်လာသည့် HONDA INSIGHT အမျိုးအစား မော်တော်ယာဉ်ကို ရပ်တန့်စစ်ဆေးရှာဖွေရာ ယာဉ်ပေါ်မှ စိတ်ကြွရူးသွပ်ဆေးပြား ၂၄,၀၀၀ ပြား (တစ်ပြားလျှင် ငွေ ၇၀၀ ကျပ်နှုန်းဖြင့် ၎င်းဒေသတန်ဖိုးငွေ ၁၆၈ သိန်း) အား သိမ်းဆည်းရမိခဲ့သဖြင့် သက်နိုင်ဝင်း(ခ)ကိုသက် (၃၈)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အသီးသီးအရေးယူထားကြောင်း သတင်းရရှိပါသည်။

Source: www.moha.gov.mm

တရုတ်၊ ရုရှားနှင့် အီရန် ရေတပ်တို့သည် Security Belt-2025 စစ်ရေးလေ့ကျင့်မှုကို ၂၀၂၅ ခုနှစ်၊ မတ်လအတွင်း အီရန်နိုင်ငံ၏ ပင်လယ်ထဲတွင် ပြုလုပ်မည်ဖြစ်ကြောင်း တရုတ်နိုင်ငံ ကာကွယ်ရေးဝန်ကြီးဌာန၏ WeChat စာမျက်နှာတွင် ထုတ်ပြန်ထားပါသည်။

“မတ်လအစောပိုင်း သို့မဟုတ် မတ်လလယ်ပိုင်းတွင် တရုတ်၊ အီရန်နှင့် ရုရှား ရေတပ်များသည် Security Belt-2025 စစ်ရေးလေ့ကျင့်မှုကို ပြုလုပ်မည်။

အဆိုပါ လေ့ကျင့်မှုများကို အီရန်နိုင်ငံ Chabahar ဆိပ်ကမ်းအနီးရှိ ပင်လယ်ပြင်တွင် ပြုလုပ်မည်” ဟု ထုတ်ပြန်ချက်တွင် ဖော်ပြထားသည်။

ကိုးကား- TASS

Photo: Global Times

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဆက်စပ်သတင်း ဖတ်ရှုရန်- https://myawady.net.mm/node/66017

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင် အကြမ်းဖက်သမားများက ဓား၊ သေနတ်များအသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ မတ် ၉ ရက် နံနက် ၈ နာရီ ၃၀ မိနစ်တွင် ပဲခူးတိုင်းဒေသကြီး၊ မင်းလှမြို့နယ်၊ ဗိုလ်တစ်ထောင်ကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးထွန်းထွန်းနိုင်(၅၀)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား နှစ်ဦး(စိစစ်ဆဲ)က ဆိုင်ကယ် တစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
 အလားတူ နံနက် ၈ နာရီ ၄၅ မိနစ်တွင် မကွေးတိုင်းဒေသကြီး၊ ပွင့်ဖြူမြို့နယ်၊ အင်းကုန်းကျေးရွာအနီး၌ သေနတ်ဖြင့် ပစ်ခတ်ခံရ၍ အမျိုးသား သုံးဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ပွင့်ဖြူမြို့နယ်၊ ထူးပေါက်ကျေးရွာနေ ဦးမြင့်ကို(၄၀)နှစ်၊ ဦးဇော်လင်းဦး(၄၅)နှစ်နှင့် အင်းကုန်းကျေးရွာနေ ဦးဟိန်းထွန်းဝင်း(၂၇)နှစ်တို့သည် ၎င်းတို့၏ နေအိမ်အသီးသီး၌ ရှိနေစဉ် PDF အမည်ခံ အကြမ်းဖက်အဖွဲ့ အင်အား ၅၀ ဦးခန့် ရောက်ရှိလာပြီး အင်းကုန်းကျေးရွာအနီးရှိ ဒေသအခေါ် အနောက်ရေကျော်ပေါက်သို့ ဖမ်းဆီးခေါ်ဆောင်၍ သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတို့သုံးဦးတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
အလားတူ မွန်းလွဲ ၁ နာရီတွင် ပဲခူးတိုင်းဒေသကြီး၊ မင်းလှမြို့နယ်၊ နတ်ထမင်းကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးသက်နိုင်စိုး(ခ)ကိုငယ်လေး(၅၅)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား နှစ်ဦး(စိစစ်ဆဲ)က ဆိုင်ကယ် တစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။

 အလားတူ ညနေ ၅ နာရီ ၁၅ မိနစ်တွင် ပဲခူးတိုင်းဒေသကြီး၊ ညောင်လေးပင်မြို့နယ်၊ အလုပ်စုကျေးရွာအနီး၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ညောင်လေးပင်မြို့နယ်၊ ဂျောင်းတာကျေးရွာနေ ရာအိမ်မှူး ဦးအောင်မျိုး(၄၇)နှစ်သည် အလုပ်စုကျေးရွာမှ ဂျောင်းတာကျေးရွာသို့ ပြန်လာစဉ် အလုပ်စုကျေးရွာ၏အနောက်ဘက် ၃ ဖာလုံခန့်အကွာရှိ နဘူးဘုရားအနီးအရောက်၌ KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမားများ ပူးပေါင်းအဖွဲ့ အင်အား(စိစစ်ဆဲ)က သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
  ထိုသို့ အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm