အိန္ဒိယနိုင်ငံ မြောက်ပိုင်း အက်တာပရာဒေ့ရှ် ပြည်နယ်တွင် ဘရာမို အသံ ထက်မြန်သော ခရုဇ်ဒုံးကျည် ထုတ်လုပ်ရေးစက်ရုံကို ဖွင့်လှစ်လိုက်ပြီဖြစ်ကြောင်း အိန္ဒိယကာကွယ်ရေးဝန်ကြီးဌာန တာဝန်ရှိသူများက ပြောကြား ခဲ့ပါသည်။ ကာကွယ်ရေးဝန်ကြီး ရာဇနတ်သ်ဆင်းဂ်က ဖွင့်လှစ်လိုက်သည့် အဆိုပါစက်ရုံသည် အကွာအဝေး ၂၉၀ - ၄၀၀ ကီလိုမီတာနှင့် အမြန်နှုန်း မက်ချ် ၂.၈ အထိရှိသည့် ကမ္ဘာ့အမြန်ဆုံး အသံထက်မြန်သော ခရုဇ် ဒုံးကျည်များ ထုတ်လုပ်မည်ဖြစ်ကြောင်း ပြောကြားခဲ့ပါသည်၊၊

ရုရှားအာကာသအေဂျင်စီ Roscosmos ၏ ထုတ်ပြန်ချက်အရ ၁၉၇၂ ခုနှစ်က ဆိုဗီယက်တို့လွှတ်တင်ခဲ့သော အာကာသယာဉ်တစ်စင်း အိန္ဒိယ သမုဒ္ဒရာထဲသို့ ကျဆင်းဝင်ရောက်ခဲ့သည်။ အဆိုပါ အာကာသယာဉ်သည် သောကြာဂြိုဟ်ဆိုင်ရာ မစ်ရှင်မအောင်မြင်ခဲ့ဘဲ ကမ္ဘာပတ်လမ်းထဲတွင် ဆယ်စုနှစ် ၅ ခုကျော် ရှိနေခဲ့သော Kosmos 482 စမ်းသပ်ယာဉ် ဖြစ်သည်။

ရုရှားသမ္မတ ဗလာဒီမာ ပူတင်က နာဇီဂျာမနီကို ဆိုဗီယက်ယူနီယံ အောင်နိုင်မှု၏ ၈၀နှစ်ပြည့် အထိမ်းအမှတ် Victory Day ချီတက်ပွဲအတွက် မော်စကိုမြို့သို့လာရောက်ကြသည့် နိုင်ငံတကာခေါင်းဆောင်များအား ခြိမ်းခြောက်ရန် ယူကရိန်းအစိုးရက ကြိုးပမ်းခဲ့သည်ဟု စွပ်စွဲခဲ့သည်။

မြောက်ကိုရီးယားက တာတိုပစ်နှင့် တာဝေးပစ်ပဲ့ထိန်းဒုံး ပူးတွဲပစ်ခတ် လေ့ကျင့်မှုတစ်ရပ်ကို မေလ ၈ ရက်နေ့တွင် လုပ်ဆောင်ခဲ့ပြီး ခေါင်းဆောင် ကင်ဂျုံအန်က ကြီးကြပ်ဆောင်ရွက်ခဲ့ကြောင်း အာဏာရအလုပ်သမားပါတီ၏ သတင်းစာတွင် ရေးသားဖော်ပြခဲ့ပါသည်။